Jabo danȩrȩ, ja̧di dari̧ ja̧botä earëremȩdejȩ Jeova judi. Gito ana̧ri̧ jo̧rȩtariä ja̧botä earëremȩdejȩ. Jabechji̧ Jeova judi ütarë jo̧rȩtarërea̧mi̧ ja̧bo tänȩrea̧ yürürëremȩdejȩrȩ, pumȩ ütëbodärärë duridëparȩa̧ oa cjiapea̧ oa, judiro̧ chjai̧dëri̧ japea̧ üdë duridëparȩa̧ oa cjiapea̧ oa. Aja̧, pio ju̧i̧iä ja̧bo tänȩrea̧ yürürëremȩdejȩrȩ. Jabechji̧ pio judiri ja̧mȩ pio ju̧i̧ cja̧rȩmȩ oa ëbadërërea̧ ji̧, jibëa̧ pumȩ no̧i̧dë tjamo̧ oa ëbamȩrȩ cjo̧ro̧mȩpe bagapade jënȩ pumȩ pio ji̧ri̧ chjiari ano̧ mire ja̧boa̧ pio ju̧i̧iä. Jabechji̧ Jeova judi pearä judi ütarë jo̧rȩtarërea̧ üdë coëma cjiari̧ cjiadiärëremȩde jibëa̧ mu̧i̧tjoi̧ pio ju̧i̧iä, o ji̧ri̧ chjiari ano̧ mire ja̧boa̧mȩ pio ju̧i̧iä.
Juan 1:29 - Biblia Pume29 Ja̧dëa ji̧ dopea̧rä Juan judi darëremȩdejȩ Jechu ju̧i̧ pio jȩaiäpȩmo̧ jana̧mȩ oa. Ado pio ju̧i̧ damȩrȩ ja̧di tärëri̧ yo̧rëremȩdejȩrȩ pumȩ ji̧ri̧: —Dachji̧jo̧ȩ —yo̧a̧dejȩrȩ—. Pio yüdëje Ütë tjamo̧ ja̧ oveja pëi̧ chjami̧ dade. Jabechji̧ Ütë tjamo̧ judi chjadürëremȩdejȩ ovejami̧ dari̧ ja̧bopea̧ oa, pumȩ judiro̧ chjai̧dëri̧ japea̧ üdë duridëparȩa̧ oa cjiapea̧ oa. Dachji̧jo̧ȩ —yo̧a̧dejȩrȩ—. Faic an caibideil |
Juan 1:29
65 Iomraidhean Croise
Ado Jeova ja̧ mu̧i̧tjoi̧ üdë, coëma cjiari̧ cjo̧ro̧mȩ mu̧i̧tjoi̧ pio judi, jabechji̧ gito ana̧ri̧ conȩda̧ oa cjia ëte, o ji̧ri̧ chjiari ano̧ mire ja̧bo ëte, jabechji̧ a̧dë chjäte ma̧ chiadëri̧ cjiamȩrȩ cjo̧ro̧mȩpea̧de. Aja̧, ma̧ chiadëri̧ cjiamȩrȩ cjo̧ro̧mȩpea̧de ja̧di dari̧ jo̧rȩtamȩrȩ: 'Aja̧, badëri̧ conȩda̧ oa cjiadëa̧quëda, badëri̧ ja̧bodëa̧quëda jabo jabechji̧ pumȩ ja̧ chjai̧dë oa tuti aramȩrȩ ja̧boa̧quëda, judiro̧ cja̧rȩmȩ co chjai̧dëri̧ japadëji̧ri̧mi̧ dari̧ cjiadiäpea̧ oa ja̧boa̧quëda, jabechji̧parȩa̧ oa cjiadiro̧da yaba̧, pio ju̧i̧iä ma̧ chiadëri̧ cjia tjamo̧quëda' quëna̧ jo̧rȩtarëremȩde.
Danȩrȩ, ma̧i̧ dari̧ conȩda̧diro̧jo̧ȩ. Goae tjamo̧dëri̧ ya̧e chjaoa̧diro̧jo̧ȩ. Jabo judiro̧ ja̧di dari̧ japea̧räbo, jabechji̧ ba dëbë ya̧dëa̧dejȩrȩ. Ba dëbë ërecjiadëa̧dejȩrȩ. Jabechji̧ cjapiri̧ cjiarëremȩde ovejami̧ dari̧. Danȩrȩ, oveja üdë ja̧bobea yaboi̧, cjapiri̧ cjiade. Ado jibëa̧ cö̧ oa täa̧ ji̧, peaja̧di cjapiri̧ cjiade. Ado peaja̧di dari̧ cjiarëremȩde Jeova ja̧ mu̧i̧tjoi̧ üdë. Cjapiri̧ cjiarëremȩde ma̧i̧ dari̧ conȩdaräbo.
Jabechji̧ üi̧ boi̧ oa arapanȩjȩ. Ado üi̧ boi̧ pio ju̧i̧, jabechji̧ Jechu yo̧mȩ quȩra̧ pio ju̧ri̧ra̧ quȩpatä earequedemȩ. Jabechji̧ ja̧di dari̧ quȩpajo̧ȩ pio judimo̧ tara. Tjamo̧ davä. Pio judimo̧i̧de Chjätä tänȩpamȩ judi. Pio judimo̧i̧de jibëa̧ pumȩ ji̧ri̧ chjätä tänȩpamȩ judi, pio judiro̧ chjai̧dëri̧ japea̧ ba oa bape chjaoa̧ oa cjiachea oa.” Aja̧ ja̧di ta̧rëri̧ ni̧bämȩ oa ta̧rërëremȩdejȩ Ano̧mȩ ja̧ mu̧i̧tjoi̧ pio ju̧i̧ Joche judi.
Danȩrȩ, pio coa cho̧rëdiä matäreji̧ri̧renȩro̧coe, Pumȩrȩ Ara̧ Tjamo̧ pio ju̧i̧. Ado cüdë a̧dëri pio judiri birë ma̧na̧rä, jabechji̧ pumȩ pio judiro̧ ca̧ mu̧i̧tjoi̧mi̧ da maearë cjo̧ro̧pea̧ oa birë ma̧na̧dërëremȩrequede. Pio judiro̧ coa ji̧dë ma a̧dopea̧ oa birë ma̧na̧dëa̧requede, jabo jabechji̧ pio ji̧ri̧ ja̧ mu̧i̧tjoi̧mi̧ dari̧ cjo̧ro̧pea̧ oa birë ma̧na̧requede cüdë. Tjamo̧ davä. Pio ji̧ri̧ chjadëri̧ a̧dopea̧ oa birë ma̧na̧requede. Ado pio ju̧i̧iä ca̧ icjara pio ju̧i̧ yürüparequede pumȩ ja̧ oa. Tjamo̧ davä. Pumȩ pio ji̧ri̧ chjiari ano̧ mire ja̧bopea̧ oa, pio judiro̧ chjai̧dëri̧ japea̧ pio ju̧i̧ chjiari tuti ba ano̧a̧ cjiapea̧ oa, jabechji̧ ca̧ icjara oa yürüparequede —yo̧a̧dejȩrȩ. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi Ütë tjamo̧ pio ju̧i̧ ja̧ mu̧i̧tjoi̧mi̧ dari̧ cjo̧ro̧pea̧ pio ju̧i̧ chjiari.
Ado Jechu judi Natanera quȩmȩ pio ju̧i̧ nö̧ta ni̧bä chjao ëte, yo̧a̧ri̧ do chjätä ëte, pumȩ no̧i̧dërë a̧doparëreji̧ri̧dirȩ Cana quȩmȩ bë ma̧ri̧räpȩ ju̧ri̧, Garirea quȩmȩ chiriräpȩ cjiamȩ bë ma̧ri̧räpȩ ju̧ri̧. Jabechji̧ üi̧ judi jibëa̧ iei̧ ji̧ ëba̧ oaiä a̧doparëreji̧ri̧dirȩ, airi̧ cjia ëba juraji̧ri̧rȩ. Ado Jechu ju̧i̧ arayi̧ pio jini̧borë a̧doparëreyi̧nȩ.
Jabechji̧ Ütë tjamo̧ judi pumȩ ütëbodärä oa ea tjamo̧ tara, tuti yürürëremȩdejȩ jibëa̧ Ja oa pumȩ pio ji̧ri̧ chjiari ano̧ mire ja̧bopea̧ oa. Yo̧a̧ri̧ oa ëbadëmȩborë chjadürëremȩdejȩ, pio ju̧i̧mo̧i̧ ëbamȩrȩ. Ado eami̧ pumȩ judi, pio ju̧i̧iäpȩmo̧ quëna̧mȩ judi, jabechji̧ bucho ana̧ cjo̧ro̧rea̧ dapade aeno̧rea̧ decjiari̧.
Ado jënȩro̧ quëna̧ duri oa yo̧a̧diro̧jȩ iei̧ ji̧iäpȩmo̧: —Damȩ, quëna̧ji̧ri̧pea̧a̧ro̧ yaba̧. Pio mȩaiä ta̧rë ëte jabo tocoi̧mi̧ quëna̧ji̧ri̧pea̧a̧ro̧. Jabo yaba̧, Jechu pio ju̧i̧ irä ta̧rëa̧ oaiä tjamo̧ri̧ quëna̧ji̧ri̧pea̧a̧ro̧. Jabechji̧ yaba̧ tjamo̧ri̧ dabaa̧ro̧ju̧i̧. ‘Aja̧, dai chirirä cjo̧ro̧ji̧ri̧ pio ji̧ri̧ ja̧ Chjätä Tänȩmȩ pio judi tjamo̧dida’ quëna̧ dabaa̧ro̧ju̧i̧, tjamo̧ri̧ quëna̧ji̧ri̧rȩ. Aja̧, ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jȩ iei̧ ji̧iäpȩmo̧ Jechu ju̧i̧ pea quëna̧ji̧ri̧ judiro̧ Chamariaräpȩ ju̧ri̧.
Ado pio jiro chja̧pe pio judirequede cüdë. Tjamo̧ davä. A̧dëri ja̧ chja̧pe pio judirequede. Bucho ana̧ cjo̧ro̧rea̧ yürümȩ chja̧pe pio judirequede. Ado eami̧rȩ pio yoa chja̧pe oa jurarä judi, jabechji̧ bucho ana̧ cjo̧ro̧pade —yo̧a̧dejȩrȩ—. Ado danȩrȩ, pio jiro chja̧pe üdë ca̧ go̧a̧ pio judide. Ado ca̧ go̧a̧ pio ju̧i̧ yürürequededibe mȩnȩro̧ jurapea̧ oa. Jabechji̧ yürürequede ca̧ icjara oa pumȩ judiro̧ ütëbodärärë bucho ana̧ cjo̧ro̧rea̧ dapea̧ oa —yo̧mȩrȩ ni̧bä chjaorëremȩdejȩrȩ Jechu judi ma̧ȩ go̧a̧ti̧ oa.
Jabechji̧ Moicherë go̧ȩparërea̧ ma̧ȩ pio ju̧i̧iä duridëparȩrea̧ dadërëreji̧ri̧rea̧rȩ. Pio jiro ma̧ȩ oaiä jare chjadüa̧ oa cjiami̧ dari̧ cjiarea̧ dadërëreji̧ri̧rea̧rȩ. Jabo eami̧ pumȩ üdë Jechu pio ju̧i̧iä quëna̧rä judi, jabechji̧ chjätärea̧ dapade, jare chjadürea̧mi̧ dari̧. Aja̧, ërecjiarea̧ decjiaräpȩ cjo̧ro̧rea̧ dapade.
Cüdë dabapea̧ ma̧ȩ pio ju̧i̧ a̧ra̧ano̧rëremȩrequededibe a̧dë chjäte ba chiamȩ ma̧ȩ pio ju̧i̧. Jabechji̧ Quiricho pio ju̧i̧ chjiari ma̧ȩ oa, a̧ro̧rȩ chjai̧dëri̧ japea̧ ba oa ano̧ mire ja̧borëremȩ pio ju̧i̧ chjiari ma̧ȩ oa yürürëremȩrequededibe, no̧mȩ tjamo̧ri̧ ja̧ go̧ȩparëreji̧ri̧ pio judiro̧ go̧ȩparërea̧mi̧.
Jabechji̧ Quiricho judi cja̧rȩmȩ co chjai̧dëri̧ japadëa̧räbo, jabechji̧ Ütë tjamo̧ pio judi tuti yürürëremȩdejȩ pio ibë chjiari ano̧ mire ja̧bopea̧ oa, a̧ro̧rȩ chjai̧dëri̧ japea̧ üdë pio ju̧i̧iäpȩmo̧ ma ano̧ mire cjiadiäpea̧ oa, a̧ro̧rȩ jabechji̧parȩa̧ oa cjiapea̧ oa. Ado yaba̧ a̧ro̧rȩ Quiricho pio judiri ja̧ji̧ri̧pea̧ oaiä, jabechji̧ pio ibëiäpȩmo̧ ma ano̧ mire cjiadiäa̧de Quiricho pio ju̧i̧ ja̧ chjadë üdë. Tjamo̧ davä. Ibëa̧ chjadëdë üdë Quiricho pio ju̧i̧iäpȩmo̧ cjiadiäa̧de, ado pio ju̧i̧ ja̧ chjadë üdë pio ibëiäpȩmo̧ ano̧ mire cjiadiäa̧de, a̧ro̧rȩ jabechji̧parȩa̧ oa cjiarea̧mi̧ dari̧. Ado pio jiro ma̧ȩ pio ju̧i̧ järi tjamo̧ji̧ri̧rȩ a̧ra̧ano̧rea̧ro̧jo̧ȩ.
Jabo danȩrȩ, Quiricho pio judi tuti japarëremȩde Ütë ja̧ ërecjia üdë pio ibëiäpȩmo̧ acji cjatächea oa. Tjamo̧ davä. A̧ro̧rȩ Moicherë go̧ȩparërea̧ ma̧ȩ oa nö̧tadäräri̧ ta̧rëdiädëa̧ ba oa bape acji cjatätärea̧ ji̧, Quiricho pio ju̧i̧iäpȩmo̧ ano̧ mire acji cjatärëremȩdejȩ pio a̧ro̧rȩ Moicherë go̧ȩparërea̧ ma̧ȩrȩ yo̧a̧ chja̧oeri pio judiri go̧dürea̧mi̧ dari̧. Peaja̧di ta̧rëri̧ go̧ȩpea̧ oa cjiade ma̧ȩ üdë: "Eami̧ pumȩ üdë toro cji̧de ja̧bo tänȩa̧ oa cjiarä judi, jabechji̧ Ütë ja̧ ërecjiarea̧ pio judi acji cjatäpadejȩ."
Aja̧, ütëbodärä ja̧ chjiari tuti yürürëremȩdejȩ jibëa̧ icjara oa tuti ba ano̧pea̧ oa pumȩ judiro̧ chjai̧dëri̧ japea̧ pio ju̧i̧ chjiari. Aja̧ pumȩ pio ji̧ri̧ go̧dü tänȩpea̧ oa tuti yürürëremȩdjȩ jibëa̧ icjara oa. Ado pio ju̧i̧ chjiari ma̧ȩ oa yürürëremȩdiibe ütëbodärä oa Ütë tjamo̧ judi jënȩ ütarë jo̧rȩtarërea̧ doro.
Jabechji̧ pio judide pio ibë chjiari tuti yürürëremȩ judi. Jibëa̧ icjara oa tuti yürümȩrȩ yürürëremȩde ano̧ mi̧rȩ ja̧bopea̧ oa. Ja̧di dari̧ tuti japarëremȩde a̧ro̧rȩ jare chjadüa̧ oa cjiami̧ dari̧ go̧dürea̧ datä, a̧ro̧rȩ chjai̧dë ja̧ chja̧oeri judiri go̧dürea̧ datä. Aja̧, pio ju̧i̧ ja̧ icjara oa tuti yürürëremȩde a̧ro̧rȩ pio ju̧i̧ ja̧ pumȩpe jätä, chjai̧dë gȩrȩ chiadëri̧ joami̧ dari̧ cjiatä, dami̧ti̧ chjadë oa japarea̧ järitä.
Jabechji̧ Joja pio judi na̧rȩdiibe davä Ütë tjamo̧ pio ju̧i̧ chjiari. Jabechji̧ Joja pio ju̧i̧ daea̧ üdë, Ütë tjamo̧ pio ju̧i̧iäpȩmo̧ darea̧de. Jabechji̧ dacho darea̧rä dami̧ dari̧ da tänȩdiibe Jechu judi Ütë tjamo̧ pio ju̧i̧. Jabechji̧ Ütë tjamo̧ pio judimi̧ darë a̧dë chjäte tatari̧ cjiamȩ pio ju̧i̧ na̧rȩdiibe, Ütë tjamo̧ ja̧ chjacjiamȩ tjamo̧rea̧ pio ju̧i̧. Aja̧, jibëa̧ chjadë pio ju̧i̧, jibëa̧ jauëchjarea̧ pio ju̧i̧, a̧dë chjäte tatari̧ cjiamȩ jauëchjarea̧ pio ju̧i̧ ana̧ri̧ na̧rȩdiibe Jechu judi, jabëdiärea̧ decjiari̧. Ado Ütë tjamo̧ pio ju̧i̧ chjiari na̧rȩmȩ pio judi, jabechji̧ jibëa̧ ma̧ȩ jauëchjara̧ pio ju̧ri̧ra̧ chjadëri̧ jidadejȩ jënȩ pareapea̧ chjö̧na̧i̧därä oa. Jabechji̧ ji̧dë ma chjadëri̧ cjiapea̧ oa, goarijächea oa, chjadëri̧ quirë baä quirë baä cjiapea̧ oa jidadejȩ. Ado pio judi, jabechji̧ chadärärëremȩde a̧dë chjäte ba chiaräpȩ ju̧ri̧. Tjamo̧ davä. Pumȩ judiro̧ chjai̧dëri̧ japea̧ pio ju̧i̧ joami̧ dari̧ duridëparȩa̧ pio ju̧i̧ japadärä ëte, jabechji̧ chadärärëremȩde a̧dë chjäte Ütë tjamo̧ pio ju̧i̧ ja̧ mu̧i̧ chjuaräpȩ ju̧ri̧.
Ado pio ju̧i̧iä jabechji̧, jibëa̧ pumȩ pio judiro̧mi̧ dari̧ cjiadiäpea̧ chiarëremȩde jabëdiärea̧ decjiari̧. Aja̧, Ütë tjamo̧ ja̧ oa chjadëri̧ ja̧bepapea̧ oa, tjamo̧ goë tuti ja̧bepamȩ chjadërë ja̧bepapea̧ oa, pumȩ chjapea̧de. Tjamo̧ davä. Jibëa̧ pumȩ pio ji̧ri̧ cjäri̧ri̧ cjiamȩrȩ a̧dopea̧ oa, pio ji̧ri̧ chjiari ji̧dë ma ja̧bepë yürüpea̧ oa, jabechji̧ pumȩ pio judiro̧mi̧ dari̧ cjiadiäpea̧ chiarëremȩde pio ji̧ri̧ chjiari chjadëri̧ goë cjo̧dëpea̧ oa, pio ji̧ri̧ chjiari chjadëri̧ ja̧bepapea̧ oa. Ado pio ju̧i̧iä pumȩ chjapea̧de. Ado pumȩ chjapea̧mȩrȩ goe gu̧rori̧ yürürea̧ darëremȩde pumȩ judiro̧ chjai̧dëri̧ japea̧ üdë duridëparȩa̧ oa cjiapea̧ oa.
Jabo jabechji̧ Quiricho pio ju̧i̧ ja̧ goe ba chia tjamo̧ra̧ pio ju̧ri̧ra̧ ba ano̧a̧ oa cjiarëreji̧ri̧nȩrȩ ca̧ oti̧. Jabechji̧ oveja co chjami̧ darë goe gu̧rori̧ ja̧borëremȩde. Goë tuti ja̧bepaji̧ri̧ pio judiro̧ oveja co chja oa ja̧bo tänȩrërea̧mi̧ ja̧borëremȩde Jechu judi peaja̧di, oveja co chjami̧ darë. Tjamo̧ davä. Goe gu̧rori̧ ja̧borëremȩde pio dibë chjiari tuti ba ano̧pea̧ oa.
Jabechji̧ judi toro ja̧boa̧rä, a̧ro̧rȩ chjai̧dëri̧ japea̧ pio ju̧i̧ tuti aramȩrȩ ja̧borëremȩde, a̧ro̧rȩ chjai̧dërë yo̧a̧ chja̧oerä cjo̧ro̧chea oa. Tjamo̧ davä ca̧ oti̧. Pio ibë chjiari ja̧borëremȩde a̧ro̧rȩ coëma cjiari̧ cjo̧ro̧pea̧ oa, a̧ro̧rȩ chjai̧dëri̧ cjo̧ro̧rërea̧ pio ju̧i̧ a̧dë ja̧boa̧mi̧ dari̧ cjo̧ro̧pea̧ oa. Jabechji̧ a̧ro̧rȩ ma̧i̧ da co chiami̧ dari̧ cjo̧ro̧rërea̧ ji̧, a̧ro̧rȩ ja̧bopea̧ querediä tjamo̧ji̧ri̧mi̧ dari̧ cjo̧ro̧rërea̧ ji̧, jabechji̧ ma̧i̧ da co chiamȩrȩ cji̧däa̧ oa cjiarëremȩde toro, pio a̧ro̧rȩ chjadëri̧ chjaparȩa̧ oa cjiami̧ dari̧ cjiapea̧ oa, pio a̧ro̧rȩ co chjami̧ dari̧ ano̧ mire cjiapea̧ oa.
Danȩrȩ, Quiricho pio judiborë conȩda̧ oa cjiarëremȩde Ütë tjamo̧ pio judi tänȩa̧ oaiä. Jabechji̧ judi coëma cjiari̧ cjo̧ro̧a̧räbo, ma̧i̧ dari̧ conȩdarëreji̧ri̧diro̧jo̧ȩ. Jabechji̧ cja̧rȩmȩ co chjai̧dëri̧ japadëmȩrȩ ano̧ mire ja̧borëremȩde ji̧ra̧ co chjai̧dëri̧ jape chjaoji̧ri̧ pio ji̧ri̧ chjiari, ibë chjadëri̧ ëba baämi̧ dari̧ japapea̧ oa Ütë tjamo̧ pio ju̧i̧iäpȩ. Jabechji̧ cja̧rȩmȩ co maea ja̧borëremȩde, ado judiri ja̧bodëpade. Aja̧, jibëa̧ icjara oa ja̧bo tänȩrëreji̧ri̧diro̧jo̧ȩ, jabo Tjo tjamo̧ pio ju̧i̧iä bëdüa̧ oa cjiarëremȩde.
Jabechji̧ pio judide ibë chjiari goe gu̧rori̧ yürüa̧ oa cjiarëremȩ üdë Ütë tjamo̧ ja̧ ërecjia̧ üdë pio ibëiäpȩmo̧ acji cjatächea oa, judi ba ano̧rea̧ daea̧ oaiä cjatäcjie jo̧rȩtarea̧ dapea̧ oa. Tjamo̧ davä. A̧ro̧rȩ chjai̧dëri̧ japea̧ pio ju̧i̧ chjiari ano̧ mire ja̧boa̧ oa cjiarëremȩde Jechu judi a̧ro̧rȩ ütëbodärärë duridëparȩrea̧ dapea̧ oa, chiriräpȩti̧ oa cjo̧ro̧ji̧ri̧ pio judiro̧borë.
Aja̧, pio ibë tjamo̧ri̧ eamȩrȩ ja̧di dari̧ japarëremȩde. Jabechji̧ tjamo̧ri̧ earea̧ üdë pio ibëiä tarupadëa̧de. Jabechji̧ a̧ro̧rȩ pearä judi Ütë tjamo̧ pio ju̧i̧iäpȩmo̧ eadërëreji̧ri̧rea̧ro̧jo̧ȩ, jabo pio judide pio ibëiäpȩmo̧ pearä earëremȩ judi. Jabechji̧ pio ju̧i̧iä taruparëremȩde, pio ibëiädë. Ado pio ibë ea tjamo̧mȩrȩ chjadürëremȩdejȩ Joja pio ju̧i̧. Jabechji̧ a̧ro̧rȩ pio ju̧i̧iäpȩmo̧ eadëa̧räbo, eamȩrȩ darëremȩdiibe. Ado pio ju̧i̧iä pio ibë eamȩrȩ Joja pio ju̧i̧ chjadürëremȩdejȩ pio ibë chjiari goe gu̧rori̧ yürüa̧ oa cjiapea̧ oa, Ütë tjamo̧ ja̧ ërecjia̧ üdë pio ibëiäpȩmo̧ acji cjatächea oa.
Ado Jechu Quiricho pio ju̧i̧iäbo goë cjo̧dërequede. Aja̧, Ütë ja̧ ma̧ȩ oa coëma cjiari̧ daba tänȩmȩ pio ju̧i̧iä, o ji̧ri̧ ja̧ yaboi̧ bëdüa̧ oa cjiamȩ pio ju̧i̧iä, ja̧boa̧remȩrȩ bëdüa̧ oa cjiamȩ pio ju̧i̧iäbo goë cjo̧dërequede, a̧dë chjäte tjamo̧ yo̧mȩ pio ju̧i̧iä, ado cja̧rȩmo̧rȩ nö̧tadärärea̧mi̧dëri̧ cjiamȩ Ütë pio ju̧i̧iä. Jabechji̧ pio ju̧i̧iäbo goë cjo̧dërequede, judi pio dibë cjäri̧ri̧ cjiamȩrȩ yürütä, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabechji̧ ji̧dë ma idami̧ dari̧ ea tjamo̧diibe Quiricho judi, eadëpe bagarea̧ decjiari̧. Ado pio ibë chjiari goe gu̧rori̧ ano̧ mire ja̧borërea̧ oaiä, jabechji̧ jare chjadüa̧ oa cjiami̧ dari̧ cjiarea̧rȩ yaba̧, a̧ro̧rȩ ibëa̧ icjararä chjai̧dërë yo̧a̧ chja̧oerä cjo̧ro̧chea oa.
Jabechji̧ ibëa̧ oti̧ judiro̧ pio ju̧i̧ boadäräa̧diro̧jo̧ȩ. Tjamo̧ davä. Boadäräa̧diro̧jo̧ȩ Ichiae pio ju̧i̧. Oveja pëi̧ chjamȩmi̧ da pio ju̧i̧ ja̧ goera̧ pio ju̧ri̧ra̧ joa̧ oa cjiami̧ dari̧ cjia̧ oaiä, ado tjamo̧i̧ cjiari̧ baämȩ ma̧ȩ pio ju̧i̧ ji̧dë ma a̧ra̧ano̧a̧ oaiä, jabechji̧ boadärärea̧ daea̧diro̧jo̧ȩ. Jabechji̧ ja̧bopai̧ daräbo a̧ra̧ano̧rëreji̧ri̧dirȩ uapadëji̧ri̧rȩ.
Ado chiri nö̧tai̧ oa cjo̧ro̧ji̧ri̧ pio judiro̧ chjacjiamȩri̧ jo̧rȩtaji̧ri̧pea̧diro̧jo̧ȩ, o judiro̧mo̧rȩ cjiadiäri̧. Aja̧, o judiro̧mo̧rȩ chjacjiamȩri̧ jo̧rȩtadëdëa̧diro̧jo̧ȩ. Jabechji̧ jabërä go̧ȩpea̧ oa cjiaji̧ri̧ pio judiro̧dirȩ. Jabechji̧ jibëa̧ quȩ oa bucho ana̧ cjo̧ro̧rea̧ joërä go̧ȩpea̧ oa cjiareji̧ri̧ judiro̧, jabë dabu oa pareapadëa̧rä go̧ȩpea̧ oa cjiareji̧ri̧ pio judiro̧ chirirä cjo̧ro̧mȩmi̧ da pio ju̧i̧iäpȩmo̧ chjacjiamȩri̧ jo̧rȩtadëa̧diro̧jo̧ȩ. Danȩrȩ, bucho ana̧ cjo̧ro̧rea̧ joë üdë, ja̧bo tänȩa̧ oa cjiamȩ Oveja pëi̧ chjamȩmi̧ da pio ju̧i̧ ja̧de. Ado pio jiro joërä go̧ȩpea̧ oa cjiaji̧ri̧ pio judiro̧ chjacjiamȩri̧ jo̧rȩtadëa̧diro̧jo̧ȩ.
Ja̧dëa ji̧ daea̧reconȩ Oveja pëi̧ chjamȩmi̧ da pio ju̧i̧. Chio̧ quȩmȩ ya̧mi̧räpȩ cjiamȩ oa daea̧reconȩ. Ado pio ju̧i̧ ja̧ yuroro cjiaji̧ri̧ oa daea̧requedejȩrȩ pumȩ ji̧ra̧ tjamo̧ oa, 144 mil pumȩ oa. Ado pio jibë nö̧ta ëba cjiamȩ pio ju̧i̧ ja̧ quȩ oa go̧ȩpea̧ oa goa mareji̧ri̧dirȩ jibëa̧ daitoro. Ado jibë nö̧ta cjiamȩ pio ju̧i̧ ja̧ Ama̧i̧ ja̧ quȩbo go̧ȩpea̧ oa goareji̧ri̧diro̧jo̧ȩ daitoro.
Ado pio judiro̧dirȩ ivi pio ji̧ri̧iä oëra̧diädëa̧ judiro̧. Aja̧, Ütë tjamo̧ ja̧ maea oa cjo̧ro̧pea̧ oa china̧chjari̧ tutia̧ oa cjiami̧ dari̧ cjo̧ro̧reji̧ri̧ pio judiro̧dirȩ. Oveja pëi̧ chjamȩmi̧ da pio ju̧i̧ ji̧dë ma cho̧rë jämi̧ dari̧ japareji̧ri̧ pio judiro̧dirȩ. Jabechji̧ yodëro̧je chiriräpȩti̧ oa cjo̧ro̧rërea̧ ji̧, jabechji̧ gatëa̧ oa cjiami̧ dari̧ cjiadiäa̧dirȩ yaba̧. Gatëa̧ oa cjiami̧ dari̧ cjiadiäa̧dirȩ Ütë tjamo̧ ja̧ mape bagari̧, Oveja pëi̧ chjamȩmi̧ da pio ju̧i̧ ja̧ mape bagari̧. Jabechji̧ tjado ana̧mȩ judi yabo joechjapea̧mȩ jurarea̧ oa mitëmi̧ dari̧ mitëa̧dejȩrȩ pio jiro pumȩ ji̧ri̧ Ütë tjamo̧ judi, Oveja pëi̧ chjamȩmi̧ da pio judiborë.
Ado Moicherë go̧a̧rërea̧ duri pio ju̧i̧ go̧a̧reji̧ri̧dirȩ, Oveja pëi̧ chjamȩmi̧ darë go̧a̧rërea̧ duri pio ju̧i̧. Tjamo̧ davä, pio judiro̧ go̧a̧rërea̧ duri pio ju̧i̧ go̧a̧reji̧ri̧dirȩ. Ja̧di ta̧rëri̧ go̧a̧reji̧ri̧dirȩ: “Ano̧mȩ Ütë, a̧dë chjäte ju chiamȩrenȩ. A̧dë chjäte chjadëri̧ japamȩrenȩ a̧ro̧rȩ dabarea̧mi̧dë pio ju̧i̧. Dacho bëremi̧ cjiari̧ jo̧rȩtaji̧ri̧rȩ darea̧rȩ davä mȩnȩ japea̧ pio ju̧i̧. Aja̧, chiriräpȩti̧ oa cjo̧ro̧ji̧ri̧ pumȩ pio ji̧ri̧ ja̧ Ano̧mȩrenȩ. Ado coëma cjiari̧ japamȩrenȩ tjamo̧i̧ cjiari̧.
Ado pio judiro̧ ütëborë Oveja pëi̧ chjamȩmi̧ da pio ju̧i̧iäpȩmo̧ dëbëpe chjaotapadiro̧jo̧ȩ. Tjamo̧ davä. chirirä cjo̧ro̧mȩmi̧ da pio judi, ado pio jȩadi ütëreji̧ri̧ pio judiro̧borë dëbëpe chjaotapadiro̧jo̧ȩ. Jabo cjäri̧ madiro̧jo̧ȩ, japarea̧ dadëpadiro̧jo̧ȩ. Oveja pëi̧ chjamȩmi̧ da pio judi boadäräpadiro̧jȩrȩ. Tjamo̧ davä. Oveja pëi̧ chjamȩmi̧ da pio judi, jënȩ mitëa̧ pio ji̧ri̧ nö̧ta, pio jȩaiäpȩmo̧ chjadëri̧ ta̧rëdiäa̧ji̧ri̧ pio ji̧ri̧ nö̧ta boadäräpadiro̧jȩrȩ. Jabechji̧ Oveja pëi̧ chjamȩmi̧ da pio judi a̧dë chjäte Ano̧mȩ pio judide. Ado cja̧rȩmo̧rȩ nö̧tadë madejȩ. Ado pio judide chiri tjamo̧ cjo̧ro̧mȩ Ütë üdë. Ado cja̧rȩmo̧rȩ pio ju̧i̧iäpȩmo̧ boadärärea̧mi̧dëde. Aja̧, ja̧di ta̧rëri̧ yo̧mȩrȩ yo̧a̧dique mu̧i̧tjoi̧ üdë.
Pio ju̧i̧iä jabechji̧, ma̧ chiadëri̧ cjiari̧ jo̧rȩtatärȩ. Jabechji̧ ma̧ chiadëri̧ cjia tjamo̧täreji̧ri̧rea̧rȩ. Ado ma̧ chiadëri̧ cjiaji̧ri̧rȩ chjacjiamȩri̧ jo̧rȩtatäreji̧ri̧rea̧ro̧jo̧ȩ a̧dë chjäte ju chiamȩ pio ju̧i̧. Jabechji̧ Oveja pëi̧ chjamȩmi̧ da pio judi ëbapea̧ ji̧ queri̧na̧ra̧diibe yaba̧. Ado ju̧i̧ ja̧ iei̧mi̧ da pio jini̧ chjadëri̧ jëdano̧a̧ oa cjianȩ ëbapea̧ ji̧.
Ja̧dëa ji̧ cja̧rȩmȩ mu̧i̧tjoi̧ üdë, a̧dëräpȩmȩ ja̧ mu̧i̧tjoi̧ pio judi yo̧a̧dique: —Danȩ, cüdë mȩa yo̧pea̧ ma̧ȩ pio ju̧i̧ go̧ȩpeno̧vä —yo̧a̧dique—. Aja̧, pio yoa ma̧ȩ oa go̧ȩpeno̧vä: “Danȩ, Oveja pëi̧ chjamȩmi̧ da pio judi ëbapadejȩ jibëa̧ iei̧mi̧ da pio ji̧. Ado jȩa nö̧ta a̧dopera̧tä ma̧ȩ chjadüa̧dejȩrȩ o ji̧ri̧iäpȩmo̧. Ado pio ju̧i̧iä yo̧requededibe. Ma̧ chiadëri̧ cjia tjamo̧dirȩ pio ji̧ri̧ nö̧ta ëba a̧doparea̧ dapaji̧ri̧ judiro̧”. Aja̧, pio jiro ma̧ȩ oa go̧ȩpavä —yo̧a̧dique. Ado a̧dërämȩ ja̧ mu̧i̧tjoi̧ üdë ji̧dë u̧i̧ yo̧mȩrȩ tocoi̧mi̧ a̧de yo̧a̧dique: —Aja̧, pio yoa ma̧ȩ üdë Ütë tjamo̧ ja̧ ma̧ȩde. Tjamo̧i̧ cjiari̧ yo̧rea̧ ma̧ȩ pio judide —a̧de yo̧a̧dique.
Ado bë ma̧ri̧ oa tutirea̧ uë tjamo̧ üdë, taru a̧rȩmȩrä cji̧däa̧ oa cjiaremȩde, ichi chjö̧na̧i̧ yo̧a̧ri̧ ta̧dë bori̧dë oa chiamȩ taru a̧rȩmȩrä. Ado ta̧dë nö̧tai̧ oa cjareriä go̧ȩpea̧ oa cjiaremȩde cja̧rȩmȩ quȩ üdë. Jabechji̧ Oveja pëi̧ chjamȩmi̧ darë chjadüa̧ pio ji̧ri̧ ja̧ quȩ chia maeari̧ chjarapë cjareriä go̧ȩpea̧ oa cjiaremȩde ta̧dë nö̧tai̧ oa. Cja̧rȩmȩ ta̧dë üdë cja̧rȩmȩ quȩ chiaremȩde.
Jabo cjari̧darea̧ üdë, chjai̧dërea̧ üdë yu̧a̧rea̧ dadëpade. Chjai̧dëra̧ pio ju̧ri̧ra̧ idi̧ dari̧ mirea̧ oa cjiami̧ dari̧ cjo̧ro̧mȩ judi, cjäri̧ made, yu̧a̧rea̧ dadëpade. Ado ji̧dë ma ma̧ȩ chjádë yürümȩ judi peaja̧di yu̧a̧rea̧ dadëpade. Jabo go̧ȩpea̧ oa cjiaji̧ri̧ pio judiro̧, Oveja pëi̧ chjamȩmi̧ da pio ju̧i̧ ja̧ joërä go̧ȩpea̧ oa cjiaji̧ri̧ pio judiro̧, bucho ana̧ cjo̧ro̧rea̧ chiaji̧ri̧ pio ji̧ri̧ ja̧ quȩ oa joërä go̧ȩpea̧ oa cjiaji̧ri̧ judiro̧, dëdë, yu̧a̧rea̧ dapadirȩ.
Ja̧dëa ji̧ mu̧i̧tjoi̧ judiro̧, cja̧ȩta̧ra̧ ichiri yo̧a̧ri̧ mu̧i̧tjoi̧ judiro̧ cja̧rȩmȩrȩ jana̧dique. Aja̧, cjiadiäa̧mȩ conȩdarea̧ chiamȩ tachja pio ju̧i̧ chiareji̧ri̧ judiro̧ cja̧rȩmȩrȩ jana̧dique. Ado ja̧di ta̧rëri̧ yo̧a̧dique: —Pio coadi jana̧vä —yo̧a̧dique—. Na̧rȩparequedemȩ Oveja pëi̧ chjamȩmi̧ da pio ju̧i̧ ja̧ iei̧payi̧mi̧ da oa. Jana̧vä —yo̧a̧dique.
Ado ja̧dëa ji̧ daea̧reconȩ Oveja pëi̧ chjamȩmi̧ da pio ju̧i̧. Ütërë chamȩ ba chiaräpȩmȩ oa daea̧reconȩ cjiamȩ oa. Ado jibëa̧ icjara nö̧tai̧ oa dacho chiaji̧ri̧ pio judiro̧ jadüchiami̧rȩ tjoro tänȩa̧diro̧jo̧ȩ jibëa̧ yuro nö̧tai̧ oa cjiari̧. Ado tjamo̧ yo̧ji̧ri̧ judiro̧ peaja̧di tjoro tänȩa̧diro̧jo̧ȩ ta ütëbo jadüchiami̧rȩ, 24rë. Ado Oveja pëi̧ chjamȩmi̧ da pio ju̧i̧ daea̧ ji̧, ja̧bo tänȩa̧ oa cjiami̧ da oa daea̧reconȩ. Ado yatë chiaremȩde cja̧ȩta̧ra̧ ichiri yo̧a̧ri̧ oa. Ado dacho chiaremȩde peaja̧di cja̧ȩta̧ra̧ ichiri yo̧a̧ri̧ oa. Ado pio jiro dacho üdë, jabechji̧ Tjo tjamo̧ pio ju̧i̧ chjiari na̧rȩrea̧de. Aja̧, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧ chjiari na̧rȩrea̧de. Ado pio jiro Tjo tjamo̧ pio judi peadë chjadüa̧ oa cjiade chiriräpȩti̧ oa Ütë tjamo̧ pio judi chjadüa̧ ju̧i̧iä.
Ado pio ju̧i̧ mitëa̧ nö̧ta, jibëa̧ icjara nö̧tai̧ oa dacho chiaji̧ri̧ pio judiro̧ jadüchiami̧rȩ tjätjäpë china̧däräa̧dirȩ. Ado tjamo̧ yo̧ji̧ri̧ pio judiro̧borë, ta ütëbo jadüchiami̧rȩ tjätjäpë china̧däräa̧dirȩ. Aja̧, Oveja pëi̧ chjamȩmi̧ da pio ju̧i̧ ja̧ dëbëräpȩ tjätjäpë china̧däräa̧dirȩ, carecare guarea̧mi̧ da oa goaji̧ri̧rȩ. Ado peaja̧di tachja oa goareji̧ri̧dirȩ. Orora̧ japea̧ tachja oa goareji̧ri̧dirȩ goaeri̧ pjȩa̧mȩ cäarea̧ pio ju̧i̧ tjuri cjiari̧ chiamȩ oa. Ado goaeri̧ pjȩa̧mȩ cäarea̧ üdë, jabechji̧ Ütë ja̧ pumȩ judiro̧ pio jȩaiä goë cjo̧dëa̧ pio judimi̧ dade.
Ja̧dëa ji daea̧reconȩ Oveja pëi̧ chjamȩmi̧ da pio ju̧i̧. Puria̧ oa cjiamȩ go̧ȩ i oa, ji̧cha̧parea̧ cja̧rȩmȩ oa mu̧i̧ iamȩ oa daea̧reconȩ. Cja̧ȩta̧ra̧ ichiri yo̧a̧ri̧remȩde ji̧cha̧parea̧ üdë, ado cja̧rȩmȩ oa mu̧i̧ iamȩ oa daea̧reconȩ. Ado judirä, chjaodëri̧ ta̧rëa̧reconȩ cja̧rȩmȩ oa, jibëa̧ icjara nö̧tai̧ oa dacho chiamȩ cja̧rȩmȩ oa. Mai̧ dari̧ dörö eami̧ ta̧rëri̧ ni̧bämȩ oa ta̧rëa̧reconȩ ado cja̧rȩmo̧ ju̧i̧iäpȩmo̧ ni̧bämȩ oa. —Jana̧vä —yo̧a̧mȩ oa ta̧rëa̧reconȩ.
Ado ëna̧ quira̧ti̧ cjiaji̧ri̧rȩ ëna̧tea̧diro̧jo̧ȩ ya̧mi̧ oa, ta̧dë chacha oa, ta̧rërea̧ chiadëmȩ oa. Ado ja̧di ta̧rëri̧ ëna̧diätea̧diro̧jo̧ȩ: —Goadirea̧ yürüibe. Ano̧ mire chami̧ dari̧ japachji̧vä ibë chjadëri̧ i̧äpapea̧ oa —ëna̧diätea̧dirȩ—. Ütërë charea̧räpȩ chamȩ pio judi ibë dachea oa, Oveja pëi̧ chjamȩmi̧ da pio ju̧i̧ ja̧ ërecjia̧ üdë pio ibëiäpȩmo̧ acji cjatächea oa, jabechji̧ chjadëri̧ i̧äpaibe.
Jabo cüdë dabadëmȩrȩ dëbë yo̧a̧reconȩ: —Cjäri̧ marequede, dabadërequede, jabo pio mȩnȩ daba jirorenȩ —dëbë yo̧a̧reconȩ. Ja̧dëa ji̧ yo̧a̧dique: —Danȩ, pio yodëro̧je a̧dë chjäte chjai̧dë pio ju̧i̧ chjätäa̧ji̧ri̧ pio judiro̧dirȩ —yo̧a̧dique—. Aja̧, ana̧ tjamo̧ri̧ tararëreji̧ri̧ pio judiro̧dirȩ jabo yaba̧ chjadëri̧ ma̧na̧rea̧ daea̧dirȩ chjadëri̧ go̧dürea̧mi̧ dari̧. Ado jibëa̧ chjibo üdë Oveja pëi̧ chjamȩmi̧ da pio ju̧i̧ ja̧ goera̧ pio ju̧ri̧ra̧ joa̧ oa cjiami̧ dari̧ cjiade, bërebërea tjamo̧pe järea̧mi̧ dari̧.
Jabechji̧ Oveja pëi̧ chjamȩmi̧ da pio judi chjadëri̧ jidadejȩrȩ. Tjamo̧ davä. Ütërë chamȩ yuroräpȩ cjiamȩ pio judi chjadëri̧ jidadejȩrȩ. Jabechji̧ chjadëri̧ jidamȩrȩ ëba jäpadejȩrȩ bucho ana̧ cjo̧ro̧rea̧ yürümȩ uiräpȩ, ui goaeri̧ cjitëmȩräpȩ. Ado judiro̧ ejaro cjiaji̧ri̧rȩ cjo̧ro̧rërea̧ ji̧, gito ana̧ri̧ jo̧rȩtarërea̧ ji̧, jabechji̧ tjaoëpai̧ dari̧ cjo̧ro̧rea̧ dapadirȩ Ütë tjamo̧ pio judi tuti japea̧ oaiä.
Sanasan