Ado ja̧dëa ji̧ tjamo̧ cjo̧ro̧ji̧ri̧ judiro̧ chjö̧na̧i̧ oa ta̧rëa̧ oaiä, chjö̧na̧i̧ daea̧ oaiä, 'Aja̧, tjamo̧i̧ cjiari̧ yo̧diro̧ibëda' quëna̧ jo̧rȩtaji̧ri̧pea̧dirȩ. Ado ja̧dëa ji̧ judiro̧ chjö̧na̧i̧ oa ta̧rëa̧ oaiä, "Jeova judi pio ibë ana̧ri̧ jo̧rȩtamȩrȩ dadiibe” yo̧a̧ oa ta̧rëa̧ oaiä, “Jeova judi a̧doera̧pea̧diibe” yo̧a̧ oa ta̧rëa̧ oaiä, “Conȩda̧ oa cjiaji̧ri̧ oa daba dae chjaodiibe” yo̧a̧ oa ta̧rëa̧ oaiä, jabechji̧ juchatura̧ tjätjäpë china̧därärëreji̧ri̧dirȩ Jeova pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ.
Lucas 7:16 - Biblia Pume16 Ado pumȩ judiro̧ pio ju̧i̧ daea̧ oaiä, uapea̧ üdë ana̧ri̧ boadärärëremȩdejȩrȩ jibëa̧ chji̧ oa. Ado Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧pea̧diro̧jo̧ȩ. —Aja̧, a̧dë chjäte ju chiamȩ üdë, Ütërë ea jana̧ chjadüa̧ oa ni̧bämȩ pio judi ibëa̧ chjarerä cjiamȩpea̧de —yo̧ji̧ri̧rȩ chjacjiamȩri̧ ni̧bärëreji̧ri̧diro̧jo̧ȩ—. Aja̧, Ütë tjamo̧ pio judi a̧doera̧pea̧diibe pio yaba̧ domȩ oa —yo̧a̧dirȩ. Faic an caibideil |
Lucas 7:16
31 Iomraidhean Croise
Ado pumȩ judiro̧ pio ju̧i̧ daea̧ oaiä, jabechji̧ chjacjiamȩri̧ ni̧bäji̧ri̧pea̧diro̧jo̧ȩ Ütë tjamo̧ pio ju̧i̧iäpȩmo̧, Icharai pio judiri ja̧ji̧ri̧ ja̧ Ütë pio ju̧i̧iäpȩmo̧. Jabechji̧ ni̧bärea̧ chiadërëreji̧ri̧ pio ji̧ri̧ ni̧bäji̧ri̧ oa daea̧ oaiä, ju chjerea̧ oa cjiarëreji̧ri̧ pio ji̧ri̧ chjapea̧ oa cjiaji̧ri̧ oa daea̧ oaiä, ado tai̧rea̧ dadërëreji̧ri̧ pio ji̧ri̧ tai̧ji̧ri̧ oa daea̧ oaiä, jabechji̧ chjacjiamȩri̧ jo̧rȩtaji̧ri̧rȩ ni̧bäji̧ri̧pea̧diro̧jo̧ȩ Ütë tjamo̧ pio ju̧i̧.
Ado ivi jini̧ro̧ ja̧di dari̧ da oaiä oë ja̧boji̧ri̧rȩ ta̧dë cjarari judiri chjaodëri̧ bagureno̧a̧ni̧rȩ. Jabo mu̧i̧tjoi̧ judi yo̧a̧ oaiä, "Aja̧, ja̧boremȩrȩ bëdüa̧di" yo̧a̧ oa ta̧rë oaiä, jabechji̧ a̧dë chjäte ma̧ chiadëri̧ cjiari̧ jo̧rȩtaji̧ri̧rȩ bagureno̧rëreji̧ri̧nirȩ Jechu ja̧ jadü pio ji̧ri̧iäpȩmo̧ ta̧rë tänȩpea̧ oa.
Ado pumȩ judiro̧ Jechurë ja̧di dari̧ japea̧mȩ oa irä daea̧ oaiä, ana̧ri̧ jo̧rȩtaji̧ri̧pea̧dirȩ uapa tjamo̧ji̧ri̧rȩ. ‘Chia chia, ja̧di dari̧ japarea̧ yürüa̧diji̧da, pumȩ pio ju̧i̧iäpȩmo̧ ja̧di dari̧ japarea̧ yürüa̧diji̧da, Ütë tjamo̧ pio judi yürüa̧diji̧da, ado pio ju̧i̧iä Ütërë yürüa̧ jauëchjara̧ pio ju̧ri̧ra̧ japea̧dida, ja̧di dari̧ japapea̧ ji̧ tjamo̧ yo̧rea̧ yürüa̧diji̧da’ quëna̧ jo̧rȩtaji̧ri̧rȩ chjacjiamȩri̧ jo̧rȩtarërëreji̧ri̧diro̧jo̧ȩ Ütë tjamo̧ pio ju̧i̧iäpȩmo̧. Aja̧, ja̧di dari̧ jo̧rȩtaji̧ri̧pea̧dirȩ pumȩ judiro̧ Jechu judi tai̧dërëremȩ pio ju̧i̧ chjaparȩa̧mȩ oa irä daea̧ oaiä.
Ado bë ma̧ri̧ tjoräpȩ acji yu̧a̧rea̧ darä, cjäri̧ madiro̧dibe, chjö̧na̧i̧ oa yuropa tänȩpadiro̧dibe —yo̧a̧dejȩrȩ—. Pume ütëbodärä oa ma̧i̧ dari̧ japaji̧ri̧rȩ ida chidepadiro̧dibe daburäpȩmo̧, dibëa̧ bori̧bo. Tjamo̧ davä. Ju chjichjiparea̧mi̧ dari̧, dibë ütëbo oa ja̧bo tänȩrea̧mi̧ dari̧ ida chidepadiro̧dibe daburäpȩmo̧. Ado Jerucharȩ bë ma̧ri̧ üdë ta̧dë ana̧ra̧ chjadëri̧ cji̧däa̧ oa cjiarërea̧ ji̧, cjäri̧ madiro̧jo̧ȩ, iëchäeno̧ mapadiro̧jo̧ȩ chjö̧na̧i̧ oa, bë ma̧ri̧dëpe bagarea̧mi̧ dari̧, cja̧rȩmȩ ta̧dë üdë jibëa̧ jadüremȩrä charea̧mi̧dëri̧ cjiari̧. Jabechji̧ jiada̧renȩro̧jo̧ȩ Ütë tjamo̧ ju̧i̧. Aja̧, pio dibë a̧doera̧pea̧mȩ pio ju̧i̧ eadëa̧renȩro̧jo̧ȩ. Ütë tjamo̧ judi dibë goëdaera̧pea̧räbo, dibë chjadëri̧ a̧doera̧pea̧räbo, cjäri̧ marenȩro̧jo̧ȩ, jiada̧renȩro̧jo̧ȩ. Ado mȩnȩro̧ jiada̧ oaiä, jabechji̧ ma̧i̧ dari̧ conȩda̧ oa cjiapanȩrȩ —yo̧mȩrȩ ni̧bä chjaorëremȩde Jechu judi, Jerucharȩ bë ma̧ri̧rä cjo̧ro̧ji̧ri̧ pio ji̧ri̧iäpȩmo̧ jo̧rȩtamȩrȩ. Aja̧, eamȩrȩ, gitori̧ jo̧rȩtamȩrȩ ni̧bärëremȩdejȩrȩ, pio ji̧ri̧iäpȩmo̧ irä ni̧bämȩmi̧ dari̧.
Ado oveja jidaji̧ri̧ pio judiro̧, jabechji̧ ado chjereno̧ baäa̧dirȩ jibëa̧ ovejarë cjiamȩräpȩ. Ado jënȩro̧ irä daea̧ pio ju̧i̧iä, jënȩro̧ irä ta̧rëa̧ pio ju̧i̧iä, jabechji̧ ma̧ chiadëri̧ cjia tjamo̧ji̧ri̧rȩ baärëreji̧ri̧dirȩ, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ. Jabechji̧ a̧dërimȩ mu̧i̧tjoi̧ judi pio jibëiäpȩmo̧ yo̧a̧mi̧ tjamo̧ri̧ darëreji̧ri̧diro̧jo̧ȩ.
Ado Jechu judi dabadëcji̧ quëna̧ japamȩrȩ dëbë iëno̧ë ta̧rëa̧dejȩ: —Jabo chjadëri̧ yo̧chji̧coe. ¿Tjana̧ oa chjätäa̧de? Yo̧chji̧coe —yo̧a̧dejȩrȩ. Ado ja̧dëa ji̧ judiro̧ yo̧a̧ri̧borë dëbë yo̧rëreji̧ri̧diro̧jo̧ȩ: —Tjana̧dë, danȩ, Jechurea̧ pio judi, Nachare bë ma̧ri̧rimȩ pio judi chjätäa̧ pio ju̧i̧ chjiari ni̧bä chjaorea̧rȩ —yo̧a̧diro̧jo̧ȩ—. Danȩ, Ütërë ea jana̧ chjadüa̧ oa ni̧bämȩrȩ cjo̧ro̧rëremȩde. Ado pumȩ ütëbo ja̧ dachoro jauëchja cjiari̧ na̧rȩ chjaomȩrȩ cjo̧ro̧rëremȩde, ana̧ri̧ na̧rȩmȩrȩ. Ado pio ju̧i̧iä pumȩ judiro̧ ütëborë, 'Aja̧, ju chia tjamo̧mȩrȩ ja̧bepamȩdida, Ütë tjamo̧ ja̧ ma̧ȩ oa goae tarari̧ a̧ra̧ano̧mȩdida, pumȩ ji̧ri̧ ana̧ri̧ jo̧rȩta tänȩrea̧mi̧ dari̧ a̧ra̧ano̧mȩdida' quëna̧ jo̧rȩtaji̧ri̧rȩ darëreji̧ri̧diro̧jo̧ȩ. Ado peaja̧dimi̧ dari̧ jo̧rȩtamȩrȩ dadejȩ Ütë tjamo̧ pio judi —yo̧a̧diro̧jo̧ȩ—.
Ado pumȩ judiro̧ Jechurë ja̧di dari̧ japea̧mȩ oa irä daea̧ oaiä, yaa yabë cjiaji̧ri̧rȩ ana̧ri̧ jo̧rȩtaji̧ri̧pea̧dirȩ jibëa̧ chji̧ oaiä idëguami̧ tarari̧. Ado Ütë tjamo̧ pio ju̧i̧iäpȩmo̧ chjacjiamȩrȩ jo̧rȩtaji̧ri̧rȩ yo̧a̧dirȩ: —Chia chia, a̧ro̧rȩ ja̧di dari̧ japamȩ oa cja̧rȩmȩ co dadërërea̧ ji̧, irä daea̧rea̧rȩ yaba̧ tjaoëpai̧ da oa, ado cja̧rȩmo̧ darea̧ oa. Aja̧, ja̧di ta̧rëri̧ yo̧rëreji̧ri̧dirȩ, judiro̧ irä darërea̧ pio ju̧i̧ chjiari.
Ado Chimo̧ Pedro judi cho̧ ji̧ra̧ tjamo̧ oa daea̧ oaiä, jabechji̧ ana̧ tjamo̧ri̧ jo̧rȩtamȩpea̧de, pio jȩa nö̧ta ëba cjiaji̧ri̧ pio judiro̧borë. Tjamo̧ davä. Jibëa̧ jadü judiro̧, Santiago pio judi, ado Juan pio judi, Chebedeo quȩmȩ pio ju̧i̧ ja̧ u̧ri̧ pio judiro̧ peaja̧di ana̧ tjamo̧ri̧ jo̧rȩtaji̧ri̧pea̧dirȩ. Jabechji̧ Pedro judi cho̧ ji̧ra̧ oa daea̧ oaiä, 'jabo cjäri̧ maquëda, a̧dë chjäte jauëchjamȩdida, Ütë tjamo̧ ja̧ jauëchjara̧ japamȩdida, jabo cüdë pumȩ chjai̧dëquëda' quëna̧ jo̧rȩta̧ oaiä, jabechji̧ idëri̧ cjiapea̧ bagamȩrȩ Jechu ja̧ yaboräpȩ cjatärëremȩde, ju chatura̧ cjiadiäa̧mȩrȩ. Ado ja̧di ta̧rëri̧ yo̧a̧dejȩ: —Danȩ Ano̧mȩ, chja jabechji̧ a̧dë jachipadäräcoe. Jabechji̧ chjai̧dë oa jape chjaomȩrȩ cjo̧ro̧requede cüdë. Pio mȩa nö̧ta tjamo̧ri̧ ëba cjiarea̧mi̧dërequedemȩ —yo̧a̧dejȩ. Jabo Jechu judi dëbë yo̧a̧dejȩ Chimo̧ pio ju̧i̧: —Danȩ, uapadëvä —yo̧a̧dejȩ—. Pio yaba̧ domȩri ja̧ mȩnȩ cho̧ maea oa mu̧i̧rërea̧ ji̧, jabechji̧ pumȩ pio ji̧ri̧ ano̧ mire mu̧i̧riä tai̧mi̧ dari̧ japa tänȩparequedemȩ —yo̧a̧dejȩ.
Jabo pjaricheo judi pio ji̧ daea̧ oaiä, Jechu ju̧i̧ jibëa̧ bëräpȩ jurera̧tä yabëa̧mȩ pio judi chjö̧na̧i̧ oa daea̧ oaiä, ana̧ri̧ jo̧rȩtamȩpea̧de. 'Jabo cjäri̧ madida, pio jiro üi̧ üdë Ütërë ea jana̧ chjadüa̧ oa ni̧bämȩrȩ tjamo̧ri̧ cjo̧ro̧a̧rä judi, 'jabechji̧ pio jiro iei̧ pio ji̧ chjiari chjadëri̧ dabatäremȩdida, pio jȩa ga̧re tarayi̧ pio ji̧ chjiari na̧e chiatäremȩdida, jabechji̧ chjai̧dëri̧ japayi̧ iei̧ pio jini̧ni̧da quëna̧täremȩdida' quëna̧ jo̧rȩtamȩrȩ darëremȩdejȩ Jechu ju̧i̧.
Ja̧dëa ji̧ Geracha quȩmȩ chirirä cjo̧ro̧ji̧ri̧ pio judiro̧, pio jiro chirirä oëra̧ti̧ oa cjo̧ro̧ji̧ri̧ pio judiro̧ yo̧tarëreji̧ri̧diro̧jo̧ȩ Jechu ju̧i̧ judi jibëa̧ chiriri pio judiri a̧dë baätä. Jabechji̧ ma̧i̧ da uaparea̧ üdë jibëa̧ chji̧ oa boadäräa̧ oaiä, jabechji̧ jibëa̧ chiriri pio judiri a̧dë baätä yo̧a̧diro̧jo̧ȩ. Ado pio ju̧i̧iä Jechu judi bua̧de chararä ado chjereno̧ cuchupë baäpea̧ oa.
Ado dëbë yo̧a̧diro̧jo̧ȩ: —Chjia tjamo̧rämi̧ cjiadë, jabechji̧ o judiro̧ Juan pio judirämi̧ cjiadiro̧mȩ, uirä go̧ȩ cjaeä chudarëremȩ pio judi. Ado o judiro̧, ‘Aja̧, Eria pio judipamȩ jirodida’ quëna̧ jo̧rȩtadiro̧mȩ. Ado o judiro̧, ‘A̧ja̧, Ütërë ea jana̧ chjadüa̧ oa ni̧bämȩ pio judipamȩ jirodida, no̧mȩ tjamo̧ri ja̧ cjo̧ro̧rëreji̧ri̧ pio ji̧ri̧ ja̧ jadüpamȩ jirodida, ja̧borëremȩrȩ bëdüa̧ jirodiibëda' quëna̧ jo̧rȩtadiro̧mȩ —yo̧a̧diro̧jo̧ȩ.
Jabo iëno̧ë ta̧rëji̧ri̧ judiro̧ cjiadiädëji̧ri̧rȩ ji̧dë ma̧ iëno̧ iëno̧ cjia̧diro̧jo̧ȩ. —Jabo chjadëri̧ yo̧ibe. ¿Chjia tjamo̧nȩ ado ja̧di. Ütërë mitëa̧ Chjätä Tänȩmȩ pio judidërä judi, ¿chjia tjamo̧nȩ? ¿Ja̧borëremȩrȩ bëdüa̧ oa cjiamȩ Eria pio judidënȩ? —iëno̧ë ta̧rëa̧diro̧jo̧ȩ. Jabo Juan judi dëbë yo̧a̧dejȩrȩ: —Cjäri̧ marequede. Eria pio judidërequede —dëbë yo̧a̧dejȩrȩ. Ja̧dëa ji̧ ado iëno̧ë ta̧rëa̧diro̧jo̧ȩ: —Jabo ¿chjianȩ ado ja̧di. Moicherë yo̧rërea̧ ¿pio judidënȩ? Ütërë ea jana̧ chjadüa̧ oa ni̧bäparemȩ ¿pio judidënȩ? —iëno̧ë ta̧rëa̧diro̧jo̧ȩ. —Cjäri̧ marequede. Pio judidërequede —dëbë yo̧a̧dejȩrȩ.
Ado Juan pio ju̧i̧ ta̧rëa̧ oaiä ado iëno̧ë ta̧rëa̧diro̧jo̧ȩ, ja̧di ta̧rëri̧ yo̧ji̧ri̧rȩ: —Jabo cjäri̧ marenȩ. Mȩnȩ Ütërë mitëa̧ Chjätä Tänȩmȩ pio judidërä judi, ado Eria quȩmȩrea̧ pio judidërä judi, ¿chjianȩ? Ado Ütërë ea jana̧ chjadüa̧ oa ni̧bäparemȩ pio judidërä judi, ¿chjia ja̧ ma̧ȩrä go̧ȩ cjaeä chudarenȩjȩrȩ pumȩ ji̧ri̧? —iëno̧ë ta̧rëa̧diro̧jo̧ȩ.
Ado iei̧ jini̧ Jechurë pio jȩa chjiari dabarea̧mi̧dë pio ju̧i̧ ni̧bä chjaoa̧ oaiä, jabechji̧ ana̧ri̧ jo̧rȩtayi̧rȩ yo̧a̧nȩjȩ: —‘Chia chia, pio judidida’ quëna̧ dabadëa̧requedemȩ, jabo yaba̧ dabarequede pio mȩa chjiari —yo̧a̧nȩjȩ—. ‘Jabechji̧ Ütërë ea jana̧ chjadüa̧ oa ni̧bämȩdida’ quëna̧ dabarequedemȩ yaba̧.
Ado ja̧dëa ji̧ pjaricheo judiro̧ ado iëno̧ë ta̧rëa̧diro̧jo̧ȩ da cotoremȩ ju̧i̧. —Danȩ, yo̧ibe ado. Pio jiro üi̧ üdë mȩa chjaparȩa̧ pio ju̧i̧ chjiari pea yo̧a̧räbo, jabechji̧ ado chjereno̧ yo̧ibe. Da cotoremȩ oa chjaparȩa̧ pio ju̧i̧ chjari ado yo̧ibe chjadëri̧. ¿Yö̧ta dari̧ jo̧rȩtanȩ mȩa chjaparȩa̧mȩ pio ju̧i̧ chjiari? —yo̧a̧diro̧jo̧ȩ. Ado da cotoremȩ üdë: —Yö̧ta dari̧ jo̧rȩtadë, ‘jabechji̧ Ütërë ea jana̧ chjadüa̧ oa ni̧bämȩ pio judidida’ quëna̧ jo̧rȩtareconȩ —dëbë yo̧a̧dejȩrȩ.
Ado danȩrȩ ca̧ oti̧, pio jiro Moiche pio judide Ütërë chjadüpea̧ pio ju̧i̧ chjiari jabërä ni̧bärëremȩ judi. Jabechji̧ judi icharaita pio ji̧ri̧iiäpȩmo̧ no̧mȩ tjamo̧ri ja̧ ni̧bärërea̧ ji̧, judi Ütërë chjadüpea̧ pio ju̧i̧ chjiari jabërä ni̧bärërea̧ ji̧, jabechji̧ ja̧di ta̧rëri̧ ni̧bärëremȩdejȩrȩ: "Aja̧, Ütërë ea jana̧ chjadüa̧ oa ni̧bämȩ pio ju̧i̧ chjadüpadidibe dibëa̧ chjarerämȩ pio ju̧i̧. Aja̧, pio coa chjadürërea̧mi̧ chjadüpadejȩ peaja̧di" yo̧mȩrȩ yo̧rëremȩdejȩrȩ Moiche judi Ütërë chjadüpea̧ pio ju̧i̧ chjiari.
Ado Moiche judi ja̧di ta̧rëri̧ yo̧mȩrȩ yo̧rëremȩdejȩrȩ icharaita pio ji̧ri̧iäpȩmo̧: “Jabo cja̧rȩmȩ oa chjadüpadidibe Jeova judi, na̧ Ütë pio judi. Pio cüdëmi̧ da oa, dibëa̧ chjarerämȩ oa chjadüpadidibe. Aja̧, cja̧rȩmȩ oa, Ütërë ea jana̧ chjadüa̧ oa ni̧bämȩ pio ju̧i̧ chjadüpadidibe. Ado pio ju̧i̧ chjadëri̧ ta̧rë ja̧bopea̧ chiarenȩro̧jo̧ȩ.” Aja̧, ja̧di ta̧rëri̧ yo̧mȩrȩ yo̧rëremȩdejȩrȩ icharaita ji̧ri̧ Moiche judi, Jeova judi chjadüpea̧ pio ju̧i̧ chjiari.
Sanasan