Lucas 23:4 - Biblia Pume

⁴ Ja̧dëa ji̧ Pirato judi yo̧a̧dejȩrȩ tjamo̧ goë tuti ja̧bepaji̧ri̧ pio ji̧ri̧iäpȩmo̧, pumȩ buba pio ji̧ri̧iäpȩmo̧bo: —Danȩrȩ, pio yoa üi̧ pio judi 'chjai̧dëri̧ japea̧dida, ana̧ri̧ bape chjaopea̧ chiacuni̧da' quëna̧ jo̧rȩtamȩrȩ dadëreconȩ —yo̧a̧dejȩrȩ.

Lucas 23:4 Iomraidhean Croise

Mateo 27:19

Ado Pirato judi charëremȩde ütarë ta̧rë charea̧räpȩ ju̧ri̧, pumȩ pio ji̧ri̧ ta̧rë ëte ütarapea̧räpȩ ju̧ri̧. Ado ju̧ri̧pȩ cha̧ nö̧ta, jibëa̧ iei̧ pio ji̧iä ta̧rërëremȩde Jechu pio ju̧i̧ chjiari. Jabechji̧ pumȩ pio ju̧i̧iä go̧ȩpe chjadürëreyi̧nȩjȩ. “Jabechji̧ eami̧ oa japadëjo̧ȩ pio jiro üi̧ oa, jabo jabechji̧ chjaodëri̧ baä tänȩjo̧ȩ” yo̧mȩ maȩ pio ju̧i̧ go̧ȩpe chjadürëreyi̧nȩjȩ. “Aja̧, pio jiro üi̧ üdë chjai̧dë oa japadëmȩde, jabo coëma cjiari̧ cjo̧ro̧mȩde. Jabechji̧ pio ju̧i̧ chjiari uapai̧ da tjamo̧ri̧ canȩjä mo̧a̧reyi̧requede pio yaba̧ domȩ oa. Ado pio ju̧i̧iä yo̧tarequedemȩ ca̧ üi̧. Jabechji̧ baä tänȩjo̧ȩ” yo̧mȩ ma̧ȩ pio ju̧i̧ go̧ȩpe chjadürëreyi̧nȩ Pirato ja̧ iei̧ jini̧ jibëa̧ üi̧ pio ju̧i̧iäpȩmo̧, Jechu pio ju̧i̧ chjiari.

Marcos 15:14

Jabo Pirato judi dëbë yo̧a̧dejȩrȩ: —Jabo cjäri̧ made, toro ja̧bo tänȩrea̧mi̧dëde. Danȩrȩ, chjadëri̧ yo̧chji̧coe. ¿Tjana̧ chjai̧dë oa japea̧de? —iëno̧ë ta̧rëtea̧dejȩrȩ Pirato judi. Jabo pumȩ judiro̧ ta̧rë ja̧bodëa̧diro̧jo̧ȩ. Jabechji̧ ji̧dë u̧i̧ goae tarari̧ ëna̧diäji̧ri̧rȩ yo̧ chjaoa̧diro̧jo̧ȩ: —Toro cji̧de ja̧bo tänȩjo̧ȩ! —ëna̧diäa̧diro̧jo̧ȩ.

Lucas 23:22

Ado ja̧dëa ji̧ Pirato judi pumȩ buba pio ji̧ri̧ Jechu pio ju̧i̧ chjiari yo̧a̧ri̧ co iëno̧ë ta̧rërëremȩrȩ ado chjereno̧ iëno̧ë ta̧rëa̧dejȩrȩ, ja̧di ta̧rëri̧ yo̧mȩrȩ: —¿Jabo tjana̧ ju̧i̧iä ja̧bo tänȩtä earenȩro̧jo̧ȩ? —iëno̧ë ta̧rëa̧dejȩrȩ— ¿Tjana̧ chjai̧dë oa japea̧de? Jabechji̧ pio ju̧i̧ iëno̧ë ta̧rë ëte ütarë ta̧rëa̧ oaiä, 'jabechji̧ ja̧bo tänȩpea̧dida' quëna̧ jo̧rȩtadëreconȩ. Ado pio ju̧i̧iä pio ju̧i̧ gitoi̧ dari̧ japa ëte, jabechji̧ baä tänȩpareconȩ —yo̧tarëremȩdejȩrȩ.

Juan 18:38

Ja̧dëa ji̧ Pirato judi iëno̧ë ta̧rëa̧dejȩ: —Jabo chjadëri̧ yo̧coe. ¿Tjana̧de tjamo̧i̧ cjiari̧ baämȩ ma̧ȩ üdë? Yo̧coe —yo̧a̧dejȩ. Aja̧, ja̧di ta̧rëri̧ yo̧mȩrȩ iëno̧ë ta̧rëa̧dejȩ Jechu ju̧i̧. ‘Tjamo̧i̧ cjiari̧ baämȩ jo̧rȩtarea̧ pio ju̧i̧ chjiari tjamo̧ri̧ dabarea̧mi̧dë jirodida’ quëna̧ jorȩtamȩrȩ iëno̧ë ta̧rëa̧dejȩ. Ja̧dëa ji̧ Pirato judi Jechu pio ju̧i̧ nö̧ta ni̧bä ëte, ado chjereno̧ go̧dürëremȩde a̧dopë cjiaji̧ri̧ pio ji̧ri̧iäpȩ. Ado yo̧a̧dejȩrȩ: —Danȩrȩ, pio jiro üi̧ üdë chjai̧dëri̧ japadëa̧de. Ja̧bo tänȩrea̧mi̧dëde.

Japarea̧ 25:25

Jabo cüdë ütarë ta̧rë cha̧rea̧ ji̧, 'jabechji̧ ma̧i̧ da chjai̧dë oa japea̧dida, ja̧bo tänȩpea̧dida' quëna̧ jo̧rȩtadëa̧requede. Jabechji̧ ma̧i̧ da chjai̧dë oa japadëa̧de. Ado judi Domaräpȩ cjo̧ro̧mȩ ütë tjamo̧ pio judi ano̧ mire ütarë bape chjaotä cjo̧dëa̧ oaiä, jabechji̧ pio ju̧i̧iäpȩ chjadüpareconȩ.

Japarea̧ 3:13

Jabechji̧ Ütë tjamo̧ pio judide pio yoa pumȩ oa chjaparȩa̧mȩ judi. Ibëa̧ ütëti̧rȩa judiro̧ quëna̧rërea̧ Ütë pio judide. Danȩrȩ, Abaraa̧ judi quëna̧rërea̧ Ütë pio ju̧i̧ quëna̧rëremȩdejȩ Icha judi. Ado Jacobo judi peaja̧di quëna̧rëremȩdejȩ. Ado judiro̧ quëna̧rërea̧ Ütë pio judi chjaparȩa̧dejȩ. Tjamo̧ davä. Jibëa̧ mu̧i̧tjoi̧ ju̧i̧, Jechu pio ju̧i̧ a̧dë chjäte ba chiaparȩpea̧ oa chjaparȩa̧dejȩ pumȩ judiro̧ ütëborë Jechu pio ju̧i̧iäpȩmo̧ ma chjacjiamȩri̧ jo̧rȩtapea̧ oa. Jabo cjäri̧ manȩrȩ, a̧dë chjäte ma̧i̧ dari̧ japea̧nȩrȩ —yo̧a̧dejȩrȩ.— Ütë tjamo̧ judi ba chiaparȩa̧ pio ju̧i̧ jiada̧renȩro̧jo̧ȩ. Ütë tjamo̧ judi na̧rȩa̧ pumȩ pio ju̧i̧ jiada̧renȩro̧jo̧ȩ. Pirato pio judi dibë yo̧tarërea̧ ji̧, "Cjäri made, ja̧bo tänȩdëpea̧de jabo baä tänȩpea̧de" yo̧tarërea̧ ji̧, cjäri̧ marenȩro̧jo̧ȩ, chjuari̧ jiada̧renȩro̧jo̧ȩ. 'Jabechji̧ Jechu pio judi ja̧bo tänȩpea̧dida' quëna̧ jo̧rȩtaji̧ri̧rȩ yürüa̧renȩro̧jo̧ȩ ja̧bo tänȩa̧ oa cjiapea̧ oa. Tjamo̧ davä. Pirato pio ju̧i̧ ja̧ dachoro järiji̧ri̧rȩ yürüa̧renȩro̧jo̧ȩ ja̧bo tänȩa̧ oa cjiapea̧ oa —yo̧a̧dejȩrȩ—.

Ebereo Ma̧ȩ 7:26

Pio ju̧i̧iä jabechji̧, Jechu pio judide pio ibë chjiari tjamo̧ goë tuti ja̧bepamȩ judi. Jabechji̧ chjadë tjamo̧de pio ibë chjadëri̧ a̧dopea̧ ji̧. Danȩrȩ, judi tata chja tara, judi cja̧rȩmȩ co chjai̧dëri̧ japadëa̧ tara, judi chjai̧dë oa mirea̧ oa cjiadëmȩ tara, jabechji̧ chjadë tjamo̧de ibë chjadëri̧ a̧dopea̧ ji̧. Ado danȩrȩ, ¿tjana̧räpȩde pio ibë chjiari goë tuti ja̧bepamȩ judi? Tjana̧räpȩdë, jabechji̧ baärëremȩde a̧dëräpȩ, a̧dë chäte ba chiaräpȩ ju̧ri̧ chapea̧ oa. Jabechji̧ Ütë tjamo̧ pio judi tänȩa̧ oaiä, chjai̧dëri̧ japaji̧ri̧ judiro̧ yu̧a̧rea̧mi̧dëräpȩ tutia̧ oa cjiade yaba̧, Jäjäa ja̧ mu̧i̧ chjua cotoräpȩ ju̧ri̧.

Pedro Ma̧ȩ 1 1:19

Jabo jabechji̧ Quiricho pio ju̧i̧ ja̧ goe ba chia tjamo̧ra̧ pio ju̧ri̧ra̧ ba ano̧a̧ oa cjiarëreji̧ri̧nȩrȩ ca̧ oti̧. Jabechji̧ oveja co chjami̧ darë goe gu̧rori̧ ja̧borëremȩde. Goë tuti ja̧bepaji̧ri̧ pio judiro̧ oveja co chja oa ja̧bo tänȩrërea̧mi̧ ja̧borëremȩde Jechu judi peaja̧di, oveja co chjami̧ darë. Tjamo̧ davä. Goe gu̧rori̧ ja̧borëremȩde pio dibë chjiari tuti ba ano̧pea̧ oa.

Pedro Ma̧ȩ 1 2:22

Jabechji̧ ma̧i̧ da chjai̧dë oa chjätäa̧räbo, cja̧rȩmȩ co chjai̧dëri̧ japadërëremȩde. Cja̧rȩmȩ co jibëa̧ yara̧ u̧i̧pe ni̧bädërëremȩde.

Pedro Ma̧ȩ 1 3:18

Danȩrȩ, Quiricho pio judiborë conȩda̧ oa cjiarëremȩde Ütë tjamo̧ pio judi tänȩa̧ oaiä. Jabechji̧ judi coëma cjiari̧ cjo̧ro̧a̧räbo, ma̧i̧ dari̧ conȩdarëreji̧ri̧diro̧jo̧ȩ. Jabechji̧ cja̧rȩmȩ co chjai̧dëri̧ japadëmȩrȩ ano̧ mire ja̧borëremȩde ji̧ra̧ co chjai̧dëri̧ jape chjaoji̧ri̧ pio ji̧ri̧ chjiari, ibë chjadëri̧ ëba baämi̧ dari̧ japapea̧ oa Ütë tjamo̧ pio ju̧i̧iäpȩ. Jabechji̧ cja̧rȩmȩ co maea ja̧borëremȩde, ado judiri ja̧bodëpade. Aja̧, jibëa̧ icjara oa ja̧bo tänȩrëreji̧ri̧diro̧jo̧ȩ, jabo Tjo tjamo̧ pio ju̧i̧iä bëdüa̧ oa cjiarëremȩde.