Juan 1:3 - Biblia Pume

³ Ado Ma̧ȩ quȩmȩ pio ju̧i̧iä chjö̧na̧i̧ oa pareaparëremȩde Ütë tjamo̧ judi. Jabechji̧ pio judi pareapadëa̧rä judi, eami̧ti̧ üdë cjiadë matäremȩde. Eami̧ cjo̧ro̧mȩ üdë cjo̧ro̧rea̧ chiadëtäremȩde.

Juan 1:3 Iomraidhean Croise

Taruparea̧ Ma̧ȩ 1:1

Pearä judirä Ütë tjamo̧ judi chjö̧na̧i̧ oa tarupë pareaparërea̧ ji̧, pareaparëremȩdejȩ a̧dë oa. Dabu oa peaja̧di pareaparëremȩdejȩ.

Taruparea̧ Ma̧ȩ 1:26

Ja̧dëa ji̧ ja̧di ta̧rëri̧ yo̧rëremȩde Ütë tjamo̧ judi: “Aja̧, pumȩ pio ji̧ri̧ pareapatäro̧jȩrȩ yaba̧. Jabechji̧ pio a̧ro̧rȩmi̧ dari̧ pareapatäro̧jȩrȩ." Ado 'pareapatäro̧ji̧ri̧da' quëna̧ jo̧rȩtamȩrȩ pareaparëremȩdejȩrȩ Ütë tjamo̧ judi, Tjarari̧rȩ. Ado pumȩ ji̧ri̧ pareapea̧ ji̧, ‘Aja̧, pumȩ pio judiro̧ chiri tjamo̧ cjo̧ro̧ji̧ri̧rȩ cjo̧ro̧padiro̧da, pio cüdë yürüa̧ oa chiri ütë cjo̧ro̧ji̧ri̧rȩ cjo̧ro̧padiro̧da, ado pio ju̧i̧iä chirirä cjo̧ro̧ji̧ri̧ pio judiro̧ pumȩ ja̧ chja̧oerä cjo̧ro̧padiro̧da, coë jäji̧ri̧ judiro̧, pua judiro̧, ado cho̧ judiro̧ pio ji̧ri̧ ja̧ chja̧oerä cjo̧ro̧padiro̧da, pio cüdë tänȩa̧ oa pumȩ ja̧ chja̧oerä cjo̧ro̧padiro̧da’ quëna̧ jo̧rȩtamȩrȩ yo̧rëremȩde Ütë tjamo̧ judi.

Ichaia 45:18

Jeoava judi, Ütë tjamo̧ pio judide. Ado a̧dë oa, dabu oa pareaparëremȩdejȩ. Chjö̧na̧i̧rȩ chjadëri̧ cjiarea̧mi̧ dari̧ pareaparëremȩdejȩ. Jabechji̧ pumȩ judiro̧ cjo̧ro̧rea̧mi̧dë oa pareapadëa̧dejȩ jabo chjadëri̧ cjo̧ro̧rea̧mi̧ da oa pareaparëremȩdejȩ chjadë oa, chjadëri̧ ütara̧ oa cjia oa, oëra̧ cjiadë maea oa. Jabechji̧ ja̧di ta̧rëri̧ yo̧de Jeova judi: Aja̧, Jeova pio judirequede. Ado cja̧rȩmo̧ decjiade.

Juan 1:10

Jabo cjäri̧ madiro̧jo̧ȩ, tatami̧ damȩ pio judi pio yoa chirirä cjiaräbo, Ütë tjamo̧ judi pio ju̧i̧iä chjö̧na̧i̧däräti̧ oa pareapea̧räbo, jabechji̧ pio yoa chirirä cjo̧ro̧ji̧ri̧ judiro̧ quëna̧ dadëa̧diro̧jo̧ȩ. ‘Pio judidida’ quëna̧ dadërëreji̧ri̧diro̧jo̧ȩ.

Juan 1:2

Ado pio judiborë Ütë tjamo̧ tara, jabechji̧ Ütë tjamo̧ pio ju̧i̧ nö̧ta ëba cjia marëremȩdejȩ pearäri ja̧.

Cori̧tio Ma̧ȩ 1 8:6

‘jabechji̧ cja̧rȩmȩ Ama̧i̧ Ütë pio judimo̧dida’ quëna̧ dabarea̧rȩ ca̧ oti̧. Ado danȩrȩ, pio jiro Ütë pio ju̧i̧iä chjö̧na̧i̧rȩ taruparëremȩde. Ado pio ju̧i̧iämo̧i̧ cjo̧ro̧rea̧ darea̧rȩ. Pio ju̧i̧ ja̧ maea oa cjo̧ro̧rea̧rȩ, pio ju̧i̧iäpȩmo̧ ma chjacjiamȩri̧ jo̧rȩtapea̧ oa. Aja̧ ca̧ oti̧, o judiro̧ jibëa̧ ütë ji̧ra̧ oa quëna̧räbo, ‘jabechji̧ Ama̧i̧ Ütë pio judimo̧dida’ quëna̧ dabarea̧rȩ, tjamo̧ri̧ dabaji̧ri̧rȩ. Ado Ano̧mȩ cja̧rȩmȩ maea oa quëna̧rea̧ro̧jo̧ȩ peaja̧di. Jabechji̧ o judiro̧ jibëa̧ ano̧ji̧ri̧mi̧ da oa goaräbo, 'jabechji̧ Ano̧mȩ Jechu Quiricho pio judimo̧dida' quëna̧ dabarea̧ro̧jo̧ȩ, tjamo̧ri̧ dabaji̧ri̧rȩ. Jabechji̧ Ütë tjamo̧ pio judi tänȩa̧ oa chjö̧na̧i̧rȩ pareapea̧ oa cjiarëremȩde pio ju̧i̧iä. Ado pio ju̧i̧iä cjo̧ro̧rea̧ peaja̧ oa daea̧rea̧rȩ. Tjamo̧ davä. Pio ju̧i̧iä taruparëremȩ üdë ma̧na̧diibe yaba̧ a̧ro̧rȩ peaja̧ri̧ cjo̧ro̧rea̧mi̧ dari̧.

Epjecho Ma̧ȩ 3:9

Jabo danȩrȩ ca̧ oti̧, jënȩ urëdi tjamo̧ oa jo̧rȩtarërea̧ pio ju̧i̧ chjiaribo daba tänȩtämi̧ cjiarëremȩde pio coaiä. Jabechji̧ chjö̧na̧i̧ti̧ oa Pareapamȩ Ütë judi pearä judirä ütarë jo̧rȩtarërea̧ ji̧, jabechji̧ quëna̧paji̧ri̧ pio judiro̧ ütëborë cja̧rȩmȩ pumȩ mape bagatä eamȩrȩ jo̧rȩtarëremȩde judio pio ji̧ri̧ chjiari, judiodë pio ji̧ri̧ chjiaribo. Jabo judi jo̧rȩtarërea̧ üdë goadia̧ oa cjiarëremȩde pearä judi. Tjamo̧ davä. Judi pearä ütarë jo̧rȩtarërea̧ üdë goadia̧ oa cjiarëremȩde, jabo yaba̧ pio coaiä daba tänȩa̧ oa cjiade. Pio coaiä ana̧ri̧ ni̧bäa̧ oa cjiade. Tjamo̧ davä. Ütërë jo̧rȩtarërea̧ üdë, pumȩ judiro̧ yo̧a̧ri̧rȩ cja̧rȩmȩ pumȩpe bagapea̧ pio ju̧i̧ chjiari jo̧rȩtarërea̧ üdë ana̧ri̧ daba tänȩa̧ oa cjiade. Ado pio ju̧i̧iä yaba̧ pumȩ judiro̧ ütëborë daea̧ oaiä, ëna̧diäa̧ oa a̧dopaji̧ri̧ pio ji̧ri̧ daea̧ oaiä, jabechji̧ ana̧ tjamo̧ri̧ jo̧rȩtaji̧ri̧rȩ dadiro̧jo̧ȩ. Tjamo̧ davä. Pumȩ judiro̧ ütëborë a̧dopaji̧ri̧ pio ji̧ri̧ daea̧ oaiä, ado a̧dëräpȩ tjamo̧ yo̧ji̧ri̧ pio judiro̧borë daea̧ oaiä, tjo maearë jauëchja pio judiro̧ daea̧ oaiä, jabechji̧ ana̧ tjamo̧ri̧ jo̧rȩtaji̧ri̧rȩ dadiro̧jo̧ȩ. Tjamo̧ davä. Judiro̧ ëna̧diäa̧ oa a̧dopaji̧ri̧ pio ji̧ri̧ daea̧ oaiä, 'chia chia, Ütë tjamo̧ pio judi a̧dë chjäte urëdi tjamo̧ oa jo̧rȩtarea̧ chiadida, ëna̧diäa̧ oa a̧dopaji̧ri̧ pio ji̧ri̧ chjiari chjadë tjamo̧ri̧ ütarë jo̧rȩtarëremȩdida' quëna̧ jo̧rȩtaji̧ri̧pea̧diro̧jo̧ȩ.

Ebereo Ma̧ȩ 11:3

Danȩrȩ, a̧ro̧rȩ quëna̧ pio oaiä na̧e chiapea̧rea̧rȩ Ütë tjamo̧ judi pareapea̧ pio ju̧i̧ chjiari. Aja̧, judi dabu oa, a̧dë oa jibëa̧ ma̧ȩra̧ pio ju̧ri̧ra̧ pareaparërea̧ pio ju̧i̧ chjiari, dëdë, na̧e chiapea̧rea̧rȩ. Jabechji̧ ibëa̧ dachora̧ irä darea̧mi̧dë maeara̧ pio ju̧ri̧ra̧ pareapea̧ duri pio ju̧i̧ irä darea̧ro̧jo̧ȩ yaba̧.

Juan Ma̧ȩ 1 5:1

Eami̧ pumȩ üdë Jechu pio ju̧i̧ chjiari quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Tjamo̧ davä. Eami̧ pumȩ üdë coëma cjiari̧ quëna̧rä judi, ‘Aja̧, Jechu judi Ütërë mitëa̧ Chjätä Tänȩmȩ pio judi tjamo̧dida, Ütë tjamo̧ judi a̧dëri pio judiri chjadürërea̧ pio judi tjamo̧dida’ quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Ado danȩrȩ ca̧ oti̧, a̧ro̧rȩ ju̧i̧ ea tjamo̧rä judi, ibë ado nö̧ria̧ oa cjia tänȩa̧mȩ pio ju̧i̧ ea tjamo̧rä judi, peaja̧di ea tjamo̧rea̧ro̧jȩrȩ ado nö̧ria̧ oa cjiaji̧ri̧ pio ji̧ri̧iäpȩmo̧.

Jechurë Na̧rȩrërea̧ Ma̧ȩ 3:14

Ja̧dëa ji̧ coa ni̧bämȩ judi, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Daodichea quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Aja̧, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, ‘Ja̧ditäde’ quȩmȩ pio judirequede. Pio coaiä tjamo̧i̧ cjiari̧ cjiade Ütë tjamo̧ ja̧ ma̧ȩ üdë. Pio judi yo̧a̧mi̧ japadärämȩrequede a̧dë chiquirea̧ decjiari̧. Jabechji̧ judi pearä judirä pareaparërea̧ üdë pio coaiämo̧i̧ taruparëremȩde. Ado pio judimȩrȩ ma̧ȩ yürürequededibe.

Jechurë Na̧rȩrërea̧ Ma̧ȩ 4:11

—Ibëa̧ Ütë, ibëa̧ Ano̧mȩrenȩ —go̧a̧diro̧jo̧ȩ—. Pio mȩaiäpȩmo̧ ma chjacjiamȩri̧ jo̧rȩtarea̧mi̧ dade. Pio mȩaiäpȩmo̧ ma̧ chjacjiamȩri̧ ni̧bärea̧mi̧ dade. Tjamo̧ davä. Ba chia jo̧rȩtarea̧ro̧mȩ ‘a̧dë chjäte ju chiamȩdida’ quëna̧ jo̧rȩtaji̧ri̧rȩ. Pio mȩnȩmo̧renȩ chjö̧na̧i̧ oa pareapamȩ judi. Ado pio mȩnȩ pearä judirä ütarë jo̧rȩtarërea̧ oaiä pareapea̧ oa cjia maeade. Ado pio mȩaiämo̧i̧ quirë baä quirë baä cjiarea̧ dadirȩ cjo̧ro̧ji̧ri̧ judiro̧. Aja̧, na̧ jauëchja̧rämo̧ cjo̧ro̧rea̧ dadirȩ. Aja̧, ja̧di ta̧rëri̧ go̧a̧reji̧ri̧diro̧jo̧ȩ Ütë tjamo̧ pio ju̧i̧iäpȩmo̧, tjamo̧ yo̧ji̧ri̧ judiro̧, 24rë.