Ado danȩ ca̧ ütë, mȩnȩ pumȩmi̧ da pio ju̧i̧ ja̧ ta oa darämi̧ cjia̧ ji̧, mȩnȩ ta chjiabo daea̧ ji̧, jabechji̧ mirea̧mȩ oa daea̧renȩjo̧ȩ. Aja̧, iero üdë dabu bërebëreara̧ mirea̧ oa cjiamȩ oa daea̧renȩjo̧ȩ. Jabo danȩ ca̧ ütë, iero üdë dabu bërebëreara̧ ji̧cha̧ri̧ mirerea̧mi̧dëde. Chjuari̧ mirerea̧mi̧dëde. Ado peaja̧dimi̧ dari̧ cjo̧ro̧padirȩ ieromi̧ da cjiamȩ ütë pio ju̧i̧ ja̧ chja̧oeräji̧ri̧ judiro̧. Jabechji̧ judiro̧ orë ieromi̧ dari̧ cjo̧ro̧räbo, ju chiaji̧ri̧mi̧ dari̧ cjo̧ro̧räbo, jabechji̧ cja̧rȩmȩ chji̧ chiami̧ dari̧ cjo̧ro̧rea̧ dadëpadirȩ, jabo ji̧dë ma chjarapë jo̧rȩtaji̧ri̧rȩ cjo̧ro̧padirȩ, jadüchiami̧ bubape bagarea̧mi̧ dari̧.
Jechurë Na̧rȩrërea̧ Ma̧ȩ 12:3 - Biblia Pume3 Ja̧dëa ji̧ ado cja̧rȩmo̧ na̧rȩrea̧ üdë na̧rȩa̧ oa cjiadiäa̧de a̧dëräpȩ ju̧ri̧. Uapai̧ dari̧ daea̧reconȩ. A̧dë chjäte ana̧ oa daea̧reconȩ chjö̧ri̧mi̧ da oa, coëcoëa oa. Cja̧ȩta̧ra̧ ichiri yo̧a̧ri̧ tjübë chiamȩ oa daea̧reconȩ, ichi chjö̧na̧i̧ yatë chiamȩ oa. Ado yuaremȩde yuarea̧ ba chia oa tjübë nö̧ta oa. Faic an caibideil |
Jechurë Na̧rȩrërea̧ Ma̧ȩ 12:3
27 Iomraidhean Croise
Aja̧ ca̧ ütë, mȩnȩ pumȩmi̧ damȩ pio ju̧i̧ ja̧ ta oa daea̧ ji̧, jabechji̧ mirea̧ oa cjiamȩ oa daea̧renȩjo̧ȩ. Ierora̧ mirea̧ oa cjiamȩ oa daea̧renȩjo̧ȩ dabu bërebëreara̧. Ado peaja̧dimi̧ dari̧ cjo̧ro̧padirȩ pio jiro ütëti̧ judiro̧. Jabechji̧ judiro̧ orë jabëtari̧mi̧ ju chiami̧ dari̧ cjo̧ro̧räbo, jabechji̧ ju chiadëji̧ri̧mi̧ dari̧ cjiadiäpadirȩ peaja̧di dabu bërebërea pio judimi̧ dari̧.
Ado danȩ, peaja̧di dabatämi̧ cjiarequede ichi chjö̧na̧i̧ yatë pio ji̧ri̧ chjiari, cjiadiäa̧mi̧ go̧düa̧mȩ pio ju̧i̧ ja̧ tjübërä chiamȩ yatë pio ji̧ri̧ chjiari. Ado yatë boi̧chji̧ pio ju̧i̧ chjiaribo tjamo̧ri̧ dabatämi̧ cjiarequede, jibëa̧ jadü ja̧ chjarerä cjiaremȩ yatë pio ju̧i̧ chjiari, jidë duri oa cjitëa̧ pio ju̧i̧ chjiari. Aja̧, pio judi cjitëa̧rä, jabechji̧ daea̧reconȩ ado cja̧rȩmo̧ yatë oa boadäräa̧mȩ oa, tjarari̧ oa boadäräa̧mȩ oa. Jabechji̧ o ji̧ri̧iä ji̧dë u̧i̧ ba chiamȩmi̧ da oa daea̧reconȩ. Aja̧, pumȩ ja̧ dachomi̧ da oa chiamȩ oa, ado jibëa̧ yara̧ pio jȩa chjiari a̧dë chjäte goaeri̧ ni̧bämȩ oa darämi̧ cjiaremȩreconȩ, jibëa̧ chji̧rämo̧ jo̧rȩtatamȩ oa, 'ba chia tjamo̧mȩquëda' quëna̧mȩ oa.
Ado ja̧dëa ji̧ a̧de ni̧bä chjaoa̧dique ichi chjö̧na̧i̧ yatë pio ju̧i̧ chjiari: —Ado danȩ, cjiadiäa̧mȩ chirirä cjo̧ro̧mi̧ dari̧ cjiamȩ pio judi, jabechji̧ yatë oa chiapade ichi chjö̧na̧i̧ oa. Ado pio jiro yatë üdë, jabechji̧ ichi chjö̧na̧i̧ ütë pio ji̧ri̧ chjiari na̧rȩrea̧de. Aja̧, cja̧rȩmȩ chiri ütëmȩ pio judi cjo̧ro̧rërea̧ ji̧, jabechji̧ ichi chjö̧na̧i̧rȩ cjitëpadirȩ chiri ütëji̧ri̧rȩ ano̧ mire cjo̧ro̧pea̧ oa. Ado ja̧dëa ji̧ judiro̧ chiri ütëji̧ri̧rȩ cjo̧ro̧ji̧ri̧pea̧rä, ado cja̧rȩmo̧ ütërë peaja̧di cjitëpade, tjaoëpai̧ darë. Ado tjarari̧ ütëreji̧ri̧ pio ji̧ri̧ boadäräpadejȩrȩ.
Ado chjaodëri̧ na̧rȩa̧ oa cjiaremȩde a̧dë iräpȩ ju̧ri̧ na̧rȩrea̧ üdë. Dacho bëremi̧ cjiari̧ jo̧rȩtamȩrȩ daea̧reconȩ, ya yabë cjiamȩrȩ. Daea̧requede iei̧ ji̧, dora̧ ina̧ oa cjiayi̧ ji̧. Gupënȩ oa boë cjaeäyi̧ oa daea̧requedejȩ. Ado yuarea̧ ba chia tjamo̧ oa yuayi̧ oa daea̧requedejȩ, ichi chjö̧na̧i̧ yo̧a̧ri̧ büë chiamȩ yuarea̧ oa.
Ado pio ju̧i̧iä a̧dë chjäte ërecjiapea̧dejȩ iei̧ ji̧ chö̧ri̧mi̧ damȩ pio judi. Jabo cjäri̧ madejȩ, eami̧ oa japarea̧ dadëa̧dejȩ. Pio ju̧i̧iä ano̧ mire acji jäa̧dejȩrȩ iei̧ pio judiri ja̧ji̧ri̧ pio ji̧ri̧iäpȩmo̧. Tjamo̧ davä, Ütë tjamo̧ ja̧ ma̧ȩ oa ta̧rëdiäji̧ri̧ pio ji̧ri̧iäpȩmo̧, Jechurë yürüa̧ ma̧ȩ tjamo̧i̧ cjia oa ta̧rë japaji̧ri̧ pio ji̧ri̧iäpȩmo̧ ano̧ mire acji jäa̧dejȩrȩ.
Ja̧dëa ji̧ chjö̧ri̧mi̧ da üdë jibëa̧ chjiara̧ pio ju̧ri̧ra̧ mitëa̧de büë no̧i̧dë tjamo̧ oa. No̧i̧dë tjamo̧ oa mitëa̧de jabo ütëbodë oa, jabo oamo̧ oa. Ado daburäpȩmo̧ arë cürëmi̧ dari̧ aeno̧a̧dejȩ. Ado ja̧dëa ji̧ chjö̧ri̧mi̧ damȩ pio ju̧i̧ daea̧reconȩ iei̧ ja̧ dëbëräpȩ cjiamȩ oa. Iei̧ jini̧ pea ara̧rä boi̧chji̧ pio ju̧i̧ jurapea̧ oa jidatamȩ oa daea̧reconȩ.
Ado chjaodëri̧ idëpea̧de dëbëpe chjaorea̧ üdë a̧dëräpȩ ju̧ri̧. Mi̧guë quȩmȩ mu̧i̧tjoi̧ ba chia tjamo̧mȩ judi, a̧dërämȩ ja̧ mu̧i̧tjoi̧ pio ji̧ri̧ nö̧ta acji jäji̧ri̧rȩ, dëbëpe chjaoa̧diro̧jo̧ȩ chjö̧ri̧mi̧ damȩ pio ju̧i̧. Ado ba dëbëpe chjaoa̧dejȩrȩ jibëa̧ mu̧i̧tjoi̧ pio ji̧ri̧ nö̧ta. Tjamo̧ davä. Pio ju̧i̧ ja̧ mu̧i̧tjoi̧ pio ji̧ri̧ nö̧ta ba dëbë jape chjaoa̧dejȩrȩ.
Ado pio ju̧i̧iä aeno̧a̧diro̧jo̧ȩ daburäpȩmo̧, jibëa̧ mu̧i̧tjoi̧ pio ji̧ri̧bo. Aja̧, chö̧ri̧mi̧ damȩ pio ju̧i̧, no̧mȩ tjamo̧ri ja̧ cjo̧ro̧mȩ po ana̧ pio ju̧i̧ aeno̧a̧diro̧jo̧ȩ. Tjamo̧ aechide ni̧bämȩ pio judide. Ichiae pio judide. Chiriräpȩti̧ oa cjo̧ro̧ji̧ri̧ pio ji̧ri̧ ma̧ȩ chjádë yürümȩ pio judide. Ado pio judi a̧dëri pio judiri aeno̧a̧ oa cjiadiäa̧de jibëa̧ mu̧i̧tjoi̧ pio ji̧ri̧ nö̧ta.
Ja̧dëa ji̧ daea̧reconȩ chirirä cjo̧ro̧mȩmi̧ da oa, ui ana̧ri pio judiri go̧dümȩ oa. Uapai̧ da oa daea̧reconȩ yatë ji̧ra̧ri̧ chiamȩ oa, ichi chjö̧na̧i̧ yatë chiamȩ oa. Ado yatë nö̧tai̧ oa yuarea̧ ba chiara̧ mu̧i̧ idäa̧ oa cjiaremȩde, ütërë yuarea̧ ba chiami̧ dara̧. Ado tjübë ji̧ra̧ oa chiaremȩde peaja̧di. Cja̧ȩta̧ra̧ ichiri yo̧a̧ri̧ tjübë oa chiaremȩde quȩ chia maea oa. Tjamo̧ davä. Tjübë nö̧tai̧rȩ quȩ chiaremȩde. Quȩ china̧chja oa, Ütë tjamo̧ ja̧ quȩmi̧ da maea oa, pio ju̧i̧ ja̧ quȩdë oa chiaremȩde, pio ju̧i̧iäpȩmo̧ ya̧mȩmi̧ dari̧. Ado goae tjamo̧dëremȩde davä Ütë tjamo̧ pio ju̧i̧iä.
Aja̧, chirirä cjo̧ro̧mȩmi̧ da pio ju̧i̧ daea̧reconȩ pa̧rȩmȩ ca̧ra̧ca̧ra̧mi̧ da oa, boi̧dë oa. Ado jibëa̧ ta bori̧dë oa chiaremȩde jibëa̧ ta cö̧ ji̧ra̧ oa chiamȩrȩ, ivë go̧a̧ti̧ chiamȩrȩ. Ochjo quȩmȩ ja̧ tami̧ da oa chiaremȩde. Ado ju̧i̧ ja̧ ya üdë pa̧rȩmȩ coë ja̧ yami̧ daremȩde. Ado chö̧ri̧mi̧ damȩ pio judi jibëa̧ jauëchja oa yürüa̧dejȩ. Uiri judiri uapai̧ damȩ ju̧i̧iäpȩmo̧, chirirä cjo̧ro̧mȩmi̧ da pio ju̧i̧iäpȩmo̧ yürüa̧dejȩ. Ado tjamo̧ yo̧rea̧ pio ju̧i̧bo yürüa̧dejȩ. Pumȩ judiro̧ pio ju̧i̧ ja̧ chja̧oerä cjo̧ro̧pea̧ oa ja̧di dari̧ yürüa̧dejȩ. Ado jënȩ charea̧mi̧ daräpȩ yürüa̧dejȩ peaja̧di, ba chia tjamo̧mi̧ daräpȩ cjo̧ro̧pea̧ oa.
Ado ütëbodärärë chjacjiamȩri̧ jo̧rȩtareji̧ri̧diro̧jo̧ȩ chjö̧ri̧mi̧ damȩ pio ju̧i̧. Jabechji̧ jibëa̧ jauëchja oa uiri judiri uapai̧ damȩ pio ju̧i̧iäpȩmo̧ yürüa̧ oaiä, tjamo̧ yo̧rea̧ ji̧ra̧ oa pio ju̧i̧iäpȩmo̧ yürüa̧ oaiä, chjacjiamȩri̧ jo̧rȩtareji̧ri̧diro̧jo̧ȩ. Ado uirimȩ pio ju̧i̧iäpȩmo̧bo chjacjiamȩri̧ jo̧rȩtareji̧ri̧diro̧jo̧ȩ. Ado ja̧di ta̧rëri̧ yo̧a̧dirȩ pio ju̧i̧ chjiari: —Aja̧, chirirä cjo̧ro̧mȩmi̧ da pio judi ba chia tjamo̧de —yo̧a̧dirȩ—. Ado cja̧rȩmo̧rȩ nö̧tadë madejȩ. Pio judimo̧de. Ado cja̧rȩmo̧rȩ pio ju̧i̧iäpȩmo̧ dëbëparea̧mi̧dëde. Pio ju̧i̧iäpȩmo̧ acji jana̧rea̧mi̧dëde. Aja̧, ja̧di ta̧rëri̧ yo̧reji̧ri̧dirȩ uirimȩ pio ju̧i̧ chjiari.
Ja̧dëa ji̧ daea̧reconȩ ado cja̧rȩmo̧ na̧rȩrea̧ oa, quëna̧rea̧mi̧dë na̧rȩrea̧ oa. Dacho bëremi̧ cjiari̧ jo̧rȩtamȩrȩ daea̧reconȩ uapamȩrȩ. Cja̧ȩta̧ra̧ ichiri yo̧a̧ri̧ mu̧i̧tjoi̧ ji̧ri̧ daea̧requedejȩrȩ cja̧ȩta̧ra̧ ichiri yo̧a̧ri̧ conȩdarea̧ chiaji̧ri̧ oa. Pumȩ pio ji̧ri̧iäpȩmo̧ conȩdapea̧ oa chiareji̧ri̧dirȩ. Ado pio jiro conȩdarea̧ üdë, jabechji̧ cjiadiäa̧mȩ conȩdarea̧de. Ado judiri decjiade. Jabechji̧ pio jiro conȩdarea̧ra̧ pio ju̧ri̧ra̧ jibëa̧ ërecjia̧ pio ju̧i̧ nö̧tadäräri̧ japadäräpade Ütë tjamo̧ judi, ado chjereno̧ na̧rȩdëpea̧ oa. Jabechji̧ pio yoamo̧ japadärä ëte cjiadiäpade.
Ja̧dëa ji̧ tjarari̧ oa daea̧requedejȩrȩ yaröca ji̧ri̧, a̧dë chjäte chjai̧dë oa. Chjö̧ri̧mi̧ damȩ pio ju̧i̧ ja̧ yari pio judiri go̧dümȩ oa daea̧reconȩ cja̧rȩmȩ oa. Ado chirirä cjo̧ro̧mȩmi̧ da pio ju̧i̧ ja̧ yari go̧dümȩ oa daea̧reconȩ ado cja̧rȩmo̧ oa. Ado daburimȩ ja̧ yari pio judiri, Ütërë ea jana̧ chjadüa̧ oa ni̧bämȩcji̧ quëna̧ ni̧bämȩ pio ju̧i̧ ja̧ yari pio judiri go̧dümȩ oa daea̧reconȩ ado cja̧rȩmo̧ oa. Aja̧, codocodo cja̧ri̧dati̧mi̧ da oa daea̧requedejȩrȩ, yari go̧düji̧ri̧ pio ji̧ri̧.
Ado mu̧i̧tjoi̧ üdë pio coaiäpȩmo̧ ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧a̧dique: —Ado mȩnȩ daea̧ yatë üdë, ichi chjö̧na̧i̧ yatë üdë, peaja̧di ütëti̧ yo̧rea̧de —yo̧a̧dique—. Ichi chjö̧na̧i̧ ütë yo̧rea̧de. Jabo jabëdirȩ jabo. Jabë tarupadëa̧dirȩ ütëji̧ri̧rȩ cjo̧ro̧pea̧ ji̧. Jabo cja̧rȩmȩrȩ yürüa̧ oa ütëji̧ri̧rȩ cjo̧ro̧padirȩ jabo. Chiri ütëji̧ri̧rȩ cjo̧ro̧padirȩ chirirä cjo̧ro̧mȩmi̧ da pio ju̧i̧ nö̧ta. Jabo japamitë ana̧ri̧ ütëdëpadirȩ. Jabomo̧ japamitë boi̧chji̧ mai̧ ütëji̧ri̧rȩ cjo̧ro̧padirȩ, cja̧rȩmȩ ora maea nö̧ta.
Ado danȩ, yo̧requedemȩ. Mȩnȩ daea̧ ichi chjö̧na̧i̧ yatëmi̧ da judiro̧, jabechji̧ chiri ütëti̧ pio judiro̧dirȩ. Aja̧, pio judiro̧ ea tjamo̧dëpadiro̧jȩ üi̧ goarayi̧ iei̧ pio ji̧, jabo goëdëri̧ cjia tjamo̧padiro̧jȩ. Ado chirirä cjo̧ro̧mȩmi̧ da pio judiborë goëdëri̧ cjia tjamo̧padejȩ. Ado to̧bari̧ dëbëpe chjaopadiro̧jȩ. Jibëa̧ oa, chjö̧na̧i̧ oa baë mitëpadiro̧jȩ, chjibobo. Ado pio ju̧i̧iä jabechji̧ chäteyi̧rȩ cjiadiäpanȩ. Ado pio ji̧ ja̧ go̧a̧ pio ju̧i̧ jurapadiro̧jo̧ȩ. Ado ja̧dëa ji̧ cjo̧dëra̧ pio ju̧ri̧ra̧ acjürüpadiro̧jȩ tüe baärea̧mi̧ dari̧. Aja̧, ja̧di dari̧ japapadiro̧jȩ.
Ado ja̧dëa ji̧ mu̧i̧tjoi̧ üdë iëno̧ë ta̧rëa̧dique: —¿Tjana̧ ju̧i̧iä ya yabë cjiarenȩ iei̧ pio ji̧ chjiari? —yo̧a̧dique—. Danȩ, mȩnȩ dabadëchea oa, iei̧ pio ji̧ chjiari goadia̧ oa cjiarëremȩ ma̧ȩ pio ju̧i̧ chjiari chjadëri̧ are ia̧ oa cjiami̧ dari̧ daba tänȩparequedemȩ. Ado chirirä cjo̧ro̧mȩmi̧ da pio ju̧i̧ chjiari goadia̧ oa cjiarëremȩ ma̧ȩ pio ju̧i̧ chjiaribo chjadëri̧ daba tänȩparequedemȩ. Tjamo̧ davä. Iei̧ pio ji̧ i̧a̧ baämȩ pio ju̧i̧ chjiari, cja̧ȩta̧ra̧ ichiri yo̧a̧ri̧ tjübë chiamȩ pio ju̧i̧ chiari̧, ichi chjö̧na̧i̧ yatë oa chiamȩ pio ju̧i̧ chjiari chjadëri̧ daba tänȩparequedemȩ peaja̧di —yo̧a̧dique—.
Ado chjaodëri̧ mitëa̧dejȩ chjö̧ri̧mi̧ damȩ pio ju̧i̧. Tjamo̧ davä. No̧mȩ tjamo̧ri ja̧ cjiarëremȩ po ana̧ pio ju̧i̧, tjamo̧ aechide yo̧mȩ pio ju̧i̧ mitëa̧dejȩ Ichiae pio ju̧i̧. Ado chjiparari chatu chiamȩra̧ yurë cji̧däa̧dejȩ. Mil ui nö̧ta chaäa̧ oa cjiapea̧ oa yurë cji̧däa̧dejȩ. Ado ja̧dëa ji̧ a̧dë chjäte urëdi puëräpȩ aeno̧a̧dejȩ. Ado ja̧di dari̧ japa ëte, tuti cararea̧ pio ju̧i̧ chjuari̧ tuti cara̧dejȩ coërea̧ra̧. Ja̧dea̧ ji̧, go̧ȩ oa cji̧därëmȩdejȩ tuti cararea̧rä. Aja̧, ja̧di dari̧ japarëmȩde, ‘china̧chjadida, are goëdëpea̧dida’ quëna̧ dapea̧ oa japea̧dejȩ. Tjamo̧ davä. Ichiae judi chiriräpȩti̧ oa cjo̧ro̧ji̧ri̧ pumȩ pio ji̧ri̧ ji̧dë ma u̧i̧pe chjaochea oa, chjuari̧ tutia̧dejȩ. Jabo dëdë, mil ui chjätä ëte, go̧dürea̧ dapade jabo. Go̧dürea̧ dapade. Japamitë boi̧chji̧ ma go̧dürea̧ dapade, japamitë ana̧dëri̧.
Sanasan