Juan 10:1 - Biblia Pume

^1-2 Ado Jechu judi ji̧dë u̧i̧ yo̧tämi̧ cjiamȩrȩ a̧de ni̧bä chjaorëremȩdejȩrȩ pumȩ ji̧ri̧: —Danȩrȩ, tjamo̧i̧ cjiari̧ yo̧requededibe —yo̧a̧dejȩrȩ—. Oveja jidamȩ judi chjadëri̧ jidadejȩrȩ oveja pio ji̧ri̧. Ado gȩnȩpea̧rä, tutia̧rä yu̧a̧ tänȩdejȩrȩ totarea̧räpȩ, judiro̧ chjadëri̧ mo̧a̧pea̧ oa. Ado oveja jidamȩ judi totarea̧räpȩ yu̧a̧rä, jabechji̧ tjaoëri yu̧a̧dëmȩde, jabo yu̧a̧rea̧ jo̧ë yari pio judiri yu̧a̧de chjadëri̧. Jabo ja̧di dari̧ japadëmȩde garümȩ judi. Tjaoëri yu̧a̧mȩde. Uëri buë ëte yu̧a̧de garüpea̧ oa. Pumȩ chjadëdëde.

Juan 10:1 Iomraidhean Croise

Mateo 7:15

Ado cjiadiädëmȩrȩ ji̧dë u̧i̧ ni̧bä chjaorëremȩdejȩrȩ Jechu judi, ja̧di ta̧rëri̧ yo̧mȩrȩ: ⁠—⁠Danȩrȩ, na̧e chiachji̧vä teracabari̧ a̧ra̧ano̧ji̧ri̧ pio ji̧ri̧ chjiari ⁠—⁠yo̧a̧dejȩrȩ⁠—⁠. Jabechji̧ u̧i̧pea̧ oa cjiadëchji̧vä Ütërë ea jana̧ chjadüa̧ oa ni̧bäcji̧ quëna̧ ni̧bäji̧ri̧ pio ji̧ri̧iä. Jabechji̧ aure chjuamȩmi̧ da maeadirȩ. Jabo oveja ja̧ ira̧ ina̧ oa cjiami̧ dari̧ cjiaji̧ri̧rȩ go̧düdärädirȩ mȩnȩro̧ pio ji̧ri̧ chjiari na̧e chiachea oa. Jabo cjäri̧ madirȩ, uapai̧ da tjamo̧dirȩ. Dairi daea̧ ji̧mo̧i̧ chjadëmi̧ dadirȩ chjadëdë pio judiro̧. Ado pio dibë jui quiraji̧ri̧mi̧ dari̧ japatämi̧ cjiadiro̧dibe.

Juan 10:7

Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ pumȩ ji̧ri̧: —Tjamo̧i̧ cjiari̧ yo̧requededibe. Cüdë yu̧a̧rea̧ jo̧ë yami̧ darequede. Ado pio coaiämo̧i̧ yu̧a̧rea̧ dadirȩ oveja judiro̧.

Juan 3:3

Ado Jechu judi yo̧a̧dejȩ: —Tjamo̧dë yo̧dërequedemȩ, jabo tjamo̧i̧ cjiari̧ yo̧requedemȩ. Eami̧ pumȩ üdë peaja̧ mape bagari̧ ado nö̧ria̧ oa cjiadërä judi, Ütërë yo̧a̧ chja̧oerä cjo̧ro̧rea̧ dadëpade —yo̧a̧dejȩ.

Domano Ma̧ȩ 10:15

Ado a̧ra̧ano̧ji̧ri̧ pio ji̧ri̧ chjadüa̧ oa cjiadërä judi, Ütë tjamo̧ ja̧ ma̧ȩ pio ju̧i̧ a̧ra̧ano̧pea̧ oa chjadüa̧ oa cjiadërä judi, ¿yö̧ta dari̧ a̧ra̧ano̧a̧ oa cjiapade ma̧ȩ üdë? ¿Yö̧ta dari̧ ta̧rërea̧ dapadirȩ dabadëji̧ri̧ judiro̧? Danȩrȩ, Ütë tjamo̧ ja̧ ma̧ȩ oa a̧ra̧ano̧e jäji̧ri̧ pio ji̧ri̧ chjiari go̧ȩpea̧ oa cjiade ma̧ȩ üdë peadëri ja̧. Ta̧rëchji̧vä: "Aja̧, ma̧ȩ chjadëi̧ pio ju̧i̧ a̧de jäji̧ri̧ pio judiro̧ eami̧räpȩ go̧düdärärä, goae tjamo̧de. Tjamo̧ davä. Pio jiro ma̧ȩ chjadëi̧ pio ju̧i̧ goa jämȩ pio judi eami̧räpȩ järä, jabechji̧ a̧dë chjäte goae tjamo̧de pumȩ pio ji̧ri̧iä." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë a̧ra̧ano̧e jäji̧ri̧ pio ji̧ri̧ chjiari.

Domano Ma̧ȩ 16:18

Jabechji̧ ja̧di dari̧ japaji̧ri̧ judiro̧ ibëa̧ Ano̧mȩ pio ju̧i̧ ja̧ oa ja̧bepadë madirȩ. Quiricho pio ju̧i̧ ja̧ oa ja̧bepadë madirȩ jabo jabechji̧, jibëa̧ icjararä chjai̧dë pio judiri cjitëmȩ pio ju̧i̧mo̧i̧ jo̧rȩtaji̧ri̧rȩ ja̧bepadirȩ, teracabati̧ oa. Goaeri̧ gari̧pe gari̧pe ni̧bädirȩ u̧i̧pe u̧i̧pe ni̧bätämi̧ cjiaji̧ri̧rȩ. Ado nae chiadërë quëna̧ji̧ri̧ pio judiro̧ chjaodëri̧ u̧i̧pea̧ oa cjiapai̧ dadirȩ davä pio ji̧ri̧iä. Jabechji̧ tjamo̧rämi̧ cjiadiro̧jȩrȩ. Pio ju̧i̧iä na̧ȩ chiatä eamȩrȩ yo̧tarequededibe ca̧ pumȩ.

Tito 1:11

Jabo danȩ Tito, oëra̧ a̧ra̧ano̧ji̧ri̧ pio ji̧ri̧ cjapiri̧ cjia tänȩtäreji̧ri̧diro̧jȩrȩ tjamo̧ jidaji̧ri̧ judiro̧. A̧ra̧ano̧rea̧ yürüdëtäreji̧ri̧diro̧jȩrȩ judiro̧ a̧ra̧ano̧rea̧mi̧dë tara. Jabechji̧ judiro̧ teracaba ma̧ȩ oa a̧ra̧ano̧ chjaoa̧ oaiä, pumȩ no̧i̧dërë a̧dë jo̧rȩtaji̧ri̧pea̧diro̧jo̧ȩ tjamo̧i̧ cjiari̧ baämȩ ma̧ȩ pio ju̧i̧. Aja̧, tjamo̧ cjo̧ro̧ji̧ri̧ pio judiro̧ jibëa̧ pumȩborë teracaba ma̧ȩ maea oa quëna̧ji̧ri̧pea̧dirȩ oëra̧ a̧ra̧ano̧ji̧ri̧ pio ji̧ri̧iä ta̧rëa̧ oaiä. Ado pio jiro a̧ra̧ano̧ji̧ri̧ judiro̧, ¿tjana̧ tjamo̧ oa jo̧rȩtaji̧ri̧rȩ ja̧bepadirȩ? Tjana̧dë, jabechji̧ chëre pio ju̧i̧mo̧i̧ jo̧rȩtaji̧ri̧rȩ ja̧bepadirȩ. Pio ju̧i̧iä cjapiri̧ cjia tänȩpea̧ maeadirȩ. A̧ra̧ano̧rea̧ yürüdëjȩrȩ.

Ebereo Ma̧ȩ 5:4

Ado eami̧ pumȩ üdë pio jiro ja̧beparea̧ ba chia tjamo̧ oa, jabechji̧ jibëa̧ ma̧na̧ri̧ jo̧rȩtamȩrȩ mitërea̧mi̧dëde. Jabechji̧ Ütë tjamo̧ pio judi ëna̧diäa̧rämo̧ ja̧beparea̧mi̧ dade, pio judi mitëa̧rämo̧. Ado peaja̧dirëremȩde Aro̧ judi. Ütë tjamo̧ judi ëna̧diäa̧ oaiä taruparëremȩde ja̧di dari̧ ja̧bepapea̧ ji̧.

Pedro Ma̧ȩ 1 1:10

Ado Ütë tjamo̧ judi yürüa̧ chjätärea̧ pio judi a̧dë chjäte chjadë tjamo̧de ca̧ oti̧. Ado pio ju̧i̧iä no̧mȩri ja̧ cjo̧ro̧rëreji̧ri̧ pio judiro̧, Ütërë ea jana̧ chjadüa̧ oa ni̧bäji̧ri̧ pio judiro̧ ji̧dë ma jo̧rȩtarëreji̧ri̧dirȩ jabërä Ütërë yürüpea̧ pio ju̧i̧ chjiari, judi tuti chjadüpea̧ pio ju̧i̧ chjiari. Jabechji̧ ji̧dë u̧i̧ dabapatämi̧ cjiarëreji̧ri̧dirȩ pio jiro chjätärea̧ pio ju̧i̧ chjiari. Ado pio ju̧i̧iä iëno̧ iëno̧ cjiarëreji̧ri̧dirȩ. Tjamo̧ davä. Ütërë cjäri̧ri̧ cjiamȩrȩ yürüpea̧ pio ju̧i̧ chjiari ea jana̧ chjadüa̧ oa ni̧bäji̧ri̧ pio judiro̧ ji̧dë ma na̧taji̧ri̧mi̧ dari̧ iëno̧ë iëno̧ë cjiarëreji̧ri̧dirȩ.

Pedro Ma̧ȩ 2 2:1

Danȩrȩ ca̧ pumȩ, Ütërë ea jana̧ chjadüa̧ oa ni̧bäji̧ri̧ pio judiro̧ chjadëri̧ a̧ra̧ano̧rëreji̧ri̧dirȩ icharaita ja̧ chjarerä. Jabo danȩrȩ, Ütërë ea jana̧ chjadüa̧ oa ni̧bäji̧ri̧cji̧ quëna̧ japaji̧ri̧ pio judiro̧borë a̧ra̧ano̧rëreji̧ri̧dirȩ pio ji̧ri̧ ja̧ charerä. Jabechji̧ Ütërë ea jana̧ chjadüa̧ oa ni̧bäji̧ri̧ pio judiro̧mo̧rȩ a̧ra̧ano̧tärea̧ ji̧, pio judiro̧mo̧rȩ Icharaita pio ji̧ri̧iäpȩmo̧ a̧ra̧ano̧tärea̧ ji̧, teracabari̧ ni̧bäji̧ri̧ pio judiro̧borë a̧ra̧ano̧rëreji̧ri̧dirȩ, jibëa̧ ma̧na̧ri̧ jo̧rȩtaji̧ri̧rȩ. Ado danȩrȩ ca̧ oti̧, peaja̧dimi̧ dari̧ japapai̧ dadirȩ dibëa̧ chjareräji̧ri̧ pio judiro̧ orë. Jabechji̧ chjadëri̧ a̧ra̧ano̧cji quëna̧ japaji̧ri̧rȩ teracaba ma̧ȩ oa a̧ra̧ano̧pai̧ dadiro̧dibe. Goadiji̧ri̧mi̧ dari̧ a̧ra̧ano̧pai̧ dadiro̧dibe. Aja̧, ‘teracaba ma̧ȩ oa ni̧bä chjaodiro̧ibëda’ quëna̧ jo̧rȩtadëji̧ri̧ oa goadiji̧ri̧mi̧ dari̧ a̧ra̧ano̧pai̧ dadiro̧dibe. Jabechji̧ uapai̧ dari̧ a̧ra̧ano̧pai̧ dadiro̧dibe pumȩ no̧i̧dë tjamo̧rȩ ana̧ri̧ oëra̧diärea̧mi̧ dari̧, quëna̧ji̧ri̧ pio judiro̧ cja̧rȩmȩ chji̧ chiami̧ dari̧ jo̧rȩtadëpe bagarea̧mi̧ dari̧. Jabechji̧ Quiricho pio judi pumȩ ütëbodärä ja̧ oa tuti ba ano̧a̧räbo, pumȩ judiro̧ ja̧boa̧ chja̧oeri pio judiri go̧dürea̧mi̧ dari̧ tuti ba ano̧a̧räbo, cjäri̧ madiro̧jo̧ȩ, “Quiricho judi ibëa̧ Ano̧mȩ tjamo̧dëde, ado pio ju̧i̧ ja̧ chja̧oerä cjo̧ro̧dëpea̧de” yo̧pai̧ dadirȩ. Jabo cjäri̧ madejȩrȩ ca̧ oti̧, judiro̧ ja̧di dari̧ japea̧ ba oaiä chjaodëri̧ bape chjaopadejȩrȩ Ütë tjamo̧ judi.

Pedro Ma̧ȩ 2 2:3

Aja̧ ca̧ oti̧, pio jiro oëra̧ a̧ra̧ano̧ji̧ri̧ pio judiro̧ chëre goaraji̧ri̧rȩ u̧i̧pe u̧i̧pe ni̧bäpai̧ dadiro̧dibe dibëa̧ pio ju̧i̧ baë mitërea̧ dapea̧ oa. Jabechji̧ goaeri̧ ni̧bäji̧ri̧rȩ teracaba ma̧ȩ maea oa ni̧bäpai̧ dadiro̧dibe, jibëa̧ icjarari pio judiri cjitëmȩ chjai̧dë jo̧rȩtarea̧ pio ju̧i̧. Jabo danȩrȩ, Ütë tjamo̧ judi peadëri ja̧ na̧e chiade davä oëra̧ a̧ra̧ano̧ji̧ri̧ pio ji̧ri̧ chjiari. ‘Jabechji̧ bape chjaoa̧ oa cjiapea̧ chiadiro̧da’ quëna̧ jo̧rȩtade davä no̧mȩ tjamo̧ri ja̧. Ado pio ju̧i̧iä, ‘A̧ja̧, Ütë tjamo̧ judi mo̧a̧mi̧ dari̧ cjia jirodida, eami̧ oa japadaemȩ jirodiji̧ri̧da’ quëna̧rea̧mi̧dëde jabo jabechji̧, ütara̧ doro, jënȩ jabërä ütarë jo̧rȩtarërea̧ra̧ pio ju̧ri̧ra̧ uapai̧ da tjamo̧ri̧ bape chjaopadejȩrȩ.

Juan Ma̧ȩ 1 4:1

Dibë ea tjamo̧mȩrȩ ja̧di ta̧rëri̧ yo̧requededibe ca̧ oti̧. Danȩrȩ, na̧e chiachji̧vä. Jabechji̧ pio yoa chirirä teracabari̧ a̧ra̧ano̧ji̧ri̧ pio judiro̧, ado Ütërë ea jana̧ chjadüa̧ oa ni̧bäji̧ri̧cji̧ quëna̧ japaji̧ri̧ pio judiro̧ ji̧ra̧ tjamo̧dirȩ. Ado pio ju̧i̧iä na̧e chiachji̧vä. Jabechji̧ pio dibëiäpȩ chjaodëri̧ go̧düdäräpai̧ dade teracabari̧ a̧ra̧ano̧mȩ judi. Ado go̧düdäräa̧mȩ pio judi yo̧rä judi, “Aja̧, Tjo tjamo̧ pio judi dabarea̧ yürüa̧ oa ni̧bärequededibe” yo̧rä judi, jabechji̧ chjaodëri̧ ta̧rë ja̧bodëchji̧jo̧ȩ. Tjamo̧i̧ cjiari̧ yo̧requededibe ca̧ oti̧. Chjaodëri̧ ta̧rë ja̧bodëchji̧jo̧ȩ jabo chjadëri̧ ütarë ta̧rëchji̧jo̧ȩ yabochja. Jabechji̧ o judiro̧ “Tjo tjamo̧ pio ju̧i̧ ja̧ ma̧ȩ oa ni̧bämȩrequede” yo̧ji̧ri̧borë, Tjo tjamo̧ pio ju̧i̧ chiadëji̧ri̧rȩ ni̧bädirȩ. Tjamo̧ davä. Pio ju̧i̧ chiadëdiro̧jo̧ȩ, jabo ado cja̧rȩmo̧ tjo pio ju̧i̧ chiaji̧ri̧rȩ ni̧bädirȩ. Ado pio ju̧i̧iä jabechji̧, mȩnȩro̧ ta̧rë ja̧bobea yaboi̧, jabechji̧ chjadëri̧ ütarë ta̧rëtäreji̧ri̧nȩrȩ yabochja.