Lucas 16:2 - Biblia Pume

² Ado pio ju̧i̧iä pio jȩaiäpȩ jätä yo̧ chjadüa̧dejȩ jibëa̧ bë jidamȩ pio ju̧i̧. Ado pio jȩaiäpȩ go̧düdäräa̧rä, jabechji̧ cuchu chiadëri̧ iëno̧ë ta̧rëa̧dejȩ: "Danȩ, mȩnȩ ji̧dë u̧i̧ baë mitëa̧ pio ju̧i̧ chjiari ta̧rëa̧requedemȩ" yo̧a̧dejȩ. "Jabechji̧ ca̧ chëre oa chjadëri̧ jidatärea̧ ji̧, cüdë goa̧ pio ju̧i̧ chjadëri̧ jidatärea̧ ji̧, cjäri̧ marenȩ, chjadëri̧ jidadëmȩrenȩ jabo ji̧dë u̧i̧ baë mitëa̧renȩque ji̧dëri̧. Ado pio ju̧i̧iä jabechji̧ aeno̧parequedemȩ yaba̧, mȩnȩ ca̧ea̧ oa ja̧bepë yürürea̧mi̧dëpe bagari̧. Jabechji̧ mȩnȩ chjadëri̧ jidadë tara, baä tänȩparequedemȩ. Jabo mȩnȩ baäbea yaboi̧, jabechji̧ mȩnȩ ja̧bepea̧ pio ju̧i̧, mȩnȩ jida̧ pio ju̧i̧ chjadëri̧ ütarë go̧ȩpatä earequedemȩ chjö̧na̧i̧ oa. Aja̧, mȩnȩ pumȩ pio ji̧ri̧iä mitëa̧ chëre pio ju̧i̧, mȩnȩ pumȩ pio ji̧ri̧iäpȩmo̧ ba ano̧a̧ chëre pio ju̧i̧ ado mȩnȩ baë mitëa̧ chëre pio ju̧i̧ chjadëri̧ ütarë go̧ȩpatä earequedemȩ, a̧dë cjiadiärea̧ decjiari̧. Jabechji̧ ca̧ea̧remȩ pio ju̧i̧ jidadëparenȩque yaba̧" yo̧mȩrȩ yo̧rëremȩdejȩ bë ana̧mȩ judi tjamo̧ jidamȩ pio ju̧i̧iäpȩmo̧.

Lucas 16:2 Iomraidhean Croise

Mateo 12:36

Danȩrȩ ca̧ pumȩ, chjadëri̧ jo̧rȩtachji̧vä cüdë dibë yo̧a̧ pio ju̧i̧ ⁠—⁠yo̧a̧dejȩrȩ⁠—⁠. Mȩnȩro̧ eami̧ ma̧ȩ teracaba oa ni̧bäa̧ ba oa, eami̧ ma̧ȩ chjai̧dë oa ni̧bäa̧ ba oa, jabechji̧ bape chjaorea̧ doro ütara̧ oa cjiapanȩrȩ. Pio ju̧i̧iä teracabari̧ ni̧bädëtäreji̧ri̧nȩrȩ.

Mateo 20:8

Ado ja̧dëa ji̧ gȩnȩpea̧rä, tjado ana̧mȩ judi yo̧rëremȩdejȩ jibëa̧ mu̧i̧tjoi̧ tjamo̧ pio ju̧i̧: "Danȩ, ëna̧diäeno̧jȩrȩ ja̧bepaji̧ri̧ pio ji̧ri̧" yo̧a̧dejȩ. "Ado ütëbodärä oa ba ano̧jȩrȩ. Tarupë ba ano̧jȩrȩ pio yabo ja̧bepareji̧ri̧ pio ji̧ri̧. Ji̧tärä tarupareji̧ri̧ pio ji̧ri̧ yabochja tarupë ba ano̧jȩrȩ. Ado pio ji̧ri̧ ba ano̧a̧ duri oa, pio ji̧ri̧ ja̧ yaboi̧ jana̧reji̧ri̧ pio ji̧ri̧ ba ano̧jȩrȩ. Ado pio ji̧ri̧ ba ano̧a̧ duri oa, pio ji̧ri̧ ja̧ yaboi̧ jana̧reji̧ri̧ pio ji̧ri̧ ba ano̧jȩrȩ. Ja̧di ma ja̧di ma ba ano̧tä earequedemȩ. Jaevä" yo̧a̧dejȩ.

Lucas 12:20

Jabo Ütë tjamo̧ judi yo̧rëremȩdejȩ ji̧ra̧ri̧ goamȩ pio ju̧i̧iäpȩmo̧: —Cjäri̧ marenȩ, japëtaramȩrenȩ —yo̧a̧dejȩ—. Pio yaba̧ gȩnȩrä ja̧boparenȩ. Ado judirä mȩnȩ goa̧ pio ju̧i̧, ¿chjiarë ano̧ mire mitëpadejȩ mȩnȩ goa̧rea̧ pio ju̧i̧? Ado yaba̧ mȩnȩ ja̧boa̧ duri oa, mȩnȩ boea̧ pio judi ¿a̧dodëjadimȩ? Cjäri̧ madimȩ, a̧dodëjadimȩ —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi chjadëri̧ jo̧rȩtadëmȩ pio ju̧i̧ chjiari.

Lucas 12:42

Ado Ano̧mȩ judi dëbë yo̧a̧dejȩ: —Jabechji̧ Ano̧mȩ tjamo̧ pio ju̧i̧ ta̧rëdiäji̧ri̧ pio ji̧ri̧ ja̧ maeade jiro ma̧ȩ üdë —yo̧a̧dejȩrȩ—. Danȩrȩ, eami̧ bë ana̧mȩ judi jibëa̧ bë oa a̧dë baäbea yaboi̧, japamitë ana̧ri̧ tai̧pea̧ oa baäbea yaboi̧, jabechji̧ tjamo̧ ja̧bepamȩ mu̧i̧tjoi̧ chjadë pio ju̧i̧ mitëpade. Jabo ¿chjia oa mitëtäremȩde? Chjia oadë, jabechji̧ jënȩ yo̧a̧mi̧ chjadëri̧ ta̧rëdiämȩ pio ju̧i̧ mitëtäremȩde. Urëdi tjamo̧ oa jo̧rȩtamȩ pio ju̧i̧ mitëtäremȩdejȩ, chjadëri̧ ütara̧mi̧ ja̧bepapamȩ pio ju̧i̧. Jabechji̧ pio jȩa nö̧ta ëba ja̧bepaji̧ri̧ pio ji̧ri̧ doti̧mi̧ chjadëri̧ ëba jurapamȩ pio ju̧i̧, jurarea̧ pio ju̧i̧ ütara̧mi̧ yürüpamȩ pio ju̧i̧ mitëtäremȩdejȩ.

Lucas 16:1

Ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi na̧rȩrea̧ ma̧ȩmi̧ dara̧: —Danȩrȩ, chëre ji̧ra̧ri̧ goamȩ pio judi, bë ano̧mȩ pio judi cjo̧ro̧rëremȩde, jibëa̧ bë jidamȩ pio ju̧i̧ goamȩrȩ. Ado bë jidamȩ pio judi jabechji̧ chjö̧na̧i̧ oa jidamȩrȩ cjo̧ro̧rëremȩde bë ano̧mȩ ja̧ oa, chëre ji̧ra̧ tjamo̧ pio ju̧i̧bo. Jabo bë ano̧mȩ pio judi pumȩ pio ji̧ri̧iä goë ta̧rëa̧ oaiä, bë jidamȩ pio ju̧i̧ chjiari goë ta̧rëa̧ oaiä, 'ä, garümȩdida, ca̧ chëreremȩ pio ju̧i̧ ji̧dë ma baë mitëdiji̧da, chjadëri̧ jidatärea̧ ji̧ chjadëri̧ jidadëdiji̧da, ji̧dë ma baë mitëdiji̧da' quëna̧ jo̧rȩtamȩpea̧de bë jidamȩ pio ju̧i̧ chjiari goë ta̧rëa̧ oaiä.

Lucas 16:3

Ado bë jidamȩ judi pio ju̧i̧ ta̧rëa̧ oaiä, ana̧ tjamo̧ri̧ jo̧rȩtamȩpea̧de. 'Chia chia, bë ano̧mȩ pio judi aeno̧padicoada yaba̧, ¿tjana̧ oa ano̧ mire japatäremȩquëda, cjäri̧ maquëda, ado cja̧rȩmo̧ oa ano̧ mire ja̧beparea̧mi̧dëquëda, palara̧ jäerea̧mi̧dëquëda, ado chëre ji̧ra̧ri̧ goaji̧ri̧ pio ji̧ri̧iä cjo̧dëdëri̧ cjiaquëda, jabechji̧ pio ji̧ri̧iä eoparea̧mi̧dëquiji̧ri̧da, ¿tjana̧ oa ano̧ mire ja̧bepatäremȩcjivaquë, japarea̧ decjiaquëda' quëna̧ jo̧rȩtamȩpea̧de, idëri̧ cjiamȩrȩ, bücjüri̧ cjia tjamo̧mȩrȩ.

Domano Ma̧ȩ 14:12

Ado pio ju̧i̧iä tjamo̧ri̧ dabarea̧rȩ Ütë tjamo̧ judi ibë ütarapea̧ pio ju̧i̧ chjiari. Tjamo̧ davä. A̧ro̧rȩ ütëbodärärë ütara̧ doro, pio ju̧i̧ ja̧ dëbëräpȩ cjiaparea̧rȩ judi ibë ütarapea̧ oa, ibë iëno̧ iëno̧ cjiapea̧ oa. Ado ibë iëno̧ iëno̧ ta̧rëmȩ pio ju̧i̧ dëbë yo̧parea̧ro̧jo̧ȩ davä, a̧ro̧rȩ japea̧ pio ju̧i̧ chjiari.

Cori̧tio Ma̧ȩ 1 1:11

Jabechji̧ ja̧di ta̧rëri̧ yo̧mȩrȩ go̧ȩpe chjadürequededibe ca̧ oti̧, cüdë pio dibë chjiari goë ta̧rëa̧ oaiä. Jabechji̧ Coroe quȩyi̧ pio ji̧ ja̧ pumȩ pio ji̧ri̧iä, o ji̧ri̧iä goë ta̧rëa̧requede mȩnȩro̧ dibëa̧ dëbëti̧ra̧ chia ni̧bäta̧bea pio ju̧i̧ chjiari, mȩnȩro̧ jadüchiami̧ bubami̧ dari̧ goëdëri̧ cjia̧bea pio ju̧i̧ chjiari.

Cori̧tio Ma̧ȩ 1 4:2

Ado danȩrȩ, jidaji̧ri̧mi̧ dari̧ ja̧bepaji̧ri̧ pio judiro̧, bë oa jidaji̧ri̧mi̧ dari̧ ja̧bepaji̧ri̧ pio judiro̧, jabechji̧ nö̧tadäräri̧ ta̧rëdiäji̧ri̧rȩ ja̧bepatäreji̧ri̧dirȩ bë ano̧mȩ pio judi yo̧a̧mi̧.

Cori̧tio Ma̧ȩ 1 4:5

Ja̧di tara ca̧ oti̧, ibëa̧ Ano̧mȩ judi ibë ütarapea̧ oa jabë jana̧dëa̧ tara, jabechji̧ ibëa̧ oti̧ judiro̧ jo̧rȩta̧ pio ju̧i̧ chjiari jabërä ütarë yo̧dëtäreji̧ri̧rea̧rȩ. Jabechji̧ a̧ro̧rȩ ji̧ri̧ ja̧ chji̧räpȩmo̧ cjacjarë darea̧ chia ma ja̧didë. Jabo ibëa̧ Ano̧mȩ pio judi jana̧rä, urëdi tjamo̧ oa cjacjarë damȩrȩ ütarapadiibe ibëa̧ chji̧ oa, a̧ro̧rȩ jo̧rȩta̧ pio ju̧i̧. Jabechji̧ a̧ro̧rȩ jo̧rȩta̧ pio ju̧i̧, a̧ro̧rȩ jo̧rȩtariä ja̧bepea̧ pio ju̧i̧ ütarapadiibe, a̧ro̧rȩ goadi jo̧rȩtarërea̧ pio ju̧i̧. Jabechji̧ ibëa̧ chji̧rä urëdi tjamo̧ oa charërea̧ pio ju̧i̧, a̧ro̧rȩ eami̧ oa japea̧rä jo̧rȩtarërea̧ pio ju̧i̧ ütarapadiibe, chjadë maearä cjia tänȩrea̧mi̧ dari̧. ‘Aja̧, ja̧di dari̧ jo̧rȩtamȩrȩ ja̧bepea̧dida, pio ju̧i̧mo̧i̧ jo̧rȩtamȩrȩ japea̧dida, pumȩ judiro̧ pio jȩaiäpȩmo̧ chjacjiamȩri̧ jo̧rȩtapea̧ oa japea̧dida, jabomo̧ bacjiami̧ dari̧ a̧dorëremȩdiji̧ri̧da, jabo tjaoërä, dëdë pio coamo̧ ta̧rëdiätämi̧ cjiamȩrȩ a̧dorëremȩdiji̧ri̧da’ quëna̧ dabamȩrȩ ütarë yo̧padiibe Ano̧mȩ judi, a̧ro̧rȩ ibëa̧ chji̧ra̧ jo̧rȩtarërea̧ pio ju̧i̧. Ado ja̧dëa ji̧ Ütë tjamo̧ pio judi chjacjiamȩri̧ ni̧bäpade pio ibë chjiari. Tjamo̧ davä. Quëna̧ji̧ri̧ pio judiro̧ ütëborë chjadëri̧ jo̧rȩta̧ ba oa chjacjiamȩri̧ ni̧bäpade pio ibë chjiari cja̧rȩmȩrȩ a̧dë cjiadiärea̧ decjiari̧. Jabo chjadëri̧ jo̧rȩtadëji̧ri̧rȩ ja̧bepaji̧ri̧ pio ji̧ri̧ chjiari, jabechji̧ judiro̧ chjadëri̧ jo̧rȩtadëa̧ ba oa chjacjiamȩri̧ ni̧bädëpade.

Cori̧tio Ma̧ȩ 2 5:10

Jabechji̧ a̧ro̧rȩ a̧dëräpȩ go̧düdäräa̧rä, jabechji̧ quëna̧ji̧ri̧ pio judiro̧ ütëborë Quiricho pio ju̧i̧ ja̧ dëbëräpȩ cjiadiäpea̧ chiarea̧rȩ pio judi ibë ütarapea̧ oa. Jabechji̧ a̧ro̧rȩ pio yoa chirirä cjo̧ro̧a̧ nö̧ta japea̧ pio ju̧i̧ ütarapadejȩ chjö̧na̧i̧ oa. Tjamo̧ davä. A̧ro̧rȩ chjadëri̧ japea̧ pio ju̧i̧ ütarapadejȩ, a̧ro̧rȩ chjai̧dëri̧ japea̧ pio ju̧i̧bo. Ado a̧ro̧rȩ japea̧ ba oa yürüpadiibe. Ado pio ju̧i̧iä järi tjamo̧täreji̧ri̧rea̧rȩ ca̧ oti̧ pio ju̧i̧ ji̧dë ma ma̧ chiadëri̧ cjiaparȩpea̧ oa, a̧ro̧rȩ pio yoa chirirä jabë cjo̧ro̧a̧ nö̧ta.

Timoteo Ma̧ȩ 1 4:14

Ado danȩ, Tjo tjamo̧ judi mȩa yürüa̧ ja̧beparea̧ra̧ pio ju̧ri̧ra̧ chjadëri̧ ja̧bepavä, daburäpȩmo̧ mu̧i̧ cürëmi̧ dari̧ japarea̧ decjiari̧. Jabechji̧ pio jiro ja̧beparea̧ oa chiamȩpea̧renȩ pio mȩa chjiari ni̧bäji̧ri̧ pio judiro̧ ni̧bärërea̧mi̧. Aja̧, Ütërë daba tänȩa̧ oa ni̧bäji̧ri̧ pio judiro̧ ni̧bärërea̧ ji̧, tjamo̧ jidaji̧ri̧ judiro̧ pio mȩa ja̧ȩ cjiadärärërea̧ ji̧, jabechji̧ pio jiro ja̧beparea̧ chiamȩpea̧renȩ Tjo tjamo̧ pio judi yürüa̧ oaiä. Ado pio ju̧i̧iä yo̧requedemȩ. Jabechji̧ a̧dë jo̧rȩtadëjo̧ȩ na̧ ja̧beparea̧ oa.

Timoteo Ma̧ȩ 1 5:24

Danȩ, o judiro̧ chjai̧dëri̧ japarä, jabechji̧ chjadë marä cjiami̧ dari̧ cjiade chjaodëri̧. Ado pio ju̧i̧iä pumȩ judiro̧, ‘Aja̧, judiro̧ chjai̧dëri̧ japea̧ ba oa bape chjaoa̧ oa cjiapadiro̧da’ quëna̧ daba maeadiro̧jȩrȩ. Jabo o judiro̧ chjai̧dëri̧ japarä, jabechji̧ goadia̧ oa cjiami̧ dari̧ cjiade. Darea̧mi̧dëri̧ cjiade. Jabo japamitë ana̧ chjätä ëte, peaja̧di chjadë marä cjiami̧ dari̧ cjiapade goadirea̧ decjiari̧.

Pedro Ma̧ȩ 1 4:10

Jabechji̧ Ütë tjamo̧ judi pio ibëiäpȩmo̧ tjaoëti̧ chia ja̧beparea̧ oa jauëchja cjiari̧ yürüa̧ oaiä, jabechji̧ a̧ro̧rȩ ütëbodärärë ibëa̧ ja̧beparea̧ chia maearea̧rȩ. Ado judi ibë jauëchja cjiari̧ yürüa̧ra̧ pio ju̧ri̧ra̧ chjadëri̧ ja̧bepatäreji̧ri̧rea̧rȩ, ibëa̧ dëbëti̧ra̧ chia chjadëri̧ a̧doji̧ri̧rȩ. Jabechji̧ Ütë tjamo̧ judi ibë cjäri̧ri̧ cjiamȩrȩ yürüa̧ pio ju̧i̧ badë jo̧rȩtadëtäreji̧ri̧rea̧ro̧jo̧ȩ, jabo chjadëri̧ ja̧bepatäreji̧ri̧rea̧rȩ daburäpȩmo̧ arë cürëmi̧ dari̧ japarea̧ decjiari̧.

Pedro Ma̧ȩ 1 4:5

Jabo danȩrȩ ca̧ oti̧, pio jiro pumȩ judiro̧ ütara̧ oa cjiapadirȩ. Tjamo̧ davä. Pumȩ pio judiro̧ ütëbodärärë Ütë tjamo̧ pio ju̧i̧ ja̧ dëbëräpȩ cjiadäräpea̧ chiadirȩ. Ado pio judi iëno̧ë iëno̧ë cjiarä, chjadëri̧ dëbë yo̧pea̧ chiadiro̧jo̧ȩ jënȩro̧ japea̧ pio ju̧i̧ chjiari, jënȩro̧ yo̧a̧ pio ju̧i̧ chjiari, jënȩro̧ pio dibëiäpȩmo̧ aechide yo̧a̧ pio ju̧i̧ chjiari. Tjamo̧ davä. Cjo̧ro̧ji̧ri̧ pio ji̧ri̧ ütëbo oa ütarapadejȩrȩ, ja̧boa̧ji̧ri̧ pio ji̧ri̧bo.

Jechurë Na̧rȩrërea̧ Ma̧ȩ 20:12

Ado ja̧boa̧ji̧ri̧ pio ji̧ri̧ chjö̧na̧i̧därä oa daea̧requedejȩrȩ. Tjamo̧ cjo̧ro̧ji̧ri̧ pio ji̧ri̧, tjamo̧ cjo̧ro̧dëji̧ri̧ pio ji̧ri̧bo daea̧requedejȩrȩ. Aja̧, Ütë ja̧ dëbëräpȩ cjiaji̧ri̧ oa daea̧requedejȩrȩ, Ütërë charea̧ ba chia ja̧ dëbëräpȩ cjiaji̧ri̧ oa. Ado ja̧dëa ji̧ daea̧requede go̧ȩ i chiamȩ joë ji̧ra̧ oa. Areia̧ oa cjia maea oa daea̧requede. Jabechji̧ pumȩ judiro̧ cjo̧ro̧a̧ nö̧ta chjai̧dëri̧ japea̧ pio judi go̧ȩpea̧ oa cjiaremȩde pio jiro joërä. Ado ja̧dëa ji̧ ado cja̧rȩmo̧ joë oa daea̧requede peaja̧di, bucho ana̧ cjo̧ro̧rea̧ chiaji̧ri̧ ja̧ quȩ chiamȩ joë pio ju̧i̧. Ado ja̧dëa ji̧ Ütë tjamo̧ judi ütara̧dejȩrȩ pumȩ ji̧ri̧. Aja̧, judiro̧ cjo̧ro̧a̧ nö̧ta japea̧ pio ju̧i̧ ütara̧dejȩrȩ.