Lucas 9:12 - Biblia Pume

¹² Ado do decjiape baga̧rä, jibëa̧ jadü pio judiro̧ 12rë jäa̧diro̧jo̧ȩ Jechu pio ju̧i̧iäpȩ. Ado yo̧a̧diro̧jo̧ȩ: —Jabo danȩ, baä tänȩjȩrȩ pumȩ buba oa. Jabechji̧ jibëa̧ jurarea̧ oa gatëpea̧ oa, jënȩro̧ mo̧a̧rea̧räpȩ dapea̧ oa, baä tänȩjȩrȩ. Jabechji̧ jurarea̧ decjiaräpȩrea̧rȩ. Chiri tjoräpȩrea̧rȩ —yo̧a̧diro̧jo̧ȩ.

Lucas 9:12 Iomraidhean Croise

Mateo 14:13

Ado Jechu judi Juan pio ju̧i̧ ichjiari goë ta̧rëa̧ oaiä, pumȩ decjiaräpȩ jätämi̧ cjiamȩrȩ buarëremȩde chara oa. Jabo pumȩ judiro̧ pio ju̧i̧ chjiari ta̧rëa̧ oaiä, “ja̧dira̧ jäa̧de” yo̧a̧ oa ta̧rëa̧ oaiä, jabechji̧ bë ma̧ri̧räpȩ cjo̧ro̧ji̧ri̧ pio judiro̧ chjaodëri̧ cho̧rë järëreji̧ri̧diro̧jo̧ȩ tara̧.

Mateo 15:23

Jabo jini̧ to̧bari̧ ëna̧diäa̧räbo, Jechu judi dëbë yo̧dëa̧dejȩ. Cjapi maearë cjiadiäa̧de. Ado ju̧i̧ ja̧ jadü pio judiro̧ yo̧a̧diro̧jo̧ȩ Jechu ju̧i̧: ⁠—⁠Jabechji̧ baä tänȩjȩ. Ji̧dë ma ëna̧diäni̧ibe. Baä tänȩjȩ ibë ji̧dë ma̧ tja̧reparȩchea oa ⁠—⁠yo̧tea̧diro̧jo̧ȩ.

Mateo 15:32

Ja̧dëa ji̧ Jechu judi ëna̧diärëremȩdejȩrȩ jibëa̧ jadü ji̧ri̧. Ado yo̧a̧dejȩrȩ: ⁠—⁠Danȩrȩ ca̧ jadü, cjäri̧ri̧ cjia jo̧rȩtamȩrȩ darequedejȩrȩ pumȩ buba oa ⁠—⁠yo̧a̧dejȩrȩ⁠—⁠. Jabechji̧ tjarari̧ dori ja̧ ëba cjia̧diro̧coe, jabo eami̧ oa juradëa̧dirȩ. Ado judiro̧ no̧ro ju chiadëji̧ri̧rȩ cjatächea oa, dabadëtä bagami̧ dari̧ a̧rȩdärächea oa, jabechji̧ ta̧mȩcho̧ ja̧boji̧ri̧ oa baä tänȩdëri̧ cjiarequedejȩrȩ ⁠—⁠yo̧a̧dejȩrȩ.

Lucas 9:11

Jabo judiro̧ jibëa̧ma̧i̧ chjadëri̧ a̧doparea̧ datärea̧ ji̧, cjäri̧ madirȩ, japarea̧ dadëa̧dirȩ. Jabechji̧ japamitȩ chjätä ëte pumȩ bubarë cho̧rë järëreji̧ri̧diro̧jo̧ȩ. 'Aja̧, Jechu judi jibëa̧ jadü pio ji̧ri̧ nö̧ta ja̧dira̧ baäa̧diro̧da' quëna̧ dabaji̧ri̧pea̧ oaiä, jabechji̧ cho̧rë järëreji̧ri̧diro̧jo̧ȩ. Ado ja̧dëa ji̧ judiro̧ Jechu pio ju̧i̧iäpȩ go̧düdäräa̧ji̧ri̧ oa, jabechji̧ chjadëri̧ jea̧dejȩrȩ. Jibëa̧ma̧i̧ cjiatämi̧ cjiaräbo, jabechji̧ chjadëri̧ jea̧dejȩrȩ. Ado ja̧dëa ji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari a̧ra̧ano̧rëremȩdejȩrȩ. Ado gito ja̧boji̧ri̧ pio ji̧ri̧ peaja̧di chjaparȩrëremȩdejȩrȩ.

Lucas 9:13

Jabo Jechu judi dëbë yo̧a̧dejȩrȩ: —Jabechji̧ pio mȩnȩro̧ jurarea̧ oa yürüchji̧jȩrȩ —yo̧a̧dejȩrȩ. Jabo judiro̧ dëbë yo̧a̧diro̧jo̧ȩ: —Jabo cjäri̧ marea̧rȩ, japarea̧ decjiade —yo̧a̧diro̧jo̧ȩ—. Jabomo̧ cja̧rȩichimo̧ chja̧pe maea oa goarea̧rȩ, yo̧a̧ri̧ cho̧ oa peaja̧di. Nö̧tadë made. ¿Jabo yö̧ta jo̧rȩtarenȩ? ¿Gatërea̧ bëräpȩ jäeno̧tä earenȩibe a̧ro̧rȩ pio jiro pumȩ buba ja̧ oa gatë yürüpea̧ oa? —iëno̧ë ta̧rëa̧diro̧jo̧ȩ.

Juan 6:1

Ja̧dëa ji̧ judio tjamo̧ yo̧ji̧ri̧ pio ji̧ri̧iäpȩmo̧ ni̧bä chjao ëte, Jechu judi Garirea tja oëräpȩ chjätärëremȩde. Ado Garirea tja oa, peaja̧di Tiberia tja yo̧rëreji̧ri̧diro̧jo̧ȩ. Aja̧, yo̧a̧ri̧ quȩ chiarëremȩde.

Pjiripo Ma̧ȩ 1:19

Ado ji̧dë ma ma̧ chiadëri̧ cjiamȩrȩ jo̧rȩtaparequede. Jabechji̧ cüdë chjai̧dëri̧ chjätäräbo ma̧ chiadëri̧ cjiarequede, 'pio yudiri chjadëri̧ go̧dürea̧ dapaquëda' quëna̧ daba tara. Jabechji̧ mȩnȩro̧ pio coa chjiari goë cjo̧dë chjaoa̧ oaiä, ado Jechu Quirichorë chjadüa̧ Tjo tjamo̧ pio judi ju chiarea̧ yürüa̧ oaiä, 'jabechji̧ chjadëri̧ go̧dürea̧ dapaquëda' quëna̧ dabarequede.