Osee 4:15 - La Sainte Bible en Langue Yipunu

¹⁵ Aa Israel, pa gukevega uvaganga bumbembu, Juda ayakota muna! Duyawenda o Guilgal nesi o Beth-Aven na duyaleva rie: Fumu ejabi.

Osee 4:15 Iomraidhean Croise

2 Misamu 17:4

Amawamusu na Nsambi taji andi na amakipanga maruma mandi, asamagukulila baIsrael.

2 Misamu 21:11

Joram amarungisa nesi mbura tsiduyitsu tsibansambi bangana o mikongu miJuda; amarombisa bisi Jerusalem na baJuda uliyila tindi Nsambi nsima.

Esaie 48:1

Jenu bisi ndagu Jacob, guluanu; jenu aduinengulungu na diina diIsrael na adumapalila o Juda. Duilevi pesi na diina diFumu na duisambili Nsambi Israel tumba tsiri na ngensa na dusungugu!

Jeremie 44:26

Jenu baJuda botsu aduitsani o Egypte guluanu mambu maFumu! Fumu amavosa rie: Guluanu, nyilevi pesi na diina diami dineni rie: Diina diami digomueyitsu na baJuda ne umosi. O bulongu buotsu buEgypte ne mutu mosi agomueleva pesi rie: Fumu aguvu Fumu ejabi!

Jeremie 5:2

Ne pa belevi pesi rie: Fumuejabi! kulini belevi pesi.

Ezekiel 20:39

Jenu baIsrael, menu aguvu Fumu Nsambi nyivosi rie: Wendanu, mutu mutu uyeyitsa kosi andi! Tumba va julu vana dukulu na dugomuelensa diina diami adivu yingitsi ava duivagulili bakosi benu pagu.

Osee 10:5

Bisi Samarie boyitsa muana ngombi ulora o Beth-Aven. Batu na bavagulitsi bapagu bandi boduara yifuila. Bogamuganga ava bundumba bu-uonyi butsiemuyila va gari ogu.

Osee 10:8

Mbura tsiduyitsu atsi baIsrael bamavayilanga masumu tsimabungu; matsiendi na kengitsi biubenda va binyensulu biogu bipagu. Botsingula mikongu rie: Tukubiyianu! Tuvikianu!

Osee 12:1

Efraim emfuringi na baIsrael bendunsingi; Juda avu uNsambi na avu usigama uNsambi.

Osee 12:11

Nyimavosa na babiyitsi na nyimafunisa biriariamu, nyimasalisa babiyitsi ubuaga banongu.

Osee 12:12

Pa vavu mabi o Galaad, dingensa abemavayi bobungu; pa bevaguli bangombi pagu tsiunyensa o Guilgal, binyensulu biogu bipagu biuba yika mamanyi na mamanyi o nungi tsiogu.

Osee 4:12

Batu bami besambili bakosi bamuiri, dupangu duogu duibabiyili; nsala bumbembu jibapembusi nsila. Bevayingi bumbembu te na bamakakana na Nsambi ogu.

Osee 5:8

Siganu mumbanda o Guibea, siganu mumbanda o Ramal Gamuganu migamu o Beth-Aven! Aa Benjamin, bavinitsi bagu bavu o nsima agu.

Osee 9:15

Fumu evosi rie: Mbivulu tsiogu tsiotsu tsilabini o Guilgal. Avana nyimabavinina. Mu diambu dibifu biogu nyubabingila o Ndagu ami. Ngomuebarondanga.

Amos 4:4

BaIsrael, wendanu o Bethel, yevagaqu masumu. Wendanu o Guilgal, yeviosulilanu bumbini buenu. Yevagulanga pagu tsienu kedi tsiotsu na yimosi yienu mu digumi kumbu beji mutsona.

Amos 5:5

Duyatomba o Bethel, duyawenda o mbura jiduyitsu jiGuilgal, duyalinga o mbura jiduyitsu jiBercheba. Mu mbari bisi Guilgal bebegu bakoli na o Bethel, Ndagu Nsambi jiusielusunu.

Amos 6:10

Ava tindi yiburu oruyila uyetsiga mfumbi owivula aguvu o gari ndagu rie: Guki na mutu guna? Ususu owaka rie: Vola nduku! Ajiji tsiri temu utubula diina diFumu!

Amos 8:14

jogu abamaleva pesi na bansambi bangana baSamarie rie: Aa Dan, nsambi agu abi nsambi! Nsila Bercheba jibi mutubu! Botsu bana boberuga te na bagomuesimbuga.

Ephesiens 5:11

Duyabambana na batu abevayi mambu makulini o tsi pisama jimasumu tumba matubulianu.

Josue 5:9

Fumu amatsingula Josue rie: Namunyi nyimadugusulila yisonyi yiEgypte. La dibandu mbura eni jimalugulu Guilgal te na namunyi.

Josue 7:2

Ava Josue amabila o Jericho amasindiga babaala o Ai, aguvu bebeli na Bet-Aven o yiari ayi wisi epalili yiBethel. Amabaruma rie: Wendanu, yesieenganu bulongu. Babaala beni bamawenda na bamayesieenga Ai.