Techaronichȩche Ma̧ȩ 2:7 - Biblia Pume

⁷ Jabo cjäri̧ marea̧ro̧dibe, ja̧di ta̧rëri̧ yo̧dëa̧rea̧ro̧dibe, jabo jabechji̧, joji̧ri̧mi̧ dari̧ japarëreji̧ri̧rea̧ro̧dibe chuchu yürüji̧ri̧mi̧ dari̧. Aja̧, ma̧ chjua daji̧ri̧rȩ jidarëreji̧ri̧rea̧ro̧dibe bücjüi̧ idaji̧ri̧mi̧ dari̧.

Techaronichȩche Ma̧ȩ 2:7 Iomraidhean Croise

Japarea̧ 13:18

Ado ibëa̧ ütëti̧rea̧ ji̧ri̧ chiri maearäpȩ chjätäti̧ cjiaji̧ri̧ oa chjadëri̧ jidarëremȩdejȩrȩ 40 ui nö̧ta. Pio jȩaiäpȩmo̧ chjai̧dëri̧ jape chjaoa̧räbo, jabechji̧ chjadëri̧ jidarëremȩdejȩrȩ.

Cori̧tio Ma̧ȩ 1 2:3

Ado ja̧dëa ji̧ cüdë pio dibëiäpȩ go̧düdäräa̧rä, jabechji̧ bücjüri̧ cjia tjamo̧mȩrȩ a̧ra̧ano̧rëremȩrequededibe ju chiadëmȩmi̧ darë. ‘Jabechji̧ nö̧tadëquëda, ca̧ ju chiarea̧ra̧ a̧ra̧ano̧rea̧mi̧dëquëda, ado Ütë tjamo̧ judi coa yürüa̧ ja̧beparea̧ pio ju̧i̧ chjadëri̧ ja̧bepadärärea̧ dadaemȩ jirocuni̧da, jabechji̧ ma̧ȩ ta̧rë ëte jiadapai̧dadiro̧da’ quëna̧ jo̧rȩtamȩrȩ bücjüri̧ cjia tjamo̧rëremȩrequede ca̧ oti̧. Ja̧di tara cüdë pio dibëiäpȩ go̧düdäräa̧rä, jabechji̧ jana̧ jana̧ cjiami̧ tarari̧ jape chjaorëremȩdique ca̧ chji̧ üdë. Ado i ma̧na̧ gura cjiami̧ tarari̧ cjiarëremȩdique.

Cori̧tio Ma̧ȩ 1 9:22

Ado danȩrȩ, cüdë ju chiadëmi̧ dari̧ quëna̧ji̧ri̧ pio ji̧ri̧ nö̧ta cjo̧ro̧rä judi, peaja̧di ju chiadëmȩmi̧ dari̧ quëna̧mȩ pio judimi̧ dari̧ cjo̧ro̧requede. Jabechji̧ cüdë ju chiadëmi̧ dari̧ quëna̧ji̧ri̧ pio ji̧ri̧ nö̧ta cjo̧ro̧rä, pumȩrȩ jëdano̧a̧ oa cjiamȩ ütë pio ju̧i̧iäpȩmo̧ yürüa̧ go̧a̧ pio ju̧i̧ juradërequede. Tjamo̧ davä. Ado pio ji̧ri̧ nö̧ta cjo̧ro̧rä judi, ‘Ütë pio ju̧i̧iäpȩmo̧ yürüa̧ go̧a̧ pio ju̧i̧ jurapea̧ üdë china̧chjadida’ quëna̧ji̧ri̧ pio ji̧ri̧ nö̧ta cjo̧ro̧rä judi, jabechji̧ ju chiadëmȩmi̧ dari̧ quëna̧mȩ pio judimi̧ dari̧ cjo̧ro̧requede pio jiro go̧a̧ oa juradëmȩrȩ. Jabechji̧ cüdë pio jiro go̧a̧ oa jurapai̧ daräbo, pio jiro go̧a̧ üdë pio coaiä china̧chjadëräbo, jabechji̧ ju chiadëmȩmi̧ dari̧ quëna̧mȩ pio judimi̧ dari̧ cjo̧ro̧requede, cüdë pio ji̧ri̧ ana̧ri̧ jo̧rȩta tänȩchea oa, cüdë pio ji̧ri̧iäpȩmo̧ chjadëri̧ a̧ra̧ano̧rea̧ dapea̧ oa. Tjamo̧ davä. Pio coaiä china̧chjadë pio ju̧i̧ china̧chjarämi̧ cjiaji̧ri̧ pio ji̧ri̧ nö̧ta ëba cjo̧ro̧rä judi, jabechji̧ ju chiadëmȩmi̧ dari̧ cjo̧ro̧requede cüdë. Jabechji̧ pio ji̧ri̧ chjadëri̧ a̧dorea̧ dapea̧ oa ja̧di dari̧ cjo̧ro̧requede, pio ji̧ri̧ chjadëri̧ ju chiaparȩpea̧ oa. Jabechji̧ cüdë eami̧räpȩ järä, cüdë eami̧ pumȩ pio ji̧ri̧ ja̧ chjarerä cjo̧ro̧rä, pio judiro̧mi̧ dari̧ cjo̧ro̧requede cüdë pio ji̧ri̧iäpȩmo̧ chjadëri̧ a̧dopea̧ oa, quëna̧dëji̧ri̧ pio judiro̧ Quiricho pio ju̧i̧iä chjätärea̧ dapea̧ oa, quëna̧ji̧ri̧ pio judiro̧ ji̧dë u̧i̧ ju chiarea̧ dapea̧ oa.

Cori̧tio Ma̧ȩ 2 10:1

Danȩrȩ ca̧ oti̧, goë ta̧rëa̧requede o judiro̧ pio coa chjiari yo̧a̧bea pio ju̧i̧ chjiari. “Aja̧, Pablo judi jachiri pio judiri go̧ȩpe chjadüa̧rämo̧ oëadëmȩmi̧ darë go̧ȩpe chjadüdiibe, uapadëmemi̧ darë” yo̧vedirȩ. “Jabo cjäri̧ made, ibëa̧ chjarerä cjo̧ro̧a̧rä, to̧bari̧ chi̧dëeadërëremȩdiibe, jabomo̧ uapamȩrȩ ni̧bärëremȩdiibe, idëri̧ cjiamȩrȩ” yo̧vedirȩ. Aja̧ ca̧ oti̧, ja̧di ta̧rëri̧ yo̧a̧ jirovedirȩ oëra̧ a̧ra̧ano̧ji̧ri̧ pio judiro̧, pio ji̧ri̧ ta̧rë ja̧boji̧ri̧ pio judiro̧borë. Aja̧, ja̧di ta̧rëri̧ yo̧ jirovedirȩ pio coa chjiari. Jabo danȩrȩ, chjadëri̧ ta̧rëchji̧vä. Jabechji̧ Pablo pio judirequede. Ado pio cüdë chi̧dëeatarequededibe, pio dibë bücjüi̧ idamȩmi̧ darë. Jabechji̧ Quiricho pio judiri ma̧na̧mȩra̧ pio ju̧ri̧ra̧ jo̧rȩtamȩrȩ chi̧dëeatarequededibe, pio dibë chjiari bücjüri̧ cjia tjamo̧mȩrȩ, pio dibë ma̧ chjua jo̧rȩtamȩrȩ.

Cori̧tio Ma̧ȩ 2 13:4

Jabo dëdë, pumȩ judiro̧ Quiricho pio ju̧i̧ ja̧bo tänȩrërea̧ ji̧, ju chiadëmȩ oa cji̧de ja̧bo tänȩrëreji̧ri̧diro̧jo̧ȩ toro. Ado pio judi ju chiadërërea̧mi̧ ju chiadërea̧rȩ peaja̧di. Jabo danȩrȩ, bëdüa̧ oa cjo̧ro̧de yaba̧ Ütë tjamo̧ ja̧ jauëchja pio oaiä. Aja̧, bëdüa̧ oa cjo̧ro̧de, ju chia tjamo̧mȩrȩ. Ado peaja̧direa̧rȩ ca̧ oti̧. Jabechji̧ Quiricho pio ju̧i̧ nö̧ta cja̧rȩmȩpe bagarëreji̧ri̧rea̧rȩ. Ado pio ju̧i̧iä a̧ro̧rȩ pio dibëiäpȩ go̧düdäräa̧rä, jabechji̧ ju chia tjamo̧ji̧ri̧ oa daparenȩro̧ibe. Tjamo̧ davä. A̧ro̧rȩ pio dibë bape chjaomi̧ dari̧ ütarapea̧ oa pio ju̧ri̧pȩ go̧düdäräa̧rä, jabechji̧ Quiricho pio judiri ma̧na̧mȩ cjo̧ro̧rea̧ chiaji̧ri̧ oa daparenȩro̧ibe, Ütë tjamo̧ pio judiri ma̧na̧mȩ jauëchjarea̧ pio ju̧i̧ na̧rȩji̧ri̧ oa.

Garata Ma̧ȩ 4:19

'Jabechji̧ ca̧ u̧ri̧diro̧ca̧da' quëna̧ jo̧rȩtarequededibe, gito ana̧ri̧ jo̧rȩtamȩrȩ. Jabechji̧ cüdë pio dibë chjiari ana̧ri̧ ja̧beparërea̧ ji̧, jabechji̧ ado chjereno̧ ja̧beparequede pio dibë a̧dopea̧ oa. Jabechji̧ iei̧ jini̧ bomai̧yi̧rȩ boi̧chji̧ ji̧ gitori̧ arami̧ dari̧ ado chjereno̧ ja̧beparequede, gitori̧ jo̧rȩtamȩrȩ. Aja̧, mȩnȩro̧ Quiricho pio judimi̧ dapea̧rä yuro ja̧beparequede ca̧ oti̧.

Techaronichȩche Ma̧ȩ 2:11

Jabechji̧ jäjäa judi jibëa̧ u̧ri̧ ji̧ri̧ japami̧ dari̧ chi̧dëea̧rea̧ro̧dibe pumȩ nö̧tai̧ oa. Ma̧ chiadëri̧ cjiape järea̧mi̧ dari̧ ju chiaparȩa̧rea̧ro̧dibe. Ado mȩnȩro̧, 'Aja̧, tjamo̧ri̧ yo̧diro̧ibëda, ja̧di dari̧ japea̧diro̧ibëda' quëna̧ dabanȩrȩ.

Santiago Ma̧ȩ 3:17

Jabo a̧dëri pio judiri ma̧na̧mȩ jo̧rȩtarea̧ra̧ cjo̧ro̧mȩ judi, tjaoëpai̧ dari̧ cjo̧ro̧de. Jabechji̧ coëma cjiari̧ cjo̧ro̧de, chjadë maea oa japamȩrȩ. Chjaodëri̧ ërecjiape bagadëde, jabo chjadëri̧ ëba cjo̧ro̧dejȩrȩ jibëa̧ pumȩ ji̧ri̧, ori̧ bagari̧ ëba cjo̧ro̧pea̧ ji̧ järimȩrȩ. Ado ma̧ chjua ëba cjo̧ro̧dejȩrȩ, ütëbo oa eamȩrȩ. Ado ji̧ri̧ ea tjamo̧ tara, jabechji̧ cjäri̧ri̧ cjiamȩrȩ dadejȩrȩ, pio ji̧ri̧ chjiari bücjüri̧ cjiamȩrȩ. Ado pio jȩaiäpȩmo̧ chi̧dëeamȩ pio ju̧i̧, jabechji̧ ma̧ chiadëri̧ cjiamȩrȩ ta̧rë ja̧bodejȩ, ji̧dë u̧i̧ na̧e chiape bagatämi̧ cjiamȩrȩ. Ado jurarea̧ goae tjamo̧ oa yürümi̧ dari̧ cjo̧ro̧de, chjadëri̧ na̧rȩmȩrȩ. Ado o ji̧ri̧mo̧i̧ ba chia dadëdejȩrȩ, jabo ütëbo oa cja̧rȩmȩ ba chiara̧ dadejȩrȩ. Ado coëma cjiari̧ cjo̧ro̧cji̧ quëna̧ japadëmȩde, jabo jabechji̧ coëma cjiari̧ cjo̧ro̧de, yadë maeara̧.