Biblia Todo Logo
Bìoball air-loidhne

- Sanasan -




Juan 14:6 - Biblia Pume

6 Ado Jechu judi ütëbo oa yo̧a̧dejȩrȩ: —Danȩrȩ, Ütë tjamo̧ pio ju̧i̧iäpȩ baärea̧ no̧mi̧ darequede —yo̧a̧dejȩrȩ—. Pio coaiä tarupade coëma cjiari̧ jo̧rȩtarea̧ üdë. Cjo̧ro̧rea̧ yürümȩ pio judirequede. Pio coaiämo̧ go̧düdärärea̧mi̧ dade ca̧ Ama̧i̧rȩ cjiamȩräpȩ —yo̧a̧dejȩrȩ—.

Faic an caibideil Dèan lethbhreac




Juan 14:6
57 Iomraidhean Croise  

Ja̧dëa ji̧ Jechu judi ado ni̧bärëremȩdejȩrȩ pumȩ ji̧ri̧, ja̧di ta̧rëri̧ yo̧mȩrȩ: ⁠—⁠Danȩrȩ ca̧ pumȩ, ca̧ Ama̧i̧ pio judi tjamo̧ yo̧rea̧ yürürëremȩdique ⁠—⁠yo̧a̧dejȩrȩ⁠—⁠. Ado pio ju̧i̧iä chjö̧na̧i̧därärë ca̧ chja̧oerämo̧ cjiade. Ado ca̧ Ama̧i̧ pio judi chjadëri̧ dabadique. O judiro̧ tjamo̧ri̧ dabadëdiro̧coe jabo ca̧ Ama̧i̧ pio judi, dëdë, tjamo̧ri̧ dabadique. Ado cüdë peaja̧di dabareconȩ ca̧ Ama̧i̧ pio ju̧i̧. O judiro̧ tjamo̧ri̧ dabadë madiro̧jo̧ȩ jabo cüdë, dëdë, tjamo̧ri̧ dabareconȩ. Ado cüdë mitëa̧ pio ji̧ri̧bo daba tänȩparequedejȩrȩ ca̧ Ama̧i̧ pio ju̧i̧ ⁠—⁠yo̧a̧dejȩrȩ.


Ma̧ȩ quȩmȩ pio judi pumȩpe bagarëremȩde. Icjara chiamȩpe järëremȩde. Ado ibëa̧ chjarerä cjo̧ro̧rera̧pea̧de. Ado ibëa̧ chjarerä cjo̧ro̧mȩ oa irä darëreji̧ri̧rea̧ro̧jo̧ȩ jibëa̧ chjacjiamȩrea̧ pio ju̧i̧. Tjamo̧ davä. Jibëa̧ jauëcharea̧ oa daea̧rea̧ro̧jo̧ȩ, a̧dë chjäte tatari̧ cjiamȩ oa. Danȩrȩ, Ama̧i̧ Ütë judi Joja pio ju̧i̧mo̧i̧ ëbarëremȩdejȩ cja̧rȩmȩ oa. Ado pio ju̧i̧ ja̧ chjacjiamȩrea̧ pio ju̧i̧ darëreji̧ri̧rea̧ro̧jo̧ȩ ji̧dë ma cjäri̧ri̧ cjiamȩrȩ a̧domȩ ju̧i̧, ji̧dë ma tjamo̧i̧ cjiari̧ ni̧bämȩ ju̧i̧.


Danȩrȩ, Ütë tjamo̧ judi Moiche pio ju̧i̧iä tüdüa̧mi̧ darä cjo̧ro̧pea̧ ma̧ȩ pio ju̧i̧ yürürëremȩdiibe. Jabo Jechu pio ju̧i̧iä ji̧dë u̧i̧ chja̧dë oa yürürëremȩdiibe. Jabechji̧ cjäri̧ri̧ cjiamȩrȩ a̧dorea̧ pio ju̧i̧ yürüdiibe, tjamo̧i̧ cjiari̧ quëna̧rea̧ pio ju̧i̧bo.


Jabechji̧ cjo̧ro̧rea̧ yürümȩ pio judide. Pio ju̧i̧iämo̧i̧ taruparëremȩde cjo̧ro̧rea̧ üdë. Ado cjo̧ro̧rea̧ yürümȩ pio judi tatami̧ darä jo̧rȩtarea̧ yürümȩde pumȩ ütëbo ja̧ oa.


Ado bucho ana̧ cjo̧ro̧rea̧ yürürequedejȩrȩ, judiro̧ ja̧borea̧mi̧dëri̧. Ado pio coaiä chjadëri̧ mitëa̧ oa cjiami̧ dari̧ cjia̧ oaiä, jabechji̧ eami̧ üdë baë mitërea̧ dadëpadiro̧coe —yo̧a̧dejȩrȩ—.


Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ pumȩ ji̧ri̧: —Tjamo̧i̧ cjiari̧ yo̧requededibe. Cüdë yu̧a̧rea̧ jo̧ë yami̧ darequede. Ado pio coaiämo̧i̧ yu̧a̧rea̧ dadirȩ oveja judiro̧.


Jabo danȩrȩ, jo̧ë yami̧ darequede cüdë —yo̧a̧dejȩrȩ—. Ado ovejami̧ daji̧ri̧ pumȩ judiro̧ pio coaiä yu̧a̧rea̧ dapadirȩ, chjätärea̧ daji̧ri̧rȩ. Pio coaiä go̧dürea̧ dapadirȩ peaja̧di, mairi̧ jurariä tai̧ji̧ri̧mi̧ dari̧ cjo̧ro̧pea̧ oa.


Ado ji̧dë duri oa jana̧mȩ oa, japamitë boi̧chji̧ chjätä ëte jana̧mȩ oa, dadëpadiro̧coe dai chirirä ja̧ jo̧rȩtarea̧ra̧ jo̧rȩtaji̧ri̧ judiro̧. Aja̧, pio coa quëna̧dëji̧ri̧ pio judiro̧ dadëpadiro̧coe, jabo mȩnȩro̧, dëdë, daparenȩro̧coe ado chjereno̧. Jabechji̧ japamitë boi̧chji̧ chjätä ëte, ado chjereno̧ daparenȩro̧coe. Jabechji̧ cüdë ja̧bo ëte bëdüa̧ oa cjo̧ro̧pa tara, peaja̧di bëdüa̧ oa cjo̧ro̧panȩrȩ —yo̧a̧dejȩrȩ—


Ado Jechu judi ado ni̧bärëremȩdejȩrȩ jibëa̧ jadü ji̧ri̧. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ: —Danȩrȩ ca̧ jadü, uva to taru tjamo̧mi̧ dari̧ cjiarequede —yo̧a̧dejȩrȩ—. Ado ca̧ Ama̧i̧ judi pio jiro to oa jidamȩmi̧ dade. Tjado jidamȩmi̧ dade.


Pio ju̧i̧ ta̧rëa̧ oaiä, Pirato judi iëno̧ë ta̧rëa̧dejȩ: —¿Jabo mȩnȩ tjamo̧ yo̧mȩrȩ cjo̧ro̧dënȩ? —yo̧a̧dejȩ. Ado Jechu judi dëbë yo̧a̧dejȩ: —Dëdë, tjamo̧ yo̧mȩre cjo̧ro̧quede. Birë ma̧na̧mȩrȩ ara̧ oa cjiarëremȩrequede pio yoa chirirä cjo̧ro̧pea̧ oa, tjamo̧i̧ cjiari̧ baämȩ ma̧ȩ pio ju̧i̧ ni̧bäpea̧ oa. Tjamo̧i̧ cjiari̧ baämȩ ma̧ȩ pio ju̧i̧ ta̧rë ja̧boji̧ri̧ pio judiro̧, ta̧rë ja̧bodiro̧coe —yo̧a̧dejȩ.


Jabechji̧ Ama̧i̧ tjamo̧ judi ja̧boa̧ji̧ri̧ pio ji̧ri̧ bëdü tänȩdejȩrȩ. Cjo̧ro̧rea̧ yürüdejȩrȩ. Ado peaja̧dimi̧ dari̧ japarequede, Ja tjamo̧mȩrȩ. Aja̧, cüdë jo̧rȩtami̧ bëdü tänȩrequedejȩrȩ pumȩ ji̧ri̧. Cjo̧ro̧rea̧ yürürequedejȩrȩ.


Danȩrȩ, Ütë tjamo̧ judi yürüa̧ chja̧pe judi a̧dëri pio judiri biramȩ pio judide. Dai chirirä cjo̧ro̧ji̧ri̧ pio ji̧ri̧iäpȩmo̧ bucho ana̧ cjo̧ro̧rea̧ yürüpea̧ oa birarëremȩde —yo̧a̧dejȩrȩ.


Ado pio jiro chja̧pe pio judirequede cüdë. Tjamo̧ davä. A̧dëri ja̧ chja̧pe pio judirequede. Bucho ana̧ cjo̧ro̧rea̧ yürümȩ chja̧pe pio judirequede. Ado eami̧rȩ pio yoa chja̧pe oa jurarä judi, jabechji̧ bucho ana̧ cjo̧ro̧pade —yo̧a̧dejȩrȩ—. Ado danȩrȩ, pio jiro chja̧pe üdë ca̧ go̧a̧ pio judide. Ado ca̧ go̧a̧ pio ju̧i̧ yürürequededibe mȩnȩro̧ jurapea̧ oa. Jabechji̧ yürürequede ca̧ icjara oa pumȩ judiro̧ ütëbodärärë bucho ana̧ cjo̧ro̧rea̧ dapea̧ oa —yo̧mȩrȩ ni̧bä chjaorëremȩdejȩrȩ Jechu judi ma̧ȩ go̧a̧ti̧ oa.


Danȩrȩ, coa chjadüa̧mȩ judi, ca̧ Ama̧i̧ pio judi cjo̧ro̧de. Ado pio ju̧i̧iä tarupade cjo̧ro̧rea̧ üdë. Jabechji̧ ca̧ Ama̧i̧ pio ju̧i̧iä cjo̧ro̧requede cüdë. Ado pio coa juraji̧ri̧ judiro̧ cjo̧ro̧padirȩ pio coaiä. Jabechji̧ Ama̧i̧ tjamo̧ pio judiri ma̧na̧mȩ cjo̧ro̧rea̧ra̧ pio ju̧ri̧ra̧ cjo̧ro̧ tänȩparequedejȩrȩ —yo̧a̧dejȩrȩ—.


Ado Chimo̧ Pedro judi dëbë yo̧a̧dejȩ: —Cjäri̧ marea̧rȩ ca̧ Ano̧mȩ, pio mȩa a̧dë baärea̧mi̧dëde. Jabechji̧ bucho ana̧ cjo̧ro̧rea̧ yürümȩ ma̧ȩ pio ju̧i̧ chiamȩrenȩ pio mȩnȩ. Ado pio ju̧i̧iä pio mȩa a̧dë baärea̧mi̧dëde.


Ado ta̧rëdiäa̧ oaiä, jabechji̧ Ütë tjamo̧ pio judiri ma̧na̧mȩ ma̧ȩ coëma oa dabarea̧ dapanȩrȩ. Ado pio jiro ma̧ȩ oa urëdi oa jo̧rȩtaji̧ri̧rȩ cjo̧ro̧ro, jabechji̧ jare chjadüa̧ oa cjiami̧ dari̧ cjiapanȩrȩ, mu̧i̧tjoi̧dëpe bagari̧ —yo̧a̧dejȩrȩ.


Tjamo̧i̧ cjiari̧ yo̧rerequededibe. Eami̧ pumȩ üdë cüdë a̧ra̧ano̧a̧ pio ju̧i̧ ta̧rëdiärä judi, bucho ana̧ cjo̧ro̧pade ja̧borea̧ decjiari̧ —yo̧mȩrȩ yo̧rëremȩdejȩrȩ.


Cjo̧ro̧rea̧ yürümȩ pio ju̧i̧ ja̧bo tänȩa̧renȩro̧jo̧ȩ. Jabo danȩrȩ ca̧ oti̧, —yo̧a̧dejȩrȩ— mȩnȩro̧ ja̧bo tänȩrërea̧ pio ju̧i̧ bëdü tänȩa̧dejȩ Ütë tjamo̧ judi. Tjamo̧ davä. Mȩnȩro̧ ja̧bo tänȩa̧ pio judi bëdüa̧ oa cjiade yaba̧. Irä daea̧rea̧ro̧jo̧ȩ a̧ro̧rȩ. Bedüa̧mȩ oa irä daea̧rea̧ro̧jo̧ȩ.


Jabechji̧ pio ju̧i̧iämo̧i̧ chjätärea̧mi̧ dade ca̧ oti̧. Ado cja̧rȩmo̧ decjiade. Jechu pio ju̧i̧mo̧i̧ tuti yürü chjadürëremȩdejȩ Ütë tjamo̧ judi a̧ro̧rȩ chjätärea̧ dapea̧ oa. Pio ju̧i̧iämo̧i̧ chjätärea̧mi̧ dade —yo̧mȩrȩ dëbë ni̧bä chjaorëremȩdejȩrȩ tjamo̧ yo̧ji̧ri̧ pio ji̧ri̧iäpȩmo̧ Pedro judi.


Aja̧, quëna̧ji̧ri̧ pio ji̧ri̧ chaärea̧ go̧ȩ i pio ju̧i̧ cjo̧dëpea̧ oa, Damaco quȩmȩ bë ma̧ri̧räpȩ quëna̧ji̧ri̧ pio ji̧ri̧ mitë ëte chaä tänȩpea̧ oa järëremȩde. Tjamo̧ davä. 'Jechu judi Ütë tjamo̧ pio ju̧i̧iäpȩ baärea̧ no̧mi̧ dadida, coëma cjiari̧ baämȩ no̧mi̧ dadida' quëna̧ji̧ri̧ pio ji̧ri̧ chaäpea̧ oa, Judiorë a̧doparea̧ bëräpȩ quëna̧ji̧ri̧ pio ji̧ri̧ chaäpea̧ oa, eami̧ quëna̧yi̧ iei̧ pio ji̧bo chaäpea̧ oa järëremȩde go̧ȩ i pio ju̧i̧ cjo̧dëpea̧ oa tjamo̧ goë tuti ja̧bepamȩ pio ju̧i̧iä. Ado pio ju̧i̧iäpȩ go̧düdäräa̧mȩrȩ, ja̧di ta̧rëri̧ yo̧rëremȩdejȩ: —Danȩ, Damacoräpȩ jäparequede quëna̧ji̧ri̧ pio ji̧ri̧ mitëpea̧ oa, tabüa̧ oa goa ma̧na̧pea̧ oa Jerucharȩräpȩ chaäpea̧ oa —yo̧a̧dejȩ—. Pio ju̧i̧iä quëna̧ji̧ri̧ pio ji̧ri̧ chaärea̧ go̧ȩ i oa cjo̧dera̧pea̧requedemȩ Aja̧, pio ju̧ri̧pȩ goë na̧rȩpea̧ oa, Judiorë a̧doparea̧ bëräpȩ tjamo̧ yo̧ji̧ri̧ pio ji̧ri̧ goë na̧rȩpea̧ oa, judiro̧ coa mitërea̧ yürüpea̧ oa, cjo̧dera̧pea̧requedemȩ —yo̧mȩrȩ cjo̧dëa̧dejȩ tjamo̧ goë tuti ja̧bepamȩ pio ju̧i̧iä.


Jabechji̧ Jechu Quiricho pio judi chjadüa̧ oa ja̧beparequede pio ju̧i̧ ja̧ mu̧i̧tjoi̧mȩrȩ. Aja̧, judiodë pio ji̧ri̧iäpȩmo̧ ma̧ȩ chjadëi̧ pio ju̧i̧ a̧ra̧ano̧pea̧ oa ja̧beparequede Ütë tjamo̧ ja̧ bëräpȩ goë tuti ja̧bepamȩmi̧ dari̧. Jabechji̧ judiodë pio judiro̧ quëna̧ji̧ri̧pea̧ji̧ri̧ oa yürümi̧ dari̧ yürüparequedejȩrȩ Ütë tjamo̧ pio ju̧i̧iäpȩmo̧. Aja̧, ca̧ yürürea̧mi̧ da oa yürümȩrȩ yürüpareconȩ goaeri̧ pjea̧ cjitëmi̧ dari̧ cjiapamȩ pio ju̧i̧, Tjo tjamo̧ pio ju̧i̧iä china̧chjari̧ tutia̧ oa cjiapamȩ pio ju̧i̧.


Tjamo̧ davä. A̧ro̧rȩ Jechu pio ju̧i̧ quëna̧ oaiä, jabechji̧ Ütë tjamo̧ pio ju̧i̧iäpȩ ëba jämi̧ dari̧ japarëremȩdiibe. Aja̧, Ütërë cjäri̧ri̧ cjia da̧ chja̧oeräpȩ ano̧ mire cjo̧ro̧pea̧ oa, ëba jämi̧ dari̧ japarëremȩdiibe Ütë tjamo̧ pio ju̧i̧ nö̧ta ori̧ bagari̧ ëba cjiarea̧ dapea̧ oa. Ado pio ju̧i̧iä jabechji̧, ma̧ chiadëri̧ cjiaji̧ri̧rȩ cjo̧ro̧rea̧rȩ, jidatarea̧ chiaji̧ri̧pea̧ji̧ri̧rȩ. Tjamo̧ davä. Ütë tjamo̧ pio judimi̧ dape jäpea̧ pio ju̧i̧, jënȩ ibë ëba goapea̧ pio ju̧i̧ jidataji̧ri̧rȩ cjo̧ro̧rea̧rȩ, ma̧ chiadëri̧ cjiaji̧ri̧rȩ.


Pio ju̧i̧iä yo̧requededibe. Pearä judi a̧ro̧rȩ chjai̧dëri̧ japea̧ oaiä, jabechji̧ ja̧bopea̧ chja̧oerämo̧ cjo̧ro̧rëreji̧ri̧rea̧rȩ. Jabo ja̧didëde yaba̧. Ütërë cjäri̧ri̧ cjia da̧ chja̧oerä ano̧ mire cjo̧ro̧rea̧rȩ. Pio judi ano̧ mire boami̧ dari̧ japea̧diibe. Ado pio ju̧i̧iä jabechji̧parȩa̧ oa cjiarea̧rȩ bucho ana̧ cjo̧ro̧rea̧mi̧ dari̧. Tjamo̧ davä. Ja̧bopea̧ chja̧oerä cjo̧ro̧rërea̧ ji̧, Ütërë cjäri̧ri̧ cjia da̧ chja̧oerä ano̧ mire cjo̧ro̧rea̧rȩ yaba̧, ibëa̧ Ano̧mȩ Jechu Quiricho pio ju̧i̧iä.


Danȩrȩ ca̧ oti̧, ¿tjana̧ yo̧diibe ma̧ȩ üdë pearämȩ üi̧ pio ju̧i̧ chjiari? Tjana̧dë, ta̧rëchji̧vä Ütë tjamo̧ judi go̧ȩpa tänȩrërea̧ ma̧ȩ pio ju̧i̧: "Pearärëremȩ üi̧ pio judi, Ada̧ pio judi, jabechji̧ Ütërë pareapea̧ oaiä pumȩpea̧de.” Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ada̧ judi pearärëremȩ üi̧ pio judide, jabo ji̧dë duri oamȩ üi̧ üdë Quiricho pio judide. Ado Quiricho pio judi jabechji̧ pearärëremȩ üi̧ pio judi japarea̧mi̧dë pio ju̧i̧ japarëremȩde. Tjamo̧ davä. Duri oamȩ üi̧ pio judi bucho ana̧ cjo̧ro̧rea̧ yürürëremȩde. Ja̧boa̧mi̧ dari̧ cjiaji̧ri̧ pio ji̧ri̧ bucho ana̧ cjo̧ro̧rea̧ yürürëremȩde. Jabechji̧ bucho ana̧ cjo̧ro̧rea̧ yürümȩ tjo pio judide.


Ado yaba̧ Quiricho judi pio ibë chjiari ja̧di dari̧ tuti japarërea̧ oaiä, jabechji̧ a̧ro̧rȩ ütëborë ni̧bärea̧ darea̧ro̧jo̧ȩ ibëa̧ Amai̧ pio ju̧i̧, judio judiro̧, ado judiodë pio judiro̧borë. Jabechji̧ a̧ro̧rȩ ütëborë cja̧rȩmȩ pio ju̧i̧iä ni̧bärea̧ darea̧ro̧jo̧ȩ, Tjo tjamo̧ pio ju̧i̧iä.


Jabechji̧ pio jiro ma̧ȩrä cjo̧ro̧rea̧mi̧dëde. Judiro̧ yo̧a̧ üdë, jabomo̧ chja̧oe cjiami̧ dari̧ cjiarëremȩde. Jabomo̧ chja̧oemi̧ darëremȩde ado cja̧rȩmo̧rȩ ma̧na̧bëmi̧. Duri oa ma̧na̧pamȩ pio ju̧i̧ ja̧ chja̧oerä cjiami̧ dari̧ cjiarëremȩde. Ja̧di dari̧ yo̧a̧ üdë jabomo̧ na̧rȩrea̧de. Jabomo̧ na̧rȩmi̧ dari̧ japarëremȩdejȩrȩ judio pio ji̧ri̧iäpȩmo̧ cja̧rȩmȩrȩ ma̧na̧pea̧ pio ju̧i̧ chjiari. Ado pio judi ma̧na̧de peadë. Ado pio ju̧i̧iämo̧i̧ cjo̧ro̧rea̧ darea̧rȩ yaba̧, Quiricho pio ju̧i̧iämo̧i̧. Tjamo̧ri̧ cjo̧ro̧rea̧ yürümȩ pio judide.


Ado Quiricho judi Ütë tjamo̧ pio judide. Jabechji̧ pio ju̧i̧ ja̧ tjoro cjiade Ütë tjamo̧ judi. Ado pio ju̧i̧iä Ütë tjamo̧ ja̧ jo̧rȩtarea̧ chiade. Ado Ütë pio ju̧i̧ ja̧ üdë Quiricho pio ju̧i̧ ja̧de peaja̧di.


Ado Quiricho pio judi ma̧na̧rä, pio ibë cjo̧ro̧rea̧ peaja̧ oa yürümȩ pio judi ma̧na̧rä, jabechji̧ pio ju̧i̧ nö̧ta cjiadiäparea̧rȩ a̧dëräpȩ ju̧ri̧ Ütë tjamo̧ pio ju̧i̧ nö̧ta.


Ado pio ju̧i̧iä nö̧tade pumȩ ji̧ri̧ ji̧dë ma chjätä tänȩpea̧ ji̧. Ado pio ju̧i̧iä eami̧ pumȩ oa, Jechu pio ju̧i̧ quëna̧mȩ oa, Ütë tjamo̧ pio ju̧i̧iäpȩ jämi̧ dari̧ quëna̧mȩ oa, jabechji̧ chjätärea̧ yürüdejȩ. Jabechji̧ judi bucho ana̧mȩ tara, judi ja̧bodëmȩ tara, jabechji̧ pio ibë chjiari ji̧dë ma goë tuti cjo̧dëpai̧ dade Ütë tjamo̧ pio ju̧i̧iä.


Ado icharaita judiro̧ Moicherë go̧ȩparërea̧ ma̧ȩrä ja̧di dari̧ ji̧dë ma jape chjaoa̧ oaiä, jabechji̧ chjadëri̧ daba tänȩdiibe Tjo tjamo̧ judi. ‘A̧ja̧, jabë china̧chjadida, a̧dë chjäte china̧chja jo̧ tjo üdë china̧chjadida, Ütërë cjiamȩräpȩ yu̧a̧ üdë jabë china̧chjadida, eami̧ pumȩ üdë pio ju̧ri̧pȩ chjaodëri̧ yu̧a̧därätärea̧ ji̧, tjamo̧ri̧ yu̧a̧därärea̧mi̧dëdida, jabechji̧ dai cjiamȩ jo̧ tjo üdë jabë cjiami̧ nö̧ta tjamo̧ri̧ yu̧a̧därärea̧mi̧dëdida, judiro̧ Moicherë go̧ȩparërea̧ ma̧ȩrä jabë cjo̧ro̧a̧mi̧ nö̧ta tjamo̧ri̧ yu̧a̧därärea̧mi̧dëdida, jabo tutia̧ oa cjiadida’ quëna̧ daba tänȩdiibe Tjo tjamo̧ judi.


Ado yaba̧ mȩnȩro̧ birë ma̧na̧rëremȩ pio ju̧i̧iä quëna̧ji̧ri̧pea̧renȩro̧jo̧ȩ Ütë tjamo̧ pio ju̧i̧. Tjamo̧ davä. Quiricho pio ju̧i̧iä quëna̧ji̧ri̧pea̧renȩro̧jo̧ȩ Ütë tjamo̧ pio ju̧i̧ bëdü tänȩrëremȩ pio ju̧i̧. Ado Quiricho pio ju̧i̧, bëdüa̧ oa cjiarëremȩ pio ju̧i̧ a̧dë chjäte ba chiaparȩrëremȩdejȩ Jäja judi. Tjamo̧ davä. Pumȩ judiro̧ ba chia dadërërea̧ pio ju̧i̧ a̧dë chjäte ba chiaparȩrëremȩdejȩ. Ado pio ju̧i̧iä jabechji̧, Ütë tjamo̧ pio ju̧i̧iäpȩmo̧ ma quëna̧renȩro̧jo̧ȩ yaba̧. Ado pio ju̧i̧iäpȩmo̧ ma jidatarenȩro̧jo̧ȩ dibëiäpȩmo̧ teracabari̧ ma̧diä ma̧diä cjia tänȩdëmȩ pio ju̧i̧. Ado danȩrȩ ca̧ oti̧, Ütë tjamo̧ judi ja̧di dari̧ tuti japarërea̧ oaiä, pio ibë chjiari a̧dë chjäte chjadëri̧ japarërea̧ oaiä, jabechji̧ järi tjamo̧täreji̧ri̧rea̧rȩ tatachjami̧ dari̧ cjo̧ro̧pea̧ ji̧ a̧ro̧rȩ pio yoa chiri oa cjo̧ro̧a̧ nö̧ta.


Danȩrȩ ca̧ oti̧, a̧ro̧rȩ Ütë tjamo̧ ja̧ ma̧ȩ oa ji̧dë ma dabapaji̧ri̧rȩ cjo̧ro̧a̧ oaiä, ji̧dë u̧i̧ ütëchjai̧pe bagarea̧rȩ. Ado a̧ro̧rȩ ji̧dë u̧i̧ ütëchjai̧pe baga̧ oaiä, ji̧dë u̧i̧ queri̧räpȩ cjiami̧ dari̧ cjiarea̧rȩ ibëa̧ Ano̧mȩ Jechu pio ju̧i̧ nö̧ta, ibë cjo̧ro̧rea̧ yürümȩ pio ju̧i̧ nö̧ta. Ado goë cji̧däriä baämi̧ dari̧ japadiibe jibëa̧ bëmi̧ darä, taru a̧rȩmȩ chjadëmi̧ darä, cji̧däa̧ oa cjiamȩ bëmi̧ darä. Jabechji̧ quëna̧ji̧ri̧ pio ji̧ri̧iä cji̧däa̧ oa cjiami̧ dari̧ cjiade jibëa̧ bë üdë a̧ro̧rȩ pio ju̧i̧iäpȩmo̧ chjacjiamȩri̧ jo̧rȩtapea̧ oa, a̧ro̧rȩ pio ju̧i̧iäpȩmo̧ ma̧ȩ goaera̧ ni̧bäpea̧ oa. Tjamo̧ davä. Cjo̧ro̧rea̧ chiamȩ ta̧dëmi̧ da oa goë cji̧däriä baämi̧ dari̧ japadiibe jibëa̧ bëmi̧ darä, ta̧dë ji̧ra̧ tjamo̧mi̧ da oa. Danȩrȩ ca̧ oti̧, eami̧ pumȩ üdë jibëa̧ bë oa ta̧dëra̧ pio ju̧ri̧ra̧ cji̧därä judi, jabechji̧ taru a̧rȩmȩ pio ju̧i̧ cji̧dädejȩ yabochja. Ado pio ju̧i̧ tarupë cji̧därä, jabechji̧ buräpȩ ju̧ri̧ yabochja arëchädejȩ tjamo̧ goë chamȩ ta̧dë pio ju̧i̧. Ana̧ tjamo̧ oa, chjadëri̧ chjuroa̧ oa cjiamȩ oa arëchädejȩ buräpȩ ju̧ri̧. Jabechji̧ tjamo̧ goë chamȩ ta̧dëri pio judiri baäde taru a̧rȩmȩ üdë. Ado ja̧dëa ji̧ taru a̧rȩmȩ pio ju̧i̧ chjadëri̧ cji̧däa̧ oa goarä, jabechji̧ pio ju̧i̧ uëmo̧ ta̧dë ji̧ra̧ tjamo̧ oa goë cji̧dädejȩ ji̧mo̧ cjia maeari̧, chjuari̧ cjia maeari̧, cja̧rȩmȩ codë maearë cjiari̧. Ado danȩrȩ ca̧ oti̧, ibëa̧ Ano̧mȩ Jechu pio judi tjamo̧ goë chamȩ ta̧dëmi̧ dade. Jabechji̧ pio judiri ja̧ maearë chjuari̧ goë cji̧däa̧ oa cjiami̧ dari̧ cjiarea̧rȩ jibëa̧ bëmi̧ darä. Pio ju̧i̧iä cjo̧ro̧rea̧ chiarea̧rȩ. Danȩrȩ, Ütë tjamo̧ pio judi mitërëremȩdejȩ tjamo̧ goë chamȩ ta̧dëmi̧ damȩ pio ju̧i̧, ‘ba chia tjamo̧dida’ quëna̧ jo̧rȩtamȩrȩ. Ado o judiro̧ peaja̧dimi̧ dari̧ jo̧rȩtatärea̧ ji̧, peaja̧di ba chia datärea̧ ji̧, cjäri̧ madiro̧jo̧ȩ, ba chia dadëa̧diro̧jo̧ȩ, jabo ta̧dë teracabami̧ da oa darëreji̧ri̧diro̧jo̧ȩ, ba chiadëmȩmi̧ da oa. Jabo Ütë tjamo̧ pio judi mitërëremȩdejȩ. Jabo dai oa cjiamȩ bërä arëchäpea̧ oa mitëdërëremȩdejȩ jabo. Pumȩ pio judiro̧ japea̧ bërä arëchäpea̧ oa, dai chirirä ja̧ bërä cji̧däpea̧ oa mitëdërëremȩdejȩ, jabo jibëa̧ bëmi̧ darä arëchäpea̧ oa mitërëremȩdejȩ. Jabo dëdë, o judiro̧ chjuari̧ jiadadiro̧jo̧ȩ, jabo ja̧di dari̧ japadërëreji̧ri̧renȩrȩ ca̧ oti̧. Badë dadëa̧renȩro̧jo̧ȩ, jabo ba chia darëreji̧ri̧renȩro̧jo̧ȩ. Ado pio ju̧i̧iä jabechji̧, mȩnȩro̧ Ütë tjamo̧ pio ju̧i̧ ja̧ queri̧räpȩ jämi̧ dari̧ japarä, jabechji̧ Ütë tjamo̧ pio judi goë cji̧däriä baämi̧ dari̧ japadidibe jibëa̧ bëpe bagarea̧mi̧ dari̧. Tjamo̧ davä. Cjo̧ro̧rea̧ peaja̧ oa chiamȩ ta̧dëmi̧ da maea oa, ji̧ra̧ tjamo̧ oa goë cji̧däriä baämi̧ dari̧ japadidibe ca̧ oti̧, ji̧mo̧ ma cjiape bagapea̧ oa, pio ju̧i̧ ja̧ bëpe bagami̧ dari̧ cjiapea̧ oa. Jabechji̧ pio judi bëpapea̧ oa, goë cji̧däriä baämi̧ dari̧ japadiibe a̧ro̧rȩ pio ju̧i̧ ja̧ oa ja̧bepapea̧ oa, a̧ro̧rȩ pio ju̧i̧iäpȩmo̧ chjacjiamȩri̧ jo̧rȩtapea̧ oa. Danȩrȩ ca̧ oti̧, a̧ro̧rȩ quëna̧ji̧ri̧ pio judiro̧ ütëborë goë tuti ja̧bepaji̧ri̧pea̧rea̧rȩ. Tjamo̧ davä. Ütë tjamo̧ ja̧ bëmi̧ darä ja̧bepapea̧ oa, goë tuti ja̧bepaji̧ri̧pea̧rea̧rȩ. Jabo danȩrȩ, ¿tjana̧ oa japadirȩ Ütë tjamo̧ ja̧ bërä goë tuti ja̧bepaji̧ri̧ pio judiro̧? Tjana̧ oa japadë, jabechji̧ ji̧dë ma goe gu̧rori̧ cäë yürüji̧ri̧rȩ ja̧bepadirȩ. Jabo danȩrȩ ca̧ oti̧, dai chirirä cjo̧ro̧mȩ pio ju̧i̧ goe gu̧rori̧ cäë yürüdë marea̧ro̧jo̧ȩ. Tjamo̧ davä. Dai chirirä ja̧ oveja oa, dai chiri ja̧ chivo oa goe gu̧rori̧ cäë yürüdë marea̧rȩ, jabo Tjo tjamo̧ ja̧ chja̧oerä cjiaji̧ri̧rȩ cäë yürümi̧ dari̧ yürürea̧ro̧jo̧ȩ dami̧ti̧ ba chia oa. Jabechji̧ a̧ro̧rȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩta oaiä, a̧ro̧rȩ chjacjiamȩri̧ ni̧bä oaiä, cäë yürümi̧ dari̧ yürürea̧ro̧jo̧ȩ ca̧ oti̧. ‘Aja̧, Ütë tjamo̧ judi chjadëri̧ japea̧diibëda’ quëna̧ jo̧rȩta̧ oaiä, cäë yürümi̧ dari̧ yürürea̧ro̧jo̧ȩ. Ado Jechu Quiricho judi pio ibë chjiari chjadëri̧ tuti japea̧ oaiä, jabechji̧ goae tjamo̧dejȩ davä Ütë tjamo̧ pio ju̧i̧iä, a̧ro̧rȩ cäë yürümi̧ dari̧ yürüa̧ üdë.


Danȩrȩ, Quiricho pio judiborë conȩda̧ oa cjiarëremȩde Ütë tjamo̧ pio judi tänȩa̧ oaiä. Jabechji̧ judi coëma cjiari̧ cjo̧ro̧a̧räbo, ma̧i̧ dari̧ conȩdarëreji̧ri̧diro̧jo̧ȩ. Jabechji̧ cja̧rȩmȩ co chjai̧dëri̧ japadëmȩrȩ ano̧ mire ja̧borëremȩde ji̧ra̧ co chjai̧dëri̧ jape chjaoji̧ri̧ pio ji̧ri̧ chjiari, ibë chjadëri̧ ëba baämi̧ dari̧ japapea̧ oa Ütë tjamo̧ pio ju̧i̧iäpȩ. Jabechji̧ cja̧rȩmȩ co maea ja̧borëremȩde, ado judiri ja̧bodëpade. Aja̧, jibëa̧ icjara oa ja̧bo tänȩrëreji̧ri̧diro̧jo̧ȩ, jabo Tjo tjamo̧ pio ju̧i̧iä bëdüa̧ oa cjiarëremȩde.


Jabo danȩrȩ ca̧ oti̧, a̧ro̧rȩ yo̧rä judi, “Cjäri̧ marequede, chjai̧dë chiadërequede” yo̧rä judi, cjäri̧ marea̧rȩ, tjamo̧i̧ cjiari̧ baämȩ ma̧ȩ üdë ibëa̧ chji̧rä jabë tjamo̧ri̧ chadëde jabo ji̧dëri̧ u̧i̧pea̧ oa cjiarea̧rȩ ibëa̧ ma̧na̧ri̧ japea̧ oaiä.


Jabechji̧ eami̧ pumȩ üdë, ‘Aja̧, Jechu judi Ütërë mitëa̧ chjätä tänȩmȩ pio judidida’ quëna̧dërä judi, ‘jabechji̧dida’ quëna̧ dadëpadejȩ Ama̧i̧ tjamo̧ judi. Jabo eami̧ pumȩ üdë, ‘Aja̧, Jechu judi Ütë tjamo̧ ja̧ Joja pio judidida, Ütë tjamo̧ pio judi chjadüa̧ oa pio ibë chjiari birë ma̧na̧diibëda’ quëna̧mȩrȩ ni̧bä chjaorä judi, jabechji̧ ori̧ bagari̧ ëba cjiarea̧ dapade Ama̧i̧ tjamo̧ pio ju̧i̧ nö̧ta.


Ado peaja̧di dabarea̧rȩ Ütë tjamo̧ ja̧ Joja judi birë ma̧na̧pea̧ pio ju̧i̧ chjiari. Aja̧, ma̧na̧rëremȩde, ado yürürëremȩdiibe dabarea̧ oa, a̧ro̧rȩ 'Ütë tjamo̧ pio judidida' quëna̧ dabarea̧ dapea̧ oa. Ado yaba̧, a̧ro̧rȩ Ütë tjamo̧ pio ju̧i̧ tjamo̧ri̧ dabaji̧ri̧pea̧ tara, jabechji̧ pio ju̧i̧ nö̧ta ori̧ bagari̧ ëba cjiarea̧ daea̧rea̧rȩ a̧ro̧rȩ Jechu Quiricho pio judiri ja̧ mapea̧ tara, a̧ro̧rȩ Ütë tjamo̧ ja̧ Joja pio judiri ja̧ mapea̧ tara. Jabechji̧ Jechu Quiricho judi Ütë tjamo̧ pio judide. Ado pio judi tjamo̧de pio ibëiäpȩmo̧ bucho ana̧ cjo̧ro̧rea̧ yürümȩ judi.


Jechu Quiricho judi pio yoa chiri oa birë ma̧na̧rëremȩde. Ado pio ju̧i̧ chjiari na̧rȩrea̧ üdë tjarari̧de. Danȩrȩ, ui üdë na̧rȩrea̧de. Jabechji̧ uirä go̧ȩ cjaeä chuda̧ oa cjiarëremȩde. Pio jiro na̧rȩrea̧ üdë na̧rȩde judi birë ma̧na̧ pio ju̧i̧ chjiari. Jabo pio judimo̧dëde. Ado cja̧rȩmo̧de peaja̧di. Jabechji̧ goe üdë peaja̧di na̧rȩrea̧de. Jabechji̧ pio ju̧i̧ ja̧ goe üdë gu̧roa̧ oa cjiarëremȩde pio ibë chjiari. Peaja̧di na̧rȩrea̧de. Peaja̧di na̧rȩde judi birë ma̧na̧ pio ju̧i̧ chjiari. Jabo pio judimo̧dëde. Danȩrȩ, Tjo tjamo̧ pio judiborë na̧rȩrea̧de. Jabechji̧ Jechu pio ju̧i̧ chjiari tjamo̧i̧ cjiari̧ baämȩ dabarea̧ yürümȩde Tjo tjamo̧ judi. Aja̧ ca̧ oti̧, Jechu pio ju̧i̧ chjiari na̧rȩrea̧de. Ado ji̧mo̧ baädirȩ pio jiro na̧rȩrea̧ tjarari̧rȩ. Cja̧rȩmȩ na̧rȩrea̧ chia maeadirȩ. Cja̧rȩmȩ jo̧rȩtarea̧ chia maeadirȩ. ‘Aja̧, Jechu judi Ütë tjamo̧ pio ju̧i̧ ja̧ Joja tjamo̧dida’ quëna̧rea̧mi̧ dari̧ na̧rȩdiibe a̧ro̧rȩ quëna̧pea̧ oa.


Jabo eami̧ pumȩ üdë quëna̧rä judi, ‘Cjäri̧ madida, Quiricho judi a̧ra̧ano̧rërea̧ üdë nö̧tadëdida, jabechji̧ judi a̧ra̧ano̧a̧ pio ju̧i̧ uëri baämȩ ma̧ȩ pio ju̧i̧ quëna̧pea̧ chiaquëda’ quëna̧rä judi, cjäri̧ madi, Ütë tjamo̧ pio ju̧i̧ nö̧ta jädü cjiarea̧ chiadëdi. Jabo eami̧ pumȩ üdë, Quiricho judi a̧ra̧ano̧a̧ ma̧ȩrä cjo̧ro̧mȩ pio judi, jabechji̧ Ama̧i̧ tjamo̧ pio ju̧i̧ nö̧ta jadü cjiarea̧ chiadi, Joja pio ju̧i̧ nö̧tabo.


Ado Jechu Quiricho pio ju̧i̧iäbo goë cjo̧dërequede. Aja̧, Ütë ja̧ ma̧ȩ oa coëma cjiari̧ daba tänȩmȩ pio ju̧i̧iä, o ji̧ri̧ ja̧ yaboi̧ bëdüa̧ oa cjiamȩ pio ju̧i̧iä, ja̧boa̧remȩrȩ bëdüa̧ oa cjiamȩ pio ju̧i̧iäbo goë cjo̧dërequede, a̧dë chjäte tjamo̧ yo̧mȩ pio ju̧i̧iä, ado cja̧rȩmo̧rȩ nö̧tadärärea̧mi̧dëri̧ cjiamȩ Ütë pio ju̧i̧iä. Jabechji̧ pio ju̧i̧iäbo goë cjo̧dërequede, judi pio dibë cjäri̧ri̧ cjiamȩrȩ yürütä, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabechji̧ ji̧dë ma idami̧ dari̧ ea tjamo̧diibe Quiricho judi, eadëpe bagarea̧ decjiari̧. Ado pio ibë chjiari goe gu̧rori̧ ano̧ mire ja̧borërea̧ oaiä, jabechji̧ jare chjadüa̧ oa cjiami̧ dari̧ cjiarea̧rȩ yaba̧, a̧ro̧rȩ ibëa̧ icjararä chjai̧dërë yo̧a̧ chja̧oerä cjo̧ro̧chea oa.


Ja̧dëa ji̧ daea̧reconȩ a̧dë oa. Ado ju̧ri̧pȩ tuti cararea̧ joë ya oa daea̧reconȩ areia̧ oa cjiamȩ oa. Ado chjaodëri̧ daea̧reconȩ yae bërebërea oa. Ado yae bërebërearä buë chamȩ oa daea̧reconȩ peaja̧di. Aja̧, “Coëma cjiari̧ Jo̧rȩtamȩ” quȩmȩ oa, “Judi yo̧a̧mi̧ Japamȩ” quȩmȩ oa daea̧reconȩ yaerä buë chamȩ oa. Ado judi, jabechji̧ coëma cjiari̧ ütarë bape chjaomȩrȩ acji tai̧dejȩrȩ pio jȩa dëbëpe chjaoji̧ri̧ pio ji̧ri̧iäpȩmo̧.


Ado pumȩ judiro̧ ütëbodärärë jibëa̧ quȩ oa bucho ana̧ cjo̧ro̧rea̧ joërä go̧ȩpea̧ oa cjiadëa̧rä judi, jabechji̧ cjo̧dë tja ana̧räpȩ aeno̧a̧ oa cjiadiäa̧ maeadirȩ.


Ja̧dëa ji̧ a̧dërämȩ ja̧ mu̧i̧tjoi̧ üdë ji̧dë u̧i̧ na̧rȩtämi̧ cjiamȩrȩ na̧rȩa̧dique bea oa, bucho ana̧ cjo̧ro̧rea̧ yürümȩ ui oa. Ütë ja̧ charea̧ri pio judiri ca̧mȩ oa, tatachjari̧ ca̧mȩ oa na̧rȩa̧dique, Oveja pëi̧ chjamȩmi̧ da pio ju̧i̧ ja̧ charea̧ri pio judiri ca̧mȩ oa.


Ado ja̧dëa ji̧ ta̧rëa̧reconȩ Tjo tjamo̧ pio ju̧i̧. Aja̧, Oveja pëi̧ chjamȩmi̧ da pio ju̧i̧ ja̧ iei̧payi̧ pio ji̧ nö̧ta ni̧bämȩ oa ta̧rëa̧reconȩ. Ado Jechu pio ju̧i̧iäpȩmo̧ ni̧bäji̧ri̧ oa ta̧rëa̧requedejȩrȩ judi jo̧ȩra̧pe ma̧na̧tä. Aja̧, ja̧di ta̧rëri̧ ni̧bäji̧ri̧ oa ta̧rëa̧requedejȩrȩ: —Ma̧na̧vä —yo̧a̧diro̧jo̧ȩ. Ado Tjo tjamo̧ judi Oveja pëi̧ chjamȩmi̧ da pio ju̧i̧ ja̧ iei̧payi̧ pio ji̧ nö̧ta ji̧dë u̧i̧ yo̧ji̧ri̧rȩ ja̧di ta̧rëri̧ yo̧a̧dirȩ: —Aja̧, ado eami̧ pumȩrȩ pio yoa ma̧ȩ oa ta̧rëmȩ pio judi peaja̧di dari̧ yo̧tädejȩ Jechu pio ju̧i̧iäpȩmo̧. Aja̧, “Ma̧na̧vä” yo̧tädejȩ. Ado eami̧ pumȩ üdë ui ja̧borä judi, jabechji̧ jarera̧täde bucho ana̧ cjo̧ro̧rea̧ yürümȩ ui pio ju̧i̧ jarapea̧ oa. Aja̧, badëri̧ jarera̧täde —yo̧a̧dirȩ.


Ja̧dëa ji̧ coa ni̧bämȩ judi, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Daodichea quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Aja̧, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, ‘Ja̧ditäde’ quȩmȩ pio judirequede. Pio coaiä tjamo̧i̧ cjiari̧ cjiade Ütë tjamo̧ ja̧ ma̧ȩ üdë. Pio judi yo̧a̧mi̧ japadärämȩrequede a̧dë chiquirea̧ decjiari̧. Jabechji̧ judi pearä judirä pareaparërea̧ üdë pio coaiämo̧i̧ taruparëremȩde. Ado pio judimȩrȩ ma̧ȩ yürürequededibe.


Ja̧dëa ji̧ cüdë daea̧ üdë, ji̧dë u̧i̧ yo̧mȩrȩ ja̧di ta̧rëri̧ ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Pjiradepjia quȩmȩ bë ma̧ri̧räpȩ tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, chjai̧dëra̧ mirea̧ oa cjiadëmȩ pio judirequede. Tjamo̧i̧ cjiari̧ cjiamȩ pio judirequede. Ado Davi quȩmȩrea̧ ütë pio ju̧i̧ ja̧ joë ya coërea̧ pio ju̧i̧ goarequede. Ado pio ju̧i̧iä cüdë eami̧ tuti cararea̧ joë ya oa chjuari̧ tuti cararä judi, jabechji̧ chjuari̧ tuti cara̧ oa cjiapade, ado cja̧rȩmo̧rȩ areiarea̧ decjiari̧. Ado cüdë eami̧ tuti cararea̧ joë ya oa areiarä judi, jabechji̧ chjuari̧ tuti cararea̧mi̧dëri̧ areia̧ oa cjiapade. Jabechji̧ cüdë ütärë jo̧rȩta̧mi̧ japadärärea̧ chiarequede, ado cja̧rȩmo̧rȩ dëbëparea̧ decjiari̧.


Lean sinn:

Sanasan


Sanasan