Techaronichȩche Ma̧ȩ 3:6 - Biblia Pume

⁶ Jabo yaba̧ pea ma̧na̧na̧ra̧diibe Timoteo judi. Pio dibëiäpȩ järëremȩrȩ ma̧ȩ goae oa chia ma̧na̧na̧ra̧diibe pio dibë chjiari. "Aja̧, Ütë tjamo̧ pio ju̧i̧ chjuari̧ quëna̧diro̧jo̧ȩ" yo̧a̧diibe. "Ado pio ju̧i̧ ea tjamo̧ji̧ri̧rȩ cjo̧ro̧dirȩ jibëa̧ oti̧ pio ji̧ri̧bo" yo̧a̧diibe. "Ado pio dibë, jabechji̧ cjäri̧ri̧ cjia jo̧rȩtadiro̧dibe" yo̧a̧diibe. "Ado mȩnȩro̧ pio ji̧ri̧iäpȩmo̧ odai̧ tarari̧ jo̧rȩtami̧ odai̧ tarari̧ jo̧rȩtadiro̧dibe peaja̧di" yo̧a̧diibe. Aja̧, ja̧di ta̧rëri̧ ni̧bä chjaoa̧diibe pio dibë chjiari.

Techaronichȩche Ma̧ȩ 3:6 Iomraidhean Croise

Urëdi oa jo̧rȩta tänȩrea̧ Ma̧ȩ 25:25

Ca̧ tjo üdë ui ja̧bomi̧ dari̧ cjiadique ma̧ȩ oa ta̧rëdëa̧ oaiä. Jabo jachiri ma̧na̧mȩ ma̧ȩ goae üdë ma̧na̧na̧ra̧ oaiä, jabechji̧ ui chjöchja üdë ca̧ tjo oa ma̧ chjupi̧ bagari̧ bëdü tänȩmi̧ dari̧ japadejȩ cüdë ma̧ȩ oa ta̧rëa̧ oaiä.

Japarea̧ 16:1

Ado Pablo judi go̧düdärärëremȩde Derebe quȩmȩ bë ma̧ri̧räpȩ. Ado judiri jämȩrȩ go̧düdäräa̧de Irichara quȩmȩ bë ma̧ri̧räpȩ. Ado ju̧ri̧pȩ dëbëdiärëremȩdejȩ Timoteo quȩmȩ ju̧i̧, Jechu ju̧i̧iäpȩmo̧ quëna̧mȩ pio ju̧i̧. Ado jea̧ nö̧riyi̧ jini̧ judiorëreyi̧nȩ, jabo nö̧rimȩ judi giriegorëremȩde. Ado jo̧ji̧ni̧ jini̧ jabechji̧ quëna̧yi̧rȩ cjo̧ro̧rëreyi̧ne.

Japarea̧ 18:1

Ado Pablo judi Atenaräpȩ ja̧di ta̧rëri̧ ni̧bä chjaoa̧ duri oa, pio jiro bë ma̧ri̧ri pio judiri go̧dümȩrȩ järëremȩde Cori̧tio quȩmȩ bë ma̧ri̧räpȩ.

Japarea̧ 18:5

Jabo Chira judi, Timoteo pio judiborë, Machedonia quȩmȩ chiriri pio judiri go̧düdäräa̧rä, Pablo judi ira̧ japea̧ cjiamȩ jo̧ oa chjarapë ja̧beparërea̧ ji̧, jabechji̧ oëra̧diärea̧ decjiari̧ ano̧ mire ja̧bepamȩpea̧de Ütë tjamo̧ ja̧ ma̧ȩ maea oa a̧ra̧ano̧pea̧ oa. Aja̧, judio judiro̧ chjadëri̧ quëna̧pea̧ oa, 'Aja̧, Jechu judi Ütërë mitëa̧ pio judidida, Ütërë mitëa̧ Chjätä Tänȩmȩ pio judidida' quëna̧pea̧ oa goae tarari̧ a̧ra̧ano̧tarëremȩdejȩrȩ.

Cori̧tio Ma̧ȩ 1 11:2

Danȩrȩ ca̧ oti̧, ma̧ chiadëri̧ cjiari̧ jo̧rȩtarequededibe mȩnȩro̧ pio coa a̧dë jo̧rȩtadë tara, mȩnȩro̧ cüdë dibë a̧ra̧ano̧rërea̧ ma̧ȩrä jabë cjo̧ro̧ tara.

Cori̧tio Ma̧ȩ 1 13:13

Ja̧di tara yo̧requededibe ca̧ oti̧. Tjarari̧de bucho ana̧ cjiadiäpamȩ üdë. Tjarari̧de yuropadëpamȩ üdë. Jabechji̧ Ütë tjamo̧ pio ju̧i̧iäpȩmo̧ quëna̧rea̧ üdë cja̧rȩmȩde. Ado Ütë tjamo̧ pio ju̧i̧ chjuari̧ quëna̧mȩrȩ jidatarea̧ üdë, judi pio ibë chjiari japapea̧ pio ju̧i̧ jidatarea̧ üdë peaja̧di cja̧rȩmȩde. Ado ibëa̧ dëbëti̧ra̧ chia earea̧ üdë peaja̧di cja̧rȩmȩde. Jabo danȩrȩ, ji̧dë u̧i̧ ba chiamȩ üdë, jabechji̧ earea̧ pio judide. Tjamo̧ davä. Ji̧dë u̧i̧ ba chiade earea̧ üdë. A̧dë chjäte ba chiamȩ pio judide. Ado pio ju̧i̧iä pio jiro no̧mi̧ darä cjo̧ro̧tä earequededibe ca̧ oti̧, mȩnȩro̧ dibëa̧ pumȩ chjadëri̧ a̧dopea̧ oa, Tjo tjamo̧ judi dibë yürüa̧ra̧ pio ju̧ri̧ra̧ chjadëri̧ ja̧bepapea̧ oa. Aja̧, dibëa̧ pumȩ pio ji̧ri̧ tjamo̧ri̧ earea̧mi̧ da no̧rä cjo̧ro̧tä eamȩrȩ go̧ȩparequededibe.

Garata Ma̧ȩ 5:6

Jabechji̧ a̧ro̧rȩ Jechu Quiricho pio judiri ja̧pe baga̧ oaiä, budoa̧ üdë badë mapea̧de. Ado pio ju̧i̧iä a̧dodë madiibe Ütë tjamo̧ ju̧i̧iä. Ado budodëa̧ üdë peaja̧di badë maeade. Peaja̧di a̧dodë madiibe. Jabechji̧ quëna̧ pio judimo̧rȩ ba chiade. Chjadëri̧ a̧dodiibe. Ado a̧ro̧rȩ quëna̧ji̧ri̧rȩ cjo̧ro̧ro, jabechji̧ Ütë tjamo̧ pio ju̧i̧ eariä cjo̧ro̧parea̧rȩ, pumȩ pio ji̧ri̧iäpȩmo̧bo.

Pjiripo Ma̧ȩ 1:8

Ado Ütë tjamo̧ judi tjamo̧ri̧ dabadique davä, cüdë dibë cjäri̧ri̧ cjia jo̧rȩtamȩ oa, dibë tjamo̧ri̧ eamȩ oa. Jabechji̧ Jechu Quiricho pio judi eara̧ pio ju̧ri̧ra̧ earequededibe peaja̧di.

Corochȩche Ma̧ȩ 1:4

Jabechji̧ a̧ro̧rȩ pio dibë chjiari ma̧ȩ goae oa goë ta̧rëa̧ oaiä, ma̧ chiadëri̧ cjia tjamo̧rea̧rȩ ca̧ oti̧. Tjamo̧ davä. Mȩnȩro̧ Jechu Quiricho pio ju̧i̧ quëna̧ji̧ri̧pea̧ pio ju̧i̧ ta̧rëa̧ oaiä, mȩnȩro̧ Ütë tjamo̧ ja̧ pumȩ ütëbodärä oa eaji̧ri̧rȩ cjo̧ro̧a̧ pio ju̧i̧ ta̧rëa̧ oaiä, jabechji̧ ma̧ chiadëri̧ cjiari̧ jo̧rȩtaji̧ri̧rȩ ni̧bärea̧ro̧jo̧ȩ, ‘chjadëri̧ japea̧diji̧ri̧da’ quëna̧ jo̧rȩtaji̧ri̧rȩ.

Corochȩche Ma̧ȩ 4:18

Ado yaba̧ ca̧ ichira̧ pio yoamo̧i̧ ma̧ȩ oa go̧ȩparequededibe. Jearea̧ chjadürequededibe. Ado danȩrȩ, a̧dë jo̧rȩtadë machji̧coe chaäa̧ oa cjiamȩ oa, chatu chiamȩ chjipararira̧ cji̧däa̧ oa cjiamȩ oa. Cjäri̧ri̧ cjia jo̧rȩtachji̧coe. Aja̧, goë cjo̧dërequede Ütë tjamo̧ pio ju̧i̧iä, judi pio dibë cjäri̧ri̧ cjiamȩrȩ a̧dopea̧ oa. Aja̧, pio yoamo̧i̧ ma̧ȩ oa go̧ȩpe chjadürequededibe ca̧ oti̧. Dibëa̧ omȩ, Pablo

Techaronichȩche Ma̧ȩ 1:3

Jabechji̧ mȩnȩro̧ Jechu pio ju̧i̧ chjuari̧ quëna̧ oaiä, pio ju̧i̧ ea tjamo̧ji̧ri̧rȩ cjo̧ro̧a̧ oaiä, 'jabechji̧ chjadëri̧ japadiro̧da, pio ju̧i̧ ja̧ oa ana̧ri̧ ja̧bepadiro̧da, ado jidatarea̧ chiarë cjo̧ro̧diro̧da, Ano̧mȩ Jechu Quiricho judi ma̧na̧pea̧ ji̧ ji̧dë ma jidatadiro̧da, ado pio ju̧i̧iä chjai̧dëri̧ chjätäräbo ma̧ chjua cjo̧ro̧diro̧da' quëna̧ jo̧rȩtaji̧ri̧rȩ ni̧bärea̧ro̧jo̧ȩ ibëa̧ Ama̧i̧ Ütë pio ju̧i̧.

Techaronichȩche Ma̧ȩ 2:17

Jabo danȩrȩ ibëa̧ oti̧, a̧ro̧rȩ dibë a̧dë ma̧na̧rërea̧ ji̧, japamitë boi̧chji̧ chjätä ëte odai̧ tarari̧ jo̧rȩte chjaorëreji̧ri̧rea̧ro̧dibe darërea̧ oaiä. Ado pio ju̧i̧iä ado chjereno̧ datämi̧ cjiaji̧ri̧rȩ jäpatea̧rea̧rȩ, jabo cjäri̧ marea̧rȩ, järea̧ dadëa̧rea̧rȩ. Ado pio ju̧i̧iä dëbë dae charea̧ dadëji̧ri̧borë, jabechji̧ ana̧ri̧ jo̧rȩtarëreji̧ri̧rea̧ro̧dibe, pio dibë nö̧taji̧ri̧mi̧ dari̧ cjiaji̧ri̧rȩ.

Techaronichȩche Ma̧ȩ 2:9

Ado danȩrȩ ca̧ oti̧, ¿jo̧rȩtadënȩrȩ? A̧ro̧rȩ dibëa̧ chjarerä ana̧ri̧ ja̧beparërea̧ ji̧ ¿jo̧rȩtadënȩrȩ? Doromo̧dë oa jabo gȩrȩräbo ja̧bepe cjiarëreji̧ri̧rea̧rȩ ibëa̧ chëre oa boapea̧ oa. Jabechji̧ pio dibëiä cjo̧dëtärea̧ ji̧, cjäri̧ marea̧rȩ, ibëa̧ oa ja̧beparëreji̧ri̧rea̧rȩ ibëa̧ jurarea̧ oa gatëpea̧ oa. Tjamo̧ davä. A̧ro̧rȩ Ütë ja̧ ma̧ȩ chjadëi̧ oa a̧ra̧ano̧rërea̧ ji̧, ja̧di da maeari̧ ja̧bepe cjiarëreji̧ri̧rea̧rȩ pio dibëiä cjo̧dëchea oa.

Techaronichȩche Ma̧ȩ 3:7

Ado a̧ro̧rȩ ja̧di ta̧rëri̧ ta̧rëa̧ oaiä, ma̧ chiadëri̧ cjia tjamo̧pea̧rea̧rȩ ibëa̧ oti̧. A̧ro̧rȩ ma̧i̧ da oa chjätäji̧ri̧borë, conȩdarea̧ pio ju̧i̧ taraji̧ri̧borë, jabechji̧ ma̧ chiadëri̧ cjiari̧ cjatäcjie jo̧rȩtarea̧rȩ pio dibë chjiari ta̧rëa̧ oaiä, "chjuari̧ quëna̧ji̧ri̧rȩ cjo̧ro̧dirȩ" yo̧a̧ oa ta̧rëa̧ oaiä.

Techaronichȩche Ma̧ȩ 2 1:3

Danȩrȩ ca̧ oti̧, pio dibë jo̧rȩtaji̧ri̧rȩ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧, 'chjadëri̧ a̧doa̧diji̧ri̧da' quëna̧ jo̧rȩtaji̧ri̧rȩ. Ado ja̧di dari̧ jo̧rȩtapea̧ üdë jabechji̧ chjadë tjamo̧de. Jabechji̧ mȩnȩro̧ ji̧dë u̧i̧ chjuari̧ quëna̧ji̧ri̧pe baga̧ oaiä, mȩnȩro̧ dibëa̧ pumȩ ji̧ri̧ ji̧dë u̧i̧ eaji̧ri̧pe baga̧ oaiä, dibëa̧ dëbëti̧ra̧ chia ji̧dë u̧i̧ eaji̧ri̧pe baga̧ oaiä, jabechji̧ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧.

Timoteo Ma̧ȩ 1 1:5

Pio ju̧i̧iä yo̧requedemȩ Timoteo. To̧bari̧ chi̧dëeajȩrȩ. Jibëa̧ dëbëti̧ra̧ chia ea tjamo̧ji̧ri̧rȩ cjo̧ro̧tä chi̧dëeajȩrȩ. Danȩ, ¿tjana̧ri cjitëde tjamo̧ri̧ ea̧ üdë? Tjana̧ridë, jabechji̧ coëma cjiari̧ jo̧rȩtarea̧ chji̧ri pio judiri cjitëde. Cjo̧dërë tüe baämi̧ dari̧ jo̧rȩtadëmȩ chji̧ri pio judiri cjitëde. Yadë maeara̧ quëna̧mȩ chji̧ri pio judiri cjitëde. Ado ja̧di dari̧ eaji̧ri̧rȩ cjo̧ro̧täreji̧ri̧dirȩ.

Timoteo Ma̧ȩ 2 1:3

‘Ütë tjamo̧ judi chjadëri̧ japea̧diji̧da’ quëna̧ jo̧rȩtamȩrȩ ji̧dë ma goë cjo̧dë chjaorequedemȩ Timoteo, doro gȩnȩräbo. Jabechji̧ ca̧ ütëti̧rea̧ pio judiro̧ Ütë tjamo̧ ja̧ oa ja̧beparërea̧mi̧ ja̧beparequede peaja̧di, pio mȩa ji̧dë ma goë cjo̧dëmȩrȩ. Aja̧, cjo̧dërë tüe baämi̧ dari̧ jo̧rȩtadëmȩ chji̧ra̧ ja̧bepamȩrȩ goë cjo̧dërequede pio mȩa chjiari.

Pjiremo̧ 1:5

Jabechji̧ pio mȩa chjiari ji̧dë ma goë ta̧rërequede omȩ. Tjamo̧ davä. Mȩnȩ Ütë tjamo̧ ja̧ pumȩ ütëbo oa tjamo̧ri̧ ea̧ pio ju̧i̧ chjiari goë ta̧rërequede, mȩnȩ ibëa̧ Ano̧mȩ Jechu pio ju̧i̧iäpȩmo̧ chjuari̧ quëna̧ pio ju̧i̧ chjiaribo.

Ebereo Ma̧ȩ 13:3

Ado danȩrȩ, cjäri̧ri̧ cjia jo̧rȩtachji̧jȩrȩ chaärea̧ bëräpȩ tutia̧ oa cjo̧ro̧ji̧ri̧ pio ji̧ri̧. Jabechji̧ pio ji̧ri̧ nö̧ta ëba cjiami̧ dari̧, pio ji̧ri̧ nö̧ta tarami̧ dari̧ jo̧rȩtachji̧jȩrȩ, chjadëri̧ a̧doji̧ri̧rȩ. Ado gitoi̧ dari̧ conȩda̧ oa cjiaji̧ri̧ pio ji̧ri̧ peaja̧di cjäri̧ri̧ cjia jo̧rȩtachji̧jȩrȩ. Jabechji̧ dibëa̧ icjarabo conȩda̧ oa cjiami̧ dari̧ cjäri̧ri̧ cjia jo̧rȩtachji̧jȩrȩ, pio ji̧ri̧ ëba taraji̧ri̧mi̧ dari̧.

Ebereo Ma̧ȩ 13:7

Ado dibë pearä a̧ra̧ano̧rëreji̧ri̧ pio ji̧ri̧, Ütë tjamo̧ ja̧ ma̧ȩ oa dibë pearä a̧ra̧ano̧rëreji̧ri̧ pio ji̧ri̧ jo̧rȩtachji̧jȩrȩ, urëdi oa jo̧rȩtaji̧ri̧rȩ. ‘Aja̧, judiro̧ ibëa̧ chjarerä cjo̧ro̧a̧ nö̧ta ja̧di dari̧ cjo̧ro̧rëreji̧ri̧diro̧da, ja̧di dari̧ ni̧bärëreji̧ri̧diro̧da, jabechji̧ ja̧di dari̧ ja̧beparëreji̧ri̧diro̧da, ado pio ju̧i̧iä jabechji̧ pio ji̧ri̧ cho̧rë cjo̧ro̧täreji̧ri̧a̧ro̧ji̧ri̧da, jabechji̧ pio judiro̧ cjo̧ro̧mi̧ dari̧ cjo̧ro̧täreji̧ri̧ra̧ro̧da’ quëna̧pea̧ oa chjadëri̧ jo̧rȩtachji̧jȩrȩ ca̧ oti̧.

Juan Ma̧ȩ 1 3:23

Danȩrȩ ca̧ oti̧, ¿tjana̧ oa japariä cjo̧ro̧tä eadiibe Ütë tjamo̧ judi? Tjana̧dë, jabechji̧ Joja pio ju̧i̧, Jechu Quiricho pio ju̧i̧ quëna̧riä dopatä eadiibe. Ado Jechu Quiricho judi yo̧a̧mi̧ eaji̧ri̧rȩ cjo̧ro̧tä eadiibe peaja̧di, ibëa̧ dëbëti̧ra̧ chia ea tjamo̧ji̧ri̧rȩ. Aja̧ ca̧ oti̧, ja̧di dari̧ japatä eadiibe Ütë tjamo̧ judi.