Lucas 3:3 - Biblia Pume

³ Ado Ütë tjamo̧ judi pio jȩaiäpȩmo̧ ma̧ȩ yürüa̧ oaiä, jabechji̧ oëra̧ti̧ oa tai̧mȩrȩ a̧ra̧ano̧riä järëremȩde pumȩ pio ji̧ri̧ chjadëri̧ a̧ra̧ano̧pea̧ oa. Tjamo̧ davä. Bea Joroda̧ yuro oa, bea ca̧ȩta̧ra̧ri ja̧ yurori peaja̧di a̧ra̧ano̧riä tai̧rëremȩde. Ado ja̧di ta̧rëri̧ yo̧mȩrȩ ji̧dë ma yo̧rëremȩdejȩrȩ pumȩ ji̧ri̧: —Danȩrȩ, mȩnȩro̧ duridëparȩa̧ oa cjiatämi̧ cjiarä judi, mȩnȩro̧ Ütë tjamo̧ pio ju̧i̧iäpȩmo̧ chjai̧dëri̧ japea̧ ba oa duridëparȩa̧ oa cjiatämi̧ cjiarä judi, jabechji̧ ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari —yo̧a̧dejȩrȩ—. Jabechji̧ chjai̧dë pio ju̧i̧ japë ano̧chji̧vä. Ado mȩnȩro̧ ja̧di dari̧ japea̧rä, mȩnȩro̧ Ütë tjamo̧ pio ju̧i̧iä, 'Aja̧, duridëparȩrea̧ dapaquëda' quëna̧ji̧ri̧pea̧rä, jabechji̧ yo̧chji̧coe. Ado uirä go̧e cjaeä chudaparequededibe —yo̧mȩrȩ a̧ra̧ano̧riä tai̧rëremȩde Juan judi.

Lucas 3:3 Iomraidhean Croise

Mateo 3:11

Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Juan judi: ⁠—⁠Jabechji̧ pumȩ judiro̧ chjai̧dëri̧ japea̧ pio ju̧i̧ chjiari tjamo̧ri̧ ano̧ mire jo̧rȩtaji̧ri̧pea̧ pio ji̧ri̧ uirä go̧ȩ cjaeä chudarequededibe ⁠—⁠yo̧a̧dejȩrȩ⁠—⁠. Aja̧, ja̧di dari̧ japarequededibe. Jabo danȩrȩ, ca̧ duri oa ma̧na̧pamȩ pio judi, jabechji̧ pio coa u̧i̧ ba chiamȩde. Pio coa u̧i̧ ju chiamȩde. Jabomo̧ mu̧i̧tjoi̧requede cüdë. Nö̧tadëreconȩ ma̧na̧pamȩ ju̧i̧. Jabechji̧ a̧dë chjäte ba chiamȩde. Ado a̧dë chjäte ba chiamȩ tara, jibëa̧ ta joë pio ju̧i̧ mu̧i̧ yürüpea̧ ji̧ nö̧tadërequede. Jabechji̧ boi̧chji̧mi̧ darequede. Borequede. Ado pio judi ma̧na̧rä, Tjo tjamo̧ra̧ pio ju̧ri̧ra̧ go̧ȩ cjaeä chudapadidibe o ji̧ri̧. Jabo o ji̧ri̧, cjo̧dëra̧ pio ju̧ri̧ra̧ go̧ȩ cjaeä chudapadidibe.

Lucas 1:16

Ado na̧ ja pio judi a̧ra̧ano̧a̧ oaiä, Icharai pio judiri ja̧ji̧ri̧ pio judiro̧ no̧i̧dërë ano̧ mire jo̧rȩtapadirȩ, jënȩro̧ chjai̧dëri̧ japea̧ pio ju̧i̧ putu jura̧ a̧dë chami̧ dari̧. Tjamo̧ davä. Judiro̧ Juan pio ju̧i̧ ta̧rë ja̧boa̧ oaiä, jabechji̧ jibëa̧ Ano̧mȩ Ütë pio ju̧i̧ ado chjereno̧ chjacjiamȩri̧ jo̧rȩtapadiro̧jo̧ȩ.

Lucas 1:77

Aja̧ ca̧ ja, ni̧bä chjaoparenȩjȩrȩ Ano̧mȩ pio ju̧i̧ ja̧ pumȩ pio ji̧ri̧. Judiro̧ chjätärea̧ dapea̧ oa, judiro̧ chjai̧dëri̧ japea̧ pio judi duridëparȩa̧ oa cjiapea̧ oa, ni̧bä chjaoparenȩjȩrȩ ca̧ ja.

Lucas 4:1

Ja̧dëa ji̧ Jechu judi, Tjo tjamo̧ ja̧ chja̧oerä cjiamȩrȩ go̧dürëremȩde bea Joroda̧ yuroro a̧rȩmȩ chiriri pio judiri. Ado Tjo tjamo̧ pio judi yabo ëba jämi̧ dari̧ jä tänȩrëremȩdejȩ chiri tjoräpȩ ju̧ri̧, pumȩ decjiaräpȩ ju̧ri̧.

Juan 1:28

Pio jiro pumȩ judiro̧ Juan pio ju̧i̧ ana̧ri̧ iëno̧ iëno̧ ta̧rë chjaorërea̧ ji̧, jabechji̧ Betania quȩmȩräpȩmȩ oa iëno̧ë ta̧rë chjaorëji̧ri̧diro̧jo̧ȩ bea Joroda̧ oëräpȩmȩ oa, pumȩ ji̧ri̧ uirä go̧e cjaeä chuda̧räpȩ cjiamȩ oa.

Juan 3:26

Ado pio ju̧i̧ nö̧ta ni̧bäa̧ duri oa goëdepea̧diro̧jo̧ȩ Juan ju̧i̧. Ado Jechu pio ju̧i̧ jo̧rȩtaji̧ri̧rȩ yo̧a̧diro̧jo̧ȩ: —Danȩ a̧ra̧ano̧mȩ, mȩnȩ ibë yo̧a̧ pio ju̧i̧ ¿jo̧rȩtadënȩ üi̧ oa? Bea Joroda̧ oëräpȩ pio mȩa nö̧ta ëba cjiaremȩ pio ju̧i̧ ¿jo̧rȩtadënȩ? Danȩ, judiborë pumȩ ji̧ri̧ go̧e cjaeä chudadejȩrȩ yaba̧. Ado pumȩ judiro̧ ütëborë pio mȩaiäpȩ jana̧rërea̧ ji̧, pio ju̧i̧iäpȩ ano̧ mire jä chjaodirȩ yaba̧ —yo̧a̧diro̧jo̧ȩ.

Japarea̧ 13:24

Jabo Jechu judi jabë ma̧na̧dëa̧rä, go̧e cjaeä chudamȩ Juan pio judi a̧ra̧ano̧rëremȩdejȩrȩ pumȩ ütëbo oa, Icharai pio judiri ja̧ji̧ri̧ ütëbo oa. Aja̧, judiro̧ chjai̧dëri̧ japea̧ pio ju̧i̧ chjiari ano̧ mire jo̧rȩtapea̧ oa, judiro̧ uirä go̧e cjaeä chuda̧ oa cjiapea̧ oa a̧ra̧ano̧rëremȩdejȩrȩ —yo̧a̧dejȩrȩ—.

Japarea̧ 19:4

Ja̧dëa ji̧ Pablo judi yo̧a̧dejȩrȩ: —Danȩrȩ, Juan judi go̧e cjaeä chudarërea̧ ji̧, pumȩ judiro̧ chjai̧dëri̧ japea̧ pio ju̧i̧ chjiari chjere jo̧rȩtaji̧ri̧ oa chudarëremȩdejȩrȩ. 'Aja̧, chjai̧dë oa japamȩrȩ dopaquëda, chjai̧dë oa japadëtäremȩquëda, chjai̧dë pio ju̧i̧ putu jura̧ a̧dë chami̧ dari̧ cjo̧ro̧täremȩquëda' quëna̧ji̧ri̧ oa chudarëremȩdejȩrȩ. Ado jibëa̧ duri oa ma̧na̧pamȩ pio ju̧i̧ chjiaribo ni̧bä chjaorëremȩdejȩrȩ, Jechu pio ju̧i̧ chjiari. Pio ju̧i̧iäpȩmo̧ quëna̧tä yo̧mȩrȩ ni̧bä chjaorëremȩdejȩrȩ Juan üdë —yo̧a̧dejȩrȩ.

Japarea̧ 22:16

Ado ja̧dëa ji̧ a̧de yo̧a̧dique, “¿Tjana̧ ju̧i̧iä jabomo̧ dae charenȩ? ¿Tjana̧ ju̧i̧iä cjiadiä cjiadiä cjiarenȩ? Jabechji̧ cjitëvä. Uirä go̧e cjaeä chuda̧ oa cjiavä. Ado Ütë tjamo̧ pio ju̧i̧iä goëcjo̧dëvä mȩnȩ chjai̧dëri̧ japea̧ üdë duridëparȩa̧ oa cjiapea̧ oa.” Aja̧, ja̧di ta̧rëri̧ yo̧mȩrȩ ni̧bä chjaorëremȩdique Anania judi.