Juan 4:48 - Biblia Pume

⁴⁸ Jabo pio ju̧i̧ ta̧rëa̧ oaiä, Jechu judi yo̧a̧dejȩ: —Danȩ, mȩnȩ na̧ pumȩborë jauëchja cjiari̧ na̧rȩmȩ oa daea̧rämo̧ quëna̧panȩrȩ —iëno̧ë ta̧rëa̧dejȩ.

Juan 4:48 Iomraidhean Croise

Da̧de 4:2

Ado mȩnȩro̧ dabadëchea oa, jabechji̧ ütëbodärä oa daba tänȩtämi̧ cjiarequededibe a̧dë chjäte Ütë pio ju̧i̧ chjiari, judi pio coa chjiari chjadëri̧ japea̧ pio ju̧i̧ chjiari, judi jibëa̧ jauëchara̧ pio coa japë yürüa̧ pio ju̧i̧ chjiari.

Da̧de 6:27

Aja̧, pio judi tjamo̧de jibëa̧ pumȩ pio ji̧ri̧ chjiari tuti japamȩ judi judiro̧ ma̧i̧ da chjai̧dë oa chjätächea oa. Aja̧, chjadëri̧ chjätärea̧ yürüdejȩrȩ. Jabechji̧ jauëchja cjiari̧ na̧rȩmȩrȩ japamȩde a̧dëräpȩ ju̧ri̧, pio yoa chiribo. Ado danȩrȩ ca̧ pumȩ, mȩnȩro̧ dabadëchea oa yo̧requededibe. Pio judi chjadëri̧ go̧dü tänȩa̧dejȩ Da̧de pio ju̧i̧. Jabechji̧ pa̧rȩmȩ judiro̧ pio ju̧i̧ chjaodëri̧ ja̧bo tänȩtärea̧ ji̧, cjäri̧ madiro̧jo̧ȩ, eami̧ oa japarea̧ dadëa̧diro̧jo̧ȩ Ütë tjamo̧ pio judi chjadëri̧ chjätärea̧ yürüa̧ tara. Ado pio ju̧i̧iä i ma̧na̧ga järi̧ uapaji̧ri̧rȩ ba chia jo̧rȩtatä earequededibe pio ju̧i̧iäpȩmo̧ —yo̧mȩrȩ go̧ȩpe chjadürëremȩde Dario judi chiriräpȩti̧ oa cjo̧ro̧ji̧ri̧ pumȩ pio ji̧ri̧iäpȩmo̧, jibëa̧ chja̧oerä cjo̧ro̧ji̧ri̧ pumȩ pio ji̧ri̧iäpȩmo̧.

Ütararea̧ Ma̧ȩ 14:11

Ado Jeova pio judi yo̧a̧dejȩ Moiche ju̧i̧iäpȩmo̧: —¿Napai̧rä yuro badë jo̧rȩtapadiro̧coe pio jiro pumȩ judiro̧? ¿Napai̧rä yuro ji̧dë ma chjuari̧ jiadapadiro̧coe pio coaiäpȩmo̧ chjadëri̧ quëna̧tärea̧ ji̧? Danȩ, cüdë ana̧ri̧ na̧rȩa̧räbo, cüdë ana̧ri̧ tuti japea̧räbo, jabechji̧ chjuari̧ quëna̧dëdiro̧coe. Pio ju̧i̧iä iëno̧ë ta̧rërequedemȩ. ¿Napai̧rä yuro ja̧di dari̧ japapadiro̧coe?

Mateo 16:1

Ado pjaricheo judiro̧, chaducheo pio judiro̧borë goë daera̧pea̧diro̧jo̧ȩ Jechu pio ju̧i̧. Ado Jechu pio ju̧i̧ ütarami̧ dari̧ japapea̧ oa, judi puëräpȩ choë cjatämi̧ dari̧ cjia tänȩpea̧ oa, jabechji̧ ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jo̧ȩ: ⁠—⁠Danȩ, mȩnȩ Ütë tjamo̧ pio judi chjadüa̧ oa tjamo̧ri̧ birë ma̧na̧rä judi, jabechji̧ na̧rȩibe ⁠—⁠yo̧a̧diro̧jo̧ȩ⁠—⁠. A̧dëri ma̧na̧mȩ jauëchjarea̧ra̧ pio ju̧ri̧ra̧ chjadëri̧ na̧rȩibe ⁠—⁠yo̧a̧diro̧jo̧ȩ.

Mateo 24:24

Jabechji̧ pio jiro japamitërä u̧i̧paji̧ri̧ pio judiro̧ no̧i̧dërë go̧düdäräpadirȩ. Jabechji̧ Ütërë mitëa̧ Chjätä Tänȩji̧ri̧cji̧ quëna̧ japaji̧ri̧ pio judiro̧, ado Ütërë ea jana̧ chjadüa̧ oa ni̧bäji̧ri̧cji̧ quëna̧ ni̧bäji̧ri̧ pio judiro̧borë go̧düdäräpadirȩ. Ado dami̧ti̧ jauëchja cjiari̧ na̧rȩrea̧ oa na̧rȩ chjaopadirȩ. Japarea̧mi̧dë pio ju̧i̧ jape chjaoji̧ri̧ oa dae chjaopadiro̧jȩrȩ, pumȩ pio ji̧ri̧ goae tarari̧ u̧i̧pe chjaoji̧ri̧ oa. Ado Ütërë mitëa̧ pumȩ pio ji̧ri̧bo u̧i̧patapadiro̧jȩrȩ pio judiro̧borë jibë ta̧rë ja̧bopea̧ oa. Jabo Ütërë mitëa̧ pumȩpea̧ pio ju̧i̧iä, jabechji̧ u̧i̧parea̧ dadëpadiro̧jȩrȩ.

Mateo 27:42

⁠—⁠Cjäri̧ made, o ji̧ri̧ chjadëri̧ chjätärea̧ yürürëremȩdejȩrȩ, jabo jibëa̧ ma̧na̧ri̧ japea̧ ju̧i̧iä chjätärea̧mi̧dëde ⁠—⁠yo̧a̧dirȩ⁠—⁠. Danȩrȩ, Icharai pio judiri ja̧ji̧ri̧ ja̧ Ütërä judi, pio ji̧ri̧ ja̧ Ütë tjamo̧rä judi, jabechji̧ jibëa̧ ma̧na̧ri̧ japea̧ oaiä tori pio judiri biratäremȩde ⁠—⁠yo̧a̧dirȩ⁠—⁠. Ado judi tori pio judiri tjamo̧ri̧ birarä judi, jabechji̧ quëna̧täreji̧ri̧rea̧ro̧jo̧ȩ ⁠—⁠yo̧ji̧ri̧rȩ ya̧e chjaorëreji̧ri̧dirȩ⁠—⁠.

Marcos 13:22

Danȩrȩ, no̧i̧dë tjamo̧padirȩ davä teracabari̧ japaji̧ri̧ judiro̧. Chjätä Tänȩmȩcji̧ quëna̧ japaji̧ri̧rȩ u̧i̧papadirȩ. Ado o judiro̧, Ütërë ea jana̧ chjadüa̧ oa ni̧bäji̧ri̧cji̧ quëna̧ japaji̧ri̧ pio judiro̧borë u̧i̧papadirȩ. Aja̧, na̧rȩrea̧ ji̧ra̧ri̧ chiaji̧ri̧rȩ na̧rȩ chjaopadirȩ jauëchja cjiari̧ japaji̧ri̧rȩ. Ana̧ri̧ japaji̧ri̧rȩ u̧i̧papadiro̧jȩrȩ pumȩ ji̧ri̧. Ado Ütë tjamo̧ ja̧ u̧ri̧ pio ji̧ri̧ tjamo̧ri̧ u̧i̧parea̧ darä judi, peaja̧di pio ji̧ri̧bo u̧i̧papai̧ dadiro̧jȩrȩ.

Lucas 10:18

Ado Jechu judi dëbë yo̧a̧dejȩrȩ: —Aja̧, ta̧rëdiäa̧diro̧dibe yaröca judiro̧. Ado dibë ta̧rëdiäa̧ ji̧, jabechji̧ Ichiae pio ju̧i̧ daea̧reconȩ. A̧dëri pio judiri cjatämȩ oa, bërepe chjaomȩ üdë a̧dëri pio judiri cjatämi̧ dari̧ cjatämȩ oa daea̧reconȩ. Jabechji̧ cüdë pio dibëiäpȩmo̧ tjamo̧ yo̧rea̧ pio ju̧i̧ yürüa̧ oaiä, jabechji̧ pio mȩnȩro̧borë boadäräa̧renȩro̧jo̧ȩ Ichiae pio ju̧i̧, pio ju̧i̧ ja̧ mu̧i̧tjoi̧ pio ji̧ri̧bo.

Lucas 16:31

Jabo Abaraa̧rea̧ pio judi ado dëbë yo̧a̧dejȩ: "Cjäri̧ madirȩ, bëdüa̧ oa cjiamȩ pio ju̧i̧ ta̧rë ja̧bodëpadiro̧jo̧ȩ. Jabechji̧ judiro̧ Moicherea̧rȩ go̧ȩparërea̧ ma̧ȩ pio ju̧i̧ ta̧rë ja̧bodërä judi, ado Ütërë ea jana̧ chjadüa̧ oa ni̧bäji̧ri̧ pio judiro̧ yo̧a̧ duri pio ju̧i̧ ta̧rë ja̧bodërä judi, peaja̧di ta̧rë ja̧bodëpadiro̧jo̧ȩ bëdüa̧mȩ ju̧i̧. Jabechji̧ ja̧boa̧remȩ pio judi bëdü ëte ni̧bä chjaoräbo, irä chi̧dëearäbo, jabechji̧ ta̧rë ja̧bodëpadiro̧jo̧ȩ" dëbë yo̧rëremȩdejȩ Abaraa̧rea̧ judi ji̧ra̧ri̧ goaremȩ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, pjaricheo pio ji̧ri̧iäpȩmo̧bo.

Juan 12:37

Jabechji̧ judi pumȩ ja̧ dachoro co ji̧ra̧ri̧ jauëchja cjiari̧ na̧rȩa̧räbo, quëna̧dëa̧diro̧jo̧ȩ.

Juan 15:24

Ado pio jiro pumȩ pio ji̧ri̧, jabechji̧ chjadëri̧ na̧rȩtea̧requedejȩrȩ. Ji̧ri̧ ja̧ dachoro ana̧ri̧ na̧rȩtea̧requedejȩrȩ. Jabechji̧ eami̧ pumȩ üdë cja̧rȩmȩ co na̧rȩdërërea̧ra̧ pio ju̧ri̧ra̧ na̧rȩtea̧requedejȩrȩ, jauëchja cjiari̧ japamȩrȩ. Jabo cjäri̧ madirȩ. Pio ji̧ri̧ ana̧ri̧ na̧rȩa̧räbo, jabechji̧ goëdëri̧ cjiadiro̧coe, ca̧ Ama̧i̧ pio ju̧i̧bo. Pio ju̧i̧iä chjadë maearä cjiami̧ dari̧ cjiade davä judiro̧ chjai̧dëri̧ japea̧ üdë, ‘chjai̧dëri̧ japadëa̧quëda’ quëna̧rea̧ decjiari̧.

Juan 2:18

Ja̧dëa ji̧ Jechu judi ja̧di dari̧ japea̧ oaiä, judio tjamo̧ yo̧ji̧ri̧ pio judiro̧ ana̧ tjamo̧ri̧ jo̧rȩtaji̧ri̧rȩ iëno̧ë ta̧rëa̧diro̧jo̧ȩ: —¿Jabo tjana̧ ju̧i̧iä ja̧di dari̧ japea̧renȩ? ¿Chjia ja̧ ma̧ȩrä ja̧di dari̧ japarea̧ daea̧renȩ? Mȩnȩ Ütë tjamo̧ ja̧ ma̧ȩrä tjamo̧ri̧ japea̧rä judi, jabechji̧ chjadëri̧ na̧rȩibe jauëchja cjiari̧ japea̧ oaiä —yo̧a̧diro̧jo̧ȩ.

Juan 20:29

Ado Jechu judi yo̧a̧dejȩ: —¿Mȩnȩ coa irä daea̧rämo̧ quëna̧mȩpea̧renȩ? —yo̧a̧dejȩ—. Jabo danȩ, chjadëri̧ cjiadiätädirȩ coa irä dadëräbo quëna̧ji̧ri̧ pio judiro̧. Aja̧, pio coa irä dadëräbo quëna̧ji̧ri̧ pio judiro̧ a̧dë chjäte ma̧ chiadëri̧ cjia jo̧rȩtarea̧ datädirȩ —yo̧mȩrȩ yo̧rëremȩdejȩ Toma ju̧i̧ Jechu judi.

Juan 4:49

Jabo tjamo̧ cjo̧ro̧mȩ üdë cjiadiädëmȩrȩ dëbë yo̧a̧dejȩ: —Danȩ Ano̧mȩ, jo̧ȩra̧pe ëba jäcoe ca̧ ja üdë ja̧bobea yaboi̧.

Japarea̧ 14:3

Jabo pio jibëiäpȩmo̧ ma̧ cjüëtüri̧ jo̧rȩta̧räbo, jabechji̧ japamitë ana̧ri̧ cjiadiärëreji̧ri̧dirȩ Ano̧mȩ Jechu pio ju̧i̧ chjiari ma̧ȩ oa a̧ra̧ano̧pea̧ oa, uapadëji̧ri̧rȩ a̧ra̧ano̧pea̧ oa. Ado ana̧ri̧ na̧rȩrea̧mi̧ dari̧ yürürëremȩdejȩrȩ Jechu judi pio ji̧ri̧iä jauëchja cjiari̧ japarea̧mi̧ dari̧. 'Aja̧, tjamo̧i̧ cjiari̧ a̧ra̧ano̧diro̧ibëda, Ütërë cjäri̧ri̧ cjia yürüa̧ pio ju̧i̧ chjiari ma̧ȩ oa a̧ra̧ano̧diro̧ibëda' quëna̧rea̧mi̧ dari̧ japarea̧ yürürëremȩdejȩrȩ.

Japarea̧ 15:12

Ado Chimo̧ Pedro judi cjiadiäa̧ ji̧, cjapi maearë cjiadiärëreji̧ri̧dirȩ, dëbë yo̧rea̧ decjiari̧. Ado ja̧dëa ji̧ Pablo pio judi ano̧ mire ni̧bä chjaoa̧dejȩrȩ, Bernabe pio judiborë. Judiro̧ judiodë pio ji̧ri̧iäpȩmo̧ a̧ra̧ano̧rërea̧ pio ju̧i̧ chjiari, Ütë tjamo̧ judi pio jibëiä jauëchja cjiari̧ japea̧ pio ju̧i̧ chjiari, judi pio jibëiä ana̧ri̧ na̧rȩ chjaoa̧ pio ju̧i̧ chjiari, ni̧bä chjaorëreji̧ri̧diro̧jȩrȩ.

Japarea̧ 2:19

Ado pio jiro doro jauëchja cjiari̧ na̧rȩparequedejȩrȩ yo̧de Ütë tjamo̧ judi. A̧dëri pio judiri na̧rȩparequedejȩrȩ daburi pio judiribo. Goera̧ pio ju̧ri̧ra̧ na̧rȩparequedejȩrȩ peaja̧di. Ado cjo̧dëra̧ na̧rȩparequedejȩrȩ peaja̧di, ma̧i̧ dari̧ chjära̧bo.

Japarea̧ 2:22

Ado yaba̧ chjadëri̧ ta̧rëchji̧coe. Jabechji̧ ca̧ oti̧ ji̧ri̧, Icharai pio judiri ja̧ maea oa ni̧bä chjaorequededibe —yo̧a̧dejȩrȩ Pedro judi—. Danȩrȩ, Ütë tjamo̧ pio judi jauëchja cjiari̧ jape chjaorëremȩde Jechu pio ju̧i̧iä, Nachareräpȩ cjo̧ro̧rëremȩ pumȩ pio ju̧i̧iä. Aja̧, dibëa̧ chjarerämȩ pio ju̧i̧iä ana̧ri̧ na̧rȩmȩrȩ jauëchja cjiari̧ jape chjaorëremȩde pio dibë chjadëri̧ na̧rȩpea̧ oa, pio dibë chjadëri̧ daba tänȩpea̧ oa. 'Aja̧, Jechu pio judidida, Ütë tjamo̧ judi mitëa̧ pio judidida, Ütë tjamo̧ judi chjadüa̧ pio judi tjamo̧dida' quëna̧rea̧mi̧ dari̧ ana̧ri̧ na̧rȩa̧didibe davä ütëbo ja̧ dachoro.

Japarea̧ 2:43

Ado Ütë tjamo̧ judi Jechurë chjadüa̧ pio ji̧ri̧iä jauëchja cjiari̧ jape chjaorëremȩde. Ado pumȩ judiro̧ pio ju̧i̧ daea̧ oaiä, jabechji̧ ütëborë ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ, dacho bëremi̧ cjiaji̧ri̧rȩ.

Japarea̧ 4:30

Ado yaba̧ Ama̧i̧, jabechji̧ jauëchja cjiari̧ japarea̧ yürüibe a̧ro̧rȩ gito ja̧boji̧ri̧ pio ji̧ri̧ chjadëri̧ chjaparȩpea̧ oa, a̧ro̧rȩ pumȩ ji̧ri̧ chjadëri̧ na̧rȩpea̧ oa. Jabechji̧ Ama̧i̧, na̧ Mu̧i̧tjoi̧ tatachja pio ju̧i̧ ja̧ quȩ oaiä, Jechu pio ju̧i̧ ja̧ quȩ oaiä jauëchjari̧ japarea̧ yürüibe a̧ro̧rȩ chjadëri̧ na̧rȩpea̧ oa. Aja̧ Ama̧i̧, pio ju̧i̧mo̧i̧ ma̧ȩ oa ni̧bärea̧ro̧mȩ. Ja̧ditäde.”

Japarea̧ 5:12

Ado Jechurë chjadüa̧ pio judiro̧ ana̧ri̧ na̧rȩji̧ri̧rȩ jauëchja cjiari̧ chjaparȩ chjaorëreji̧ri̧diro̧jȩrȩ pumȩ no̧i̧dë oa. Ütëborë darea̧mi̧ dari̧ chjaparȩrëreji̧ri̧diro̧jȩrȩ. Ado quëna̧ji̧ri̧ pio judiro̧ ütëborë, jabechji̧ Ütë tjamo̧ ja̧ bë yuroräpȩ ju̧ri̧ ji̧dë ma a̧dope chjaorëreji̧ri̧dirȩ. Ütë tjamo̧ ja̧ bëri pio judiri cjaȩta̧ra̧rimo̧ a̧rüa̧ oa cjiamȩräpȩ ju̧ri̧, tutia̧ oa cjiadëmȩräpȩ ju̧ri̧, 'Choromo̧ ja̧ bë' quȩmȩ bëräpȩ ju̧ri̧ ji̧dë ma a̧dope chjaorëreji̧ri̧dirȩ.

Japarea̧ 6:8

Ado Eteba judi, jabechji̧ Ütë tjamo̧ pio judi tjamo̧ri̧ a̧doa̧ oa cjo̧ro̧rëremȩde, pumȩ ji̧ri̧ ana̧ri̧ jo̧rȩta tänȩmȩrȩ. Tjamo̧ davä. Jauëchja cjiari̧ jape chjaomȩrȩ cjo̧ro̧rëremȩde, pumȩ ji̧ri̧ goae tarari̧ na̧rȩmȩrȩ.

Japarea̧ 7:36

Ado ja̧dëa ji̧ Moiche judi icharaita pio ji̧ri̧ Ejito quȩmȩ chiriri pio judiri yabo ëba go̧dürërea̧ ji̧, jabechji̧ ana̧ri̧ na̧rȩmȩrȩ ëba go̧dürëremȩdejȩrȩ, jauëchja cjiari̧ jape chjaomȩrȩ. Aja̧, Ejitoräpȩ ju̧ri̧, ui coëcoëaräpȩ ju̧ri̧, ado chiri maearäpȩ ju̧ri̧ ana̧ri̧ na̧rȩrëremȩdejȩrȩ ibëa̧ ütëti̧rea̧ ji̧ri̧ 40 ui nö̧ta.

Domano Ma̧ȩ 15:19

Tjamo̧ davä. Pio coaiä ana̧ri̧ ja̧beparëremȩde jauëchja cjiari̧ na̧rȩ chjaomȩrȩ. Tjo tjamo̧ pio judi jibëa̧ jauëchja ana̧ oa yürüa̧ oaiä ja̧di dari̧ ja̧beparea̧ daea̧requede. Danȩrȩ, Quiricho pio ju̧i̧ chjiari ma̧ȩ ütëbo oa to̧bari̧ ni̧bäriä tai̧ chjaorëremȩrequede ma̧ȩ chjadëi̧ pio ju̧i̧. Tjamo̧ davä. Jerucharȩ bë ma̧ri̧ri pio judiri Iriria quȩmȩ chiriräpȩ yuro to̧bari̧ ni̧bäriä tai̧ chjaorëremȩrequede davä, pio jiro ma̧ȩ oa ni̧bä chjaomȩrȩ.

Cori̧tio Ma̧ȩ 1 1:22

Tjamo̧ davä ca̧ oti̧, dai chirirä ja̧ jo̧rȩtaji̧ri̧ pio judiro̧ ta̧rë ja̧bodëdiro̧jo̧ȩ ma̧ȩ chjadëi̧ pio ju̧i̧. Danȩrȩ, judio judiro̧ jauëchja cjiari̧ na̧rȩrea̧ pio ju̧i̧mo̧i̧ jo̧rȩtadirȩ. ‘Aja̧, na̧rȩrea̧ jauëchja pio ju̧i̧mo̧i̧ da oaiä quëna̧paa̧ro̧da’ quëna̧ jo̧rȩtaji̧ri̧rȩ ji̧dë ma yo̧ chjaodirȩ. Ado judiodë pio judiro̧ ji̧dë ma jo̧rȩtadirȩ dai chirirä ja̧ jo̧rȩtarea̧ maea oa. Jabechji̧ judiro̧ chjadëri̧ dadäräji̧ri̧mi̧ cjo̧ro̧tärea̧ ji̧, ji̧dë ma na̧taji̧ri̧mi̧ dari̧ cjo̧ro̧dirȩ, dai chirirä ja̧ jo̧rȩtarea̧ maea oa jo̧rȩtaji̧ri̧rȩ. Tjamo̧ davä ca̧ oti̧, dai chirirä ja̧ jo̧rȩtarea̧ maea oa jo̧rȩtadirȩ.

Cori̧tio Ma̧ȩ 2 12:12

Jabechji̧ cüdë dibëa̧ chjarerä cjo̧ro̧rërea̧ ji̧, chjadëri̧ na̧rȩmȩrȩ cjo̧ro̧rëremȩrequede davä, pio coa chjiari. ‘Aja̧ Pablo judi Jechurë chjadüa̧ pio judi tjamo̧dida, ado pio ju̧i̧iä ana̧ri̧ na̧rȩa̧diibëda, Jechurë chjadüa̧ oa pio judiro̧ na̧rȩmi̧ dari̧ na̧rȩrea̧ ji̧ra̧ tjamo̧ oa na̧rȩa̧diibëda’ quëna̧rea̧mi̧ dari̧ na̧rȩ chjaorëremȩrequededibe ca̧ oti̧. Jabechji̧ cüdë chjai̧dë oa chjätäa̧räbo ji̧dë ma ma̧ chjua jo̧rȩtamȩrȩ jauëchja cjiari̧ jape chjaorëremȩrequededibe dami̧ti̧ jauëchja oa.

Techaronichȩche Ma̧ȩ 2 2:9

Jabo Jechu judi pio jiro pumȩ oa ja̧bo tänȩbea yaboi̧, jabechji̧ Ichiae ja̧ jauëchjara̧ pio ju̧ri̧ra̧ ana̧ri̧ na̧rȩ chjaopadejȩrȩ pumȩ ji̧ri̧iäpȩmo̧ pio ji̧ri̧ u̧i̧papea̧ oa. Jabechji̧ japadai̧ da pio ju̧i̧, eami̧ti̧ na̧rȩrea̧ pio ju̧i̧ na̧rȩcji̧ quëna̧ japamȩrȩ u̧i̧pe u̧i̧pe na̧rȩ chjaopadejȩrȩ, jauëchja cjiari̧ japamȩrȩ.

Ebereo Ma̧ȩ 2:4

Ado Ütë tjamo̧ pio judiborë tjamo̧ri̧ jo̧rȩta tänȩrea̧ yürürëremȩdiibe. ‘Jabechji̧ pumȩ judiro̧ a̧ra̧ano̧a̧ ma̧ȩ üdë tjamo̧i̧ cjiari̧ baädida’ quëna̧rea̧ dapea̧ oa, Ütë tjamo̧ pio judiborë tjamo̧ri̧ jo̧rȩta tänȩrea̧ yürüa̧diibe dami̧ti̧ jauëchja oa japarea̧ yürüa̧ oaiä. Jabechji̧ ana̧ri̧ na̧rȩ chjaorëremȩde Ütë tjamo̧ judi pumȩ pio ji̧ri̧iä, japarea̧mi̧dë pio ju̧i̧bo japa tänȩmȩrȩ. Ado peaja̧di tjaoëti̧ chia ja̧beparea̧ oa yürüchärëremȩdejȩrȩ quëna̧ji̧ri̧ pio ji̧ri̧ Tjo tjamo̧ pio ju̧i̧iä. Jabechji̧ pio jënȩ jo̧rȩta̧mi̧ yürüchärëremȩdejȩrȩ.