Ado Jechu ja̧ yaboi̧räpȩ jäji̧ri̧rȩ goae tarari̧ ëna̧diä ëna̧diä ni̧bärëreji̧ri̧dirȩ, duriräpȩ jäji̧ri̧borë. Ja̧di ta̧rëri̧ ëna̧diä ëna̧diä yo̧rëreji̧ri̧dirȩ: —Pio yoaje chjacjiamȩri̧ ni̧bätäro̧jo̧ȩ, Davi pio judiri ja̧mȩ oa —ëna̧diäa̧dirȩ—. Aja̧, Ütë tjamo̧ pio judi chjadüa̧ oa ma̧na̧mȩ pio ju̧i̧iäpȩmo̧ chjacjiamȩri̧ ni̧bätäro̧jo̧ȩ. Ado a̧dëräpȩ cjiamȩ Ütë pio judiborë chjacjiamȩri̧ ni̧bäa̧ oa cjiatäde —ëna̧diäa̧dirȩ. Aja̧, ja̧di ta̧rëri̧ ëna̧diä chjaorëreji̧ri̧dirȩ, Jechu pio ju̧i̧ ba chia jo̧rȩtaji̧ri̧rȩ.
Lucas 2:14 - Biblia Pume14 "Aja̧, Ütë tjamo̧ judi chjacjiamȩri̧ jo̧rȩtapea̧de. Jabechji̧ a̧dëräpȩmȩ oa, a̧dë chjäte ba chiamȩräpȩmȩ oa, a̧dë chjäte tatari̧ cjiamȩräpȩmȩ oa chjacjiamȩri̧ jo̧rȩtapea̧ maeade. Ado chjadëri̧ yürütädejȩrȩ chiriräpȩti̧ oa cjo̧ro̧ji̧ri̧ pio ji̧ri̧. Aja̧, ma̧ chjupi̧ cjiari̧ jo̧rȩtarea̧ yürütädejȩrȩ, jënȩ cjäri̧ri̧ cjia da̧ pio ji̧ri̧iäpȩmo̧." Aja̧, ja̧di ta̧rëri̧ yo̧rëreji̧ri̧dirȩ a̧dëriji̧ri̧ mu̧i̧tjoi̧ pio judiro̧. Faic an caibideil |
Lucas 2:14
36 Iomraidhean Croise
Jabechji̧ pumȩ judiro̧ damirerea̧ dapea̧ oa, bagönȩrä dae chami̧ dari̧ cjiaji̧ri̧ pio judiro̧ damirerea̧ dapea̧ oa, ja̧bopea̧ chja̧oerä cjo̧ro̧ji̧ri̧ pio judiro̧ tatami̧ darä cjo̧ro̧rea̧ dapea̧ oa, jabechji̧ dorë cjitëmi̧ dari̧ ma̧na̧padiibe Ano̧mȩ judi, pio ibë chjadëri̧ yabo ëba baämi̧ dari̧ japapea̧ oa, a̧ro̧rȩ ütëborë no̧ tjamo̧mi̧ darä cjo̧ro̧rea̧ dapea̧ oa, a̧ro̧rȩ ma̧ chjupi̧ cjiari̧ cjo̧ro̧rea̧ dapea̧ oa —yo̧mȩrȩ ni̧bä chjaorëremȩdejȩ Chacaria judi, jibëa̧ ja pio ju̧i̧iäpȩmo̧, Ütërë ea jana̧ chjadüa̧ oa ni̧bämȩrȩ.
Ado chjacjiamȩri̧ ni̧bäji̧ri̧rȩ ja̧di ta̧rëri̧ yo̧rëreji̧ri̧dirȩ: —Jabechji̧ Ütë tjamo̧ pio judi chjadëri̧ japatädejȩ pio yoa Ütë oa, dai chirirä ja̧ Ütë pio ju̧i̧. Jabechji̧ Ano̧mȩ pio judi tjamo̧ yo̧rea̧ yürüa̧ oa ma̧na̧diibe. Ado a̧ro̧rȩ jachi cjiami̧ dari̧ cjiarërea̧ ji̧, jabechji̧ queri̧räpȩ cjiami̧ dari̧ cjiaji̧ri̧pea̧rea̧rȩ yaba̧ a̧dëräpȩ cjiamȩ Ütë pio ju̧i̧ nö̧ta. Ado pio ju̧i̧iä a̧dë chjäte chjacjiamȩri̧ ni̧bätäreji̧ri̧rea̧ro̧jo̧ȩ a̧dëräpȩ cjiamȩ Ütë pio ju̧i̧ —yo̧ji̧ri̧rȩ ni̧bärëreji̧ri̧dirȩ, to̧bari̧ yo̧ji̧ri̧rȩ.
Ado a̧dërimȩ mu̧i̧tjoi̧ judi ja̧di ta̧rëri̧ yo̧a̧ duri oa, chjaodëri̧ idëpea̧ oa cjiarëreji̧ri̧dirȩ a̧dëriji̧ri̧ mu̧i̧tjoi̧ judiro̧ no̧i̧dërë, ütararea̧mi̧dërë. Jabechji̧ mu̧i̧tjoi̧ pio judi jibëa̧ma̧i̧ cjiarërea̧ ji̧, chjaodëri̧ bubape bagarëreji̧ri̧dirȩ. Ado chjacjiamȩri̧ ni̧bäji̧ri̧pea̧dirȩ Ütë tjamo̧ pio ju̧i̧iäpȩmo̧, ja̧di ta̧rëri̧ yo̧ji̧ri̧rȩ:
Ado Tjo tjamo̧ pio judi a̧dëri pio judiri birana̧ra̧rëremȩdejȩ. Tjamo̧ davä. Birana̧ra̧rëremȩdejȩ jotoco puami̧ dari̧. Ado chjaodëri̧ ta̧rërëreji̧ri̧diro̧jo̧ȩ a̧dëri pio judiri ni̧bämȩ oa. Aja̧, ja̧di ta̧rëri̧ yo̧a̧mȩ oa ta̧rëa̧diro̧jo̧ȩ: —Ea tjamo̧requedemȩ ca̧ Ja. Ma̧ chiadëri̧ cjia tjamo̧mȩrȩ darequedemȩ —yo̧mȩrȩ yo̧rëremȩde Ama̧i̧ tjamo̧ judi jibëa̧ Ja pio ju̧i̧ chjiari, judi uiri pio judiri pea go̧dürërea̧ ji̧.
Ado Jechu judi ji̧dë u̧i̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧: —Danȩrȩ, cüdë dibë a̧dë baäpa tara, jabechji̧ ma̧ chjupi̧ cjiari̧ jo̧rȩtarea̧ yürürequededibe, chji̧ goaera̧ jo̧rȩtarea̧mi̧ dari̧. Peaja̧di jo̧rȩtarequede cüdë. Chji̧ goaera̧ jo̧rȩtarequede. Ado ca̧ jo̧rȩtarea̧ pio ju̧i̧ yürürequededibe pio dibëiäpȩmo̧. Jabo danȩrȩ, dai chirirä cjo̧ro̧ji̧ri̧ pio judiro̧ yürümi̧ dari̧ yürüdërequededibe. Dai chirirä ja̧ jo̧rȩtarea̧ oa yürüdërequededibe, jabo tjaoëpai̧ dari̧ jo̧rȩtarea̧ pio ju̧i̧ yürürequededibe. Pio ju̧i̧iä yo̧requededibe. Bücjüri̧ cjiadëchji̧vä —yo̧a̧dejȩrȩ—. Uapadëchji̧vä.
Jabechji̧ Ütë tjamo̧ judi pumȩ ütëbodärä oa ea tjamo̧ tara, tuti yürürëremȩdejȩ jibëa̧ Ja oa pumȩ pio ji̧ri̧ chjiari ano̧ mire ja̧bopea̧ oa. Yo̧a̧ri̧ oa ëbadëmȩborë chjadürëremȩdejȩ, pio ju̧i̧mo̧i̧ ëbamȩrȩ. Ado eami̧ pumȩ judi, pio ju̧i̧iäpȩmo̧ quëna̧mȩ judi, jabechji̧ bucho ana̧ cjo̧ro̧rea̧ dapade aeno̧rea̧ decjiari̧.
Danȩrȩ ca̧ oti̧, Ütë tjamo̧ judi Icharai pio judiri ja̧ji̧ri̧ pio ji̧ri̧iäpȩmo̧ yürüa̧ ma̧ȩ pio ju̧i̧ chjiari daba jironȩrȩ. Aja̧, Jechu pio ju̧i̧ chjiari ma̧ȩ chjadëi̧ pio judide. Ado Jechu pio ju̧i̧iämo̧i̧ ori̧ bagari̧ ëba cjiarea̧ darea̧rȩ Ütë tjamo̧ pio ju̧i̧ nö̧ta. Jabechji̧ a̧ro̧rȩ jachi cjiami̧ dari̧ cjiarërea̧ ji̧, Jechu pio ju̧i̧iä ori̧ bagari̧ ëba cjiarea̧ darea̧rȩ pio ju̧i̧ nö̧ta. Tjamo̧ davä. Pumȩ ütëbodärä ja̧ Ano̧mȩ pio ju̧i̧iämo̧i̧ ori̧ bagari̧ ëba cjiarea̧ darea̧rȩ, judiodë pio judiro̧borë. Aja̧, pio ju̧i̧ chjiari daba jironȩrȩ peaja̧di.
Jabo Ütë tjamo̧ judi a̧ro̧rȩ chjai̧dëri̧ japea̧ ba oa bape chjaotärea̧ ji̧, cjäri̧ri̧ cjiamȩrȩ jo̧rȩtarëremȩdiibe, pio ibë ütararea̧mi̧dëri̧ eamȩrȩ. Ado bëdü tänȩrëremȩdiibe Quiricho pio ju̧i̧ nö̧ta. Aja̧, nö̧tadäräri̧ japadëji̧ri̧ oa, ja̧boa̧mi̧ dari̧ cjiaji̧ri̧ oa bëdü tänȩrëremȩdiibe. Jabechji̧ cjäri̧ri̧ cjia tjamo̧mȩrȩ chjätärea̧ yürürëremȩdiibe, pio judirimȩ marë.
Aja̧, ja̧di dari̧ japarëremȩde Ütë tjamo̧ judi jënȩ pio ibëiäpȩmo̧ cjäri̧ri̧ cjia da̧ pio ju̧i̧ ana̧ri̧ na̧rȩpea̧ oa bucho ana̧. 'Aja̧, Ütë tjamo̧ judi Quiricho pio ju̧i̧iä ütararea̧mi̧dëri̧ cjäri̧ri̧ cjia dae chjaoa̧diji̧ri̧da, Jechu pio ju̧i̧iä chjamȩ tjamo̧diji̧ri̧da, Jechu Quiricho pio judiri ja̧ji̧ri̧ oa a̧dë chjäte chjadëri̧ japea̧diji̧ri̧da' quëna̧pea̧ oa japarëremȩde ütëbodärä oa chjadëri̧ na̧rȩpea̧ oa.
Jabechji̧ ja̧di dari̧ cjo̧ro̧tä eamȩrȩ ja̧bepade Ütë tjamo̧ judi. Tjamo̧ davä. Jënȩ jo̧rȩta̧mi̧ ana̧ri̧ ja̧bepade dibëa̧ chji̧rä. 'Aja̧, Ütë tjamo̧ judi yo̧a̧mi̧ ta̧rëdiätämi̧ cjiaquëda, jabechji̧ cüdë chjadëri̧ ta̧rëdiärea̧mi̧ dari̧ ju chiarea̧ yürüdicoada, pio ju̧i̧iä chjadëri̧ ta̧rëdiärea̧ daquëda' quëna̧rea̧mi̧ dari̧ ja̧bepade.
Ado Joja pio ju̧i̧iä, jabechji̧ jachidai̧parȩmi̧ dari̧ japatä earëremȩdejȩ Ütë tjamo̧ judi jënȩ pareaparërea̧ chjö̧na̧i̧ oa, pio jȩa nö̧ta ado chjereno̧ chjadëri̧ ëba cjiarea̧mi̧ dari̧ cjiapea̧ oa. Tjamo̧ davä. A̧dëräpȩ cjiamȩ chjö̧na̧i̧ oa, ado daburäpȩ cjiamȩ chjö̧na̧i̧ oa ado chjereno̧ pio jȩa nö̧ta chjadëri̧ ëba cjiarea̧mi̧ dari̧ cjiatä earëremȩde. Ado pio ju̧i̧iä chjadürëremȩdejȩ Joja oa. Ado Joja üdë toro goe gu̧rori̧ ja̧boa̧ oaiä, jabechji̧ pio jȩa nö̧ta ado chjereno̧ ëba cjiarea̧mi̧ dari̧ cjiadiäa̧de jënȩ pareapea̧ chjö̧na̧i̧rȩ. Jabechji̧ a̧dëräpȩji̧ri̧ judiro̧, daburäpȩji̧ri̧ judiro̧, jachidai̧parȩmi̧ dari̧ cjiadiäa̧dirȩ, pio ju̧i̧ ja̧ mape bagaji̧ri̧rȩ.
Ado yaba̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe. Jabechji̧ ibëa̧ Ano̧mȩ Jechu Quiricho judi, ibëa̧ Ama̧i̧ Ütë pio judiborë järiparȩtädiro̧dibe mȩnȩro̧ cjatäcjie jo̧rȩtarea̧mi̧ dari̧, mȩnȩro̧ chji̧ goaera̧ jo̧rȩtarea̧mi̧ dari̧. Jabechji̧ pio ibë ea tjamo̧ji̧ri̧rȩ cjäri̧ri̧ cjia darëreji̧ri̧diro̧ibe. Ado pio pio ibë cjäri̧ri̧ cjia daji̧ri̧rȩ bucho ana̧ järirea̧ yürürëreji̧ri̧diro̧ibe, ma̧diä tänȩrea̧ decjiari̧ jidatarea̧ chjadë pio ju̧i̧bo. Ado pio judiro̧, jabechji̧ chjadëri̧ järiparȩtädiro̧dibe dibëa̧ chji̧rä. Ado ju chiaparȩtädiro̧dibe peaja̧di mȩnȩro̧ chjadë maea oa japariä cjo̧ro̧pea̧ oa, mȩnȩro̧ chjadë maea oa ni̧bäriä cjo̧ro̧pea̧ oa.
Ado o ji̧ri̧ peaja̧di ta̧rëa̧requedejȩrȩ cjo̧ro̧ji̧ri̧ ütëbodäräti̧ oa. Ütë tjamo̧ pio ju̧i̧iäpȩmo̧ go̧a̧ji̧ri̧ oa ta̧rëa̧requedejȩrȩ. Daburo cjo̧ro̧ji̧ri̧ pio ji̧ri̧, a̧dëräpȩ cjiaji̧ri̧ pio ji̧ri̧, dabu ëteräpȩ cjiaji̧ri̧ pio ji̧ri̧ ta̧rëa̧requedejȩrȩ, ui ëteräpȩ cjiaji̧ri̧ pio ji̧ri̧bo. Ütëbodäräti̧ oa ta̧rëa̧requedejȩrȩ Ütë tjamo̧ ju̧i̧iäpȩmo̧ go̧a̧ji̧ri̧ oa. Ja̧di ta̧rëri̧ go̧a̧reji̧ri̧dirȩ: “Ütërë charea̧räpȩ chamȩ pio ju̧i̧iäpȩmo̧ go̧a̧rea̧ro̧jo̧ȩ. Ado Oveja pëi̧ chjamȩmi̧ da pio ju̧i̧iäpȩmo̧bo go̧a̧rea̧ro̧jo̧ȩ. Ji̧dë ma chjacjiamȩri̧ jo̧rȩtaji̧ri̧rȩ ni̧bäpea̧de pio ji̧ri̧iäpȩmo̧, a̧dë chjäte tatari̧ cjiaji̧ri̧ pio ji̧ri̧iäpȩmo̧. Bucho ana̧ ba chia jo̧rȩtapea̧de a̧dë chjäte ju chiaji̧ri̧ pio ji̧ri̧iäpȩmo̧. Pio ji̧ri̧iäpȩmo̧ bucho ana̧ chjacjiamȩri̧ jo̧rȩtapea̧de, jo̧rȩtadëpe bagarea̧ decjiari̧.” Aja̧ ja̧di ta̧rëri̧ go̧a̧ji̧ri̧ oa ta̧rëa̧requedejȩrȩ.
Sanasan