Jabo danȩ, japamitë ana̧ chjätä ëte, na̧ea̧ri ja̧ji̧ri̧ pio judiro̧ pio yoa chiri oa ma̧na̧na̧ra̧padiro̧jo̧ȩ. Tjamo̧ davä. Na̧ jadama̧i̧ taru pio judiro̧ jibëa̧ bori̧ ji̧ri̧ nö̧rirä, jabechji̧ pio yoa chiri oa ma̧na̧na̧ra̧rea̧ dapadirȩ. Ado judirä bape chjaoparequedejȩrȩ Canaa̧ quȩmȩ chiriräpȩ cjo̧ro̧ji̧ri̧ pio ji̧ri̧. Aja̧, amoreo quȩji̧ri̧ pumȩ pio ji̧ri̧, a̧dë chjäte chjai̧dëri̧ jape cjiaji̧ri̧ pio ji̧ri̧ bape chjaoparequedejȩrȩ tjuri cjiami̧ dari̧ chjai̧dëri̧ japaji̧ri̧ oa —yo̧rëremȩdejȩ Ütë tjamo̧ judi Abara̧ pio ju̧i̧.
Techaronichȩche Ma̧ȩ 2:16 - Biblia Pume16 Jabechji̧ pio ibë tja̧reparȩmi̧ dari̧ japea̧ oaiä, pumȩ ütëbo oa dëbëpe cjiami̧ dari̧ japadiro̧jȩrȩ pumȩ ütëbo oa. Jabechji̧ a̧ro̧rȩ, judiodë pio ji̧ri̧ ni̧bä chjaotärea̧ ji̧, pio judiro̧ chjätärea̧mi̧ dari̧ ni̧bä chjaotärea̧ ji̧, cjäri̧ madiro̧ibe, tuti jape chjaodiro̧ibe a̧ro̧rȩ ni̧bä chjaorea̧mi̧dëri̧. Ado ja̧di dari̧ japea̧ oaiä a̧dë chjäte ma̧i̧ dari̧ jape chjaodirȩ. Ado judiro̧ chjai̧dëri̧ jape chjaoa̧ üdë, jabechji̧ a̧dë chjäte ji̧ra̧ri̧ cjiadiäa̧de yaba̧. Pio ju̧i̧iä Ütë tjamo̧ ja̧ ërecjiarea̧ üdë pio ji̧ri̧iäpȩmo̧ acji cjatäpea̧ ji̧ querediä tjamo̧de. Acji cjatäpadejȩrȩ chjaodëri̧. Faic an caibideil |
Techaronichȩche Ma̧ȩ 2:16
52 Iomraidhean Croise
Jabo pio jiro chiri ütëji̧ri̧ pio judiro̧ ütëdëpe bagapea̧ querediärä, jibëa̧ pumȩ pio judiro̧ a̧dë chjäte chjai̧dëri̧ cjo̧ro̧ji̧ri̧pea̧rä, judiro̧ tjamo̧ri̧ bape chjaorea̧mi̧ dapea̧rä, jabechji̧ ado cja̧rȩmo̧rȩ ano̧ mire ütëmȩrȩ cjo̧ro̧pade, u̧i̧pe u̧i̧pe ni̧bämȩrȩ. Jabechji̧ uapai̧ dari̧ ërecjiapai̧ darë, oëadëmȩ tjamo̧mȩmi̧ darë ano̧ mire ütëmȩrȩ cjo̧ro̧pade, 'ju chia tjamo̧mȩmi̧ dari̧ cjiaquëda' quëna̧ jo̧rȩtamȩrȩ.
Jabo judi pumȩ ja̧ icjara oa yu̧a̧bea yaboi̧, jabechji̧ jäeno̧dejȩrȩ jibëa̧ jadü pio ji̧ri̧iäpȩ, pio ji̧ri̧iäpȩmo̧ yabëpea̧ oa. Jabechji̧ pio jȩaiä ji̧dë u̧i̧ chjai̧dë tjamo̧ pio ji̧ri̧ yabëdejȩrȩ ado cja̧rȩmo̧ yaröca 7 oa. Ado ja̧dëa ji̧ ëba baädejȩrȩ jënȩ cjo̧ro̧rërea̧ icjararäpȩmo̧ pio ji̧ri̧ nö̧ta bëpapea̧ oa. Ado pio jiro pumȩ judi, cjäri̧ made, jënȩ pearä cjo̧ro̧rërea̧mi̧ cjo̧ro̧dëpade. Jabechji̧ ji̧dë u̧i̧ chjadëdëri̧ cjo̧ro̧pade. Ado peaja̧dimi̧ dari̧ cjo̧ro̧panȩrȩ pio yaba̧mȩ yoaiä cjo̧ro̧ji̧ri̧ pio judiro̧. Jabechji̧ mȩnȩro̧ pio coa ji̧dë ma jiada̧ oaiä, cüdë a̧ra̧ano̧a̧ pio ju̧i̧ ji̧dë ma jiade ta̧rëa̧ oaiä, jabechji̧ ji̧dë u̧i̧ chjai̧dëri̧ ano̧ mire cjo̧ro̧panȩrȩ, mȩnȩro̧ pearä cjo̧ro̧rërea̧mi̧dëri̧ —yo̧mȩrȩ ni̧bä chjaorëremȩdejȩrȩ judio ütëti̧ pio ji̧ri̧iäpȩmo̧ Jechu judi.
Ado cjiadiärea̧ japamitë üdë ma̧na̧na̧ra̧bea yaboi̧, jabechji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ chjadëi̧ üdë a̧ra̧ano̧a̧ oa cjiapea̧ chiade chiriräpȩti̧ oa cjo̧ro̧ji̧ri̧ pio ji̧ri̧, pumȩ ütëbodärärë ta̧rërea̧mi̧ dari̧. Tjamo̧ davä. Ütërë yo̧a̧ chja̧oeräpȩ cjo̧ro̧pea̧ pio ju̧i̧ chjiari ma̧ȩ chjadëi̧ üdë oëra̧ti̧ oa a̧ra̧ano̧a̧ oa cjiarämo̧ ma̧na̧na̧ra̧padiibe cjiadiärea̧ japamitë üdë —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧, Orivo quȩmȩ ya̧mi̧räpȩji̧ri̧ oa.
Ado danȩrȩ, pio judirä japamitë chjätä ëte, peaja̧di ta̧rëpanȩrȩ. Tjamo̧ davä. Babui̧ra̧ goë goë ta̧rë chjaopanȩrȩ acji go̧düdäräpaji̧ri̧ pio ji̧ri̧ chjiari, dibëa̧ chiri queri̧räpȩ acji go̧düdäräpaji̧ri̧ pio ji̧ri̧ chjiari. Ado jachi tjamo̧ a̧rȩmȩ chiriräpȩ ju̧ri̧ acji go̧düdäräpaji̧ri̧ pio ji̧ri̧ chjiaribo ji̧dë ma goë goë ta̧rë chjaopanȩrȩ. Tjamo̧ davä. Jibëa̧ dëbëti̧ra̧ chia acji tai̧ chjaoji̧ri̧ pio ji̧ri̧ chjiari babui̧ra̧ goë goë ta̧rëpanȩrȩ. Jabo danȩrȩ ca̧ jadü, ja̧di ta̧rëri̧ goë ta̧rëa̧räbo, ana̧ri̧ jo̧rȩtadëchji̧vä. Jabechji̧ uaparea̧ üdë boadärächedidibe dibëa̧ chji̧ oa. Jabechji̧ ja̧di dari̧ japapadirȩ. Jabo judiro̧ ja̧di dari̧ acji tai̧ chjaoräbo, jabë pjärämȩde cjiadiäa̧ japamitë üdë. Jabë ma̧na̧na̧ra̧dëa̧de. Jabë tarupadëa̧de.
Jabechji̧ yo̧a̧ri̧ bubape bagari̧ tutipadejȩrȩ pumȩ ji̧ri̧. Coëma cjiari̧ cjo̧ro̧ji̧ri̧ pio judiro̧ jibëa̧ buba cjiapea̧ oa tutipadejȩrȩ. Ado coëma cjiari̧ cjo̧ro̧dëji̧ri̧ pio ji̧ri̧ peaja̧di tutipadejȩrȩ jibëa̧ buba cjiapea̧ oa. Jabechji̧ chjai emi̧ da oa pjaepa oaiä, boa chari̧ japami̧ dari̧ japapadejȩrȩ pumȩ ji̧ri̧. Ado ja̧dëa ji̧ chomi̧ da pio ji̧ri̧ chjadëri̧ a̧dopa tänȩpadejȩrȩ chjadëri̧ jidapea̧ oa, chjadëri̧ boeapea̧ oa. Jabo chjai emi̧ da pio ji̧ri̧, jabechji̧ pio ji̧ri̧ caäpadejȩrȩ. Tjamo̧ davä. Coëma cjiari̧ cjo̧ro̧dëji̧ri̧ pio ji̧ri̧ cäapadejȩrȩ ja̧bodëmȩ cjo̧dëra̧ pio ju̧ri̧ra̧, ja̧bo tänȩrea̧mi̧dëmȩ cjo̧dëra̧ pio ju̧ri̧ra̧ —yo̧mȩrȩ ni̧bä chjaorëremȩdejȩrȩ pumȩ ji̧ri̧ Juan pio judi.
Jabo judio tjamo̧ yo̧ji̧ri̧ judiro̧ Ütë tjamo̧ ja̧ ma̧ȩ oa ta̧rë ja̧bodë marëreji̧ri̧diro̧jo̧ȩ. Ado pio ju̧i̧iä ma̧ȩ chjádë yürü chjaorëreji̧ri̧dirȩ a̧ra̧ano̧ji̧ri̧ pio ji̧ri̧ chjiari. Ado bë ma̧ri̧ tjamo̧ cjo̧ro̧ji̧ri̧ judiro̧ pio ju̧i̧ ta̧rëa̧ oaiä, goëdëri̧ cjia tjamo̧pe bagarëreji̧ri̧dirȩ. Ado chëre ji̧ra̧ri̧ goaji̧ri̧ ivi jini̧ro̧, judiodë ivi pio jini̧ro̧, Ütë tjamo̧ ju̧i̧ jo̧rȩtaji̧ri̧ ivi pio jini̧ro̧ peaja̧di goëdëri̧ cjiapea̧ni̧rȩ. Jabechji̧ a̧ra̧ano̧ji̧ri̧ pio ji̧ri̧ chjiari teracaba ma̧ȩ oa ta̧rëa̧ oaiä, peaja̧di goëdëri̧ cjiapea̧ni̧rȩ. Ado goëdëri̧ cjiaji̧ri̧rȩ a̧ra̧ a̧ra̧ jiärëreji̧ri̧diro̧jȩrȩ jibëa̧ pumȩ ji̧ri̧. Aja̧, a̧ra̧ano̧ji̧ri̧ pio ji̧ri̧ conȩdatä, pio ji̧ri̧ jaepe ma̧ȩtä yo̧ji̧ri̧rȩ a̧ra̧ a̧ra̧ jiäa̧diro̧jȩrȩ. Pio ju̧i̧iä jaepe ma̧ȩa̧diro̧jo̧ȩ Pablo ju̧i̧, Bernabe pio ju̧i̧bo. Jibëa̧ chiriri pio judiri baä tänȩrëreji̧ri̧diro̧jȩrȩ.
Jabo japamitë chjätä ëte judio judiro̧ orë A̧tioquia quȩmȩ bë ma̧ri̧ri pio judiri acji go̧düdärärëreji̧ri̧dirȩ, Iconio quȩmȩ bë ma̧ri̧ri pio judiribo. Ado judiro̧ go̧düdärä ëte, 'Aja̧, Pablo pio ju̧i̧ goae tarari̧ conȩdatäreji̧ri̧a̧ro̧ju̧i̧da' quëna̧ jo̧rȩtaji̧ri̧rȩ ana̧ri̧ ni̧bä chjaorëreji̧ri̧diro̧jȩrȩ pumȩ ji̧ri̧, pio jibëiäpȩmo̧ cho̧rë jo̧rȩtapea̧ oa. Ado pumȩ judiro̧ pio ji̧ri̧ ta̧rë ja̧boa̧ oaiä, mitëa̧diro̧jo̧ȩ Pablo ju̧i̧. Ado ta̧dëra̧ pio ju̧ri̧ra̧ to̧bari̧ ae ja̧bo tänȩtarëreji̧ri̧diro̧jo̧ȩ. Ado ja̧di dari̧ japa ëte, bë ma̧ri̧ dairäpȩ mu̧i̧ a̧ra̧diro̧jo̧ȩ, coë a̧rȩriäri̧. Ja̧boa̧rämi̧ cjiaji̧ri̧rȩ dairäpȩ mu̧i̧ a̧ra̧diro̧jo̧ȩ.
Jabo quëna̧dëri̧ cjiaji̧ri̧ judio judiro̧ ma̧ȩ chjádë yürürëreji̧ri̧dirȩ judiodë pio ji̧ri̧iäpȩmo̧. "Aja̧, Jechu pio ju̧i̧ chjiari ma̧ȩ üdë tjamo̧i̧ cjiari̧ baädëde" yo̧a̧dirȩ. "Pio jiro ma̧ȩ üdë quëna̧dëpea̧de" yo̧a̧dirȩ. Ado pio ju̧i̧iä judiodë judiro̧ orë ërecjiape bagarëreji̧ri̧diro̧jȩrȩ quëna̧ji̧ri̧ pio ji̧ri̧iäpȩmo̧.
Ado pio ju̧i̧iä pumȩ bubarë järiji̧ri̧pea̧dirȩ Jechurë chjadüa̧ pio ji̧ri̧ ana̧ri̧ conȩdapea̧ ji̧. Tjamo̧ davä. Judio judiro̧ orë jibëa̧ ütëti̧ pio ji̧ri̧ nö̧ta järiji̧ri̧pea̧dirȩ judiodë pio ji̧ri̧ nö̧ta, jibëa̧ ütëti̧ pio ji̧ri̧ nö̧ta. Ado järiji̧ri̧rȩ, 'Aja̧, goae tarari̧ acji jätäreji̧ri̧a̧ro̧ji̧ri̧da, ta̧dëra̧ ae ja̧bo tänȩtäreji̧ri̧a̧ro̧ji̧ri̧da' quëna̧ jo̧rȩtarëreji̧ri̧dirȩ.
Jabo Techaronicaräpȩ cjo̧ro̧ji̧ri̧ judio judiro̧ Pablorë Berearäpȩ cjo̧ro̧ji̧ri̧ pio ji̧ri̧iäpȩmo̧ a̧ra̧ano̧a̧ pio ju̧i̧ chjiari goë ta̧rëa̧ oaiä, chjaodëri̧ acji järëreji̧ri̧dirȩ. Ado Berearäpȩ go̧düdärä ëte, Pablo pio ju̧i̧iäpȩmo̧ poë aechide ni̧bäji̧ri̧rȩ ana̧ri jo̧rȩta tänȩrëreji̧ri̧diro̧jȩrȩ pio ju̧ri̧pȩ cjo̧ro̧ji̧ri̧ pio ji̧ri̧. Pio ju̧i̧iä no̧i̧dërë a̧dopaji̧ri̧pea̧dirȩ cjarari̧ cjiape jäji̧ri̧rȩ, Pablo pio ju̧i̧iäpȩmo̧ ërecjiape jäji̧ri̧rȩ.
Jabo o judiro̧ ta̧ra̧ puë chiadëti̧rȩ chjuari̧ jiadarëreji̧ri̧dirȩ. Quëna̧dëri̧ cjiarëreji̧ri̧dirȩ. Ado pio ju̧i̧iä Pablo judi a̧ra̧ano̧a̧ pio ju̧i̧ chjiari ma̧ȩ oa chjai̧dëti̧ra̧ ni̧bärëreji̧ri̧diro̧jo̧ȩ. 'Jabo cjäri̧ madida, "Jechu judi Ütë tjamo̧ ju̧i̧iäpȩmo̧ baärea̧ no̧mi̧ dade" yo̧mȩ ma̧ȩ üdë badëdida, chjai̧dëdida' quëna̧ jo̧rȩtaji̧ri̧rȩ ma̧ȩ chjai̧dëti̧ra̧ ni̧bärëreji̧ri̧diro̧jo̧ȩ. Pio ju̧i̧iä Pablo judi a̧doparea̧ bëri pio judiri go̧dürëremȩde. Quëna̧ji̧ri̧pea̧ pio ji̧ri̧ nö̧ta go̧düa̧de. Ado Tirano quȩmȩ pio ju̧i̧ ja̧ bëräpȩ ano̧ mire a̧dopaji̧ri̧pea̧dirȩ, jo̧ tjo ana̧ tjamo̧räpȩ. Ado ju̧ri̧pȩ Pablo judi doti̧mi̧ ni̧bä chjaorëremȩdejȩrȩ pio jȩaiäpȩmo̧ dëbë ni̧bä chjaorea̧mi̧ dari̧.
Ado mȩnȩ a̧ra̧ano̧a̧ pio ju̧i̧ chjiari peadëri ja̧ goë goë ta̧rëa̧ oaiä, jabechji̧ ana̧ri̧ jo̧rȩtaji̧ri̧pe järëreji̧ri̧dirȩ. 'Aja̧ Pablo judi Moicherë go̧ȩparërea̧ ma̧ȩ pio ju̧i̧ chjiari chjadëri̧ a̧ra̧ano̧tärea̧ ji̧, chjadëri̧ a̧ra̧ano̧dëdiji̧ri̧da, judiodërë cjo̧ro̧mȩ chiriräpȩ cjo̧ro̧ji̧ri̧ judio pio ji̧ri̧ chjadëri̧ a̧ra̧ano̧tärea̧ ji̧, chjadëri̧ a̧ra̧ano̧dëdiji̧ri̧da, jabechji̧ Moicherë go̧ȩparërea̧ ma̧ȩ pio ju̧i̧ a̧dë jo̧rȩtatä yo̧diji̧ri̧da, jibëa̧ bori̧ pio ji̧ri̧ budoa̧ oa cjiadëtä yo̧diji̧ri̧da, ado a̧ro̧rȩ ibëa̧ taru pio ji̧ri̧iä dabaparërea̧ ma̧ȩ pio ju̧i̧ jiadatä yo̧diji̧ri̧da, a̧ro̧rȩ tüdüa̧mi̧ darä cjo̧ro̧rërea̧ ji̧, jabechji̧ pio ju̧i̧ a̧dë jo̧rȩtatä yo̧diji̧ri̧da' quëna̧ jo̧rȩtaji̧ri̧pea̧dirȩ pio mȩa chjiari goë goë ta̧rëa̧ oaiä.
Ado dopea̧rä judio judiro̧ orë a̧dopera̧parëreji̧ri̧dirȩ Pablo pio ju̧i̧ ja̧bo tänȩpea̧ pio ju̧i̧ chjiari ni̧bä chjaopea̧ oa. 'Aja̧, ja̧bo tänȩtäreji̧ri̧a̧ro̧ju̧i̧da, ja̧di dari̧ japaji̧ri̧rȩ ja̧bo tänȩtäreji̧ri̧a̧ro̧ju̧i̧da' quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ. Ado Pablo pio ju̧i̧ tjamo̧ri̧ ja̧bo tänȩtämi̧ cjiaji̧ri̧rȩ yo̧ë cji̧därëreji̧ri̧dirȩ jibëa̧ dëbëti̧ra̧ chia. 'Aja̧, Pablo pio ju̧i̧ ja̧bo tänȩpea̧ pio ju̧i̧mo̧i̧ jo̧rȩtapaa̧ro̧da yaba̧, jurarea̧ oa juradëpaa̧ro̧da, eami̧ jararea̧ oa jaradëpaa̧ro̧da, jabechji̧ Pablo pio ju̧i̧ ja̧bo tänȩa̧rämo̧ ado jurapaa̧ro̧da' quëna̧ jo̧rȩtaji̧ri̧rȩ yo̧ë cji̧därëreji̧ri̧dirȩ ma̧ȩ chjádë yürürea̧mi̧dëri̧, ano̧ mire jo̧rȩtarea̧mi̧dëri̧.
Ado Pjeto judi pio ju̧ri̧pȩ go̧düdärä ëte, tjamo̧ yo̧ji̧ri̧ judio pio judiro̧ järirëreji̧ri̧dirȩ jȩa nö̧ta ni̧bä chjaopea̧ oa, Pablo pio ju̧i̧ chjiari ta̧rë tänȩpea̧ oa. Aja̧, tjamo̧ goë tuti ja̧bepaji̧ri̧ pio judiro̧, ado ütëti̧ pio judiro̧borë Pablo pio ju̧i̧iäpȩmo̧ aechide yo̧ji̧ri̧rȩ ni̧bä chjaorëreji̧ri̧diro̧jo̧ȩ, ja̧di ta̧rëri̧ yo̧ji̧ri̧rȩ:
Ado pio ju̧i̧ ëba jana̧rä, ado Jerucharȩ pio judiri jana̧reji̧ri̧ judio pio judiro̧ pio ju̧i̧ daea̧rä, cjäri̧ madiro̧jo̧ȩ, chjaodëri̧ tjoro tänȩa̧diro̧jo̧ȩ. Ado taruparëreji̧ri̧dirȩ pio ju̧i̧iäpȩmo̧ aechide yo̧pea̧ ji̧. —Jabo cjäri̧ marenȩ, ma̧i̧ da chjai̧dë oa japamȩrenȩ —yo̧ji̧ri̧rȩ aechide yo̧ chjaoa̧diro̧jo̧ȩ. Jabo tjamo̧i̧ cjiari̧ jo̧rȩta tänȩrea̧ yürüdëa̧diro̧jo̧ȩ ütë ju̧i̧iäpȩmo̧.
Peaja̧dimi̧ dari̧ cjo̧ro̧tämi̧ cjiamȩrȩ cjo̧ro̧requede ca̧ oti̧. Jabechji̧ ca̧ chji̧rämo̧ jo̧rȩtami̧ dari̧ japadëri̧ cjiarequede, jabo o ji̧ri̧ ja̧ chji̧räbo jo̧rȩtami̧ dari̧ cjo̧ro̧tämi̧ cjiarequede. Pio ju̧i̧iä järi tjamo̧requede o ji̧ri̧iäpȩmo̧ chjadëri̧ japapea̧ ji̧. Ado eami̧ pumȩ judiro̧ jabë Quiricho pio ju̧i̧ chjiari quëna̧dërä judi, chjadëri̧ a̧dotämi̧ cjiarequedejȩrȩ pio judiro̧borë chjadëri̧ chjätärea̧ dapea̧ oa, pio judiro̧borë bape chjaoa̧ oa cjiachea oa. Ado pio ju̧i̧iä ca̧ oti̧, pio ji̧ri̧ ja̧ chji̧räbo jo̧rȩtami̧ dari̧ chjadëri̧ japatämi̧ cjiarequedejȩrȩ.
Danȩrȩ ca̧ oti̧, o judiro̧ pio coa chjiari teracabari̧ aechide yo̧ chjaodirȩ. “Aja̧, Pablo judi budoa̧rämo̧ chjätärea̧mi̧ dade a̧ra̧ano̧de” yo̧dirȩ. Jabo cjäri̧ marequede, ja̧di ta̧rëri̧ a̧ra̧ano̧dëmȩrequede. Jabechji̧ cüdë ja̧di dari̧ a̧ra̧ano̧rä judi, judio pio judiro̧ ma̧ chiadëri̧ cjia tjamo̧ji̧ri̧rȩ ta̧rëtäreji̧ri̧diro̧coe. Tjamo̧ davä. Ba chia ta̧rëtäreji̧ri̧diro̧coe cüdë ja̧di dari̧ a̧ra̧ano̧a̧rä judi. Jabo cjäri̧ madiro̧jo̧ȩ, cüdë a̧ra̧ano̧a̧ ma̧ȩ pio ju̧i̧ ea tjamo̧dëdiro̧jo̧ȩ. Ado pio ju̧i̧iä conȩdadiro̧coe. Jabechji̧ Moicherë go̧ȩparërea̧ ma̧ȩ oaiä chjätärea̧mi̧dëde a̧ra̧ano̧a̧ oaiä, dëdë, conȩdadiro̧coe. Aja̧, cüdë Quiricho pio ju̧i̧iämo̧i̧ chjätärea̧mi̧ dade a̧ra̧ano̧a̧ oaiä, toro ja̧boa̧mȩ pio ju̧i̧iämo̧i̧ chjätärea̧mi̧ dade a̧ra̧ano̧a̧ oaiä, jabechji̧ chjuari̧ jiadadiro̧jo̧ȩ cüdë a̧ra̧ano̧a̧ pio ju̧i̧.
Ado pio ju̧i̧iä jabechji̧, järidëpe bagadëchji̧vä cüdë pio yi chaärea̧ bëräpȩ tutia̧ oa cjiapea̧ pio ju̧i̧ chjiari. Jabechji̧ pio yirequede cüdë pio dibëiäpȩmo̧ ma̧ȩ chjadëi̧ pio ju̧i̧ a̧ra̧ano̧a̧ tara, mȩnȩro̧ quëna̧ji̧ri̧pea̧ tara. Jabo cüdë chaärea̧räpȩ tutia̧ oa cjiamȩborë, jabechji̧ ma̧ chiadëri̧ cjiari̧ jo̧rȩtarequede cüdë pio dibë chjadëri̧ a̧ra̧ano̧rea̧ daea̧ tara, pio dibë a̧dorea̧ daea̧ tara.
Jabechji̧ cüdë pumȩ ba chiadëräbo, cüdë Ütë ja̧ pumȩ pio ji̧ri̧ tjamo̧ri̧ nö̧tadëräbo, jabechji̧ pio coa cjäri̧ri̧ cjiamȩrȩ a̧ra̧ano̧rea̧ yürürëremȩdique Quiricho pio ju̧i̧ chjiari ma̧ȩ oa. Tjamo̧ davä. Ütë tjamo̧ ja̧ pumȩ judiro̧ ütëborë pio coaiä ji̧dë u̧i̧ ba chiaräbo, jabechji̧ pio coa yürürëremȩdique pio jiro ja̧beparea̧ oa. Aja̧, judiodë pio ji̧ri̧iäpȩmo̧ a̧ra̧ano̧pea̧ oa, judiro̧ Quiricho pio ju̧i̧ quëna̧ oaiä a̧dë chjäte ba chiamȩti̧ oa mitërea̧ dapea̧ oa, tjamo̧ri̧ dabarea̧mi̧dë oa mitërea̧ dapea̧ oa, yürürëremȩdique pio jiro ja̧beparea̧ oa.
Ado mȩnȩro̧ jidata̧ pio ju̧i̧ chjiari ni̧bä chjaoa̧diro̧ibe peaja̧di. 'Aja̧, jidatadiro̧da, Ütë tjamo̧ ja̧ Joja pio ju̧i̧ jidatadiro̧da, a̧dëri pio judiri ma̧na̧pea̧ ji̧ jidatadiro̧da, ja̧boa̧remȩrȩ bëdüa̧ oa cjiamȩ pio ju̧i̧ jidatadiro̧da, Ütërë bëdü tänȩa̧ pio ju̧i̧ jidatadiro̧da, Jechu pio ju̧i̧ jidatadiro̧da, Ütërë chjadüpamȩ ërecjia̧ pio ju̧i̧ tarachea oa Go̧dü Tänȩmȩ pio ju̧i̧ jidatadiro̧da' quëna̧ jo̧rȩtaji̧ri̧rȩ ni̧bä chjaorëreji̧ri̧diro̧ibe pio dibë chjiari.
'Aja̧, ana̧ri̧ u̧i̧patäquiji̧ri̧da, chjai̧dëri̧ japatäquiji̧ri̧da' quëna̧ jo̧rȩtamȩrȩ dami̧ti̧ u̧i̧parea̧ra̧ pio ju̧ri̧ra̧ na̧rȩ chjaopadejȩrȩ aeno̧pea̧ maea oa cjiaji̧ri̧ pumȩ pio ji̧ri̧. Coëma cjiari̧ baämȩ ma̧ȩ oa ta̧rë ja̧bodëji̧ri̧ pio ji̧ri̧, chjätärea̧ ma̧ȩ oa quëna̧dëji̧ri̧ pio ji̧ri̧ na̧rȩ chjaopadejȩrȩ.
Jabo o judiro̧ ja̧di dari̧ jurarea̧ yürüdëmȩ dabu chjadëdëmi̧ dadirȩ. Jabechji̧ pio jiro dabu üdë jurarea̧ yürüdëmȩde jabo teracaba maea oa yürüde. Daö̧ cärä oa, o̧to chiamȩ cärä oa, pada cärä oa yürüde. Ado tjado ana̧mȩ judi pio jiro cärä oa, jabechji̧ acjürüpadejȩ. Ado pio jiro dabumi̧ dari̧ cjiaji̧ri̧ pio ji̧ri̧, jabechji̧ bape chjaopadejȩrȩ Ütë tjamo̧ judi.
Ado danȩ, chjai̧dë oa jape chjaoji̧ri̧ judiro̧ ji̧dë ma chjai̧dëri̧ japatämi̧ cjiarä judi, jabechji̧ ji̧dë ma chjai̧dëri̧ jape cjiatädirȩ. Ado a̧dë chjäte idi̧ dari̧ jo̧rȩtariä cjo̧ro̧ji̧ri̧ judiro̧ ja̧di dari̧ ji̧dë ma cjo̧ro̧tämi̧ cjiarä judi, jabechji̧ ja̧di dari̧ cjo̧ro̧tädirȩ jënȩro̧ jo̧rȩta̧mi̧. Jabo coëma cjiari̧ cjo̧ro̧ji̧ri̧ pio judiro̧, jabechji̧ ji̧dë ma coëma cjiari̧ cjo̧ro̧täreji̧ri̧dirȩ. Ado china̧chjari̧ tutia̧ oa cjiami̧ dari̧ cjo̧ro̧ji̧ri̧ pio judiro̧ peaja̧di ji̧dë ma china̧chjari̧ tutia̧ oa cjiami̧ dari̧ cjo̧ro̧täreji̧ri̧dirȩ —yo̧a̧dique mu̧i̧tjoi̧ üdë.
Sanasan