Juan 13:5 - Biblia Pume

⁵ Ja̧dëa ji̧ ui oa arë cjareno̧a̧dejȩ tachja pjatërä. Ado ja̧di dari̧ japa ëte, taruparëremȩde jibëa̧ jadü pio ji̧ri̧ ja̧ ta oa joapea̧ ji̧. Ado cja̧rȩmȩ ja̧ ta oa joa ëte, bubëgua̧dejȩ bubëguarea̧ra̧, jibëa̧ cadarä yura̧rea̧ra̧ pio ju̧ri̧ra. Ja̧di dari̧ japa ëte, ano̧ mire joarëremȩde ado cja̧rȩmo̧ ja̧ oa.

Juan 13:5 Iomraidhean Croise

Taruparea̧ Ma̧ȩ 18:4

Aja̧, pio dibëiä chjadërä judi, ui oa goa jana̧ tänȩparequedejȩrȩ ca̧ mu̧i̧tjoi̧ ji̧ri̧ mȩnȩro̧ dibëa̧ ta oa chjadëri̧ joapea̧ oa. Jabechji̧ mȩnȩro̧ dabami̧ to chja̧oeräpȩ chadieno̧täreji̧ri̧nȩrȩ järätä cjatäjärea̧ dapea̧ oa.

Taruparea̧ Ma̧ȩ 19:2

Ado Oto judi yo̧a̧dejȩrȩ: —Jana̧nȩrȩ. Danȩrȩ, jätärȩ ca̧ bëräpȩ. Pio ju̧ri̧pȩ cjiadiäpanȩrȩ mo̧a̧pea̧ oa. Ju̧ri̧pȩ dibëa̧ ta oa joarea̧ dapanȩrȩ. Ado dopea̧rä, jabechji̧ chjadëri̧ go̧dürea̧ dapanȩrȩ. Danȩrȩ, dibëa̧ mu̧i̧tjoi̧mi̧ darë yo̧requededibe —yo̧a̧dejȩrȩ. Jabo judiro̧ dëbë yo̧tea̧diro̧jo̧ȩ Oto ju̧i̧: —Cjäri̧ marea̧rȩ. Jabechji̧ dairäpȩ cjiadiäparea̧rȩ —yo̧a̧diro̧jo̧ȩ.

Taruparea̧ Ma̧ȩ 43:24

Ado ja̧dëa ji̧ ëba yu̧a̧rëremȩdejȩrȩ ütëbo oa Joche ja̧ jo̧räpȩ. Ado ui yürüa̧dejȩrȩ jibëa̧ ta oa chjadëri̧ joapea̧ oa. Ado jibëa̧ buro oa yürüa̧dejȩrȩ jurarea̧ oa.

Go̧a̧rea̧ 51:2

Ca̧ chjai̧dë gȩrȩ üdë cjiadiädëri̧ bide bide joami̧ dari̧ japacoe cüdë chjai̧dë oa chiarea̧mi̧dëri̧.

Lucas 7:38

Ado bëräpȩ yu̧a̧ ëte, Jechu ja̧ duriräpȩ cjiayi̧pea̧nȩ. Ado ja̧dëa ji̧ ejaro cjiayi̧rȩ ju chatura̧ cjiadäräa̧nȩ. Ado Jechu ja̧ taräpȩmo̧ gu̧roa̧de jibëa̧ da ui üdë ejaro cjia̧ oaiä. Ado ja̧dëa ji̧ jibëa̧ ta oa gaüparȩpea̧ oa, bubëgua̧nȩjȩ jibëa̧ cö̧ra̧. Ado ja̧dëa ji̧ Jechu ja̧ ta oa goaeri̧ pjȩa̧mȩ joarea̧ oa arë cjaräyi̧rȩ ji̧dë ma ya i̧bu chjaorëreyi̧nȩjȩ jibëa̧ ta oa.

Lucas 7:44

Ja̧dëa ji̧ Jechu judi iei̧ pio ji̧iäpȩmo̧ dapea̧ oa mȩmȩrȩpamȩrȩ yo̧a̧dejȩ Chimo̧ ju̧i̧: —Danȩ, pio yi̧a iei̧ pio ji̧, pio yi ju chatura̧ cjiadäräa̧yi̧ pio ji̧ dajȩ —yo̧a̧dejȩ—. Jabechji̧ pio mȩnȩ coa chjadëri̧ yürütärea̧ ji̧, na̧ bëräpȩ go̧düna̧ra̧mȩ oa ui ca̧ ta oa joapea̧ oa yürütärea̧ ji̧, dabu pjo̧no̧ oa chiadëpe bagari̧ joapea̧ oa yürütärea̧ ji̧, cjäri̧ marenȩque, yürüdëa̧renȩque. Jabo pio jiro iei̧ pio yi̧në jibëa̧ da uira̧ pio ju̧ri̧ra̧ joë yürüa̧ni̧que ca̧ ta oa. Ado bubëgua̧ni̧que jibëa̧ cö̧ra̧ ji̧dëri̧.

Juan 13:10

Jabo Jechu judi yo̧a̧dejȩ: —Danȩ, eami̧ pumȩ üdë jibëa̧ icjara codë oa chjadëri̧ joarä judi, jabechji̧ igȩrȩ chiadëde. Joa̧ oa cjiade. Jibëa̧ ta pio ju̧i̧mo̧i̧ joapea̧de. Ado mȩnȩro̧ ütëborë peaja̧di dari̧ cjianȩrȩ. Icjara codë oa joa̧ oa cjiami̧ dari̧ cjianȩrȩ. Jabo cjäri̧ made, cja̧rȩmȩrȩ joa̧ oa cjiami̧ dari̧ cjiadëde —yo̧a̧dejȩ Jechu judi.

Juan 13:6

Ado ja̧dëa ji̧ Pedro pio ju̧i̧ ja ta oa joapea̧ oa tarupatea̧rä, Chimo̧ Pedro judi yo̧a̧dejȩ: —¿Pio mȩnȩ ca̧ ta oa joaparenȩ Ano̧mȩ? Cjäri̧ marenȩ. Jabomo̧ pumȩrequede. Mȩnȩ ca̧ ta oa joarea̧mi̧dërenȩ —yo̧a̧dejȩ.

Juan 13:8

Jabo Pedro judi yo̧a̧dejȩ: —Cjäri̧ marenȩ, mȩnȩ ca̧ ta oa cja̧rȩmȩ co joarea̧ yürüdëparequedemȩ jabechji̧ —yo̧a̧dejȩ. Ja̧dëa ji̧ Jechu judi dëbë yo̧a̧dejȩ: —Danȩ, cüdë na̧ ta oa joarea̧ dadërä judi, ca̧ jadüdëpe bagamȩrȩ cjiadiäparenȩ —yo̧a̧dejȩ.

Juan 19:34

Jabo guadia cja̧rȩmȩrȩ jibëa̧ yipjatë oa mitë ëte, chjaodëri̧ cjacjarë gua̧dejȩ pjatëtu ju chjia yuroi̧rä ju̧ri̧. Ado chjaodëri̧ go̧dürëremȩde goe üdë, uibo.

Japarea̧ 22:16

Ado ja̧dëa ji̧ a̧de yo̧a̧dique, “¿Tjana̧ ju̧i̧iä jabomo̧ dae charenȩ? ¿Tjana̧ ju̧i̧iä cjiadiä cjiadiä cjiarenȩ? Jabechji̧ cjitëvä. Uirä go̧e cjaeä chuda̧ oa cjiavä. Ado Ütë tjamo̧ pio ju̧i̧iä goëcjo̧dëvä mȩnȩ chjai̧dëri̧ japea̧ üdë duridëparȩa̧ oa cjiapea̧ oa.” Aja̧, ja̧di ta̧rëri̧ yo̧mȩrȩ ni̧bä chjaorëremȩdique Anania judi.

Cori̧tio Ma̧ȩ 1 6:11

Ado pio mȩnȩro̧ orë peaja̧dimi̧ dari̧ jape chjaorëreji̧ri̧nȩrȩ pearä judi, jabo yaba̧ tjaoëpai̧ dari̧ cjo̧ro̧ji̧ri̧pea̧nȩrȩ. Quiricho pio ju̧i̧ ja̧ quȩ ba chia oaiä, pio ju̧i̧ ja̧ ma̧ȩ oaiä ado cja̧rȩmo̧ pumȩpea̧nȩrȩ. Jabechji̧ chjai̧dë gȩrȩ chiadëji̧ri̧mi̧ dari̧ joa̧ oa cjiami̧ dari̧ cjiaji̧ri̧pea̧nȩrȩ. Ütë tjamo̧ ja̧ pumȩpe bagarea̧mi̧ dari̧ china̧chjari̧ tutia̧ oa cjiaji̧ri̧pea̧nȩrȩ. Chjai̧dë chiadëpe bagarea̧mi̧ dari̧ jabechji̧parȩa̧ oa cjiaji̧ri̧pea̧nȩrȩ. Tjamo̧ davä ca̧ oti̧, ibëa̧ Ano̧mȩ Jechu Quiricho pio judi tuti japea̧ oaiä, ibëa̧ Ütë ja̧ Tjo pio ju̧i̧ ja̧ jauëchja oaiä chjai̧dë chiadëpe bagarea̧mi̧ dari̧ jabechji̧parȩa̧ oa cjiaji̧ri̧pea̧nȩrȩ. Aja̧ ca̧ oti̧, ado cja̧rȩmo̧ pumȩ tjamo̧pea̧nȩrȩ. Ado pio ju̧i̧iä quëna̧dëji̧ri̧ pio judiro̧ japami̧ dari̧ japarea̧mi̧dëpea̧nȩrȩ yaba̧. Ado pio ju̧i̧iä jabechji̧, dibëa̧ omȩ pio ju̧i̧ tjamo̧ yo̧ji̧ri̧ pio ji̧ri̧iäpȩ ëba jädë matäreji̧ri̧renȩro̧jo̧ȩ. Tjamo̧ davä. A̧dë chjäte ma̧i̧ dari̧ japaji̧ri̧ pio ji̧ri̧iä, cüdë pio yabo ütarë yo̧a̧ji̧ri̧ pio ji̧ri̧iä tuti chi̧dëeapea̧ oa ëba jädë matäreji̧ri̧renȩro̧jo̧ȩ dibëa̧ omȩ oa. Jabechji̧ a̧dë chjäte ma̧i̧ dari̧ japaji̧ri̧ pio judiro̧ dibë chi̧dëearea̧mi̧dë madiro̧dibe.

Epjecho Ma̧ȩ 5:26

Ja̧di dari̧ japarëremȩde a̧doparea̧ pio ji̧ china̧chjari̧ tutipea̧ oa, chjai̧dë chiadë maeari̧ cjiapea̧ oa. Aja̧, uira̧ joami̧ dari̧ cjiapea̧ oa, Ütë ja̧ ma̧ȩ pio ju̧i̧ quëna̧ oaiä uira̧ joami̧ dari̧ cjiapea̧ oa ano̧ mire ja̧boera̧pea̧de.

Timoteo Ma̧ȩ 1 5:10

Jabo jibëa̧ pumȩ ji̧ri̧ chjadëri̧ a̧do chjaoyi̧ pio jini̧, dëdë go̧ȩpapea̧nȩ. Chjadëri̧ a̧dopea̧nȩ. Tjamo̧ davä. Pumȩ judiro̧ pio ji̧ chjiari chjadëri̧ jo̧rȩtarä judi, ‘Aja̧, ütai̧ chjadëni̧da, o ji̧ri̧ chjadëri̧ a̧doni̧ji̧ri̧da, no̧mȩ tjamo̧ri ja̧ chjadëri̧ jape chjaoni̧ji̧ri̧da’ quëna̧ jo̧rȩtarä judi, jabechji̧ go̧ȩ irä go̧ȩpapea̧nȩ. Tjamo̧ davä. Jibëa̧ bori̧ ji̧ri̧ chjadëri̧ jidayi̧rȩ cjo̧ro̧a̧rä judi, pio jȩa goë daera̧pea̧ji̧ri̧ pio ji̧ri̧ chjadëri̧ yürüyi̧rȩ a̧doa̧rä judi, jënȩ cja̧rȩmȩ co dadërërea̧ pumȩ pio ji̧ri̧ cjäri̧ri̧ cjiayi̧rȩ a̧doa̧rä judi, dëdë, go̧ȩpapea̧nȩ. A̧dopea̧nȩ. Aja̧, quëna̧ji̧ri̧ pio ji̧ri̧ chjadëri̧ a̧doyi̧rȩ cjo̧ro̧a̧rä judi, gito ana̧ri̧ jo̧rȩtaji̧ri̧ pio ji̧ri̧bo a̧doa̧rä judi, eami̧ti̧ chjadë oa jape chjaoyi̧rȩ cjo̧ro̧a̧rä judi, jabechji̧ chjadëri̧ a̧dopea̧nȩ. Aja̧ Timoteo, ja̧di dari̧ ütarapea̧de ja̧boa̧ji̧ri̧ ja̧ ivi pio ji̧ri̧ chjiari.

Ebereo Ma̧ȩ 10:22

Ado pio ju̧i̧iä Ütë tjamo̧ pio ju̧i̧iäpȩmo̧ jädärämi̧ dari̧ japatärȩ, chjuari̧ quëna̧ji̧ri̧rȩ. Jabechji̧ chjaocjiarea̧ decjiari̧, pënȩ maeara̧ jo̧rȩtarea̧ decjiari̧ pio ju̧i̧iäpȩmo̧ jädärämi̧ dari̧ japatärȩ. Jabechji̧ a̧ro̧rȩ chjai̧dëri̧ japea̧ üdë duridëparȩa̧ oa cjiade. Ado ibëa̧ chji̧ üdë Quiricho ja̧ goe oaiä pjo̧dechäa̧ oa cjiami̧ dari̧ cjiade. Ado pjo̧dechäa̧ oa cjiami̧ dari̧ cjia̧ oaiä, jabechji̧ chji̧ chjadëra̧ jo̧rȩtarea̧ darea̧rȩ. Ado ibëa̧ icjara üdë uira̧ joa̧ oa cjiami̧ dari̧ cjiade. Ado pio ju̧i̧iä jabechji̧, jädärämi̧ dari̧ japatärȩ Ütë tjamo̧ pio ju̧i̧iäpȩ.

Juan Ma̧ȩ 1 1:7

Jabo danȩrȩ, a̧ro̧rȩ tatami̧ darä cjo̧ro̧rä judi, Ütë tjamo̧ pio judimi̧ dari̧ tatami̧ darä cjo̧ro̧rä judi, jabechji̧ ori̧ bagari̧ ëba cjiarea̧ darea̧rȩ ibëa̧ dëbëti̧ra̧ chia. Ado Ütë ja̧ Joja pio ju̧i̧ ja̧ goe üdë, jabechji̧ ji̧dë ma joami̧ dari̧ japadiibe chjai̧dë üdë cjiadiärea̧ decjiari̧.

Juan Ma̧ȩ 1 5:6

Jechu Quiricho judi pio yoa chiri oa birë ma̧na̧rëremȩde. Ado pio ju̧i̧ chjiari na̧rȩrea̧ üdë tjarari̧de. Danȩrȩ, ui üdë na̧rȩrea̧de. Jabechji̧ uirä go̧ȩ cjaeä chuda̧ oa cjiarëremȩde. Pio jiro na̧rȩrea̧ üdë na̧rȩde judi birë ma̧na̧ pio ju̧i̧ chjiari. Jabo pio judimo̧dëde. Ado cja̧rȩmo̧de peaja̧di. Jabechji̧ goe üdë peaja̧di na̧rȩrea̧de. Jabechji̧ pio ju̧i̧ ja̧ goe üdë gu̧roa̧ oa cjiarëremȩde pio ibë chjiari. Peaja̧di na̧rȩrea̧de. Peaja̧di na̧rȩde judi birë ma̧na̧ pio ju̧i̧ chjiari. Jabo pio judimo̧dëde. Danȩrȩ, Tjo tjamo̧ pio judiborë na̧rȩrea̧de. Jabechji̧ Jechu pio ju̧i̧ chjiari tjamo̧i̧ cjiari̧ baämȩ dabarea̧ yürümȩde Tjo tjamo̧ judi. Aja̧ ca̧ oti̧, Jechu pio ju̧i̧ chjiari na̧rȩrea̧de. Ado ji̧mo̧ baädirȩ pio jiro na̧rȩrea̧ tjarari̧rȩ. Cja̧rȩmȩ na̧rȩrea̧ chia maeadirȩ. Cja̧rȩmȩ jo̧rȩtarea̧ chia maeadirȩ. ‘Aja̧, Jechu judi Ütë tjamo̧ pio ju̧i̧ ja̧ Joja tjamo̧dida’ quëna̧rea̧mi̧ dari̧ na̧rȩdiibe a̧ro̧rȩ quëna̧pea̧ oa.

Jechurë Na̧rȩrërea̧ Ma̧ȩ 1:5

Ado Jechu Quiricho pio ju̧i̧iäbo goë cjo̧dërequede. Aja̧, Ütë ja̧ ma̧ȩ oa coëma cjiari̧ daba tänȩmȩ pio ju̧i̧iä, o ji̧ri̧ ja̧ yaboi̧ bëdüa̧ oa cjiamȩ pio ju̧i̧iä, ja̧boa̧remȩrȩ bëdüa̧ oa cjiamȩ pio ju̧i̧iäbo goë cjo̧dërequede, a̧dë chjäte tjamo̧ yo̧mȩ pio ju̧i̧iä, ado cja̧rȩmo̧rȩ nö̧tadärärea̧mi̧dëri̧ cjiamȩ Ütë pio ju̧i̧iä. Jabechji̧ pio ju̧i̧iäbo goë cjo̧dërequede, judi pio dibë cjäri̧ri̧ cjiamȩrȩ yürütä, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabechji̧ ji̧dë ma idami̧ dari̧ ea tjamo̧diibe Quiricho judi, eadëpe bagarea̧ decjiari̧. Ado pio ibë chjiari goe gu̧rori̧ ano̧ mire ja̧borërea̧ oaiä, jabechji̧ jare chjadüa̧ oa cjiami̧ dari̧ cjiarea̧rȩ yaba̧, a̧ro̧rȩ ibëa̧ icjararä chjai̧dërë yo̧a̧ chja̧oerä cjo̧ro̧chea oa.

Jechurë Na̧rȩrërea̧ Ma̧ȩ 7:14

Jabo cüdë dabadëmȩrȩ dëbë yo̧a̧reconȩ: —Cjäri̧ marequede, dabadërequede, jabo pio mȩnȩ daba jirorenȩ —dëbë yo̧a̧reconȩ. Ja̧dëa ji̧ yo̧a̧dique: —Danȩ, pio yodëro̧je a̧dë chjäte chjai̧dë pio ju̧i̧ chjätäa̧ji̧ri̧ pio judiro̧dirȩ —yo̧a̧dique—. Aja̧, ana̧ tjamo̧ri̧ tararëreji̧ri̧ pio judiro̧dirȩ jabo yaba̧ chjadëri̧ ma̧na̧rea̧ daea̧dirȩ chjadëri̧ go̧dürea̧mi̧ dari̧. Ado jibëa̧ chjibo üdë Oveja pëi̧ chjamȩmi̧ da pio ju̧i̧ ja̧ goera̧ pio ju̧ri̧ra̧ joa̧ oa cjiami̧ dari̧ cjiade, bërebërea tjamo̧pe järea̧mi̧ dari̧.