Juan 15:4 - Biblia Pume

⁴ Danȩrȩ ca̧ jadü, ca̧ea̧ri ja̧nȩrȩ. Ado peaja̧di dibëa̧ri ja̧requede. Pio ju̧i̧iä ji̧dë ma taruri pio judiri a̧ji̧ri̧mi̧ dari̧ cjo̧ro̧täreji̧ri̧nȩrȩ —yo̧a̧dejȩrȩ—. To a̧ üdë jibëa̧ma̧i̧ cjiarä judi, taruri pio judiri ja̧dëmi̧ dari̧ cjiarä judi, jurarea̧ oa chiarea̧mi̧dëde. Jabo taruri pio judiri cjiarä judi, jurarea̧ ji̧ra̧ oa chiapade. Peaja̧dimi̧ dari̧ cjianȩrȩ mȩnȩro̧. Dibëa̧ma̧i̧ cjiami̧ dari̧ cjiarä judi, ca̧ea̧ri ja̧dëji̧ri̧mi̧ dari̧ cjiarä judi, jabechji̧ jurarea̧ chiadëji̧ri̧mi̧ dari̧ cjiadiäpanȩrȩ. Jabo pio coaiä cjo̧ro̧rä judi, taruri pio judiri a̧ji̧ri̧mi̧ dari̧ cjo̧rorä judi, jabechji̧ jurarea̧ ji̧ra̧ tjamo̧ oa chiaji̧ri̧mi̧ dari̧ cjo̧ro̧panȩrȩ —yo̧a̧dejȩrȩ.

Juan 15:4 Iomraidhean Croise

Mateo 12:33

Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pjaricheo pio ji̧ri̧iäpȩmo̧ na̧rȩrea̧ ma̧ȩmi̧ dara̧: ⁠—⁠Danȩrȩ, jurarea̧ to chjadë üdë, jabechji̧ jurarea̧ chjadë oa chiade ⁠—⁠yo̧a̧dejȩrȩ⁠—⁠. Jabo jurarea̧ to üdë chjadëdë üdë, jabechji̧ jurarea̧ chjadëdë oa chiade. Teracaba maea oa chiade. Aja̧, jurarea̧ pio ju̧i̧ ütarë daea̧ oaiä, jabechji̧ dabarea̧rȩ to pio ju̧i̧ chjiari.

Lucas 8:15

Ado pumȩ judiro̧ orë dabu chjadëmi̧ dadirȩ. Jabechji̧ dabu chjadë üdë jibëa̧ chji̧mi̧ dade. Ado pio jiro pumȩ judiro̧ Ütë tjamo̧ ja̧ ma̧ȩ oa ta̧rërä, bapë ta̧rëdiro̧jo̧ȩ. Quëna̧diro̧jo̧ȩ. Oëra̧ quëna̧dëri̧ cjiamȩ chji̧ra̧ quëna̧diro̧jo̧ȩ, ma̧ȩ pio ju̧i̧ chjuari̧ acji mitëmi̧ dari̧. Ado ütëchjai̧pe jämi̧ dari̧ cjo̧ro̧dirȩ. Cho ji̧ra̧ tjamo̧pe järea̧mi̧ dari̧ na̧rȩriä cjo̧ro̧dirȩ ma̧ chjua jo̧rȩtaji̧ri̧rȩ —yo̧mȩrȩ ni̧bä chjaoa̧dejȩrȩ.

Juan 14:20

Ado pio jiro do üdë ma̧na̧na̧ra̧rä, jabechji̧ coëma cjiari̧ dabarea̧ dapanȩrȩ. ‘Aja̧ Jechu judi jibëa̧ Ama̧i̧ pio ju̧i̧ nö̧ta cja̧rȩmȩdida, ji̧mo̧ cjiadiro̧da, ado peaja̧dia̧ro̧da, Jechu pio ju̧i̧ nö̧ta cja̧rȩmȩa̧ro̧da, ji̧mo̧ cjiaa̧ro̧da’ quëna̧ dabarea̧ dapanȩrȩ.

Juan 17:23

Jabechji̧ pio ji̧ri̧ ja̧ tjoro cjiarequede cüdë. Ado mȩnȩ ca̧ tjoro cjiarenȩ Ama̧i̧. Jabechji̧ judiro̧ cja̧rȩmȩrȩ cjiami̧ dari̧ cjiapea̧ oa goë cjo̧dërequedemȩ Ama̧i̧, dai chirirä ja̧ jo̧rȩtaji̧ri̧ pio judiro̧ na̧e chiape bagapea̧ oa. ‘Aja̧, Jechu judi Ütërë chjadüa̧ oa ma̧na̧dida, ado Ütë tjamo̧ judi quëna̧ji̧ri̧ pio ji̧ri̧ eadiji̧ri̧da, Joja pio ju̧i̧ eami̧ eadiji̧ri̧da’ quëna̧ dabapea̧ oa, cja̧rȩmȩrȩ cjiami̧ dari̧ cjo̧ro̧tä eamȩrȩ goë cjo̧dërequedemȩ Ama̧i̧ —yo̧a̧dejȩ Jechu judi jibëa̧ Ama̧i̧ ju̧i̧.

Juan 6:56

Ado pio ju̧i̧iä yo̧requededibe. Ca̧ go̧a̧ oa juraji̧ri̧ judiro̧, ado ca̧ goe oa jaraji̧ri̧ judiro̧, jabechji̧ cja̧rȩmȩpe bagadirȩ pio coa nö̧ta. Ado ca̧ea̧ri ja̧ maearë cjo̧ro̧padirȩ pio coaiä. Ado pio judiriji̧ri̧ ja̧mȩrȩ cjo̧ro̧parequede pio ji̧ri̧iä. Tjamo̧ davä. Pio ji̧ri̧iä cjo̧ro̧parequede, pio judiriji̧ri̧ ja̧mȩrȩ —yo̧a̧dejȩrȩ—.

Juan 8:31

Ado pio jȩaiäpȩmo̧ quëna̧ji̧ri̧ judio pio ji̧ri̧iäpȩmo̧ yo̧mȩrȩ ni̧bärëremȩdejȩrȩ Jechu judi: —Danȩrȩ mȩnȩro̧, cüdë a̧ra̧ano̧a̧ ma̧ȩrä ji̧dë ma ta̧rëdiärä judi, ca̧ jadü tjamo̧parenȩrȩ —yo̧a̧dejȩrȩ—.

Japarea̧ 11:23

Ado Bernabe judi, jabechji̧ pumȩ chjadëmȩrȩ cjo̧ro̧rëremȩde. Ütë tjamo̧ pio ju̧i̧ chjuari̧ quëna̧mȩrȩ cjo̧ro̧rëremȩde ji̧dë ma chjadëri̧ jape chjaomȩrȩ. Jabechji̧ Tjo tjamo̧ judi chi̧dëea̧ chja̧oerä cjo̧ro̧rëremȩde. Ado pio judi A̧tioquiaräpȩ go̧düdäräa̧rä, jabechji̧ irä darëremȩdejȩrȩ quëna̧ji̧ri̧ pio ji̧ri̧. Ütë tjamo̧ judi ana̧ri̧ a̧doa̧ oa cjiaji̧ri̧ oa daea̧dejȩrȩ coëma cjiari̧ cjo̧ro̧ji̧ri̧ oa. Pio ju̧i̧iä ma̧ chiadëri̧ cjia tjamo̧pea̧de. Ado chjadëri̧ a̧dorëremȩdejȩrȩ. Ma̧ chjua jo̧rȩtariä cjo̧ro̧pea̧ oa, no̧dë oa jämi̧ dari̧ cjo̧ro̧chea oa, chjadëri̧ chi̧dëearëremȩdejȩrȩ, Ano̧mȩ pio ju̧i̧ ja̧ ma̧ȩrämo̧ chjadëri̧ cjo̧ro̧pea̧ oa. Ado Bernabe judi ja̧bepea̧ oaiä, ji̧dë u̧i̧ ji̧ra̧rȩ quëna̧ji̧ri̧pea̧diro̧jo̧ȩ Ano̧mȩ Jechu pio ju̧i̧iäpȩmo̧.

Cori̧tio Ma̧ȩ 2 13:5

Jabo danȩrȩ ca̧ oti̧, a̧ro̧rȩ pio dibëiäpȩ go̧düdäräbea yaboi̧, jabechji̧ jabërä chjadëri̧ ütarë jo̧rȩtatäreji̧ri̧nȩrȩ pio dibë chjiari, uëmo̧ uëmo̧ jo̧rȩtarea̧ decjiari̧, chjaocjiarea̧ decjiari̧. Danȩrȩ, iëno̧ë ta̧rërequededibe. ¿Jechu Quiricho pio ju̧i̧ tjamo̧ri̧ quëna̧ji̧ri̧pea̧renȩro̧jo̧ȩ, jabo chjaocjianȩrȩ? ¿Tjamo̧ri̧ quëna̧ji̧ri̧pea̧renȩro̧jo̧ȩ, jabo ta̧ra̧ puë maeara̧ ta̧rërëreji̧ri̧nȩrȩ? Danȩrȩ, mȩnȩro̧ pio ju̧i̧iäpȩmo̧ tjamo̧ri̧ quëna̧ji̧ri̧pea̧rä judi, jabechji̧ peadë bëpea̧ oa cjiade Quiricho judi dibëa̧ icjararä. Jabo mȩnȩro̧ tjamo̧ri̧ quëna̧dëa̧rä judi, cjäri̧ madidibe, dibëa̧ icjararä bëpadëa̧de.

Garata Ma̧ȩ 2:20

Jabechji̧ Quiricho pio ju̧i̧ nö̧ta toro cji̧däa̧ oa ja̧boa̧requede. Jabo pio ju̧i̧ nö̧ta ja̧boa̧mȩborë, jabechji̧ cjo̧ro̧requede ado chjereno̧. Jabo cüdë tjamo̧dërequede, jabo Quiricho pio judide. Jabechji̧ ca̧ icjararä chjai̧dërë chi̧dëea̧ chja̧oerä cjo̧ro̧dërequede, jabo tjamo̧ cjo̧ro̧mȩ Quiricho pio ju̧i̧ ja̧ chja̧oerämo̧ ano̧ mire cjo̧ro̧requede yaba̧. Aja̧, pio judi tjamo̧de pio coaiä ja̧bepamȩ judi. Ado yaba̧ Ütë tjamo̧ pio ju̧i̧ ja̧ Joja pio ju̧i̧ quëna̧mȩrȩ cjo̧ro̧requede, pio coa ea tjamo̧mȩ pio ju̧i̧. Aja̧, jibëa̧ icjara oa tuti yürürëremȩ pio ju̧i̧ quëna̧mȩrȩ cjo̧ro̧requede yaba̧ pio cüdë ano̧ mire cjo̧ro̧pea̧ oa.

Epjecho Ma̧ȩ 3:17

Aja̧, mȩnȩro̧ chjuari̧ quëna̧tä goë cjo̧dëreconȩ Quiricho pio judi dibëa̧ chji̧rä goae tarari̧ cjo̧ro̧rea̧mi̧ dari̧. Ado mȩnȩro̧ Quirichorë ea̧ chja̧oerä chjuari̧ cjiatä eamȩrȩ goë cjo̧dërequede peaja̧di. Danȩrȩ, to tacö̧ üdë uredi tacö̧pe bagade ëteräpȩmo̧, to üdë chjua tjamo̧ri̧ cjiarea̧mi̧ dari̧. Ado peaja̧dimi̧ dari̧ cjiatä earequededibe Jechurë ea̧ chja̧oerä.

Pjiripo Ma̧ȩ 1:11

Aja̧, Jechu Quiricho pio judiri ma̧na̧mȩ maeara̧ na̧rȩriä cjo̧ro̧panȩrȩ, jurarea̧ torë chachari̧ barami̧ dari̧, chjacjiamȩri̧ na̧rȩmi̧ dari̧. Jabechji̧ pio judiri ma̧na̧mȩ cjo̧ro̧rea̧ra̧ na̧rȩriä cjo̧ro̧panȩrȩ coëma cjiari̧ cjo̧ro̧ji̧ri̧rȩ, chjadë pio ju̧i̧ na̧rȩji̧ri̧rȩ. Ado mȩnȩro̧ ja̧di dari̧ cjo̧ro̧a̧ oaiä, 'jabechji̧ Ütë tjamo̧ judi ba chia tjamo̧dida, chjacjiamȩri̧ jo̧rȩtapea̧dida' quëna̧ jo̧rȩtaji̧ri̧rȩ cjo̧ro̧padirȩ pumȩ judiro̧.

Corochȩche Ma̧ȩ 1:23

Jabo mȩnȩro̧ dabapea̧ ma̧ȩrä ji̧dë ma chjuari̧ quëna̧pea̧ chianȩrȩ, jaejaeami̧ dari̧ cjiarea̧ decjiari̧. Jabechji̧ ji̧dë ma jo̧rȩtachji̧vä mȩnȩro̧ pearä jidatarërea̧ pio ju̧i̧. Jabechji̧ ado cja̧rȩmo̧ ma̧ȩ oa ano̧ mire quëna̧rea̧ decjiari̧, ma̧ȩ chjadëi̧ pio ju̧i̧ a̧dë jachipe bagami̧ dari̧ japarea̧ decjiari̧ ji̧dë ma jo̧rȩtachji̧vä. Pio jiro ma̧ȩ üdë chiriräpȩti̧ oa a̧ra̧ano̧a̧ oa cjiade. Ado pio jiro ma̧ȩ oa a̧ra̧ano̧mȩpea̧requede cüdë, Pablo pio judi.

Corochȩche Ma̧ȩ 1:27

Tjamo̧ davä. Ütë tjamo̧ judi no̧mȩ tjamo̧ri ja̧ goadia̧ oa cjiarërea̧ ma̧ȩ pio ju̧i̧ dabapa tänȩtämi̧ cjiadejȩrȩ yaba̧ judio ji̧ri̧, ado judiodë pio ji̧ri̧bo. Ma̧ȩ ba chia tjamo̧ oa, ma̧ȩ a̧dë chjäte goae oa chjadëri̧ dabapa tänȩtämi̧ cjiadejȩrȩ pumȩ ütëbodärä ja̧ oa, chiriräpȩti̧ oa cjo̧ro̧ji̧ri̧ ja̧ oa. Ado ¿tjana̧ ma̧ȩde goadia̧ oa cjiarëremȩ ma̧ȩ üdë? Tjana̧ ma̧ȩdë, jabechji̧ Quiricho judi dibëa̧ icjararä bëpea̧mȩ pio judide. Pio judide goadia̧ oa cjiarëremȩ ma̧ȩ üdë. Tjamo̧ davä. Quëna̧ji̧ri̧ ja̧ icjararä bëpea̧de Quiricho judi. Ado dibëa̧ icjararä bëpea̧ tara, jabechji̧ jidatarea̧ chianȩrȩ. Jabechji̧ Ütë tjamo̧ pio judimi̧ dari̧ cjiapea̧ oa, pio judi tatachjami̧ dari̧ cjiapea̧ oa, jidatarea̧ chianȩrȩ.

Corochȩche Ma̧ȩ 2:6

Mȩnȩro̧ Ano̧mȩ Jechu Quiricho pio ju̧i̧iäpȩmo̧ quëna̧ oaiä, jabechji̧ pio ju̧i̧ ja̧ chja̧oerämo̧ cjo̧ro̧chji̧vä, pio judiri ma̧na̧mȩ cjo̧ro̧rea̧ra̧.

Techaronichȩche Ma̧ȩ 3:5

Ado mȩnȩro̧ conȩda̧ pio ju̧i̧ tara̧ oaiä, ado a̧ro̧rȩ pio dibëiä ma̧ȩ ta̧rëdëa̧ oaiä, jabechji̧ bücjüri̧ cjia tjamo̧pea̧requededibe. Pio ju̧i̧iä chjadüa̧reconȩ Timoteo ju̧i̧ pio dibë chjiari chjadëri̧ ta̧rëpea̧ oa. 'Aja̧, yö̧ta dari̧ quëna̧diro̧da, Ichiaerë chjai̧dëri̧ japa tänȩa̧ oa quëna̧dëji̧ri̧pe bagapai̧ dadiro̧da, a̧ro̧rȩ badëri̧ ja̧beparea̧mi̧ dari̧ u̧i̧papai̧ dadiji̧ri̧da' quëna̧ jo̧rȩtamȩrȩ chjadüa̧reconȩ pio dibëiä chjadëri̧ ta̧rëpea̧ oa.

Ebereo Ma̧ȩ 10:39

Jabo cjäri̧ marea̧rȩ ca̧ oti̧, a̧ro̧rȩ duriräpȩmo̧diämi̧ dari̧ japaji̧ri̧ pio judiro̧dë marea̧rȩ. Pio a̧ro̧rȩ duriräpȩmo̧diämi̧ dari̧ japea̧ oaiä, bape chjaoa̧ oa cjiapaji̧ri̧ pio judiro̧dë marea̧rȩ, jabo jabechji̧ ji̧dë ma chjuari̧ quëna̧paji̧ri̧ pio judiro̧rea̧rȩ. Ado pio ju̧i̧iä chjadëri̧ chjätärea̧ daparea̧rȩ.

Juan Ma̧ȩ 1 2:6

Ado pio ju̧i̧iä eami̧ pumȩ üdë yo̧rä judi, 'Aja̧, Jechu Quiricho pio ju̧i̧ nö̧ta cja̧rȩmȩpe baga̧quëda, pio judiri ja̧ a̧mi̧ dari̧ cjiaquëda’ quëna̧ jo̧rȩtamȩrȩ yo̧rä judi, jabechji̧ Jechu pio judi pio yoa chirirä cjo̧ro̧rërea̧mi̧ cjo̧ro̧täremȩde peaja̧di.

Juan Ma̧ȩ 2 1:9

Jabo eami̧ pumȩ üdë quëna̧rä judi, ‘Cjäri̧ madida, Quiricho judi a̧ra̧ano̧rërea̧ üdë nö̧tadëdida, jabechji̧ judi a̧ra̧ano̧a̧ pio ju̧i̧ uëri baämȩ ma̧ȩ pio ju̧i̧ quëna̧pea̧ chiaquëda’ quëna̧rä judi, cjäri̧ madi, Ütë tjamo̧ pio ju̧i̧ nö̧ta jädü cjiarea̧ chiadëdi. Jabo eami̧ pumȩ üdë, Quiricho judi a̧ra̧ano̧a̧ ma̧ȩrä cjo̧ro̧mȩ pio judi, jabechji̧ Ama̧i̧ tjamo̧ pio ju̧i̧ nö̧ta jadü cjiarea̧ chiadi, Joja pio ju̧i̧ nö̧tabo.