Juan 13:14 - Biblia Pume

¹⁴ Ado dibëa̧ Ano̧mȩ pio judimȩborë, dibë a̧ra̧ano̧mȩborë, jabechji̧ pea joa̧requededibe dibëa̧ ta oa. Jabechji̧ cüdë a̧dë chjäte ba chiamȩborë ba chiadëmȩmi̧ darë japea̧requededibe dibëa̧ mu̧i̧tjoi̧mi̧ darë. Ado peaja̧dimi̧ dari̧ japatäreji̧ri̧nȩrȩ dibëa̧ dëbëti̧ra̧ chia.

Juan 13:14 Iomraidhean Croise

Japarea̧ 20:35

Ado danȩrȩ, cüdë ja̧di dari̧ ja̧bepea̧ oaiä, jabechji̧ chjadëri̧ na̧rȩrëremȩrequededibe cjäri̧ ja̧bomȩ pio ju̧i̧ ëba jurapea̧ pio ju̧i̧ chjiari. Jabechji̧ Jechurë yo̧rërea̧ ma̧ȩ pio ju̧i̧ chjadëri̧ jo̧rȩtatäreji̧ri̧rea̧ro̧jo̧ȩ, ja̧di ta̧rëri̧ baämȩ ma̧ȩ oa: “Aja̧, o ji̧ri̧iäpȩmo̧ badëri̧ yürüa̧ üdë goae tjamo̧de. Jabechji̧ o ji̧ri̧iä badëri̧ mitëa̧ pio ju̧i̧ u̧i̧ goaede." Aja̧, ja̧di ta̧rëri̧ yo̧rëremȩde Ano̧mȩ Jechu judi o ji̧ri̧iäpȩmo̧ yürüpea̧ pio ju̧i̧ chjiari. Peaja̧di dari̧ na̧rȩrëremȩrequededibe ca̧ oti̧ —yo̧mȩrȩ ni̧bä chjaorëremȩdejȩrȩ Pablo judi Epjechoräpȩ tjamo̧ jidaji̧ri̧ pio ji̧ri̧iäpȩmo̧.

Domano Ma̧ȩ 12:10

Dibëa̧ dëbëti̧ra̧ chia tjamo̧ri̧ eachji̧jȩrȩ, pio ji̧ri̧ ba chiaparȩmi̧ dari̧ japaji̧ri̧rȩ. Jabechji̧ järi tjamo̧chji̧vä pio ji̧ri̧iäpȩmo̧ ba chia dapea̧ oa. Ado ibëa̧ pumȩ judiro̧ eami̧ oa chjadëri̧ japea̧ oaiä, jabechji̧ chjaodëri̧ ni̧bätäreji̧ri̧rea̧ro̧jȩrȩ ma̧ȩ chjadëra̧, nȩmȩparea̧ decjiari̧.

Domano Ma̧ȩ 12:16

Ado danȩrȩ, cja̧rȩmȩ chji̧ chiami̧ dari̧ jo̧rȩtaji̧ri̧rȩ cjo̧ro̧täreji̧ri̧rea̧rȩ, jadüchiami̧ bubami̧ dadëri̧. Jabechji̧ cja̧rȩmȩ ba chiara̧ da matäreji̧ri̧rea̧ro̧jȩrȩ pumȩ ütëbo oa, 'o ji̧ri̧ u̧i̧ ba chiaquëda' quëna̧rea̧ decjiari̧. Jabechji̧ orë badë daea̧ pumȩ pio ji̧ri̧bo ba chia datäreji̧ri̧rea̧ro̧jȩrȩ. Jabechji̧ ibëa̧ chji̧rämo̧ jo̧rȩtatadëtäreji̧ri̧rea̧rȩ.

Cori̧tio Ma̧ȩ 1 12:3

Ado mȩnȩro̧ ado chjereno̧ u̧i̧pea̧ oa cjiachea oa, mȩnȩro̧ Ichiaerë ado chjereno̧ u̧i̧pea̧ oa cjiachea oa, jabechji̧ chjadëri̧ dabatä earequededibe pio dibëiäpȩmo̧ ni̧bämȩ pio ju̧i̧ chjadëri̧ ütarë ta̧rëpea̧ ji̧. Jabechji̧ dibë a̧ra̧ano̧ji̧ri̧ judiro̧ orë, “Aja̧, Tjo tjamo̧ ja̧ chja̧oerä cjo̧ro̧mȩrȩ a̧ra̧ano̧requededibe” yo̧ji̧ri̧borë pio ju̧i̧ ja̧ chja̧oerä cjo̧ro̧dëdirȩ. Ja̧di tara pio yoa ma̧ȩ oa chjadëri̧ dabatä earequededibe. Danȩrȩ, Tjo tjamo̧ pio judiri ma̧na̧mȩ ma̧ȩ oa ni̧bämȩ pio judi, jabechji̧ Jechu pio ju̧i̧ chjiari chjai̧dëri̧ ni̧bärea̧mi̧dëde, jabo chjadë maea oa ni̧bäpade pio ju̧i̧ chjiari. Jabechji̧ “Ütë tjamo̧ ja̧ ërecjia̧ üdë Jechu pio ju̧i̧iäpȩmo̧ acji cjatätädejȩ” yo̧rea̧mi̧dëde, jabo chjadëri̧ ni̧bäpade Jechu pio ju̧i̧ chjiari. Ado danȩrȩ ca̧ oti̧, Tjo tjamo̧ pio judiri ma̧na̧mȩ ma̧ȩ oa ni̧bädëmȩ pio judi, jabechji̧ “Jechu judi Ano̧mȩ tjamo̧ pio judide” yo̧rea̧ dadëpade. Aja̧, ja̧di ta̧rëri̧ yo̧requededibe ca̧ oti̧, mȩnȩro̧ dabadëchea oa, Tjo tjamo̧ judi pio dibëiäpȩmo̧ yürüchäa̧ pio ju̧i̧ chjiari dabadëchea, dibë u̧i̧pe ni̧bätämi̧ cjiaji̧ri̧ pio ji̧ri̧ chjiari dabadëchea oa.

Cori̧tio Ma̧ȩ 1 8:13

Ja̧di tara, cüdë eami̧ jurarea̧ oa jura̧ pio oaiä ca̧ omȩ pio ju̧i̧iäpȩmo̧ chjai̧dëri̧ japarä judi, ca̧ omȩ pio ju̧i̧ oëra̧diä tänȩrä judi, jabechji̧ pio jiro jurarea̧ oa juradëpareconȩ. Jabechji̧ cüdë jura̧ oaiä ca̧ omȩ pio ju̧i̧ oëra̧diä tänȩchea oa, jabechji̧ juradëpareconȩ pio coaiä china̧chjadëräbo. Ado mȩnȩro̧ ja̧di dari̧ cjo̧ro̧a̧ oaiä, jabechji̧ tjamo̧ri̧ earea̧ro̧jȩrȩ dibëa̧ pumȩ pio ji̧ri̧.

Cori̧tio Ma̧ȩ 2 10:1

Danȩrȩ ca̧ oti̧, goë ta̧rëa̧requede o judiro̧ pio coa chjiari yo̧a̧bea pio ju̧i̧ chjiari. “Aja̧, Pablo judi jachiri pio judiri go̧ȩpe chjadüa̧rämo̧ oëadëmȩmi̧ darë go̧ȩpe chjadüdiibe, uapadëmemi̧ darë” yo̧vedirȩ. “Jabo cjäri̧ made, ibëa̧ chjarerä cjo̧ro̧a̧rä, to̧bari̧ chi̧dëeadërëremȩdiibe, jabomo̧ uapamȩrȩ ni̧bärëremȩdiibe, idëri̧ cjiamȩrȩ” yo̧vedirȩ. Aja̧ ca̧ oti̧, ja̧di ta̧rëri̧ yo̧a̧ jirovedirȩ oëra̧ a̧ra̧ano̧ji̧ri̧ pio judiro̧, pio ji̧ri̧ ta̧rë ja̧boji̧ri̧ pio judiro̧borë. Aja̧, ja̧di ta̧rëri̧ yo̧ jirovedirȩ pio coa chjiari. Jabo danȩrȩ, chjadëri̧ ta̧rëchji̧vä. Jabechji̧ Pablo pio judirequede. Ado pio cüdë chi̧dëeatarequededibe, pio dibë bücjüi̧ idamȩmi̧ darë. Jabechji̧ Quiricho pio judiri ma̧na̧mȩra̧ pio ju̧ri̧ra̧ jo̧rȩtamȩrȩ chi̧dëeatarequededibe, pio dibë chjiari bücjüri̧ cjia tjamo̧mȩrȩ, pio dibë ma̧ chjua jo̧rȩtamȩrȩ.

Cori̧tio Ma̧ȩ 2 8:9

Jabechji̧ ibëa̧ Ano̧mȩ Jechu Quiricho judi pumȩ pio ji̧ri̧iäpȩmo̧ cjäri̧ri̧ cjia da̧ pio ju̧i̧ chjiari tjamo̧ri̧ dabaji̧ri̧pea̧nȩrȩ ca̧ oti̧. Jabechji̧ a̧dëräpȩ ju̧ri̧ a̧dë chjäte ba chiamȩ oa goamȩborë, chjö̧na̧i̧ti̧ oa cjäri̧ ja̧bomȩrȩ cjo̧ro̧mȩpe bagarëremȩde. Tjamo̧ davä. Judi dami̧ti̧ ba chiamȩ oa goamȩborë, jabechji̧ jënȩ goa̧ chjö̧na̧i̧ oa a̧dë birarëremȩdejȩ pio yoa chirirä ano̧ mire cjo̧ro̧pea̧ oa, chjö̧na̧i̧ti̧ oa cjäri̧ ja̧bomȩrȩ ano̧ mire cjo̧ro̧pea̧ oa. Tjamo̧ davä. Judi tjamo̧ri̧ goamȩrȩ cjo̧ro̧rërea̧ ji̧, tjamo̧ri̧ goadëmȩpea̧de, pio a̧ro̧rȩ tjamo̧ri̧ goapea̧ oa, pio a̧ro̧rȩ dami̧ti̧ ba chiamȩ oa ano̧ mire goapea̧ oa a̧dëräpȩ ju̧ri̧. Ado pio ju̧i̧iä Jechu judi nȩmȩpadëmȩrȩ yürürërea̧ oaiä, jabechji̧ pio a̧ro̧rȩborë yürütäreji̧ri̧rea̧rȩ ibëa̧ oti̧ pio ji̧ri̧ chjadëri̧ a̧dopea̧ oa.

Garata Ma̧ȩ 5:13

Danȩrȩ ca̧ oti̧, Ütë tjamo̧ pio judi ëna̧diäa̧ oa cjiaji̧ri̧pea̧nȩrȩ jare chjadüa̧ oa cjiami̧ dari̧ cjo̧ro̧pea̧ oa, Moicherë go̧ȩparërea̧ chja̧oerä cjo̧ro̧chea oa. Jabo oëra̧ jo̧rȩtadëtäreji̧ri̧nȩrȩ jabo. ‘Jaeboquëda, jare chjadüa̧ oa cjiami̧ dari̧ cjiaquëda, ado pio ju̧i̧iä eami̧ oa japapai̧ daquëda, ca̧ icjararä chjai̧dë pio judiri cjitëmȩ pio ju̧i̧bo japapai̧ daquëda, jabechji̧ pio ju̧i̧ ja̧ chja̧oeräbo cjo̧ro̧pai̧ daquëda’ quëna̧ jo̧rȩtadëtäreji̧ri̧nȩrȩ. Jabo jabechji̧ coëma cjiari̧ jo̧rȩtaji̧ri̧rȩ a̧dotäreji̧ri̧nȩrȩ dibëa̧ dëbëti̧ra̧ chia, ea tjamo̧ji̧ri̧rȩ.

Pjiripo Ma̧ȩ 2:11

Ado judiro̧ ütëbodärärë jibëa̧ yara̧, 'Aja̧, Jechu Quiricho judi, Ano̧mȩ tjamo̧ pio judimo̧dida, ba chia tjamo̧dida' quëna̧ jo̧rȩtaji̧ri̧rȩ yo̧padiro̧jo̧ȩ. Ado ja̧di dari̧ yo̧a̧ oaiä, jabechji̧ ibëa̧ Ama̧i̧ Ütë pio ju̧i̧iäpȩmo̧ chjacjiamȩri̧ jo̧rȩtapadiro̧jo̧ȩ.

Timoteo Ma̧ȩ 1 5:10

Jabo jibëa̧ pumȩ ji̧ri̧ chjadëri̧ a̧do chjaoyi̧ pio jini̧, dëdë go̧ȩpapea̧nȩ. Chjadëri̧ a̧dopea̧nȩ. Tjamo̧ davä. Pumȩ judiro̧ pio ji̧ chjiari chjadëri̧ jo̧rȩtarä judi, ‘Aja̧, ütai̧ chjadëni̧da, o ji̧ri̧ chjadëri̧ a̧doni̧ji̧ri̧da, no̧mȩ tjamo̧ri ja̧ chjadëri̧ jape chjaoni̧ji̧ri̧da’ quëna̧ jo̧rȩtarä judi, jabechji̧ go̧ȩ irä go̧ȩpapea̧nȩ. Tjamo̧ davä. Jibëa̧ bori̧ ji̧ri̧ chjadëri̧ jidayi̧rȩ cjo̧ro̧a̧rä judi, pio jȩa goë daera̧pea̧ji̧ri̧ pio ji̧ri̧ chjadëri̧ yürüyi̧rȩ a̧doa̧rä judi, jënȩ cja̧rȩmȩ co dadërërea̧ pumȩ pio ji̧ri̧ cjäri̧ri̧ cjiayi̧rȩ a̧doa̧rä judi, dëdë, go̧ȩpapea̧nȩ. A̧dopea̧nȩ. Aja̧, quëna̧ji̧ri̧ pio ji̧ri̧ chjadëri̧ a̧doyi̧rȩ cjo̧ro̧a̧rä judi, gito ana̧ri̧ jo̧rȩtaji̧ri̧ pio ji̧ri̧bo a̧doa̧rä judi, eami̧ti̧ chjadë oa jape chjaoyi̧rȩ cjo̧ro̧a̧rä judi, jabechji̧ chjadëri̧ a̧dopea̧nȩ. Aja̧ Timoteo, ja̧di dari̧ ütarapea̧de ja̧boa̧ji̧ri̧ ja̧ ivi pio ji̧ri̧ chjiari.

Ebereo Ma̧ȩ 12:2

Ado ja̧di dari̧ japarea̧ darea̧rȩ a̧ro̧rȩ Jechu pio ju̧i̧iäpȩmo̧ ji̧dë ma dami̧ dari̧ jo̧rȩta̧ oaiä. Jabechji̧ pio ju̧i̧iä taruparëremȩde a̧ro̧rȩ quëna̧ üdë. Ado pio ju̧i̧iä peaja̧di nö̧tadäräri̧ quëna̧rea̧ darea̧rȩ. Jabechji̧ Jechu pio ju̧i̧iä peaja̧di ju chiarea̧ darea̧rȩ nö̧tadäräri̧ quëna̧pea̧ oa, pio judimi̧ dari̧ quëna̧pea̧ oa. Jabechji̧ pio judi toro cji̧däa̧ oa cjia̧rä, ‘Aja̧, ca̧ goe oaiä noi̧dërë chjätärea̧ dapadiro̧da’ quëna̧ jo̧rȩta̧ oaiä, jabechji̧ ma̧ chiadëri̧ cjiari̧ jo̧rȩtamȩrȩ chjätärëremȩde pio jiro ma̧i̧ da chjai̧dë oa. Jabechji̧ ma̧ chjua jo̧rȩtamȩrȩ chjätärëremȩde, pio jȩa idëri̧ cjia tänȩa̧ pio ju̧i̧ chjiari bücjüri̧ cjiadëmȩrȩ. Ado yaba̧ chadäräa̧ oa cjiade tjamo̧ yo̧mȩ Ütë pio ju̧i̧ ja̧ mu̧i̧ chjuaräpȩ ju̧ri̧.

Pedro Ma̧ȩ 1 4:1

Danȩrȩ ca̧ oti̧, Quiricho judi jo̧rȩtamȩrȩ yürürëremȩdejȩ jibëa̧ icjara oa. ‘Aja̧, ca̧ icjara oa nȩmȩpadëmȩrȩ yürüpacuni̧da, a̧dë chjäte gitoi̧ dari̧ tarapea̧ oa yürüpacuni̧da’ quëna̧ jo̧rȩtamȩrȩ yürürëremȩdejȩ. Ado peaja̧dimi̧ dari̧ yürüpea̧ oa jëdano̧mi̧ dari̧ poë cürë jo̧rȩtatäreji̧ri̧rea̧rȩ ca̧ oti̧, pio ju̧i̧ ja̧ chji̧ra̧ jo̧rȩtami̧ dari̧ yürüpea̧ oa, peaja̧di ibëa̧ icjara oa nȩmȩpadëji̧ri̧rȩ yürüpea̧ oa. Danȩrȩ, guadia üdë ma̧i̧ da chjai̧dë oa chjätäbea yaboi̧, ¿tjana̧ japade? Tjana̧ japadë, jabechji̧ poë cürë jo̧rȩtamȩrȩ jëdano̧de jibëa̧ icjara oa yürüpea̧ oa, ma̧i̧ da chjai̧dë oa chjätäpea̧ oa, uapai̧ da tjamo̧räpȩ ja̧bepapea̧ oa, ja̧bopai̧ daräpȩ jäpea̧ oa. Ado peaja̧dimi̧ dari̧ japatäreji̧ri̧rea̧rȩ ca̧ oti̧. Jabechji̧ jibëa̧ icjara oa china̧chjari̧ yürümȩ judi, Ütë tjamo̧ ja̧ oa china̧chjari̧ yürümȩ judi, gitoi̧ dari̧ conȩda̧ oa cjiapai̧ daräbo yürümȩ pio judi, ¿yö̧ta dari̧ jo̧rȩtade? Yö̧ta dari̧ jo̧rȩtadë, jabechji̧ chjai̧dë oa japapea̧ oa yürüdëri̧ cjiadejȩ jibëa̧ icjara oa, jabo chjadëri̧ japapea̧ maea oa yürütämi̧ cjiadejȩ Quiricho pio judimi̧ dari̧.

Pedro Ma̧ȩ 1 5:5

Ado oari pei̧ chja pio ji̧ri̧bo chidëeatämi̧ cjiarequededibe ma̧ȩ boi̧chji̧ maea oa. Danȩrȩ, tjamo̧ jidaji̧ri̧ pio judiro̧ chi̧dëea̧ chja̧oerä cjo̧ro̧täreji̧ri̧nȩrȩ, chjadëri̧ ta̧rëdiäji̧ri̧rȩ. Aja̧, pio jiro ma̧ȩ maeara̧ chi̧dëeamȩrȩ go̧ȩpe chjadürequededibe oari pëi̧ chja pio ji̧ri̧. Ado yaba̧ dibë ütëbo oa, tjamo̧ jidaji̧ri̧ pio ji̧ri̧bo chi̧dëearequededibe. Danȩrȩ, dibëa̧ chji̧rämo̧ jo̧rȩtadëchji̧vä, jabo ütëbodärä oa ba chia daji̧ri̧rȩ a̧dochji̧jȩrȩ, ‘o ji̧ri̧ u̧i̧ ba chiaquëda’ quëna̧rea̧ decjiari̧. Jabechji̧ ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ta̧rëchji̧vä: “Ütë tjamo̧ judi chjuari̧ dëbëpe chjaodejȩ jibëa̧ chji̧rämo̧ quëna̧tamȩ pio ju̧i̧, jabo cjäri̧ri̧ cjiamȩrȩ a̧dodejȩ chjadëri̧ jo̧rȩtamȩ ju̧i̧, ‘o judiro̧ pio coa u̧i̧ ba chiadiro̧ca̧da’ quëna̧mȩ pio ju̧i̧.” Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado pio ju̧i̧iä ‘ba chia tjamo̧quëda’ quëna̧ jo̧rȩtadëtäreji̧ri̧nȩrȩ ‘jabomo̧ boquëda’ quëna̧ jo̧rȩtariä cjo̧ro̧täreji̧ri̧nȩrȩ.