Juan 13:4 - Biblia Pume

⁴ Ado pio ju̧i̧ daba oaiä, jabechji̧ jura charemȩrȩ cjitëno̧a̧de. Ado cjitë ëte, jibëa̧ chjibo oa, dai oa ina̧rea̧ chjibo pio ju̧i̧ cjüëno̧a̧dejȩ. Ado bubëguarea̧ pio ju̧i̧ mitë ëte yureno̧a̧dejȩ jibëa̧ cadarä.

Juan 13:4 Iomraidhean Croise

Lucas 12:37

Jabechji̧ bë ano̧mȩ judi ma̧na̧rä jibëa̧ mu̧i̧tjoi̧ pio ji̧ri̧ darä judi, mo̧a̧dëji̧ri̧ oa darä judi, jabo pio jȩa jidataji̧ri̧ oa darä judi, jabechji̧ ma̧ chiadëri̧ cjia tjamo̧mȩrȩ dapadejȩrȩ. Ado danȩrȩ, tjamo̧i̧ cjiari̧ yo̧requededibe. Bë ano̧mȩ pio judi ma̧na̧rä, pio jȩa jidataji̧ri̧ oa darä, jabechji̧ jurarea̧ oa yürüpadejȩrȩ, pio ji̧ri̧ ja̧ oa ano̧ mire ja̧bepë yürümȩrȩ. Tjamo̧ davä. Jibëa̧ ja̧beparea̧ chjibora̧ pio ju̧ri̧ra̧ ano̧ mire ina̧ ëte, jurarea̧ oa yürüpadejȩrȩ bë ano̧mȩ pio judi. Mechjaräpȩ ju̧ri̧ chaji̧ri̧ oa yürüpadejȩrȩ, pio ji̧ri̧ ja̧ oa ano̧ mire ja̧bepë yürümȩrȩ.

Lucas 17:7

Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ, eami̧ mu̧i̧tjoi̧ judi, gatëa̧ mu̧i̧tjoi̧ pio judi chjadëri̧ ja̧bepë yürüpea̧ chiade jibëa̧ ano̧mȩ ja̧ oa. Ado pio ju̧i̧iä yo̧requededibe —yo̧a̧dejȩrȩ—. Mu̧i̧tjoi̧ üdë tjadoräpȩ ju̧ri̧ do yoa cabëpe chjaoa̧räbo, do yoa oveja oa jida̧räbo, jabechji̧ "mechjaräpȩ jurera̧vä" yo̧dëtäremȩdejȩ ano̧mȩ judi.

Lucas 17:8

Aja̧, ja̧di ta̧rëri̧ yo̧dëtäremȩdejȩ jabo jabechji̧ jibëa̧ mu̧i̧tjoi̧ tara, "Aja̧, na̧ chjibo oa ano̧ mire ina̧ ëte, chjadëri̧ chuma̧ yürücoe ca̧ jurarea̧ oa" yo̧täremȩdejȩ. "Jabechji̧ yürücoe cüdë chjadëri̧ jura chapea̧ oa" yo̧täremȩdejȩ. "Ado ja̧dëa ji̧ cüdë chjadëri̧ jura̧ duri oa, jabechji̧ pio mȩnȩ ano̧ mire jurapai̧ darenȩ, ano̧ mire jarapai̧ darenȩ" yo̧mȩrȩ yo̧täremȩdejȩ mu̧i̧tjoi̧ oa ano̧mȩ pio judi.

Lucas 22:27

Danȩrȩ ca̧ jadü, dai chirirä ja̧ jo̧rȩtarea̧ra̧ jo̧rȩtaji̧ri̧ pio ji̧ri̧iä, ¿chjiade ji̧dë u̧i̧ ba chiamȩ judi? Jabo mechjaräpȩ jura chamȩ pio judi, jabo jurarea̧ oa goa jä yürümȩ mu̧i̧tjoi̧ judi? Mechjaräpȩ jara chamȩ pio judi, jabo jararea̧ oa mu̧i̧ jädiämȩ mu̧i̧tjoi̧ judi? ¿Chjiade ji̧dë u̧i̧ ba chiamȩ judi? Chiadëde, jabechji̧ mechjaräpȩ jura chamȩ pio judide. Jabo danȩrȩ, ja̧didëde pio coaiä. Ado pio ju̧i̧iä jabechji̧ dibëa̧ chjarerä cjo̧ro̧mȩrequede pumȩ pio ji̧ri̧ ja̧ mu̧i̧tjoi̧mi̧ darë, pumȩ pio ji̧ri̧ a̧domȩmi̧ darë, dibëa̧ oa ja̧bepë yürümȩmi̧ darë. Jabechji̧ pio dibë chjadëri̧ na̧rȩpea̧ oa ja̧di dari̧ na̧rȩrëremȩrequededibe mȩnȩro̧ pio coa chjadëri̧ cho̧rëdiäpea̧ oa —yo̧mȩrȩ ni̧bä chjaorëremȩdejȩrȩ.

Juan 13:12

Ado Jechu judi jibëa̧ jadü ja̧ ta oa joa ëte, ado chjereno̧ ina̧dejȩ jibëa̧ chjibo oa, dai oa ina̧rea̧ chjibo oa. Ado jënȩ mechja yuroro cha̧rea̧räpȩ ado chjereno̧ chamȩpea̧de. Ja̧dëa ji̧ iëno̧ë ta̧rëa̧dejȩrȩ jibëa̧ jadü ji̧ri̧: —Danȩrȩ, cüdë dibë pea japea̧ pio ju̧i̧ chjiari ¿chjadëri̧ dabadënȩrȩ? —iëno̧ë ta̧rëa̧dejȩrȩ—.

Cori̧tio Ma̧ȩ 2 8:9

Jabechji̧ ibëa̧ Ano̧mȩ Jechu Quiricho judi pumȩ pio ji̧ri̧iäpȩmo̧ cjäri̧ri̧ cjia da̧ pio ju̧i̧ chjiari tjamo̧ri̧ dabaji̧ri̧pea̧nȩrȩ ca̧ oti̧. Jabechji̧ a̧dëräpȩ ju̧ri̧ a̧dë chjäte ba chiamȩ oa goamȩborë, chjö̧na̧i̧ti̧ oa cjäri̧ ja̧bomȩrȩ cjo̧ro̧mȩpe bagarëremȩde. Tjamo̧ davä. Judi dami̧ti̧ ba chiamȩ oa goamȩborë, jabechji̧ jënȩ goa̧ chjö̧na̧i̧ oa a̧dë birarëremȩdejȩ pio yoa chirirä ano̧ mire cjo̧ro̧pea̧ oa, chjö̧na̧i̧ti̧ oa cjäri̧ ja̧bomȩrȩ ano̧ mire cjo̧ro̧pea̧ oa. Tjamo̧ davä. Judi tjamo̧ri̧ goamȩrȩ cjo̧ro̧rërea̧ ji̧, tjamo̧ri̧ goadëmȩpea̧de, pio a̧ro̧rȩ tjamo̧ri̧ goapea̧ oa, pio a̧ro̧rȩ dami̧ti̧ ba chiamȩ oa ano̧ mire goapea̧ oa a̧dëräpȩ ju̧ri̧. Ado pio ju̧i̧iä Jechu judi nȩmȩpadëmȩrȩ yürürërea̧ oaiä, jabechji̧ pio a̧ro̧rȩborë yürütäreji̧ri̧rea̧rȩ ibëa̧ oti̧ pio ji̧ri̧ chjadëri̧ a̧dopea̧ oa.

Juan Ma̧ȩ 1 3:11

Danȩrȩ ca̧ oti̧, pio yoa ma̧ȩ oa ji̧dë ma ta̧rërëreji̧ri̧nȩrȩ mȩnȩro̧ pea quëna̧ji̧ri̧pea̧ri ja̧. Tjamo̧ davä. “Dibëa̧ dëbëti̧ra̧ chia eachji̧vä” yo̧mȩ ma̧ȩ pio ju̧i̧ ta̧rërëreji̧ri̧nȩrȩ peadëri ja̧.