Biblia Todo Logo
Bìoball air-loidhne

- Sanasan -




Jechurë Na̧rȩrërea̧ Ma̧ȩ 11:2 - Biblia Pume

2 Jabo pio ju̧i̧mo̧i̧ ütaradëpea̧de —yo̧a̧dique—. Ca̧ bë dairäpȩ tutia̧ oa cjiamȩ pio ju̧i̧ ataradëpea̧de. Jabechji̧ judiodë pio ji̧ri̧ ja̧de. Ado danȩ, pio judiro̧dirȩ. Judiodë pio judiro̧dirȩ conȩdapaji̧ri̧ judiro̧. Tjamo̧ davä. China̧chjari̧ tutia̧ oa cjiamȩ bë ma̧ri̧ pio ju̧i̧ boë cjaeä chjätämi̧ dari̧ conȩdapadiro̧jo̧ȩ. Aja̧, 42 gupënȩ nö̧ta, tjarari̧ ui tjomo̧ra̧ a̧de ma̧i̧ dari̧ japapadiro̧jo̧ȩ pio jiro bë ma̧ri̧ oa, cüdë china̧chjari̧ tutia̧ bë ma̧ri̧ pio ju̧i̧.

Faic an caibideil Dèan lethbhreac




Jechurë Na̧rȩrërea̧ Ma̧ȩ 11:2
32 Iomraidhean Croise  

Ja̧dëa ji̧ chjibo bërebëreai̧ tjamo̧ra̧ ina̧ oa cjiamȩ mu̧i̧tjoi̧ üdë, bea uëmo̧ cjiamȩ mu̧i̧tjoi̧ pio judi, jibëa̧ ichi ju dëbëribo uëräpȩmo̧ cjiari̧ ichipe cjiamȩpea̧de a̧dë iräpȩmo̧. Ado ja̧di ta̧rëri̧ dëbë yo̧a̧dejȩ ado cja̧rȩmo̧ mu̧i̧tjoi̧ oa: —Napai̧ japamitëdë, pio jiro ma̧i̧ da chjai̧dë üdë yuropapade japamitë chjätä ëte, tjarari̧ ui codë tjomo̧ra̧ a̧de chjätä ëte. Jabechji̧ Ütë tjamo̧ ja̧ pumȩ pio ji̧ri̧ ja̧ ju chiarea̧ üdë goarijäa̧rä, judiro̧ acji jana̧ji̧ri̧ pio ji̧ri̧ dëbëpe chjaorea̧ chiadëji̧ri̧pea̧rä yuropapade pio jiro chjai̧dë üdë. Aja̧, ja̧di ta̧rëri̧ yo̧requedemȩ, bucho ana̧ cjo̧ro̧mȩ Ütë pio ju̧i̧ ja̧ dachoro cjiamȩrȩ, mȩa tjamo̧i̧ cjiari̧ baämȩ ma̧ȩ oa yo̧mȩrȩ —yo̧a̧dejȩ.


Ado mu̧i̧tjoi̧ judi pio coaiäpȩmo̧ ja̧di ta̧rëri̧ dëbë yo̧a̧ oaiä, jabechji̧ ja̧di ta̧rëri̧ yo̧mȩrȩ a̧de iëno̧ë ta̧rëa̧reconȩ, jabë mo̧a̧mȩrȩ: —Danȩ, tjamo̧ri̧ dabatämi̧ cjiarequede uiri pio judiri cjiadiäa̧mi̧ go̧düremȩ pio ju̧i̧ chjiari, a̧dë chjäte tjaoëmȩ pio ju̧i̧ chjiari. Jabechji̧ o ji̧ri̧iä ji̧dë u̧i̧ uapai̧ daremȩde. O ji̧ri̧iä ji̧dë u̧i̧ chjuamȩremȩde. Ado pio ju̧i̧iä oë ja̧bo tjamo̧mȩrȩ daea̧reconȩ. Danȩ, ierora̧ japea̧ jo̧dëra̧ tutupe juimȩrȩ acji tai̧remȩde, jui jui gu̧na̧mȩrȩ, boro̧chera̧ japea̧ ivëra̧ ja̧bo tänȩmȩrȩ. Ado jënȩ ja̧bo tänȩa̧ pio ji̧ri̧ pënȩ boi̧chji̧ mape bagari̧ tuti juiriä tai̧remȩde, uapai̧ da tjamo̧rȩ. Ado jënȩ jura̧ cjiadiäa̧mȩ pio ju̧i̧ boë cjaeä chjätäremȩde, pjo̧no̧i̧ mape bagari̧. Aja̧, pio ju̧i̧ chjiari tjamo̧ri̧ dabatämi̧ cjiarequede.


Ado ja̧dëa ji̧ pio jiro ütë üdë, cjäri̧ madejȩ chjai̧dëri̧ ni̧bäpade a̧dë chjäte Ütë tjamo̧ pio ju̧i̧ chjiari. Ado pio ju̧i̧ uëri ana̧ri̧ conȩdapadejȩrȩ Ütërë mitëa̧ pumȩ pio ji̧ri̧. Ado peaja̧di järi tjamo̧pade Ütë tjamo̧ ja̧ ma̧ȩ pio ju̧i̧ ano̧ mire go̧ȩpapea̧ oa, Ütë ja̧ ma̧ȩdëpe bagami̧ dari̧ cjiapea̧ oa. Tjamo̧ davä. Ütërë Moiche pio ju̧i̧iäpȩmo̧ yürürërea̧ ma̧ȩ pio ju̧i̧ ano̧ mire go̧ȩpapea̧ ji̧, tjaoëpai̧ dape bagari̧ ano̧ mire go̧ȩpapea̧ ji̧ järi tjamo̧pade. Ado pio ju̧i̧ uëri Ütërë mitëa̧ pumȩ pio judiro̧ ütara̧ doro a̧dopachea oa, jabechji̧ järi tjamo̧pade pio jiro do pio ju̧i̧ chjiari ano̧ mire go̧ȩpapea̧ ji̧. Tjamo̧ davä. Judiro̧ Ütë tjamo̧ pio ju̧i̧ ütara̧ doro jo̧rȩtaji̧ri̧rȩ a̧dopachea oa, judiro̧ ütara̧ doro jo̧rȩtaji̧ri̧rȩ a̧dopachea oa, jabechji̧ järi tjamo̧pade davä, judiro̧ ütaradëa̧ doro ano̧ mire a̧dopapea̧ oa. Ado danȩ, Ütë tjamo̧ pio judi jabechji̧ japarea̧ yürüpadejȩ. Tjamo̧ davä. Japarea̧ yürüpadejȩ. Ado pio ju̧i̧iä tjarari̧ ui tjomo̧ra̧ a̧de Ütë tjamo̧ ja̧ pumȩ pio judiro̧ pio ju̧i̧ ja̧ chja̧oerä ano̧ mire cjo̧ro̧padirȩ.


Ado pio jiro yatë boi̧chji̧mi̧ da pio judi a̧dë chjäte ju chia tjamo̧mi̧ dari̧ cjiape baga̧ oaiä, jabechji̧ a̧dëräpȩ cjo̧ro̧mȩ pio ju̧i̧ ja̧ guadia pio ji̧ri̧bo dëbëpe chjaoremȩdejȩrȩ, büëmi̧ daji̧ri̧ pio ji̧ri̧. Ado ja̧dëa ji̧ o ji̧ri̧ daburäpȩmo̧ aeno̧a̧dejȩrȩ. Ado daburäpȩmo̧ cjatäa̧ji̧ri̧ pio ji̧ri̧ boë cjaeämȩrȩ ja̧bo tänȩmȩ oa darämi̧ cjiaremȩreconȩ.


Ado ja̧dëa ji̧ cüdë darämi̧ cjiamȩrȩ da̧ nö̧ta, jabechji̧ yo̧a̧ri̧ a̧dëriji̧ri̧ mu̧i̧tjoi̧ judiro̧ ni̧bäji̧ri̧ oa ta̧rërämi̧ cjiaremȩrequedejȩrȩ. Ado cja̧rȩmȩ üdë ado cja̧rȩmo̧ oa iëno̧ë ta̧rëa̧mȩ oa ta̧rërämi̧ cjiaremȩreconȩ, ja̧di ta̧rëri̧ yo̧mȩ oa: —Jabo danȩ, napai̧rä yuro ma̧i̧ dari̧ japarea̧ dapade pio jiro yatë boi̧chji̧ üdë? Danȩ, pumȩ judiro̧ doti̧mi̧ cäë yürütärea̧ ji̧, ¿napai̧rä yuro japarea̧ yürüdëpadejȩrȩ? Yo̧coe. ¿Napai̧rä yuro chjai̧dëparȩmi̧ dari̧ japarea̧ dapadejȩ Ütë tjamo̧ ja̧ bë oa? Aja̧, ¿napai̧rä yuro ji̧dë ma̧ conȩdarea̧ dapadejȩrȩ Ütë tjamo̧ ja̧ pumȩ ji̧ri̧? —yo̧mȩrȩ iëno̧ë ta̧rëmȩ oa ta̧rërämi̧ cjiaremȩreconȩ a̧dëräpȩ mu̧itjoi̧ pio ju̧i̧ jibëa̧ jadü oa yo̧a̧ ji̧.


Ado ja̧dëa ji̧ dëbë yo̧mȩ oa ta̧rërämi̧ cjiaremȩreconȩ: —Napai̧rä yurodë, jabechji̧ 1.150 do nö̧ta ja̧di dari̧ japarea̧ dapade. Jabechji̧ pio jiro japamitë nö̧ta Ütë tjamo̧ pio ju̧i̧ ütara̧mi̧ cäë yürütärea̧ ji̧, yürürea̧ dadëpadiro̧jo̧ȩ. Jabechji̧ peadai̧rä cäë yürütärea̧ ji̧, ado ji̧täräbo yürütärea̧ ji̧, cjäri̧ madiro̧jo̧ȩ, mechjaräpȩ ju̧ri̧ yürürea̧ dadëpadiro̧jo̧ȩ. Jabo ja̧dëa ji̧ pio jiro japamitë chjätä ëte judiro̧ chjadëri̧ japea̧ oaiä, judiro̧ chjai̧dë gȩrȩ chiadëpe järea̧mi̧ dari̧ chjadëri̧ japea̧ oaiä, jabechji̧ ado chjereno̧ chjadëparȩa̧ oa cjiapade Ütë tjamo̧ ja̧ bë üdë —dëbë yo̧a̧mȩ oa ta̧rërämi̧ cjiaremȩreconȩ mu̧i̧tjoi̧ oa jibëa̧ jadü oa ni̧bämȩ oa.


Jabechji̧ mȩnȩro̧ pio coaiäpȩmo̧ chjai̧dëri̧ japea̧ ba oa, jabechji̧ 40 ui nö̧ta goae tjamo̧dëri̧ chjätäti̧ cjia tänȩparequededibe gitoi̧ dari̧. Ado danȩrȩ, mȩnȩro̧ 40 do nö̧ta chiri chjadë oa ütarariä tai̧a̧ tara, peaja̧di 40 ui nö̧ta ano̧ mire tai̧ tänȩrequededibe chiri maearäpȩ. Chiri chjadëräpȩ ju̧ri̧ cja̧rȩmȩ do tai̧rea̧ üdë, jabechji̧ chiri maearäpȩ cja̧rȩmȩ ui nö̧ta chjätäti̧ cjiarea̧de. Pio ju̧i̧iä 40 ui nö̧ta chjätäti̧ cjia tänȩparequededibe.


Ado ji̧dë duri oa, Jechu judi bedüa̧ duri oa, pio jiro ja̧boa̧rëreji̧ri̧ pio judiro̧ järëreji̧ri̧dirȩ Jerucharȩräpȩ juri̧. Ado na̧rȩji̧ri̧rȩ järëreji̧ri̧dirȩ pumȩ no̧i̧dërë pio jibëiäpȩmo̧ darea̧mi̧ dari̧.


Jabo Ichiae judi cjiadiädëmȩrȩ ëba järëremȩdejȩ Jechu ju̧i̧ Ütë tjamo̧ ja̧ bë ma̧ri̧räpȩ ju̧ri̧, Jerucharȩräpȩ ju̧ri̧. Ado Ütë tjamo̧ ja̧ bë uë tjamo̧räpȩ ju̧ri̧ cjia tänȩrëremȩdejȩ, jo̧ pacho ina̧räpȩ ju̧ri̧.


Ado Jechu judi ji̧dë u̧i̧ a̧ra̧ano̧mȩrȩ ja̧di ta̧rëri̧ a̧de ni̧bärëremȩdejȩrȩ: ⁠—⁠Danȩrȩ, ca̧ ma̧ȩrä cjo̧ro̧ji̧ri̧ pio judiro̧ yagoemȩmi̧ dadirȩ ⁠—⁠yo̧a̧dejȩrȩ⁠—⁠. Jabechji̧ yagoemȩ üdë chjadëri̧ a̧dodejȩ jurarea̧ oa. Ado mȩnȩro̧ peaja̧di chjadëri̧ a̧dorea̧ chianȩrȩ. Aja̧, chiriräpȩti̧ oa cjo̧ro̧ji̧ri̧ pio ji̧ri̧ chjadëri̧ a̧dorea̧ chianȩrȩ. Yagoemȩ üdë jurarea̧ oa chjadëri̧ a̧domi̧ dari̧ a̧dopai̧ danȩrȩ peaja̧di pumȩ ji̧ri̧. Jabo cjäri̧ made, yagoemȩ üdë chjadëdëpe bagarä judi, jurarea̧ oa goaeparȩrea̧ chiadëpea̧rä judi, ¿tjana̧ japapea̧? ¿Ado chjereno̧ chjadëparȩpea̧de? Cjäri̧ made, ado chjereno̧ chjadëparȩrea̧mi̧dëde. Ado pio ju̧i̧iä jabechji̧ daburäpȩmo̧ puri cjarapea̧de. Jabechji̧ pumȩ judiro̧ tara̧ boë cjaeäpea̧ maeade ⁠—⁠yo̧mȩrȩ ni̧bäa̧dejȩrȩ.


Jabechji̧ dëbëribo jo̧dë chiamȩ tjapënȩ jujuai̧ra̧ pio ju̧ri̧ra̧ guë ja̧bo tänȩa̧ oa cjiadiäpadirȩ noi̧dërë. Ado ja̧bo tänȩa̧ oa cjiadëji̧ri̧ pumȩ pio ji̧ri̧, jabechji̧ mitë ëte yura̧ oa cjiaji̧ri̧ oa ëba baäpadiro̧jȩrȩ chiriräpȩti̧ oa jachi tjamo̧räpȩ. Ado Jerucharȩ bë ma̧ri̧remȩ pio judi boadäräa̧ oa cjiapade judiodë pio ji̧ri̧iä. Jabechji̧ boë cjaeä chjätämi̧ dari̧ conȩdapadiro̧jo̧ȩ. Ado boadäräji̧ri̧ pio judiro̧ tjamo̧ yo̧ji̧ri̧rȩ ano̧ mire cjo̧ro̧padirȩ judiorë cjo̧ro̧rërea̧ bë ma̧ri̧räpȩ ju̧ri̧ Ütë tjamo̧ pio judi ütara̧ japamitërä yuro. Tjamo̧ davä. Ütë tjamo̧ judi judiodë pio ji̧ri̧ tjamo̧ yo̧ji̧ri̧rȩ cjo̧ro̧rea̧ japamitë üdë goarijäa̧rä yuro tjamo̧ cjo̧ro̧rea̧ yürüpadejȩrȩ, Ütë tjamo̧ judi pio jiro japamitë oa goarijä tänȩa̧rä yuro —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi cjiadiäa̧ japamitë pio ju̧i̧ chjiari.


Ado danȩrȩ, ji̧dë u̧i̧ uapai̧ dari̧ ütara̧ oa cjiapadirȩ Ja tjamo̧ pio ju̧i̧ putu jura̧ a̧dë chami̧ dari̧ jo̧rȩtaji̧ri̧ pio judiro̧, pio ju̧i̧ badë jo̧rȩtaji̧ri̧ pio judiro̧. Tjamo̧ davä. ‘Jechu ja̧ goe üdë badëdida, ibë a̧dorea̧mi̧dë goedida’ quëna̧ jo̧rȩtaji̧ri̧ pio judiro̧, ji̧dë u̧i̧ uapai̧ dari̧ ütara̧ oa cjiapadirȩ. Jabechji̧ Jechu ja̧ goe pio oaiä ba chiaparȩa̧ oa cjiadiärëremȩde ma̧ȩ peaja̧ üdë. Ado pio jiro goe üdë pumȩ pio ji̧ri̧ china̧chjari̧ tutia̧ oa cjia tänȩmȩ goe pio judide. Jabo judiro̧ pio ju̧i̧ ba chia jo̧rȩtatärea̧ ji̧, cjäri̧ madiro̧jo̧ȩ, badë jo̧rȩtadiro̧jo̧ȩ. Pio jibë china̧chjari̧ tutia̧ oa cjia tänȩmȩ goe pio ju̧i̧ badë jo̧rȩtadiro̧jo̧ȩ. Ado judiro̧ ja̧di dari̧ japea̧ oaiä, jabechji̧ pio jibë cjäri̧ri̧ cjiamȩrȩ a̧domȩ pio ju̧i̧ a̧dë chjäte ërecjia tänȩa̧diro̧jo̧ȩ Tjo tjamo̧ pio ju̧i̧. Ado pio ju̧i̧iä, dëdë, Moicherë go̧ȩparërea̧ ma̧ȩ oa jiada̧ ba oa bape chjaoa̧ oa cjiarëreji̧ri̧ pio ji̧ri̧ u̧i̧ uapai̧ dari̧ ütara̧ oa cjiapadirȩ a̧dë chjäte uapai̧ dari̧.


Jabo cüdë jabë da nö̧ta, ja̧di dari̧ daea̧requede: Aja̧, tjarari̧ do tjomo̧mi̧ chjätä ëte, jabechji̧ Ütë tjamo̧ judi ado chjereno̧ bëdü tänȩa̧dejȩrȩ ja̧boa̧reji̧ri̧ pio ji̧ri̧. Aja̧, ja̧boa̧reji̧ri̧rȩ cjitëno̧a̧dirȩ. Ado pio ji̧ri̧ irä daea̧ji̧ri̧ pio judiro̧ a̧dë chjäte uapea̧dirȩ chjaodëri̧.


Jabo danȩ, chjadüparequedejȩrȩ pio coa chjiari ni̧bäpaji̧ri̧ pio ji̧ri̧, yo̧a̧ri̧ oa. Töca chiamȩ ina̧rea̧ oa ina̧ji̧ri̧ oa chjadüpaquedejȩrȩ. Ado pio cüdë ea jana̧ chjadüa̧ oa ni̧bäpadirȩ. Aja̧, cüdë chjadüa̧ ma̧ȩ pio ju̧i̧ ni̧bäpadirȩ tjarari̧ ui tjomo̧ra̧ a̧de. Aja̧, 1260 do nö̧ta ni̧bäpadirȩ, japamitë ana̧ nö̧ta. Aja̧, ja̧di ta̧rëri̧ yo̧a̧dique Ano̧mȩ judi.


Ado iei̧ jini̧ bagureno̧a̧nȩ chiri maearäpȩ, dabu nȩgȩ maearäpȩ. Ütë tjamo̧ judi jabërä jëdano̧a̧ oaiä, bagureno̧a̧nȩ judi atara̧räpȩ. Ado ju̧ri̧pȩ chjadëri̧ jida̧ oa cjiareyi̧nȩ 1260 do nö̧ta, tjarari̧ ui tjomo̧mi̧.


Ado Tjo tjamo̧ pio ju̧i̧ ja̧ chja̧oerä cjiamȩ oa, ëba jäa̧dique ya̧mi̧ uë tjamo̧räpȩ. Ado judiri na̧rȩa̧dique Jerucharȩ bë ma̧ri̧ pio ju̧i̧, china̧chjari̧ tutia̧ oa cjiamȩ bë ma̧ri̧ pio ju̧i̧. A̧dëri pio judiri biramȩ oa daea̧reconȩ, Ütërë cjiamȩri pio judiri biramȩ oa.


Ado Ütë tjamo̧ ja̧ bë ma̧ri̧ oa daea̧requede peaja̧di. Jerucharȩ quȩmȩ bë ma̧ri̧ pio ju̧i̧, bë ma̧ri̧ pea chja pio ju̧i̧ daea̧reconȩ a̧dëri pio judiri biramȩ oa. Tjamo̧ davä, Jerucharȩ be ma̧ri pea chja oa, china̧chjari̧ tutia̧ oa cjiamȩ oa daea̧reconȩ, Ütërë cjiamȩri pio judiri biramȩ oa. Jëdano̧a̧ oa cjiamȩ oa, iei̧ chjacjiayi̧mi̧ da oa, chjibo chjacjiamȩ oa ina̧yi̧mi̧ da oa daea̧reconȩ, jibëa̧ üi̧ oa ëbapea̧ querediämi̧ dayi̧ oa.


Ado eami̧ pumȩ judi pio yoa ma̧ȩ oa tutimi̧ dari̧ japarä judi, ‘orë ta̧rë ja̧bodëpea̧dida’ quëna̧rä judi, peaja̧dimi̧ dari̧ japajadejȩ. Jabechji̧ bucho ana̧ cjo̧ro̧rea̧ yürümȩ to ja̧ jurarea̧ oa chjadëri̧ juratärea̧ ji̧, tutimi̧ dari̧ japajadejȩ jurarea̧mi̧dëri̧. Ado Ütë tjamo̧ ja̧ bë ma̧ri̧räpȩ chjadëri̧ yu̧a̧tärea̧ ji̧, cjäri̧ made, dairäpȩ cjiadiämi̧ dari̧ cjiadiäpade, Ütë tjamo̧ judi tutimi̧ dari̧ japea̧ oaiä. Tjamo̧ davä ca̧ oti̧, pio yoa ma̧ȩ pio ju̧i̧ chjiari yo̧requededibe. Jabechji̧ a̧de yo̧dëpea̧de. Go̧ȩpea̧ oa cjiamȩ ma̧ȩ pio ju̧i̧ uëri̧ a̧de yo̧dëpea̧de. Ado peaja̧di, ‘Aja̧, orë ba chiadë maeadida’ quëna̧dëpea̧de.


Lean sinn:

Sanasan


Sanasan