Jabechji̧ ca̧ ja pio judi ja̧boa̧mi̧ dari̧ cjiarërea̧ ji̧, bëdüa̧ oa cjiami̧ dari̧ cjiadiquȩ yaba̧. Dabadëpea̧ oa cjiami̧ dari̧ cjiarërea̧ ji̧, dadäräa̧ oa cjiami̧ dari̧ cjiamȩpea̧de yaba̧. Irä ëbareconȩ ado chjereno̧. Pio ju̧i̧iä a̧dopapea̧ chiarea̧rȩ airi̧ cjiaji̧ri̧rȩ. Jo̧ȩra̧pȩchji̧vä" yo̧a̧dejȩrȩ. Ado bë ana̧mȩ pio judi jibëa̧ mu̧i̧tjoi̧ pio ji̧ri̧ yo̧a̧mi̧ japeno̧a̧dirȩ chjaodëri̧. Ado chjö̧na̧i̧ oa jëdano̧ ëte, taruparëreji̧ri̧dirȩ airi̧ cjia airi̧ cjia a̧dopapea̧ ji̧.
Jechurë Na̧rȩrërea̧ Ma̧ȩ 3:1 - Biblia Pume1 Ja̧dëa ji̧ cüdë daea̧ üdë, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Charade quȩmȩ bë ma̧ri̧räpȩ tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧ chiareconȩ. Ado cja̧ȩta̧ra̧ ichiri yo̧a̧ri̧ büë oa peaja̧di goarequede ca̧ ichirä. Aja̧, pio judirequede. Ado pio judimȩrȩ tjamo̧ri̧ dabarequede pio dibë chjiari. Danȩrȩ, bëdüa̧ oa cjiami̧ dari̧ cjo̧ro̧nȩrȩ jabo cjäri̧ manȩrȩ, ja̧boa̧mi̧ dari̧ cjianȩrȩ. Faic an caibideil |
Jechurë Na̧rȩrërea̧ Ma̧ȩ 3:1
30 Iomraidhean Croise
Ado yaba̧ na̧ ayi̧ma̧i̧ pio judi ma̧na̧ tara, jabechji̧ chjadëde a̧ro̧rȩ pio ju̧i̧di airi̧ cjia airi̧ cjia ëba a̧dopapea̧ ji̧. Na̧ ayi̧ma̧i̧ pio judi ja̧boa̧mi̧ dari̧ cjiarërea̧ ji̧, jabechji̧ bëdüa̧ oa cjiami̧ dari̧ cjiade yaba̧. Ado dabadëpea̧ oa cjiami̧ dari̧ cjiarërea̧ ji̧, jabechji̧ dadäräa̧ oa cjiami̧ dari̧ cjiade. Ado pio ju̧i̧iä jabechji̧, airi̧ cjia airi̧ cjiaji̧ri̧rȩ ëba a̧dopapea̧de" yo̧mȩrȩ yo̧rëremȩdejȩ joja oa jäja pio judi. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ pjaricheo ji̧ri̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ Jechu judi.
Jabo pio ju̧i̧ daea̧mȩborë, ‘jabechji̧ Ütë tjamo̧ ja̧ Jojadida’ quëna̧ dabadëa̧täremȩreconȩ. Jabo Ütë tjamo̧ judi coa jabërä ni̧bäa̧ oaiä, uira̧ go̧e cjaeä chudapea̧ oa chjadürëremȩ pio judi coa jabërä ni̧bäa̧ oaiä, jabechji̧ dabamȩpea̧requede. Ado coa yo̧a̧ ji̧, ja̧di ta̧rëri̧ yo̧rëremȩdique: "Danȩ Juan, Jechuro cjiadiäpea̧ oa biradärämȩ oa daparenȩ Tjo tjamo̧ pio ju̧i̧" yo̧a̧dique. "Pio judi tjamo̧de. Tjo tjamo̧ra̧ pio ju̧ri̧ra̧ go̧ȩ cjaeä chudapamȩ pio judi tjamo̧de" yo̧a̧dique.
Pio ju̧i̧iä ba chia tjamo̧parȩmi̧ dari̧ japarëremȩdejȩ Ütë tjamo̧ judi ba chiati̧ tjamo̧räpȩ cha tänȩa̧ oaiä, pio ju̧i̧ ja̧ mu̧i̧ chjuari pio judiri cha tänȩa̧ oaiä. Jabechji̧ bëdüa̧mȩ pio ju̧i̧ a̧dëräpȩ yuro cjitë tänȩrëremȩdejȩ Jäjäa pio ju̧i̧ ja̧ cotoräpȩ cha tänȩpea̧ oa. Ado ja̧dëa ji̧ Ama̧i̧ tjamo̧ judi Joja pio ju̧i̧iäpȩmo̧ yürürëremȩdejȩ Tjo tjamo̧ ju̧i̧, jënȩ yo̧ë cji̧därërea̧mi̧. Ado ja̧dëa ji̧ pio ibëiäpȩmo̧ ano̧ mire yürü chjadüa̧diibe yaba̧. Aja̧, Tjo tjamo̧ pio ju̧i̧ yürü chjadüa̧diibe, pio judirimȩ marë. Ado pio ju̧i̧iä tjaoëpai̧ dari̧ ni̧bäji̧ri̧ oa darenȩro̧ibe ca̧ oti̧. Tjamo̧ davä. Tjo tjamo̧ pio ju̧i̧iä oëra̧ti̧ a̧rȩmȩ chirirä ni̧bärea̧ ma̧ȩ oa ni̧bäji̧ri̧ oa ta̧rërenȩro̧ibe —yo̧a̧dejȩrȩ—.
Jabo pearä judi mȩnȩro̧ chjai̧dëri̧ japaji̧ri̧rȩ cjo̧ro̧rërea̧ pio ju̧i̧iä, jabechji̧ ja̧boa̧mi̧ dari̧ cjiarëremȩde dibëa̧ tjo üdë. Jabechji̧ Ütë tjamo̧ ja̧ pumȩdërëreji̧ri̧nȩrȩ. Ado mȩnȩro̧ dibëa̧ icjararä chjai̧dërë yo̧a̧ chja̧oeri pio judiri go̧düpea̧ oa budoa̧ oa cjiami̧ dari̧ cjiadërëreji̧ri̧nȩrȩ. Jabo Ütë tjamo̧ judi cjo̧ro̧rea̧ yürürëremȩdidibe Quiricho pio ju̧i̧ nö̧ta mȩnȩro̧ pea chjari̧ cjo̧ro̧pea̧ oa. Ado mȩnȩro̧ chjai̧dëri̧ japea̧ chjö̧na̧i̧ oa duridëparȩrëremȩdejȩ cjiadiärea̧ decjiari̧.
Danȩrȩ ca̧ pumȩ, a̧ro̧rȩ ibëa̧ tjo chiadërä judi cjo̧ro̧rea̧mi̧dëde. Chjaodëri̧ ja̧botäreji̧ri̧rea̧rȩ. Jabechji̧ ja̧boa̧mȩ ja̧ icjara üdë pumȩ tjoborë a̧rȩdëde. Tjo chiadëde. Pumȩdëde. Ado peaja̧dide quëna̧rea̧ pio ju̧i̧ chjiari. Quëna̧rea̧ üdë chjadëri̧ japarea̧ra̧ pio ju̧ri̧ra̧ na̧rȩdërä judi, peaja̧di ja̧boa̧mi̧ dade. Badëde.
Jabechji̧ tjamo̧ri̧ dabapatämi̧ cjiarëreji̧ri̧dirȩ ma̧na̧pamȩ pio ju̧i̧ chjiari, judi ma̧na̧pea̧ do pio ju̧i̧ chjiari. Jabechji̧ Quiricho pio ju̧i̧ ja̧ tjo üdë pio ji̧ri̧ ja̧ icjararä cjiamȩrȩ ma̧ȩ yürürërea̧ ji̧, ana̧ tjamo̧ri̧ jo̧rȩtaji̧ri̧pea̧dirȩ, tjamo̧ri̧ jidate cjiaji̧ri̧rȩ. Tjamo̧ davä. Quiricho ja̧ tjo üdë pio ji̧ri̧iä ma̧ȩ yürürërea̧ ji̧, jënȩ gitoi̧ dari̧ conȩda̧ oa cjiapea̧ pio ju̧i̧ chjiari jabërä pio ji̧ri̧iä ma̧ȩ yürürërea̧ ji̧, jënȩ a̧dë chjäte ba chia tjamo̧räpȩ ju̧ri̧ ado chjereno̧ chadäräpea̧ pio ju̧i̧ chjiari jabërä pio ji̧ri̧iä ma̧ȩ yürürërea̧ ji̧, jabechji̧ ana̧ri̧ jo̧rȩtaji̧ri̧pea̧dirȩ no̧mȩ tjamo̧ri ja̧ cjo̧ro̧ji̧ri̧ pio judiro̧. ‘Chia chia, ¿chjia ju̧i̧ chjiari yo̧diibëda, naparä ma̧na̧padiibëda, chjia tjamo̧dida’ quëna̧ jo̧rȩtaji̧ri̧rȩ na̧tami̧ dari̧ iëno̧ iëno̧ cjiarëreji̧ri̧dirȩ, tjamo̧ri̧ dabapatämi̧ cjiaji̧ri̧rȩ.
Jabo danȩrȩ ca̧ oti̧, pio jiro pumȩ judiro̧, pio dibë nö̧ta ëba a̧dopea̧ oaiä a̧dë chjäte idi̧dade. Tjamo̧ davä. Mȩnȩro̧ a̧doparä, mȩnȩro̧ ori̧ bagari̧ ëba cjiapea̧ oa a̧doparä, mȩnȩro̧ ëba jurapea̧ oa a̧doparä, mȩnȩro̧ Jechu ja̧ icjara oa jo̧rȩtaji̧ri̧rȩ ëba jurapea̧ oa a̧doparä, cjäri̧ made, dibëa̧ a̧doparea̧ üdë cjari̧dami̧ dari̧ cjiade pio judiro̧borë ëba a̧dopea̧ oaiä. Jabechji̧ judiro̧ pio dibë nö̧ta ëba a̧dopapea̧ ji̧ idëri̧ cjiatärea̧ ji̧, judiro̧ ma̧i̧ dari̧ japea̧ oaiä idëri̧ cjiatärea̧ ji̧, cjäri̧ madirȩ, idëri̧ cjiarea̧ taradëdirȩ, jabo pio dibë nö̧ta ëba a̧dopatämi̧ cjiadiro̧dibe pio dibë ana̧ri̧ oëra̧diä tänȩpea̧ oa. Jabechji̧ ma̧i̧ da oëadëji̧ri̧dirȩ. Ado ui yürüdëmȩ go̧a̧ra̧ ëmi̧ dari̧ cjo̧ro̧dirȩ. Tjamo̧ davä. Dibë ma̧diä cjia tänȩa̧ oaiä, dibë u̧i̧pe chjaoa̧ oaiä, ui yürüdëmȩ go̧a̧ra̧ ëmi̧ dadirȩ. Danȩrȩ, pjaepa üdë chia ma̧na̧diibe go̧a̧ra̧ ë pio ju̧i̧. Jabo chjadëri̧ cjütärea̧ ji̧, ui oa chjadëri̧ yürütärea̧ ji̧, a̧dodë madiibe jabomo̧ u̧i̧pami̧ dari̧ japadiibe ji̧dëri̧. Peaja̧dimi̧ dari̧ japadiro̧dibe pio jiro pumȩ judiro̧. Tjamo̧ri̧ a̧dodëpadiro̧dibe, jabomo̧ u̧i̧pe chjaodiro̧dibe. Ado danȩrȩ, pio jiro pumȩ judiro̧ jurarea̧ yürüdëmȩ tomi̧ dadirȩ peaja̧di. Jabechji̧ chjadëri̧ chiami̧ dari̧ cjo̧ro̧tärea̧ ji̧, jurarea̧ mitërea̧mi̧ dapea̧rä mitërea̧mi̧ dari̧ chiatärea̧ ji̧, mȩnȩro̧ mairi̧ jurami̧ dari̧ jurapea̧ oa chjadëri̧ yürümi̧ dari̧ cjo̧ro̧tärea̧ ji̧, cjäri̧ madiro̧dibe ca̧ oti̧, yürürea̧ chiadë madirȩ jabomo̧ ma̧diä cjia tänȩdiro̧dibe. Tjamo̧ davä. Pio jiro oëra̧ a̧ra̧ano̧ji̧ri̧ pio judiro̧ yürürea̧ chiadë madirȩ. Jabechji̧ jabërä ja̧boa̧ tara, tacö̧remȩ üdë dairäpȩ a̧rȩmi̧ dari̧ go̧dü tänȩa̧ oa cjia tara, jabechji̧ yürürea̧mi̧dë madiro̧dibe.
Ja̧di ta̧rëri̧ yo̧mȩrȩ yo̧a̧dique: —Danȩ Juan, mȩnȩ dapea̧ pio ju̧i̧ chjiari go̧ȩpatä earequedemȩ go̧ȩ irä —yo̧a̧dique—. Ado mȩnȩ go̧ȩpa ëte, jabechji̧ chjadütä earequedemȩ ca̧ a̧doparea̧ ji̧ra̧ oa, cja̧ȩta̧ra̧ ichiri yo̧a̧ri̧ oa. Aja̧, Epjecho quȩmȩ bë ma̧ri̧räpȩ a̧doparea̧ pio ju̧i̧, Echimira quȩmȩ bë ma̧ri̧räpȩ a̧doparea̧ pio ju̧i̧, Pegamo quȩmȩ bë ma̧ri̧räpȩ a̧doparea̧ pio ju̧i̧ chjadütä earequedemȩ. Ado Tiatira quȩmȩ bë ma̧ri̧räpȩ a̧doparea̧ pio ju̧i̧, Charade quȩmȩ bë ma̧ri̧räpȩ a̧doparea̧ ju̧i̧, Pjiradëpjia quȩmȩ bë ma̧ri̧räpȩ a̧doparea̧ ju̧i̧, ado Daodichea quȩmȩ bë ma̧ri̧räpȩ a̧doparea̧ pio ju̧i̧ chjadütä earequedemȩ peaja̧di. Aja̧, Achia quȩmȩ chiriräpȩ tjaoëpa a̧dopaji̧ri̧ oa chjadütä earequedemȩ ma̧ȩ oa —yo̧a̧dique.
Ado mȩnȩ, goadia̧ oa cjiarëremȩ pio ju̧i̧ chjiari dabadëchea oa, jabechji̧ chjadëri̧ yo̧parequedemȩ yaba̧ cja̧ȩta̧ra̧ ichiri yo̧a̧ri̧ büë pio ju̧i̧ chjiari, mȩnȩ ca̧ mu̧i̧ chjuari ja̧ ichirä daea̧ pio ju̧i̧ chjiari. Ado cja̧ȩta̧ra̧ ichiri yo̧a̧ri̧ tataparea̧ chiamȩ to pio ju̧i̧ chjiari, oro maeara̧ japea̧ pio ju̧i̧ chjiari, peaja̧di chjadëri̧ yo̧parequedemȩ. Danȩ, pio jiro tataparea̧ chiamȩ to üdë, jabechji̧ ca̧ a̧doparea̧ pio judide. Cja̧ȩta̧ra̧ ichiri yo̧a̧ri̧ a̧doparea̧de. Achia quȩmȩ chiriräpȩ a̧doparea̧de. Ado ca̧ ichirä goa̧ büë üdë, cja̧ȩta̧ra̧ ichi yo̧a̧ri̧rȩ, jabechji̧, mu̧i̧tjoi̧dirȩ. Cja̧ȩta̧ra̧ ichiri yo̧a̧ri̧ mu̧i̧tjoi̧dirȩ. Ca̧ a̧doparea̧ pio ji̧ri̧ tjamo̧ jidaji̧ri̧ pio judiro̧dirȩ —yo̧mȩrȩ ni̧bä chjaoremȩdique pumȩmi̧ da cjiamȩ judi.
Aja̧, Juan pio judi tjamo̧requede cüdë. Pio yoa ma̧ȩ oa go̧ȩpe chjadürequedejȩrȩ Quiricho ja̧ a̧doparea̧ oa, cja̧ȩta̧ra̧ ichiri yo̧a̧ri̧ buba oa, Achia quȩmȩ chiriräpȩ tjaoëpa a̧dopaji̧ri̧ oa. Ado pio dibë chjiari goë cjo̧dërequede Ütë tjamo̧ pio ju̧i̧iä. Tjamo̧ davä. Pearämȩ pio ju̧i̧iä, jabechji̧ cjiamȩ pio ju̧i̧iä, yuropadëmȩrȩ cjiamȩ pio ju̧i̧iä goë cjo̧dërequede pio dibë chjiari. Aja̧, pio dibëiäpȩmo̧ cjäri̧ri̧ cjiamȩrȩ yürütä goë cjo̧dërequede, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabo pio ju̧i̧iämo̧ cjo̧dëdërequede. Jabechji̧ Tjo tjamo̧ pio ju̧i̧iäbo goë cjo̧dërequede. Tjamo̧ davä, Tjo tjamo̧ pio ju̧i̧iä, Ütë ja̧ charea̧ ba chia ja̧ dëbëräpȩ cjiamȩ pio ju̧i̧iä, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧iä peaja̧di goë cjo̧dërequede pio dibë chjiari.
Danȩrȩ, pio dibë chjiari dabarequede. ‘Ichiaerë ana̧ tjamo̧ri̧ ja̧bepea̧räpȩ cjo̧ro̧diro̧da, Ichiaerë tjamo̧ cjo̧ro̧a̧mi̧ daräpȩ cjo̧ro̧diro̧da’ quëna̧ dabarequededibe. Jabo ja̧di daräpȩ cjo̧ro̧räbo, jabechji̧ coëma cjiari̧ cjo̧ro̧nȩrȩ. Jabechji̧ pio coaiäpȩmo̧ quëna̧dëpe bagadëa̧nȩrȩ. Ado dibëa̧ chjarerä cjo̧ro̧remȩ pio ju̧i̧ ja̧bo tänȩrërea̧ ji̧, pio coa chjiari ji̧dë ma ni̧bäremȩ pio ju̧i̧ ja̧bo tänȩrërea̧ ji̧, Atipa quȩmȩ pio ju̧i̧ ja̧bo tänȩa̧ ji̧, jabechji̧ mȩnȩro̧ quëna̧dëpe bagatärea̧ ji̧, cjäri̧ manȩrȩ, quëna̧dëpe bagadëa̧nȩrȩ, jabo jabechji̧ pio coaiäpȩmo̧ chjuari̧ quëna̧ji̧ri̧rȩ cjo̧ro̧rëreji̧ri̧renȩrȩ chjao tjamo̧räbo, Ichiaerë bëpea̧mi̧ daräpȩ cjo̧ro̧räbo.
Danȩrȩ, pio dibë chjiari chjadëri̧ dabarequede ca̧ pumȩ. Aja̧, mȩnȩro̧ dibëa̧ dëbëti̧ra̧ chia ea̧ pio ju̧i̧ dabarequededibe, mȩnȩro̧ chjuari̧ quëna̧ pio ju̧i̧bo. Ado dibëa̧ ba dëbëti̧ra̧ chia a̧doa̧ pio ju̧i̧ dabarequede peaja̧di, mȩnȩro̧ ja̧bepea̧ pio ju̧i̧ chjiaribo. Ado mȩnȩro̧ chjai̧dë oa chjätäräbo, jabechji̧ chjuari̧ quëna̧ji̧ri̧rȩ cjo̧ro̧nȩrȩ, Ütë tjamo̧ ju̧i̧ jëreea tänȩdëji̧ri̧rȩ. Ado pio ju̧i̧bo dabarequede. Ado mȩnȩro̧ Ütë tjamo̧ ja̧ oa ana̧ri̧ ja̧bepea̧ pio ju̧i̧ chjiaribo dabarequede. Jabechji̧ mȩnȩro̧ pearä ja̧beparërea̧ ji̧, jabechji̧ ji̧dë u̧i̧ ana̧ri̧ ja̧bepaji̧ri̧pea̧nȩrȩ yaba̧. Ado pio ju̧i̧ chjiaribo dabarequede.
Danȩ, dabarequede pio dibë chjiari. Mȩnȩro̧ ca̧ea̧ pio ju̧i̧ ja̧bepe chjaoa̧ pio ju̧i̧ chjiari, mȩnȩro̧ goaedëräbo coëma cjiari̧ cjo̧ro̧a̧ pio ju̧i̧ chjiari dabarequede. Chjuari̧ quëna̧ji̧ri̧rȩ ja̧bepaji̧ri̧ oa, jëreeadëji̧ri̧ oa darequededibe davä conȩda̧ oa cjia̧räbo. Ado chjai̧dëri̧ japaji̧ri̧ pio ji̧ri̧ ta̧rë ja̧bodë marenȩro̧jȩrȩ. ‘Jabechji̧diro̧da’ quëna̧ dadë marenȩro̧jȩrȩ. Pio ju̧i̧bo dabarequede. Ado mȩnȩro̧, teracabari̧ yo̧ji̧ri̧ pio ji̧ri̧ chjadëri̧ ütarë daea̧ pio ju̧i̧ chjiaribo dabarequede. Tjamo̧ davä. Mȩnȩro̧ na̧e chiaji̧ri̧rȩ chjadëri̧ ütarë daea̧ oaiä, chjadëri̧ dabaji̧ri̧pea̧nȩrȩ teracabari̧ yo̧ji̧ri̧ pio ji̧ri̧ chjiari, Jechurë chjadüa̧cji̧ quëna̧ japaji̧ri̧ pio ji̧ri̧ chjiari. ‘Aja̧, ma̧ȩ chjádë yürüji̧ri̧ maeadiro̧da’ quëna̧ dabaji̧ri̧pea̧nȩrȩ chjadëri̧. Pio ju̧i̧ chjiaribo dabarequede.
Danȩrȩ, dabarequede pio dibë chjiari. Mȩnȩro̧ chjai̧dë oa chjätäa̧ pio ju̧i̧ chjiari, o judiro̧ dibë conȩda̧ pio ju̧i̧ chjiari dabarequede. Ado chjö̧na̧i̧ti̧ oa cjäri̧ ja̧boji̧ri̧ oa darequededibe, eami̧ oa goadëji̧ri̧ oa. Jabo eami̧ oa goadëräbo, jabechji̧ a̧dë chjäte ji̧ra̧ri̧ goaji̧ri̧mi̧ dari̧ cjianȩrȩ. Jabo dëdë, conȩdadiro̧dibe. Ado pio ju̧i̧ chjiari dabarequede. Ado judio judiro̧ pio dibëiäpȩmo̧ teracabari̧ aechide ni̧bäa̧ pio ju̧i̧ chjiaribo dabarequede. ‘Ütë tjamo̧ ja̧ pumȩrea̧rȩ’ yo̧dirȩ, jabo cjäri̧ madirȩ, Ütë tjamo̧ ja̧ pumȩdëdirȩ. Ichiae ja̧ pumȩdirȩ.
Jabechji̧ mȩnȩro̧ Ütë tjamo̧ ja̧ ma̧ȩrä tüdüa̧mi̧ darä cjo̧ro̧rërea̧ ji̧, chjadëri̧ na̧rȩji̧ri̧rȩ cjo̧ro̧rërea̧ ji̧, ju baebaeami̧ dari̧ cjiadiäji̧ri̧pea̧nȩrȩ. Jabechji̧ ja̧bopea̧ querediämi̧ dari̧ cjiade mȩnȩro̧ quëna̧ üdë. Jabechji̧ dae chjaodidibe Ütë tjamo̧ judi coëma cjiari̧ cjo̧ro̧dëji̧ri̧ oa.
Ado danȩrȩ, tjamo̧ri̧ dabarequede pio dibë chjiari. ‘Aja̧, jadi dari̧ cjo̧ro̧diro̧da, ja̧di dari̧ jo̧rȩtadiro̧da’ quëna̧ dabarequededibe. Ado mȩnȩro̧ dibëa̧ tjoro ju chiarea̧ dadëräbo, mȩnȩro̧ järätä järätä jo̧rȩta̧räbo, jabechji̧ ca̧ ma̧ȩrä cjo̧ro̧nȩrȩ. Ütë tjamo̧ judi yo̧a̧mi̧ japaji̧ri̧rȩ cjo̧ronȩrȩ. Ado pio ju̧i̧iä areia̧reconȩ joë ya̧mi̧ da oa dibëa̧ yaboräpȩ, ado cja̧rȩmo̧rȩ tuti cararea̧mi̧dëri̧.
Ado Ütë ja̧ charea̧ri pio judiri oëra̧ti̧ oa bërepe chjaoremȩde ma̧i̧ da dörö eari̧. Ado charea̧ dëbëräpȩ ju̧ri̧ daea̧requede cjo̧dë gärimȩ to ji̧ra̧ oa, cja̧ȩta̧ra̧ ichiri yo̧a̧ri̧ oa. Aja̧, pio ji̧ri̧ daea̧requedejȩrȩ cja̧ȩta̧ra̧ ichiri yo̧a̧ri̧ na̧rȩrea̧ oa, Ütë tjamo̧ pio ju̧i̧ ja̧ na̧rȩrea̧ oa.
Ado ja̧dëa ji̧ daea̧reconȩ Oveja pëi̧ chjamȩmi̧ da pio ju̧i̧. Ütërë chamȩ ba chiaräpȩmȩ oa daea̧reconȩ cjiamȩ oa. Ado jibëa̧ icjara nö̧tai̧ oa dacho chiaji̧ri̧ pio judiro̧ jadüchiami̧rȩ tjoro tänȩa̧diro̧jo̧ȩ jibëa̧ yuro nö̧tai̧ oa cjiari̧. Ado tjamo̧ yo̧ji̧ri̧ judiro̧ peaja̧di tjoro tänȩa̧diro̧jo̧ȩ ta ütëbo jadüchiami̧rȩ, 24rë. Ado Oveja pëi̧ chjamȩmi̧ da pio ju̧i̧ daea̧ ji̧, ja̧bo tänȩa̧ oa cjiami̧ da oa daea̧reconȩ. Ado yatë chiaremȩde cja̧ȩta̧ra̧ ichiri yo̧a̧ri̧ oa. Ado dacho chiaremȩde peaja̧di cja̧ȩta̧ra̧ ichiri yo̧a̧ri̧ oa. Ado pio jiro dacho üdë, jabechji̧ Tjo tjamo̧ pio ju̧i̧ chjiari na̧rȩrea̧de. Aja̧, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧ chjiari na̧rȩrea̧de. Ado pio jiro Tjo tjamo̧ pio judi peadë chjadüa̧ oa cjiade chiriräpȩti̧ oa Ütë tjamo̧ pio judi chjadüa̧ ju̧i̧iä.
Sanasan