Tjana̧ ju̧i̧ chjiaridë, jabechji̧ pio ju̧i̧ yo̧parequededibe —yo̧a̧dejȩrȩ—. Danȩrȩ, mȩnȩro̧ judio pio judiro̧ peadë tjamo̧ri ja̧ mitëa̧ oa cjia marëreji̧ri̧nȩrȩ Ütërë yo̧a̧ chja̧oeräpȩ cjo̧ro̧pea̧ oa. Jabo cjäri̧ manȩrȩ, pio ju̧i̧ ja̧ chja̧oerä cjo̧ro̧dëri̧ cjiarëreji̧ri̧nȩrȩ. Ado pio ju̧i̧iä jabechji̧, ado cja̧rȩmo̧ pumȩ pio ji̧ri̧ ano̧ mire mitërëremȩdejȩrȩ Ütë tjamo̧ judi. Jabechji̧ pio ju̧i̧ ja̧ ma̧ȩrä tjamo̧ri̧ cjo̧ro̧tämi̧ cjiaji̧ri̧ pio ji̧ri̧, chjadë pio ju̧i̧ na̧rȩriä cjo̧ro̧tämi̧ cjiaji̧ri̧ pio ji̧ri̧ ano̧ mire mitërëremȩdejȩrȩ.
Lucas 3:8 - Biblia Pume8 Ado pio ju̧i̧iä yo̧requededibe. Jabechji̧ chjadëri̧ ano̧ mire jo̧rȩtachji̧vä. Ado chjadëri̧ ano̧ mire jo̧rȩta ëte, mȩnȩro̧ chjai̧dëri̧ japea̧ pio ju̧i̧ chjiari chjadëri̧ ano̧ mire jo̧rȩta ëte, jabechji̧ chjadëri̧ na̧rȩriä cjo̧ro̧chji̧vä jurarea̧mi̧ da oa, chacha oa chia bararea̧mi̧ dari̧. Jabo oëra̧ jo̧rȩtadëchji̧vä pio dibë chjiari —yo̧a̧dejȩrȩ—. ‘Chja jabechji̧ cüdë Abaraa̧rea̧ pio judiri ja̧mȩ tara, Ütë tjamo̧ pio ju̧i̧iä ba chia tjamo̧quëda, jabechji̧ pio judiri ja̧mȩ tara, Ütë ja̧ ërecjiarea̧ üdë pio coaiäpȩmo̧ tjamo̧ri̧ acji cjatädëpadicoada’ quëna̧ jo̧rȩtadëchji̧vä. Jabechji̧ Abaraa̧rea̧ pio judiri ja̧mȩborë bape chjaoa̧ oa cjiapai̧ danȩrȩ davä, mȩnȩro̧ ano̧ mire quëna̧dërä judi —yo̧a̧dejȩrȩ—. Danȩrȩ, mȩnȩro̧, 'Aja̧, ba chia tjamo̧a̧ro̧da' quëna jo̧rȩta maeanȩrȩ jabo cjäri̧ manȩrȩ, ba chia tjamo̧dënȩrȩ. Jabechji̧ Ütë tjamo̧ judi pumȩ ji̧ri̧ jëdano̧tämi̧ cjiarä judi, jabechji̧ pio yi chamȩ ta̧dëra̧ pio ju̧ri̧ra̧ jëdano̧pai̧ dadejȩrȩ chjaodëri̧. Tjamo̧ davä. Ütë tjamo̧ judi pumȩ ji̧ri̧ jëdano̧tämi̧ cjiarä judi, Abaraa̧rea̧ pio judiri ja̧ji̧ri̧ pumȩ pio ji̧ri̧ jëdano̧tämi̧ cjiarä judi, jabechji̧ pio yi chamȩ ta̧dëra̧ pio ju̧ri̧ra̧ tjamo̧ri̧ jëdano̧pai̧ dadejȩrȩ davä, jënȩ ja̧di dari̧ japarea̧ jo̧rȩtarä judi. Ado pio ju̧i̧iä jabechji̧, 'ba chiaa̧ro̧da' quëna̧dëchji̧vä jabo jabechji̧, Abaraa̧rea̧ pio judiri ja̧ji̧ri̧borë ano̧ mire jo̧rȩtatäreji̧ri̧nȩrȩ mȩnȩro̧ bape chjaoa̧ oa cjiachea oa —yo̧a̧dejȩrȩ—. Faic an caibideil |
Lucas 3:8
29 Iomraidhean Croise
Dëdë, ja̧di dari̧ quëna̧ jo̧rȩtanȩrȩ, jabo cjäri̧ manȩrȩ, oëra̧ jo̧rȩtanȩrȩ —yo̧a̧dejȩrȩ—. Danȩrȩ, mȩnȩro̧ tjamo̧ri̧ ano̧ mire jo̧rȩtaji̧ri̧pea̧rä judi, jabechji̧ chjadëri̧ na̧rȩriä cjo̧ro̧chji̧vä. Aja̧, jurarea̧mi̧ da oa chjadëri̧ na̧rȩriä cjo̧ro̧chji̧vä. 'Aja̧, tjamo̧ri̧ ano̧ mire jo̧rȩtaji̧ri̧pea̧diro̧da’ quëna̧rea̧mi̧ dari̧ na̧rȩriä cjo̧ro̧chji̧vä pumȩ ütëbo oa.
Jabo oëra̧ jo̧rȩtadëchji̧vä pio dibë chjiari —yo̧a̧dejȩrȩ—. ‘Chja jabechji̧ cüdë Abaraa̧rea̧ pio judiri ja̧mȩ tara, Ütë tjamo̧ pio ju̧i̧iä ba chia tjamo̧quëda, jabechji̧ pio judiri ja̧mȩ tara, Ütë ja̧ ërecjiarea̧ üdë pio coaiäpȩmo̧ tjamo̧ri̧ acji cjatädëpadicoada’ quëna̧dëchji̧vä. Jabechji̧ Abaraa̧rea̧ pio judiri ja̧mȩborë bape chjaoa̧ oa cjiapai̧ danȩrȩ. Ado pio ju̧i̧iä yo̧requededibe. ‘Jabechji̧ ba chia tjamo̧quëda, Abaraa̧rea̧ pio judiri ja̧mȩ tara ba chia tjamo̧quëda’ quëna̧ jo̧rȩtadëtäreji̧ri̧nȩrȩ pio dibë chjiari. Danȩrȩ, Ütë tjamo̧ judi Abaraa̧rea̧ pio judiri ja̧ ji̧ri̧ pio ji̧ri̧ cjitë tänȩtämi̧ cjiarä judi, jabechji̧ ta̧dëra̧ pio ju̧ri̧ra̧ cjitë tänȩpai̧ dadejȩrȩ chjaodëri̧, pio yi chamȩ ta̧dëra̧ pio ju̧ri̧ra̧. Tjamo̧ davä. Ja̧di dari̧ japapai̧ dade Ütë tjamo̧ judi, judi ja̧di dari̧ japatämi̧ cjiarä judi. Ado pio ju̧i̧iä oëra̧ jo̧rȩtadëtäreji̧ri̧nȩrȩ pio dibë chjiari. Jabechji̧ Abaraa̧rea̧ pio judiri ja̧ji̧ri̧borë ano̧ mire jo̧rȩtatäreji̧ri̧nȩrȩ. Jabechji̧ Abaraa̧rea̧ pio judiri ja̧mȩrȩ cjo̧ro̧pea̧ üdë, dëdë, ba chiade, jabo ji̧dë u̧i̧ ba chiade ano̧ mire jo̧rȩtapea̧ üdë. Jabo cjäri̧ manȩrȩ, tjamo̧ri̧ ano̧ mire jo̧rȩtadëri̧ cjianȩrȩ.
Danȩrȩ, bë ana̧mȩ judi joë ya oa chjuari̧ tuti cara̧ oaiä, jabechji̧ yu̧a̧rea̧mi̧dëpea̧de. Ado mȩnȩro̧ orë dairäpȩ tutia̧ oa cjiapanȩrȩ joë ya oa tao tao eari̧ gu̧na̧ gu̧na̧ cjiaji̧ri̧rȩ. Ado ja̧di ta̧rëri̧ ëna̧diäji̧ri̧rȩ yo̧panȩrȩ: "Aja̧ Ano̧mȩ, chjadëri̧ areië yürüibe" yo̧pa. Jabo joë ya Ano̧mȩ pio judi dëbë yo̧padidibe: "Cjäri̧ marequededibe, tjamo̧ri̧ dabadërequededibe. 'Jabechji̧ pio judiri ma̧na̧diro̧coada' quëna̧ dabadërequededibe" yo̧pa.
cjäri̧ manȩrȩ, idëri̧ cjiaji̧ri̧rȩ cjiadiäpai̧ danȩrȩ. Jabechji̧ tjamo̧ a̧dopamȩ pio judi pumȩ ba chiamȩ pio ju̧i̧ charea̧ ba chiaräpȩ cha tänȩtämi̧ cjia oaiä, jabechji̧ pio dibë cjitë tänȩpai̧ dadidibe pumȩ ba chiamȩ pio judi ano̧ mire chapea̧ oa. Ado mȩnȩro̧ idëri̧ cjiaji̧ri̧rȩ cjiadiäpai̧ danȩrȩ. Ado ja̧dëa ji̧ ba chiadëräpȩ ano̧ mire cha tänȩpai̧ dadidibe.
Jabo Jechu judi dëbë yo̧a̧dejȩrȩ: —Cjäri̧ marequedejȩrȩ, pio ji̧ri̧ cjapiri̧ cjia tänȩrea̧mi̧dërequedejȩrȩ —yo̧a̧dejȩrȩ—. Jabechji̧ pumȩ judiro̧ cjapiri̧ cjiarä judi, Ütë tjamo̧ pio judi tänȩa̧ oa chjacjiamȩri̧ ni̧bäji̧ri̧pe bagatäreji̧ri̧dirȩ järea̧ no̧ yuroro chaji̧ri̧ ta̧dë pio judiro̧. Tjamo̧ davä. Pio coa chjiari chjacjiamȩri̧ ni̧bäji̧ri̧pe bagatäreji̧ri̧dirȩ. Ado pio ju̧i̧iä yo̧requededibe. Chja jabechji̧ chjacjiamȩri̧ ni̧bätädiro̧coe pumȩ judiro̧ —dëbë yo̧a̧dejȩrȩ.
Ado Chaqueo pio judi ja̧di dari̧ quëna̧mȩrȩ yo̧a̧ oaiä, jabechji̧ ja̧di ta̧rëri̧ dëbë yo̧a̧dejȩ Jechu judi: —Jabechji̧ Ütërë yürüa̧ oa chjätärea̧ üdë pio yaba̧ domȩ oa go̧düna̧ra̧didibe, pio yoa bërä cjo̧ro̧ji̧ri̧ pio ji̧ri̧. Ado dëdë, Abaraa̧rea̧ pio judiri ja̧mȩrenȩ jabo mȩnȩ quena̧mȩpea̧ oaiä, jabechji̧ pio ju̧i̧ nö̧ta ji̧mo̧pea̧renȩ yaba̧ pio judi quëna̧rërea̧mi̧ quëna̧mȩpea̧ tara. Jabechji̧ Abaraa̧rea̧ pio judiri ja̧ tjamo̧mȩpea̧renȩ —yo̧a̧dejȩ—.
Jabo pjaricheo judiro̧ pio ju̧i̧ ta̧rëa̧ oaiä, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë pio jiro ma̧ȩ oa ta̧rëa̧ oaiä, goae tjamo̧dërëremȩdejȩrȩ. Ado ja̧di ta̧rëri̧ ni̧bäji̧ri̧pea̧dirȩ jibëa̧ dëbëti̧ra̧ chia: —Jabo cjäri̧ made pio yüdëje. Ütë tjamo̧ pio ju̧i̧iäpȩmo̧ chjai̧dëri̧ japamȩmi̧ dari̧ ni̧bäde. Jabechji̧ Ütë tjamo̧ pio judicji̧ quëna̧ japamȩmi̧ dari̧ ni̧bäde. Jabechji̧ Ütë tjamo̧ pio judimo̧rȩ chjai̧dë oa duridëparȩpai̧ dadejȩ. Jabo pio yodëje, cjäri̧ made, duridëparȩrea̧mi̧dëde. Jabo duridëparȩrea̧mi̧dëräbo, jabechji̧ duridëparȩmȩmi̧ dari̧ ni̧bämȩde. 'Yö̧ta dari̧ jo̧rȩtacjivadi, pio cüdëborë Ütë tjamo̧ pio judiquëda' quëna̧ jirode. Jaboti̧ri̧ ni̧bämȩde —yo̧ji̧ri̧pea̧dirȩ jibëa̧ dëbëti̧ra̧ chia.
Jabo Jechu judi ja̧di ta̧rëri̧ yo̧a̧ oaiä, goae tjamo̧dërëremȩdejȩrȩ. Ado ja̧di ta̧rëri̧ dëbë yo̧a̧diro̧jo̧ȩ: —Jabo cjäri̧ marea̧rȩ —dëbë yo̧a̧diro̧jo̧ȩ—. Abaraa̧ pio judiri ja̧ marea̧rȩ. A̧ro̧rȩ cja̧rȩmȩ co mu̧i̧tjoi̧dë marëreji̧ri̧rea̧rȩ. ¿Tjana̧ ju̧i̧iä ja̧di ta̧rëri̧ yo̧renȩibe. ¿Tjana̧ ju̧i̧iä mu̧i̧tjoi̧ pio ju̧i̧ chjiari yo̧renȩibe? —yo̧ji̧ri̧rȩ iëno̧ë ta̧rëa̧diro̧jo̧ȩ.
Jabo yo̧a̧diro̧jo̧ȩ: —Ibëa̧ taru judi, ibëa̧ ama̧i̧mi̧ da judi, jabechji̧ Abaraa̧ pio judide. Pio judiri ja̧ maearea̧rȩ —yo̧a̧diro̧jo̧ȩ. Jabo Jechu judi dëbë yo̧a̧dejȩrȩ: —Cjäri̧ manȩrȩ, mȩnȩro̧ Abaraa̧ pio ju̧i̧ ja̧ u̧ri̧ tjamo̧rä judi, pio ju̧i̧ cho̧rëdiätäreji̧ri̧renȩro̧jo̧ȩ. Pio judi japarërea̧mi̧ japatäreji̧ri̧nȩrȩ —yo̧a̧dejȩrȩ—.
Ado cüdë pearä a̧ra̧ano̧rërea̧ ji̧, jabechji̧ tarupë a̧ra̧ano̧rëremȩrequede Damacoräpȩ ju̧ri̧. Ado judiri ano̧ mire a̧ra̧ano̧a̧requede Jerucharȩräpȩ. Ado judiri Judea quȩmȩ chiri nö̧tai̧ oa ano̧ mire a̧ra̧ano̧a̧requede. Aja̧, oëra̧ti̧ oa a̧ra̧ano̧riä tai̧rëremȩquede Icharai pio judiri ja̧ji̧ri̧ pio ji̧ri̧iäpȩmo̧, judiodë pio ji̧ri̧iäpȩmo̧bo. Ado cüdë a̧ra̧ano̧riä tai̧a̧ ji̧, "Aja̧, ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari" yo̧a̧requedejȩrȩ. "Ütë tjamo̧ pio ju̧i̧iäpȩmo̧ ano̧ mire quëna̧chji̧vä. Ado ja̧dëa ji̧ mȩnȩro̧ tjamo̧ri̧ quëna̧ji̧ri̧pea̧rä, jabechji̧ chjadëri̧ na̧rȩriä cjo̧ro̧täreji̧ri̧nȩrȩ mȩnȩro̧ quëna̧ji̧ri̧pea̧ pio ju̧i̧ chjiari" yo̧a̧requedejȩrȩ. "Aja̧, mȩnȩro̧ quëna̧ji̧ri̧pea̧rä, jabechji̧ dami̧ti̧ chjadë oa japariä cjo̧ro̧täreji̧ri̧nȩrȩ ütëbo oa chjadëri̧ na̧rȩpea̧ oa" yo̧mȩrȩ yo̧a̧requedejȩrȩ cüdë a̧ra̧ano̧riä tai̧a̧ ji̧, ca̧ ütë Agiripa —yo̧a̧dejȩ Pablo judi—.
Pio ju̧i̧iä yo̧requededibe ca̧ oti̧. Ütë tjamo̧ ju̧i̧iäpȩmo̧ quëna̧ji̧ri̧ pio judiro̧dirȩ Ütërë yo̧ë cji̧däa̧ pio ju̧i̧ mitërea̧ dapaji̧ri̧ judiro̧. Pio ji̧ri̧iäpȩmo̧ cjäri̧ri̧ cjiamȩrȩ jabechji̧parȩpadejȩrȩ, pio judirimȩ maearë, judiro̧ chjadëri̧ japadëa̧ ba oa. Ado pio ju̧i̧iä Ütërë yo̧ë cji̧däa̧ üdë, jabechji̧ Abaraa̧ pio judiri ja̧ pumȩ ütëbo ja̧de. Pio ji̧ri̧iäpȩmo̧ tjamo̧ri̧ yürüpadejȩrȩ yürüdëpe bagarea̧ decjiari̧. Tjamo̧ davä. Moicherë go̧ȩparërea̧ ma̧ȩrä quëna̧ji̧ri̧ judio pio ji̧ri̧iäpȩmo̧, ado Abaraa̧ pio ju̧i̧ cho̧rë quëna̧ji̧ri̧ judiodë pio ji̧ri̧iäpȩmo̧bo yürüpadejȩrȩ. Jabechji̧ a̧ro̧rȩ quëna̧ji̧ri̧ pio judiro̧ ütëborë jadama̧i̧ taru oparea̧ro̧jo̧ȩ Abaraa̧ ju̧i̧.
Jabechji̧ judiro̧ Abaraa̧ pio judiri ja̧räbo, cja̧rȩmȩ goe chiaräbo, cja̧rȩmȩ taru chiaräbo, jabechji̧ o judiro̧ Abaraa̧ pio judiri ja̧ tjamo̧dëdirȩ. Ütë tjamo̧ ja̧ pumȩ tjamo̧dëdirȩ. Danȩrȩ, Ütë tjamo̧ judi Abaraa̧ pio ju̧i̧iäpȩmo̧ pearä yo̧ë cji̧därërea̧ ji̧, ja̧di ta̧rëri̧ yo̧mȩrȩ yo̧rëremȩdejȩ: “Aja̧, na̧ ja Icha pio ju̧i̧iä no̧i̧dë tjamo̧padirȩ na̧ea̧ri ja̧paji̧ri̧ pio judiro̧” yo̧mȩrȩ yo̧rëremȩdejȩ.
Aja̧, Jechu Quiricho pio judiri ma̧na̧mȩ maeara̧ na̧rȩriä cjo̧ro̧panȩrȩ, jurarea̧ torë chachari̧ barami̧ dari̧, chjacjiamȩri̧ na̧rȩmi̧ dari̧. Jabechji̧ pio judiri ma̧na̧mȩ cjo̧ro̧rea̧ra̧ na̧rȩriä cjo̧ro̧panȩrȩ coëma cjiari̧ cjo̧ro̧ji̧ri̧rȩ, chjadë pio ju̧i̧ na̧rȩji̧ri̧rȩ. Ado mȩnȩro̧ ja̧di dari̧ cjo̧ro̧a̧ oaiä, 'jabechji̧ Ütë tjamo̧ judi ba chia tjamo̧dida, chjacjiamȩri̧ jo̧rȩtapea̧dida' quëna̧ jo̧rȩtaji̧ri̧rȩ cjo̧ro̧padirȩ pumȩ judiro̧.
Sanasan