Ado Jechu judi jënȩ chjadüpea̧ pio ji̧ri̧ ji̧dë u̧i̧ yo̧a̧ oaiä, jabechji̧ pio yoa ma̧ȩbo a̧de yo̧rëremȩdejȩrȩ: —Ado danȩrȩ, mȩnȩro̧ eami̧ bë ma̧ri̧räpȩ go̧düdäräa̧rä, jabechji̧ dibë a̧dotämi̧ cjiaji̧ri̧ pio ji̧ri̧ ja̧ bëräpȩ cjiadiächji̧vä ano̧ mire cjo̧ro̧rea̧ decjiari̧ —yo̧a̧dejȩrȩ—. Jabechji̧ pio ju̧ri̧pȩ cjiadiächji̧vä mȩnȩro̧ pio jiro bë ma̧ri̧ri pio judiri a̧dë baäa̧rä yuro. Ado judiro̧ dibë yürüa̧ jurarea̧ pio ju̧i̧, jabechji̧ jurachji̧jo̧ȩ. Jabechji̧ pio ji̧ri̧iäpȩmo̧ a̧ra̧ano̧a̧ ba oa, chjadëri̧ ëba jurapea̧ chiadiro̧dibe.
Techaronichȩche Ma̧ȩ 5:12 - Biblia Pume12 Danȩrȩ ca̧ oti̧, ba chia datä earea̧ro̧dibe dibëa̧ chjarerä ja̧bepaji̧ri̧ pio ji̧ri̧, tjamo̧ jidaji̧ri̧ pio ji̧ri̧. Jabechji̧ Ano̧mȩ pio judi tänȩa̧ oa ja̧bepadirȩ dibë chjadëri̧ jidapea̧ oa, dibë chi̧dëeapea̧ oa. Jabechji̧ pio ji̧ri̧ ja̧ chja̧oerä cjiaji̧ri̧ oa yabo ëba baämi̧ dari̧ japadiro̧dibe, tjamo̧ yo̧ji̧ri̧mi̧ dari̧ ja̧bepaji̧ri̧rȩ. Faic an caibideil |
Techaronichȩche Ma̧ȩ 5:12
42 Iomraidhean Croise
Danȩrȩ ca̧ jadü, jurarea̧mi̧ da pio ji̧ri̧ mitëpea̧ oa chjadüa̧requededibe. O judiro̧ ponȩmi̧ dari̧ ja̧bepea̧ duriräpȩ ju̧ri̧ ja̧bepapea̧ oa chjadüa̧requededibe pio jiro pumȩ pio ji̧ri̧ mitëpea̧ oa. Jabechji̧ pio judiro̧ järätäa̧rä ja̧ oa mitërea̧ dapanȩrȩ —yo̧mȩrȩ ni̧bä chjaorëremȩdejȩrȩ Jechu judi jurarea̧mi̧ daji̧ri̧ pio ji̧ri̧ chjiari.
Ado pio ju̧i̧iä yo̧requededibe yaba̧ ca̧ oti̧. Jabechji̧ mȩnȩro̧ pio coaiä dabapea̧ pio ju̧i̧ jo̧rȩtaji̧ri̧rȩ cjo̧ro̧chji̧vä. Na̧e chiachji̧vä. Chjadëri̧ jidachji̧vä dibëa̧ chji̧ oa mȩnȩro̧ u̧i̧pea̧ oa cjiadiächea oa, oëra̧diächea oa. Peaja̧di chjadëri̧ jidatäreji̧ri̧nȩrȩ ovejami̧ da pio ji̧ri̧, oveja oa jidamȩrȩ japarëmi̧ cjiari̧. Jabechji̧ Tjo tjamo̧ pio judi mitëa̧ oa tjamo̧ jidaji̧ri̧pea̧nȩrȩ. Ja̧di tara chjadëri̧ jidatäreji̧ri̧nȩrȩ Ütë tjamo̧ ja̧ a̧doparea̧ pio ju̧i̧, Joja ja̧ goera̧ gatërërea̧ pio ju̧i̧, jibëa̧pe baga̧ pio ju̧i̧ —yo̧a̧dejȩrȩ—.
Ado danȩrȩ, cüdë ja̧di dari̧ ja̧bepea̧ oaiä, jabechji̧ chjadëri̧ na̧rȩrëremȩrequededibe cjäri̧ ja̧bomȩ pio ju̧i̧ ëba jurapea̧ pio ju̧i̧ chjiari. Jabechji̧ Jechurë yo̧rërea̧ ma̧ȩ pio ju̧i̧ chjadëri̧ jo̧rȩtatäreji̧ri̧rea̧ro̧jo̧ȩ, ja̧di ta̧rëri̧ baämȩ ma̧ȩ oa: “Aja̧, o ji̧ri̧iäpȩmo̧ badëri̧ yürüa̧ üdë goae tjamo̧de. Jabechji̧ o ji̧ri̧iä badëri̧ mitëa̧ pio ju̧i̧ u̧i̧ goaede." Aja̧, ja̧di ta̧rëri̧ yo̧rëremȩde Ano̧mȩ Jechu judi o ji̧ri̧iäpȩmo̧ yürüpea̧ pio ju̧i̧ chjiari. Peaja̧di dari̧ na̧rȩrëremȩrequededibe ca̧ oti̧ —yo̧mȩrȩ ni̧bä chjaorëremȩdejȩrȩ Pablo judi Epjechoräpȩ tjamo̧ jidaji̧ri̧ pio ji̧ri̧iäpȩmo̧.
Ado Tiripjena pio ji̧, Tiripjocha pio ji̧ jearea̧ chjadürequedejȩrȩ peaja̧di. Tjamo̧ davä. Cjäri̧ri̧ cjia jo̧rȩtarequede pio jiro ivibo. Danȩrȩ, ibëa̧ Ano̧mȩ ja̧ oa ja̧bepani̧rȩ. Ado Peride pio ji̧bo cjäri̧ri̧ cjia jo̧rȩtamȩrȩ jearea̧ chjadürequedejȩ. Ea tjamo̧rea̧ro̧jȩ. Peaja̧di ana̧ tjamo̧ri̧ ja̧beparëreyi̧nȩ ibëa̧ Ano̧mȩ ja̧ oa.
Ado pio ju̧i̧iä Ütë tjamo̧ judi ütarë jo̧rȩtarëremȩrȩ tjaoëti̧ chia ja̧beparea̧ oa yürürëremȩde Quiricho pio ju̧i̧ ja̧ a̧doparea̧ ja̧ oa, quëna̧ji̧ri̧ pio judiro̧ jibëa̧ dëbëti̧ra̧ chia chjadëri̧ ju chiaparȩpea̧ oa. Ado pio ju̧i̧iä jabechji̧ mitërëremȩdejȩrȩ Jechurë chjadüa̧ pio ji̧ri̧. Tjamo̧ davä. Pio ji̧ri̧ yabochja mitërëremȩdejȩrȩ jibëa̧ ja̧beparea̧ oa yürüpea̧ oa. Ado pio ji̧ri̧ mitë ëte, Ütërë ea jana̧ chjadüa̧ oa ni̧bäji̧ri̧ pio ji̧ri̧ a̧de mitërëremȩdejȩrȩ. Ado pio ji̧ri̧ mitë ëte, a̧de mitërëremȩdejȩrȩ a̧ra̧ano̧ji̧ri̧ pio ji̧ri̧. Ado pio ji̧ri̧ mitë ëte, a̧de mitërëremȩdejȩrȩ jauëchja cjiari̧ na̧rȩji̧ri̧ pio ji̧ri̧. Ado pio ji̧ri̧ mitë ëte, chjaparȩji̧ri̧ pio ji̧ri̧ a̧de mitërëremȩdejȩrȩ. A̧do pio ji̧ri̧ mitë ëte, o ji̧ri̧iäpȩmo̧ cjäri̧ cjia jo̧rȩtaji̧ri̧ pio ji̧ri̧ a̧de mitërëremȩdejȩrȩ o ji̧ri̧ chjadëri̧ a̧dopea̧ oa. Ado pio ji̧ri̧ mitë ëte, tjamo̧ yo̧ji̧ri̧ pio ji̧ri̧ a̧de mitërëremȩdejȩrȩ o ji̧ri̧ ja̧ yabo ëba tai̧ji̧ri̧mi̧ dari̧ ja̧bepapea̧ oa. Ado pio ji̧ri̧ mitë ëte, tjaoë ma̧ȩ oa ni̧bärea̧ chiaji̧ri̧ pio ji̧ri̧ a̧de mitërëremȩdejȩrȩ, jënȩro̧ dabapadëa̧ ma̧ȩ oa ni̧bäji̧ri̧ pio ji̧ri̧. Aja̧ ca̧ oti̧, tjaoëti̧ chia ja̧beparea̧ oa chiapea̧ maea oa Ütë tjamo̧ judi mitërëremȩdejȩrȩ quëna̧ji̧ri̧ ütëbodärä oa, jibëa̧ ja̧beparea̧ oa chjadëri̧ yürüpea̧ oa.
Jaboti̧ri̧ mitërëremȩdique Ütë tjamo̧ judi. Jabechji̧ a̧dë chjäte cjäri̧ri̧ cjia damȩrȩ mitërëremȩdique Jechurë chjadüa̧ oa ja̧bepapea̧ oa. Ado pio coa mitëa̧rä, ma̧diä tänȩdëa̧reconȩ jabo pio ju̧i̧ ja̧ oa ana̧ tjamo̧ri̧ ja̧beparëremȩrequede ji̧dëri̧. Jabechji̧ Jechurë chjadüa̧ pio judiro̧ ana̧ri̧ ja̧bepea̧räbo, jabechji̧ pio ji̧ri̧iä ji̧dë u̧i̧ ana̧ri̧ ja̧beparëremȩrequede. Jabo cjäri̧ marequede jabo. Ca̧ea̧ ma̧na̧ri̧ ja̧bepadëa̧requede. Ca̧ ju chiarea̧ra̧ pio ju̧ri̧ra̧ ja̧bepadëa̧requede jabo Ütë tjamo̧ pio judiri ma̧na̧mȩ ju chiarea̧ra̧ pio ju̧ri̧ra̧ ja̧beparëremȩrequede.
Jabechji̧ Ütë tjamo̧ pio ju̧i̧ nö̧ta ja̧bepaji̧ri̧rȩ a̧ra̧ano̧rea̧rȩ pio ju̧i̧ ja̧ jadümi̧ darë. Ado mȩnȩro̧, jabechji̧ Ütë tjamo̧ ja̧ tjadümi̧ danȩrȩ. Ado a̧ro̧rȩ pio ju̧i̧ nö̧ta ja̧bepaji̧ri̧rȩ a̧ra̧ano̧rea̧ro̧dibe tjado ja̧bepaji̧ri̧mi̧ darë. Ado peaja̧di Ütë tjamo̧ ja̧ bëmi̧ danȩrȩ. Ado pio ju̧i̧ nö̧ta ja̧bepaji̧ri̧rȩ bë cji̧däji̧ri̧mi̧ darë a̧ra̧ano̧rea̧ro̧dibe. Ado pio ju̧i̧iä yo̧requededibe ca̧ oti̧. Aro̧rȩ Ütë tjamo̧ pio judi yürüa̧ oa jadü maearë ja̧bepa tara, jabechji̧ oëra̧ jo̧rȩtadëtäreji̧ri̧nȩrȩ pio ibë chjiari. ‘Aja̧, pio jiro a̧ra̧ano̧mȩ judi o pio ji̧ri̧iä ji̧dë u̧i̧ ba chia jirodida, pio ju̧i̧mo̧i̧ cho̧rëdiäpacuni̧da’ quëna̧ jo̧rȩtadë matäreji̧ri̧renȩro̧ibe.
Ado danȩrȩ, judiro̧ Quiricho pio ju̧i̧ chjiari goaeri̧ ni̧bärä, “Aja̧, Quiricho pio ju̧i̧ ja̧ oa chjadëri̧ ja̧beparea̧rȩ” yo̧vedirȩ. Jabo danȩrȩ ca̧ oti̧, judiro̧ Quiricho ja̧ oa ja̧bepea̧ pio ju̧i̧iä ji̧dë u̧i̧ goae tarari̧ ja̧bepamȩrequede. Tjamo̧ davä. Judiro̧ ja̧bepea̧ pio ju̧i̧ u̧i̧ ana̧ri̧ ja̧beparëremȩrequede pio ju̧i̧ ja̧ ma̧ȩrä. Ado dabarequede ca̧ oti̧. Jabechji̧ cüdë ja̧di ta̧rëri̧ ni̧bä chjaoa̧ oaiä, pio coa chjiari goaeri̧ ni̧bä chjaoa̧ oaiä, cüdë ja̧bepea̧ pio ju̧i̧ chjiari chjacjiamȩri̧ ni̧bä chjaoa̧ oaiä, jabechji̧ cjarari̧ cjiape baga̧mȩmi̧ dari̧ ni̧bärequededibe ca̧ oti̧. Jabo jabechji̧de jabo. Mȩnȩro̧ pio coabo ba chia dapea̧ oa, mȩnȩro̧ pio ji̧ri̧iäpȩmo̧ ba chia dami̧ dari̧ dapea̧ oa, jabechji̧ pio judiro̧ goaeri̧ ni̧bämi̧ dari̧ ni̧bäparequededibe peaja̧di. Danȩrȩ, Quiricho pio ju̧i̧ ja̧ ma̧ȩ oa ji̧dë u̧i̧ ana̧ tjamo̧ri̧ ja̧beparëremȩrequede pio jiro pumȩ pio ji̧ri̧iä. Dami̧ti̧ chjai̧dë oa chjätärëremȩrequede pio ju̧i̧ ja̧ oa ja̧bepamȩrȩ. Pio ji̧ri̧iä ji̧dë u̧i̧ ji̧ra̧ri̧ chaäa̧ oa cjiarëremȩrequede cja̧rȩmȩ coi̧mo̧dë. Ado pio ji̧ri̧ u̧i̧ bide cjaeäa̧ oa cjiarëremȩrequede peaja̧di. Tjamo̧ davä. Bide cjaeäji̧ri̧ judiro̧ biderea̧ ca̧i̧ra̧ pio ju̧ri̧ra̧ ji̧ra̧ co bide cjaeärëreji̧ri̧diro̧coe. Jabomo̧ cja̧rȩmȩ coi̧mo̧i̧ bidedëa̧diro̧coe jabo ji̧ra̧ co bidea̧diro̧coe. Jabechji̧ ca̧ oti̧, dami̧ti̧ chjai̧dë oa chjätärëreji̧ri̧rea̧rȩ Quiricho pio ju̧i̧ ja̧ oa ja̧bepea̧ oaiä. Jabechji̧ ji̧ra co ja̧bo tänȩrea̧ jo̧rȩtatea̧diro̧coe. Ado pio ju̧i̧iä tjamo̧ri̧ ja̧boparämi̧ cjiarëremȩrequede. Tjamo̧ davä. Uapai̧ da tjamo̧ri̧ chjätäa̧ oaiä, ‘Aja̧, tjamo̧ri̧ ja̧bopaquëda yaba̧, bucho ana̧ ja̧boa̧mi̧ ja̧bopaquëda’ quëna̧ jo̧rȩte chjaorëremȩrequede ji̧ra̧ co.
Jabechji̧ a̧ro̧rȩ pio yoa chirirä jabë cjo̧ro̧a̧ nö̧ta, ji̧dë ma ma̧ chiadëri̧ cjiaparȩtämi̧ cjiarea̧ro̧jo̧ȩ ibëa̧ Ano̧mȩ pio ju̧i̧. Ado a̧ro̧rȩ a̧dëräpȩ ano̧ mire cjo̧ro̧ji̧ri̧pea̧rä, peaja̧di dari̧ jo̧rȩtaparea̧rȩ. Jabechji̧ pio ju̧i̧iäpȩmo̧ ji̧dë ma ma̧ chiadëri̧ cjiaparȩpea̧ pio jiro jo̧rȩtarea̧ üdë tjamo̧ri̧ chade ibëa̧ chji̧rä.
Tjamo̧ davä ca̧ pumȩ. Ütë tjamo̧ pio judi jachidai̧parȩrea̧ ma̧ȩ pio ju̧i̧ a̧ra̧ano̧ tänȩrëremȩdiibe. Ado pio ju̧i̧iä Ütë tjamo̧ pio ju̧i̧ ja̧ jadümi̧ dari̧ ja̧beparea̧rȩ. Ado pio ju̧i̧ ja̧ jädümi̧ dari̧ ja̧bepa tara, jabechji̧ yo̧tarea̧ro̧dibe ütëbo oa mȩnȩro̧ jiadachea oa, Ütë tjamo̧ judi pio dibëiäpȩmo̧ cjäri̧ri̧ cjia da̧ pio ju̧i̧ putu jura̧ a̧dë chami̧ dari̧ jiadachea oa.
Aja̧, arë dariämi̧ dari̧ cjo̧ro̧chji̧vä bucho ana̧ cjo̧ro̧rea̧ yürümȩ ma̧ȩ pio ju̧i̧ a̧ra̧ano̧ji̧ri̧rȩ. Ado mȩnȩro̧ ja̧di dari̧ cjo̧ro̧rä judi, jabechji̧ ma̧ chiadëri̧ cjia tjamo̧mȩrȩ cjiadiäparequede Quiricho pio judi jana̧ doro. 'Aja̧, badëri̧ cjiadiädëa̧dida, cüdë pio ji̧ri̧ chjiari goae tarari̧ ja̧bepea̧ üdë badëri̧ cjiadiädëa̧dida, jabo dae järea̧mi̧ dari̧ cjiadiäa̧dida' quëna̧ jo̧rȩtamȩrȩ ma̧ chiadëri̧ cjiaparequede pio jiro doro.
Ado danȩrȩ ca̧ oti̧, ¿jo̧rȩtadënȩrȩ? A̧ro̧rȩ dibëa̧ chjarerä ana̧ri̧ ja̧beparërea̧ ji̧ ¿jo̧rȩtadënȩrȩ? Doromo̧dë oa jabo gȩrȩräbo ja̧bepe cjiarëreji̧ri̧rea̧rȩ ibëa̧ chëre oa boapea̧ oa. Jabechji̧ pio dibëiä cjo̧dëtärea̧ ji̧, cjäri̧ marea̧rȩ, ibëa̧ oa ja̧beparëreji̧ri̧rea̧rȩ ibëa̧ jurarea̧ oa gatëpea̧ oa. Tjamo̧ davä. A̧ro̧rȩ Ütë ja̧ ma̧ȩ chjadëi̧ oa a̧ra̧ano̧rërea̧ ji̧, ja̧di da maeari̧ ja̧bepe cjiarëreji̧ri̧rea̧rȩ pio dibëiä cjo̧dëchea oa.
Ado yo̧tarea̧ro̧dibe ibëa̧ oti̧. Jabechji̧ to̧bari̧ chi̧dëeajȩrȩ ja̧bepadëri̧ cjiaji̧ri̧ pio ji̧ri̧. Aja̧, judiro̧ chumi̧dëri̧ cjiachea oa, to̧bari̧ chi̧dëeajȩrȩ. Ado järidëpea̧ pio ji̧ri̧bo chjadëri̧ a̧dochji̧jȩrȩ. Ado oëra̧diäpai̧ daji̧ri̧ pio ji̧ri̧bo chjadëri̧ a̧dochji̧jȩrȩ. Jabechji̧ ma̧ chjua jo̧rȩtaji̧ri̧rȩ da machji̧jȩrȩ pumȩ ütëbodärä oa, bücjüri̧ cjiaji̧ri̧rȩ.
Ado cja̧rȩmo̧ jo̧rȩtarea̧ ma̧ȩra̧ jo̧rȩta tänȩtämi̧ cjiarequedemȩ peaja̧di. Danȩ, tjado ana̧mȩ judi, to̧bari̧ ja̧bepamȩ pio judi, jabechji̧ o ji̧ri̧ ja̧ yaboi̧ mitërea̧ dapade joechjapea̧mȩ jurarea̧ pio ju̧i̧. Ado peaja̧dimi̧ dari̧ ja̧bepatäremȩrenȩ ibëa̧ Ano̧mȩ ja̧ oa. Aja̧, to̧bari̧ cjiami̧ dari̧ ja̧bepatäremȩrenȩ. Ado mȩnȩ ja̧di dari̧ ja̧bepea̧ oaiä, peaja̧di chjadëri̧ ba ano̧a̧ oa cjiaparenȩ.
Jabechji̧ Ütërë ütara̧ doro bucho ana̧ cjo̧ro̧rea̧ pio ju̧i̧ chjiari dabarea̧ yürürëremȩdiibe ma̧ȩ chjadëi̧ pio ju̧i̧iä. Ado pio jiro ma̧ȩ oa yürürëremȩdique cüdë to̧bari̧ ni̧bä chjaopea̧ oa. Tjamo̧ davä. Pio ibë Chjätä Tänȩmȩ Ütë pio judi yürüa̧ oa goami̧ dari̧ goareconȩ yaba̧ pio jiro ma̧ȩ oa o ji̧ri̧iäpȩmo̧ chjadëri̧ ni̧bä chjaopea̧ oa.
Danȩ Tito, cüdë mȩa a̧dë ma̧na̧rërea̧ ji̧, Quereta quȩmȩ chiriräpȩmȩ oa a̧dë ma̧na̧rërea̧ ji̧, ui ana̧ tjoro chamȩ chiriräpȩmȩ oa a̧dë ma̧na̧rërea̧ ji̧, jabechji̧ a̧dë ma̧na̧rëremȩrequedemȩ mȩnȩ chjadëri̧ ja̧bepadärätä a̧ro̧rȩ ja̧bepea̧ pio ju̧i̧, jabë pjärämȩ cjiadiäa̧ pio ju̧i̧. Ado cüdë mȩa yo̧a̧mi̧ chjadëri̧ mitëtä earequedemȩ tjamo̧ jidapaji̧ri̧ pio ji̧ri̧. Aja̧, bë ma̧ri̧ nö̧tai̧ oa mitëtä earequedemȩ Quereta quȩmȩ chiriräpȩ cjo̧ro̧ji̧ri̧ pio ji̧ri̧, tjamo̧ jidapaji̧ri̧ pio ji̧ri̧. Ja̧di tara cjiadiätä yo̧a̧requedemȩ.
Ado danȩ Tito, pio jiro ma̧ȩ chjö̧na̧i̧ oa chjadëri̧ a̧ra̧ano̧jȩrȩ pio ju̧ri̧pȩ quëna̧ji̧ri̧ pio ji̧ri̧. Ju chiaparȩjȩrȩ. Ado tjamo̧ yo̧rea̧ chiamȩ tara, jabechji̧ oëra̧diäa̧ji̧ri̧ pio ji̧ri̧ to̧bari̧ chi̧dëeajȩrȩ. Jabechji̧ Ütë tjamo̧ pio judi yürüa̧ oa ja̧di dari̧ ja̧beparea̧ chiarenȩ. Ja̧di tara ja̧bepavä. Ado ba chia datädiro̧mȩ bücjü darea̧ decjiari̧.
Ado danȩrȩ, a̧doparea̧ tjamo̧ yo̧ji̧ri̧ pio ji̧ri̧ chjadëri̧ ta̧rëdiächji̧jȩrȩ. Pio ji̧ri̧ ja̧ chja̧oerä cjo̧ro̧chji̧vä. Jabechji̧ cjiadiärea̧mi̧dëri̧ ja̧bepadirȩ dibë chjadëri̧ a̧dopea̧ oa, dibë chjadëri̧ jidapea̧ oa. Jabechji̧ ja̧bepadirȩ Ütë tjamo̧ pio judi tänȩa̧ oa. Ado pio ju̧i̧iä ütara̧ doro Ütë tjamo̧ pio judi ütarapadejȩrȩ jënȩro̧ ja̧bepea̧ pio ju̧i̧ chjiari. Iëno̧ iëno̧ cjiamȩrȩ ütarë ta̧rëpadejȩrȩ judiro̧ quëna̧ji̧ri̧ pio ji̧ri̧ jida̧ pio ju̧i̧ chjiari. Ado pio ju̧i̧iä tja̧reparȩrea̧ decjiari̧ chjadëri̧ ta̧rëdiätäreji̧ri̧renȩro̧jȩrȩ judiro̧ ma̧ chiadëri̧ cjiaji̧ri̧rȩ ja̧bepapea̧ oa, judiro̧ nö̧tadäräri̧ ja̧bepapea̧ oa. Jabechji̧ mȩnȩro̧ ji̧ri̧ jiadarä judi, gitori̧ jo̧rȩta tänȩrenȩro̧jȩrȩ. Ado gitori̧ jo̧rȩta tänȩrä judi, tjamo̧ri̧ tja̧reparȩa̧ oa cjiapadirȩ, dibë goae tarari̧ a̧dorea̧mi̧dëri̧, mȩnȩro̧ ütëchjape bagarea̧mi̧dëri̧. Pio ju̧i̧iä jabechji̧ chjadëri̧ ta̧rëdiächji̧jȩrȩ.
Ado dibë pearä a̧ra̧ano̧rëreji̧ri̧ pio ji̧ri̧, Ütë tjamo̧ ja̧ ma̧ȩ oa dibë pearä a̧ra̧ano̧rëreji̧ri̧ pio ji̧ri̧ jo̧rȩtachji̧jȩrȩ, urëdi oa jo̧rȩtaji̧ri̧rȩ. ‘Aja̧, judiro̧ ibëa̧ chjarerä cjo̧ro̧a̧ nö̧ta ja̧di dari̧ cjo̧ro̧rëreji̧ri̧diro̧da, ja̧di dari̧ ni̧bärëreji̧ri̧diro̧da, jabechji̧ ja̧di dari̧ ja̧beparëreji̧ri̧diro̧da, ado pio ju̧i̧iä jabechji̧ pio ji̧ri̧ cho̧rë cjo̧ro̧täreji̧ri̧a̧ro̧ji̧ri̧da, jabechji̧ pio judiro̧ cjo̧ro̧mi̧ dari̧ cjo̧ro̧täreji̧ri̧ra̧ro̧da’ quëna̧pea̧ oa chjadëri̧ jo̧rȩtachji̧jȩrȩ ca̧ oti̧.
Ado mȩnȩ, goadia̧ oa cjiarëremȩ pio ju̧i̧ chjiari dabadëchea oa, jabechji̧ chjadëri̧ yo̧parequedemȩ yaba̧ cja̧ȩta̧ra̧ ichiri yo̧a̧ri̧ büë pio ju̧i̧ chjiari, mȩnȩ ca̧ mu̧i̧ chjuari ja̧ ichirä daea̧ pio ju̧i̧ chjiari. Ado cja̧ȩta̧ra̧ ichiri yo̧a̧ri̧ tataparea̧ chiamȩ to pio ju̧i̧ chjiari, oro maeara̧ japea̧ pio ju̧i̧ chjiari, peaja̧di chjadëri̧ yo̧parequedemȩ. Danȩ, pio jiro tataparea̧ chiamȩ to üdë, jabechji̧ ca̧ a̧doparea̧ pio judide. Cja̧ȩta̧ra̧ ichiri yo̧a̧ri̧ a̧doparea̧de. Achia quȩmȩ chiriräpȩ a̧doparea̧de. Ado ca̧ ichirä goa̧ büë üdë, cja̧ȩta̧ra̧ ichi yo̧a̧ri̧rȩ, jabechji̧, mu̧i̧tjoi̧dirȩ. Cja̧ȩta̧ra̧ ichiri yo̧a̧ri̧ mu̧i̧tjoi̧dirȩ. Ca̧ a̧doparea̧ pio ji̧ri̧ tjamo̧ jidaji̧ri̧ pio judiro̧dirȩ —yo̧mȩrȩ ni̧bä chjaoremȩdique pumȩmi̧ da cjiamȩ judi.
Ado coa ni̧bämȩ judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ Juan, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Pegamo quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, dëbëribo jo̧dë chiamȩ coana̧rea̧ go̧a̧ti̧ oa chiamȩ pio judirequede cüdë. Ado pio yoa ma̧ȩ üdë, ca̧ea̧ri ja̧de.
Ado coa ni̧bämȩ pio judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ Juan, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Tiatira quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, pio yoa ma̧ȩ üdë Ütë tjamo̧ Joja pio judiri ja̧de. Ju̧i̧ ja̧ dacho üdë cjo̧dërë goae tarari̧ gärimi̧ dari̧ tatade. Ado pio ju̧i̧ ja̧ ta üdë boro̧che quȩmȩ chjipararirë tatami̧ dari̧ cjiade. Aja̧, pio judimȩrȩ ma̧ȩ yürürequededibe.
Ado coa ni̧bämȩ judi ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dique: —Danȩ Juan, pio yoa ma̧ȩ oa go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Echimira quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Danȩ, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, pio yoa ma̧ȩ üdë, jabechji̧ pearäri ja̧mȩ pio judiri ja̧de. Yuropadëmȩ pio judiri ja̧de. Ja̧boa̧remȩrȩ bëdü ëte ado chjereno̧ cjo̧ro̧mȩ pio judiri ja̧de. Ado pio judirequede cüdë.
Ja̧dëa ji̧ cüdë daea̧ üdë, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Charade quȩmȩ bë ma̧ri̧räpȩ tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧ chiareconȩ. Ado cja̧ȩta̧ra̧ ichiri yo̧a̧ri̧ büë oa peaja̧di goarequede ca̧ ichirä. Aja̧, pio judirequede. Ado pio judimȩrȩ tjamo̧ri̧ dabarequede pio dibë chjiari. Danȩrȩ, bëdüa̧ oa cjiami̧ dari̧ cjo̧ro̧nȩrȩ jabo cjäri̧ manȩrȩ, ja̧boa̧mi̧ dari̧ cjianȩrȩ.
Ja̧dëa ji̧ coa ni̧bämȩ judi, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Daodichea quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Aja̧, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, ‘Ja̧ditäde’ quȩmȩ pio judirequede. Pio coaiä tjamo̧i̧ cjiari̧ cjiade Ütë tjamo̧ ja̧ ma̧ȩ üdë. Pio judi yo̧a̧mi̧ japadärämȩrequede a̧dë chiquirea̧ decjiari̧. Jabechji̧ judi pearä judirä pareaparërea̧ üdë pio coaiämo̧i̧ taruparëremȩde. Ado pio judimȩrȩ ma̧ȩ yürürequededibe.
Ja̧dëa ji̧ cüdë daea̧ üdë, ji̧dë u̧i̧ yo̧mȩrȩ ja̧di ta̧rëri̧ ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Pjiradepjia quȩmȩ bë ma̧ri̧räpȩ tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, chjai̧dëra̧ mirea̧ oa cjiadëmȩ pio judirequede. Tjamo̧i̧ cjiari̧ cjiamȩ pio judirequede. Ado Davi quȩmȩrea̧ ütë pio ju̧i̧ ja̧ joë ya coërea̧ pio ju̧i̧ goarequede. Ado pio ju̧i̧iä cüdë eami̧ tuti cararea̧ joë ya oa chjuari̧ tuti cararä judi, jabechji̧ chjuari̧ tuti cara̧ oa cjiapade, ado cja̧rȩmo̧rȩ areiarea̧ decjiari̧. Ado cüdë eami̧ tuti cararea̧ joë ya oa areiarä judi, jabechji̧ chjuari̧ tuti cararea̧mi̧dëri̧ areia̧ oa cjiapade. Jabechji̧ cüdë ütärë jo̧rȩta̧mi̧ japadärärea̧ chiarequede, ado cja̧rȩmo̧rȩ dëbëparea̧ decjiari̧.
Sanasan