Juan 1:1 - Biblia Pume

¹ Pearä judiräri ja̧, jabë dabu decjiarä Ma̧ȩ quȩmȩ pio judi cjiarëremȩde. Ütë tjamo̧ pio ju̧i̧ nö̧ta cjiarëremȩde. Jabechji̧ Ma̧ȩ quȩmȩ pio judiborë Ütë tjamo̧de.

Juan 1:1 Iomraidhean Croise

Taruparea̧ Ma̧ȩ 1:1

Pearä judirä Ütë tjamo̧ judi chjö̧na̧i̧ oa tarupë pareaparërea̧ ji̧, pareaparëremȩdejȩ a̧dë oa. Dabu oa peaja̧di pareaparëremȩdejȩ.

Ichaia 7:14

Jeova pio judi na̧rȩrea̧ yürüpadidibe. Jabechji̧ iei̧ jini̧, pea ütëpea̧yi̧ pio jini̧, üi̧rȩ cja̧rȩmo̧ co ëba mo̧a̧dëa̧ iei̧ pio jini̧ bo maipanȩ. Ado arapanȩjȩ jibëa̧ ja oa. Ado Emanue quȩra̧ pio ju̧ri̧ra̧ quȩpajanȩjȩ. Aja̧, “Ütë tjamo̧ judi pio ibëdimȩde” yo̧mȩ quȩra̧ pio ju̧ri̧ra̧ quȩpajanȩjȩ. Aja̧, ja̧di ta̧rëri̧ go̧ȩpea̧ oa cjiade Go̧dü Tänȩmȩ pio ju̧i̧ chjiari.

Ichaia 9:6

Jabechji̧ Ütë tjamo̧ pio judi yürüa̧ oa cja̧rȩmȩrȩ ara̧ oa cjiapade pio ibë chjiari. Aja̧, joja pio ju̧i̧ yürüa̧ oa cjiapade pio ibë a̧dopea̧ oa. Ado Ütë tjamo̧ pio judi tänȩa̧ oa, tjamo̧ yo̧mȩrȩ cjo̧ro̧pade. Ado tjamo̧ yo̧mȩrȩ cjo̧ro̧pea̧mȩ oa, jabechji̧ chacjiamȩri̧ yo̧padiro̧jo̧ȩ pumȩ judiro̧ quȩ ji̧ra̧ra̧ quȩpami̧ dari̧. “Aja̧, a̧dë chjäte chjadëri̧ chi̧dëeamȩrenȩ, a̧dë chjäte ju chiamȩ Ütërenȩ” yo̧padiro̧jo̧ȩ. Ado “bucho ana̧mȩ Ama̧i̧renȩ” yo̧padiro̧jo̧ȩ peaja̧di. Ado ju̧i̧ uëri “goae tarari̧ cjo̧ro̧rea̧ yürümȩ pio judirenȩ” yo̧padiro̧jo̧ȩ peaja̧di. “Jabechji̧ aro̧rȩ chjadëri̧ cjo̧ro̧pea̧ oa, ibë eadëji̧ri̧ pio judiro̧ acji jana̧rea̧ dachea oa, a̧ro̧rȩ uapadëji̧ri̧rȩ cjo̧ro̧pea̧ oa jabo chjadëri̧ jida̧ oa cjo̧ro̧pea̧ oa, jabechji̧ chjadëri̧ cjo̧ro̧rea̧ yürümȩrenȩibe a̧ro̧rȩ chji̧ goae tjamo̧ra̧ jo̧rȩtaji̧ri̧rȩ cjo̧ro̧rea̧mi̧ dari̧" yo̧padiro̧jo̧ȩ.

Mateo 1:23

"Danȩrȩ, iei̧ jini̧, üi̧ cja̧rȩmȩrȩ ëba mo̧a̧dëa̧ oa bo maiyi̧rȩ cjiadiäpanȩ. Ado joja pio ju̧i̧ arapanȩjȩ. Ado Emanue quȩra̧ pio ju̧ri̧ra̧ quȩpea̧ oa cjiapade. Ado pio jiro quȩ üdë, jabechji̧ Ütë tjamo̧ judi pio ibëdimȩde yo̧rea̧ quȩde." Aja̧ ca̧ oti̧, ja̧di ta̧rëri̧ go̧ȩparëremȩde Ütërë ea jana̧ chjadüa̧ oa ni̧bämȩ judi jabërä Jechu pio ju̧i̧ chjiari.

Lucas 24:53

Ado judiro̧ ju̧ri̧pȩ go̧düdäräa̧rä, jabechji̧ doti̧mi̧ jädiärëreji̧ri̧dirȩ Ütë tjamo̧ ja̧ bëräpȩ Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ oa.

Juan 1:14

Ma̧ȩ quȩmȩ pio judi pumȩpe bagarëremȩde. Icjara chiamȩpe järëremȩde. Ado ibëa̧ chjarerä cjo̧ro̧rera̧pea̧de. Ado ibëa̧ chjarerä cjo̧ro̧mȩ oa irä darëreji̧ri̧rea̧ro̧jo̧ȩ jibëa̧ chjacjiamȩrea̧ pio ju̧i̧. Tjamo̧ davä. Jibëa̧ jauëcharea̧ oa daea̧rea̧ro̧jo̧ȩ, a̧dë chjäte tatari̧ cjiamȩ oa. Danȩrȩ, Ama̧i̧ Ütë judi Joja pio ju̧i̧mo̧i̧ ëbarëremȩdejȩ cja̧rȩmȩ oa. Ado pio ju̧i̧ ja̧ chjacjiamȩrea̧ pio ju̧i̧ darëreji̧ri̧rea̧ro̧jo̧ȩ ji̧dë ma cjäri̧ri̧ cjiamȩrȩ a̧domȩ ju̧i̧, ji̧dë ma tjamo̧i̧ cjiari̧ ni̧bämȩ ju̧i̧.

Juan 1:18

Danȩrȩ, eami̧ pumȩrȩ cja̧rȩmȩ co Ütë tjamo̧ pio ju̧i̧ daea̧ ma ja̧didë jabo Joja pio judi chjadëri̧ dabarea̧ yürürëremȩdiibe pio ju̧i̧ chjiari. Danȩrȩ, Ütë tjamo̧ judi ëbadejȩ jibëa̧ ja oa, cja̧rȩmȩ oa. Jabechji̧ Jäjäa pio ju̧i̧iäpȩde. Ji̧mo̧ cjiadirȩ, cja̧rȩmȩ maearë. Ado Joja judi peaja̧di Ütë tjamo̧de. Ado danȩrȩ, pio judide davä ibë chjadëri̧ dabarea̧ yürürëremȩ judi Jäjäa pio ju̧i̧ chjiari.

Juan 1:2

Ado pio judiborë Ütë tjamo̧ tara, jabechji̧ Ütë tjamo̧ pio ju̧i̧ nö̧ta ëba cjia marëremȩdejȩ pearäri ja̧.

Juan 16:28

Aja̧, Ama̧i̧ tjamo̧ pio judi chjadüa̧ oa birë ma̧na̧requede —yo̧a̧dejȩrȩ—. Birë ma̧na̧requede dai chiriräpȩ cjo̧ro̧pea̧ oa. Jabo pio yoa chiri oa a̧dë baäpareconȩ ado chjereno̧, Ama̧i̧ pio ju̧i̧iäpȩ baäpea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧.

Juan 17:5

Ado yaba̧ Ama̧i̧, japamitë boi̧chji̧ chjätä ëte, ado baäparequede pio mȩaiäpȩ. Ado cüdë pio ju̧ri̧pȩ go̧düdäräa̧rä, jabechji̧ Ama̧i̧, ca̧ chjacjiamȩrea̧ üdë ado chjereno̧ ana̧ri̧ na̧rȩa̧ oa cjiapea̧ oa japavä. Aja̧, ca̧ chjacjiamȩrea̧ üdë pearä na̧rȩa̧ oa cjiarërea̧mi̧, na̧rȩa̧ oa cjiatä eareconȩ Ama̧i̧, dabu üdë jabë pareapea̧ oa cjiadëa̧rä cjiarërea̧mi̧ —yo̧mȩrȩ yo̧a̧dejȩ Jechu judi jibëa̧ Ama̧i̧ ju̧i̧.

Juan 20:28

Ado Toma judi irä daea̧ oaiä, yo̧a̧dejȩ: —Ca̧ Ano̧mȩrenȩ. Ca̧ Ütërenȩ.

Juan 8:58

Ado Jechu judi dëbë yo̧a̧dejȩrȩ: —Tjamo̧i̧ cjiari̧ yo̧requededibe. Abaraa̧ judi jabë ara̧ oa cjiadëa̧rä, cjiarëremȩrequede jabërä. Jabechji̧ Cüdërequede quȩmȩ pio judirequede —yo̧mȩrȩ yo̧a̧dejȩrȩ Jechu judi.

Domano Ma̧ȩ 9:5

Ado danȩrȩ, no̧mȩ tjamo̧ri ja̧ cjo̧ro̧rëreji̧ri̧ taru pio judiri ja̧ maeadirȩ. Taru ba chia tjamo̧ji̧ri̧ pio judiri ja̧ji̧ri̧ maeadirȩ. No̧mȩ cjo̧ro̧rëreji̧ri̧ Ebereo pio judiri ja̧ maeadirȩ. Ado Go̧dü Tänȩmȩ judi peaja̧di pio judiri ja̧de. Pio ji̧ri̧ ja̧ pumȩde. Icharaitarë ara̧ oa pumȩpea̧de. Ado pio ju̧i̧iä yo̧requededibe. Danȩrȩ, a̧dë chjäte tjamo̧ yo̧mȩ Ütë pio judi bucho ana̧ chjacjiamȩ tjamo̧ri̧ jo̧rȩtapea̧ maeade. Pio ju̧i̧ ja̧ chja̧oerämo̧ ji̧dë ma cjo̧ro̧pea̧de. Ja̧ditäde.

Epjecho Ma̧ȩ 3:9

Jabo danȩrȩ ca̧ oti̧, jënȩ urëdi tjamo̧ oa jo̧rȩtarërea̧ pio ju̧i̧ chjiaribo daba tänȩtämi̧ cjiarëremȩde pio coaiä. Jabechji̧ chjö̧na̧i̧ti̧ oa Pareapamȩ Ütë judi pearä judirä ütarë jo̧rȩtarërea̧ ji̧, jabechji̧ quëna̧paji̧ri̧ pio judiro̧ ütëborë cja̧rȩmȩ pumȩ mape bagatä eamȩrȩ jo̧rȩtarëremȩde judio pio ji̧ri̧ chjiari, judiodë pio ji̧ri̧ chjiaribo. Jabo judi jo̧rȩtarërea̧ üdë goadia̧ oa cjiarëremȩde pearä judi. Tjamo̧ davä. Judi pearä ütarë jo̧rȩtarërea̧ üdë goadia̧ oa cjiarëremȩde, jabo yaba̧ pio coaiä daba tänȩa̧ oa cjiade. Pio coaiä ana̧ri̧ ni̧bäa̧ oa cjiade. Tjamo̧ davä. Ütërë jo̧rȩtarërea̧ üdë, pumȩ judiro̧ yo̧a̧ri̧rȩ cja̧rȩmȩ pumȩpe bagapea̧ pio ju̧i̧ chjiari jo̧rȩtarërea̧ üdë ana̧ri̧ daba tänȩa̧ oa cjiade. Ado pio ju̧i̧iä yaba̧ pumȩ judiro̧ ütëborë daea̧ oaiä, ëna̧diäa̧ oa a̧dopaji̧ri̧ pio ji̧ri̧ daea̧ oaiä, jabechji̧ ana̧ tjamo̧ri̧ jo̧rȩtaji̧ri̧rȩ dadiro̧jo̧ȩ. Tjamo̧ davä. Pumȩ judiro̧ ütëborë a̧dopaji̧ri̧ pio ji̧ri̧ daea̧ oaiä, ado a̧dëräpȩ tjamo̧ yo̧ji̧ri̧ pio judiro̧borë daea̧ oaiä, tjo maearë jauëchja pio judiro̧ daea̧ oaiä, jabechji̧ ana̧ tjamo̧ri̧ jo̧rȩtaji̧ri̧rȩ dadiro̧jo̧ȩ. Tjamo̧ davä. Judiro̧ ëna̧diäa̧ oa a̧dopaji̧ri̧ pio ji̧ri̧ daea̧ oaiä, 'chia chia, Ütë tjamo̧ pio judi a̧dë chjäte urëdi tjamo̧ oa jo̧rȩtarea̧ chiadida, ëna̧diäa̧ oa a̧dopaji̧ri̧ pio ji̧ri̧ chjiari chjadë tjamo̧ri̧ ütarë jo̧rȩtarëremȩdida' quëna̧ jo̧rȩtaji̧ri̧pea̧diro̧jo̧ȩ.

Pjiripo Ma̧ȩ 2:6

Ado Quiricho judi, ¿yö̧ta dari̧ jo̧rȩtarëremȩde? Yö̧ta dari̧dë, jabechji̧ jibëa̧ maea oa jo̧rȩtadëa̧de jabo o ji̧ri̧ ja̧bo jo̧rȩtarëremȩde. Danȩrȩ, Quiricho judi, jabechji̧ Ütë tjamo̧ pio judimo̧rȩ cjiarëremȩde pearä judiräri ja̧. Jabo judi Ütë tjamo̧mȩborë, 'Aja̧, ji̧dë ma ba chia tjamo̧ro cjiapea̧ chiaquëda, Ütërë cjiami̧ dari̧ ji̧dë ma cjiapea̧ chiaquëda' quëna̧dëa̧de.

Corochȩche Ma̧ȩ 1:15

Danȩrȩ, Ütë tjamo̧ judi darea̧mi̧dëde, jabo Quiricho pio judi, dëdë, darea̧mi̧ dade icjarabomȩpea̧ tara. Ado icjarabomȩpea̧mȩ pio ju̧i̧iä, jabechji̧ dapai̧ darea̧ro̧jo̧ȩ Tjo maearë cjiamȩ pio ju̧i̧. Aja̧, darea̧mi̧ damȩ pio ju̧i̧iä dapai̧ darea̧ro̧jo̧ȩ darea̧mi̧dëmȩ pio ju̧i̧. Ado darea̧mi̧ damȩ pio judi, jabechji̧ Quiricho pio judide. Ado Quiricho pio judi, jabechji̧ cjiamȩde. Jabechji̧ pearä judirämȩde. Jabechji̧ eami̧ üdë jabë pareapea̧ oa cjiadëa̧rä cjiarëremȩde. Jabechji̧ pareapea̧ oa cjiadëde, jabo jabechji̧ cjiamȩ pio judide. Ja̧di tara ji̧dë u̧i̧ ba chiade. Aja̧, Ütërë pareapea̧ pio ju̧i̧iä ji̧dë u̧i̧ ba chiade. Jabechji̧ a̧dë chjäte ba chiamȩ pio judide.

Corochȩche Ma̧ȩ 1:17

Jabechji̧ orë jabë pareapadëa̧rä cjiarëremȩde Quiricho judi. Ado pio judi jida̧ oaiämo̧i̧ chjadëri̧ jida̧ oa cjiade jënȩ pareapea̧ üdë. Jabechji̧ judi jidadëa̧rä judi, chjaodëri̧ goarijäa̧ oa cjia matäremȩde chjö̧na̧i̧rȩ. Jabechji̧ pio ju̧i̧ ja̧ ma̧ȩrämo̧ cjo̧ro̧de. Judi ütara̧rämo̧ cjo̧ro̧de. Pio ju̧i̧iämo̧ quirë baä quirë baä cjiarea̧ dade.

Timoteo Ma̧ȩ 1 3:16

Ado a̧ro̧rȩ Jechu Quiricho pio ju̧i̧ chjiari quëna̧ üdë, ‘jabechji̧ a̧dë chjäte ba chiadida’ quëna̧ dabarea̧rȩ. Jabechji̧ pio jiro ma̧ȩ üdë goadia̧ oa cjiami̧ dari̧ cjiarërea̧ ji̧, chjadëri̧ daba tänȩrëremȩdiibe Ütë tjamo̧ judi. Aja̧, pio yoa ma̧ȩ oa dabapa tänȩrëremȩdiibe. Ta̧rëchji̧vä: "Quiricho judi a̧dëräpȩrëremȩrȩ birarëremȩde pumȩpapea̧ oa. Ado Tjo tjamo̧ pio judi daba tänȩrërea̧ oaiä, ‘Aja̧, Quiricho judi cja̧rȩmȩ co chjai̧dëri̧ japadëa̧dida, coëma cjiari̧ cjo̧ro̧mȩdida’ quëna̧ dabarea̧mi̧ dapea̧de. Ado pumȩ chjarerä cjo̧ro̧mȩpea̧mȩ oa darëreji̧ri̧diro̧jo̧ȩ a̧dëräpȩ mu̧i̧tjoi̧ judiro̧. Ado pio ju̧i̧ chjiari ma̧ȩ üdë to̧bari̧ a̧ra̧ano̧a̧ oa cjiarëremȩde chiri nö̧tai̧ oa cjo̧ro̧ji̧ri̧ pio ji̧ri̧ ja̧ chjarerä. Ado a̧ra̧ano̧a̧ oa cjiadiäa̧ oaiä, jabechji̧ no̧i̧dë tjamo̧rȩ quëna̧ji̧ri̧pea̧dirȩ. Ado ja̧dëa ji̧ ütara̧ doro, Ütë tjamo̧ judi ado chjereno̧ cjitë tänȩrëremȩdejȩ a̧dëräpȩ baäpea̧ oa."

Tito 2:13

Aja̧, ja̧di dari̧ japariä cjo̧ro̧täreji̧ri̧rea̧rȩ jidataji̧ri̧rȩ, ma̧ chiadëri̧ cjiaparȩrea̧ do pio ju̧i̧ jidataji̧ri̧rȩ. Jabechji̧ ibëa̧ Ütë judi, Chjätä Tänȩmȩ Jechu Quiricho pio judi ana̧ri̧ na̧rȩmȩrȩ jana̧padiibe, a̧dë chjäte tatari̧ cjiamȩrȩ. Ado pio ju̧i̧ jidataji̧ri̧rȩ cjo̧ro̧rea̧rȩ.

Ebereo Ma̧ȩ 13:8

Jabechji̧ Jechu Quiricho judi tjaoëdiä tjaoëdiäpe bagadëmȩde. Jabechji̧ judi no̧mȩ cjiarërea̧mi̧ cjiamȩde yaba̧. Ado judi yaba̧ cjiami̧ bucho ana̧ cjiapade. Jabechji̧ cjiamȩde. Tjaoëdiäpe bagadëmȩde.

Ebereo Ma̧ȩ 7:3

Jabo danȩrȩ, Mequichede ju̧i̧ nö̧rimȩ pio ju̧i̧ chjiari dabadë marea̧rȩ. Ado pio ju̧i̧ arayi̧ pio ji̧ chjiaribo dabadërea̧rȩ. Jibëa̧ ütëti̧rea̧ pio ji̧ri̧ chjiari, jibëa̧ taru pio ju̧i̧ chjiari peaja̧di dabadë marea̧rȩ. Ado ‘pio jiro doro ara̧ oa cjiarëremȩdida, ado pio jiro doro ja̧boa̧dida’ quëna̧ dabadërea̧rȩ peaja̧di. Jabechji̧ tarupadëmȩmi̧ dade. Ado ja̧bodëmȩmi̧ dade peaja̧di. Ado pio ju̧i̧iä Ütë tjamo̧ ja̧ Joja pio judimi̧ dade, judi bucho ana̧ tjamo̧ goë tuti ja̧bepamȩmi̧ da tara. Jabechji̧ judi ararërea̧ pio ju̧i̧ chjiari go̧ȩpea̧ oa cjiadëa̧ oaiä, judi ja̧borërea̧ pio ju̧i̧ chjiari go̧ȩpea̧ oa cjiadëa̧ oaiä, jabechji̧ ji̧dë ma goë tuti ja̧bepamȩmi̧ dade o pio ji̧ri̧ chjiari.

Pedro Ma̧ȩ 2 1:1

Danȩrȩ ca̧ oti̧, jo̧rȩtarequededibe. ¿Jabënȩrȩ? ¿Jabëti̧ cjianȩrȩ? ‘Jabë cjo̧ro̧ baä jirodiro̧da’ quëna̧ jo̧rȩtamȩrȩ go̧ȩpe chjadürequededibe. Danȩrȩ, Chimo̧ Pedro quȩmȩ pio judirequede cüdë. Ado Jechu Quiricho pio judi chjadüa̧ oa cjiamȩrȩ go̧ȩpe chjadürequededibe, pio ju̧i̧ ja̧ mu̧i̧tjoi̧mȩrȩ. Aja̧, pio dibë jo̧rȩtamȩrȩ go̧ȩpe chjadürequededibe quëna̧ji̧ri̧ pio ji̧ri̧iäpȩmo̧, Jechu Quiricho pio ju̧i̧ quëna̧ji̧ri̧pea̧ pio ji̧ri̧iäpȩmo̧. Ado Jechu judi, jabechji̧ Ütë tjamo̧ pio judide. Ibë Chjätä Tänȩmȩ pio judide. Aja̧, pio ju̧i̧ quëna̧ji̧ri̧pea̧renȩro̧jo̧ȩ pio a̧ro̧rȩ quëna̧mi̧ dari̧. Jabechji̧ quëna̧rea̧ yürürëremȩdiibe ibë ütëbodärä oa, quëna̧rea̧ ba chia oa, teracabadë maea oa. Jabechji̧ a̧ro̧rȩ jabechji̧parȩa̧ oa cjiapea̧ oa quëna̧rea̧ yürürëremȩdiibe. Ado pio ju̧i̧ jo̧rȩtamȩrȩ go̧ȩpe chjadürequededibe ca̧ oti̧.

Juan Ma̧ȩ 1 5:20

Ado peaja̧di dabarea̧rȩ Ütë tjamo̧ ja̧ Joja judi birë ma̧na̧pea̧ pio ju̧i̧ chjiari. Aja̧, ma̧na̧rëremȩde, ado yürürëremȩdiibe dabarea̧ oa, a̧ro̧rȩ 'Ütë tjamo̧ pio judidida' quëna̧ dabarea̧ dapea̧ oa. Ado yaba̧, a̧ro̧rȩ Ütë tjamo̧ pio ju̧i̧ tjamo̧ri̧ dabaji̧ri̧pea̧ tara, jabechji̧ pio ju̧i̧ nö̧ta ori̧ bagari̧ ëba cjiarea̧ daea̧rea̧rȩ a̧ro̧rȩ Jechu Quiricho pio judiri ja̧ mapea̧ tara, a̧ro̧rȩ Ütë tjamo̧ ja̧ Joja pio judiri ja̧ mapea̧ tara. Jabechji̧ Jechu Quiricho judi Ütë tjamo̧ pio judide. Ado pio judi tjamo̧de pio ibëiäpȩmo̧ bucho ana̧ cjo̧ro̧rea̧ yürümȩ judi.

Jechurë Na̧rȩrërea̧ Ma̧ȩ 1:11

Ja̧di ta̧rëri̧ yo̧mȩrȩ yo̧a̧dique: —Danȩ Juan, mȩnȩ dapea̧ pio ju̧i̧ chjiari go̧ȩpatä earequedemȩ go̧ȩ irä —yo̧a̧dique—. Ado mȩnȩ go̧ȩpa ëte, jabechji̧ chjadütä earequedemȩ ca̧ a̧doparea̧ ji̧ra̧ oa, cja̧ȩta̧ra̧ ichiri yo̧a̧ri̧ oa. Aja̧, Epjecho quȩmȩ bë ma̧ri̧räpȩ a̧doparea̧ pio ju̧i̧, Echimira quȩmȩ bë ma̧ri̧räpȩ a̧doparea̧ pio ju̧i̧, Pegamo quȩmȩ bë ma̧ri̧räpȩ a̧doparea̧ pio ju̧i̧ chjadütä earequedemȩ. Ado Tiatira quȩmȩ bë ma̧ri̧räpȩ a̧doparea̧ pio ju̧i̧, Charade quȩmȩ bë ma̧ri̧räpȩ a̧doparea̧ ju̧i̧, Pjiradëpjia quȩmȩ bë ma̧ri̧räpȩ a̧doparea̧ ju̧i̧, ado Daodichea quȩmȩ bë ma̧ri̧räpȩ a̧doparea̧ pio ju̧i̧ chjadütä earequedemȩ peaja̧di. Aja̧, Achia quȩmȩ chiriräpȩ tjaoëpa a̧dopaji̧ri̧ oa chjadütä earequedemȩ ma̧ȩ oa —yo̧a̧dique.

Jechurë Na̧rȩrërea̧ Ma̧ȩ 1:17

Ado cüdë pio ju̧i̧ daea̧ ji̧, jabechji̧ ja̧boa̧mȩmi̧ dari̧ toboe china̧däräa̧requede daburo, pio ju̧i̧ ja̧ ta cotoräpȩ ju̧ri̧. Jabo mu̧i̧ chjuari ja̧ ichira̧ pio ju̧ri̧ra̧ ida̧dique. Ado yo̧a̧dique: —Uapadëvä —yo̧a̧dique—. Uapadëvä. Jabechji̧ pearämȩ pio judimȩrȩ cjiarequede yuropadëmȩrȩ cjiamȩ üdë —yo̧a̧dique—.

Jechurë Na̧rȩrërea̧ Ma̧ȩ 1:2

Ado cüdë daea̧ pio ju̧i̧ chjiari jabechji̧ chjadëri̧ go̧ȩpea̧reconȩ. Aja̧, cüdë daea̧ pio ju̧i̧ chjiari, cüdë dabapea̧ pio ju̧i̧ chjiari chjadëri̧ go̧ȩpea̧reconȩ. Danȩrȩ, pio yoa ma̧ȩ üdë Ütë tjamo̧ pio judiri ja̧de. Jechu Quiricho pio judi daba tänȩrërea̧ ma̧ȩde.

Jechurë Na̧rȩrërea̧ Ma̧ȩ 1:8

Ado Ano̧mȩ Ütë judi, a̧dë chjäte jauëchjamȩ pio judi, ja̧di ta̧rëri̧ yo̧de: “Pio cüdë pearä judirä pareaparërea̧ oaiä, jabechji̧ chjö̧na̧i̧rȩ taruparëremȩde. Pio coaiämo̧ taruparëremȩde. Ado yaba̧ pio cüdë tänȩa̧ oaiä, yuropea̧ oa cjiapade goarijädärärea̧mi̧ dari̧. Jabechji̧ pearämȩ pio judimȩrȩ cjiarequede yuropadëmȩrȩ cjiamȩ judi.” Aja̧, ja̧di ta̧rëri̧ yo̧de Ano̧mȩ Ütë judi.

Jechurë Na̧rȩrërea̧ Ma̧ȩ 19:13

Ado pio ju̧i̧ ja̧ ina̧rea̧ go̧a̧ti̧ üdë, goerä chuda̧ oa cjiaremȩde. Pio ju̧i̧iä goe mape jäa̧de. Ado quȩ ji̧ra̧ri̧ chiamȩborë ado cja̧rȩmo̧ quȩ oa a̧de chiade peaja̧di. Aja̧, “Ütë tjamo̧ ja̧ Ma̧ȩmi̧ damȩ” yo̧a̧diro̧jo̧ȩ peaja̧di.

Jechurë Na̧rȩrërea̧ Ma̧ȩ 2:8

Ado coa ni̧bämȩ judi ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dique: —Danȩ Juan, pio yoa ma̧ȩ oa go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Echimira quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Danȩ, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, pio yoa ma̧ȩ üdë, jabechji̧ pearäri ja̧mȩ pio judiri ja̧de. Yuropadëmȩ pio judiri ja̧de. Ja̧boa̧remȩrȩ bëdü ëte ado chjereno̧ cjo̧ro̧mȩ pio judiri ja̧de. Ado pio judirequede cüdë.

Jechurë Na̧rȩrërea̧ Ma̧ȩ 21:6

Ado ji̧dë u̧i̧ yo̧mȩrȩ a̧de yo̧a̧de: —Jabechji̧de yaba̧ —yo̧a̧de—. Cüdë tänȩa̧ oa, japadäräa̧ oa cjia maeade. Pio coaiä tarupea̧ maeade. Jabechji̧ pearämȩ pio judirequede, yuropadëmȩrȩ cjiamȩ üdë. Ado pio cüdë yo̧requede: Eami̧rȩ ui ja̧borä judi, jabechji̧ ba eadëmȩrȩ jararea̧ yürüpareconȩ bucho ana̧ cjo̧ro̧rea̧ yürümȩ ui pio ju̧i̧.

Jechurë Na̧rȩrërea̧ Ma̧ȩ 22:13

Danȩrȩ, pearämȩ pio judimȩrȩ cjiarequede, yuropadëmȩrȩ cjiamȩ üdë. Jabechji̧ tarupadëmȩrȩ cjiarequede bucho ana̧mȩrȩ —yo̧a̧de Jechu judi.

Jechurë Na̧rȩrërea̧ Ma̧ȩ 3:14

Ja̧dëa ji̧ coa ni̧bämȩ judi, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Daodichea quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Aja̧, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, ‘Ja̧ditäde’ quȩmȩ pio judirequede. Pio coaiä tjamo̧i̧ cjiari̧ cjiade Ütë tjamo̧ ja̧ ma̧ȩ üdë. Pio judi yo̧a̧mi̧ japadärämȩrequede a̧dë chiquirea̧ decjiari̧. Jabechji̧ judi pearä judirä pareaparërea̧ üdë pio coaiämo̧i̧ taruparëremȩde. Ado pio judimȩrȩ ma̧ȩ yürürequededibe.