Lucas 11:41 - Biblia Pume

⁴¹ Ado pio ju̧i̧iä yo̧requededibe —yo̧a̧dejȩrȩ—. Dibëa̧ tjori ja̧bo chjadëri̧ jidachji̧vä chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ chjadëri̧ yürüa̧ oaiä. Ado mȩnȩro̧ o ji̧ri̧iäpȩmo̧ chjadëri̧ yürüa̧ oaiä, mȩnȩro̧ dibëa̧ chji̧ra̧ chjadëri̧ jo̧rȩta ëte yürüa̧ oaiä, jabechji̧ i gȩrȩ chiamȩ ae jararea̧ pio ju̧i̧ tjori ja̧bo chjadëri̧ joami̧ dari̧ japapanȩrȩ. Tjamo̧ davä. Mȩnȩro̧ o ji̧ri̧iäpȩmo̧ tjamo̧ri̧ yürütämi̧ cjiaji̧ri̧rȩ yürüa̧ oaiä, jabechji̧ igȩrȩ chiamȩ jëdërea̧ tjori ja̧bo chjadëri̧ joami̧ dari̧ japapanȩrȩ, goadëji̧ri̧ pio ji̧ri̧ chjadëri̧ ëba goa̧ pio ju̧i̧iä —yo̧a̧dejȩrȩ.

Lucas 11:41 Iomraidhean Croise

Da̧de 4:27

Ado Da̧de judi ji̧dë u̧i̧ yo̧mȩrȩ ja̧di ta̧rëri̧ chi̧dëearëremȩdejȩ ütë oa: —Jabo danȩ ca̧ ütë, mȩnȩ canȩjäa̧ üdë pio mȩa chjiari uapai̧ dari̧ na̧rȩ tara, jabechji̧ cjäri̧ri̧ cjia ta̧rëcoe. Cüdë mȩa chi̧dëearea̧mi̧dëräbo chi̧dëeatämi̧ cjiarequedemȩ. Jabechji̧ chjai̧dë oa japë ano̧vä. Coëma cjiari̧ japamȩrȩ cjo̧ro̧vä. Jabechji̧ mȩnȩ chjai̧dëri̧ japamȩrȩ cjo̧ro̧rërea̧ ji̧, jabechji̧ ano̧ mire jo̧rȩtavä ca̧ ütë. Mȩnȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ cjäri̧ri̧ cjia dadërërea̧ ji̧, jabechji̧ cjäri̧ri̧ cjia dajȩrȩ. A̧dojȩrȩ. Ado mȩnȩ ja̧di dari̧ ano̧ mire jo̧rȩtamȩrȩ japarä judi, jabechji̧ Ütë tjamo̧ pio judi cjäri̧ri̧ cjia dapai̧ dadimȩ mȩnȩ ji̧dë ma chjadëri̧ cjo̧ro̧pea̧ oa, mȩnȩ pio ju̧i̧iä bape chjaoa̧ oa cjiachea oa. Jabechji̧ ano̧ mire jo̧rȩtavä ca̧ ütë, mȩnȩ uapai̧ dari̧ canȩjäa̧ üdë pio mȩaiäpȩmo̧ acji cjatächea oa, mȩnȩ ji̧dë ma chjadëri̧ cjo̧ro̧rea̧ dapea̧ oa —yo̧mȩrȩ chi̧dëeatarëremȩdejȩ Nabucodonocho pio ju̧i̧ Da̧de judi.

Mateo 26:11

Danȩrȩ, ji̧dë ma ëba cjo̧ro̧padiro̧dibe chjö̧na̧i̧ti̧ oa cjäri̧ ja̧boji̧ri̧ pio judiro̧. Ado mȩnȩro̧ eami̧ doro pio jiro cjäri̧ ja̧boji̧ri̧ pio ji̧ri̧iäpȩmo̧ a̧dorea̧ tararä judi, jabechji̧ a̧dopai̧ darenȩro̧jȩrȩ chjaodëri̧. Jabo ja̧didërequede cüdë. Dibëa̧ chjarerä ji̧dë ma cjo̧ro̧dëparequede.

Mateo 5:42

Ado eami̧ pumȩ üdë pio dibëiä cjo̧dërä judi, jabechji̧ goëdëri̧ cjiadëji̧ri̧rȩ chjadëri̧ yürüchji̧jo̧ȩ. Ado dibëiä eopatämi̧ cjiamȩ pio ju̧i̧, jabechji̧ eopatämi̧ cjiaji̧ri̧rȩ yürüchji̧jo̧ȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Marcos 7:19

Danȩrȩ, a̧ro̧rȩ eami̧ jurarea̧ oa jura̧ ji̧, jabechji̧ ibëa̧ chji̧räpȩmo̧ biradëde jabo ibëa̧ acäräpȩmo̧ ma bira̧de. Ado japamitë chjätäa̧rä, jabechji̧ ibëa̧ icjarari pio judiri go̧düde bucho ana̧ —yo̧a̧dejȩrȩ. Ado Jechu judi ja̧di ta̧rëri̧ yo̧a̧ oaiä, 'jabechji̧ jurarea̧ chjö̧na̧i̧rȩ chja jabechji̧ jurapea̧dida, china̧chjadë madida' quëna̧pea̧ oa a̧ra̧ano̧rëremȩde.

Lucas 12:33

Danȩrȩ, dai chirirä goa̧ üdë ba chia tjamo̧dëde jabo a̧dëräpȩ goa̧ üdë ba chia tjamo̧de bucho ana̧mȩ tara. Ado pio ju̧i̧iä jabechji̧, gatë tänȩchji̧vä mȩnȩro̧ goa̧ pio ju̧i̧ chëre oa yürüpea̧ oa chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Ado mȩnȩro̧ ja̧di dari̧ japea̧ oaiä, jabechji̧ chëre goarea̧ joë chjadë oa goami̧ dari̧ goapanȩrȩ a̧dëräpȩ ju̧ri̧, ütama̧i̧pe bagadëmȩ goarea̧ oa, co chiape bagadëmȩ goarea̧mi̧ da oa. Aja̧ ca̧ pumȩ, a̧dëräpȩ ju̧ri̧ ano̧ mire boeatäreji̧ri̧nȩrȩ goëje ji̧ra̧ tjamo̧pe järea̧mi̧ dari̧. Jabechji̧ chjadëdëpe jädëmȩräpȩ ju̧ri̧, mu̧i̧ decjiaräpȩ ju̧ri̧, achäcä chiape jädëmȩräpȩ ju̧ri̧ chjadëri̧ boeatäreji̧ri̧nȩrȩ, garüji̧ri̧ pio judiro̧ baë goa baärea̧mi̧dëräpȩ ju̧ri̧.

Lucas 16:9

Ado pio ju̧i̧iä yo̧requededibe —yo̧a̧dejȩrȩ—. Danȩrȩ, mȩnȩro̧ pio yoa chirirä cjo̧ro̧a̧ nö̧ta, jabechji̧ järi tjamo̧täreji̧ri̧nȩrȩ dibëa̧ra̧ pio ju̧ri̧ra̧ chjadëri̧ a̧dopea̧ ji̧ o ji̧ri̧iäpȩmo̧, pio judiro̧ dibëa̧ jadüpe bagarea̧mi̧ dari̧, pio dibë cjäri̧ri̧ cjia dape järea̧mi̧ dari̧. Ado ja̧dëa ji̧ mȩnȩro̧ ja̧boa̧rä, mȩnȩro̧ goarërea̧ra̧ pio ju̧ri̧ra̧ eami̧ oa japarea̧ dadërä, jabechji̧ mȩnȩro̧ a̧dorërea̧ pumȩ pio judiro̧ ano̧ mire cjäri̧ri̧ cjia daji̧ri̧rȩ jeapadiro̧dibe. Tjamo̧ davä. Mȩnȩro̧ a̧dëräpȩ ju̧ri̧ go̧düdäräa̧rä, jabechji̧ cjäri̧ri̧ cjia daji̧ri̧rȩ chjadëri̧ jeapadiro̧dibe mȩnȩro̧ bucho ana̧ cjo̧ro̧pea̧ bëräpȩ —yo̧mȩrȩ ni̧bä chjaorëremȩdejȩrȩ Jechu judi.

Lucas 18:22

Ado Jechu judi jënȩ dëbë yo̧a̧ pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧dejȩ: —Jabo danȩ, jabë pjärämȩde cja̧rȩmȩrȩ —yo̧a̧dejȩ—. Jabechji̧ mȩnȩ jabëdiärea̧ decjiari̧ cjo̧ro̧tämi̧ cjiarä judi, jabechji̧ na̧ea̧ chjö̧na̧i̧ oa gatë tänȩchäeno̧jo̧ȩ. Ado gatë tänȩ ëte, jabechji̧ chëre chjö̧na̧i̧ oa yürüjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Jabechji̧ mȩnȩ ja̧di dari̧ japarä judi, a̧dë chjäte ba chia pio ju̧i̧ goaparenȩ a̧dëräpȩ ju̧i̧. Aja̧ ado dari̧ japa ëte, jabechji̧ cho̧rë jana̧coe —yo̧a̧dejȩ.

Lucas 19:8

Ado Jechu judi Chaqueo ja̧ bëräpȩ go̧düdäräa̧ duri oa, Chaqueo judi pio ju̧i̧ ja̧ dëbëräpȩ cjiamȩrȩ yo̧rëremȩdejȩ: —Danȩ Ano̧mȩ, cüdë goa̧ pio ju̧i̧ tjomo̧mi̧ yürüparequedejȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ —yo̧a̧dejȩ—. Ado cüdë eami̧ pumȩ oa chjai̧dëri̧ japea̧rä judi, pio ji̧ri̧iä ba cjia̧ pio uëri baë mitëa̧rä judi, jabechji̧ ado chjereno̧ yürüparequedejȩrȩ. Jabo cüdë pio ji̧ri̧iä baë mitëa̧mi̧ yürüdëparequedejȩrȩ jabo ji̧dë u̧i̧ ji̧ra̧ oa yürüparequedejȩrȩ ba uëri. Jabechji̧ cja̧rȩmȩ chëremi̧ da oa baë mitëa̧rä judi, jabechji̧ jadüchiami̧ chëremi̧ da oa ado chjereno̧ yürüparequedejȩrȩ, cüdë baë mitëa̧ pio ju̧i̧ uëri. Ja̧di ma ja̧di ma yürüparequedejȩrȩ cüdë pumȩ pio ji̧ri̧iä ba uëri cjo̧dëa̧ pio ju̧i̧ —yo̧a̧dejȩ Jechu ju̧i̧.

Japarea̧ 10:15

Jabo pio jȩaiäpȩmo̧ ni̧bämȩ pio ju̧i̧ ado chjereno̧ ta̧rërämi̧ cjia̧dejȩ, ja̧di ta̧rëri̧ yo̧mȩ oa: —Danȩ, Ütë tjamo̧ judi pio jiro jurarea̧ oa jabechji̧parȩa̧dejȩ. China̧chjadëparȩa̧dejȩ. Pio ju̧i̧iä ano mire jo̧rȩtatäremȩrenȩ. Jabechji̧ mȩnȩ, 'Aja̧, jurarea̧dëdida, juradëpea̧dida, pio jiro jurarea̧ üdë jabechji̧ china̧chjadida' quëna̧rërea̧ ji̧, ja̧di dari̧ quëna̧ jo̧rȩtadëtäremȩrenȩ yaba̧ —yo̧mȩrȩ dëbë yo̧a̧dejȩ.

Japarea̧ 11:29

Ado quëna̧ji̧ri̧ judiro̧ pio ju̧i̧ ta̧rëa̧ oaiä, ’Aja̧, a̧dotäreji̧ri̧a̧ro̧ji̧ri̧da, a̧ro̧rȩ ütëbodärärë tara̧mi̧ yürü chjadütäreji̧ri̧a̧ro̧ji̧ri̧da, Judearäpȩ quëna̧ji̧ri̧ pio ji̧ri̧ a̧dopea̧ oa yürü chjadütäreji̧ri̧a̧ro̧ji̧ri̧da’ quëna̧ jo̧rȩtarëreji̧ri̧dirȩ.

Japarea̧ 24:17

—Ado danȩ ca̧ ütë, cüdë ui ji̧ra̧ nö̧ta oëra̧ti̧ oa tai̧mȩrȩ cjo̧ro̧rërea̧ ji̧, 'jabechji̧ Jerucharȩräpȩ ado chjereno̧ jätäremȩquëda' quëna̧ jo̧rȩtamȩrȩ pio ju̧ri̧pȩ go̧düdäräa̧requede do ji̧ra̧dëri ja̧. Jabechji̧ ca̧ pumȩ pio ji̧ri̧iäpȩmo̧ yürüpea̧ oa, chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ chëre oa yürüpea̧ oa, ado Ütë tjamo̧ pio ju̧i̧iäpȩmo̧ cäë yürüpea̧ oa, jabechji̧ go̧düdäräa̧requede.

Cori̧tio Ma̧ȩ 2 8:12

Ado mȩnȩro̧ eami̧ oa yürürä, mȩnȩro̧ järätäa̧rä ja̧ oa yürürä, jabechji̧ yürüdëri̧ cjiaji̧ri̧rȩ yürüdëchji̧vä, jabo jabechji̧ tjamo̧ri̧ yürütämi̧ cjiaji̧ri̧rȩ yürüchji̧vä. Jabechji̧ mȩnȩro̧ yürüdëri̧ cjiaji̧ri̧rȩ yürürä judi, goae tjamo̧dëdejȩ Ütë tjamo̧ pio ju̧i̧iä. Jabo mȩnȩro̧ tjamo̧ri̧ yürütämi̧ cjiaji̧ri̧rȩ yürürä judi, dëdë, goae tjamo̧de pio ju̧i̧iä. Ado pio ju̧i̧iä yo̧requededibe ca̧ oti̧. Yürütämi̧ cjiaji̧ri̧rȩ yürüchji̧vä. Ado eami̧ pumȩ üdë tjamo̧ri̧ goadërä judi, eami̧ oa yürüpea̧ oa goadërä judi, eami̧ jurarea̧ boi̧chji̧ oa goadërä judi, jabechji̧ yürürea̧mi̧dëde. Jabo mȩnȩro̧ goa̧ pio ju̧i̧, dëdë, yürüpai̧ darenȩro̧jo̧ȩ ji̧ra̧dëräbo, jabëtarimi̧räbo.

Epjecho Ma̧ȩ 4:28

Ado mȩnȩro̧ garüji̧ri̧rȩ cjo̧ro̧rërea̧ ji̧, garüdëchji̧vä yaba̧. Jabechji̧ dibëa̧ ichira̧ garüji̧ri̧rȩ cjo̧ro̧rërea̧ ji̧, chjadëri̧ ano̧ mire ja̧bepachji̧vä cjäri̧ ja̧boji̧ri̧ pio ji̧ri̧iäpȩmo̧ chjadëri̧ a̧dopea̧ oa.

Tito 1:15

Danȩrȩ, chji̧ peaja̧ra̧ jo̧rȩtaji̧ri̧ judiro̧, Ütë pio ju̧i̧iä chjadë pio ju̧i̧ jo̧rȩtaji̧ri̧ pio judiro̧, jabechji̧ chjadë pio ju̧i̧ japariä cjo̧ro̧dirȩ. Jabo jibëa̧ icjarari cjitëmȩ jo̧rȩtarea̧ra̧ jo̧rȩtaji̧ri̧ judiro̧, Ütë pio ju̧i̧iä chjai̧dë pio ju̧i̧ jo̧rȩtaji̧ri̧ pio judiro̧, jabechji̧ chjai̧dë pio ju̧i̧ japariä cjo̧ro̧dirȩ. Aja̧, ja̧di dari̧ japadirȩ quëna̧dë ma tara. Jabechji̧ jibëa̧ chji̧ üdë chjai̧dëparȩa̧ oa cjia oaiä, chji̧ cjari̧da maeara̧ jo̧rȩta̧ oaiä, chjai̧dë maea oa jo̧rȩtadirȩ chjadëri̧ jo̧rȩtarea̧mi̧dëri̧, cjo̧dërë tüe baämi̧ dari̧ jo̧rȩtarea̧mi̧dëri̧.

Ebereo Ma̧ȩ 13:16

Ado pio ju̧i̧ uëri ji̧dë ma chjadëri̧ japachji̧vä o ji̧ri̧iäpȩmo̧, aäpami̧ dari̧ jo̧rȩtarea̧ decjiari̧. Ado mȩnȩro̧ goa̧ pio ju̧i̧, jabechji̧ chjadëri̧ ëba goachji̧jȩrȩ o ji̧ri̧, nȩmȩparea̧ decjiari̧. Jabechji̧ ja̧di dari̧ cäë yürümi̧ dari̧ yürüa̧ üdë, goae tjamo̧de Ütë tjamo̧ pio ju̧i̧iä.

Ebereo Ma̧ȩ 6:10

Jabechji̧ Ütë tjamo̧ judi oëra̧ ütaradëmȩde, jabo coëma cjiari̧ ütaramȩde. Ado pio ju̧i̧iä a̧dë dami̧ dari̧ a̧dë jo̧rȩtadëpadejȩ mȩnȩro̧ ja̧bepea̧ pio ju̧i̧, mȩnȩro̧ pio ju̧i̧ ja̧ oa ana̧ri̧ ja̧bepea̧ pio ju̧i̧. Jabechji̧ Ütë tjamo̧ pio ju̧i̧ ea tjamo̧ji̧ri̧rȩ ana̧ri̧ na̧rȩa̧nȩrȩ ja̧bepea̧ pio ju̧i̧iä. China̧chjari̧ tutia̧ oa cjiaji̧ri̧ pumȩ pio ji̧ri̧ chjadëri̧ a̧doa̧ oaiä ana̧ri̧ na̧rȩa̧nȩrȩ. Ado ji̧ri̧ chjadëri̧ a̧dorëreji̧ri̧rȩ ji̧dë ma a̧do chjaorenȩro̧jȩrȩ yaba̧. Ado pio ju̧i̧iä yo̧requededibe. Mȩnȩro̧ japea̧ pio ju̧i̧ a̧dë jo̧rȩtadëpade Ütë tjamo̧ judi.

Santiago Ma̧ȩ 1:27

Jabo danȩrȩ, Ütë tjamo̧ ja̧ ma̧ȩrä coëma cjiari̧ cjo̧ro̧a̧ üdë, jabechji̧ ba chiade. Ado goae tjamo̧de ibëa̧ Ama̧i̧ Ütë pio ju̧i̧iä. Jabechji̧ ja̧di dari̧ cjo̧ro̧a̧ üdë, ‘chjai̧dëdida’ quëna̧ dadëpadejȩ, jabo ‘goae tjamo̧dica̧da’ quëna̧ dapadejȩ. Tjamo̧ davä. A̧ro̧rȩ bori̧ pio ji̧ri̧ a̧doa̧ üdë, bori̧ maearë cjiadiäa̧ji̧ri̧ pio ji̧ri̧ a̧doa̧ üdë goae tjamo̧de ibëa̧ Ama̧i̧ Ütë pio ju̧i̧iä. Ado oari chiareji̧ri̧ pio ji̧ri̧ a̧doa̧ üdë, chjö̧na̧i̧ti̧ oa cjäri̧ ja̧boji̧ri̧ pio ji̧ri̧ a̧doa̧ üdë, peaja̧di goae tjamo̧de ibëa̧ Ama̧i̧ Ütë pio ju̧i̧iä. Ado a̧ro̧rȩ dai chirirä cjo̧ro̧ji̧ri̧ ja̧ chjai̧dëra̧ pio ju̧ri̧ra̧ mirea̧ oa cjiadëji̧ri̧mi̧ dari̧ cjo̧ro̧a̧ üdë, peaja̧di goae tjamo̧de ibëa̧ Ama̧i̧ Ütë pio ju̧i̧iä. Jabechji̧ ja̧di dari̧ cjo̧ro̧dirȩ Ütë tjamo̧ ja̧ ma̧ȩrä coëma cjiari̧ cjo̧ro̧ji̧ri̧ pio judiro̧. Ado pio ju̧i̧iä peaja̧dimi̧ dari̧ cjo̧ro̧ matäreji̧ri̧rea̧rȩ ca̧ oti̧.