Techaronichȩche Ma̧ȩ 5:10 - Biblia Pume

¹⁰ Jabechji̧ pio judide pio ibë chjiari ano̧ mire ja̧borëremȩ judi a̧ro̧rȩ pio ju̧i̧ nö̧ta cjo̧ro̧rea̧ dapea̧ oa. Jabechji̧ pio judi jana̧rä, jabë ja̧bodëa̧ pio ji̧ri̧ mitëpadiibe, ja̧boa̧ji̧ri̧ pio ji̧ri̧bo.

Techaronichȩche Ma̧ȩ 5:10 Iomraidhean Croise

Mateo 20:28

Danȩrȩ, pio coa cho̧rëdiä matäreji̧ri̧renȩro̧coe, Pumȩrȩ Ara̧ Tjamo̧ pio ju̧i̧. Ado cüdë a̧dëri pio judiri birë ma̧na̧rä, jabechji̧ pumȩ pio judiro̧ ca̧ mu̧i̧tjoi̧mi̧ da maearë cjo̧ro̧pea̧ oa birë ma̧na̧dërëremȩrequede. Pio judiro̧ coa ji̧dë ma a̧dopea̧ oa birë ma̧na̧dëa̧requede, jabo jabechji̧ pio ji̧ri̧ ja̧ mu̧i̧tjoi̧mi̧ dari̧ cjo̧ro̧pea̧ oa birë ma̧na̧requede cüdë. Tjamo̧ davä. Pio ji̧ri̧ chjadëri̧ a̧dopea̧ oa birë ma̧na̧requede. Ado pio ju̧i̧iä ca̧ icjara pio ju̧i̧ yürüparequede pumȩ ja̧ oa. Tjamo̧ davä. Pumȩ pio ji̧ri̧ chjiari ano̧ mire ja̧bopea̧ oa, pio judiro̧ chjai̧dëri̧ japea̧ pio ju̧i̧ chjiari tuti ba ano̧a̧ cjiapea̧ oa, jabechji̧ ca̧ icjara oa yürüparequede ⁠—⁠yo̧a̧dejȩrȩ. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi Ütë tjamo̧ pio ju̧i̧ ja̧ mu̧i̧tjoi̧mi̧ dari̧ cjo̧ro̧pea̧ pio ju̧i̧ chjiari.

Juan 10:11

Aja̧, oveja jidamȩ chjadërequede. Ado oveja jidamȩ judi, jabechji̧ jibëa̧ icjara oa yürüde oveja ja̧ oa, nȩmȩparea̧ decjiari̧. Jabechji̧ ano̧ mire ja̧bopea̧ oa yürüde judiro̧ chjätärea̧ dapea̧ oa.

Juan 10:17

Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧: —Danȩrȩ, ca̧ icjara oa ja̧bopea̧ oa yürüpea̧ chiarequede ca̧ cjo̧ro̧rea̧ pio ju̧i̧ —yo̧a̧dejȩrȩ—. Jabo ja̧di dari̧ japa ëte, ado chjereno̧ cjo̧ro̧parequede. Ado pio ju̧i̧iä ea tjamo̧dique ca̧ Ama̧i̧ judi.

Juan 15:13

Ado eami̧ pumȩ üdë jibëa̧ jadü pio ju̧i̧ chjiari ano̧ mire ja̧borä judi, jibëa̧ icjara oa ano̧ mire ja̧bopea̧ oa yürürä judi, jabechji̧ a̧dë chjäte ana̧ri̧ earea̧ra̧ cjo̧ro̧de. Jabechji̧ ado cja̧rȩmo̧rȩ nö̧tarea̧mi̧dëri̧ eamȩrȩ yürüde —yo̧a̧dejȩrȩ—.

Domano Ma̧ȩ 8:34

Ado pio ju̧i̧iä iëno̧ë ta̧rërequededibe ca̧ oti̧. ¿Chjiarë aeno̧täremȩdiibe? ¿Chjiarë bape chjaotäremȩdiibe? Jabo cjäri̧ madiibe, eami̧ üdë ja̧di dari̧ japarea̧mi̧dëde. Danȩrȩ, Jechu Quiricho judi pio ibë chjiari ano̧ mire ja̧borëremȩde peadë. A̧ro̧rȩ aeno̧pea̧ chja̧oeri pio judiri go̧dürea̧mi̧ dari̧, bape chjaopea̧ chja̧oeri pio judiri go̧dürea̧mi̧ dari̧ ja̧boa̧de. Ado ja̧boa̧remȩrȩ bëdüa̧de. Ado bëdüa̧ oa cjiamȩrȩ baärëremȩde a̧dëräpȩ ba chia tjamo̧räpȩ chapea̧ oa. Ado danȩrȩ, Ütërë cjiamȩ cotoräpȩ ju̧ri̧ chamȩrȩ chade pio ibë chjiari goë cjo̧dëmȩrȩ. Aja̧, Quiricho pio judide. Pio ibë chjiari tuti japamȩ pio judide. Ado pio ju̧i̧iä ado cja̧rȩmo̧rȩ pio ibëiäpȩmo̧ aeno̧rea̧mi̧dëde.

Cori̧tio Ma̧ȩ 1 15:3

Cüdë dabapea̧ ma̧ȩ pio ju̧i̧ a̧ra̧ano̧rëremȩrequededibe a̧dë chjäte ba chiamȩ ma̧ȩ pio ju̧i̧. Jabechji̧ Quiricho pio ju̧i̧ chjiari ma̧ȩ oa, a̧ro̧rȩ chjai̧dëri̧ japea̧ ba oa ano̧ mire ja̧borëremȩ pio ju̧i̧ chjiari ma̧ȩ oa yürürëremȩrequededibe, no̧mȩ tjamo̧ri̧ ja̧ go̧ȩparëreji̧ri̧ pio judiro̧ go̧ȩparërea̧mi̧.

Cori̧tio Ma̧ȩ 2 5:15

Tjamo̧ davä. Ibë ütëbo oa chia ja̧borëremȩdiibe a̧ro̧rȩ cjo̧ro̧rea̧ peaja̧ra̧ pio ju̧ri̧ra̧ ano̧ mire cjo̧ro̧pea̧ oa, a̧ro̧rȩ ibëa̧ chja̧oerä cjo̧ro̧chea oa. Ado pio ju̧i̧iä yo̧requededibe ca̧ oti̧. Danȩrȩ, a̧ro̧rȩ ibëa̧ chja̧oerämo̧ cjo̧ro̧rërea̧ ji̧, jabechji̧ pio ibë chjiari ano̧ mire ja̧borëremȩ pio ju̧i̧ ja̧ chja̧oerämo̧ ano̧ mire cjo̧ro̧täreji̧ri̧rea̧rȩ yaba̧, pio ibë chjiari bëdüa̧ oa cjiarëremȩ pio ju̧i̧ ja̧ chja̧oerämo̧.

Cori̧tio Ma̧ȩ 2 5:21

Jabechji̧ Quiricho judi cja̧rȩmȩ co chjai̧dëri̧ japadëa̧räbo, jabechji̧ Ütë tjamo̧ pio judi tuti yürürëremȩdejȩ pio ibë chjiari ano̧ mire ja̧bopea̧ oa, a̧ro̧rȩ chjai̧dëri̧ japea̧ üdë pio ju̧i̧iäpȩmo̧ ma ano̧ mire cjiadiäpea̧ oa, a̧ro̧rȩ jabechji̧parȩa̧ oa cjiapea̧ oa. Ado yaba̧ a̧ro̧rȩ Quiricho pio judiri ja̧ji̧ri̧pea̧ oaiä, jabechji̧ pio ibëiäpȩmo̧ ma ano̧ mire cjiadiäa̧de Quiricho pio ju̧i̧ ja̧ chjadë üdë. Tjamo̧ davä. Ibëa̧ chjadëdë üdë Quiricho pio ju̧i̧iäpȩmo̧ cjiadiäa̧de, ado pio ju̧i̧ ja̧ chjadë üdë pio ibëiäpȩmo̧ ano̧ mire cjiadiäa̧de, a̧ro̧rȩ jabechji̧parȩa̧ oa cjiarea̧mi̧ dari̧. Ado pio jiro ma̧ȩ pio ju̧i̧ järi tjamo̧ji̧ri̧rȩ a̧ra̧ano̧rea̧ro̧jo̧ȩ.

Epjecho Ma̧ȩ 5:2

Jabechji̧ Quiricho judi dibë ea̧ra̧ pio ju̧ri̧ra̧ eachji̧jȩrȩ dibëa̧ pumȩ ji̧ri̧. Danȩrȩ, ibë ea tjamo̧mȩrȩ ja̧boera̧parëremȩde. Aja̧, Ütë tjamo̧ pio ju̧i̧iäpȩmo̧ goaeri̧ pjȩa̧ cjitëmi̧ dari̧ ja̧bopea̧ oa yürürëremȩde jibëa̧ icjara oa, ovejami̧darë ja̧bopea̧ oa. Ado pio jiro earea̧ra̧ pio ju̧ri̧ra̧ eatäreji̧ri̧rea̧ro̧jȩrȩ ibëa̧ pumȩ ji̧ri̧ peaja̧di.

Techaronichȩche Ma̧ȩ 4:13

Ado danȩrȩ ibëa̧ oti̧, Jechu ju̧i̧ quëna̧ji̧ri̧rȩ ja̧borëreji̧ri̧ pio ji̧ri̧ chjiari dabadëji̧ri̧rȩ cjo̧ro̧tä eadërea̧ro̧dibe. Jabechji̧ jidatarea̧ chiadëji̧ri̧ pio judiro̧ odai̧ tarari̧ jo̧rȩtami̧ jo̧rȩtachea oa, chjadëri̧ dabatä earea̧ro̧dibe mȩnȩro̧ coëma cjiari̧ jo̧rȩtapea̧ oa.

Techaronichȩche Ma̧ȩ 4:15

Danȩrȩ, ibëa̧ Ano̧mȩ judi a̧ra̧ano̧rërea̧ duri pio ju̧i̧ a̧ra̧ano̧rea̧ro̧dibe. Ja̧di tara chjadëri̧ ta̧rëchji̧vä. Jabechji̧ Jechu judi jana̧pea̧ doro, a̧ro̧rȩ jabë cjo̧ro̧ji̧ri̧ pio judiro̧ yabochjarë baädëparea̧rȩ, jabo ja̧boa̧ji̧ri̧ pio judiro̧ ibëa̧ yaboi̧ baäpadirȩ Ano̧mȩ pio ju̧i̧ dëbëdiäpea̧ oa.

Techaronichȩche Ma̧ȩ 4:17

Ado ja̧dëa ji̧ a̧dë cjiadiäa̧ji̧ri̧ pio ji̧ri̧bo chjaodëri̧ cjitë tänȩpadiibe. Ibëa̧ yaboi̧ baäa̧ji̧ri̧ pio ji̧ri̧ cho̧rë cjitërea̧mi̧ dari̧ cjitë tänȩpadiibe go̧a̧ra̧ ëräpȩ yuro. Ado ju̧ri̧pȩ a̧dopaji̧ri̧rȩ dëbëdiäparea̧ro̧jo̧ȩ ibëa̧ Ano̧mȩ pio ju̧i̧ a̧dë cjararäpȩ ju̧ri̧. Ado pio ju̧i̧ nö̧ta bucho ana̧ cjiadiäparea̧rȩ ibëa̧ Ano̧mȩ pio ju̧i̧ nö̧ta.

Techaronichȩche Ma̧ȩ 5:6

Ja̧di tara o judiro̧ mo̧a̧mi̧ dari̧ cjo̧ro̧mi̧ cjo̧ro̧dë matäreji̧ri̧rea̧rȩ, jabo na̧e chia na̧e chia cjo̧ro̧ matäreji̧ri̧rea̧rȩ a̧ro̧rȩ dadiä dadiä cjiami̧ dari̧ cjo̧ro̧pea̧ oa, a̧ro̧rȩ chjai̧dë oa aja̧parea̧ decjiari̧ cjo̧ro̧pea̧ oa.

Timoteo Ma̧ȩ 1 2:6

Aja̧, ütëbodärä ja̧ chjiari tuti yürürëremȩdejȩ jibëa̧ icjara oa tuti ba ano̧pea̧ oa pumȩ judiro̧ chjai̧dëri̧ japea̧ pio ju̧i̧ chjiari. Aja̧ pumȩ pio ji̧ri̧ go̧dü tänȩpea̧ oa tuti yürürëremȩdjȩ jibëa̧ icjara oa. Ado pio ju̧i̧ chjiari ma̧ȩ oa yürürëremȩdiibe ütëbodärä oa Ütë tjamo̧ judi jënȩ ütarë jo̧rȩtarërea̧ doro.

Timoteo Ma̧ȩ 2 2:11

Ado yaba̧ Timoteo, pio yoa ma̧ȩ oa, tjamo̧i̧ cjiari̧ baämȩ ma̧ȩ oa ta̧rëvä: Aja̧, Quiricho pio judi ëba ja̧borëremȩdiibe. Ado pio ju̧i̧iä ëba cjo̧ro̧padiibe peaja̧di.

Tito 2:14

Jabechji̧ pio judide pio ibë chjiari tuti yürürëremȩ judi. Jibëa̧ icjara oa tuti yürümȩrȩ yürürëremȩde ano̧ mi̧rȩ ja̧bopea̧ oa. Ja̧di dari̧ tuti japarëremȩde a̧ro̧rȩ jare chjadüa̧ oa cjiami̧ dari̧ go̧dürea̧ datä, a̧ro̧rȩ chjai̧dë ja̧ chja̧oeri judiri go̧dürea̧ datä. Aja̧, pio ju̧i̧ ja̧ icjara oa tuti yürürëremȩde a̧ro̧rȩ pio ju̧i̧ ja̧ pumȩpe jätä, chjai̧dë gȩrȩ chiadëri̧ joami̧ dari̧ cjiatä, dami̧ti̧ chjadë oa japarea̧ järitä.

Pedro Ma̧ȩ 1 2:24

Jabechji̧ judi toro ja̧boa̧rä, a̧ro̧rȩ chjai̧dëri̧ japea̧ pio ju̧i̧ tuti aramȩrȩ ja̧borëremȩde, a̧ro̧rȩ chjai̧dërë yo̧a̧ chja̧oerä cjo̧ro̧chea oa. Tjamo̧ davä ca̧ oti̧. Pio ibë chjiari ja̧borëremȩde a̧ro̧rȩ coëma cjiari̧ cjo̧ro̧pea̧ oa, a̧ro̧rȩ chjai̧dëri̧ cjo̧ro̧rërea̧ pio ju̧i̧ a̧dë ja̧boa̧mi̧ dari̧ cjo̧ro̧pea̧ oa. Jabechji̧ a̧ro̧rȩ ma̧i̧ da co chiami̧ dari̧ cjo̧ro̧rërea̧ ji̧, a̧ro̧rȩ ja̧bopea̧ querediä tjamo̧ji̧ri̧mi̧ dari̧ cjo̧ro̧rërea̧ ji̧, jabechji̧ ma̧i̧ da co chiamȩrȩ cji̧däa̧ oa cjiarëremȩde toro, pio a̧ro̧rȩ chjadëri̧ chjaparȩa̧ oa cjiami̧ dari̧ cjiapea̧ oa, pio a̧ro̧rȩ co chjami̧ dari̧ ano̧ mire cjiapea̧ oa.

Pedro Ma̧ȩ 1 3:18

Danȩrȩ, Quiricho pio judiborë conȩda̧ oa cjiarëremȩde Ütë tjamo̧ pio judi tänȩa̧ oaiä. Jabechji̧ judi coëma cjiari̧ cjo̧ro̧a̧räbo, ma̧i̧ dari̧ conȩdarëreji̧ri̧diro̧jo̧ȩ. Jabechji̧ cja̧rȩmȩ co chjai̧dëri̧ japadëmȩrȩ ano̧ mire ja̧borëremȩde ji̧ra̧ co chjai̧dëri̧ jape chjaoji̧ri̧ pio ji̧ri̧ chjiari, ibë chjadëri̧ ëba baämi̧ dari̧ japapea̧ oa Ütë tjamo̧ pio ju̧i̧iäpȩ. Jabechji̧ cja̧rȩmȩ co maea ja̧borëremȩde, ado judiri ja̧bodëpade. Aja̧, jibëa̧ icjara oa ja̧bo tänȩrëreji̧ri̧diro̧jo̧ȩ, jabo Tjo tjamo̧ pio ju̧i̧iä bëdüa̧ oa cjiarëremȩde.