Lucas 16:8 - Biblia Pume

⁸ Ado ji̧dë duri oa bë ana̧mȩ pio judi dabamȩpea̧rä, jibëa̧ bë jidaremȩ pio judi japea̧ pio ju̧i̧ chjiari dabamȩpea̧rä, jabechji̧ ana̧ri̧ jo̧rȩtamȩpea̧de. 'Chia chia, ca̧ mu̧i̧tjoi̧remȩ üdë pio coaiäpȩmo̧ chjai̧dëri̧ japea̧räbo, pio coa u̧i̧pea̧räbo, 'jabechji̧ na̧e chia tjamo̧mȩrȩ japea̧dida, pio coaiäpȩmo̧ bacjiareji̧ri̧ pio judiro̧ pio jȩaiäpȩmo̧ ano̧ mire cjäri̧ri̧ cjia dapea̧ oa japea̧diji̧ri̧da, jabechji̧ judiro̧ pio coaiäpȩmo̧ bacjia̧ pio ju̧i̧ cjatäpami̧ dari̧ japea̧diji̧ri̧da, jabechji̧ jënȩ ji̧dë duri oa chjadëri̧ cjo̧ro̧rea̧ dapea̧ oa järi tjamo̧mȩpea̧dida, jabechji̧ judi ji̧dë duri oa cjo̧ro̧rea̧räpȩ dadëmȩrȩ cjiadiächea oa oëadëmȩ tjamo̧dida' quëna̧ jo̧rȩtamȩpea̧de bë ana̧mȩ judi pio ju̧i̧ chjiari —yo̧mȩrȩ ja̧di ta̧rëri̧ ni̧bä chjaorëremȩdejȩrȩ Jechu judi. Ado Jechu judi, jënȩ pea yo̧a̧ pio ju̧i̧ chjiari ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧a̧dejȩrȩ: —Aja̧ ca̧ pumȩ, dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧, dëdë, oëadëji̧ri̧dirȩ —yo̧a̧dejȩrȩ—. Järi tjamo̧ji̧ri̧pe bagarea̧ chiadirȩ. Jabechji̧ pio yoa chirirä chjadëri̧ cjo̧ro̧pea̧ ji̧, ji̧dë duri oa ma̧na̧pamȩ japamitërä chjadëri̧ cjo̧ro̧pea̧ ji̧, dëdë, järi tjamo̧dirȩ davä. Jabechji̧ tata u̧ri̧ pio ji̧ri̧iä ji̧dë u̧i̧ na̧e chiadirȩ pio jënȩro̧ cjäri̧ ja̧boji̧ri̧rȩ cjo̧ro̧chea oa, pumȩ judiro̧ pio jibëiäpȩmo̧ ji̧dë ma cjäri̧ri̧ cjia dapea̧ oa.

Lucas 16:8 Iomraidhean Croise

Taruparea̧ Ma̧ȩ 3:1

Ado Jeova Ütë judi chirirä cjo̧ro̧ji̧ri̧ pio ji̧ri̧ chjö̧na̧i̧ oa pareaparërea̧ ji̧, jabechji̧ po pio judi o ji̧ri̧iä ji̧dë u̧i̧ oëadëmȩrȩ cjo̧ro̧rëremȩde. Chirirä cjo̧ro̧ji̧ri̧ pio ji̧ri̧iä ji̧dë u̧i̧ järimȩrȩ cjo̧ro̧rëremȩde, o ji̧ri̧ u̧i̧pe ni̧bärea̧mi̧ dari̧. Ado ja̧dëa ji̧ ado cja̧rȩmo̧ doremȩrä po pio judi, oëadëmȩ tjamo̧ pio judi ja̧di ta̧rëri̧ iëno̧ë ta̧rërëremȩdejȩ iei̧ ji̧: —"Tjadoräpȩ cjiamȩ to üdë cja̧rȩmȩrȩ juradëpea̧de" ¿tjamo̧ri̧ yo̧dëa̧di Ütë tjamo̧ judi? —yo̧mȩrȩ iëno̧ë ta̧rëa̧dejȩ.

Go̧dürea̧ Ma̧ȩ 1:10

Jabechji̧ ibë eadëji̧ri̧ judiro̧ pio ibëiäpȩmo̧ acji jana̧rä judi, jabechji̧ pio judiro̧borë acji jana̧pai̧ dadiro̧ibe pio ji̧ri̧ nö̧ta. Aja̧, ibë eadëji̧ri̧ pio ji̧ri̧ a̧dopai̧ dadiro̧jȩrȩ pio ibë boadäräpea̧ oa. Ado ibë boadärä ëte pio yoa chiriri pio judiri goadi a̧dë baäpai̧ dadiro̧ibe. Ja̧di tara järipea̧ chiarea̧rȩ. Na̧e chiapea̧ chiarea̧rȩ. Ado a̧ro̧rȩ chjadëri̧ ütarë jo̧rȩta̧mi̧ japatäreji̧ri̧rea̧ro̧jȩrȩ pio judiro̧ ibë eami̧ oa japachea oa —yo̧mȩrȩ yo̧rëremȩdejȩrȩ jibëa̧ pumȩ ji̧ri̧ ejitoräpȩ cjo̧ro̧mȩ ütë judi.

Mateo 12:32

Jabechji̧ eami̧ pumȩ üdë pio coaiiäpȩmo̧ chjai̧dëri̧ ni̧bärä judi, Pumȩrȩ Ara̧ Tjamo̧mȩ pio coaiäpȩmo̧ chjai̧dëri̧ ni̧bärä judi, dëdë, duridëparȩa̧ oa cjiapai̧ dade, jënȩ ano̧ mire jo̧rȩtamȩpea̧rä judi. Jabo eami̧ pumȩ üdë Tjo tjamo̧ pio ju̧i̧iäpȩmo̧ chjai̧dëri̧ ni̧bärä judi, jabechji̧ duridëparȩa̧ oa cjiadëpade. Tjamo̧ davä. Eami̧ pumȩ judiro̧ pio yoa japamitërä Tjo tjamo̧ pio ju̧i̧ ji̧dë ma jiadarä judi, jabechji̧ duridëparȩa̧ oa cjiadëpade. Ado ji̧dë duri oa ma̧na̧pamȩ cjiadiärea̧ japamitërä cjo̧ro̧pamȩ pio judiborë duridëparȩa̧ oa cjiadëpade peaja̧di. Tjamo̧ davä. Judi Tjo tjamo̧ pio ju̧i̧ ji̧dë ma jiadarä judi, jabechji̧ duridëparȩa̧ oa cjiadëpade ⁠—⁠yo̧mȩrȩ yo̧rëremȩdejȩrȩ pjaricheo pio ji̧ri̧iäpȩmo̧ Jechu judi. Aja̧, pjaricheo judiro̧ Jechu pio ju̧i̧ chjiari oëra̧ yo̧a̧ oaiä, Tjo tjamo̧ pio ju̧i̧iäpȩmo̧bo chjai̧dëri̧ ni̧bämi̧ dari̧ yo̧a̧ oaiä, ja̧di ta̧rëri̧ yo̧rëremȩdejȩrȩ. Jabechji̧ “Ichiae pio judi ju chiarea̧ yürüa̧ oaiä yaröca pio ji̧ri̧ baä tänȩmȩde” yo̧mȩ ma̧ȩ pio ju̧i̧ yo̧a̧ oaiä, dëdë, Tjo tjamo̧ pio ju̧i̧iäpȩmo̧ chjai̧dëri̧ ni̧bärëreji̧ri̧diro̧jo̧ȩ. Ado pio ju̧i̧iä ja̧di ta̧rëri̧ yo̧rëremȩdejȩrȩ Jechu judi duridëparȩa̧ oa cjiapea̧ pio ju̧i̧ chjiari.

Mateo 17:26

Ado Pedro judi dëbë yo̧a̧dejȩ: ⁠—⁠Yö̧ta dari̧ jo̧rȩtadë, jabechji̧ jibëa̧ u̧ri̧dë pio ji̧ri̧iä boa chjao jirodirȩ. Ado Pedro judi ja̧di ta̧rëri̧ dëbë yo̧a̧ oaiä, “Jibëa̧ u̧ri̧dë pio ji̧ri̧iä boa chjao jirodirȩ” dëbë yo̧a̧ oaiä, jabechji̧ ja̧di ta̧rëri̧ dëbë yo̧a̧dejȩ Jechu judi: ⁠—⁠Ja̧dirä judi chiri ütë cjo̧ro̧ji̧ri̧ ja̧ u̧ri̧ pio judiro̧ ba ano̧dëpea̧ chiadirȩ jabechji̧. Ado peaja̧direa̧rȩ a̧ro̧rȩ ⁠—⁠yo̧a̧dejȩ⁠—⁠. Jabechji̧ Ütë tjamo̧ pio ju̧i̧ ja̧ u̧ri̧rea̧rȩ. Pio ju̧i̧ ja̧ u̧ri̧dë ma ja̧didë, jabo pio ju̧i̧ ja̧ u̧ri̧rea̧rȩ. Ado pio ju̧i̧iä jabechji̧ ba ano̧dëpea̧ chiarea̧rȩ, judiro̧ Ütë tjamo̧ ja̧ bë oa jida̧ ba oa. Judi jibëa̧ u̧ri̧dë pio ji̧ri̧iämo̧i̧ cjo̧dëa̧ oaiä, jibëa̧ u̧ri̧ pio ji̧ri̧iä cjo̧dëdë oaiä, jabechji̧ ba ano̧dëpea̧ chiarea̧rȩ.

Lucas 16:10

Ado jibëa̧ jadü ji̧ri̧ ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi: —Danȩrȩ, mȩnȩro̧ Ütërë yo̧a̧mi̧ chjadëri̧ japarä judi, jabechji̧ ji̧dë u̧i̧ ana̧mi̧ da pio ju̧i̧bo japa tänȩpai̧ dadidibe Ütë tjamo̧ judi. Tjamo̧ davä. Mȩnȩro̧ Ütërë yo̧a̧mi̧ chjadëri̧ ja̧beparä judi, eami̧ ja̧beparea̧ boi̧chji̧mi̧ da pio ju̧i̧ chjadëri̧ japarä judi, jabechji̧ ji̧dë u̧i̧ ana̧mi̧ da pio ju̧i̧bo jabepa tänȩpai̧ dadidibe. Jabo danȩrȩ, mȩnȩro̧ Ütërë yo̧a̧mi̧ japadërä judi, eami̧ ja̧beparea̧ boi̧chji̧mi̧ da pio ju̧i̧ chjadëri̧ japadërä judi, jabechji̧ ji̧dë u̧i̧ ana̧mi̧ da pio ju̧i̧bo jabepa tänȩtärea̧ ji̧, cjäri̧ madidibe, ja̧bepa tänȩdëpadidibe. Tjamo̧ davä. Pio jiro ja̧beparea̧ ana̧mi̧ da pio ju̧i̧bo a̧de yürüdëpadidibe.

Lucas 16:4

Ja̧dëa ji̧ judi ana̧ri̧ jo̧rȩtarërea̧ ji̧, jabechji̧ chjaodëri̧ idëpea̧dejȩ jibëa̧ chji̧rä jo̧rȩtarea̧ üdë, o judiro̧ pio jȩaiäpȩmo̧ cjäri̧ cjia dapea̧ jo̧rȩtarea̧ üdë. 'Aja̧, ja̧di dari̧ japatäremȩquëda, chja ja̧di ca̧ ano̧mȩ pio ju̧i̧iäpȩmo̧ bacjiaji̧ri̧ pio ji̧ri̧ pio coaiäpȩmo̧ ano̧ mire bacjiami̧ dari̧ cjiapea̧ oa japatäremȩquiji̧ri̧da, jabechji̧ judiro̧ pio coa cjäri̧ri̧ cjia dapea̧ oa, ca̧ ano̧mȩ pio judi coa aeno̧a̧ duri oa pio coa cjäri̧ri̧ cjia dapea̧ oa, ado pio coa nö̧ta chjadëri̧ ëba cjo̧ro̧pea̧ oa japatäremȩqui̧ji̧ri̧da' quëna̧ jo̧rȩtamȩpea̧de, järi tjamo̧mȩpea̧mȩrȩ.

Lucas 16:7

Ado ja̧dëa ji̧ ji̧dë duri oa jana̧mȩ pio ju̧i̧ peaja̧di yo̧a̧dejȩ: "Danȩ, ¿napai̧ bacjiarenȩjo̧ȩ ca̧ ano̧mȩ ju̧i̧" iëno̧ë ta̧rëa̧dejȩ. Ado jana̧mȩ judi: "Napai̧dë, jabechji̧ tirigo cho ji̧ra̧ tjamo̧ oa bacjiareconȩ, 100 saco oa" dëbë yo̧a̧dejȩ. Ja̧dëa ji̧ tjamo̧ jidamȩ pio judi yo̧a̧dejȩ: "Danȩ, mȩnȩ gatërërea̧ go̧ȩ irä ano̧ mire go̧ȩpajo̧ȩ. Jabechji̧ 80 ütararea̧ra̧ ano̧ mire go̧ȩpavä. Jabechji̧ mȩnȩ ca̧ ano̧mȩ pio ju̧i̧ 100 saco oa bacjiarërea̧ ji̧, 80 saco maea oa bacjiarenȩjo̧ȩ yaba̧" yo̧a̧dejȩ. Aja̧, judiro̧ bë ano̧mȩ pio ju̧i̧ ji̧ra̧ tjamo̧ oa bacjiarërea̧ ji̧, jabechji̧ ba cjatäpa tänȩrëremȩdejȩrȩ judiro̧ ütëbo bacjiachea oa, judiro̧ o oamo̧ bacjiapea̧ oa. Aja̧, ja̧di maeari̧ japarëremȩde bë tjamo̧ jidamȩ judi pio jȩaiäpȩmo̧ cjäri̧ri̧ cjia dapea̧ oa.

Lucas 18:6

Ado Ano̧mȩ pio judi pio jiro ma̧ȩ oa ja̧di ta̧rëri̧ ni̧bä chjaoa̧ duri oa, pio yoa ma̧ȩbo a̧de ni̧bä chjaorëremȩdejȩrȩ: —Danȩrȩ ca̧ jadü, chjadëri̧ dabapachji̧vä tjamo̧ ütarë yo̧mȩ pio ju̧i̧iä, coëma cjiari̧ ütarë yo̧dëmȩ pio ju̧i̧iä —yo̧a̧dejȩrȩ—.

Lucas 20:34

Jabo Jechu judi dëbë yo̧rëremȩdejȩrȩ: —Danȩrȩ, ëbarea̧ üdë dai chirirä ja̧ji̧ri̧ pio ji̧ri̧ ja̧ maeade —yo̧a̧dejȩrȩ—. Pio yoa dabu oa cjaeäji̧ri̧ pio ji̧ri̧ ja̧ maeade.

Lucas 20:35

Jabechji̧ ma̧na̧pamȩ japamitërä a̧dëräpȩ cjo̧ro̧paji̧ri̧ pio judiro̧, cjäri̧ madirȩ, ëbarea̧ dadëpadirȩ. Jabechji̧ ja̧borëreji̧ri̧ pio judiro̧ bëdüa̧rä, a̧dëräpȩ cjo̧ro̧pea̧ ji̧ nö̧taji̧ri̧ pio judiro̧ bëdüa̧rä, jabechji̧ ado judiri ëbadë mapadirȩ.

Juan 12:36

Pio ju̧i̧iä yo̧requededibe. Tatami̧ damȩ pio judi pio dibëdi jabë ëba cjo̧ro̧a̧ nö̧ta, jabechji̧ quëna̧chji̧jo̧ȩ. Ado coaiäpȩmo̧ quëna̧ji̧ri̧ judiro̧, tata u̧ri̧ maearë cjo̧ro̧padirȩ —yo̧mȩrȩ yo̧rëremȩdejȩrȩ Jechu judi. Jechu judi ja̧di ta̧rëri̧ yo̧ ëte, a̧dë baärëremȩdejȩrȩ pumȩ ji̧ri̧ jibëa̧ma̧i̧ cjiapea̧ oa, pumȩ pio ji̧ri̧ a̧dë goadipea̧ oa.

Cori̧tio Ma̧ȩ 1 3:18

U̧i̧pea̧ oa cjiadëchji̧vä mȩnȩro̧ dabapea̧ ma̧ȩ pio ju̧i̧ chjiari. Pio yoa chirirä ja̧ jo̧rȩtarea̧ ji̧ra̧ tjamo̧ oa dabapea̧ oaiä, u̧i̧pea̧ oa cjiadëchji̧vä. Ado pio ju̧i̧iä yo̧requededibe ca̧ oti̧. Danȩrȩ, mȩnȩro̧ pio yoa chirirä ja̧ jo̧rȩtarea̧ ji̧ra̧ tjamo̧ oa dabapea̧rä judi, mȩnȩro̧ dai chirirä ja̧ jo̧rȩtaji̧ri̧ pio ji̧ri̧iä ji̧dë u̧i̧ dabapea̧rä judi, jabechji̧ pio ji̧ri̧iä tjamo̧ri̧ dabadëji̧ri̧pe bagami̧ dari̧ poë ae jo̧rȩtatäreji̧ri̧nȩrȩ ca̧ oti̧ badë jo̧rȩtarea̧ pio ju̧i̧. Tjamo̧ davä. Poë ae jo̧rȩtatäreji̧ri̧nȩrȩ mȩnȩro̧ a̧dë chjäte ba chiamȩ jo̧rȩtarea̧ra̧ pio ju̧ri̧ra̧ ano̧ mire jo̧rȩtapea̧ oa, mȩnȩro̧ Ütë tjamo̧ pio judiri ma̧na̧mȩ jo̧rȩtarea̧ maeara̧ ano̧ mire jo̧rȩtapea̧ oa, no̧mȩ ja̧ jo̧rȩtarea̧ pio ju̧i̧ boë cjaeä jo̧rȩtapea̧ oa.

Epjecho Ma̧ȩ 5:8

Jabo pearä judi, dëdë, mȩnȩro̧ bagönȩmi̧ darä cjo̧ro̧rëreji̧ri̧nȩrȩ, jabo ja̧didënȩrȩ yaba̧. Jabechji̧ Ano̧mȩ pio judiri ja̧ mapea̧renȩrȩ. Tatarä cjiami̧ dari̧ ano̧ mire cjo̧ro̧ji̧ri̧pea̧nȩrȩ. Ado tataräji̧ri̧mi̧ dari̧ cjiaji̧ri̧pea̧ oaiä, jabechji̧ tata u̧ri̧mi̧ dari̧ cjo̧ro̧chji̧vä.

Pjiripo Ma̧ȩ 3:19

Jabechji̧ a a ma cjiarea̧räpȩ aeno̧a̧ oa cjiapadirȩ jënȩro̧ ma̧i̧ dari̧ japea̧ oaiä. Jabechji̧ jibëa̧ icjararä chjai̧dë pio ju̧i̧ ütëmi̧ da oa ta̧rëdiä chjaodiro̧jo̧ȩ, idi̧ da maea oa japaji̧ri̧rȩ. Jënȩro̧ chjai̧dëri̧ jo̧rȩta̧mi̧ jape chjaodirȩ. Ado judiro̧ ma̧i̧ dari̧ japea̧ oaiä idëri̧ cjiatärea̧ ji̧, oëadëji̧ri̧ maearë jape chjaodirȩ, idëri̧ cjiarea̧ taradëji̧ri̧rȩ. Jabechji̧ judiro̧ chjai̧dëri̧ japea̧ pio ju̧i̧ chjiari goaeri̧ yo̧ chjaodirȩ jibëa̧ chji̧rämo̧ jo̧rȩtaji̧ri̧rȩ. Dai chirirä ja̧ maea oa jo̧rȩtaji̧ri̧rȩ cjo̧ro̧dirȩ.

Techaronichȩche Ma̧ȩ 5:5

Jabechji̧ tata u̧ri̧ marea̧rȩ. Doro ja̧ji̧ri̧ maearea̧rȩ. Ado tatarä jämi̧ dari̧ cjo̧ro̧rea̧rȩ, Ütë tjamo̧ ja̧ ma̧ȩ oa dabaji̧ri̧rȩ. Tjamo̧ davä. Bagönȩ u̧ri̧dërea̧rȩ. Gȩnȩrä jämi̧ dari̧ cjo̧ro̧dë marea̧rȩ, jabo chjadëri̧ damirerea̧mi̧ daräpȩ cjo̧ro̧rea̧rȩ, coëma cjiari̧ dabarea̧räpȩ.

Pedro Ma̧ȩ 1 2:9

Jabo cjäri̧ manȩrȩ ca̧ oti̧. Ja̧di dari̧ cjiadiädëa̧nȩrȩ. Ta̧dëmi̧ damȩ pio ju̧i̧iä ta ano̧e cjatäji̧ri̧ pio judiro̧dënȩrȩ, jabo Ütërë mitërërea̧ pumȩ pio judiro̧nȩrȩ. Ibëa̧ Ütë pio ju̧i̧ ja̧ oa goë tuti ja̧bepaji̧ri̧ pio judiro̧nȩrȩ. Tjamo̧ davä. A̧dë chjäte Ütë pio judi mitëa̧ oa, pio ju̧i̧ ja̧ oa goë tuti ja̧bepaji̧ri̧nȩrȩ. Aja̧, Ütë tjamo̧ pio ju̧i̧ cäë yürümi̧ dari̧ japaji̧ri̧ pio judiro̧nȩrȩ mȩnȩro̧ pio ju̧i̧ ja̧ pumȩpea̧ tara. Jabechji̧ pio ju̧i̧ ja̧ pumȩpe bagarea̧mi̧ dari̧ china̧chjari̧ tutirëremȩdidibe. Danȩrȩ, mȩnȩro̧ a̧dë chjäte bagönȩmi̧ daräpȩ cjo̧ro̧rërea̧ ji̧, ëna̧diärëremȩdidibe mȩnȩro̧ a̧dë chjäte tatami̧ daräpȩ ano̧ mire cjo̧ro̧pea̧ oa, mȩnȩro̧ pio ju̧i̧ chjiari ni̧bä chjaopea̧ oa, judi pio dibë chjiari chjadëri̧ tuti japea̧ pio ju̧i̧ chjiari ni̧bä chjaopea̧ oa. Aja̧ ca̧ oti̧, pio ju̧i̧ ja̧ pumȩ tjamo̧pea̧nȩrȩ.

Juan Ma̧ȩ 1 3:10

Ado pio ju̧i̧iä chjaodëri̧ dabarea̧mi̧ dade ca̧ oti̧. Tjamo̧ davä. Ütë tjamo̧ ja̧ u̧ri̧ pio ji̧ri̧ chjiari, Ichiae ja̧ pumȩ pio ji̧ri̧ chjiari, chjaodëri̧ dabarea̧mi̧ dade. Chjaodëri̧ ütarë darea̧mi̧ dade. Jabechji̧ coëma cjiari̧ cjo̧ro̧dëji̧ri̧ pio judiro̧, jibëa̧ pumȩ pio ji̧ri̧ ea tjamo̧dëji̧ri̧ pio judiro̧, jabechji̧ Ütë tjamo̧ ja̧ u̧ri̧ tjamo̧dëdiro̧da’ quëna̧ dabarea̧mi̧ dari̧ ütarë darea̧ro̧jȩrȩ.