Juan 3:15 - Biblia Pume

¹⁵ Ado eami̧ pumȩ üdë pio coa quëna̧rä judi, toro cji̧däa̧ oa cjiapamȩ pio coa quëna̧rä judi, jabechji̧ bucho ana̧ cjo̧ro̧rea̧ dapade.

Juan 3:15 Iomraidhean Croise

Ichaia 45:22

Ado pio cüdëmo̧ tara, jabechji̧ pio coaiäpȩmo̧ ma quëna̧täreji̧ri̧dirȩ pumȩ judiro̧. Aja̧, chjätärea̧ dapea̧ oa pio coaiäpȩmo̧ ma quëna̧täreji̧ri̧dirȩ. Jabechji̧ Ütë tjamo̧ pio judirequede. Ado cja̧rȩmo̧ decjiade.

Ütararea̧ Ma̧ȩ 21:9

Pio ju̧i̧iä Moiche judi boro̧che quȩmȩ chjipararira̧ pio ju̧ri̧ra̧ mo̧ȩa̧dejȩ pomi̧ da oa. Ado ja̧di dari̧ japa ëte, toro cji̧därëremȩdejȩ icharaita judiro̧ ütëborë darea̧mi̧ dari̧. Ado eami̧ pumȩ üdë pio ju̧i̧iäpȩmo̧ daea̧ oaiä, jabechji̧ chjaodëri̧ chjapea̧de ja̧botärea̧ ji̧.

Mateo 18:10

Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: ⁠—⁠Danȩrȩ, na̧e chia tjamo̧chji̧vä ado ja̧di, mȩnȩro̧ eami̧ boi̧chji̧mi̧ damȩ pio ju̧i̧ badë dachea oa ⁠—⁠yo̧a̧dejȩrȩ⁠—⁠. Tjamo̧ davä. Ba chiadëmȩmi̧ damȩ pio ju̧i̧ badë dachea oa, pea quëna̧mȩpea̧ pio ju̧i̧ badë dachea oa, jabechji̧ na̧e chia tjamo̧chji̧vä. Jabechji̧ chjadëri̧ jida̧ oa cjiadirȩ. Jabechji̧ Ütë tjamo̧ pio judi tänȩa̧ oaiä, a̧dëriji̧ri̧ mu̧i̧tjoi̧ ba chia tjamo̧ pio judiro̧ chjadëri̧ jidadiro̧jo̧ȩ ba chiadëmȩmi̧ damȩ pio ju̧i̧. Ado danȩrȩ, ca̧ Ama̧i̧ pio judi pio jiro ja̧beparea̧ ba chia oa jibëa̧ mu̧i̧tjoi̧ pio ji̧ri̧iäpȩmo̧ yürüa̧ oaiä, ado pio jiro mu̧i̧tjoi̧ judiro̧ ca̧ Ama̧i̧ pio ju̧i̧ nö̧ta ji̧dë ma ëba cjiarea̧ da oaiä ¿yö̧ta dari̧ jo̧rȩtaji̧ri̧rȩ datäreji̧ri̧rea̧rȩ ba chiadëmȩmi̧ damȩ pio ju̧i̧? Yö̧ta dari̧dë, jabechji̧ badë dadë matäreji̧ri̧rea̧ro̧jȩrȩ, jabo ba chia tjamo̧ datäreji̧ri̧rea̧ro̧jo̧ȩ ji̧dëri̧ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Mateo 25:46

Ja̧dëa ji̧ cjiadiärea̧ ma̧ȩ pio ju̧i̧ a̧de ni̧bä chjaorëremȩdejȩrȩ: ⁠—⁠Danȩrȩ ca̧ jadü, pio jiro pumȩ judiro̧, coa a̧dodëji̧ri̧mi̧ dari̧ japareji̧ri̧ pio judiro̧, jabechji̧ baäpadirȩ bucho ana̧ bape chjaoa̧ oa cjiapea̧ oa. Jabo jabechji̧parȩa̧ oa cjiaji̧ri̧ pumȩ pio judiro̧ baäpadirȩ bucho ana̧ cjo̧ro̧pea̧ oa ⁠—⁠yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, ya̧mi̧räpȩ chaji̧ri̧ oa.

Marcos 16:16

Ado eami̧ pumȩ üdë pio coaiäpȩmo̧ quëna̧mȩ pio judi, go̧ȩ cjaeä chuda̧ oa cjiamȩ pio judi, jabechji̧ chjätärea̧ dapade. Jabo pio coaiäpȩmo̧ quëna̧dëmȩ pio judi aeno̧a̧ oa cjiapade.

Lucas 19:10

Jabechji̧ Pumȩrȩ Ara̧ Tjamo̧ pio judi na̧era̧pea̧dejȩrȩ dabadëpea̧ oa cjiami̧ dari̧ cjiaji̧ri̧ pio ji̧ri̧, pio ji̧ri̧ chjadëri̧ chjätärea̧ yürüpea̧ oa —yo̧mȩrȩ yo̧rëremȩdejȩ Jechu judi Chaqueo pio ju̧i̧iäpȩmo̧.

Juan 1:12

Jabo o judiro̧ jiadadëa̧diro̧jo̧ȩ. Ba chia daea̧diro̧jo̧ȩ. Quëna̧diro̧jo̧ȩ. Ado pio ji̧ri̧iäpȩmo̧ Ütë tjamo̧ ja̧ u̧ri̧pe bagarea̧ yürürëremȩdejȩrȩ pio jȩaiäpȩmo̧ quëna̧ji̧ri̧ oa.

Juan 16:33

Ado pio coadimȩ tara, ja̧di ta̧rëri̧ ni̧bä chjaorequededibe mȩnȩro̧ pio coaiä chji̧ goaera̧ ma̧ chjupi̧ cjiari̧ jo̧rȩtarea̧ dapea̧ oa. Danȩrȩ, dai chirirä ja̧ jo̧rȩtarea̧ra̧ jo̧rȩtaji̧ri̧ judiro̧, dëdë, conȩdapadiro̧dibe. Jabo ja̧di dari̧ japea̧räbo, järichji̧vä. Uapadëchji̧vä. Jabechji̧ dai chirirä ja̧ chjai̧dë pio ju̧i̧ boadäräa̧reconȩ chjö̧na̧i̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Juan 20:31

Jabo danȩrȩ, cüdë go̧ȩpea̧ ma̧ȩ üdë, jabechji̧ mȩnȩro̧ chjadëri̧ quëna̧pea̧ oa go̧ȩpea̧ oa cjiade. ‘Aja̧, Jechu judi Ütërë mitëa̧ Chjätä Tänȩmȩ pio judidida, Ütë tjamo̧ ja̧ Joja pio judi tjamo̧dida’ quëna̧ dabapea̧ oa go̧ȩpea̧ oa cjiade pio mȩnȩro̧ Jechu pio ju̧i̧ quëna̧ oaiä bucho ana̧ cjo̧ro̧rea̧ dapea̧ oa.

Juan 3:16

Jabechji̧ Ütë tjamo̧ judi pumȩ ütëbodärä oa ea tjamo̧ tara, tuti yürürëremȩdejȩ jibëa̧ Ja oa pumȩ pio ji̧ri̧ chjiari ano̧ mire ja̧bopea̧ oa. Yo̧a̧ri̧ oa ëbadëmȩborë chjadürëremȩdejȩ, pio ju̧i̧mo̧i̧ ëbamȩrȩ. Ado eami̧ pumȩ judi, pio ju̧i̧iäpȩmo̧ quëna̧mȩ judi, jabechji̧ bucho ana̧ cjo̧ro̧rea̧ dapade aeno̧rea̧ decjiari̧.

Juan 3:36

Ado eami̧ pumȩ üdë, Joja pio ju̧i̧ quëna̧mȩ pio judi, jabechji̧ bucho ana̧ cjo̧ro̧rea̧ chiade. Jabo eami̧ pumȩ üdë, Joja pio ju̧i̧ jiadamȩ pio judi, cjäri̧ made, bucho ana̧ cjo̧ro̧rea̧ chiadëpade, jabo Ütë ja̧ ërecjiarea̧ra̧ pio ju̧ri̧ra̧ bape chjaopea̧ maearë cjorode.

Juan 5:24

Jabo Jechu judi cjiadiädëmȩrȩ ji̧dë u̧i̧ ni̧bä chjaoa̧dejȩrȩ, ja̧di ta̧rëri̧ a̧de yo̧mȩrȩ: —Danȩrȩ, tjamo̧i̧ cjiari̧ yo̧requededibe. Cüdë ni̧bä chjaoa̧ pio ju̧i̧ ta̧rë ja̧boji̧ri̧ pio judiro̧, coa chjadüa̧mȩ pio ju̧i̧ quëna̧ji̧ri̧ judiro̧, jabechji̧ bucho ana̧ cjo̧ro̧rea̧ dadirȩ —yo̧a̧dejȩrȩ—. Jabechji̧ bape chjaoa̧ oa cjiadëpadirȩ, jabo bucho ana̧ cjo̧ro̧rea̧ daji̧ri̧pea̧dirȩ, ja̧boa̧mi̧ dari̧ cjiarërea̧ ji̧.

Juan 6:27

Jabo danȩrȩ, bücjüri̧ cjiadë machji̧vä badëmȩ jurarea̧ pio ju̧i̧ boapea̧ ji̧. Jurucjü chiapai̧damȩ jurarea̧ pio ju̧i̧, chjuadëpe bagapai̧damȩ jurarea̧ pio ju̧i̧ boapea̧ ji̧ bücjüri̧ cjiadë ma̧chji̧vä. Jabo jabechji̧, ji̧dë ma bücjüri̧ cjiatäreji̧ri̧nȩrȩ jurarea̧ chjadëi̧ pio ju̧i̧ boami̧ dari̧ jo̧rȩtapea̧ ji̧, bucho ana̧ cjo̧ro̧rea̧ yürümȩ jurarea̧mi̧ damȩ pio ju̧i̧. Danȩrȩ, Pumȩrȩ Ara̧ Tjamo̧ pio judirequede. Ado pio jiro jurarea̧mi̧ da oa yürüparequededibe. Jabechji̧ pio dibëiäpȩmo̧ yürüpea̧ oa chjadürëremȩdique Ama̧i̧ Ütë judi —yo̧mȩrȩ yo̧a̧dejȩrȩ Jechu judi.

Juan 6:40

Jabechji̧ ja̧di dari̧ eade ca̧ Ama̧i̧ judi. Pio coa da ëte quëna̧ji̧ri̧ pio judiro̧ ütëborë bucho ana̧ cjo̧ro̧rea̧ datä ea madejȩrȩ. Pio ju̧i̧iä quëna̧ji̧ri̧ pio ji̧ri̧, dëdë, bëdü tänȩparequedejȩrȩ cjiadiäa̧ japamitërä, judiro̧ tjamo̧ri̧ bucho ana̧ cjo̧ro̧rea̧ dapea̧ oa —yo̧mȩrȩ yo̧rëremȩdejȩrȩ Jechu judi pio jȩa na̧tarëreji̧ri̧ pumȩ pio ji̧ri̧iäpȩmo̧.

Juan 6:47

Ado pio ju̧i̧iä tjamo̧i̧ cjiari̧ yo̧requededibe. Pio coa quëna̧mȩ pio judi, jabechji̧ bucho ana̧ cjo̧ro̧rea̧ chiade.

Japarea̧ 13:41

"Danȩrȩ, goaeri̧ ya̧ji̧ri̧renȩro̧coe. 'Aja̧, Ütëdëde. Ado judi yo̧a̧mi̧ japadëmȩde’ yo̧ji̧ri̧nȩrȩ pio coa chjiari. Jabo danȩrȩ mȩnȩro̧, ana̧ tjamo̧ri̧ jo̧rȩtapanȩrȩ davä cüdë japapea̧ pio ju̧i̧ chjiari. Ado ja̧dëa ji̧ mȩnȩro̧ pio ju̧i̧ daea̧ duri oa, jabechji̧ goari jä tänȩa̧ oa cjiapanȩrȩ. Jabo mȩnȩro̧ jabë cjo̧ro̧ro, jabechji̧ dacho bërëmi̧ cjiari̧ jo̧rȩtaji̧ri̧rȩ dapanȩrȩ ma̧i̧ da oa. Jabechji̧ a̧dë chjäte uapai̧ da oa japaparequededibe mȩnȩro̧ quëna̧rea̧mi̧dë pio ju̧i̧. Aja̧, mȩnȩro̧ o ji̧ri̧iä cüdë japapea̧ pio ju̧i̧ chjiari irä ta̧rëa̧räbo, jabechji̧ quëna̧dëtäreji̧ri̧nȩrȩ.” Aja̧ ca̧ oti̧, ja̧di ta̧rëri̧ yo̧rëremȩde Ütë tjamo̧ judi pio jȩa jiadapaji̧ri̧ pio ji̧ri̧ chjiari. Peadëri ja̧ go̧ȩpea̧ oa cjiarëremȩde ma̧ȩ üdë. Pio ju̧i̧iä chjadëri̧ ta̧rë ja̧botäreji̧ri̧nȩrȩ ma̧ȩ oa, cüdë dibë ni̧bä chjaoa̧ ma̧ȩ oa. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Pablo judi. Ado judiri cjiadiäa̧de.

Japarea̧ 8:36

Ado japamitë chjätä ëte, charara̧ jäji̧ri̧rȩ tja boi̧chji̧ oa dae chjätärëreji̧ri̧diro̧jo̧ȩ. Ado Etiopiarimȩ judi pio ju̧i̧ daea̧ oaiä, yo̧a̧dejȩ Felipe ju̧i̧: —Danȩ, pio ju̧ri̧pȩde ui üdë. Jabechji̧, ¿chjadëdëtäremȩde mȩnȩ coa uirä go̧e cjaeä chudarä judi?

Domano Ma̧ȩ 5:21

Pio ju̧i̧iä yo̧requededibe. Pearä judi a̧ro̧rȩ chjai̧dëri̧ japea̧ oaiä, jabechji̧ ja̧bopea̧ chja̧oerämo̧ cjo̧ro̧rëreji̧ri̧rea̧rȩ. Jabo ja̧didëde yaba̧. Ütërë cjäri̧ri̧ cjia da̧ chja̧oerä ano̧ mire cjo̧ro̧rea̧rȩ. Pio judi ano̧ mire boami̧ dari̧ japea̧diibe. Ado pio ju̧i̧iä jabechji̧parȩa̧ oa cjiarea̧rȩ bucho ana̧ cjo̧ro̧rea̧mi̧ dari̧. Tjamo̧ davä. Ja̧bopea̧ chja̧oerä cjo̧ro̧rërea̧ ji̧, Ütërë cjäri̧ri̧ cjia da̧ chja̧oerä ano̧ mire cjo̧ro̧rea̧rȩ yaba̧, ibëa̧ Ano̧mȩ Jechu Quiricho pio ju̧i̧iä.

Cori̧tio Ma̧ȩ 1 1:18

Jabechji̧ Jechurë toro ja̧boa̧ pio ju̧i̧ chjiari ma̧ȩ üdë ‘tëracaba madida, badë madida’ quëna̧ jo̧rȩta maeadiro̧jo̧ȩ aeno̧a̧ oa cjiapaji̧ri̧ pio judiro̧. Jabo chjätärea̧ daea̧ji̧ri̧ pio judiro̧, cjäri̧ marea̧ro̧jo̧ȩ, ja̧di dari̧ jo̧rȩtadë marea̧rȩ, jabo ba chia jo̧rȩtarea̧ro̧jo̧ȩ pio jiro ma̧ȩ oa. ‘Jabechji̧ Quiricho pio ju̧i̧ chjiari ma̧ȩ üdë ana̧ri̧ na̧rȩdiibëda, Ütë tjamo̧ ja̧ jauëchja pio ju̧i̧ chjiari na̧rȩdiibëda, jabechji̧ pio jiro ma̧ȩ oaiä quëna̧dëji̧ri̧ pio judiro̧ chjätärea̧ dapai̧ dadiro̧da’ quëna̧ jo̧rȩtarea̧ro̧jo̧ȩ. Tjamo̧ davä ca̧ oti̧. Danȩrȩ, eami̧ pumȩ üdë pio jiro ma̧ȩ oa quëna̧ oaiä Ütë tjamo̧ ja̧ jauëchja pio ju̧i̧iä chjätärea̧ dade. Jabechji̧ aeno̧rea̧ pio ju̧i̧mo̧i̧ nö̧tarërea̧ ji̧, chjätärea̧ daea̧ji̧ri̧pea̧dirȩ jënȩro̧ quëna̧ pio ju̧i̧iä, Ütë ja̧ jauëchja pio ju̧i̧iä. Ado pio ju̧i̧iä yo̧requededibe ca̧ oti̧. Ma̧ȩ chjadëi̧ üdë ana̧ri̧ na̧rȩdiibe Ütë tjamo̧ ja̧ jauëchja pio ju̧i̧ chjiari.

Cori̧tio Ma̧ȩ 2 4:3

Tjamo̧ davä, coëma cjiari̧ a̧ra̧ano̧rea̧ro̧dibe ma̧ȩ chjadëi̧ pio ju̧i̧. Jabo a̧ro̧rȩ ja̧di dari̧ a̧ra̧ano̧a̧räbo, goadia̧ oa cjiami̧ dari̧ cjiade ma̧ȩ üdë o ji̧ri̧iä, bucho ana̧ aeno̧a̧ oa cjiapaji̧ri̧ pio ji̧ri̧iä.

Garata Ma̧ȩ 2:16

Jabo judio maearë cjo̧ro̧ji̧ri̧borë na̧e chiaji̧ri̧pea̧rea̧rȩ jabo. 'Jabechji̧ Jechu Quiricho pio ju̧i̧ quëna̧rämo̧ jabechji̧parȩrea̧mi̧ dadida, Moicherë go̧ȩparërea̧ ma̧ȩ oa ta̧rëdiäa̧ oaiä jabechji̧parȩrea̧mi̧dëdida' quëna̧ jo̧rȩtaji̧ri̧pea̧rea̧rȩ, tjamo̧ri̧ dabaji̧ri̧rȩ. Jabechji̧ judioji̧ri̧borë Jechu Quiricho pio ju̧i̧ quëna̧ji̧ri̧pea̧rea̧ro̧jo̧ȩ. Ado pio ju̧i̧ quëna̧ oaiä jabechji̧parȩa̧ oa cjiadiäa̧rea̧rȩ, Moicherë go̧ȩparërea̧ ma̧ȩ oa nö̧tadäräri̧ ta̧rëdiäa̧ oaiädë.

Garata Ma̧ȩ 2:20

Jabechji̧ Quiricho pio ju̧i̧ nö̧ta toro cji̧däa̧ oa ja̧boa̧requede. Jabo pio ju̧i̧ nö̧ta ja̧boa̧mȩborë, jabechji̧ cjo̧ro̧requede ado chjereno̧. Jabo cüdë tjamo̧dërequede, jabo Quiricho pio judide. Jabechji̧ ca̧ icjararä chjai̧dërë chi̧dëea̧ chja̧oerä cjo̧ro̧dërequede, jabo tjamo̧ cjo̧ro̧mȩ Quiricho pio ju̧i̧ ja̧ chja̧oerämo̧ ano̧ mire cjo̧ro̧requede yaba̧. Aja̧, pio judi tjamo̧de pio coaiä ja̧bepamȩ judi. Ado yaba̧ Ütë tjamo̧ pio ju̧i̧ ja̧ Joja pio ju̧i̧ quëna̧mȩrȩ cjo̧ro̧requede, pio coa ea tjamo̧mȩ pio ju̧i̧. Aja̧, jibëa̧ icjara oa tuti yürürëremȩ pio ju̧i̧ quëna̧mȩrȩ cjo̧ro̧requede yaba̧ pio cüdë ano̧ mire cjo̧ro̧pea̧ oa.

Ebereo Ma̧ȩ 10:39

Jabo cjäri̧ marea̧rȩ ca̧ oti̧, a̧ro̧rȩ duriräpȩmo̧diämi̧ dari̧ japaji̧ri̧ pio judiro̧dë marea̧rȩ. Pio a̧ro̧rȩ duriräpȩmo̧diämi̧ dari̧ japea̧ oaiä, bape chjaoa̧ oa cjiapaji̧ri̧ pio judiro̧dë marea̧rȩ, jabo jabechji̧ ji̧dë ma chjuari̧ quëna̧paji̧ri̧ pio judiro̧rea̧rȩ. Ado pio ju̧i̧iä chjadëri̧ chjätärea̧ daparea̧rȩ.

Ebereo Ma̧ȩ 7:25

Ado pio ju̧i̧iä nö̧tade pumȩ ji̧ri̧ ji̧dë ma chjätä tänȩpea̧ ji̧. Ado pio ju̧i̧iä eami̧ pumȩ oa, Jechu pio ju̧i̧ quëna̧mȩ oa, Ütë tjamo̧ pio ju̧i̧iäpȩ jämi̧ dari̧ quëna̧mȩ oa, jabechji̧ chjätärea̧ yürüdejȩ. Jabechji̧ judi bucho ana̧mȩ tara, judi ja̧bodëmȩ tara, jabechji̧ pio ibë chjiari ji̧dë ma goë tuti cjo̧dëpai̧ dade Ütë tjamo̧ pio ju̧i̧iä.

Juan Ma̧ȩ 1 2:25

Jabechji̧ Ütë tjamo̧ pio judi ibë yo̧ë cji̧därërea̧mi̧ ori̧ bagari̧ ëba cjo̧ro̧rea̧ daea̧rea̧rȩ, bucho ana̧ cjo̧ro̧rea̧ chiaji̧ri̧rȩ.

Juan Ma̧ȩ 1 5:1

Eami̧ pumȩ üdë Jechu pio ju̧i̧ chjiari quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Tjamo̧ davä. Eami̧ pumȩ üdë coëma cjiari̧ quëna̧rä judi, ‘Aja̧, Jechu judi Ütërë mitëa̧ Chjätä Tänȩmȩ pio judi tjamo̧dida, Ütë tjamo̧ judi a̧dëri pio judiri chjadürërea̧ pio judi tjamo̧dida’ quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Ado danȩrȩ ca̧ oti̧, a̧ro̧rȩ ju̧i̧ ea tjamo̧rä judi, ibë ado nö̧ria̧ oa cjia tänȩa̧mȩ pio ju̧i̧ ea tjamo̧rä judi, peaja̧di ea tjamo̧rea̧ro̧jȩrȩ ado nö̧ria̧ oa cjiaji̧ri̧ pio ji̧ri̧iäpȩmo̧.

Juan Ma̧ȩ 1 5:20

Ado peaja̧di dabarea̧rȩ Ütë tjamo̧ ja̧ Joja judi birë ma̧na̧pea̧ pio ju̧i̧ chjiari. Aja̧, ma̧na̧rëremȩde, ado yürürëremȩdiibe dabarea̧ oa, a̧ro̧rȩ 'Ütë tjamo̧ pio judidida' quëna̧ dabarea̧ dapea̧ oa. Ado yaba̧, a̧ro̧rȩ Ütë tjamo̧ pio ju̧i̧ tjamo̧ri̧ dabaji̧ri̧pea̧ tara, jabechji̧ pio ju̧i̧ nö̧ta ori̧ bagari̧ ëba cjiarea̧ daea̧rea̧rȩ a̧ro̧rȩ Jechu Quiricho pio judiri ja̧ mapea̧ tara, a̧ro̧rȩ Ütë tjamo̧ ja̧ Joja pio judiri ja̧ mapea̧ tara. Jabechji̧ Jechu Quiricho judi Ütë tjamo̧ pio judide. Ado pio judi tjamo̧de pio ibëiäpȩmo̧ bucho ana̧ cjo̧ro̧rea̧ yürümȩ judi.