Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ, na̧e chia tjamo̧chji̧vä ado ja̧di, mȩnȩro̧ eami̧ boi̧chji̧mi̧ damȩ pio ju̧i̧ badë dachea oa —yo̧a̧dejȩrȩ—. Tjamo̧ davä. Ba chiadëmȩmi̧ damȩ pio ju̧i̧ badë dachea oa, pea quëna̧mȩpea̧ pio ju̧i̧ badë dachea oa, jabechji̧ na̧e chia tjamo̧chji̧vä. Jabechji̧ chjadëri̧ jida̧ oa cjiadirȩ. Jabechji̧ Ütë tjamo̧ pio judi tänȩa̧ oaiä, a̧dëriji̧ri̧ mu̧i̧tjoi̧ ba chia tjamo̧ pio judiro̧ chjadëri̧ jidadiro̧jo̧ȩ ba chiadëmȩmi̧ damȩ pio ju̧i̧. Ado danȩrȩ, ca̧ Ama̧i̧ pio judi pio jiro ja̧beparea̧ ba chia oa jibëa̧ mu̧i̧tjoi̧ pio ji̧ri̧iäpȩmo̧ yürüa̧ oaiä, ado pio jiro mu̧i̧tjoi̧ judiro̧ ca̧ Ama̧i̧ pio ju̧i̧ nö̧ta ji̧dë ma ëba cjiarea̧ da oaiä ¿yö̧ta dari̧ jo̧rȩtaji̧ri̧rȩ datäreji̧ri̧rea̧rȩ ba chiadëmȩmi̧ damȩ pio ju̧i̧? Yö̧ta dari̧dë, jabechji̧ badë dadë matäreji̧ri̧rea̧ro̧jȩrȩ, jabo ba chia tjamo̧ datäreji̧ri̧rea̧ro̧jo̧ȩ ji̧dëri̧ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.
Juan 10:10 - Biblia Pume10 Jabo garümȩ judi chjai̧dëri̧ japapea̧ pio ju̧i̧mo̧i̧ jo̧rȩtade oveja pio ji̧ri̧ chjiari. Baë mitëtämi̧ cjiadejȩrȩ. Ja̧bo tänȩtämi̧ cjiadejȩrȩ. Yuropa tänȩtämi̧ cjiadejȩrȩ. Jabo ja̧didërequede cüdë —yo̧a̧dejȩrȩ—. Jabechji̧ mȩnȩro̧ a̧dë chjäte goae tarari̧ cjo̧ro̧rea̧ dapea̧ oa yürera̧pea̧requededibe. Faic an caibideil |
Juan 10:10
25 Iomraidhean Croise
Danȩrȩ, pio coa cho̧rëdiä matäreji̧ri̧renȩro̧coe, Pumȩrȩ Ara̧ Tjamo̧ pio ju̧i̧. Ado cüdë a̧dëri pio judiri birë ma̧na̧rä, jabechji̧ pumȩ pio judiro̧ ca̧ mu̧i̧tjoi̧mi̧ da maearë cjo̧ro̧pea̧ oa birë ma̧na̧dërëremȩrequede. Pio judiro̧ coa ji̧dë ma a̧dopea̧ oa birë ma̧na̧dëa̧requede, jabo jabechji̧ pio ji̧ri̧ ja̧ mu̧i̧tjoi̧mi̧ dari̧ cjo̧ro̧pea̧ oa birë ma̧na̧requede cüdë. Tjamo̧ davä. Pio ji̧ri̧ chjadëri̧ a̧dopea̧ oa birë ma̧na̧requede. Ado pio ju̧i̧iä ca̧ icjara pio ju̧i̧ yürüparequede pumȩ ja̧ oa. Tjamo̧ davä. Pumȩ pio ji̧ri̧ chjiari ano̧ mire ja̧bopea̧ oa, pio judiro̧ chjai̧dëri̧ japea̧ pio ju̧i̧ chjiari tuti ba ano̧a̧ cjiapea̧ oa, jabechji̧ ca̧ icjara oa yürüparequede —yo̧a̧dejȩrȩ. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi Ütë tjamo̧ pio ju̧i̧ ja̧ mu̧i̧tjoi̧mi̧ dari̧ cjo̧ro̧pea̧ pio ju̧i̧ chjiari.
Ado yo̧a̧dejȩrȩ Jechu judi: —Danȩrȩ, ja̧di ta̧rëri̧ go̧ȩpea̧ oa cjiade ma̧ȩ üdë, Ütë tjamo̧ pio judi yo̧rërea̧ ma̧ȩ üdë. “Ca̧ bë üdë, pio coaiäpȩmo̧ ma ni̧bäpea̧ bëde." Aja̧, ja̧di ta̧rëri̧ yo̧diibe ma̧ȩ üdë —yo̧a̧dejȩrȩ Jechu judi—. Jabo cjäri̧ manȩrȩ, pio mȩnȩro̧ ma̧i̧ dari̧ japea̧ oaiä, garüji̧ri̧ pio judiro̧ a̧doparea̧ bëmi̧ dapea̧de —yo̧a̧dejȩrȩ.
Ado Jechu judi ji̧dë u̧i̧ ni̧bämȩrȩ uapai̧ dari̧ aechide yo̧mȩrȩ yo̧rëremȩdejȩrȩ pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo. Ja̧di ta̧rëri̧ yo̧mȩrȩ yo̧a̧dejȩrȩ: —Danȩrȩ, Ütë tjamo̧ pio judi tänȩa̧ oa, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ Ütë tjamo̧ pio ju̧i̧ quëna̧cji̧ quëna̧ japaji̧ri̧ oa acji cjatäpadidibe. Jabechji̧ mȩnȩro̧ Ütërë yo̧a̧ chja̧oerä yu̧a̧tärea̧ ji̧, yu̧a̧rea̧ dadëpanȩrȩ. Ado pumȩ judiro̧ no̧i̧dërë Ütërë yo̧a̧ chja̧oeräpȩ yu̧a̧tärea̧ ji̧, peaja̧di yu̧a̧rea̧ dadë madirȩ mȩnȩro̧ oëra̧ a̧ra̧ano̧ chjaoa̧ pio oaiä, mȩnȩro̧ yu̧a̧rea̧ joë ya oa tuti carami̧ dari̧ japea̧ oaiä. —yo̧a̧dejȩrȩ.
Ado ja̧di dari̧ japa ëte, Jechu judi taruparëremȩde a̧ra̧ano̧pea̧ ji̧. Ja̧di ta̧rëri̧ yo̧mȩrȩ a̧ra̧ano̧a̧dejȩrȩ: —Danȩrȩ, ja̧di ta̧rëri̧ go̧ȩpea̧ oa cjiade ma̧ȩ üdë, Ütë tjamo̧ pio judi yo̧rërea̧ ma̧ȩ üdë: "Danȩrȩ, ca̧ bë üdë, pio coaiäpȩmo̧ ni̧bäpea̧ bëde pumȩ ütëbodärä ja̧ oa'. Aja̧, ja̧di ta̧rëri̧ yo̧rëremȩdiibe Ütë tjamo̧ judi. Jabo cjäri̧ manȩrȩ, mȩnȩro̧ ma̧i̧ dari̧ japea̧ oaiä, garüji̧ri̧ pio ji̧ri̧ ja̧ a̧doparea̧ bëmi̧ dapea̧de —yo̧mȩrȩ yo̧a̧dejȩrȩ Jechu judi.
Ado Jechu judi ji̧dë u̧i̧ yo̧tämi̧ cjiamȩrȩ a̧de ni̧bä chjaorëremȩdejȩrȩ pumȩ ji̧ri̧: —Danȩrȩ, tjamo̧i̧ cjiari̧ yo̧requededibe —yo̧a̧dejȩrȩ—. Oveja jidamȩ judi chjadëri̧ jidadejȩrȩ oveja pio ji̧ri̧. Ado gȩnȩpea̧rä, tutia̧rä yu̧a̧ tänȩdejȩrȩ totarea̧räpȩ, judiro̧ chjadëri̧ mo̧a̧pea̧ oa. Ado oveja jidamȩ judi totarea̧räpȩ yu̧a̧rä, jabechji̧ tjaoëri yu̧a̧dëmȩde, jabo yu̧a̧rea̧ jo̧ë yari pio judiri yu̧a̧de chjadëri̧. Jabo ja̧di dari̧ japadëmȩde garümȩ judi. Tjaoëri yu̧a̧mȩde. Uëri buë ëte yu̧a̧de garüpea̧ oa. Pumȩ chjadëdëde.
Aja̧, ja̧di ta̧rëri̧ yo̧rëremȩde Juda Icariote judi iei̧ pio ji̧ chjiari, judi garümȩ tara. Tjamo̧ davä. Judi chjö̧na̧i̧ti̧ oa cjäri̧ ja̧boji̧ri̧ pio ji̧ri̧ tjamo̧ri̧ a̧dorea̧ taradërëremȩde, jabo chëre maea oa jo̧rȩtarëremȩde judi garümȩ tara. Jabechji̧ Jechu ja̧ jadü ja̧ chëre pio ju̧i̧ boeamȩ tjamo̧rëremȩde. Chjibo jo̧ërä boea̧ oa goarëremȩde ji̧ri̧ ja̧ chëre oa, jabo babui̧ra̧ baë mitërëremȩde pio ji̧ri̧iä. Pio ju̧i̧iä Jechu ja̧ tarä arë cjarätä ea tjamo̧dëa̧dejȩ iei̧ ji̧.
Ado pio jiro chja̧pe pio judirequede cüdë. Tjamo̧ davä. A̧dëri ja̧ chja̧pe pio judirequede. Bucho ana̧ cjo̧ro̧rea̧ yürümȩ chja̧pe pio judirequede. Ado eami̧rȩ pio yoa chja̧pe oa jurarä judi, jabechji̧ bucho ana̧ cjo̧ro̧pade —yo̧a̧dejȩrȩ—. Ado danȩrȩ, pio jiro chja̧pe üdë ca̧ go̧a̧ pio judide. Ado ca̧ go̧a̧ pio ju̧i̧ yürürequededibe mȩnȩro̧ jurapea̧ oa. Jabechji̧ yürürequede ca̧ icjara oa pumȩ judiro̧ ütëbodärärë bucho ana̧ cjo̧ro̧rea̧ dapea̧ oa —yo̧mȩrȩ ni̧bä chjaorëremȩdejȩrȩ Jechu judi ma̧ȩ go̧a̧ti̧ oa.
Dëdë, dabarea̧ chianȩrȩ. Ado o ji̧ri̧iäpȩmo̧ a̧ra̧ano̧rea̧ chianȩrȩ peaja̧di. Jabo cjäri̧ manȩrȩ jabo, ade cjiami̧ dari̧ cjianȩrȩ. Poëdiä cjiami̧ dari̧ cjianȩrȩ. Dëdë, o ji̧ri̧iäpȩmo̧ a̧ra̧ano̧nȩrȩ jabo pio mȩnȩro̧ a̧ra̧ano̧dëa̧ oa cjiami̧ dari̧ cjianȩrȩ. Danȩrȩ, “Garüdëchji̧vä” yo̧ji̧ri̧rȩ a̧ra̧ano̧nȩrȩ, jabo cjäri̧ manȩrȩ, garüji̧ri̧rȩ cjo̧ro̧nȩrȩ.
Tjamo̧dë yo̧dërequedemȩ, jabo tjamo̧i̧ cjiari̧ yo̧requedemȩ chjuari̧ quëna̧pea̧ ma̧ȩ pio ju̧i̧. Danȩ Timoteo, Jechu Quiricho judi a̧dëri pio judiri birarëremȩde chjai̧dëri̧ japaji̧ri̧ pio ji̧ri̧ chjadëri̧ chjätä tänȩpea̧ oa. Ado cüdë ma̧i̧ dari̧ japea̧ oaiä, a̧dë chjäte chjai̧dëri̧ jape chjaoa̧ oaiä, jabechji̧ a̧dë chjäte chjai̧dëri̧ japamȩmi̧ darë cjiadiäa̧requede cüdë.
Ado peaja̧dimi̧ dari̧ japarëremȩde Ütë tjamo̧ judi pumȩ ji̧ri̧ yo̧ë cji̧därërea̧ ji̧. Tjamo̧ davä. Jibëa̧ quȩ ba chia pio ju̧i̧ a̧de yo̧mȩrȩ yo̧ë cji̧därëremȩdejȩrȩ, yo̧ë cji̧däa̧ ma̧ȩ pio ju̧i̧ mitëpaji̧ri̧ pio judiro̧ tjamo̧ri̧ dabapea̧ oa. ‘Aja̧, tjamo̧i̧ cjiari̧ yo̧diibëda, teracabari̧ yo̧rea̧ decjiari̧ yo̧diibëda, ji̧dë duri oa ano̧ mire jo̧rȩtadëpadida, jabo jabechji̧ quȩ ba chia maeara̧ a̧de yo̧mȩrȩ yo̧ë cji̧dädiibëda’ quëna̧ jo̧rȩtapea̧ oa yo̧ë cji̧därëremȩdejȩrȩ Ütë tjamo̧ judi quȩ ba chiara̧ pio ju̧ri̧ra̧.
Ado pio ju̧i̧iä nö̧tade pumȩ ji̧ri̧ ji̧dë ma chjätä tänȩpea̧ ji̧. Ado pio ju̧i̧iä eami̧ pumȩ oa, Jechu pio ju̧i̧ quëna̧mȩ oa, Ütë tjamo̧ pio ju̧i̧iäpȩ jämi̧ dari̧ quëna̧mȩ oa, jabechji̧ chjätärea̧ yürüdejȩ. Jabechji̧ judi bucho ana̧mȩ tara, judi ja̧bodëmȩ tara, jabechji̧ pio ibë chjiari ji̧dë ma goë tuti cjo̧dëpai̧ dade Ütë tjamo̧ pio ju̧i̧iä.
Ado mȩnȩro̧ no̧ coëma oa jämi̧ dari̧ na̧rȩriä cjo̧ro̧a̧ oaiä, jabechji̧ ma̧ chiadëri̧ cjia tjamo̧mȩrȩ yu̧a̧ tänȩpadidibe Ütë tjamo̧ judi. Tjamo̧ davä. Yu̧a̧ tänȩpadidibe. Ano̧mȩ Jechu Quiricho pio judi yo̧a̧ chja̧oerä cjo̧ro̧pea̧ bëräpȩ ju̧ri̧ yu̧a̧ tänȩpadidibe. Aja̧, ibë Chjätä Tänȩmȩ pio judi cjiamȩräpȩ ju̧ri̧, judi bucho ana̧ tjamo̧ yo̧mȩrȩ cjiamȩräpȩ ju̧ri̧ yu̧a̧rea̧ yürüpadidibe davä a̧dë chjäte chjadë tjamo̧räpȩ ju̧ri̧. Pio ju̧i̧iä na̧ȩ chiachji̧vä mȩnȩro̧ quëna̧ pio ju̧i̧ uëri a̧de goaji̧ri̧mi̧ dari̧ chjadëri̧ cjo̧ro̧pea̧ oa.