1 เปโตร 4:11 - Prai Bible11 แอ ตี มี ความ ซามาด ไล แญง เอาซาง อน ตัก อัห ก็ ครอ ระ แอ ไล แญง เอาซาง มอก เป็น เอาซาง จ็อก ออ ฮัก อีเอ มี ความ ซามาด จวย อัห นำ ก็ ต็อง เอิด ใจ ซิห จวย อัห ซีเละ นัน เอาซาง อน แร็ง มอก นเดย ก็ ต็อง แอง มอก นัน กัน แอ จวย นอย เลาะ มอก เอาซาง อน ความ ซามาด นัน เอาซาง ก็ ฮับ เกียด เลาะ นำ ฮับ เกียด ญอน เยซู คริด ฮัก ครอ ลือ เอาซาง ตี มี ริด มี แร็ง ตลอด จำ นเดย จำ กวา ดาย ซาทุ Faic an caibideil |
1 เปโตร 4:11
47 Iomraidhean Croise
ทาเน ซะเทเฟน ลบ ไล อัห ฮุนเน วัล “ตัก อิง นัน โมเซด ก็ อุ เลิม เคิบ ปึง เอา เม แอ ตัก ตี แลง นัน เทวาดา ตัก มแบละ นัง ออ ตัก ญวัง ซีนาย ก็ อุ เลิม เคิบ นำ เทวาดา นัน ก็ ฟาก แญง เลาะ อน ตัก โมเซด เป็น แญง เลาะ ตี ซับรวง แอ รีด โมเซด ก็ ไล แญง เลาะ แญง แลม นัน อน ตัก แอ ตอ วัล ระ แอ กุญ ปัง เตา มานะ เน
แป ก็ เป็น มอก เจิง เอาซาง เอิญ ก็ เป็น มอก ซะลา แอง เจิง นัน เอิญ มี ความ ซามาด แอง เจิง เอาซาง ก็ เป็น ตัก เอาซาง อน ความ ซามาด นัน ตัก เอิญ ฮัก ทาเน เอิญ ก็ มอก พร็อห งกรัง ซิห เน็ล เลาะ แลว เจ็นนัน อัหซอ ก็ โตะ แอง ตอ วัล แต ครำ ตี แอง ตอ วัล นัน อัห ก็ ต็อง เจิม นัง ออ แอง เลาะๆ ต็อง แอง เลาะๆ
บัดนะ กัน แป กิว จวย ครำ เยซู ตัก จังวัด ยูเดีย ซีเละ นัน อัห ก็ อน เกียด ตัก เอาซาง ดก ตี แป แอง เลาะ ซิห อัห มอก แญง เอาซาง ไล อน นัน จู ล็อง ก็ เม็จจึด เค็ย แป กิว มี ใจ กวาง จวย อัห ซีเละ อัห ก็ ลด เคาใจ เค็ย แป กิว เอิด ใจ ซิห คาว เลาะ คาว แลม เลือง เยซู คริด ซีเละ ตี แป เค็ย เจือ เยซู นัน แป ก็ กิว แอง อัห ก็ วัล ลือ เอาซาง อน เกียด ตัก เอาซาง ยาง ดก วัล
ซำรับ แอ ตี เจือ นำ ก็ ครอ ระ แอ เคาใจ เอาซาง มี แร็ง ดก ซีเละ แร็ง คอง นำ นัน แอ เปียบเทียบ เคิบ ซีวะ ไอ มี กุญ เตาะ เป็น แร็ง นัน ตี แอง ระ เยซู คริด รีด เล็ห วัล แร็ง นัน แอง ระ เยซู คริด ลบ วัล ก็อห วาง ทึห ลด คุด อุ เพียห เลาะ คอง เอาซาง ปกคอง อุ เลิม เคิบ นำ เอาซาง ก็ ไจ แร็ง นัน จวย แอ จู งิ เน ดาย
ครอ ระ แป แอง เลาะๆ ฮัก ซัง เลาะ ญาม แป อุ เลิม เคิบ ครำ กรอก ซอ ตี ไอ มี เจือ นัน ก็ ครอ ระ แป แอง เลาะ ตลอด ดาย กัน แป แอง เลาะ ตลอด อัห ก็ ไอ มี จางรู พอง แป เลือง ซีวะ เตาะ อัห ก็ เม็จจึด เค็ย แป แอง เลาะ ซีเละ บัดนะ กัน เล็ห งิ โตะ เอาซาง ตัก โลก เน อัห ก็ ต็อง ลือ เอาซาง เค็ย นำ กิว เลาะ ซีเละ
แป ก็ เมือนนอย แป ก็ รีด อุ จำ นเดย จำ กวา แป ก็ มอก เกียง ตี เอาซาง เอิด แอง เป็น วิฮาน นัน เอาซาง ระ แป เป็น ตี อุ คอง ซีมาล นำ ฮัก แป ก็ มอก มอ เอาซาง ตัก แองกาน อน เอาซาง ตัก วิฮาน นัน ซะ ตี แป ทวาย ญอน ซีมาล เอาซาง ซับรวง นัน เอาซาง ก็ ปอใจ อัง ซีเละ นำ ปอใจ ก็ ญอน เยซู คริด นัน ฮัก
Sanasan