Techaronichȩche Ma̧ȩ 1:3 - Biblia Pume3 Jabechji̧ mȩnȩro̧ Jechu pio ju̧i̧ chjuari̧ quëna̧ oaiä, pio ju̧i̧ ea tjamo̧ji̧ri̧rȩ cjo̧ro̧a̧ oaiä, 'jabechji̧ chjadëri̧ japadiro̧da, pio ju̧i̧ ja̧ oa ana̧ri̧ ja̧bepadiro̧da, ado jidatarea̧ chiarë cjo̧ro̧diro̧da, Ano̧mȩ Jechu Quiricho judi ma̧na̧pea̧ ji̧ ji̧dë ma jidatadiro̧da, ado pio ju̧i̧iä chjai̧dëri̧ chjätäräbo ma̧ chjua cjo̧ro̧diro̧da' quëna̧ jo̧rȩtaji̧ri̧rȩ ni̧bärea̧ro̧jo̧ȩ ibëa̧ Ama̧i̧ Ütë pio ju̧i̧. Faic an caibideil |
Techaronichȩche Ma̧ȩ 1:3
55 Iomraidhean Croise
Ja̧di tara ano̧ mire jo̧rȩtachjivä ca̧ oti̧, —yo̧a̧dejȩrȩ—. Mȩnȩro̧ Ütë tjamo̧ pio ju̧i̧iäpȩmo̧ chjai̧dëri̧ japea̧ üdë duridëparȩa̧ oa cjiapea̧ oa, jabechji̧ chjere jo̧rȩtachji̧vä mȩnȩro̧ ma̧ chjupi̧ cjiari̧ jo̧rȩtami̧ dari̧ jo̧rȩtapea̧ oa. Aja̧, Ütë tjamo̧ judi pio dibë cjatäcjie jo̧rȩtarea̧ yürüpea̧ oa, jabechji̧ ano̧ mire jo̧rȩtachji̧vä.
Danȩrȩ, Ütë tjamo̧ pio judiri ma̧na̧ tjamo̧diibe jidatarea̧ üdë. Ja̧di tara pio ju̧i̧iä goë cjo̧dëreconȩ pio dibë chjiari. Jabechji̧ mȩnȩro̧ pio ju̧i̧iäpȩmo̧ quëna̧ji̧ri̧rȩ cjo̧ro̧ tara, jabechji̧ dibëa̧ chji̧ üdë tjuri cjiami̧ dari̧ cjiatä goë cjo̧dëreconȩ ma̧ chiadëri̧ cjiari̧ jo̧rȩtarea̧ra̧, ma̧ chjupi̧ cjiari̧ jo̧rȩtarea̧ra̧ a̧de. Ado ja̧dëa ji̧ Tjo tjamo̧ ja̧ jauëchja oaiä, jabechji̧ jidatarea̧ ji̧ra̧ tjamo̧ oa chiaji̧ri̧rȩ cjo̧ro̧panȩrȩ, a̧dë chjäte ji̧ra̧ri̧ chiari̧.
Ado pio jiro ma̧ȩ üdë, jabërä go̧ȩpea̧ oa cjiarërea̧ ma̧ȩ üdë, yabo yürüa̧ pënȩrä jabërä go̧ȩpea̧ oa cjiarërea̧ ma̧ȩ chjö̧na̧i̧rȩ, jabechji̧ go̧ȩpea̧ oa cjiarëremȩde ibë chjadëri̧ a̧dopea̧ oa. Tjamo̧ davä. Ibë dabapa tänȩpea̧ oa, ibë järiparȩpea̧ oa, ibë chichipami̧ dari̧ japapea̧ oa go̧ȩpea̧ oa cjiarëremȩde. Aja̧, a̧ro̧rȩ chjai̧dëri̧ chjätäräbo chjuari̧ quëna̧pea̧ oa, a̧ro̧rȩ ma̧ chjua jo̧rȩtaji̧ri̧rȩ cjo̧ro̧pea̧ oa, a̧ro̧rȩ jidataji̧ri̧rȩ cjo̧ro̧pea̧ oa jabërä go̧ȩpea̧ oa cjiarëremȩde Ütërȩ go̧ȩpa tänȩrërea̧ ma̧ȩ pio judi.
Jabo yaba̧ bucho ana̧mȩ Ütë pio judi yo̧a̧ oaiä, goadia̧ oa cjiarërea̧ ma̧ȩ üdë bo ë maearäpȩ ano̧ mire cjiami̧ dari̧ cjiade. Tjamo̧ davä. Dabarea̧mi̧dërërea̧ ji̧, dabarea̧mi̧ dari̧ cjiade yaba̧ Ütërë ea jana̧ chjadüa̧ oa ni̧bäji̧ri̧ judiro̧ ütëborë go̧ȩparërea̧ oaiä. Aja̧, go̧ȩpatä yo̧rëremȩdejȩrȩ Ütë tjamo̧ judi, pumȩ judiro̧ ütëborë, chiriräpȩti̧ oa cjo̧ro̧ji̧ri̧ pumȩ judiro̧ ütëborë pio jȩaiäpȩmo̧ quëna̧tä, pio ju̧i̧ ja̧ ma̧ȩrä cjo̧ro̧tä.
Bucho ana̧ cjo̧ro̧rea̧ yürüpadejȩrȩ. Tjamo̧ davä. Ma̧ chjua jo̧rȩtaji̧ri̧rȩ coëma cjiari̧ cjo̧ro̧ji̧ri̧ pio ji̧ri̧, Ütë tjamo̧ ja̧ ma̧ȩrä cjo̧ro̧ji̧ri̧ pio ji̧ri̧, jabechji̧ bucho ana̧ cjo̧ro̧rea̧ yürüpadejȩrȩ. Aja̧, bucho ana̧ cjo̧ro̧rea̧ na̧taji̧ri̧mi̧ dari̧ cjo̧ro̧ji̧ri̧ pio ji̧ri̧, a̧dë chjäte tatari̧ cjiamȩräpȩ cjo̧ro̧pea̧ ji̧ järiji̧ri̧ pio ji̧ri̧, Ütërë pio jibëiäpȩmo̧ ba chiaparȩpea̧ oa eataji̧ri̧rȩ cjo̧ro̧ji̧ri̧ pio ji̧ri̧, jabechji̧ bucho ana̧ cjo̧ro̧rea̧ yürüpadejȩrȩ.
Ja̧di tara yo̧requededibe ca̧ oti̧. Tjarari̧de bucho ana̧ cjiadiäpamȩ üdë. Tjarari̧de yuropadëpamȩ üdë. Jabechji̧ Ütë tjamo̧ pio ju̧i̧iäpȩmo̧ quëna̧rea̧ üdë cja̧rȩmȩde. Ado Ütë tjamo̧ pio ju̧i̧ chjuari̧ quëna̧mȩrȩ jidatarea̧ üdë, judi pio ibë chjiari japapea̧ pio ju̧i̧ jidatarea̧ üdë peaja̧di cja̧rȩmȩde. Ado ibëa̧ dëbëti̧ra̧ chia earea̧ üdë peaja̧di cja̧rȩmȩde. Jabo danȩrȩ, ji̧dë u̧i̧ ba chiamȩ üdë, jabechji̧ earea̧ pio judide. Tjamo̧ davä. Ji̧dë u̧i̧ ba chiade earea̧ üdë. A̧dë chjäte ba chiamȩ pio judide. Ado pio ju̧i̧iä pio jiro no̧mi̧ darä cjo̧ro̧tä earequededibe ca̧ oti̧, mȩnȩro̧ dibëa̧ pumȩ chjadëri̧ a̧dopea̧ oa, Tjo tjamo̧ judi dibë yürüa̧ra̧ pio ju̧ri̧ra̧ chjadëri̧ ja̧bepapea̧ oa. Aja̧, dibëa̧ pumȩ pio ji̧ri̧ tjamo̧ri̧ earea̧mi̧ da no̧rä cjo̧ro̧tä eamȩrȩ go̧ȩparequededibe.
Ja̧di tara ca̧ oti̧, ji̧dë ma chjuari̧ cjiami̧ dari̧ quëna̧chji̧vä Ütë tjamo̧ pio ju̧i̧, jaejaeami̧ dape järea̧ decjiari̧. Jabechji̧ Ütë tjamo̧ ja̧ ma̧ȩ pio ju̧i̧iä to̧bari̧ cjiami̧ dari̧ cjiachji̧vä, ju baebaeami̧ dari̧ jo̧rȩtarea̧ decjiari̧. Jabechji̧ chumi̧dëri̧ cjiadë machji̧vä, jabo ji̧dë ma järichji̧vä ibëa̧ Ano̧mȩ ja̧ oa chjadëri̧ ja̧bepapea̧ oa. Jabechji̧ chjadëri̧ dabanȩrȩ ca̧ oti̧. Danȩrȩ, mȩnȩro̧ eami̧ oa ibëa̧ Ano̧mȩ ja̧ oa ja̧beparä badëri̧ cjiadiädëpanȩrȩ, jabo chjadëri̧ ba ano̧a̧ oa cjiapanȩrȩ. Tjamo̧ davä. Mȩnȩro̧ pio ju̧i̧ ja̧ oa eami̧ oa ja̧bepea̧ oaiä mö̧na̧mi̧ dari̧ cjiadiädëpanȩrȩ, jabo chjadëri̧ ba ano̧a̧ oa cjiadiäpanȩrȩ ‘chjadëri̧ ba ano̧dëdicoada’ quëna̧rea̧ decjiari̧. Ado pio ju̧i̧iä jabechji̧ järi tjamo̧chji̧vä. Aja̧ ca̧ oti̧, ja̧di ta̧rëri̧ yo̧requededibe. Dibë ea tjamo̧ tara, ja̧di ta̧rëri̧ yo̧requededibe.
Ado ja̧di tara Ütë tjamo̧ pio ju̧i̧iämo̧i̧ ja̧ȩ cjiami̧ dari̧ ja̧beparea̧rȩ. Jabechji̧ o judiro̧ ja̧bepami̧ dari̧ ja̧bepadë marea̧rȩ. Pio judiro̧ chëre boarea̧ pio ju̧i̧mo̧i̧ jo̧rȩtaji̧ri̧rȩ ja̧bepaji̧ri̧mi̧ dari̧ ja̧bepadërea̧rȩ. Jabo jabechji̧, Quiricho pio ju̧i̧ ja̧ mu̧i̧tjoi̧ji̧ri̧rȩ a̧ra̧ano̧rea̧ro̧dibe, Ütë tjamo̧ pio judi chjadüa̧ oa. 'Jabechji̧ Ütë tjamo̧ ja̧ dachoro ja̧bepaa̧ro̧da, pio judi ütarë dadiibëda’ quëna̧ jo̧rȩtaji̧ri̧rȩ chjaocjiami̧ dari̧ a̧ra̧ano̧dë marea̧ro̧dibe, jabo dibë tjamo̧ri̧ a̧dotämi̧ cjiaji̧ri̧rȩ a̧ra̧ano̧rea̧ro̧dibe, dibëa̧ chëre oa tjamo̧ri̧ jo̧rȩtadëji̧ri̧rȩ.
Danȩrȩ ca̧ oti̧, Ütë tjamo̧ pio judi ëna̧diäa̧ oa cjiaji̧ri̧pea̧nȩrȩ jare chjadüa̧ oa cjiami̧ dari̧ cjo̧ro̧pea̧ oa, Moicherë go̧ȩparërea̧ chja̧oerä cjo̧ro̧chea oa. Jabo oëra̧ jo̧rȩtadëtäreji̧ri̧nȩrȩ jabo. ‘Jaeboquëda, jare chjadüa̧ oa cjiami̧ dari̧ cjiaquëda, ado pio ju̧i̧iä eami̧ oa japapai̧ daquëda, ca̧ icjararä chjai̧dë pio judiri cjitëmȩ pio ju̧i̧bo japapai̧ daquëda, jabechji̧ pio ju̧i̧ ja̧ chja̧oeräbo cjo̧ro̧pai̧ daquëda’ quëna̧ jo̧rȩtadëtäreji̧ri̧nȩrȩ. Jabo jabechji̧ coëma cjiari̧ jo̧rȩtaji̧ri̧rȩ a̧dotäreji̧ri̧nȩrȩ dibëa̧ dëbëti̧ra̧ chia, ea tjamo̧ji̧ri̧rȩ.
Jabechji̧ a̧ro̧rȩ Jechu Quiricho pio judiri ja̧pe baga̧ oaiä, budoa̧ üdë badë mapea̧de. Ado pio ju̧i̧iä a̧dodë madiibe Ütë tjamo̧ ju̧i̧iä. Ado budodëa̧ üdë peaja̧di badë maeade. Peaja̧di a̧dodë madiibe. Jabechji̧ quëna̧ pio judimo̧rȩ ba chiade. Chjadëri̧ a̧dodiibe. Ado a̧ro̧rȩ quëna̧ji̧ri̧rȩ cjo̧ro̧ro, jabechji̧ Ütë tjamo̧ pio ju̧i̧ eariä cjo̧ro̧parea̧rȩ, pumȩ pio ji̧ri̧iäpȩmo̧bo.
Pio ju̧i̧iä yo̧requededibe. Järidëpe bagadëchji̧vä o ji̧ri̧iäpȩmo̧ chjadëri̧ japapea̧ ji̧, jabo jabechji̧ ji̧dë ma chjadëri̧ japachji̧jȩrȩ. Ado japamitë chjätä ëte, dëdë, chjadëi̧ pio ju̧i̧ mitërea̧ daparea̧rȩ, Ütërë pio ibëiäpȩmo̧ ba ano̧pea̧ pio ju̧i̧. Aja̧, ja̧di dari̧ mitërea̧ daparea̧rȩ a̧ro̧rȩ ja̧bepa ano̧dërä judi.
Jabo yaba̧ pea ma̧na̧na̧ra̧diibe Timoteo judi. Pio dibëiäpȩ järëremȩrȩ ma̧ȩ goae oa chia ma̧na̧na̧ra̧diibe pio dibë chjiari. "Aja̧, Ütë tjamo̧ pio ju̧i̧ chjuari̧ quëna̧diro̧jo̧ȩ" yo̧a̧diibe. "Ado pio ju̧i̧ ea tjamo̧ji̧ri̧rȩ cjo̧ro̧dirȩ jibëa̧ oti̧ pio ji̧ri̧bo" yo̧a̧diibe. "Ado pio dibë, jabechji̧ cjäri̧ri̧ cjia jo̧rȩtadiro̧dibe" yo̧a̧diibe. "Ado mȩnȩro̧ pio ji̧ri̧iäpȩmo̧ odai̧ tarari̧ jo̧rȩtami̧ odai̧ tarari̧ jo̧rȩtadiro̧dibe peaja̧di" yo̧a̧diibe. Aja̧, ja̧di ta̧rëri̧ ni̧bä chjaoa̧diibe pio dibë chjiari.
Ado pio ju̧i̧iä ji̧dë ma goë cjo̧dë chjaorea̧rȩ pio dibë chjiari ca̧ oti̧. 'Aja̧, chjadëri̧ a̧dotädiji̧ri̧da, Ütërë ëna̧diäa̧mi̧ cjo̧ro̧pea̧ oa a̧dotädiji̧ri̧da, jabechji̧ judiro̧ nö̧tadäräri̧ cjo̧ro̧pea̧ oa a̧dotädiji̧ri̧da' quëna̧ jo̧rȩtaji̧ri̧rȩ ji̧dë ma goë cjo̧dë chjaorea̧rȩ pio dibë chjiari. Ado jibëa̧ ju chiarea̧ oa peaja̧di yürütädidibe mȩnȩro̧ dami̧ti̧ chjadë oa japadärärea̧ dapea̧ oa, pio ju̧i̧ ja̧ oa eami̧ti̧ chjadë oa japadärärea̧ dapea̧ oa. Jabechji̧ eami̧ quëna̧mȩ judi jibëa̧ chji̧ra̧ jo̧rȩtarä judi, 'Aja̧, ja̧di dari̧ japatäremȩquëda, Ütë tjamo̧ pio ju̧i̧ chjuari̧ quëna̧mȩrȩ ja̧di dari̧ japatäremȩquëda, Ütë ja̧ oa japatäremȩquëda' quëna̧ jo̧rȩtarä judi, jabechji̧ ju chiarea̧ yürütädejȩ Ütë tjamo̧ judi quëna̧mȩ pio judi chjadëri̧ japadärärea̧ dapea̧ oa.
Danȩrȩ ca̧ oti̧, pio dibë jo̧rȩtaji̧ri̧rȩ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧, 'chjadëri̧ a̧doa̧diji̧ri̧da' quëna̧ jo̧rȩtaji̧ri̧rȩ. Ado ja̧di dari̧ jo̧rȩtapea̧ üdë jabechji̧ chjadë tjamo̧de. Jabechji̧ mȩnȩro̧ ji̧dë u̧i̧ chjuari̧ quëna̧ji̧ri̧pe baga̧ oaiä, mȩnȩro̧ dibëa̧ pumȩ ji̧ri̧ ji̧dë u̧i̧ eaji̧ri̧pe baga̧ oaiä, dibëa̧ dëbëti̧ra̧ chia ji̧dë u̧i̧ eaji̧ri̧pe baga̧ oaiä, jabechji̧ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧.
Ado Ütë tjamo̧ judi Abaraa̧rea̧ pio ju̧i̧ ütara̧rä, jibëa̧ ja oa cäë yürütä eamȩrȩ ütara̧rä, jabechji̧ Ütë tjamo̧ pio ju̧i̧ chjuari̧ quëna̧mȩrȩ jëdano̧rëremȩde joja pio ju̧i̧ tjamo̧ri̧ ja̧bo tänȩpea̧ ji̧. Tjamo̧ davä. Ütë tjamo̧ judi jabërä Icha pio ju̧i̧ chjiari yo̧ë cji̧däa̧räbo, “Aja̧, na̧ea̧ri ja̧ji̧ri̧ judiro̧ na̧ ja pio ju̧i̧iä ji̧ra̧ tjamo̧pe bagapadirȩ” yo̧mȩrȩ yo̧ë cji̧däa̧räbo, jabechji̧ jëdano̧rëremȩde Abaraa̧ judi joja pio ju̧i̧ tjamo̧ri̧ ja̧bo tänȩpea̧ ji̧. Jabechji̧ pio ju̧i̧mo̧i̧ ëbamȩborë nȩmȩpadëa̧dejȩ.
Ado pio ju̧i̧iä ca̧ oti̧, a̧ro̧rȩ nö̧tarä yuro järi tjamo̧täreji̧ri̧rea̧rȩ a̧ro̧rȩ Ütë ja̧ järätä chjaparea̧räpȩ chjadëri̧ yu̧a̧pea̧ ji̧. Jabechji̧ na̧e chia tjamo̧pea̧ chiarea̧rȩ a̧ro̧rȩ ütëborë Ütë tjamo̧ pio ju̧i̧ ta̧rëdiädëchea oa, a̧ro̧rȩ yu̧a̧rea̧ dadëchea oa, a̧ro̧rȩ ibëa̧ ütëti̧rea̧ pio ji̧ri̧ cho̧rëdiächea oa.
Jabo jabechji̧ mȩnȩro̧ dibëa̧ chji̧ra̧ jo̧rȩta̧ pio ju̧i̧ jo̧rȩtaquë ca̧ oti̧. Danȩro̧, dibëa̧ tjoro pio ju̧i̧ chjacjiamȩri̧ cjiatä eaquidibë. Jabechji̧ ji̧dë ma badë maea oa ni̧bä chjaodëchji̧je, jabo ba chia maea oa ni̧bä chjaochji̧je, ma̧ȩ goae maeara̧. Ado o judiro̧ dibë ma̧i̧ dari̧ japea̧räbo, jabechji̧ ba dëbë japadëchji̧ji̧ri̧, jabo jabechji̧ cjiadiämi̧ tarari̧ jo̧rȩtachji̧je, ma̧ chjupi̧ cjiari̧ jo̧rȩtaji̧ri̧rȩ, Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧rȩ. Jabechji̧ dai oa cjiamȩ ina̧rea̧ chjacjiamȩ üdë chjaodëri̧ yuropapadi. Tjärichji chjacjiamȩ üdë goarijäpadi. Tjamo̧ davä. Dai oa cjiamȩ chjacjiamȩrea̧ üdë chjaodëri̧ yuropapadi, jabo dibëa̧ tjoro ja̧ chjacjiamȩ tjamo̧rea̧ üdë, cjäri̧ madi, goarijädëmȩdi. Tjamo̧ davä. Goarijädëmȩdi, ado ba chia tjamo̧di Ütë tjamo̧ pio ju̧i̧iä.
Danȩrȩ ca̧ u̧ri̧, jabomo̧ ya maeara̧ cjo̧ro̧dëpea̧de jabo a̧ro̧rȩ yo̧a̧mi̧ japapea̧de. Jabechji̧ a̧ro̧rȩ ibëa̧ yara̧ yo̧rä judi, “Aja̧, quëna̧ji̧ri̧ pio ji̧ri̧ tjamo̧ri̧ earequedejȩrȩ” yo̧rä judi, jabechji̧ a̧ro̧rȩ yo̧a̧mi̧ chjadëri̧ a̧dotäreji̧ri̧rea̧ro̧jȩrȩ ibëa̧ ma̧ȩ üdë coëma cjiari̧ cjiadiärea̧mi̧ dari̧.
Jabechji̧ cüdë yo̧rä judi, “Aja̧, Ütë tjamo̧ pio ju̧i̧ ea tjamo̧reconȩ” yo̧rä judi, ¿tjana̧ yo̧rea̧de? ¿Tjana̧ yo̧rea̧dë, jabechji̧ cüdë Ütë tjamo̧ judi yo̧a̧ pio ju̧i̧ tjamo̧ri̧ earä judi, pio ju̧i̧ ja̧ ma̧ȩ oa ta̧rëdiämȩrȩ cjo̧ro̧parequede. Aja̧, pio ju̧i̧ yo̧rea̧de. Ado danȩrȩ ca̧ oti̧, judi ibë yo̧a̧ ma̧ȩ pio ju̧i̧ ta̧rëdiäpea̧ üdë, jabechji̧ chjao tjamo̧dëde. Chachami̧ dari̧ cjiadëde jabo ta̧rëdiärea̧mi̧ dade.
Danȩrȩ, pio dibë chjiari chjadëri̧ dabarequede ca̧ pumȩ. Aja̧, mȩnȩro̧ dibëa̧ dëbëti̧ra̧ chia ea̧ pio ju̧i̧ dabarequededibe, mȩnȩro̧ chjuari̧ quëna̧ pio ju̧i̧bo. Ado dibëa̧ ba dëbëti̧ra̧ chia a̧doa̧ pio ju̧i̧ dabarequede peaja̧di, mȩnȩro̧ ja̧bepea̧ pio ju̧i̧ chjiaribo. Ado mȩnȩro̧ chjai̧dë oa chjätäräbo, jabechji̧ chjuari̧ quëna̧ji̧ri̧rȩ cjo̧ro̧nȩrȩ, Ütë tjamo̧ ju̧i̧ jëreea tänȩdëji̧ri̧rȩ. Ado pio ju̧i̧bo dabarequede. Ado mȩnȩro̧ Ütë tjamo̧ ja̧ oa ana̧ri̧ ja̧bepea̧ pio ju̧i̧ chjiaribo dabarequede. Jabechji̧ mȩnȩro̧ pearä ja̧beparërea̧ ji̧, jabechji̧ ji̧dë u̧i̧ ana̧ri̧ ja̧bepaji̧ri̧pea̧nȩrȩ yaba̧. Ado pio ju̧i̧ chjiaribo dabarequede.
Ado danȩrȩ, mȩnȩro̧ ca̧ ma̧ȩrä chjadëri̧ cjo̧ro̧a̧ oaiä, mȩnȩro̧ goaedë chjätäa̧räbo chjuari̧ quëna̧ oaiä, Ütë tjamo̧ pio ju̧i̧ jaepepami̧ dari̧ japadëa̧ oaiä, jabechji̧ chjadëri̧ jidaparequededibe, mȩnȩro̧ a̧dë chjäte chjai̧dëri̧ chjätächea oa. Tjamo̧ davä. Cüdë chiri nö̧tai̧ oa cjo̧ro̧ji̧ri̧ ütëbodärä oa a̧dë chjäte ma̧i̧ da conȩdarea̧ra̧ bape chjaoro, chiriräpȩti̧ oa cjo̧ro̧ji̧ri̧ pio ji̧ri̧ ana̧ri̧ ütararä, jabechji̧ chjadëri̧ boea̧ oa cjiami̧ dari̧ cjia tänȩparequededibe, mȩnȩro̧ chjadëri̧ cjo̧ro̧rea̧mi̧ dari̧.
Sanasan