Juan 13:10 - Biblia Pume

¹⁰ Jabo Jechu judi yo̧a̧dejȩ: —Danȩ, eami̧ pumȩ üdë jibëa̧ icjara codë oa chjadëri̧ joarä judi, jabechji̧ igȩrȩ chiadëde. Joa̧ oa cjiade. Jibëa̧ ta pio ju̧i̧mo̧i̧ joapea̧de. Ado mȩnȩro̧ ütëborë peaja̧di dari̧ cjianȩrȩ. Icjara codë oa joa̧ oa cjiami̧ dari̧ cjianȩrȩ. Jabo cjäri̧ made, cja̧rȩmȩrȩ joa̧ oa cjiami̧ dari̧ cjiadëde —yo̧a̧dejȩ Jechu judi.

Juan 13:10 Iomraidhean Croise

Mateo 6:12

Ado a̧ro̧rȩ chjai̧dëri̧ japea̧ pio ju̧i̧ duridëparȩibe Ama̧i̧. Ado pio ibëiäpȩmo̧ chjai̧dëri̧ japea̧ji̧ri̧ pio ji̧ri̧ chjadëri̧ duridëparȩmi̧ dari̧ japapea̧ oa peaja̧di a̧doibe.

Juan 13:18

Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ jibëa̧ jadü ji̧ri̧, jabë mechjaräpȩ chaji̧ri̧ oa: —Danȩrȩ ca̧ jadü, cüdë dibë ütëbo oa jo̧rȩtamȩrȩ yo̧dërequededibe, jabo cja̧rȩmȩ pio ju̧i̧mo̧i̧ jo̧rȩtamȩrȩ yo̧requededibe —yo̧a̧dejȩrȩ—. Jabechji̧ pio dibë mitëa̧requededibe. Ado pio dibë chjiari tjamo̧ri̧ dabarequede. Jabo danȩrȩ, cja̧rȩmȩ üdë, pio ibë nö̧ta tai̧mȩ pio judi chjai̧dëri̧ japapadique. Ado pio ju̧i̧ chjiari go̧ȩpea̧ oa cjiade ma̧ȩ üdë. Ja̧di ta̧rëri̧ yo̧diibe: “Aja̧, pio coa nö̧ta ëba juraremȩ pio judi putu jura̧ a̧dë chami̧ dari̧ japapadique”. Aja̧, ja̧di ta̧rëri̧ go̧ȩpea̧ oa cjiade ma̧ȩ üdë.

Juan 13:9

Pio ju̧i̧ ta̧rëa̧ oaiä, Chimo̧ Pedro judi yo̧a̧dejȩ: —Ja̧dirä judi Ano̧mȩ, jabechji̧ ca̧ ta maea oa joadëvä, jabo ca̧ icjara nö̧ta oa chjadëri̧ joë yürücoe. Ca̧ ichibo, ca̧ tjübëbo, ca̧ icjara codë oa jabechji̧ joavä —yo̧a̧dejȩ.

Juan 15:3

Ado peaja̧dimi̧ dari̧ cjianȩrȩ cüdë dibë a̧ra̧ano̧a̧ ma̧ȩ pio ju̧i̧iä. Peaja̧di jëdano̧a̧ oa cjianȩrȩ —yo̧a̧dejȩrȩ—. Peaja̧di chjacjiamȩri̧ cjiami̧ dari̧ cjianȩrȩ.

Cori̧tio Ma̧ȩ 2 5:17

Jabechji̧ eami̧ pumȩ judi Quiricho pio judiri ja̧pe baga̧rä judi, jabechji̧ pea chjari̧ pareapea̧ oa cjiade, pumȩ peaja̧ mape bagarea̧mi̧ dari̧. Jabechji̧ no̧mȩ ja̧ jo̧rȩtarërea̧ üdë, no̧mȩ ja̧ cjo̧ro̧rërea̧ üdë goarijäa̧ oa cjiade. Ado cjo̧ro̧rea̧ peaja̧ra̧ pio ju̧ri̧ra̧ tarupade Quiricho pio ju̧i̧iä. Tjamo̧ davä. Tjaoëpai̧ dari̧ cjo̧ro̧rea̧mi̧ dari̧, tjaoëpai̧ dari̧ jo̧rȩtarea̧mi̧ dari̧ tarupade Quiricho pio ju̧i̧iä ado cja̧rȩmo̧ cjo̧ro̧rea̧ peaja̧ra̧ pio ju̧ri̧ra̧. Ado pio ju̧i̧iä yaba̧, a̧ro̧rȩ eami̧ pumȩ oa darä, quëna̧mȩ pio ju̧i̧ darä, jabechji̧ tjaoëpai̧ dari̧ jo̧rȩtaji̧ri̧rȩ darea̧ro̧jo̧ȩ, pumȩ peaja̧ maea oa.

Cori̧tio Ma̧ȩ 2 5:21

Jabechji̧ Quiricho judi cja̧rȩmȩ co chjai̧dëri̧ japadëa̧räbo, jabechji̧ Ütë tjamo̧ pio judi tuti yürürëremȩdejȩ pio ibë chjiari ano̧ mire ja̧bopea̧ oa, a̧ro̧rȩ chjai̧dëri̧ japea̧ üdë pio ju̧i̧iäpȩmo̧ ma ano̧ mire cjiadiäpea̧ oa, a̧ro̧rȩ jabechji̧parȩa̧ oa cjiapea̧ oa. Ado yaba̧ a̧ro̧rȩ Quiricho pio judiri ja̧ji̧ri̧pea̧ oaiä, jabechji̧ pio ibëiäpȩmo̧ ma ano̧ mire cjiadiäa̧de Quiricho pio ju̧i̧ ja̧ chjadë üdë. Tjamo̧ davä. Ibëa̧ chjadëdë üdë Quiricho pio ju̧i̧iäpȩmo̧ cjiadiäa̧de, ado pio ju̧i̧ ja̧ chjadë üdë pio ibëiäpȩmo̧ ano̧ mire cjiadiäa̧de, a̧ro̧rȩ jabechji̧parȩa̧ oa cjiarea̧mi̧ dari̧. Ado pio jiro ma̧ȩ pio ju̧i̧ järi tjamo̧ji̧ri̧rȩ a̧ra̧ano̧rea̧ro̧jo̧ȩ.

Cori̧tio Ma̧ȩ 2 7:1

Danȩrȩ, Ütë tjamo̧ judi pio jiro ma̧ȩ goae tjamo̧ oa yo̧ë cji̧därërea̧ tara, jachidai̧parȩrea̧ ma̧ȩ pio ju̧i̧ yo̧ë cji̧däa̧ tara, jabechji̧ chjadëri̧ joa̧ oa cjiami̧ dari̧ cjo̧ro̧täreji̧ri̧rea̧rȩ, a̧ro̧rȩ eami̧ chjai̧dë oaiä chjadëdëparȩa̧ oa cjiami̧ dari̧ cjiachea oa. Pio dibë ea tjamo̧mȩrȩ yo̧requededibe ca̧ oti̧. Danȩrȩ, ibëa̧ icjara üdë dai oa ja̧ chjai̧dë oaiä chjadëdëparȩa̧ oa cjiami̧ dari̧ cjiachea oa, ado ibëa̧ tjo üdë tjoro ja̧ chjai̧dë oaiä chjadëdëparȩa̧ oa cjiami̧ dari̧ cjiachea oa, jabechji̧ chjadëri̧ joa̧ oa cjiami̧ dari̧ cjo̧ro̧täreji̧ri̧rea̧rȩ, a̧ro̧rȩ chjai̧dë gȩrȩ oa chiaji̧ri̧mi̧ dari̧ cjo̧ro̧chea oa, a̧ro̧rȩ ibë cjari̧daparȩa̧ oa cjiami̧ dari̧ cjiachea oa. Jabechji̧ Ütë tjamo̧ pio ju̧i̧ uapaji̧ri̧rȩ järitäreji̧ri̧rea̧rȩ chjadë pio ju̧i̧mo̧i̧ mitëpea̧ oa, üi̧padärärea̧mi̧ dari̧ cjo̧ro̧pea̧ oa, a̧ro̧rȩ chjai̧dëra̧ mirea̧ oa cjiami̧ dari̧ cjiachea oa.

Techaronichȩche Ma̧ȩ 5:23

Ado yaba̧ cüdë ji̧dë u̧i̧ go̧ȩpabea yaboi̧, jabechji̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe. Jabechji̧ Ütë tjamo̧ judi ibë ma̧ chjupi̧ cjiari̧ jo̧rȩtarea̧ yürümȩ pio judi china̧chjari̧ tutitädidibe codë oa mȩnȩro̧ coëma cjiari̧ cjo̧ro̧pea̧ oa. Codë oa chjadëri̧ jidatädidibe o judiro̧ dibë aechide yo̧rea̧mi̧dëri̧ ibëa̧ Ano̧mȩ Jechu Quiricho pio judi jana̧rä yuro. Aja̧, dibëa̧ tjo pio ju̧i̧, dibëa̧ chji̧ pio ju̧i̧, dibëa̧ icjara pio ju̧i̧ chjadëri̧ jidatädidibe co chjami̧ da oa Jechu judi jana̧rä yuro.

Ebereo Ma̧ȩ 9:10

Jabechji̧ pearä yürürërea̧ ma̧ȩ üdë ibëa̧ tjo ja̧dëde, jabo dai oa cjiamȩ pio ju̧i̧ ja̧ maeade. Aja̧, jurarea̧ pio ju̧i̧ chjiari ma̧ȩde. Jararea̧ pio ju̧i̧ chjiari ma̧ȩde. Tjaoëpai̧ dari̧ joarea̧ pio ju̧i̧ chjiari ma̧ȩde. Ado icharaita judiro̧, jabechji̧ pio jiro ma̧ȩrä tüdüa̧ oa cjiami̧ dari̧ cjo̧ro̧pea̧ chiarëreji̧ri̧dirȩ Ütë tjamo̧ judi ma̧ȩ peaja̧ oa ano̧ mire yürüa̧rä yuro.

Santiago Ma̧ȩ 3:2

Jabechi̧ a̧ro̧rȩ quëna̧ji̧ri̧ judiro̧ ütëbodärärë oëra̧diäpai̧ darea̧rȩ. A̧ro̧rȩ ütëbodärärë chjai̧dëri̧ japapai̧ darea̧rȩ. Ado ibëa̧ tjopono̧ra̧ pio ju̧ri̧ra̧ peaja̧di chjai̧dëri̧ jape chjaorea̧rȩ. Jabo eami̧ pumȩ üdë, jibëa̧ tjopono̧ oa chjadëri̧ jida̧ oa goamȩ pio judi, jibëa̧ tjopono̧ra̧ oëra̧diächea oa chjadëri̧ jida̧ oa goamȩ pio judi, jabechji̧ üi̧padäräa̧ oa cjiami̧ dari̧ cjo̧ro̧de. Jabechji̧ jibëa̧ tjopono̧ oa chjadëri̧ jida̧ oa goamȩ pio judi, peaja̧di jibëa̧ icjara codë oa chjadëri̧ jida̧ oa goapadejȩ, jibëa̧ icjarara̧ pio ju̧ri̧ra̧ oëra̧diächea oa.