9 แต แญง นะ ก็ ไล เอิญ คือเน วัล ‘กัน เอาซาง เค็ย เลาะ ก็ อำ มัห เค็ย ไอ มี เลาะ วัล ดาย’ แญง นะ อัง
ซะ ตี แอ ป็อง นัน ไอ มี อี กุด ใน ใจ แอ เตาะ แต คลิห เริล ใน มพุล นเซ็บ เจ็นนัน ก็ อี ทอก กุด ซวม ฮัก” นำ อัง (เยซู จ็อก คือนะ ก็ ซีแล็ม เค็ย ซะ ป็อง จู มบลึ แอ ป็อง กุญ ไอ มี กำ ซีวะ เตาะ)
แญง นะ ก็ ลบ ไล เปโตร คือเน วัล “ซะ ตี เอาซาง เค็ย เลาะ แลว มัห ก็ ป็อง กุญ ดาย กัน งกีจ็อง เค็ย เลาะ แลว ก็ อำ มัห เค็ย ไอ มี เลาะ เตาะ” แญง นัน อัง
เปโตร ก็ ไล อัห ฮุนเน “แป ก็ เม็จ แลว นอ ครำ ยิว อิห เน กุด เจิง ครำ กรอก ซอ ไอ มี กุญ อิห อุ เลิม เคิบ อัหซอ ไอ มี กุญ เตาะ ลุห กด อิห นอ แต เอาซาง ไล เอิญ งิ นาน แลว ‘อำ มัห เค็ย อัหซอ ไอ มี เลาะ เตาะ’ เอาซาง อัง เค็ย เอิญ
เอิญ เม็จ ซะ แปลก นัน ตวด ตึง แพะ ลบ ลด งาล แอ็ม เญ็น ตัก วาง นทึห เคิบ มัด เคิบ มุห เอิญ
เอิญ ก็ เค็ย ‘ไอ เตาะ งกีจ็อง เฮย ซะ นัน อิห กำ ดาย ซะ ตัก ไอ มี เลาะ นัน เอิญ ไอ มี เกย ป็อง ซัก มี ลบ ตัน’ เอิญ อัง
แอ เป็น ครำ ยิว อัห เป็น ครำ กรอก ซอ เอาซาง ไอ มี จบ ทือ ซัง เอาซาง แก แอ็ม ลุห อัห ญอน อัห เจือ ฮัก
ซะ ป็อง นัน เอาซาง ก็ เค็ย เลาะ ญอน แอ คอบคุน นำ ญอน แญง เอาซาง ไล แลว เค็ย แอ ป็อง กุญ มด มัห ต็อง ซอน อัห จังนะ ดาย