Techaronichȩche Ma̧ȩ 2:6 - Biblia Pume

⁶ Ado a̧ro̧rȩ a̧ra̧ano̧a̧ ji̧, 'jabechji̧ ibë ta̧rë chaji̧ri̧ pio judiro̧ ba chia jo̧rȩtapea̧ chiadiro̧ibëda, ado o judiro̧borë ba chia jo̧rȩtapea̧ chiadiro̧ibëda' quëna̧ji̧ri̧rȩ a̧ra̧no̧dëa̧rea̧ro̧dibe. Jabo danȩrȩ, Jechu Quiricho pio judi ibë chjadüa̧ tara, pio ibë tjamo̧ yo̧rea̧ yürüa̧ tara, jabechji̧ chjadëtäremȩde a̧ro̧rȩ yo̧a̧rä judi, jabechji̧ "Ba chia dachjiibe" yo̧a̧rä judi.

Techaronichȩche Ma̧ȩ 2:6 Iomraidhean Croise

Da̧de 4:30

Ado pjatë uë tjamo̧ri pio judiri ütarë darëremȩdejȩ jënȩ cjo̧ro̧mȩ bë ma̧ri̧räpȩ. Ado ma̧ chiadëri̧ cjiamȩrȩ ni̧bämȩpea̧de, ja̧di ta̧rëri̧ yo̧mȩrȩ: 'Aja̧, Babironia bë ma̧ri̧ üdë bë boi̧dë tjamo̧dida, chjacjiamȩ tjamo̧dida, jabechji̧ pio cüdë ca̧ea̧ ma̧na̧ri̧ japea̧ oaiä chjadëri̧ cji̧däa̧ oa cjiadida, jabechji̧ cüdë ju chia tjamo̧mi̧ dari̧ cjiamȩ tara ja̧di dari̧ japarea̧ daea̧quëda, ca̧ chjacjiamȩrea̧ üdë ana̧ri̧ na̧rȩa̧ oa cjiapea̧ oa cji̧däa̧ oa cjiadida' quëna̧ jo̧rȩtamȩrȩ ni̧bämȩpea̧de jënȩ jibëa̧ bë a̧ro̧a̧rä ütarë daea̧ nö̧ta. Judi Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtatärea̧ ji̧, 'A̧ja̧, Ütë tjamo̧ pio judi chjadëri̧ a̧doa̧dicoada, pio yoa bë ma̧ri̧ oa cji̧däpea̧ ji̧ chjadëri̧ a̧doa̧dicoada' quëna̧ jo̧rȩtamȩrȩ ütarë datärea̧ ji̧, cjäri̧ made, pio jȩa chjiarimo̧ jo̧rȩtamȩrȩ darëremȩdejȩ, jibëa̧ chji̧rämo̧ jo̧rȩtatamȩrȩ.

Juan 12:43

Jabechji̧ pumȩ ja̧ ya oaiä goaeri̧ ta̧rëa̧ üdë ji̧dë ui goaerëremȩde pio ji̧ri̧iä. Jabechji̧ Ütë tjamo̧ judi pio ji̧ri̧ chjiari chjacjiamȩri̧ ni̧bäa̧ üdë goae tjamo̧tärea̧ ji̧, goae tjamo̧dërëremȩdejȩrȩ. Tjamo̧ davä. Ütë tjamo̧ judi pio jibëiäpȩmo̧ chjacjiamȩri̧ yo̧a̧ üdë goae tjamo̧dërëremȩdejȩrȩ.

Juan 5:41

Ado ji̧dë u̧i̧ yo̧mȩrȩ a̧de yo̧a̧dejȩrȩ Jechu judi: —Danȩrȩ, dai chirirä cjo̧ro̧ji̧ri̧ pio judiro̧ pio coa chjiari chjacjiamȩri̧ ni̧bädërä judi, jabechji̧de coaiä. Jabechji̧ mȩnȩro̧ pio coa chjiari chjacjiamȩri̧ ni̧bäa̧ üdë goaedëdique —yo̧a̧dejȩrȩ—.

Juan 5:44

Ado pio ju̧i̧ uëri dibëa̧ dëbëti̧ra̧ chia ma̧ chiadëri̧ cjiaji̧ri̧rȩ ba chiaparȩmi̧ dari̧ chjacjiamȩri̧ ni̧bärenȩrȩ. Aja̧, dibëa̧ pumȩ judiro̧ pio dibë ba chiaparȩmi̧ dari̧ ni̧bärä judi goae tjamo̧didibe, jabo 'Ütë tjamo̧ judi pio coaiäpȩmo̧ ba chia datä eacuni̧da' quëna̧ jo̧rȩtadë marenȩro̧jo̧ȩ. Jabechji̧ Ütë tjamo̧ pio judimo̧rȩ Ütëräbo, 'pio coaiäpȩmo̧ ba chia datä eacuni̧da' quëna̧ jo̧rȩtadë marenȩro̧jo̧ȩ. Ado pio ju̧i̧iä quëna̧rea̧ dadërenȩro̧jo̧ȩ.

Juan 7:18

Jabo o judiro̧, jibëa̧ ma̧na̧ri̧ jo̧rȩtaji̧ri̧rȩ a̧ra̧ano̧ji̧ri̧ pio judiro̧, cjäri̧ madirȩ, pio jibëiäpȩmo̧ ma ba chia datä eadiro̧jȩrȩ pumȩ ji̧ri̧. Pio jibë chjiarimo̧i̧ chjacjiamȩri̧ ni̧bätä eadiro̧jȩrȩ —yo̧a̧dejȩrȩ—. Jabo danȩrȩ, pio jȩa chjadüa̧mȩ pio ju̧i̧iäpȩmo̧ ma chjacjiamȩri̧ ni̧bätä eamȩ pio judi, jabechji̧ coëma cjiari̧ cjo̧ro̧de, pumȩ pio ji̧ri̧iäpȩmo̧ u̧i̧pe ni̧bärea̧ decjiari̧.

Cori̧tio Ma̧ȩ 1 11:9

Ado üi̧ judi pearä pareapea̧ oa cjiarërea̧ ji̧, jabechji̧ iei̧ pio ju̧i̧ ja̧ oa pareapea̧ oa cjiadërëremȩde jabo iei̧ pio jini̧, dëdë, üi̧ pio ju̧i̧ ja̧ oa pareapea̧ oa cjiarëreyi̧nȩ. Jabechji̧ üi̧ pio ju̧i̧ chjadëri̧ a̧dopea̧ oa pareapea̧ oa cjiarëreyi̧nȩ iei̧ jini̧.

Cori̧tio Ma̧ȩ 2 13:10

Jabechji̧ jachi tjamo̧ri pio judiri go̧ȩpe chjadürequededibe pio yoa ma̧ȩ oa mȩnȩro̧ jabërä chjadëri̧ ano̧ mire jo̧rȩtapea̧ oa, cüdë ju̧ri̧pȩ go̧düdäräa̧rä dibë bape chjaomi̧ dari̧ ütarachea oa. Jabechji̧ Jechurë chjadüa̧ oa tjamo̧ yo̧rea̧ chiamȩborë järidëparȩdëri̧ cjiarequededibe, jabo ju chiaparȩtämi̧ cjiarequededibe ji̧dëri̧. Ado pio ju̧i̧iä jabërä ano̧ mire jo̧rȩtatä earequededibe cüdë dibë bape chjaomi̧ dari̧ ütarachea oa.

Cori̧tio Ma̧ȩ 2 4:5

Jabechji̧ a̧ro̧rȩ ma̧ȩ chjadëi̧ pio ju̧i̧ a̧ra̧ano̧rä, pumȩ judiro̧ pio ibëiäpȩmo̧ ba chia dapea̧ oa a̧ra̧ano̧dë marea̧rȩ, jabo Jechu Quiricho pio ju̧i̧ chjiarimo̧i̧ a̧ra̧ano̧rea̧rȩ. Ütëborë, ‘Ano̧mȩ tjamo̧ pio judimo̧dida’ quëna̧ jo̧rȩtapea̧ oa a̧ra̧ano̧rea̧rȩ, pumȩ judiro̧ pio ju̧i̧iäpȩmo̧ ma chjacjiamȩri̧ ni̧bäpea̧ oa. Jabechji̧ Jechu judi ibë chjätärea̧ yürüa̧ oaiämo̧i̧, jabechji̧ dibëa̧ mu̧i̧tjoi̧mi̧ dari̧ cjiadiäji̧ri̧rȩ a̧ra̧ano̧rea̧ro̧dibe.

Garata Ma̧ȩ 1:10

¿Jabo tjana̧ ju̧i̧iä ja̧di ta̧rëri̧ ni̧bärequededibe ca̧ oti̧? ¿Pumȩ judiro̧ pio coa chjiari chjacjiamȩri̧ ni̧bäpea̧ oa ni̧bärequede? Cjäri̧ marequede, pumȩ pio ji̧ri̧ jo̧rȩtadërequede, jabo Ütë tjamo̧ pio ju̧i̧mo̧i̧ jo̧rȩtareconȩ. Jabechji̧ pio coa chjiari chjadëri̧ ni̧bätä eareconȩ. 'Aja̧, Pablo pio judi chjadëri̧ ja̧bepadida, pumȩ ji̧ri̧ chjadëri̧ chi̧dëeadiji̧ri̧da' quëna̧tä eareconȩ Ütë tjamo̧ ju̧i̧. Jabechji̧ pio ju̧i̧ ja̧ mu̧i̧tjoi̧mȩrȩ ja̧beparequede pio ju̧i̧ ja̧ dachoro. Ado pio ju̧i̧iä pumȩ judiro̧ pio coa chjiari chjacjiamȩri̧ ni̧bäpea̧ ji̧ jo̧rȩtadërequede. Jabechji̧ pio ju̧i̧ jo̧rȩtamȩrȩ cjo̧ro̧rä judi, Quiricho pio ju̧i̧ ja̧ mu̧i̧tjoi̧dëmi̧ dari̧ cjo̧ro̧täremȩrequede jabo pumȩ ja̧ mu̧i̧tjoi̧mi̧ dari̧ cjiadiätäremȩrequede.

Garata Ma̧ȩ 5:26

Ado pio ju̧i̧iä, a̧ro̧rȩ Tjo tjamo̧ pio ju̧i̧ ja̧ chja̧oerä cjo̧ro̧ji̧ri̧pea̧ pio ju̧i̧iä, jabechji̧ ibëa̧ chji̧rämo̧ jo̧rȩtataji̧ri̧rȩ pio ibë chjiari chjacjiamȩri̧ ni̧bädëtäreji̧ri̧rea̧rȩ. Ado ibëa̧ pumȩ ji̧ri̧ ërecjia tänȩdëtäreji̧ri̧rea̧ro̧jȩrȩ. Ado ibëa̧ pumȩ ja̧ oa dae ja̧bo dae ja̧bo dadë matäreji̧ri̧rea̧rȩ, jabo jabechji̧ tjaoëpai̧ dari̧ cjo̧ro̧ matäreji̧ri̧rea̧rȩ Tjo tjamo̧ pio ju̧i̧iä.

Garata Ma̧ȩ 6:13

Jabo judiro̧ budoa̧ oa cjiaräbo, Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiädë madiro̧jo̧ȩ. Ado ta̧rëdiädëji̧ri̧borë budoa̧ oa cjiatä eatadiro̧dibe. Jabechji̧ pio dibë boapea̧ oa budoa̧ oa cjiatä eatadiro̧dibe, pio dibë chjiari goaeri̧ yo̧pea̧ oa.

Techaronichȩche Ma̧ȩ 2:9

Ado danȩrȩ ca̧ oti̧, ¿jo̧rȩtadënȩrȩ? A̧ro̧rȩ dibëa̧ chjarerä ana̧ri̧ ja̧beparërea̧ ji̧ ¿jo̧rȩtadënȩrȩ? Doromo̧dë oa jabo gȩrȩräbo ja̧bepe cjiarëreji̧ri̧rea̧rȩ ibëa̧ chëre oa boapea̧ oa. Jabechji̧ pio dibëiä cjo̧dëtärea̧ ji̧, cjäri̧ marea̧rȩ, ibëa̧ oa ja̧beparëreji̧ri̧rea̧rȩ ibëa̧ jurarea̧ oa gatëpea̧ oa. Tjamo̧ davä. A̧ro̧rȩ Ütë ja̧ ma̧ȩ chjadëi̧ oa a̧ra̧ano̧rërea̧ ji̧, ja̧di da maeari̧ ja̧bepe cjiarëreji̧ri̧rea̧rȩ pio dibëiä cjo̧dëchea oa.

Timoteo Ma̧ȩ 1 5:17

Tjamo̧ jidaji̧ri̧ judiro̧ chjadëri̧ ja̧beparä judi, quëna̧ji̧ri̧ pio ji̧ri̧ chjadëri̧ a̧dorä judi, chjadëri̧ yabo ëba baämi̧ dari̧ ja̧beparä judi, jabechji̧ quëna̧ji̧ri̧ judiro̧ ba chia jo̧rȩtatäreji̧ri̧diro̧jȩrȩ. Ado chjadëri̧ a̧dotäreji̧ri̧diro̧jȩrȩ. Chjadëri̧ ba ano̧täreji̧ri̧diro̧jȩrȩ. Ado Ütë tjamo̧ ja̧ ma̧ȩ oa chjadëri̧ a̧ra̧ano̧pea̧ ji̧ järi tjamo̧ji̧ri̧ pio ji̧ri̧, Jechu ju̧i̧ chjiari ma̧ȩ oa to̧bari̧ ni̧bäpea̧ ji̧ järi tjamo̧ji̧ri̧ pio ji̧ri̧, ji̧dë u̧i̧ ba chia datäreji̧ri̧diro̧jȩrȩ. Ji̧dë u̧i̧ ba ano̧täreji̧ri̧diro̧jȩrȩ.