Juan 13:1 - Biblia Pume

¹ Ado uëmo̧ a̧dë chjätärea̧ do üdë ma̧na̧pea̧ ji̧ querediä tjamo̧rëremȩde. Cja̧rȩmȩ do chjätä ëte tarupapea̧ jabërëremȩde do chjätärea̧ do üdë. Ado Jechu judi, jabechji̧ dabarëremȩde pio jȩa chjiari. ‘Aja̧, cüdë pio yoa chiri oa a̧dë baäpea̧ ji̧ querediäquëda, ca̧ Ama̧i̧ pio ju̧i̧iäpȩ baäpea̧ ji̧ querediäquëda yaba̧’ quëna̧ dabarëremȩde. Ado jibëa̧pea̧ji̧ri̧ pio ji̧ri̧ peadëri ja̧ ea tjamo̧rëremȩdejȩrȩ jibëa̧ jadü pio ji̧ri̧, dai chirirä cjo̧ro̧ji̧ri̧ pio ji̧ri̧. Jabechji̧ eadëpe bagarea̧ decjiari̧ earëremȩdejȩrȩ.

Juan 13:1 Iomraidhean Croise

Mateo 26:45

Ado ni̧bä ëte, ado chjereno̧ goëdepea̧dejȩrȩ jibëa̧ jadü ji̧ri̧. Ado mo̧a̧ cjiaji̧ri̧ oa dadäräa̧dejȩrȩ. Ado yo̧a̧dejȩrȩ: ⁠—⁠¿Ji̧dë ma mo̧a̧tämi̧ cjianȩrȩ mȩnȩro̧? ¿Ji̧dë ma järätä järätä mo̧a̧nȩrȩ mȩnȩro̧? Jabechji̧de yaba̧ ⁠—⁠yo̧a̧dejȩrȩ⁠—⁠. Danȩrȩ, coa chjai̧dëri̧ japaji̧ri̧ pio judiro̧ acji jana̧diro̧coe. Jabechji̧ cja̧rȩmȩrȩ yürüpadique coa chjai̧dëri̧ japaji̧ri̧ pio ji̧ri̧iäpȩmo̧ ⁠—⁠yo̧a̧dejȩrȩ⁠—⁠. Tjamo̧ davä. Chjaodëri̧ acji jana̧padiro̧coe. Pumȩrȩ Ara̧ Tjamo̧ pio ju̧i̧ acji jana̧padiro̧coe pio coa mitëpea̧ oa. Pio jiro japamitë üdë ma̧na̧diibe yaba̧.

Mateo 28:20

Ado pea quëna̧ji̧ri̧ pio ji̧ri̧, jabechji̧ cüdë dibë a̧ra̧ano̧a̧ chjö̧na̧i̧ oa ano̧ mire a̧ra̧ano̧chji̧jȩrȩ, judiro̧ pio jiro ma̧ȩrä chjadëri̧ ta̧rë ta̧rë japariä cjo̧ro̧pea̧ oa. Ado danȩrȩ, mȩnȩro̧ eami̧räpȩ a̧ra̧ano̧e baäji̧ri̧ oa, jabechji̧ ji̧dë ma ëba cjiaparequededibe a̧dë baärea̧ decjiari̧. Jabechji̧ chiri üdë yuropea̧rä yuro ëba cjia maparequededibe. Ja̧ditäde.

Lucas 22:53

Danȩrȩ, cüdë pumȩ pio ji̧ri̧ nö̧ta Ütë tjamo̧ ja̧ bëräpȩ ju̧ri̧ doti̧mi̧ cjiamȩ oa peadë mitëa̧täreji̧ri̧renȩro̧coe cüdë tjamo̧ri̧ chjai̧dëri̧ japea̧rä judi. Jabo cjäri̧ marenȩro̧coe, peadë mitëtärea̧ ji̧, mitërea̧ dadëa̧renȩro̧coe cüdë chjai̧dëri̧ japadëa̧ oaiä. Jabo Ütë tjamo̧ judi pio dibë japarea̧ yürüa̧ oaiä, dëdë, mȩnȩro̧ jo̧rȩta̧mi̧ japapai̧ darenȩro̧coe yaba̧. Ado Ichiae pio judiborë japapai̧ dadique, pio judi jo̧rȩta̧mi̧. Jabechji̧ Ütë tjamo̧ pio judi japarea̧ yürüa̧ oaiä, dëdë, bagönȩmi̧ darä tjamo̧ yo̧mȩrȩ cjiamȩ pio judi japapai̧ dadique davä bagönȩmi̧ darä cjiaji̧ri̧ pio ji̧ri̧iä —yo̧rëremȩdejȩrȩ Jechu judi.

Lucas 9:51

Ado Jechu judi a̧dëräpȩmo̧ baäpea̧ do üdë querediärä, Ütë tjamo̧ judi Jechu pio ju̧i̧ ado chjereno̧ a̧dëräpȩ baä tänȩpea̧ querediärä, 'jabechji̧ Jerucharȩräpȩ tjamo̧ri̧ jäpaquëda' quëna̧ jo̧rȩtamȩrȩ järëremȩde pio jiro bë ma̧ri̧räpȩ, 'jädaemȩ jiroquëda' quëna̧rea̧ decjiari̧.

Juan 11:55

Ado uëmo̧ a̧dë chjätärea̧ do üdë ma̧na̧pea̧ ji̧ querediä tjamo̧rëremȩde, do chjätärea̧ do pio judi. Ado pio ju̧i̧iä pumȩ no̧i̧dërë, oëra̧ti̧ oa cjo̧ro̧ji̧ri̧ pio judiro̧ jabërä järëreji̧ri̧dirȩ Jerucharȩräpȩ chjai̧dë gȩrȩ chiadëji̧ri̧mi̧ dari̧ cjiadiäpea̧ oa Ütë tjamo̧ pio ju̧i̧iä.

Juan 12:23

Ado Jechu judi judiodë pio ji̧ri̧ chjiari ta̧rëa̧ oaiä, taruparëremȩde ni̧bä chjaopea̧ ji̧ jënȩ ja̧bopea̧ pio ju̧i̧ chjiari. Ja̧di ta̧rëri̧ yo̧mȩrȩ dëbë yo̧rëremȩdejȩrȩ jibëa̧ jadü yo̧a̧ri̧ oa: —Danȩrȩ, ca̧ chjacjiamȩrea̧ üdë chjadëri̧ na̧rȩa̧ oa cjiapea̧ do üdë ma̧na̧pea̧ querediä tjamo̧dique —yo̧a̧dejȩrȩ—. Danȩrȩ, Pumȩrȩ Ara̧ Tjamo̧ pio judirequede. Ado ca̧ chjacjiamȩrea̧ üdë chjadëri̧ na̧rȩa̧ oa cjiapea̧ do üdë ma̧na̧pea̧ querediä tjamo̧dique.

Juan 13:29

Jabechji̧ Juda judi ütëbo ja̧ chëre oa tjamo̧ jidamȩrȩ cjo̧ro̧a̧ oaiä, ado uëmo̧ a̧dë chjätärea̧ do üdë ma̧na̧na̧ra̧ oaiä, jabechji̧ ‘jurarea̧ oa gatëtä yo̧a̧ jirodiji̧da, pio a̧ro̧rȩ jurapea̧ oa, ado chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ yürüpea̧ oa gatëtä yo̧a̧ jirodiji̧da’ quëna̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ.

Juan 13:3

Ado Jechu judi Ama̧i̧rȩ pio jȩaiäpȩmo̧ jauëchja oa yürüa̧ pio ju̧i̧ chjiari dabarëremȩde. ‘Aja̧, jibëa̧ jauëchjarea̧ chjö̧na̧i̧ oa yürüa̧dicoada, a̧dë chjäte ji̧ra̧ri̧ cjiamȩ jauëchjarea̧ pio ju̧i̧ yürüa̧dicoada’ quëna̧ dabarëremȩde. Ado jënȩ a̧dëri jana̧pea̧ pio ju̧i̧ chjiari, ado jënȩ ado chjereno̧ baäpea̧ pio ju̧i̧ chjiari peaja̧di dabarëremȩde. ‘Aja̧, Ütë tjamo̧ pio judiri birë ma̧na̧quëda, ado pio ju̧i̧iäpȩ ado chjereno̧ baäpaquëda’ quëna̧ dabarëremȩde.

Juan 13:34

Jabo danȩrȩ, ma̧ȩ peaja̧ oa yürürequededibe yaba̧. Tüdüa̧mi̧ darä cjo̧ro̧pea̧ ma̧ȩ peaja̧ oa yürürequededibe. Dibëa̧ dëbëti̧ra̧ chia eachji̧vä. Cüdë dibë eami̧ eachji̧vä dibëa̧ dëbëti̧ra̧ chia.

Juan 14:28

Danȩrȩ, peadë yo̧a̧requededibe cüdë dibë a̧dë baäpea̧ pio ju̧i̧ chjiari. Ado dibë yo̧a̧mi̧ ado yo̧requededibe. Danȩrȩ, cüdë ca̧ Ama̧i̧ pio ju̧i̧iäpȩ baäa̧ duri oa, jabechji̧ ado chjereno̧ jana̧parequededibe. Jabo yabochja baäparequede ca̧ Ama̧i̧ ju̧i̧iäpȩ. Ado mȩnȩro̧ coa ea tjamo̧rä judi, jabechji̧ ma̧ chiadëri̧ cjiari̧ jo̧rȩtapanȩrȩ, cüdë pio ju̧i̧iäpȩ baärea̧ da tara. Jabechji̧ coa u̧i̧ ba chiade ca̧ Ama̧i̧ judi —yo̧a̧dejȩrȩ—. Ado pio ju̧i̧iäpȩ tjamo̧ri̧ baätämi̧ cjiarequede.

Juan 14:31

Ca̧ Ama̧i̧ pio ju̧i̧ ja̧ chja̧oerämo̧ cjo̧ro̧requede. Ado pio ju̧i̧iä nö̧tadäräri̧ ta̧rëdiäreconȩ. Aja̧, dai chirirä cjo̧ro̧ji̧ri̧ judiro̧ pio coa chjiari chjadëri̧ dabapea̧ oa, pio ji̧ri̧iäpȩmo̧ chjadëri̧ na̧rȩpea̧ oa, jabechji̧ chjadëri̧ ta̧rëdiäreconȩ ca̧ Ama̧i̧ ju̧i̧. ‘Aja̧, Jäjäa pio ju̧i̧ ea tjamo̧diji̧da, jibëa̧ Ama̧i̧ pio ju̧i̧ tjamo̧ri̧ eadiji̧da, ado pio ju̧i̧iä ji̧dë ma ta̧rëdiädiji̧da’ quëna̧ dabapea̧ oa na̧rȩrequedejȩrȩ, ca̧ Ama̧i̧ pio ju̧i̧ ji̧dë ma ta̧rëdiäa̧ oaiä. Jabo danȩrȩ, jaechji̧ibe. Pio yudiri baätärȩ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧ mechjaräpȩji̧ri̧ oa, jënȩ ja̧bopea̧ ji̧ querediä tjamo̧mȩrȩ.

Juan 16:28

Aja̧, Ama̧i̧ tjamo̧ pio judi chjadüa̧ oa birë ma̧na̧requede —yo̧a̧dejȩrȩ—. Birë ma̧na̧requede dai chiriräpȩ cjo̧ro̧pea̧ oa. Jabo pio yoa chiri oa a̧dë baäpareconȩ ado chjereno̧, Ama̧i̧ pio ju̧i̧iäpȩ baäpea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧.

Juan 17:1

Ado Jechu judi jibëa̧ jadü pio ji̧ri̧ ni̧bä chjaoa̧ duri oa, a̧dëräpȩmo̧ cjaruchë darëremȩde. Ado taruparëremȩde jibëa̧ Ama̧i̧ pio ju̧i̧ ni̧bäpea̧ ji̧: —Ca̧ Ama̧i̧, ütara̧ do üdë ma̧na̧dique yaba̧ —yo̧a̧dejȩ—. Ado na̧ Ja pio judirequede. Ado goë cjo̧dërequedemȩ Ama̧i̧, pio coaiä na̧rȩtä ca̧ chjacjiamȩrea̧ üdë. Aja̧ Ama̧i̧, ca̧ chjacjiamȩrea̧ üdë chjadëri̧ na̧rȩa̧ oa cjiapea̧ oa japavä, na̧ chjacjiamȩrea̧ pio judi peaja̧di chjadëri̧ na̧rȩa̧ oa cjiapea̧ oa pio coaiä.

Juan 17:16

Aja̧, dai chiriri ja̧dëmȩrequede cüdë. Ado peaja̧di dari̧ cjia mapea̧dirȩ ca̧ jadü judiro̧. Dai chiriri ja̧ji̧ri̧rërea̧ ji̧, dai chiriri ja̧dëjii̧rpea̧dirȩ. A̧dë tjaoëpea̧dirȩ —yo̧a̧dejȩ—.

Juan 17:26

Jabechji̧ pio mȩa dabadërërea̧ ji̧, chjadëri̧ daba tänȩa̧requedejȩrȩ. Ado mȩa ji̧dë u̧i̧ dabapea̧ oa, ji̧dë u̧i̧ daba tänȩparequedejȩrȩ. Jabechji̧ mȩnȩ coa ea̧ra̧ pio ju̧ri̧ra̧ eariä cjo̧ro̧pea̧ oa, cüdë pio ji̧ri̧ nö̧ta cja̧rȩmȩpe bagami̧ dari̧ cjiapea̧ oa, goë cjo̧dërequedemȩ Ama̧i̧. Ja̧ditäde. Aja̧, ja̧di ta̧rëri̧ yo̧mȩrȩ goë cjo̧dërëremȩdejȩ Jechu judi jibëa̧ Ama̧i̧ pio ju̧i̧iä jibëa̧ jadü pio ji̧ri̧ chjiari, jibëa̧ jadü pio ji̧ri̧iä ta̧rë ëte quëna̧paji̧ri̧ pio ji̧ri̧ chjiaribo.

Juan 17:5

Ado yaba̧ Ama̧i̧, japamitë boi̧chji̧ chjätä ëte, ado baäparequede pio mȩaiäpȩ. Ado cüdë pio ju̧ri̧pȩ go̧düdäräa̧rä, jabechji̧ Ama̧i̧, ca̧ chjacjiamȩrea̧ üdë ado chjereno̧ ana̧ri̧ na̧rȩa̧ oa cjiapea̧ oa japavä. Aja̧, ca̧ chjacjiamȩrea̧ üdë pearä na̧rȩa̧ oa cjiarërea̧mi̧, na̧rȩa̧ oa cjiatä eareconȩ Ama̧i̧, dabu üdë jabë pareapea̧ oa cjiadëa̧rä cjiarërea̧mi̧ —yo̧mȩrȩ yo̧a̧dejȩ Jechu judi jibëa̧ Ama̧i̧ ju̧i̧.

Juan 18:4

Ado Jechu judi, jabechji̧ chjö̧na̧i̧ oa dabarëremȩde jabërä. ‘Ja̧di dari̧ japapadiro̧coada’ quëna̧ daba marëremȩde. Ado pio ju̧ri̧pȩ acji go̧düdäräa̧ji̧ri̧ oa dëbë cjiadärämȩrȩ, iëno̧ë ta̧rëa̧dejȩrȩ: —¿Chjia oa na̧tanȩrȩ? —yo̧a̧dejȩrȩ.

Juan 19:28

Ado Jechu judi toro cjiamȩrȩ jo̧rȩtarëremȩde. ‘Aja̧, japadäräa̧quëda, ca̧ Ama̧i̧ judi jo̧rȩta̧mi̧ japadäräa̧quëda’ quëna̧ jo̧rȩtarëremȩde. Ado ja̧dëa ji̧ Ütë tjamo̧ ja̧ ma̧ȩ üdë tjamo̧i̧ cjiari̧ cjiadiäpea̧ oa, ja̧di ta̧rëri̧ yo̧rëremȩde: —Ui ja̧borequede —yo̧a̧.

Juan 2:13

Ado uëmo̧ a̧dë chjätärea̧ do üdë queri̧na̧ra̧ oaiä, jabechji̧ järëremȩde Jechu judi Jerucharȩräpȩ.

Juan 6:4

Ado judiorë a̧dopapea̧ do üdë ma̧na̧pea̧ ji̧ querediä tjamo̧rëremȩde uëmo̧ a̧dë chjätärea̧ do pio judi.

Juan 7:30

Ado Jechu judi ja̧di ta̧rëri̧ yo̧a̧ oaiä, mitëtä järitea̧diro̧jo̧ȩ chaäpea̧ oa. Jabo cjäri̧ madiro̧jo̧ȩ, mitërea̧ dadëa̧diro̧jo̧ȩ. Mitëtä järitea̧räbo, eami̧ oa japarea̧ dadëa̧dirȩ. Jabechji̧ jabë mitëpea̧ dodë tara, chaärea̧ dadëa̧dirȩ. Ütara̧ doromo̧ mitërea̧ dapadiro̧jo̧ȩ.

Juan 7:6

Jabo Jechu judi dëbë yo̧a̧dejȩrȩ: —Jabërequede —yo̧a̧dejȩrȩ—. Pjärämȩde. Jabë na̧rȩdëpea̧de. Pio coa da tänȩpea̧ do üdë jabë ma̧na̧dëa̧de. Tjamo̧ davä. Pumȩ ütëbodärä oa pio coaiäpȩmo̧ da tänȩpea̧ do üdë jabë ma̧na̧dëa̧de. Ütära̧ do üdë jabë ma̧na̧dëa̧dique. Jabo ja̧didëde pio dibëiä. Ado pio mȩnȩro̧ jätämi̧ cjiarä judi, jächji̧vä chjaodëri̧.

Juan 8:20

Ja̧di ta̧rëri̧ yo̧mȩrȩ ni̧bä chjaorëremȩde Jechu judi Ütë tjamo̧ ja̧ bëräpȩ ju̧ri̧, pumȩ judiro̧ jibëa̧ chëre yürürea̧ jo̧ tjoräpȩ ju̧ri̧. Jabo Jechu pio ju̧i̧ mitëtärea̧ ji̧, ta̧rë chaji̧ri̧ pio judiro̧ pio ju̧i̧ chaäpea̧ oa chjaodëri̧ mitëtärea̧ ji̧, jabechji̧ mitërea̧ dadëa̧diro̧jo̧ȩ pio jȩa mitëpea̧ do üdë jabë ma̧na̧dëa̧ tara.

Domano Ma̧ȩ 8:37

Jabo cjäri̧ marea̧rȩ, a̧ro̧rȩ dami̧ti̧ chjai̧dë oa chjätäräbo, jabechji̧ chjadëri̧ tutia̧ oa cjiarea̧rȩ davä, Jechurë ea̧ chja̧oerä. Ado pio ju̧i̧iä jabechji̧, a̧ro̧rȩ eami̧ti̧ chjai̧dë oa chjätäa̧räbo, jabechji̧ boadäräji̧ri̧mi̧ dari̧ cjia marea̧rȩ Jechu pio ju̧i̧iä.

Cori̧tio Ma̧ȩ 1 1:8

Ado pio dibëiäpȩmo̧ nö̧tadäräri̧ yürürëremȩ pio judi ji̧dë ma cjäri̧ri̧ cjiamȩrȩ ju chiarea̧ yürüpadidibe Jechu pio judi jana̧rä yuro. Tjamo̧ davä. Mȩnȩro̧ pio ju̧i̧ ja̧ dëbëräpȩ co chjami̧ dari̧ cjiapea̧ oa, mȩnȩro̧ pio ju̧i̧ ja̧ dëbëräpȩ chjai̧dë chiadë maearë cjiapea̧ oa, jabechji̧ ji̧dë ma ju chiarea̧ yürüpadidibe, mȩnȩro̧ eami̧ chjai̧dë oa chjätäräbo ji̧dë ma chjuari̧ quëna̧pea̧ oa, mȩnȩro̧ quëna̧dëpe bagachea oa.

Ebereo Ma̧ȩ 3:14

Jabechji̧ a̧ro̧rȩ ja̧boa̧rä yuro Ütë tjamo̧ ju̧i̧ ji̧dë ma chjuari̧ quëna̧ji̧ri̧rȩ cjo̧ro̧ oaiä, a̧ro̧rȩ pearä quëna̧rërea̧mi̧ ji̧dë ma acji mitëmi̧ dari̧ quëna̧ oaiä, jabechji̧ Quiricho pio ju̧i̧ ja̧ jadümi̧ dari̧ cjiarea̧rȩ, pio ju̧i̧ nö̧ta ori̧ bagari̧ ëba cjiarea̧mi̧ dari̧.

Ebereo Ma̧ȩ 3:6

Jabo Quiricho judi, cjäri̧ made, jabomo̧ mu̧i̧tjoi̧dëde jabo Ütë tjamo̧ pio ju̧i̧ ja̧ Joja pio judide. Ado judi, jabechji̧ Ütërë yo̧a̧mi̧ chjadëri̧ jidarëremȩde Ütë tjamo̧ ja̧ bëmi̧ da pio ji̧ri̧. Jabechji̧ bëmi̧ da pio ji̧ri̧ tjamo̧ jidamȩ pio judide. Ado danȩrȩ, ¿chjia tjamo̧dirȩ Ütë tjamo̧ ja̧ bëmi̧ da judiro̧? Chjiadëdirȩ, jabechji̧ pio a̧ro̧rȩrea̧rȩ. Jabechji̧ a̧ro̧rȩ ji̧dë ma chjuari̧ quëna̧rä judi, a̧ro̧rȩ Quiricho pio ju̧i̧ ma̧ chiadëri̧ cjiaji̧ri̧rȩ jidatarä judi, pio ju̧i̧ chjuari̧ jidataji̧ri̧rȩ cjo̧ro̧rä judi, dëdë, Ütë tjamo̧ ja̧ bëmi̧ darea̧rȩ.

Ebereo Ma̧ȩ 6:11

Ado pio ju̧i̧iä jabechji̧, mȩnȩro̧ ütëbodärärë Ütë tjamo̧ ja̧ oa ji̧dë ma järiji̧ri̧rȩ ja̧bepatä ea tjamo̧requededibe. Jabechji̧ mȩnȩro̧ jidata̧ üdë ma̧na̧na̧ra̧rä yuro, ja̧di dari̧ cjo̧ro̧tä earequededibe, jidatadëpe bagarea̧ decjiari̧.

Pedro Ma̧ȩ 1 1:13

Ja̧di tara ca̧ oti̧, Ütë tjamo̧ judi pio dibëiäpȩmo̧ chjätärea̧ goae tjamo̧ oa yürüa̧ tara, a̧ro̧rȩ chjai̧dë oa chjätäpea̧ oa chjadëri̧ ju chiarea̧ yürüa̧ tara, jabechji̧ ji̧dë ma jo̧rȩtachji̧vä pio ju̧i̧ chjiari. Jabechji̧ jëdano̧chji̧vä dibëa̧ chji̧ oa tüdüa̧mi̧ darämo̧ jo̧rȩtapea̧ oa, coëma cjiari̧ jo̧rȩtapea̧ oa. Jabechji̧ dibëa̧ icjara oa chjadëri̧ boadäräa̧ oa goami̧ dari̧ cjo̧ro̧chji̧vä, chjadë pio ju̧i̧mo̧i̧ mitëji̧ri̧rȩ. Jabechji̧ Jechu Quiricho pio judi na̧rȩmȩrȩ ma̧na̧rä, dibë cjäri̧ri̧ cjiamȩrȩ yürüpadidibe. Ja̧di tara jabechji̧, judi dibë yürüpea̧ pio ju̧i̧ ji̧dë ma jidataji̧ri̧rȩ jo̧rȩtariä cjo̧ro̧chji̧vä.

Juan Ma̧ȩ 1 4:19

Danȩrȩ, ¿tjana̧ ju̧i̧iä earea̧ darea̧ro̧jo̧ȩ Ütë tjamo̧ ju̧i̧? Tjana̧ ju̧i̧iädë, jabechji̧ judi pio ibëiäpȩmo̧ pearä earërea̧mi̧ earea̧ darea̧ro̧jo̧ȩ.

Jechurë Na̧rȩrërea̧ Ma̧ȩ 1:5

Ado Jechu Quiricho pio ju̧i̧iäbo goë cjo̧dërequede. Aja̧, Ütë ja̧ ma̧ȩ oa coëma cjiari̧ daba tänȩmȩ pio ju̧i̧iä, o ji̧ri̧ ja̧ yaboi̧ bëdüa̧ oa cjiamȩ pio ju̧i̧iä, ja̧boa̧remȩrȩ bëdüa̧ oa cjiamȩ pio ju̧i̧iäbo goë cjo̧dërequede, a̧dë chjäte tjamo̧ yo̧mȩ pio ju̧i̧iä, ado cja̧rȩmo̧rȩ nö̧tadärärea̧mi̧dëri̧ cjiamȩ Ütë pio ju̧i̧iä. Jabechji̧ pio ju̧i̧iäbo goë cjo̧dërequede, judi pio dibë cjäri̧ri̧ cjiamȩrȩ yürütä, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabechji̧ ji̧dë ma idami̧ dari̧ ea tjamo̧diibe Quiricho judi, eadëpe bagarea̧ decjiari̧. Ado pio ibë chjiari goe gu̧rori̧ ano̧ mire ja̧borërea̧ oaiä, jabechji̧ jare chjadüa̧ oa cjiami̧ dari̧ cjiarea̧rȩ yaba̧, a̧ro̧rȩ ibëa̧ icjararä chjai̧dërë yo̧a̧ chja̧oerä cjo̧ro̧chea oa.