Techaronichȩche Ma̧ȩ 4:6 - Biblia Pume

⁶ Jabechji̧ dibëa̧ omȩ ja̧ iei̧ ji̧ bae ëba mo̧a̧rea̧ decjiari̧ chjadëri̧ ëbatäreji̧ri̧nȩrȩ, china̧chja pio ji̧ baë mitërea̧ decjiari̧. Jabechji̧ Ütë tjamo̧ judi acji tai̧rea̧mi̧ dari̧ bape chjaomȩde. Ado pio ju̧i̧iä chi̧dëeatarea̧ro̧dibe mȩnȩro̧ uapai̧ ta̧rëri̧ ta̧rë ja̧botä pio dibë bape chjaochea oa. Jabechji̧ pio ju̧i̧ chjiari jabërä yo̧rëreji̧ri̧rea̧ro̧dibe peadë.

Techaronichȩche Ma̧ȩ 4:6 Iomraidhean Croise

Go̧dürea̧ Ma̧ȩ 20:15

"Ado garadë machji̧vä.

Go̧dürea̧ Ma̧ȩ 20:17

“Ado cja̧rȩmo̧ ja̧ oa dae ja̧bo dae ja̧bo dadë machji̧vä. Ju̧i̧ ja̧ jo̧ oa, ju̧i̧ ja̧ iei̧ oa, ju̧i̧ ja̧ mu̧i̧tjoi̧ pio ji̧ri̧ dae ja̧bo dadë machji̧vä. Ju̧i̧ ja̧ baca oa, ju̧i̧ ja̧ yae oa, ju̧i̧ ja̧ buro oa dae ja̧bo dadë machji̧vä. Jabechji̧ jibëa̧ pio ju̧i̧ dae ja̧bo dadëpea̧de. Ja̧di ta̧rëri̧ yo̧mȩrȩ yürürëremȩdejȩrȩ ichi chjö̧na̧i̧ ma̧ȩ oa icharaita ji̧ri̧ Ütë tjamo̧ judi.

Marcos 10:19

Ado mȩnȩ yabo yo̧a̧ ji̧, "¿Tjana̧ oa japatäremȩrequede cüdë bucho ana̧ cjo̧ro̧rea̧ dapea̧ oa?" yo̧a̧ ji̧, jabechji̧ pio ju̧i̧ chjiari dëbë yo̧parequedemȩ yaba̧. Danȩ, ichi chjö̧na̧i̧ ma̧ȩ pio ju̧i̧ dabarenȩ. Ja̧di ta̧rëri̧ yo̧diibe ma̧ȩ üdë: "Ado cja̧rȩmo̧ pumȩ oa ja̧bo tänȩdëvä. Ado cja̧rȩmo̧ ja̧ iei̧ ji̧ baë ëba mo̧a̧dëvä. Garüdëvä. Teracabari̧ aechide yo̧dëvä chjai̧dëri̧ japadëmȩ pio ju̧i̧iäpȩmo̧. Ma̧ȩ chjádë yürüdëvä. Pumȩ pio ji̧ri̧iä ji̧dë u̧i̧ boapea̧ oa u̧i̧padëvä. Ado mȩa nö̧riji̧ri̧ pio ji̧ri̧ ba chia dajȩrȩ." Aja̧, pio jiro ma̧ȩ chö̧na̧i̧ oa dabarenȩ mȩnȩ —yo̧mȩrȩ yo̧a̧dejȩ pumȩ üi̧ oa Jechu judi.

Lucas 12:5

Jabo danȩrȩ, chidëearequededibe ca̧ jadü. Pio ju̧i̧iäpȩmo̧ ma uapariä cjo̧ro̧täreji̧ri̧nȩrȩ jabo. Aja̧, aeno̧rea̧ chiamȩ pio ju̧i̧mo̧i̧ uapariä cjo̧ro̧täreji̧ri̧renȩro̧jo̧ȩ. Tjamo̧ davä. Dibëa̧ icjararemȩ oa, dibëa̧ tjobo cjo̧dë tja ana̧räpȩmo̧ aeno̧rea̧ chiamȩ pio ju̧i̧mo̧i̧ uapaji̧ri̧rȩ jo̧rȩtariä cjo̧ro̧täreji̧ri̧renȩro̧jo̧ȩ —yo̧rëremȩdejȩrȩ.

Lucas 16:28

Jabechji̧ pio coadi ja̧ji̧ri̧ pio ji̧ri̧ ëbarëremȩrequedejȩrȩ cja̧rȩichimo̧ oa. Ado pio ji̧ri̧iäpȩmo̧ uapai̧ ta̧rëri̧ chi̧dëeatäremȩdejȩrȩ jabërä, pio judiro̧borë pio jauëräpȩmo̧ aeno̧a̧ oa cjiachea oa, pio judiro̧borë a a ma̧ cjiamȩräpȩ tutia̧ oa cjiachea oa. Jabechji̧ chjadëri̧ chjadüjo̧ȩ" yo̧rëremȩdejȩ.

Domano Ma̧ȩ 1:18

Danȩrȩ, Ütë tjamo̧ judi, a̧dëräpȩ cjiamȩ pio judi ma̧ cjüëtüri̧ jo̧rȩtamȩrȩ na̧rȩ chjaodejȩrȩ chjai̧dëri̧ jape cjiaji̧ri̧ pio ji̧ri̧iäpȩmo̧. Jabechji̧ jënȩ ërecjia̧ pio ju̧i̧iä na̧rȩ chjaodejȩrȩ pumȩ pio ji̧ri̧ bape chjaopea̧ pio ju̧i̧ chjiari. Jabechji̧ judiro̧ dami̧ti̧ oa chjai̧dë oa jape chjaoa̧ oaiä, judiro̧ chjuari̧ jiada̧ pio oaiä, tutia̧ oa cjiami̧ dari̧ cjiade tjamo̧i̧ cjiamȩ ma̧ȩ üdë. Jabechji̧ pumȩ no̧i̧dërë ta̧rëtärea̧ ji̧, tja̧reparȩa̧ oa cjiami̧ dari̧ cjiade ma̧ȩ üdë pio jiro pumȩ pio ji̧ri̧iä.

Domano Ma̧ȩ 12:19

Ado danȩrȩ ca̧ oti̧, ado yo̧requededibe. Eami̧ pumȩ üdë pio ibëiäpȩmo̧ chjai̧dëri̧ japarä judi, jabechji̧ ba dëbë japadëtäreji̧ri̧rea̧ro̧jo̧ȩ jabo jabechji̧, ma̧ chjua jo̧rȩtaji̧ri̧rȩ cjo̧ro̧täreji̧ri̧rea̧rȩ, ibëa̧ Ütë pio ju̧i̧iäpȩmo̧ chjuari̧ quëna̧ji̧ri̧rȩ. Jabechji̧ Ütë tjamo̧ pio judide tjamo̧ bape chjaomȩ judi, a̧ro̧rȩdë. Chja ja̧di, pio judi jo̧rȩtami̧ bape chjaotädejȩ. Peaja̧di ta̧rëri̧ go̧ȩpea̧ oa cjiade ma̧ȩ üdë, Ütërë yo̧rërea̧ ma̧ȩ üdë. Ta̧rëchji̧vä: "Aja̧, pio cüdërequede tjamo̧ bape chjaomȩ judi. Pio cüdë chjai̧dëri̧ japaji̧ri̧ pio ji̧ri̧ bape chjaoparequedejȩrȩ" yo̧diibe Ano̧mȩ judi. Aja̧, ja̧di ta̧rëri̧ go̧ȩparëremȩde no̧mȩ go̧ȩparëremȩ judi.

Domano Ma̧ȩ 13:4

Danȩrȩ, chiri ütë cjo̧ro̧ji̧ri̧ judiro̧ Ütë tjamo̧ ja̧ mu̧i̧tjoi̧mi̧ dadirȩ. Ibëa̧ pio ju̧i̧ ja̧bepadirȩ. A̧ro̧rȩ chjadëri̧ cjo̧ro̧pea̧ oa ja̧bepadirȩ. A̧ro̧rȩ chjadëri̧ jida̧ oa cjo̧ro̧pea̧ oa ja̧bepadirȩ. Jabo a̧ro̧rȩ chjai̧dëri̧ japarä judi, jabechji̧ uapatäreji̧ri̧rea̧rȩ. Teracabari̧ aradëdirȩ guadia judiro̧. Jabechji̧ pio ibë bape chjaopai̧ dadiro̧ibe davä, a̧ro̧rȩ chjai̧dëri̧ japarä judi. Uapai̧ dadirȩ. Tjamo̧ davä. Ütë pio ju̧i̧ ja̧ mu̧i̧tjoi̧mi̧ dari̧ ja̧bepadirȩ Ütë ja̧ ërecjia̧ üdë chjai̧dëri̧ japamȩ pio ju̧i̧iäpȩmo̧ acji cjatäpea̧ oa.

Cori̧tio Ma̧ȩ 2 7:11

Danȩrȩ ca̧ oti̧, Ütë tjamo̧ judi dibë gitori̧ jo̧rȩta tänȩa̧ oaiä, mȩnȩro̧ chjai̧dëri̧ japea̧ pio ju̧i̧ chjiari gitori̧ jo̧rȩta tänȩa̧ oaiä, jabechji̧ ana̧ri̧ a̧doa̧ oa cjiadiärëreji̧ri̧nȩrȩ, tjaoëpai̧ dape järea̧mi̧ dari̧. Jabechji̧ mȩnȩro̧ tjamo̧ri̧ ano̧ mire jo̧rȩtaji̧ri̧pea̧ oaiä, järi tjamo̧pea̧nȩrȩ ana̧ri̧ oëra̧diäa̧mȩ pio ju̧i̧ chjadëri̧ a̧dopea̧ oa, pio ju̧i̧ jo̧ȩra̧pe ütara ëte dairäpȩmo̧ tutimi̧ dari̧ chjadüpea̧ oa, cüdë dibë go̧ȩpe chjadürërea̧mi̧. Jabechji̧ mȩnȩro̧ pearä judi ana̧ri̧ jo̧rȩtadërërea̧ ji̧, dibëa̧ chjarerä cjo̧ro̧mȩ üdë chjai̧dëri̧ japea̧ pio ju̧i̧ chjiari ana̧ri̧ jo̧rȩtadërërea̧ ji̧, jabechji̧ ‘a̧dë chjäte ma̧i̧ da oa japadida, jo̧ȩra̧pe ütara ëte chjadüa̧ oa cjiapea̧ chiadida’ quëna̧ ano̧ mire jo̧rȩtaji̧ri̧pea̧nȩrȩ ado cja̧rȩmo̧ jo̧rȩtarea̧ra̧. Jabechji̧ mȩnȩro̧ ano̧ mire jo̧rȩta̧ oaiä, ërecjiaji̧ri̧mi̧ dari̧ jo̧rȩtaji̧ri̧pea̧nȩrȩ pio dibë chjiari, mȩnȩro̧ ana̧ri̧ oëra̧diäa̧mȩ pio ju̧i̧ jabërä ütara ëte chjadüdëa̧ oaiä. Jabechji̧ mȩnȩro̧ jo̧ȩra̧pe ta̧rëdiädëa̧ oaiä, uapai̧ tarari̧ jo̧rȩtaji̧ri̧pea̧nȩrȩ peaja̧di, ‘pio a̧ro̧rȩborë bide cjaeäa̧ oa cjiami̧ dari̧ cjiapai̧ da jiroa̧ro̧da’ quëna̧ jo̧rȩtaji̧ri̧rȩ. Tjamo̧ davä ca̧ oti̧, tjamo̧ri̧ ano̧ mire jo̧rȩtaji̧ri̧pea̧nȩrȩ ado cja̧rȩmo̧ jo̧rȩtarea̧ra̧. Ado pio ju̧i̧iä tjamo̧ri̧ datämi̧ cjiaji̧ri̧pea̧renȩro̧coe ca̧ oti̧. Aja̧, mȩnȩro̧ pio coa tjamo̧ri̧ dadëri̧ cjiarërea̧ ji̧, tjamo̧ri̧ datämi̧ cjiaji̧ri̧pea̧renȩro̧coe. Aja̧ ca̧ oti̧, mȩnȩro̧ tjamo̧ri̧ ano̧ mire jo̧rȩtaji̧ri̧pea̧ oaiä, mȩnȩro̧ ana̧ri̧ na̧rȩriä ta̧rëdiäa̧ oaiä, jabechji̧ chjadëri̧ jëdano̧a̧nȩrȩ, ‘jabë nö̧tadäräri̧ jëdano̧dëa̧diro̧da’ quëna̧rea̧ decjiari̧.

Garata Ma̧ȩ 5:21

Ado dami̧ti̧ pio ju̧i̧ chjiari oëra̧ jo̧rȩtarea̧ üdë, 'Aja̧, judi goa̧ üdë ca̧ea̧täremȩdica̧da, pio cüdëmo̧rȩ goatäremȩcuni̧da' quëna̧ jo̧rȩtarea̧ üdë, peaja̧di ibëa̧ icjararä chjai̧dë pio judiri ja̧de. Ado yu̧i̧rea̧ üdë, ërü yu̧i̧mȩrȩ ivi pio ji̧ri̧ nö̧ta idi̧ dari̧ japarea̧ üdë, jabechji̧ ibëa̧ icjararä chjai̧dë pio judiri ja̧ maeade. Ado cüdë ütëbo oa ütaratärea̧ ji̧, ibëa̧ icjararä chjai̧dë pio judiri ja̧ oa ütëbo oa ütaradärätärea̧ ji̧, jabechji̧ ütaradärädëpareconȩ, jabo peaja̧di ibëa̧ icjarari pio judiri cjitë maeade orë. Ma̧i̧ da tjamo̧de. Ado cüdë dibë yo̧rërea̧mi̧ ado yo̧requededibe uapai̧ ta̧rëri̧ yo̧ë cji̧dämȩrȩ. Ja̧di dari̧ japë ano̧dëji̧ri̧ pio judiro̧, jabechji̧ Ütërë yo̧a̧ chja̧oerä cjo̧ro̧dë madirȩ.

Epjecho Ma̧ȩ 4:17

Ja̧di tara ibëa̧ Ano̧mȩ pio ju̧i̧ ja̧ ma̧ȩra̧ yo̧tarequededibe quëna̧dëji̧ri̧mi̧ dari̧ cjo̧ro̧chea oa. Danȩrȩ, teracabari̧ jo̧rȩte cjiaji̧ri̧rȩ cjo̧ro̧dirȩ.

Epjecho Ma̧ȩ 4:28

Ado mȩnȩro̧ garüji̧ri̧rȩ cjo̧ro̧rërea̧ ji̧, garüdëchji̧vä yaba̧. Jabechji̧ dibëa̧ ichira̧ garüji̧ri̧rȩ cjo̧ro̧rërea̧ ji̧, chjadëri̧ ano̧ mire ja̧bepachji̧vä cjäri̧ ja̧boji̧ri̧ pio ji̧ri̧iäpȩmo̧ chjadëri̧ a̧dopea̧ oa.

Epjecho Ma̧ȩ 5:6

Ado danȩrȩ, ma̧ȩ chjádëra̧ pio ju̧ri̧ra̧ u̧i̧pea̧ oa cjiadëchji̧vä. Jabechji̧ mȩnȩro̧ chjai̧dëri̧ japea̧ oa tëracaba ma̧ȩra̧ yo̧pai̧ dadiro̧dibe. “Aja̧, mȩnȩro̧ ja̧di dari̧ japarä judi, jabechji̧de. Chjai̧dëdëde jabo jabechji̧de" yo̧pai̧ dadiro̧dibe chjai̧dë pio ju̧i̧ chjiari. Jabo cjäri̧ ma ca̧ oti̧, pio judiro̧ yo̧a̧ oa u̧i̧pea̧ oa cjiadëchji̧vä. Pio judiro̧ ja̧di dari̧ japea̧ oaiä acji cjatäpadejȩrȩ davä, Ütë ja̧ ërecjiarea̧ üdë. Tjamo̧ davä, ta̧dëdiädëji̧ri̧ pio ji̧ri̧iäpȩmo̧ acji cjatäpadejȩrȩ.

Techaronichȩche Ma̧ȩ 2:11

Jabechji̧ jäjäa judi jibëa̧ u̧ri̧ ji̧ri̧ japami̧ dari̧ chi̧dëea̧rea̧ro̧dibe pumȩ nö̧tai̧ oa. Ma̧ chiadëri̧ cjiape järea̧mi̧ dari̧ ju chiaparȩa̧rea̧ro̧dibe. Ado mȩnȩro̧, 'Aja̧, tjamo̧ri̧ yo̧diro̧ibëda, ja̧di dari̧ japea̧diro̧ibëda' quëna̧ dabanȩrȩ.

Techaronichȩche Ma̧ȩ 2 1:8

Ado ja̧dëa ji̧ ma̧i̧ dari̧ japamȩrȩ bape chjaopadejȩrȩ Ütë tjamo̧ ju̧i̧ dabadëji̧ri̧ pio ji̧ri̧. Aja̧, Ano̧mȩ Jechu pio ju̧i̧ chjiari ma̧ȩ chjadëi̧ oa quëna̧dëji̧ri̧ pio ji̧ri̧ bape chjaopadejȩrȩ.

Ebereo Ma̧ȩ 13:4

Ado danȩrȩ, üi̧ üdë jibëa̧ iei̧ ji̧ ëbarä, ba chia tjamo̧de. Chjadë tjamo̧de. Ado üi̧ judi jibëa̧ iei̧ ji̧ ëba mo̧a̧rä, peaja̧di ba chia tjamo̧de. Chjadë tjamo̧de. China̧chjadëde. Jabo cjäri̧ madejȩ, jibëa̧ jadü maea oa jo̧rȩtadëmȩ pio ju̧i̧, jabo china̧chja pio ji̧ri̧ baë ëba mo̧a̧mȩ pio ju̧i̧, jabechji̧ Ütë tjamo̧ pio judi bape chjaopadejȩ. Ado peaja̧dimi̧ dari̧ japajadejȩ jibëa̧ üi̧ maea oa jo̧rȩtadëyi̧ pio ji̧, jabo china̧chja pio ji̧ri̧ baë ëba mo̧a̧yi̧ pio ji̧. Tjamo̧ davä ca̧ oti̧, bape chjaopadejȩrȩ jibëa̧ jadüdë oa baë ëba mo̧a̧ji̧ri̧ pio ji̧ri̧.

Ebereo Ma̧ȩ 2:6

Tjamo̧ davä. Pio judiro̧ cjiadëpadirȩ jabo pumȩ pio judide tjamo̧ yo̧mȩrȩ cjo̧ro̧pamȩ judi. Jabechji̧ jabërä go̧ȩpea̧ oa cjiarëremȩde ma̧ȩ üdë, Ütërë go̧ȩpa tänȩrërea̧ ma̧ȩ pio judi. Danȩrȩ, ta̧rëchji̧vä cja̧rȩmȩrȩ go̧ȩparërea̧ pio ju̧i̧: “Jabo mȩnȩ Ütë, ¿tjana̧ ju̧i̧iä ba chia jo̧rȩtamȩrȩ darenȩjo̧ȩ pumȩ ju̧i̧? Jabomo̧ pumȩ made. Nö̧tadë madimȩ. ¿Tjana̧ ju̧i̧iä jidarenȩjo̧ȩ pumȩrȩ ara̧ tjamo̧ pio ju̧i̧? ¿Tjana̧ ju̧i̧iä chjadëri̧ a̧dorenȩjo̧ȩ?

Santiago Ma̧ȩ 2:6

Jabo cjäri̧ manȩrȩ, chjö̧na̧i̧ti̧ oa cjäri̧ ja̧bomȩ pio ju̧i̧ badë dae chjaorenȩro̧jo̧ȩ. ¿Tjana̧pea̧ ji̧ pio ju̧i̧ badë dae chjaorenȩro̧jo̧ȩ jabo ji̧ra̧ri̧ goamȩ ju̧i̧ ba chia dae chjaorenȩro̧jo̧ȩ? Danȩrȩ, ¿ji̧ra̧ri̧ goaji̧ri̧ pio judiro̧dëdirȩ dibë chjai̧dëri̧ cjo̧ro̧ tänȩji̧ri̧ judiro̧? ¿Pio judiro̧dëdirȩ dibë aechide yo̧ji̧ri̧ judiro̧? ¿Tjamo̧ cjo̧ro̧ji̧ri̧ ja̧ dëbëräpȩ ju̧ri̧ dibë aechide yo̧ji̧ri̧ pio judiro̧dëdirȩ? Dëdëdirȩ, pio judiro̧dirȩ.

Santiago Ma̧ȩ 5:4

Danȩrȩ, dibëa̧ tjadoräpȩ ja̧bepaji̧ri̧ pio ji̧ri̧ chjadëri̧ ba ano̧tärea̧ ji̧, joechjapea̧mȩ jurarea̧ oa mitëa̧ji̧ri̧ pio ji̧ri̧ nö̧tadäräri̧ ba ano̧tärea̧ ji̧, cjäri̧ marenȩro̧jȩrȩ, o oamo̧i̧ yürüa̧renȩro̧jȩrȩ, pio mȩnȩro̧ o oa baë mitëji̧ri̧rȩ. Jabo a̧dë chjäte jauëchjamȩ Ano̧mȩ judi pio dibë chjiari dabadë ma ja̧didë, jabo dabade. Dabade davä mȩnȩro̧ chjai̧dëri̧ japea̧ pio ju̧i̧ chjiari. Jabechji̧ pio jȩaiä ji̧dë ma goë cjo̧dëji̧ri̧ pio ji̧ri̧ cjäri̧ri̧ cjiamȩrȩ ta̧rëdejȩrȩ jibëa̧ chëre oa mitërea̧ dadëji̧ri̧ pio ji̧ri̧.