Juan 12:1 - Biblia Pume

¹ Uëmo̧ a̧dë chjätärea̧ do üdë jabë ma̧na̧dëa̧rä, jabë 6 do pjärämȩrä, Jechu judi ado järëremȩde Betania quȩmȩ bë ma̧ri̧räpȩ. Jënȩ bëdü tänȩa̧ pio ju̧i̧iäpȩ järëremȩde, Dacharorë cjo̧ro̧mȩräpȩ.

Juan 12:1 Iomraidhean Croise

Mateo 21:17

Ja̧dëa ji̧ Jechu judi järëremȩde Betania quȩmȩ bë ma̧ri̧räpȩ. Jabechji̧ pio jiro pumȩ pio ji̧ri̧ a̧dë jämȩrȩ, Jerucharȩ quȩmȩ bë ma̧ri̧ri pio judiri go̧dümȩrȩ, mo̧e järëremȩde Betania quȩmȩ bë ma̧ri̧räpȩ, pio ju̧ri̧pȩ ano̧ mire mo̧a̧pea̧ oa.

Marcos 11:11

Ado Jechu judi Jerucharȩräpȩ go̧düdärämȩrȩ tjamo̧i̧ järëremȩde Ütë tjamo̧ ja̧ bëräpȩ. Ado bë tjoräpȩ yu̧a̧mȩrȩ oëra̧ti̧ oa daeno̧ ëte, jabechji̧ ado chjereno̧ go̧dürëremȩde dorë biraremȩ tara. Ado järëremȩde Betania quȩmȩ bë ma̧ri̧ boi̧chji̧räpȩ ju̧ri̧ jibëa̧ jadü pio ji̧ri̧ nö̧ta, 12 pio ji̧ri̧ nö̧ta.

Lucas 24:50

Ado Jechu judi pio ji̧ri̧iäpȩmo̧ ni̧bä chjaoa̧ duri oa, yabo ëba baärëremȩdejȩrȩ Betania quȩmȩ bë ma̧ri̧ queri̧räpȩ. Ado pio ju̧ri̧pȩ jibëa̧ jadü pio ji̧ri̧iäpȩmo̧ ni̧bärëremȩdejȩrȩ. Aja̧, dëbëribo ichipë cjiamȩrȩ ni̧bärëremȩdejȩrȩ, judiro̧ chjadëri̧ a̧doa̧ oa cjiatä.

Lucas 7:37

Ado pio jiro bë ma̧ri̧räpȩ ju̧ri̧ cjo̧ro̧rëreyi̧nȩ iei̧ pio jini̧, oarirë chëre yürüa̧ ba oa ëba mo̧a̧ chjaorëreyi̧ iei̧ pio jini̧. Jabo pio jiro iei̧ jini̧ Jechu pio ju̧i̧ chjiari goë ta̧rëa̧ oaiä, "Aja̧, pio jiro pjaricheorë cjo̧ro̧mȩräpȩ jura chade" yo̧a̧ oa ta̧rëa̧ oaiä, jabechji̧ jäa̧nȩ, ui goaeri̧ pjȩa̧mȩ joarea̧ ba chia tjamo̧ oa goayi̧rȩ. Tjamo̧ davä. Joë ba chia tjamo̧rä, ta̧dëra̧ japea̧ oa cjiamȩ joërä goayi̧rȩ jäa̧nȩ.

Juan 11:1

Cja̧rȩmȩ üi̧ judi Dacharo quȩmȩrëremȩde. Betania quȩmȩ bë ma̧ri̧räpȩ cjo̧ro̧rëremȩde jibëa̧ ami̧ ji̧ri̧ nö̧ta, Maria pio ji̧ nö̧ta, Marta pio ji̧ nö̧ta. Ado chjadëri̧ cjo̧ro̧rërea̧ ji̧, Dacharo judi gito ja̧bomȩrȩ cjo̧ro̧mȩpea̧de. Ado Maria jini̧ pio jini̧nȩ Jechu pio ju̧i̧iäpȩ järëreyi̧nȩ. Goaeri̧ pjȩa̧mȩ joarea̧ oa Ano̧mȩ pio ju̧i̧ ja̧ tarä arë cjarärëreyi̧ pio jini̧nȩ. Jibëa̧ cö̧ra̧ Ano̧mȩ ja̧ ta oa bubëguarëreyi̧ pio jini̧nȩ. Pio ji̧ ja̧ ayi̧ma̧i̧ judi gito ja̧bomȩpea̧de.

Juan 11:43

Ado ja̧di dari̧ yo̧ ëte, ma̧ȩ to̧bari̧ ëna̧diämȩrȩ ëna̧diärëremȩde ütëborë ta̧rërea̧mi̧ dari̧: —Dacharo, go̧düvä —ëna̧diäa̧de.

Juan 11:44

Ado Dacharo judi chjaodëri̧ go̧düa̧de. Ja̧boa̧mȩ oa purirea̧ chjibo cotora̧ pio ju̧ri̧ra̧ puria̧ oa cjiamȩrȩ go̧düa̧de. Jibëa̧ ichi üdë, jibëa̧ ta üdë puria̧ oa cjiamȩrȩ go̧düa̧de. Ado jibëa̧ dacho üdë peaja̧di puria̧ oa cjiaremȩde chjibo cotora̧. —Jareno̧chji̧jo̧ȩ judi chjadëri̧ baärea̧mi̧ dari̧ —yo̧a̧dejȩrȩ Jechu judi. Ado jareno̧a̧diro̧jo̧ȩ. Ado jareno̧a̧ oa cjiarä, baäa̧de Dacharo judi.

Juan 11:55

Ado uëmo̧ a̧dë chjätärea̧ do üdë ma̧na̧pea̧ ji̧ querediä tjamo̧rëremȩde, do chjätärea̧ do pio judi. Ado pio ju̧i̧iä pumȩ no̧i̧dërë, oëra̧ti̧ oa cjo̧ro̧ji̧ri̧ pio judiro̧ jabërä järëreji̧ri̧dirȩ Jerucharȩräpȩ chjai̧dë gȩrȩ chiadëji̧ri̧mi̧ dari̧ cjiadiäpea̧ oa Ütë tjamo̧ pio ju̧i̧iä.

Juan 12:12

Ja̧dëa ji̧ dopea̧rä, pumȩ no̧i̧dë tjamo̧rȩ ta̧rëji̧ri̧pea̧dirȩ Jechu judi Jerucharȩräpȩ go̧düdäräpea̧ pio ju̧i̧ chjiari. Uëmo̧ a̧dë chjätärea̧ doro a̧dopera̧pea̧ji̧ri̧ pio judiro̧, Jerucharȩräpȩ a̧dopera̧pea̧ji̧ri̧ pio judiro̧ ta̧rëji̧ri̧pea̧dirȩ.

Juan 12:20

Ado judiodë judiro̧ orë peaja̧di a̧dopea̧ oa cjiarëreji̧ri̧dirȩ Jerucharȩräpȩ. Peaja̧di järëreji̧ri̧dirȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa, do chjätärea̧ do nö̧ta.

Juan 12:9

Judio judiro̧ no̧i̧dërë goë ta̧rëji̧ri̧pea̧dirȩ Jechu judi Betania quȩmȩ bë ma̧ri̧räpȩ go̧düdäräa̧ pio ju̧i̧ chjiari. Ado pio ju̧i̧iä ja̧dira̧ järëreji̧ri̧dirȩ. Jabo Jechu pio ju̧i̧mo̧ jo̧rȩtaji̧ri̧rȩ jädëa̧dirȩ. Jabechji̧ Jechu judi bëdü tänȩa̧ oa cjiamȩ pio ju̧i̧bo datämi̧ cjiaji̧ri̧rȩ järëreji̧ri̧dirȩ, ja̧boa̧remȩ pio ju̧i̧ dapea̧ oa.