Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ, na̧e chia tjamo̧chji̧vä ado ja̧di, mȩnȩro̧ eami̧ boi̧chji̧mi̧ damȩ pio ju̧i̧ badë dachea oa —yo̧a̧dejȩrȩ—. Tjamo̧ davä. Ba chiadëmȩmi̧ damȩ pio ju̧i̧ badë dachea oa, pea quëna̧mȩpea̧ pio ju̧i̧ badë dachea oa, jabechji̧ na̧e chia tjamo̧chji̧vä. Jabechji̧ chjadëri̧ jida̧ oa cjiadirȩ. Jabechji̧ Ütë tjamo̧ pio judi tänȩa̧ oaiä, a̧dëriji̧ri̧ mu̧i̧tjoi̧ ba chia tjamo̧ pio judiro̧ chjadëri̧ jidadiro̧jo̧ȩ ba chiadëmȩmi̧ damȩ pio ju̧i̧. Ado danȩrȩ, ca̧ Ama̧i̧ pio judi pio jiro ja̧beparea̧ ba chia oa jibëa̧ mu̧i̧tjoi̧ pio ji̧ri̧iäpȩmo̧ yürüa̧ oaiä, ado pio jiro mu̧i̧tjoi̧ judiro̧ ca̧ Ama̧i̧ pio ju̧i̧ nö̧ta ji̧dë ma ëba cjiarea̧ da oaiä ¿yö̧ta dari̧ jo̧rȩtaji̧ri̧rȩ datäreji̧ri̧rea̧rȩ ba chiadëmȩmi̧ damȩ pio ju̧i̧? Yö̧ta dari̧dë, jabechji̧ badë dadë matäreji̧ri̧rea̧ro̧jȩrȩ, jabo ba chia tjamo̧ datäreji̧ri̧rea̧ro̧jo̧ȩ ji̧dëri̧ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.
Jechurë Na̧rȩrërea̧ Ma̧ȩ 8:2 - Biblia Pume2 Ja̧dëa ji̧ daea̧requede a̧dëräpȩ cjiamȩ ja̧ mu̧i̧tjoi̧ oa, cja̧ȩta̧ra̧ ichiri yo̧a̧ri̧ oa. Ütë tjamo̧ ja̧ dëbëräpȩ ji̧dë ma cjiaji̧ri̧ oa daea̧requedejȩrȩ. Ado cja̧rȩmȩrȩ yürüa̧ oa, goaji̧ri̧pea̧dirȩ jibëa̧ pjurarea̧ oa. Faic an caibideil |
Jechurë Na̧rȩrërea̧ Ma̧ȩ 8:2
18 Iomraidhean Croise
Ado ja̧dëa ji̧ chjadüparequedejȩrȩ a̧dëriji̧ri̧ mu̧i̧tjoi̧ pio ji̧ri̧ chiri cotoi̧räpȩ yuro. Tjamo̧ davä. Ma̧i̧ dari̧ ea cjiari̧ pjurarea̧ra̧ pio ju̧ri̧ra̧ chjadüparequedejȩrȩ oëra̧ti̧ oa jäpea̧ oa. Jabechji̧ chjiaräpȩmo̧ jäpea̧ oa, taruräpȩmo̧ jäpea̧ oa, cjae ta̧ra̧ pënȩräpȩmo̧ jäpea̧ oa, ado dëbëräpȩmo̧ jäpea̧ oa chjadüparequedejȩrȩ a̧dë chjäte jachiti̧ oa, cja̧rȩmȩ chirirë cjiadiärea̧mi̧dëri̧. Jabechji̧ chiriräpȩti̧ oa jätä eamȩrȩ chjadüparequedejȩrȩ Ütërë mitëa̧ pumȩ ütëbodärä oa a̧dopa tänȩpea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi, jënȩ ado chjereno̧ ma̧na̧pea̧ pio ju̧i̧ chjiari.
Ado pio ju̧i̧iä jabechji̧, ji̧dë ma dadiäji̧ri̧mi̧ dari̧ na̧e chiaji̧ri̧rȩ cjo̧ro̧chji̧vä tjaoërämo̧dë. Ado ji̧dë ma goë cjo̧dëriä cjo̧ro̧chji̧vä Ütë tjamo̧ pio ju̧i̧iä, judi dibë ju chiarea̧ yürütä, mȩnȩro̧ chjai̧dë oa chjätäa̧ oaiä oëra̧diädëtä. Tjamo̧ davä, mȩnȩro̧ dami̧ti̧ uapai̧ da oa chjadëri̧ chjätärea̧ datä, mȩnȩro̧ Pumȩrȩ Ara̧ Tjamo̧ pio ju̧i̧ ja̧ dëbëräpȩ idëri̧ cjiadëji̧ri̧rȩ cjiatä, jabechji̧ goë cjo̧dëchji̧jo̧ȩ pio ju̧i̧iä, ji̧dë ma goë cjo̧dëji̧ri̧rȩ —ni̧bä chjaomȩrȩ cjiadiärëremȩde Jechu judi, jibëa̧ jadü pio ji̧ri̧iäpȩmo̧ ana̧ri̧ ni̧bä chjaorërea̧ ji̧, ji̧dë duri oa ma̧na̧pamȩ pio ju̧i̧ chjiari ni̧bä chjaorërea̧ ji̧.
Jabechji̧ ütara̧ japamitërä, a̧ro̧rȩ daba quëna̧dërä, pjurarea̧ üdë ea cjia tänȩrä, jabechji̧ ja̧boa̧ji̧ri̧ pio judiro̧ yabochjarë bëdüpadirȩ icjara peaja̧ maearë, bucho ana̧ cjo̧ro̧pea̧ maearë. Tjamo̧ davä. Pjurarea̧ üdë ea cjia tänȩrä, cjiadiämȩ pjurarea̧ üdë ea cjia tänȩrä, jabechji̧ ja̧boa̧ji̧ri̧ pio judiro̧ yabochjarë bëdüpadirȩ icjara peaja̧ maearë. Ado judiro̧ bëdüa̧ duri oa, jabë ja̧bodëa̧ji̧ri̧ pio judiro̧borë tjaoëpai̧ dape jäparea̧rȩ. Icjara peaja̧ maearë, bucho ana̧ cjo̧ro̧rea̧ chia maearë tjaoëpe bagaji̧ri̧rȩ cjitëparea̧rȩ peaja̧di a̧dë chjäte chjaodëri̧.
Jabechji̧ Ütë tjamo̧ ja̧ mu̧i̧tjoi̧ tjamo̧ pio judi ëna̧diäa̧rä, Ütë tjamo̧ judi pjurarea̧ pio ju̧i̧ ea cjia tänȩa̧rä, jabechji̧ Ano̧mȩ pio judi a̧dëri pio judiri birapade, goae tarari̧ ëna̧diämȩrȩ. Ado ja̧boa̧ji̧ri̧ pio ji̧ri̧ ja̧ icjara oa yabochja bëdü tänȩpadejȩrȩ. Tjamo̧ davä. Quiricho pio judiri ja̧ji̧ri̧ pio ji̧ri̧ ja̧ icjara oa yabochja bëdü tänȩpadejȩrȩ. Ado ja̧dëa ji̧ pio jȩa nö̧ta dëbëdiäpea̧ oa cjitë tänȩpadejȩrȩ.
Aja̧, Juan pio judi tjamo̧requede cüdë. Pio yoa ma̧ȩ oa go̧ȩpe chjadürequedejȩrȩ Quiricho ja̧ a̧doparea̧ oa, cja̧ȩta̧ra̧ ichiri yo̧a̧ri̧ buba oa, Achia quȩmȩ chiriräpȩ tjaoëpa a̧dopaji̧ri̧ oa. Ado pio dibë chjiari goë cjo̧dërequede Ütë tjamo̧ pio ju̧i̧iä. Tjamo̧ davä. Pearämȩ pio ju̧i̧iä, jabechji̧ cjiamȩ pio ju̧i̧iä, yuropadëmȩrȩ cjiamȩ pio ju̧i̧iä goë cjo̧dërequede pio dibë chjiari. Aja̧, pio dibëiäpȩmo̧ cjäri̧ri̧ cjiamȩrȩ yürütä goë cjo̧dërequede, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabo pio ju̧i̧iämo̧ cjo̧dëdërequede. Jabechji̧ Tjo tjamo̧ pio ju̧i̧iäbo goë cjo̧dërequede. Tjamo̧ davä, Tjo tjamo̧ pio ju̧i̧iä, Ütë ja̧ charea̧ ba chia ja̧ dëbëräpȩ cjiamȩ pio ju̧i̧iä, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧iä peaja̧di goë cjo̧dërequede pio dibë chjiari.
Ja̧dëa ji̧ ado cja̧rȩmo̧ mu̧i̧tjoi̧ üdë pjura̧dejȩ jibëa̧ pjurarea̧ra̧. Cja̧ȩta̧ra̧ ichiri cja̧rȩmȩ mu̧i̧tjoi̧rȩ jibëa̧ra̧ pjurarërea̧ ji̧, cjiadiäa̧mȩ pio judi pjura̧dejȩ jibëa̧ra̧. Ado a̧dëräpȩji̧ri̧ pio judiro̧ chjaodëri̧ ni̧bäji̧ri̧pea̧dirȩ to̧bari̧. Ado ja̧di ta̧rëri̧ yo̧a̧dirȩ: —Pio yaba̧ doro Ütë tjamo̧ judi tjamo̧ cjo̧ro̧mȩrȩ cjo̧ro̧pade daburäpȩ —yo̧a̧dirȩ—. Pumȩ ütëbodärärë pio ju̧i̧ ja̧ chja̧oerämo̧ cjo̧ro̧padirȩ, ja̧di dari̧ cjo̧ro̧dërërea̧ ji̧. Ado Chjätä Tänȩmȩ pio ju̧i̧ ja̧ chja̧oerä cjo̧ro̧padirȩ peaja̧di, Ütërë chjadüa̧ pio ju̧i̧ ja̧ chjaoerä. Jabechji̧ pio judiro̧ tjamo̧ cjo̧ro̧ji̧ri̧rȩ cjo̧ro̧padirȩ bucho ana̧, yuroparea̧ decjiari̧. Aja̧, ja̧di ta̧rëri̧ yo̧ji̧ri̧ oa ta̧rëa̧requedejȩrȩ.
Ja̧dëa ji̧ daea̧reconȩ ado cja̧rȩmo̧ na̧rȩrea̧ oa, quëna̧rea̧mi̧dë na̧rȩrea̧ oa. Dacho bëremi̧ cjiari̧ jo̧rȩtamȩrȩ daea̧reconȩ uapamȩrȩ. Cja̧ȩta̧ra̧ ichiri yo̧a̧ri̧ mu̧i̧tjoi̧ ji̧ri̧ daea̧requedejȩrȩ cja̧ȩta̧ra̧ ichiri yo̧a̧ri̧ conȩdarea̧ chiaji̧ri̧ oa. Pumȩ pio ji̧ri̧iäpȩmo̧ conȩdapea̧ oa chiareji̧ri̧dirȩ. Ado pio jiro conȩdarea̧ üdë, jabechji̧ cjiadiäa̧mȩ conȩdarea̧de. Ado judiri decjiade. Jabechji̧ pio jiro conȩdarea̧ra̧ pio ju̧ri̧ra̧ jibëa̧ ërecjia̧ pio ju̧i̧ nö̧tadäräri̧ japadäräpade Ütë tjamo̧ judi, ado chjereno̧ na̧rȩdëpea̧ oa. Jabechji̧ pio yoamo̧ japadärä ëte cjiadiäpade.
Ja̧dëa ji̧ ta̧rëa̧reconȩ ni̧bämȩ ju̧i̧. Ütë tjamo̧ ja̧ bëri pio judiri ni̧bämȩ ju̧i̧ ta̧rëa̧reconȩ, to̧bari̧ ni̧bämȩ oa. Ja̧di ta̧rëri̧ yo̧mȩrȩ yo̧a̧dejȩrȩ cja̧ȩta̧ra̧ ichiri yo̧a̧ri̧ mu̧i̧tjoi̧ ji̧ri̧, jibëa̧ tachjarä conȩdarea̧ goaji̧ri̧ pio ji̧ri̧: —Jächji̧vä —yo̧a̧dejȩrȩ—. Arë cjare jächji̧vä tachjarä chamȩ pio ju̧i̧, Ütë tjamo̧ ja̧ ërecjiarea̧ pio ju̧i̧. Daburäpȩmo̧ arë cjarächji̧vä. Aja̧, ja̧di ta̧rëri̧ yo̧a̧mȩ oa ta̧rëa̧reconȩ.
Ja̧dëa ji̧ pua oa daea̧requede iu puami̧ da oa. Uë tjamo̧ oa pjo̧a̧ baämȩ oa daea̧reconȩ. Ado to̧bari̧ ea cjiamȩrȩ yo̧a̧de: —A̧dëräpȩmȩ ja mu̧i̧tjoi̧ judiro̧ pjurapea̧ ji̧ jabë pjärämȩde. Aja̧, tjarari̧ pjurarea̧ra̧ jabë pjurapea̧de. Ado a̧dë chjäte uapai̧ dari̧ bape chjaopadejȩrȩ pumȩ ji̧ri̧. Tjamo̧ davä. Pio jiro pjurarea̧ra̧ pjura̧ oa cjiarä, pumȩ judiro̧ gito ana̧ tjamo̧ri̧ jo̧rȩtaji̧ri̧rȩ ejaro cjiapadirȩ, i ma̧na̧guraji̧ri̧rȩ. Aja̧, ja̧di ta̧rëri̧ yo̧mȩ oa ta̧rëa̧reconȩ.
Ado jadüchiami̧ mu̧i̧tjoi̧rȩ jibëa̧ pjurarea̧ra̧ pjurarërea̧ ji̧, ado cja̧rȩmo̧rȩ ano̧ mire pjura̧dejȩ jibëa̧ra̧. Ado a̧dëri pio judiri cjatäa̧ duri oa daea̧reconȩ büëmi̧ da cjiamȩ pio ju̧i̧. Ado cja̧rȩmȩrȩ yürüa̧ oa mitëa̧dejȩ joë ya coërea̧ oa, a̧dë chjäte urëdi puë oa areiapea̧ oa, daburäpȩmȩ puë oa areiapea̧ oa.