Jabo Ütë tjamo̧ ja̧ ma̧ȩ üdë jibëa̧ chji̧rä tacö̧ urëdi oa chiami̧ dari̧ cjiadëa̧ oaiä, jabechji̧ japamitë boi̧chji̧ maea oa jo̧rȩtadiro̧jo̧ȩ. Ja̧dëa ji̧ judiro̧ eami̧ chjai̧dë oa chjätärä, chjaodëri̧ putu jura̧ a̧dë chaji̧ri̧mi̧ dari̧ japadiro̧jo̧ȩ Ütë tjamo̧ ja̧ ma̧ȩ oa. Tjamo̧ davä. O judiro̧ pio jibëiäpȩmo̧ conȩda̧rä, jënȩro̧ quëna̧ji̧ri̧pea̧ oaiä conȩda̧ oa cjiarä, cjäri̧ madirȩ, chjaodëri̧ putu jura̧ a̧dë chaji̧ri̧mi̧ dari̧ japadiro̧jo̧ȩ ma̧ȩ oa, teracaba pio ju̧i̧ ado chjereno̧ quëna̧ji̧ri̧pe bagarea̧mi̧ dari̧.
Juan 15:5 - Biblia Pume5 —Danȩrȩ ca̧ jadü, uva to tarumi̧ dari̧ cjiarequede cüdë. Ado mȩnȩro̧ a̧mi̧ darenȩrȩ. Ado eami̧ pumȩ üdë pio coaiä cjo̧ro̧rä judi, taruri pio judiri a̧mi̧ dari̧ cjo̧ro̧rä judi, jabechji̧ jurarea̧ ji̧ra̧ tjamo̧ oa chiamȩmi̧ dari̧ cjo̧ro̧pade —yo̧a̧dejȩrȩ—. Jabo jibëa̧ma̧i̧ cjiarä judi, pio coaiä cjo̧ro̧dërä judi, jurarea̧ chiadëmȩmi̧ dari̧ cjo̧ro̧pade. Jabechji̧ taruri ja̧dëmȩmi̧ dari̧ cjiadiäpade, eami̧ oa japarea̧ decjiari̧. Faic an caibideil |
Juan 15:5
28 Iomraidhean Croise
Ado pio ju̧i̧iä tjamo̧i̧ cjiari̧ yo̧requededibe. Tirigo quȩmȩ cho üdë daburo ponȩrä, buiude ji̧ra̧ tjamo̧pe järea̧mi̧ dari̧. Cho iremȩ üdë ja̧boa̧rämo̧ buiurea̧mi̧ dade cho tjoremȩ üdë. Ado buiuro, no̧i̧dë tjamo̧pe bagapade. Jabo iremȩ üdë ja̧bodërä judi, buiudëpade. Iremȩ üdë ja̧bodërä judi, jibëa̧ma̧i̧ cjiami̧ dari̧ cjiadiäpade cho üdë. Jabechji̧ ji̧ra̧ jätärea̧ ji̧, jibëa̧ma̧i̧mi̧ dari̧ cjiadiäpade. Jabechji̧ ja̧bopea̧ chiade iremȩ üdë jibëa̧ma̧i̧ cjiami̧ dari̧ cjiachea oa —yo̧mȩrȩ yo̧rëremȩdejȩrȩ Jechu judi jënȩ ja̧bopea̧ pio ju̧i̧ chjiari.
Jabechji̧ mitëa̧requededibe. Pio mȩnȩro̧ coa mitëdëa̧renȩro̧coe, jabo pio cüdë mitëa̧requededibe dibë. Ado dibë mitë ëte, chjadüa̧requededibe —yo̧a̧dejȩrȩ—. Mȩnȩro̧ ba chia oa ja̧bepapea̧ oa, jurarea̧ ji̧ra̧ tjamo̧ oa chiaji̧ri̧mi̧ dari̧ cjo̧ro̧pea̧ oa, bucho ana̧ cjiamȩ jurarea̧ ji̧ra̧ tjamo̧ oa chiaji̧ri̧mi̧ dari̧ ja̧bepapea̧ oa chjadüa̧requededibe —yo̧a̧dejȩrȩ—. Ado ja̧di tara mȩnȩro̧ Ama̧i̧ tjamo̧ pio ju̧i̧iä eami̧ oa cjo̧dërä, ca̧ quȩ oaiä cjo̧dërä, jabechji̧ mȩnȩro̧ cjo̧dëa̧mi̧ yürüpadidibe —yo̧a̧dejȩrȩ—.
Pio ju̧i̧iä Jechu judi yo̧rëremȩdejȩrȩ judio tjamo̧ yo̧ji̧ri̧ pio ji̧ri̧iäpȩmo̧: —Danȩrȩ, tjamo̧i̧ cjiari̧ baämȩ ma̧ȩ pio ju̧i̧ yo̧requededibe —yo̧a̧dejȩrȩ—. Ja tjamo̧ pio judirequede. Ado ca̧ea̧ ma̧na̧ri̧ jo̧rȩtamȩrȩ japadërequede. Jabechji̧ jape cjiamȩ oa dae chjaoreconȩ ca̧ Ama̧i̧ ju̧i̧. Ado judi japea̧ pio ju̧i̧mo̧i̧ japarequede cüdë. Pio judi japami̧ dari̧ japarequede, Ja tjamo̧mȩrȩ.
Jabo danȩrȩ ca̧ oti̧, jare chjadüa̧ oa cjiami̧ dari̧ cjianȩrȩ yaba̧. Chjai̧dërë yo̧a̧ chja̧oeri pio judiri go̧düa̧ oa cjianȩrȩ jare chjadüa̧ cjiami̧ dari̧. Tjamo̧ davä. Chjai̧dërë yo̧a̧ chja̧oerä cjo̧ro̧rërea̧ ji̧, Ütë tjamo̧ pio ju̧i̧ ja̧ mu̧i̧tjoi̧pea̧nȩrȩ. Ado pio ju̧i̧iä Ütë tjamo̧ pio ju̧i̧ ja̧ mape bagari̧ cjianȩrȩ, china̧chjari̧ tutia̧ oa cjiaji̧ri̧rȩ. Ado ju̧i̧ uëri bucho ana̧ cjo̧ro̧rea̧ dapanȩrȩ peaja̧di. Ado pio ju̧i̧iä yo̧requededibe ca̧ oti̧.
Danȩrȩ ca̧ oti̧, peaja̧dirëremȩde pio ibëiä. A̧ro̧rȩ pearä judi Moicherë go̧ȩparërea̧ ma̧ȩrä cjo̧ro̧rëreji̧ri̧rea̧rȩ. Aja̧, pio jiro ma̧ȩ üdë chi̧dëea̧rä cjo̧ro̧rëreji̧ri̧rea̧rȩ, pio ju̧i̧ ja̧ chja̧oerä cjiaji̧ri̧rȩ. Jabechji̧ ibëa̧ üi̧mi̧ darëremȩde. Jabo danȩrȩ, pio ju̧i̧ ja̧ chja̧oerä cjo̧ro̧dë marea̧rȩ yaba̧. A̧dë ja̧boa̧rea̧ro̧jo̧ȩ. Jabechji̧ a̧ro̧rȩ Quiricho pio ju̧i̧ ja̧ icjararä cara̧ oa cjia̧ oaiä, jabechji̧ ja̧boa̧rea̧rȩ pio ju̧i̧ nö̧ta. Chia ja̧borëremȩdiibe. Ado chia bëdürëremȩdiibe peaja̧di a̧ro̧rȩ tjaoëpai̧ dari̧ cjo̧ro̧pea̧ oa. Jabechji̧ ibëa̧ üi̧mi̧ darëremȩ pio ju̧i̧ ëbami̧ dari̧ cjiarërea̧ ji̧, Quiricho pio ju̧i̧ ano̧ mire ëbami̧ dari̧ cjiarea̧rȩ. Aja̧, Jechu pio ju̧i̧iä bëdüa̧ oa cjiarea̧rȩ yaba̧, Ütë tjamo̧ pio ju̧i̧ ja̧ oa chjadëri̧ na̧rȩji̧ri̧rȩ cjo̧ro̧pea̧ oa, jurarea̧ ji̧ra̧ tjamo̧ oa chiarea̧mi̧ dari̧.
Danȩrȩ, a̧ro̧rȩ a̧dopea̧ oa cjiarä, a̧ro̧rȩ Ano̧mȩ pio ju̧i̧ ja̧ icjara oa jo̧rȩtarä, a̧ro̧rȩ judi pio ibë chjiari toro ano̧ mire ja̧boa̧ pio ju̧i̧ chjiari jo̧rȩtarä, jabechji̧ ja̧di dari̧ japea̧ üdë na̧rȩde davä, a̧ro̧rȩ Jechu pio ju̧i̧ nö̧ta cja̧rȩmȩpe baga̧ pio ju̧i̧ chjiari. Jabechji̧ a̧ro̧rȩ jararea̧ oa jararä, ‘Aja̧, Ütë tjamo̧ judi chjadëri̧ japea̧diibëda’ quëna̧ jo̧rȩtaji̧ri̧rȩ jararea̧ro̧jo̧ȩ. Aja̧, a̧ro̧rȩ jararä, jabechji̧ na̧rȩde a̧ro̧rȩ Jechu ja̧ goe oaiä pio ju̧i̧ nö̧ta cja̧rȩmȩpe baga̧ pio ju̧i̧ chjiari. Ado a̧ro̧rȩ chja̧pe oa jurarä, a̧ro̧rȩ mu̧i̧ quira ëte jurarä, peaja̧di na̧rȩde a̧ro̧rȩ Jechu ja̧ icjararä cara̧ oa cjiape baga̧ pio ju̧i̧ chjiari. Jabechji̧ pio judi ibë chjiari ano̧ mire ja̧borërea̧ oaiä, jabechji̧ pio ju̧i̧ ja̧ icjararä cara̧ oa cjiami̧ dari̧ cjiadiäa̧rea̧rȩ.
Jabechji̧ tjamo̧ri̧ cjiari̧ baämȩ ma̧ȩ pio ju̧i̧ dëbëpe chjaorea̧mi̧dëde, jabomo̧ ta̧rëdiäpea̧ maeade. Tjamo̧ davä. Coëma cjiari̧ cjo̧ro̧rea̧ pio ju̧i̧ dëbëpe chjaorea̧mi̧dë maearea̧rȩ. Ado pio ju̧i̧iä mȩnȩro̧ coëma cjiari̧ cjo̧ro̧rä judi, jabechji̧ dëbëpe chjaodëparea̧ro̧dibe, jabomo̧ a̧doparea̧ro̧dibe ji̧dëri̧.
Danȩrȩ ca̧ oti̧, tjado ano̧mȩ judi jibëa̧ tjadoro cho oa ponȩrä, jabechji̧ Ütërë yürüa̧ duri maea oa ponȩdejȩ. Jabechji̧ jurarea̧ cho yürümȩ pio judide. Ado cho oa cjitë tänȩmȩ pio judi tjamo̧de peaja̧di. Jabechji̧ tjado ano̧mȩ pio judi jurapea̧ oa, pumȩ judiro̧ ütëborë jibëa̧ jurarea̧ oa dapea̧ oa yürümȩde. Aja̧, pio ibëiäpȩmo̧ yürüdiibe Ütë tjamo̧ judi a̧ro̧rȩ cjo̧ro̧pea̧ oa, a̧ro̧rȩ o ji̧ri̧iäpȩmo̧ peaja̧di yürüpea̧ oa. Ado a̧ro̧rȩ o ji̧ri̧iäpȩmo̧ chjaji̧ri̧rȩ yürürä, jabechji̧ cho pio ju̧i̧ ponȩji̧ri̧mi̧ dari̧ yürürea̧rȩ. Ado a̧ro̧rȩ ponȩji̧ri̧mi̧ dari̧ yürürä, a̧ro̧rȩ o ji̧ri̧iäpȩmo̧ eami̧ oa ponȩmi̧ dari̧ yürürä, jabechji̧ a̧dë chjäte ji̧ra̧ tjamo̧pe bagarea̧mi̧ dari̧ japadejȩ Ütë tjamo̧ judi, a̧ro̧rȩ ibëa̧ tjadomi̧ darä ji̧dë u̧i̧ ji̧ra̧ tjamo̧ oa mitërea̧ dapea̧ oa.
Jabo Tjo tjamo̧ pio judiri ma̧na̧mȩ na̧rȩrea̧ üdë tjaoë tjamo̧de. Toro baramȩ jurarea̧ goaemi̧ dade. Ado pio ju̧i̧ ano̧ mire ütarë yo̧requededibe yaba̧. Danȩrȩ, o ji̧ri̧iäpȩmo̧ earea̧ üdë, ma̧ chiadëri̧ cjiari̧ jo̧rȩtarea̧ üdë, ado ma̧ chjupi̧ cjiari̧ jo̧rȩtarea̧ üdë, jabechji̧ Tjo tjamo̧ pio judiri ma̧na̧mȩ na̧rȩrea̧de. Ado Ütë tjamo̧ ju̧i̧iäpȩmo̧ chjuari quëna̧rea̧ üdë, jaepeparea̧ decjiari̧ quëna̧rea̧ üdë, chjai̧dë oa chjätäräbo chjuari̧ quëna̧rea̧ üdë, peaja̧di Tjo tjamo̧ pio judiri ma̧na̧mȩ na̧rȩrea̧de. Ado o ji̧ri̧iäpȩmo̧ cjäri̧ri̧ cjia darea̧ üdë, cjodocjodoami̧ dari̧ jo̧rȩtarea̧ üdë, o ji̧ri̧iäpȩmo̧ chjadëri̧ japarea̧ üdë, o ji̧ri̧iäpȩmo̧ tocoi̧mi̧ u̧i̧parea̧ decjiari̧ cjo̧ro̧rea̧ üdë, jënȩ yo̧a̧mi̧ japarea̧ üdë, jabechji̧ Tjo tjamo̧ pio judiri ma̧na̧mȩ na̧rȩrea̧ maeade.
Jabechji̧ dibëa̧ tjoro tatamȩ pio ju̧i̧iä chjacjiamȩri̧ na̧rȩriä cjo̧ro̧rea̧ dapanȩrȩ, jurarea̧ torë ji̧ra̧ri̧ chiamȩmi̧ dari̧. Aja̧, chjadëri̧ japarea̧ oa, coëma cjiari̧ cjo̧ro̧rea̧ oa, ado tjamo̧i̧ cjiari̧ quëna̧rea̧ oa chiami̧ dari̧ na̧rȩriä cjo̧ro̧rea̧ dapanȩrȩ, jurarea̧ goae tjamo̧ oa na̧rȩji̧ri̧mi̧ dari̧.
Aja̧, Jechu Quiricho pio judiri ma̧na̧mȩ maeara̧ na̧rȩriä cjo̧ro̧panȩrȩ, jurarea̧ torë chachari̧ barami̧ dari̧, chjacjiamȩri̧ na̧rȩmi̧ dari̧. Jabechji̧ pio judiri ma̧na̧mȩ cjo̧ro̧rea̧ra̧ na̧rȩriä cjo̧ro̧panȩrȩ coëma cjiari̧ cjo̧ro̧ji̧ri̧rȩ, chjadë pio ju̧i̧ na̧rȩji̧ri̧rȩ. Ado mȩnȩro̧ ja̧di dari̧ cjo̧ro̧a̧ oaiä, 'jabechji̧ Ütë tjamo̧ judi ba chia tjamo̧dida, chjacjiamȩri̧ jo̧rȩtapea̧dida' quëna̧ jo̧rȩtaji̧ri̧rȩ cjo̧ro̧padirȩ pumȩ judiro̧.
Ado mȩnȩro̧ ja̧di dari̧ japariä cjo̧ro̧rä judi, jabechji̧ goae tjamo̧padejȩ Ano̧mȩ pio ju̧i̧iä. Ado judi ea̧ tüdüa̧mi̧ darä cjo̧ro̧panȩrȩ, pio ju̧i̧iäpȩmo̧ ji̧dë ma ma̧ chiadëri̧ cjiaparȩji̧ri̧rȩ. Ado dami̧ti̧ jurarea̧ oa chiami̧ dari̧ na̧rȩ chjaopanȩrȩ chjadëri̧ jape chjaoa̧ oaiä. Ado ji̧dë u̧i̧ urëdi oa dabarea̧ daparenȩro̧jo̧ȩ Ütë tjamo̧ ju̧i̧, joë ya oa areiëa̧mi̧ dari̧.
Aja̧ ca̧ oti̧, ma̧ȩ chjadëi̧ pio ju̧i̧ quëna̧ji̧ri̧pea̧nȩrȩ. Ado pio jiro ma̧ȩ üdë pio dibëmo̧ a̧ra̧ano̧a̧ oa cjiadëde, jabo chiriräpȩti̧ oa chuchjupechämi̧ dari̧ baäa̧de, pumȩ no̧i̧dërë ta̧rërea̧mi̧ dari̧, pumȩ no̧i̧dërë tjaoëpe järea̧mi̧ dari̧, ütëchjai̧pe järea̧mi̧ dari̧. Ado pio jiro pumȩ judiro̧ Ütë ja̧ ma̧ȩ pio ju̧i̧iä, jabechji̧ tjaoëpai̧ dari̧ cjiaji̧ri̧pea̧dirȩ. Ado peaja̧dinȩrȩ mȩnȩro̧. Tjaoëpai̧ dari̧ cjiaji̧ri̧pea̧nȩrȩ. Tjamo̧ davä. Mȩnȩro̧ pearä dabapea̧ pio judiri yurori tjaoëpai̧ dari̧ cjiadiäa̧nȩrȩ. Jabechji̧ mȩnȩro̧ dabapea̧ oaiä, Ütërë cjäri̧ri̧ cjiamȩrȩ yürüa̧ pio ju̧i̧ chjiari dabapea̧ oaiä, tjaoëpai̧ dari̧ cjiadiäa̧nȩrȩ.
Tjamo̧ davä. Chjai̧dëri̧ japarea̧ üdë pio judiri ma̧na̧dë madiibe jabo chjadë pio judimo̧rȩ ma̧na̧diibe pio judiri. Tjamo̧ davä. Ütë tjamo̧ pio judiri ma̧na̧diibe chjadë üdë, ibëa̧ tjo oa a̧domȩ üdë. Jabechji̧ ji̧dë ma chjadë maea oa yürüdiibe jabëdiärea̧ decjiari̧. Ibëa̧ Ama̧i̧ judi, a̧dëräpȩ cjiamȩ chjö̧na̧i̧ oa Pareapamȩ pio judi cjäri̧ri̧ cjiamȩrȩ yürüdiibe dami̧ti̧ chjadë oa. Jabechji̧ judi pareapea̧ üdë, do üdë, gupënȩ üdë, büë üdë, dëdë, tjaoëdiäpe bagapai̧ dade. Jabo Ütë tjamo̧ judi tjaoëdiä tjaoëdiäpe bagadëmȩde, jabo jabechji̧ jënȩ pearä cjiarërea̧mi̧ cjiamȩde. Ado pio ju̧i̧iä ji̧dë ma chjadë maea oa yürüdiibe.
Danȩrȩ ca̧ oti̧, a̧ro̧rȩ Ütë tjamo̧ ja̧ ma̧ȩ oa ji̧dë ma dabapaji̧ri̧rȩ cjo̧ro̧a̧ oaiä, ji̧dë u̧i̧ ütëchjai̧pe bagarea̧rȩ. Ado a̧ro̧rȩ ji̧dë u̧i̧ ütëchjai̧pe baga̧ oaiä, ji̧dë u̧i̧ queri̧räpȩ cjiami̧ dari̧ cjiarea̧rȩ ibëa̧ Ano̧mȩ Jechu pio ju̧i̧ nö̧ta, ibë cjo̧ro̧rea̧ yürümȩ pio ju̧i̧ nö̧ta. Ado goë cji̧däriä baämi̧ dari̧ japadiibe jibëa̧ bëmi̧ darä, taru a̧rȩmȩ chjadëmi̧ darä, cji̧däa̧ oa cjiamȩ bëmi̧ darä. Jabechji̧ quëna̧ji̧ri̧ pio ji̧ri̧iä cji̧däa̧ oa cjiami̧ dari̧ cjiade jibëa̧ bë üdë a̧ro̧rȩ pio ju̧i̧iäpȩmo̧ chjacjiamȩri̧ jo̧rȩtapea̧ oa, a̧ro̧rȩ pio ju̧i̧iäpȩmo̧ ma̧ȩ goaera̧ ni̧bäpea̧ oa. Tjamo̧ davä. Cjo̧ro̧rea̧ chiamȩ ta̧dëmi̧ da oa goë cji̧däriä baämi̧ dari̧ japadiibe jibëa̧ bëmi̧ darä, ta̧dë ji̧ra̧ tjamo̧mi̧ da oa. Danȩrȩ ca̧ oti̧, eami̧ pumȩ üdë jibëa̧ bë oa ta̧dëra̧ pio ju̧ri̧ra̧ cji̧därä judi, jabechji̧ taru a̧rȩmȩ pio ju̧i̧ cji̧dädejȩ yabochja. Ado pio ju̧i̧ tarupë cji̧därä, jabechji̧ buräpȩ ju̧ri̧ yabochja arëchädejȩ tjamo̧ goë chamȩ ta̧dë pio ju̧i̧. Ana̧ tjamo̧ oa, chjadëri̧ chjuroa̧ oa cjiamȩ oa arëchädejȩ buräpȩ ju̧ri̧. Jabechji̧ tjamo̧ goë chamȩ ta̧dëri pio judiri baäde taru a̧rȩmȩ üdë. Ado ja̧dëa ji̧ taru a̧rȩmȩ pio ju̧i̧ chjadëri̧ cji̧däa̧ oa goarä, jabechji̧ pio ju̧i̧ uëmo̧ ta̧dë ji̧ra̧ tjamo̧ oa goë cji̧dädejȩ ji̧mo̧ cjia maeari̧, chjuari̧ cjia maeari̧, cja̧rȩmȩ codë maearë cjiari̧. Ado danȩrȩ ca̧ oti̧, ibëa̧ Ano̧mȩ Jechu pio judi tjamo̧ goë chamȩ ta̧dëmi̧ dade. Jabechji̧ pio judiri ja̧ maearë chjuari̧ goë cji̧däa̧ oa cjiami̧ dari̧ cjiarea̧rȩ jibëa̧ bëmi̧ darä. Pio ju̧i̧iä cjo̧ro̧rea̧ chiarea̧rȩ. Danȩrȩ, Ütë tjamo̧ pio judi mitërëremȩdejȩ tjamo̧ goë chamȩ ta̧dëmi̧ damȩ pio ju̧i̧, ‘ba chia tjamo̧dida’ quëna̧ jo̧rȩtamȩrȩ. Ado o judiro̧ peaja̧dimi̧ dari̧ jo̧rȩtatärea̧ ji̧, peaja̧di ba chia datärea̧ ji̧, cjäri̧ madiro̧jo̧ȩ, ba chia dadëa̧diro̧jo̧ȩ, jabo ta̧dë teracabami̧ da oa darëreji̧ri̧diro̧jo̧ȩ, ba chiadëmȩmi̧ da oa. Jabo Ütë tjamo̧ pio judi mitërëremȩdejȩ. Jabo dai oa cjiamȩ bërä arëchäpea̧ oa mitëdërëremȩdejȩ jabo. Pumȩ pio judiro̧ japea̧ bërä arëchäpea̧ oa, dai chirirä ja̧ bërä cji̧däpea̧ oa mitëdërëremȩdejȩ, jabo jibëa̧ bëmi̧ darä arëchäpea̧ oa mitërëremȩdejȩ. Jabo dëdë, o judiro̧ chjuari̧ jiadadiro̧jo̧ȩ, jabo ja̧di dari̧ japadërëreji̧ri̧renȩrȩ ca̧ oti̧. Badë dadëa̧renȩro̧jo̧ȩ, jabo ba chia darëreji̧ri̧renȩro̧jo̧ȩ. Ado pio ju̧i̧iä jabechji̧, mȩnȩro̧ Ütë tjamo̧ pio ju̧i̧ ja̧ queri̧räpȩ jämi̧ dari̧ japarä, jabechji̧ Ütë tjamo̧ pio judi goë cji̧däriä baämi̧ dari̧ japadidibe jibëa̧ bëpe bagarea̧mi̧ dari̧. Tjamo̧ davä. Cjo̧ro̧rea̧ peaja̧ oa chiamȩ ta̧dëmi̧ da maea oa, ji̧ra̧ tjamo̧ oa goë cji̧däriä baämi̧ dari̧ japadidibe ca̧ oti̧, ji̧mo̧ ma cjiape bagapea̧ oa, pio ju̧i̧ ja̧ bëpe bagami̧ dari̧ cjiapea̧ oa. Jabechji̧ pio judi bëpapea̧ oa, goë cji̧däriä baämi̧ dari̧ japadiibe a̧ro̧rȩ pio ju̧i̧ ja̧ oa ja̧bepapea̧ oa, a̧ro̧rȩ pio ju̧i̧iäpȩmo̧ chjacjiamȩri̧ jo̧rȩtapea̧ oa. Danȩrȩ ca̧ oti̧, a̧ro̧rȩ quëna̧ji̧ri̧ pio judiro̧ ütëborë goë tuti ja̧bepaji̧ri̧pea̧rea̧rȩ. Tjamo̧ davä. Ütë tjamo̧ ja̧ bëmi̧ darä ja̧bepapea̧ oa, goë tuti ja̧bepaji̧ri̧pea̧rea̧rȩ. Jabo danȩrȩ, ¿tjana̧ oa japadirȩ Ütë tjamo̧ ja̧ bërä goë tuti ja̧bepaji̧ri̧ pio judiro̧? Tjana̧ oa japadë, jabechji̧ ji̧dë ma goe gu̧rori̧ cäë yürüji̧ri̧rȩ ja̧bepadirȩ. Jabo danȩrȩ ca̧ oti̧, dai chirirä cjo̧ro̧mȩ pio ju̧i̧ goe gu̧rori̧ cäë yürüdë marea̧ro̧jo̧ȩ. Tjamo̧ davä. Dai chirirä ja̧ oveja oa, dai chiri ja̧ chivo oa goe gu̧rori̧ cäë yürüdë marea̧rȩ, jabo Tjo tjamo̧ ja̧ chja̧oerä cjiaji̧ri̧rȩ cäë yürümi̧ dari̧ yürürea̧ro̧jo̧ȩ dami̧ti̧ ba chia oa. Jabechji̧ a̧ro̧rȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩta oaiä, a̧ro̧rȩ chjacjiamȩri̧ ni̧bä oaiä, cäë yürümi̧ dari̧ yürürea̧ro̧jo̧ȩ ca̧ oti̧. ‘Aja̧, Ütë tjamo̧ judi chjadëri̧ japea̧diibëda’ quëna̧ jo̧rȩta̧ oaiä, cäë yürümi̧ dari̧ yürürea̧ro̧jo̧ȩ. Ado Jechu Quiricho judi pio ibë chjiari chjadëri̧ tuti japea̧ oaiä, jabechji̧ goae tjamo̧dejȩ davä Ütë tjamo̧ pio ju̧i̧iä, a̧ro̧rȩ cäë yürümi̧ dari̧ yürüa̧ üdë.
Aja̧ ca̧ oti̧, judiro̧ oëra̧ a̧ra̧ano̧a̧ oaiä u̧i̧pea̧ oa cjiadëchji̧vä, jabo ji̧dëri̧ Ütërë cjäri̧ri̧ cjiamȩrȩ a̧doa̧ oaiä cjo̧ro̧chji̧vä tëchjape bagami̧ dari̧, üi̧padärärea̧mi̧ dari̧. Jabechji̧ ibëa̧ Ano̧mȩ Jechu Quiricho pio ju̧i̧ chjiari dabapea̧ oaiä joechjape bagami̧ dari̧ cjiachji̧vä ibë Chjätä Tänȩmȩ pio ju̧i̧ chjiari ji̧dë u̧i̧ urëdi oa jo̧rȩtape bagarea̧mi̧ dari̧. Jabechji̧ pio ju̧i̧iäpȩmo̧ chjacjiamȩ tjamo̧ri̧ jo̧rȩtapea̧de yaba̧. Pio ju̧i̧iäpȩmo̧ chjacjiamȩri̧ jo̧rȩtapea̧de bucho ana̧. Tjamo̧ davä. Ja̧di dari̧ japapea̧de. Pio ju̧i̧mo̧ ma̧ȩ oa go̧ȩpe chjadürequededibe ca̧ oti̧. Cjo̧ro̧ibe. Dibëa̧ omȩ, Pedro
Sanasan