Juan 1:45 - Biblia Pume45 Ado Pjeripe judi jäeno̧a̧de Natanera quȩmȩ pio ju̧i̧ dadäräpea̧ oa. Ado pio ju̧i̧ dadäräa̧rä, yo̧a̧dejȩ: —Danȩ, Ütërë mitëa̧ Chjätä Tänȩmȩ pio ju̧i̧ dadäräa̧rea̧ro̧jo̧ȩ. Moicherë go̧ȩparërea̧ pumȩ pio ju̧i̧ dadäräa̧rea̧ro̧jo̧ȩ. Ütërë ea jana̧ chjadüa̧ oa ni̧bäji̧ri̧ judiro̧ go̧ȩparërea̧ pumȩ pio ju̧i̧ dadäräa̧rea̧ro̧jo̧ȩ. Danȩ, Jechu pio judide. Joche quȩmȩ pio ju̧i̧ ja̧ joja pio judide. Tjamo̧ davä. Nachare quȩmȩ bë ma̧ri̧rimȩde. Faic an caibideil |
Juan 1:45
41 Iomraidhean Croise
Ado pio cüdë tänȩa̧ oa, iei̧ pio ji̧ eadëmȩrȩ cjo̧ro̧parenȩ. Ado iei̧ pio ji̧ni̧ peaja̧di mȩa eadëyi̧rȩ cjo̧ro̧panȩ. Jabechji̧ iei̧ pio judiri ja̧ji̧ri̧ judiro̧ na̧ea̧ri ja̧ji̧ri̧ pio pio ji̧ri̧ nö̧ta ji̧dë ma dëbëpe chjaomi̧ dari̧ japapadirȩ. Ado iei̧rȩ arapea̧ oa cjiapamȩ pio judi cja̧rȩmȩrȩ goae tarari̧ gu̧na̧mi̧ dari̧ japapadimȩ na̧ tjübë oa. Ado mȩnȩ yo̧dë juimi̧ dari̧ japaparemo̧nȩ pio ju̧i̧ ja̧ ta ärä oa —yo̧mȩrȩ yo̧rëremȩdejȩ po ju̧i̧iäpȩmo̧ Ütë tjamo̧ judi.
Ado danȩ Juda, na̧ea̧ri ja̧ji̧ri̧ judiro̧ chiri ütëji̧ri̧rȩ cjo̧ro̧padirȩ. Tjamo̧ yo̧ji̧ri̧rȩ cjo̧ro̧padirȩ. Jabechji̧ ji̧dë ma ütërë cjo̧ro̧padirȩ ütëdëpe järea̧ decjiari̧. Aja̧, Ütë tjamo̧ pio judi birë ma̧na̧rä yuro ja̧di dari̧ cjo̧ro̧padirȩ. Ado ja̧dëa ji̧ Ütë judi pio judi birë ma̧na̧rä, jabechji̧ pumȩ ütëborë ta̧rëdiä mapadiro̧jo̧ȩ na̧ea̧ri ja̧mȩ pio ju̧i̧.
Jabo judiro̧ jiada̧räbo, jabechji̧ ütarë jo̧rȩtarërea̧mi̧ japamȩde Jeova judi. Ado pio ju̧i̧iä jabechji̧, ma̧ chiadëri̧ cjiamȩrȩ darëremȩdejȩ jibëa̧ mu̧i̧tjoi̧ oa. Aja̧, pea buiua̧ toi̧mi̧ damȩ oa, dabu gaüri pio judiri buiua̧mȩ toi̧mi̧ da oa ma̧ chiadëri̧ cjiamȩrȩ darëremȩdejȩ, ütëpe jäa̧mȩ oa. Jabo a̧ro̧rȩ pio ju̧i̧ irä daea̧rä judi, chamacho chjacjiamȩ tjamo̧dëmi̧ da oa daea̧täreji̧ri̧rea̧ro̧jo̧ȩ. Pio ju̧i̧ irä daea̧rä judi, jabechji̧, pio ju̧i̧iäpȩmo̧ earea̧ taradëa̧täreji̧ri̧rea̧ro̧jo̧ȩ. Pio ju̧i̧iäpȩmo̧ daea̧ üdë, ma̧ chiadëri̧ cjiari̧ jo̧rȩta tänȩdëa̧täremȩdiibe.
Jeova pio judi na̧rȩrea̧ yürüpadidibe. Jabechji̧ iei̧ jini̧, pea ütëpea̧yi̧ pio jini̧, üi̧rȩ cja̧rȩmo̧ co ëba mo̧a̧dëa̧ iei̧ pio jini̧ bo maipanȩ. Ado arapanȩjȩ jibëa̧ ja oa. Ado Emanue quȩra̧ pio ju̧ri̧ra̧ quȩpajanȩjȩ. Aja̧, “Ütë tjamo̧ judi pio ibëdimȩde” yo̧mȩ quȩra̧ pio ju̧ri̧ra̧ quȩpajanȩjȩ. Aja̧, ja̧di ta̧rëri̧ go̧ȩpea̧ oa cjiade Go̧dü Tänȩmȩ pio ju̧i̧ chjiari.
Jabechji̧ Ütë tjamo̧ pio judi yürüa̧ oa cja̧rȩmȩrȩ ara̧ oa cjiapade pio ibë chjiari. Aja̧, joja pio ju̧i̧ yürüa̧ oa cjiapade pio ibë a̧dopea̧ oa. Ado Ütë tjamo̧ pio judi tänȩa̧ oa, tjamo̧ yo̧mȩrȩ cjo̧ro̧pade. Ado tjamo̧ yo̧mȩrȩ cjo̧ro̧pea̧mȩ oa, jabechji̧ chacjiamȩri̧ yo̧padiro̧jo̧ȩ pumȩ judiro̧ quȩ ji̧ra̧ra̧ quȩpami̧ dari̧. “Aja̧, a̧dë chjäte chjadëri̧ chi̧dëeamȩrenȩ, a̧dë chjäte ju chiamȩ Ütërenȩ” yo̧padiro̧jo̧ȩ. Ado “bucho ana̧mȩ Ama̧i̧renȩ” yo̧padiro̧jo̧ȩ peaja̧di. Ado ju̧i̧ uëri “goae tarari̧ cjo̧ro̧rea̧ yürümȩ pio judirenȩ” yo̧padiro̧jo̧ȩ peaja̧di. “Jabechji̧ aro̧rȩ chjadëri̧ cjo̧ro̧pea̧ oa, ibë eadëji̧ri̧ pio judiro̧ acji jana̧rea̧ dachea oa, a̧ro̧rȩ uapadëji̧ri̧rȩ cjo̧ro̧pea̧ oa jabo chjadëri̧ jida̧ oa cjo̧ro̧pea̧ oa, jabechji̧ chjadëri̧ cjo̧ro̧rea̧ yürümȩrenȩibe a̧ro̧rȩ chji̧ goae tjamo̧ra̧ jo̧rȩtaji̧ri̧rȩ cjo̧ro̧rea̧mi̧ dari̧" yo̧padiro̧jo̧ȩ.
Aja̧, Berȩ quȩmȩ bë ma̧ri̧ üdë peaja̧di Epjarata quȩmȩde. Juda quȩmȩ chiriräpȩde. Jabo Berȩ quȩmȩ bë ma̧ri̧ üdë bë ma̧ri̧ ana̧dëräbo, jabechji̧ ba chiade. Jabechji̧ pio jiro bë ma̧ri̧ boi̧chji̧ri pio judiri ma̧na̧padiibe tjamo̧ yo̧pamȩ judi, icharaita ja̧ Ütë pio judi. Aja̧, pearä judirä cjiarëremȩ pio judi, eami̧rȩ jabë tarupadëa̧rä cjiarëremȩ pio judi ma̧na̧padiibe pio jiro bë ma̧ri̧ boi̧chji̧ri pio judiri.
Ado Felipe quȩmȩ judi, ado Bartolomȩ quȩmȩ judi, ado Tomas judi, Jechurë chjadüa̧ oa cjia maeadirȩ peaja̧di. Ado Mateo judi, domano̧ ja̧ oa chëre oa boarëremȩ pio judiborë Jechurë chjadüa̧ oa cjiade. Ado Santiago judi, Apjeo quȩmȩ pio ju̧i̧ ja̧ joja pio judi, peaja̧di Jechurë chjadüa̧ oa cjiade. Ado Tadeo quȩmȩ pio judiborë chjadüa̧ oa cjiade.
Danȩrȩ, pumȩ ba chiadëde, jabomo̧ pio yoa chiririmȩde. Jabechji̧ Joche pio ju̧i̧ ja̧ jojade. Jabomo̧ to maeara̧ ja̧bepamȩ pio ju̧i̧ ja̧ jojade. Ado pio ju̧i̧ arayi̧ pio jini̧, jabechji̧ Maria quȩyi̧ pio jini̧nȩ. Ado pio ju̧i̧di ja̧ji̧ri̧ pio ji̧ri̧ chjiaribo dabarea̧rȩ. Danȩrȩ, Santiago ju̧i̧, ado Joche pio ju̧i̧, ado Chimeo̧ ju̧i̧, ado Juda ju̧i̧, ‘jabechji̧ pio judiro̧diro̧da’ quëna̧ dabarea̧ro̧jȩrȩ.
Ado pio ju̧i̧iä Nachare quȩmȩ bë ma̧ri̧räpȩ baärëreji̧ri̧dirȩ cjo̧ro̧pea̧ oa. Aja̧, Joche judi, Maria jini̧, ado Jechu judi ja̧dira̧ baärëreji̧ri̧dirȩ. Ado pio ju̧i̧iä tjamo̧i̧ cjiari̧ cjiadiärëremȩde ma̧ȩ üdë, Ütërë ea jana̧ chjadüa̧ oa ni̧bämȩ pio judi jabërä ni̧bärërea̧ ma̧ȩ üdë. Jabechji̧ ja̧di ta̧rëri̧ yo̧rëremȩde: "'Aja̧, Nachareri pio judirimȩde’ yo̧eji̧ri̧dirȩ pumȩ judiro̧ pio ju̧i̧ chjiari.” Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë jabërä Jechu pio ju̧i̧ chjiari, judi Nachareri pio judirimȩ pio ju̧i̧ chjiari. Ado pio ju̧i̧iä pio ju̧ri̧pȩ baärëremȩde Joche judi jibëa̧ pumȩ pio ji̧ri̧ nö̧ta.
Danȩrȩ, pio jiro üi̧ pio ju̧i̧ chjiari dabarea̧rȩ jabo. Jabomo̧ tora̧ ja̧bepamȩde pio judide. Maria joja pio judide. Ado ju̧i̧di ja̧ji̧ri̧ pio ji̧ri̧ peaja̧di dabarea̧ro̧jȩrȩ. Santiago pio ju̧i̧, Joche pio ju̧i̧, Juda pio ju̧i̧, Chimo̧ pio ju̧i̧ daba marea̧ro̧jȩrȩ. Ado ju̧i̧di ja̧ji̧ri̧ pio jini̧ro̧borë pio yoaiäpȩ cjo̧ro̧ni̧rȩ —yo̧rëreji̧ri̧dirȩ. Jabechji̧ Jechu ja̧ pumȩ judiro̧, 'Jabo cjäri̧ madida, pio ibë a̧ra̧ano̧rea̧mi̧dëdida, ba chiadëdida' quëna̧ jo̧rȩtaji̧ri̧rȩ badë darëreji̧ri̧diro̧jo̧ȩ, pio ju̧i̧iäpȩmo̧ quëna̧dëri̧ cjiaji̧ri̧rȩ.
Ado Joche judi Davirea̧ pio judiri ja̧mȩ tara, jabechji̧ jäpea̧ chiarëremȩde Berȩ quȩmȩ bë ma̧ri̧räpȩ, Judea quȩmȩ chirirä cjiamȩ bë ma̧ri̧räpȩ ju̧ri̧. Jabechji̧ pio ju̧ri̧ cjo̧ro̧rëremȩde Davi quȩmȩrea̧ pio judi, jibëa̧ tarurea̧ pio judi. Ado pio ju̧i̧iä Joche judi Nachare quȩmȩ bë ma̧ri̧ri pio judiri go̧dümȩrȩ järëremȩde, Garirea quȩmȩ chiriri go̧dümȩrȩ.
Ado Jechu ja̧ ama̧i̧ judiro̧ pio ju̧i̧ daea̧ ji̧, peaja̧di ana̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧, ya yabë cjiami̧ dari̧. Ado ju̧i̧ arayi̧ pio jini̧ iëno̧ë ta̧rëa̧nȩjȩ: —Danȩ ca̧ ja, ¿tjana̧ japea̧renȩibe? Ana̧ri̧ jo̧rȩta tänȩa̧renȩibe. Jabechji̧ bücjüri̧ cjia tjamo̧ji̧ri̧rȩ na̧tareji̧ri̧rea̧ro̧mȩ, odai̧ dari̧ cjiaji̧ri̧rȩ —yo̧a̧nȩjȩ.
Ado ja̧dëa ji̧ Jechu judi taruparea̧ ma̧ȩra̧ pio ju̧ri̧ra̧ tarupamȩrȩ ana̧ri̧ ni̧bä chjaorëremȩdejȩrȩ Ütërë go̧ȩpa tänȩrërea̧ ma̧ȩ pio ju̧i̧. Jabechji̧ Moicherea̧rȩ go̧ȩparërea̧ ma̧ȩ pio judiri yurori Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩpea̧rä yuro ana̧ri̧ ni̧bä chjaorëremȩdejȩrȩ pio jȩa chjiari. Tjamo̧ davä. Pio jȩa chjiari go̧ȩpea̧ oa cjiarëremȩ ma̧ȩ chjö̧na̧i̧ oa chjadëri̧ a̧ra̧ano̧rëremȩdejȩrȩ areiami̧ dari̧, judiro̧ pio jȩa chjiari chjadëri̧ dabarea̧mi̧ dari̧.
Ja̧dëa ji̧ Jechu judi yo̧a̧dejȩrȩ: —Danȩrȩ, cüdë pio dibë pearä yo̧rërea̧ pio ju̧i̧ ado chjereno̧ ni̧bä chjaotämi̧ cjiarequededibe —yo̧a̧dejȩrȩ—. Danȩrȩ, pio coa chjiari jabërä go̧ȩparërea̧ ma̧ȩ pio judi chjö̧na̧i̧rȩ tjamo̧i̧padäräa̧ oa cjiapea̧ chia maeade, a̧dë cjiadiärea̧ decjiari̧. Tjamo̧ davä. Moicherea̧rȩ go̧ȩparërea̧ ma̧ȩ pio judiri yurori Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩpea̧rä yuro cjiamȩ ma̧ȩ pio judi, jabechji̧ tjamo̧i̧padäräa̧ oa cjiapea̧ chia maeade. Ado Go̧a̧rea̧ ma̧ȩ pio judi peaja̧di tjamo̧i̧padäräa̧ oa cjiapea̧ chiade —yo̧rëremȩdejȩrȩ.
Ado Jechu judi 30 ui goamȩpea̧rä, taruparëremȩde pumȩ pio ji̧ri̧ a̧ra̧ano̧pea̧ ji̧. Ado pumȩ judiro̧ Jechu pio ju̧i̧ chjiari ni̧bäa̧rä, 'Aja̧, Joche pio ju̧i̧ ja̧ jojadida, pio judi nö̧ria̧diji̧da' quëna̧ jo̧rȩta marëreji̧ri̧dirȩ, oëra̧ jo̧rȩtaji̧ri̧rȩ. Jabo judiro̧ oëra̧ jo̧rȩta̧räbo, jabechji̧ jabomo̧ ütëparȩrëremȩdejȩ Joche judi. Nö̧ridërëremȩdejȩ. Ado Joche judi, jabechji̧ Eri quȩmȩ pio ju̧i̧ ja̧ jojarëremȩde.
Ado pumȩ judiro̧ Jechu pio ju̧i̧ chjiari pearä ni̧bä chjaoa̧ ji̧, jabechji̧ chjacjiamȩri̧ ni̧bä marëreji̧ri̧dirȩ pio ju̧i̧ chjiari. Aja̧, jibëa̧ ma̧ȩ oa goae tjamo̧ oa ta̧rëa̧ oaiä, pio jibë a̧domȩ ma̧ȩ oa ta̧rë ja̧boa̧ oaiä, jabechji̧ chjacjiamȩri̧ ni̧bärëreji̧ri̧dirȩ, dacho bëremi̧ cjiami̧ dari̧ jo̧rȩtaji̧ri̧rȩ. Jabo ja̧dëa ji̧ o judiro̧, cjäri̧ madiro̧jo̧ȩ, ano̧ mire jo̧rȩtaji̧ri̧pea̧ji̧ri̧rȩ ja̧di ta̧rëri̧ iëno̧ë ta̧rërëreji̧ri̧dirȩ Jechu pio ju̧i̧ chjiari: —Jabo pio jiromȩ üdë, ¿jabechji̧ Joche quȩmȩ pio ju̧i̧ ja̧ jojadëde? Dëdë, pio judide. Ado dabarea̧ro̧jo̧ȩ. Jabo cjäri̧ made jabo, ¿yö̧ta dari̧ dabamȩpea̧de? —yo̧a̧dirȩ. Aja, ja̧di ta̧rëri̧ yo̧ji̧ri̧rȩ ni̧bäji̧ri̧pea̧dirȩ pumȩ judiro̧ Jechurë ütëparërea̧räpȩ cjo̧ro̧ji̧ri̧ pio judiro̧, judi boi̧chji̧rä cjo̧ro̧rërea̧räpȩ cjo̧ro̧ji̧ri̧ pio judiro̧.
Danȩrȩ, Jechu ja̧ jadü judiro̧ orë ji̧mo̧ cjiarëreji̧ri̧dirȩ pio jiro tjaräpȩ. Aja̧, Pedro judi pio ju̧ri̧pȩrëremȩde. Ado Toma judi, peaja̧di Chjara quȩmȩ pio judi peaja̧di tjaräpȩrëremȩde. Ado Natanera judi, Garirea chiririmȩ pio judi, Cana bë ma̧ri̧rimȩ pio judi peaja̧di pio ju̧ri̧pȩrëremȩde. Ado Chebedeo ja̧ u̧ri̧ yo̧a̧ri̧borë pio ju̧ri̧pȩrëreji̧ri̧dirȩ peaja̧di. Ado ji̧ri̧ uëri ado cja̧rȩmo̧ jadü yo̧a̧ri̧rȩ cjiarëreji̧ri̧dirȩ peaja̧di. Aja̧, pio judiro̧rëreji̧ri̧dirȩ tjaräpȩji̧ri̧ judiro̧
Ado jibëa̧ dëbëti̧ra̧ chia yo̧rëreji̧ri̧dirȩ: —Cjäri̧ made, oëra̧ yo̧diibe pio yüdëje. Jabechji̧ dabarea̧ro̧jo̧ȩ. Jechu pio judide. Joche joja pio judide. ‘Pio judiro̧ nö̧ria̧diro̧ju̧i̧da’ quëna̧ dabarea̧ro̧jo̧ȩ. Jabomo̧ pumȩde. Pio ju̧i̧iä ja̧di dari̧ yo̧rea̧mi̧dëde. Aja̧, “A̧dëri biramȩ pio judirequede” yo̧rea̧mi̧dëde —yo̧a̧dirȩ.
Ado Jechu judi oëra̧ti̧ oa mire damȩrȩ pumȩ buba tjamo̧ oa darëremȩdejȩrȩ, pio jȩaiäpȩmo̧ jana̧ji̧ri̧ oa. Ado pio ju̧i̧iä iëno̧ë ta̧rëa̧dejȩ jibëa̧ jadü oa, Pjeripe quȩmȩ pio ju̧i̧: —Danȩ, pio jiro pumȩ bubarë cha̧pe oa chjadëri̧ jurapea̧ oa, ¿tjana̧räpȩ gatërea̧ daparea̧rȩ? Chjadëri̧ yo̧coe —yo̧a̧dejȩ.
Ado Pjeripe judi dëbë yo̧a̧dejȩ: —Cjäri̧ marea̧rȩ, japarea̧ decjiade —yo̧a̧dejȩ—. Pumȩ ji̧ra̧ tjamo̧dirȩ. A̧ro̧rȩ 200 chëre ba chia oa goarä judibo, jabechji̧ nö̧tadëtäremȩde. Jabechji̧ pumȩ ütëborë piodai̧ maea oa jurapea̧ ji̧ nö̧tadëtäremȩde. Ado pio ju̧i̧iä jabechji̧, japarea̧ decjiade —dëbë yoa̧dejȩ.
Ado Ütë tjamo̧ judi Jechu ju̧i̧ mitëa̧ pio ju̧i̧ chjiari, Nacharerimȩ pio ju̧i̧ mitëa̧ pio ju̧i̧ chjiaribo peaja̧di daba jironȩrȩ. Ado Ütë tjamo̧ judi mitëa̧ pio ju̧i̧ yürüa̧dejȩ Tjo tjamo̧ pio ju̧i̧, jauëchjarea̧bo. Ado pio ju̧i̧iä judi oëra̧ti̧ oa tai̧a̧ ji̧, jabechji̧ chjadëri̧ japariämȩrȩ tai̧rëremȩde, yaröca chiaji̧ri̧ pio ji̧ri̧ chjadëri̧ chjaparȩmȩrȩ, yaröca pio ji̧ri̧iä conȩda̧ oa cjiaji̧ri̧ pio ji̧ri̧ chjadëri̧ a̧domȩrȩ. Jabechji̧ Ütë tjamo̧ pio judi ji̧dë ma ëba cjiarëremȩdejȩ. Ado pio ju̧i̧bo daba jironȩrȩ —yo̧a̧dejȩrȩ Pedro judi.
Ado yaba̧ chjadëri̧ ta̧rëchji̧coe. Jabechji̧ ca̧ oti̧ ji̧ri̧, Icharai pio judiri ja̧ maea oa ni̧bä chjaorequededibe —yo̧a̧dejȩrȩ Pedro judi—. Danȩrȩ, Ütë tjamo̧ pio judi jauëchja cjiari̧ jape chjaorëremȩde Jechu pio ju̧i̧iä, Nachareräpȩ cjo̧ro̧rëremȩ pumȩ pio ju̧i̧iä. Aja̧, dibëa̧ chjarerämȩ pio ju̧i̧iä ana̧ri̧ na̧rȩmȩrȩ jauëchja cjiari̧ jape chjaorëremȩde pio dibë chjadëri̧ na̧rȩpea̧ oa, pio dibë chjadëri̧ daba tänȩpea̧ oa. 'Aja̧, Jechu pio judidida, Ütë tjamo̧ judi mitëa̧ pio judidida, Ütë tjamo̧ judi chjadüa̧ pio judi tjamo̧dida' quëna̧rea̧mi̧ dari̧ ana̧ri̧ na̧rȩa̧didibe davä ütëbo ja̧ dachoro.
Ado Pablo judi cjiadiädëmȩrȩ ja̧di ta̧rëri̧ yo̧mȩrȩ a̧de ni̧bä chjaorëremȩdejȩ: —Danȩ ca̧ ütë, cüdë pearä judi ca̧ chji̧ra̧ jo̧rȩtarërea̧ ji̧, 'jabechji̧ cüdë nö̧tarä yuro dëbëpe chjaomi̧ dari̧ japatäremȩquiji̧ri̧da, Nacharerimȩ pio ju̧i̧iäpȩmo̧ quëna̧ji̧ri̧ pio ji̧ri̧ conȩdatäremȩquiji̧ri̧da' quëna̧ jo̧rȩtamȩrȩ cjo̧ro̧rëremȩrequede.
Sanasan