Juan 8:6 - Biblia Pume

⁶ Aja̧, ja̧di ta̧rëri̧ yo̧rëreji̧ri̧dirȩ Jechu pio ju̧i̧ u̧i̧papea̧ oa, judi oëra̧ yo̧pea̧ oa, judiro̧ pio ju̧i̧iäpȩmo̧ aechide ni̧bäpea̧ oa. Jabo Jechu judi uëdai̧ chjere chamȩrȩ go̧ȩparëremȩde jibëa̧ ichira̧ daburo.

Juan 8:6 Iomraidhean Croise

Taruparea̧ Ma̧ȩ 49:9

Aja̧ ca̧ ja, Juda, ja̧di dari̧ cjo̧ro̧padirȩ na̧ea̧ri ja̧ji̧ri̧ judiro̧. O ji̧ri̧ chjaodëri̧ boadärärea̧ dapadiro̧jȩrȩ dëbëparea̧ decjiari̧. Jabechji̧ pio jibë eadëji̧ri̧ pio judiro̧, cjäri̧ madiro̧jȩrȩ, boadärärea̧ dadëpadiro̧jȩrȩ. Jabechji̧ pa̧rȩmȩrȩ japarëmi̧ cjiari̧ cjiadiäpadirȩ na̧ea̧ri ja̧ji̧ri̧ judiro̧. Danȩ, parȩmȩ üdë eami̧ oa ja̧bo tänȩ ëte, jura ëte, jabechji̧ a̧rȩde järätä chjapapea̧ oa. Ado mo̧a̧mȩ oa, ¿chjiarë na̧rȩno̧täremȩdejȩ? Chjiarëdë, na̧rȩno̧pa ma ja̧didë chjuamȩ tjamo̧ tara. Jabechji̧ uapaji̧ri̧rȩ da madiro̧jo̧ȩ. Ado peaja̧dimi̧ dari̧ dapadiro̧jȩrȩ na̧ea̧ri ja̧ji̧ri̧ pio ji̧ri̧.

Jeremia 17:13

—Danȩ Jeova, pio mȩaiämo̧i̧ jidatarea̧ chiadirȩ icharaita judiro̧. Ado pio ju̧i̧iä eami̧ pumȩ üdë pio mȩa a̧dë jo̧rȩtarä judi, pio mȩa a̧dë jachipadärämi̧ dari̧ japarä judi, cjäri̧ made, a̧dë chjäte idëri̧ cjiamȩrȩ cjiadiäpade. Tjamo̧ davä. Pio mȩa putu jura̧ a̧dë chami̧ dari̧ japaji̧ri̧ pio judiro̧, jabechji̧ pumȩ ta duri üdë pjaepa oaiä na̧ra̧ oa cjiami̧ dari̧ cjiapade, duridëpe bagari̧. ¿Tjana̧ ju̧i̧iä ja̧di dari̧ cjiadiäpadirȩ? Tjana̧ ju̧i̧iädë, jabechji̧ judiro̧ Jeova pio ju̧i̧ jiada̧ oaiä, cjo̧ro̧rea̧ yürümȩ uimi̧ damȩ pio ju̧i̧ jiada̧ oaiä, goae tarari̧ ca̧mȩ dürümi̧ damȩ pio ju̧i̧ jiada̧ oaiä, jabechji̧ ja̧di dari̧ cjiadiäpadirȩ.

Da̧de 5:5

Jabo judiro̧ eami̧ oa dadërërea̧ ji̧, chjaodëri̧ daea̧diro̧jo̧ȩ pumȩ ja̧ ichi oa, jibëa̧ ma̧na̧ri̧ baramȩ oa, tataparea̧ chiamȩ to queri̧räpȩ ju̧ri̧. Pumȩ icjarari ja̧dëmȩ ichi oa daea̧diro̧jo̧ȩ jo̧tjo tuti a̧rȩmȩ pjatërä go̧ȩpamȩ oa, chiri ütë cjo̧ro̧mȩ ja̧ bëräpȩ ju̧ri̧. Tjamo̧ davä. Jo̧tjo tuti a̧rȩmȩ pjatërä go̧ȩpamȩ oa, bërëbërëa̧ra̧ joa oa cjiamȩ tuti a̧rȩmȩ pjatërä go̧ȩpamȩ oa daea̧diro̧jo̧ȩ. Ado chiri ütë pio judiborë irä daea̧dejȩ ichi oa baramȩ oa, jibëa̧ ma̧na̧ri̧ go̧ȩpamȩ oa.

Ütararea̧ Ma̧ȩ 14:22

Ado pio cüdë tjamo̧ri̧ yo̧rea̧ oa yo̧mȩrȩ yo̧requede davä pio jiro pumȩ pio ji̧ri̧ chjiari. Jabechji̧ yu̧a̧rea̧ yürüdëparequedejȩrȩ. Tjamo̧ davä. Pio jiro pumȩ judiro̧ cja̧rȩmȩrȩ yu̧a̧tärea̧ ji̧, cüdë jibëa̧ ütëti̧rea̧ pio ji̧ri̧iäpȩmo̧ yo̧ë cji̧därërea̧ chiriräpȩ yu̧a̧tärea̧ ji̧, cjäri̧ madirȩ, yu̧a̧rea̧ dadëpadirȩ. Jabechji̧ cüdë a̧dë chjäte tatari̧ cjiari̧ na̧rȩ chjaoa̧ ji̧ irä daea̧dirȩ. Ado cüdë Ejitoräpȩ jauëchja cjiari̧ na̧rȩrërea̧ ji̧ peaja̧di irä daea̧dirȩ. Ado chiri maearäpȩ ju̧ri̧, cüdë pio ji̧ri̧ chjiari ji̧dë ma tuti yürüa̧ ji̧, peaja̧di irä daea̧dirȩ. Ji̧dë ma irä daea̧dirȩ. Jabo irä dae chjaoa̧räbo, cjäri̧ madiro̧coe, quëna̧dëdiro̧coe. Ji̧dë ma jiada̧diro̧coe. Pio ju̧i̧iä jabechji̧, pio jiro chiri oa yu̧a̧rea̧ yürüdëparequedejȩrȩ. Jabechji̧ eami̧rȩ pio coa ta̧rëdiädëmȩ pio judi yu̧a̧dëpade bucho ana̧.

Mateo 10:16

Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ jibëa̧ jadü ji̧ri̧, pio ji̧ri̧ chjadübea yaboi̧: ⁠—⁠Danȩrȩ ca̧ pumȩ, uapai̧ da tjamo̧räpȩ chjadürequededibe ja̧bepapea̧ oa ⁠—⁠yo̧a̧dejȩrȩ⁠—⁠. Tjamo̧ davä, ovejami̧ da maea oa chjadürequededibe ja̧bepapea̧ oa, aure chjuaji̧ri̧mi̧ da pio ji̧ri̧ ja̧ chjarerä cjo̧ro̧ji̧ri̧ pio ji̧ri̧ a̧dopea̧ oa. Ado pio ju̧i̧iä na̧ȩ chiachji̧vä mȩnȩro̧ u̧i̧pea̧ oa cjiachea oa. Jabechji̧ urëdi oa jo̧rȩtachji̧vä mȩnȩro̧ chjadë pio ju̧i̧mo̧i̧ mitëpea̧ oa, mȩnȩro̧ chjadëri̧ ütarë jo̧rȩtapea̧ oa. Ado peaja̧di chjai̧dëra̧ pio ju̧ri̧ra̧ mirea̧ oa cjiadëchji̧vä, o judiro̧ dibë aechide yo̧rea̧mi̧dëri̧.

Mateo 15:23

Jabo jini̧ to̧bari̧ ëna̧diäa̧räbo, Jechu judi dëbë yo̧dëa̧dejȩ. Cjapi maearë cjiadiäa̧de. Ado ju̧i̧ ja̧ jadü pio judiro̧ yo̧a̧diro̧jo̧ȩ Jechu ju̧i̧: ⁠—⁠Jabechji̧ baä tänȩjȩ. Ji̧dë ma ëna̧diäni̧ibe. Baä tänȩjȩ ibë ji̧dë ma̧ tja̧reparȩchea oa ⁠—⁠yo̧tea̧diro̧jo̧ȩ.

Mateo 16:1

Ado pjaricheo judiro̧, chaducheo pio judiro̧borë goë daera̧pea̧diro̧jo̧ȩ Jechu pio ju̧i̧. Ado Jechu pio ju̧i̧ ütarami̧ dari̧ japapea̧ oa, judi puëräpȩ choë cjatämi̧ dari̧ cjia tänȩpea̧ oa, jabechji̧ ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jo̧ȩ: ⁠—⁠Danȩ, mȩnȩ Ütë tjamo̧ pio judi chjadüa̧ oa tjamo̧ri̧ birë ma̧na̧rä judi, jabechji̧ na̧rȩibe ⁠—⁠yo̧a̧diro̧jo̧ȩ⁠—⁠. A̧dëri ma̧na̧mȩ jauëchjarea̧ra̧ pio ju̧ri̧ra̧ chjadëri̧ na̧rȩibe ⁠—⁠yo̧a̧diro̧jo̧ȩ.

Mateo 19:3

Ado pjaricheo judiro̧ Jechu pio ju̧i̧iäpȩ go̧düdäräji̧ri̧rȩ iëno̧ë ta̧rërëreji̧ri̧diro̧jo̧ȩ, pio ju̧i̧ ütarami̧ dari̧ japatämi̧ cjiaji̧ri̧rȩ. Jabechji̧ Jechu judi puëräpȩ choë cjatämi̧ dari̧ cjiatä eaji̧ri̧rȩ ja̧di ta̧rëri̧ iëno̧ë ta̧rëa̧diro̧jo̧ȩ: ⁠—⁠Danȩ, üi̧ judi jibëa̧ iei̧ pio ji̧ ano̧rea̧ tararä judi, ¿jabechji̧dëde Moicherë go̧ȩparërea̧ ma̧ȩ pio ju̧i̧iä? ⁠—⁠iëno̧ë ta̧rëa̧diro̧jo̧ȩ.

Mateo 22:18

Jabo Jechu judi pio ji̧ri̧ ja̧ chji̧ oa cjacjarë damȩrȩ, pio jȩaiäpȩmo̧ chjai̧dëri̧ japatämi̧ cjiaji̧ri̧ pio ji̧ri̧ chjiari dabamȩrȩ, chjaodëri̧ dëbë yo̧rëremȩdejȩrȩ: ⁠—⁠Jabo cjäri̧ marenȩro̧coe ⁠—⁠yo̧a̧dejȩrȩ Jechu judi⁠—⁠. Ütë tjamo̧ pio ju̧i̧ tjamo̧ quëna̧cji̧ quëna̧ japaji̧ri̧rȩ u̧i̧patarenȩro̧coe.

Mateo 22:35

Ado ja̧dëa ji̧ pjaricheo üdë, cja̧rȩmȩ pio judi, Moicherë go̧ȩparërea̧ ma̧ȩ oa tjamo̧ a̧ra̧ano̧mȩ pio judi iëno̧ë ta̧rërëremȩdejȩ Jechu ju̧i̧. Jabechji̧ pio ju̧i̧ ütarami̧ dari̧ japapea̧ oa, pio judi oëra̧ dëbë yo̧ro ta̧rëpea̧ oa, pio judi puëräpȩ choë cjätämi̧ dari̧ cjiadiä tänȩpea̧ oa, iëno̧ë ta̧rërëremȩdejȩ.

Mateo 26:63

Jabo Jechu judi cjapi maearë cjiadiärëremȩde. Dëbë yo̧dërëremȩdejȩ. Ado tjamo̧ goë tuti ja̧bepamȩ pio judi ado chjereno̧ iëno̧ë ta̧rëa̧dejȩ: ⁠—⁠Danȩ, chjadëri̧ yo̧coe ⁠—⁠yo̧a̧dejȩ⁠—⁠. Ja̧bodëmȩ Ütë pio ju̧i̧ ja̧ quȩrä yo̧tä eamȩrȩ yo̧tarequedemȩ. Yo̧ibe. ¿Chjia tjamo̧renȩ mȩnȩ? ¿Ütërë mitëa̧ Chjätä Tänȩmȩ pio judidënȩ? ¿Ütë tjamo̧ pio ju̧i̧ ja̧ Joja pio judidënȩ? Chjadëri̧ dëbë yo̧coe yo̧tarequedemȩ ⁠—⁠yo̧mȩrȩ yo̧a̧dejȩ.

Marcos 10:2

Ado pjaricheo judiro̧ orëmo̧rȩ peaja̧di go̧düdärärëreji̧ri̧dirȩ Jechu pio ju̧i̧ ütarë ta̧rëpea̧ oa. Jabechji̧, Jechu pio ju̧i̧ ütarë ta̧rëtämi̧ cjiaji̧ri̧rȩ daea̧diro̧jo̧ȩ. 'Aja̧, a̧ro̧rȩ pio ju̧i̧ iëno̧ë ta̧rërä judi, oëra̧ dëbë yo̧pai̧ dadiibëda, ado oëra̧ dëbë yo̧rä judi, jabechji̧ tjamo̧ cjo̧ro̧ji̧ri̧ pio ji̧ri̧ ja̧ dëbëräpȩ aechide yo̧pai̧ daa̧ro̧ju̧i̧da' quëna̧ jo̧rȩtaji̧ri̧rȩ iëno̧ë ta̧rëa̧diro̧jo̧ȩ, ja̧di ta̧rëri̧ yo̧ji̧ri̧rȩ: —Danȩ, üi̧ judi jibëa̧ iei̧ ji̧ ano̧rä judi, ¿jabechji̧dëde? ¿Yö̧ta yo̧diibe Moicherë go̧ȩparërea̧ ma̧ȩ üdë? —yo̧ji̧ri̧rȩ iëno̧ë ta̧rëa̧diro̧jo̧ȩ Jechu ju̧i̧.

Marcos 12:15

Jabo Jechu judi, judiro̧ u̧i̧pë iëno̧ë ta̧rëa̧ pio ju̧i̧ chjiari dabamȩrȩ yo̧ë ta̧rëa̧dejȩrȩ: —¿Jabo tjana̧pea̧ oa puërä cjatä tänȩmi̧ dari̧ japatämi̧ cjiarenȩro̧coe? Danȩrȩ, goa jana̧chji̧coe cja̧rȩmȩ chëre boi̧chji̧ oa. Datämi̧ cjiareconȩ —yo̧a̧dejȩrȩ.

Marcos 3:2

Ado peaja̧di a̧doparëreji̧ri̧dirȩ Jechu pio ju̧i̧iäpȩmo̧ aechide yo̧tämi̧ cjiaji̧ri̧ judiro̧. Ado judiro̧ a̧dë darea̧ decjiari̧ ütarë dae chjaorëreji̧ri̧diro̧jo̧ȩ Jechu ju̧i̧. 'Aja̧, ¿yö̧ta dari̧ japapadida, jabechji̧ järätä chjaparea̧ dorobo chjaparȩpai̧ dadiji̧da, ado ja̧di dari̧ japarä judi pio ju̧i̧iäpȩmo̧ aechide yo̧paa̧ro̧ju̧i̧da' quëna̧ jo̧rȩtaji̧ri̧rȩ ütarë dae chjaorëreji̧ri̧diro̧jo̧ȩ.

Marcos 8:11

Ado pjaricheo judiro̧ orëmo̧rȩ go̧düdärärëreji̧ri̧dirȩ Jechu pio ju̧i̧iäpȩ. Ado chjaodëri̧ tarupea̧dirȩ pio ju̧i̧ nö̧ta dëbë ni̧bätapea̧ ji̧. Jibëa̧ jauëchja oa na̧rȩtä eaji̧ri̧rȩ yo̧tea̧diro̧jo̧ȩ, ja̧di ta̧rëri̧ yo̧ji̧ri̧rȩ: —Danȩ, mȩnȩ Ütë tjamo̧ pio judi chjadüa̧ oa tjamo̧ri̧ birë ma̧na̧rä judi, jabechji̧ na̧rȩibe —yo̧a̧diro̧jo̧ȩ—. 'Jabo cjäri̧ madida, a̧dëri pio judiri tjamo̧ri̧ biradëa̧dida, ado a̧dëri ma̧na̧mȩ na̧rȩrea̧ra̧ tjamo̧ri̧ na̧rȩrea̧mi̧dëdida, jabechji̧ Ütë tjamo̧ judi tjamo̧ri̧ chjadüa̧ oa ma̧na̧dëa̧dida' quëna̧ jo̧rȩtaji̧ri̧rȩ puëräpȩ choë cjatämi̧ dari̧ japa tänȩtarëreji̧ri̧diro̧jo̧ȩ.

Lucas 10:25

Ado cja̧rȩmo̧ doremȩrä, tjamo̧ri̧ dabamȩ judi, Moicherë go̧ȩparërea̧ ma̧ȩ oa tjamo̧ a̧ra̧ano̧mȩ pio judi iëno̧ë ta̧rërëremȩdejȩ Jechu ju̧i̧. Jabechji̧ Jechu pio ju̧i̧ ütarami̧ dari̧ japapea̧ oa, puëräpȩ choë cjätämi̧ dari̧ cjiadiä tänȩpea̧ oa, iëno̧ë ta̧rëa̧dejȩ, chjadëri̧ jo̧rȩtadëmȩrȩ. Ja̧di ta̧rëri̧ yo̧mȩrȩ iëno̧ë ta̧rëa̧dejȩ: —A̧ra̧ano̧mȩ —yo̧a̧dejȩ—. ¿Tjana̧ oa japatäremȩrequede cüdë bucho ana̧ cjo̧ro̧rea̧ dapea̧ oa? Pio ju̧i̧ chjadëri̧ yo̧coe —yo̧a̧dejȩ.

Lucas 11:16

Ado o judiro̧, Jechu pio ju̧i̧ ütarami̧ dari̧ japatämi̧ cjiaji̧ri̧ pio judiro̧, puëräpȩ choë cjatämi̧ dari̧ japa tänȩtämi̧ cjiaji̧ri̧ pio judiro̧ jauëchja cjiari̧ na̧rȩtä eaji̧ri̧rȩ yo̧a̧diro̧jo̧ȩ: —Danȩ, a̧ro̧rȩ ana̧ri̧ jo̧rȩtapea̧ oa, jabechji̧ a̧dëri ma̧na̧mȩ jauëchjarea̧ra̧ pio ju̧ri̧ra̧ chjadëri̧ na̧rȩibe. Jabechji̧ a̧ro̧rȩ pio mȩa chjiari quëna̧pea̧ oa, ‘Aja̧, Ütë tjamo̧ pio judi chjadëri̧ chjadüa̧ oa birë ma̧na̧diibëda’ quëna̧ jo̧rȩtapea̧ oa, jabechji̧ na̧rȩibe —yo̧a̧diro̧jo̧ȩ.

Juan 8:2

Ado dopea̧rä peadai̧rä, ado chjereno̧ jäa̧de Ütë tjamo̧ ja̧ bëräpȩ. Ado ju̧ri̧pȩ go̧düdäräa̧mȩ oa, chjaodëri̧ tjoro tänȩa̧diro̧jo̧ȩ pumȩ judiro̧. Ado chamȩrȩ taruparëremȩde Jechu judi pio ji̧ri̧iäpȩmo̧ a̧ra̧ano̧pea̧ ji̧.

Cori̧tio Ma̧ȩ 1 10:9

Ado danȩrȩ, peaja̧di ütarami̧ dari̧ japarëreji̧ri̧diro̧jo̧ȩ Ano̧mȩ ju̧i̧. ‘Aja̧, ¿napai̧rä yuro jiadarea̧ dapaa̧ro̧da, napai̧rä yuro cjäri̧ri̧ cjiamȩrȩ jidapadiibëda, jabechji̧ bape chjaodaemȩ jirodibëda’ quëna̧ jo̧rȩtaji̧ri̧rȩ ütarami̧ dari̧ japarëreji̧ri̧diro̧jo̧ȩ, ji̧dë ma chjai̧dëri̧ jape chjaorërea̧ oaiä. Jabo bape chjaodëpamȩdërë bape chjaopamȩrȩ japarëremȩdejȩrȩ. Jabechji̧ pio judi tänȩa̧ oaiä ja̧bo ga̧re baärëreji̧ri̧dirȩ ë chiamȩ porë jurachäa̧ oaiä. Ado pio ju̧i̧iä pio judiro̧ japarërea̧mi̧ ütarami̧ dari̧ japadëtäreji̧ri̧rea̧ro̧jo̧ȩ ibëa̧ Ano̧mȩ ju̧i̧.