Ado Jechu judi pio ju̧i̧ ta̧rëa̧ oaiä yo̧a̧dejȩ Pedro ju̧i̧: —Ütë tjamo̧ judi pio coa chjiari chjadëri̧ daba tänȩa̧ oaiä, jabechji̧ na̧ȩ chiapea̧renȩ —yo̧a̧dejȩ—. Ado pio mȩa ja̧di dari̧ daba tänȩa̧ oaiä, jabechji̧ Ütërë chjadëri̧ a̧doa̧ oa cjiarenȩ. Jabechji̧ eami̧ pumȩ pio judi tänȩa̧ oaiä na̧e chiape bagadëa̧renȩ, jabo jabechji̧ ca̧ Ama̧i̧ pio judi dabarea̧ yürü oaiämo̧i̧ na̧e chiapea̧renȩ. Tjamo̧ davä. A̧dëräpȩ cjiamȩ Ama̧i̧ pio judi daba tänȩa̧ oaiä, na̧e chiapea̧renȩ pio coa chjiari. Ado judi ja̧di dari̧ japea̧ oaiä, jabechji̧ chjadëri̧ a̧doa̧ oa cjiarenȩ.
Juan 3:3 - Biblia Pume3 Ado Jechu judi yo̧a̧dejȩ: —Tjamo̧dë yo̧dërequedemȩ, jabo tjamo̧i̧ cjiari̧ yo̧requedemȩ. Eami̧ pumȩ üdë peaja̧ mape bagari̧ ado nö̧ria̧ oa cjiadërä judi, Ütërë yo̧a̧ chja̧oerä cjo̧ro̧rea̧ dadëpade —yo̧a̧dejȩ. Faic an caibideil |
Juan 3:3
32 Iomraidhean Croise
Ado peaja̧di chjao tjamo̧de putu ju chocomȩ pio judi cararea̧ cjara oa yu̧ë chjätäpea̧ üdë. Jabo danȩrȩ, ji̧dë u̧i̧ chjaode chëre ji̧ra̧ri̧ goamȩ judi Ütërë yo̧a̧ chja̧oerä yu̧a̧pea̧ üdë. Tjamo̧ davä. Putu ju chocomȩ pio judi cararea̧ cjara oa yu̧ë chjätäpea̧ pio ju̧i̧iä ji̧dë u̧i̧ chjaode chëre ji̧ra̧ri̧ goamȩ judi Ütërë yo̧a̧ chja̧oeräpȩ yu̧a̧pea̧ üdë —yo̧a̧dejȩrȩ.
Aja̧ ca̧ pumȩ, pio jiro na̧rȩrea̧ ma̧ȩmi̧ da oa ni̧bä chjaorequededibe —yo̧a̧dejȩrȩ—. Ado yo̧chji̧coe yaba̧. ¿Chjia tjamo̧rëremȩde jäjäarë yo̧a̧mi̧ tjamo̧i̧ cjiari̧ ta̧rëdiämȩ judi? ¿Jabo jibëa̧ ja yabomȩ pio judi, jabo jibëa̧ ja durimȩ pio judi? Chjadëri̧ yo̧chji̧coe —yo̧mȩrȩ yo̧a̧dejȩrȩ. Ado judiro̧ dëbë yo̧a̧diro̧jo̧ȩ: —Chjia tjamo̧dë, danȩ, judi pearä yo̧a̧ pio judi chjadëri̧ ta̧rëdiäa̧dejȩ jäjäa pio ju̧i̧. Ado pio ju̧i̧ ta̧rëa̧ oaiä, Jechu judi yo̧a̧dejȩrȩ: —Aja̧, tjamo̧ri̧ yo̧renȩro̧coe. Ado yaba̧ tjamo̧i̧ cjiari̧ yo̧mȩrȩ yo̧requededibe peaja̧di. Jabechji̧ pio mȩnȩro̧ Ütërë yo̧a̧ chja̧oräpȩ chjaodëri̧ yu̧a̧tärea̧ ji̧, jabechji̧ chjai̧dëri̧ japaji̧ri̧ pio judiro̧ dibëa̧ yaboi̧ yu̧a̧rea̧ dapadirȩ —yo̧a̧dejȩrȩ—. Jabechji̧ pearä yo̧a̧ joja pio judimi̧ dadirȩ judiro̧. Tjamo̧ davä. Ta̧rëdiäa̧mȩ joja pio judimi̧ dadirȩ. Ado pio ju̧i̧iä jabechji̧, domano̧ ja̧ oa chëre oa boaji̧ri̧ pio judiro̧, ado chjai̧dëri̧ japaji̧ri̧ pio judiro̧, jabechji̧ dibëa̧ yaboi̧ yu̧a̧rea̧ dapadirȩ Ütërë yo̧a̧ chja̧oeräpȩ ju̧ri̧. Ado danȩrȩ, ivi jini̧ro̧, chjai̧dëri̧ japaji̧ri̧ pio ji̧ri̧ro̧, jibëa̧ icjara oa oari pio ji̧ri̧iäpȩmo̧ ji̧dë ma yürü chjaoji̧ri̧ pio jini̧ro̧, chëre boapea̧ oa yürüji̧ri̧ pio jini̧ro̧borë dibëa̧ yaboi̧ yu̧a̧rea̧ dapani̧rȩ —yo̧a̧dejȩrȩ—.
Danȩrȩ ca̧ pumȩ, tjamo̧i̧ cjiari̧ yo̧requededibe. Moicherë go̧ȩparërea̧ ma̧ȩ üdë goarijädëpade. Yuropadëpade jabo jabechji̧, ba chia maeari̧ cjiadiäpade a̧dë üdë goarijäa̧rä yuro, pio yoa dabu üdë peaja̧di yuropea̧rä yuro. ‘Jabechji̧ cja̧rȩmȩ ma̧ȩ pio judimo̧rȩ ba chiadë jirodida, cja̧rȩmȩ ma̧ȩ pio judimo̧rȩ badëpapa jirodida’ quëna̧rea̧mi̧dëde, jabo jabechji̧ pio jiro ma̧ȩ üdë chjö̧na̧i̧rȩ tjamo̧i̧ cjiari̧ cjiadiäpade, cja̧rȩmȩ ma̧ȩ üdë a̧dë cjiadiärea̧ decjiari̧.
Ado dibëa̧ dachora̧ pio ju̧ri̧ra̧ ji̧dë ma chjai̧dëri̧ japarä judi, dibëa̧ dacho pio oaiä Ütë tjamo̧ pio ju̧i̧iäpȩmo̧ quëna̧rea̧ dadërä judi, jabechji̧ pupi guachji̧jo̧ȩ dibëa̧ dacho oa. Mȩnȩro̧ cjo̧dë tja ana̧räpȩ dacho chiaji̧ri̧rȩ aeno̧a̧ oa cjiatärea̧ ji̧, jabechji̧ ji̧dë u̧i̧ chjadëtäremȩde mȩnȩro̧ Ütërë yo̧a̧ chja̧oeräpȩ yu̧a̧däräpea̧ ji̧ da cotoji̧ri̧borë.
Jabo pumȩ judiro̧ jibëa̧ bori̧ ji̧ri̧ nö̧rirëmi̧ cjiari̧ nö̧ria̧ oa cjiadëa̧dirȩ. Ëbaji̧ri̧ judiro̧ ëba mo̧a̧ ëte, iei̧rȩ ararä ëbami̧ dari̧ cjo̧ro̧dëa̧dirȩ, jabo jabechji̧ tjaoëpai̧ dari̧ nö̧ria̧ oa cjiadiäa̧dirȩ. Jabechji̧ Ütë tjamo̧ pio judi ütarë jo̧rȩta̧mi̧ nö̧ria̧ oa cjiadiärëreji̧ri̧dirȩ pio ju̧i̧ ja̧ u̧ri̧pe järea̧mi̧ dari̧.
Ado Jechu judi ji̧dë u̧i̧ yo̧mȩrȩ a̧de yo̧rëremȩdejȩrȩ pumȩ ütëbo oa: —Danȩrȩ, tjamo̧dë yo̧dërequededibe jabo tjamo̧i̧ cjiari̧ yo̧requededibe. Ji̧dë duri oa japamitë chjätäa̧rä areië baämȩ oa daparenȩro̧jo̧ȩ a̧dë pio ju̧i̧. Ado Ütë tjamo̧ ja̧ mu̧i̧tjoi̧ judiro̧ pio coaiä a̧dëräpȩmo̧ buadiä buadiä cjiaji̧ri̧ oa daparenȩro̧jȩrȩ. Ado pio coaiä biradiä biradiä cjiaji̧ri̧ oa daparenȩro̧jȩrȩ peaja̧di. Jabechji̧ Pumȩrȩ Ara̧ Tjamo̧ pio judirequede. Ado pio coaiä ja̧di dari̧ japaji̧ri̧ oa daparenȩro̧jȩrȩ. Aja̧, ja̧di ta̧rëri̧ yo̧mȩrȩ yo̧rëremȩdejȩrȩ Jechu judi pio jȩa chjiari judiro̧ dabëmi̧.
“Aja̧, Ütë tjamo̧ judi da coto tänȩmi̧ dari̧ japea̧dejȩrȩ, mo̧a̧ mo̧a̧ cjo̧ro̧ji̧ri̧mi̧ dape järi̧. Ado jibëa̧ chji̧ oa tuti carami̧ dari̧ japea̧dejȩrȩ dabaparea̧mi̧dëri̧. Jabechji̧ judiro̧ chjaparȩa̧ oa cjiami̧ dari̧ cjiachea oa, judiro̧ ano̧ mire jo̧rȩtachea oa, judiro̧ dadiäji̧ri̧mi̧ dari̧ jo̧rȩtachea oa, jabechji̧ ja̧di dari̧ japarëremȩdejȩrȩ Ütë tjamo̧ judi.”
Jabechji̧ Ichiae judi da coto tänȩmi̧ dari̧ japa madejȩrȩ pio jiro pumȩ ji̧ri̧, quëna̧dëji̧ri̧ ja̧ chji̧ pio ju̧i̧. Jabechji̧ judiro̧ coëma cjiari̧ baämȩ no̧mi̧ da oa dachea oa, judiro̧ ji̧dë ma bagönȩmi̧ darä cjo̧ro̧pea̧ oa, da coto tänȩmi̧ dari̧ japa madejȩrȩ. Tjamo̧ davä. Quëna̧dëji̧ri̧ pio judiro̧ Jechu pio ju̧i̧ chjiari ma̧ȩ oa bapë ta̧rëchea oa, judiro̧ tatami̧ damȩ ma̧ȩ pio ju̧i̧ quëna̧chea oa, da coto tänȩmi̧ dari̧ japadejȩrȩ pio yoa chirirä cjo̧ro̧ji̧ri̧ ja̧ ütë pio judi. Jabechji̧ a̧ro̧rȩ ma̧ȩ chjadëi̧ oa a̧ra̧ano̧räbo, a̧ro̧rȩ a̧dë chjäte tatari̧ cjiamȩ pio ju̧i̧ chjiari ma̧ȩ pio ju̧i̧ a̧ra̧ano̧räbo, ta̧rëdë madiro̧ibe. Tjamo̧ davä. A̧ro̧rȩ Quiricho pio ju̧i̧ chjiari a̧ra̧ano̧räbo, a̧ro̧rȩ Ütë tjamo̧ pio judimi̧ damȩ pio ju̧i̧ chjiari a̧ra̧ano̧räbo, cjäri̧ madiro̧ibe, bapë ta̧rëdë madiro̧ibe.
Jabechji̧ eami̧ pumȩ judi Quiricho pio judiri ja̧pe baga̧rä judi, jabechji̧ pea chjari̧ pareapea̧ oa cjiade, pumȩ peaja̧ mape bagarea̧mi̧ dari̧. Jabechji̧ no̧mȩ ja̧ jo̧rȩtarërea̧ üdë, no̧mȩ ja̧ cjo̧ro̧rërea̧ üdë goarijäa̧ oa cjiade. Ado cjo̧ro̧rea̧ peaja̧ra̧ pio ju̧ri̧ra̧ tarupade Quiricho pio ju̧i̧iä. Tjamo̧ davä. Tjaoëpai̧ dari̧ cjo̧ro̧rea̧mi̧ dari̧, tjaoëpai̧ dari̧ jo̧rȩtarea̧mi̧ dari̧ tarupade Quiricho pio ju̧i̧iä ado cja̧rȩmo̧ cjo̧ro̧rea̧ peaja̧ra̧ pio ju̧ri̧ra̧. Ado pio ju̧i̧iä yaba̧, a̧ro̧rȩ eami̧ pumȩ oa darä, quëna̧mȩ pio ju̧i̧ darä, jabechji̧ tjaoëpai̧ dari̧ jo̧rȩtaji̧ri̧rȩ darea̧ro̧jo̧ȩ, pumȩ peaja̧ maea oa.
Pio judirimȩ marë chjätärea̧ yürürëremȩdiibe a̧ro̧rȩ chjadëri̧ japea̧ pio ju̧i̧iädë. Jabechji̧ Ütërë cjäri̧ri̧ cjia jo̧rȩta̧ pio ju̧i̧iämo̧i̧ chjätärea̧ daea̧rea̧rȩ. Ado ibëa̧ tjo oa joami̧ dari̧ japarëremȩdiibe Tjo tjamo̧ ja̧ jauëchja pio oaiä. Ado ja̧di dari̧ japea̧ oaiä, jabechji̧ ado nö̧ria̧ oa cjiadiäa̧rea̧rȩ. Tjamo̧ davä. Pumȩ pea chja mape bagarëreji̧ri̧rea̧rȩ Tjo tjamo̧ ja̧ jauëchja pio ju̧i̧iä.
Jabo a̧dëri pio judiri ma̧na̧mȩ jo̧rȩtarea̧ra̧ cjo̧ro̧mȩ judi, tjaoëpai̧ dari̧ cjo̧ro̧de. Jabechji̧ coëma cjiari̧ cjo̧ro̧de, chjadë maea oa japamȩrȩ. Chjaodëri̧ ërecjiape bagadëde, jabo chjadëri̧ ëba cjo̧ro̧dejȩrȩ jibëa̧ pumȩ ji̧ri̧, ori̧ bagari̧ ëba cjo̧ro̧pea̧ ji̧ järimȩrȩ. Ado ma̧ chjua ëba cjo̧ro̧dejȩrȩ, ütëbo oa eamȩrȩ. Ado ji̧ri̧ ea tjamo̧ tara, jabechji̧ cjäri̧ri̧ cjiamȩrȩ dadejȩrȩ, pio ji̧ri̧ chjiari bücjüri̧ cjiamȩrȩ. Ado pio jȩaiäpȩmo̧ chi̧dëeamȩ pio ju̧i̧, jabechji̧ ma̧ chiadëri̧ cjiamȩrȩ ta̧rë ja̧bodejȩ, ji̧dë u̧i̧ na̧e chiape bagatämi̧ cjiamȩrȩ. Ado jurarea̧ goae tjamo̧ oa yürümi̧ dari̧ cjo̧ro̧de, chjadëri̧ na̧rȩmȩrȩ. Ado o ji̧ri̧mo̧i̧ ba chia dadëdejȩrȩ, jabo ütëbo oa cja̧rȩmȩ ba chiara̧ dadejȩrȩ. Ado coëma cjiari̧ cjo̧ro̧cji̧ quëna̧ japadëmȩde, jabo jabechji̧ coëma cjiari̧ cjo̧ro̧de, yadë maeara̧.
Chjacjiamȩri̧ ni̧bäpea̧de ibëa̧ Ano̧mȩ Jechu pio ju̧i̧ ja̧ Ütë judi, Quiricho pio ju̧i̧ ja̧ Ama̧i̧ judi. Jabechji̧ pio judi ibë a̧dë chjäte cjäri̧ri̧ cjiamȩrȩ jo̧rȩtarërea̧ oaiä, ado nö̧ria̧ oa cjiaji̧ri̧pea̧rea̧rȩ. Tjamo̧ davä. Jechu Quiricho judi ja̧borëremȩrȩ bëdüa̧ oaiä, ado nö̧ria̧ oa cjiaji̧ri̧pea̧rea̧rȩ, a̧ro̧rȩ ma̧diä ma̧diä cjia tänȩdëmȩ jidatarea̧ oa chiaji̧ri̧rȩ cjo̧ro̧pea̧ oa.
Jabechji̧ Quiricho pio ju̧i̧ chjiari, jënȩ a̧dë chjäte coëma cjiari̧ cjiapea̧ pio ju̧i̧ chjiari tjamo̧ri̧ dabanȩrȩ ca̧ oti̧. Ado peaja̧di dabanȩrȩ pumȩ pio ji̧ri̧ chjiari. Jabechji̧ eami̧ pumȩ üdë coëma cjiari̧ cjo̧ro̧rä judi, eami̧ üdë Quiricho pio judimi̧ dari̧ cjo̧ro̧rä judi, jabechji̧ judi jauëchja cjiari̧ ado nö̧ria̧ oa cjiade. Pio ju̧i̧ tjamo̧ri̧ dabarea̧rȩ.
Ütë tjamo̧ pio ju̧i̧iä ado nö̧ria̧ oa cjiamȩ judi chjai̧dë oa japadëmȩde. Jabechji̧ Ütë tjamo̧ pio judiri ma̧na̧mȩ cjo̧ro̧rea̧ peaja̧ pio ju̧i̧ chiamepea̧ oaiä, Ütë pio judiri ma̧na̧mȩ jo̧rȩtarea̧ pio ju̧i̧ chiamȩpea̧ oaiä, jabechji̧ chjai̧dë oa japarea̧mi̧dëde. Jabechji̧ judi Ütë tjamo̧ pio ju̧i̧iä jauëchja cjiari̧ ado nö̧ria̧ oa cjia tara, pio ju̧i̧ ja̧ joja tjamo̧pe baga̧ tara, jabechji̧ chjai̧dë oa japarea̧mi̧dëde.
Eami̧ pumȩ üdë Jechu pio ju̧i̧ chjiari quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Tjamo̧ davä. Eami̧ pumȩ üdë coëma cjiari̧ quëna̧rä judi, ‘Aja̧, Jechu judi Ütërë mitëa̧ Chjätä Tänȩmȩ pio judi tjamo̧dida, Ütë tjamo̧ judi a̧dëri pio judiri chjadürërea̧ pio judi tjamo̧dida’ quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Ado danȩrȩ ca̧ oti̧, a̧ro̧rȩ ju̧i̧ ea tjamo̧rä judi, ibë ado nö̧ria̧ oa cjia tänȩa̧mȩ pio ju̧i̧ ea tjamo̧rä judi, peaja̧di ea tjamo̧rea̧ro̧jȩrȩ ado nö̧ria̧ oa cjiaji̧ri̧ pio ji̧ri̧iäpȩmo̧.
Ja̧dëa ji̧ coa ni̧bämȩ judi, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Daodichea quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Aja̧, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, ‘Ja̧ditäde’ quȩmȩ pio judirequede. Pio coaiä tjamo̧i̧ cjiari̧ cjiade Ütë tjamo̧ ja̧ ma̧ȩ üdë. Pio judi yo̧a̧mi̧ japadärämȩrequede a̧dë chiquirea̧ decjiari̧. Jabechji̧ judi pearä judirä pareaparërea̧ üdë pio coaiämo̧i̧ taruparëremȩde. Ado pio judimȩrȩ ma̧ȩ yürürequededibe.
Sanasan