1 เปโตร 1:17 - Prai Bible17 ญาม แอ ครอ วอน เอาซาง แอ ก็ เค็ย เอา ตัก เอาซาง มด นอ เจ็นนัน ก็ ครอ ระ แอ เกงใจ อัง นำ ก็ เลาะ เพาะวา นำ ตัดซิน ครำ ทัว โลก เน มด นำ ก็ ตัดซิน แคระ ตลอด ไอ มี เลือก ล็อง เตาะ ซีเอ แอง ลุห จังนัก นำ ก็ ตัดซิน ตาม นัน แอ เป็น ควัน คอง นำ ก็ ตึก นำ ก็ ตัดซิน แอ เมือนนอย มด เจ็นนัน ญาม แอ ควะ อุ ใน โลก เน แอ เกงใจ อัง นำ ก็ เลาะ Faic an caibideil |
1 เปโตร 1:17
33 Iomraidhean Croise
แลว อัห อู นอย แลว อัห ก็ ไล ลูกนอง ออ เริล จุ ซ็วน เยซู ครำ ปึง พะเจายูฮัว เฮโรด ก็ เริล เลิม อัห จุ ซ็วน เยซู คือเน “อาจาน อิห เม็จ แลว มัห เป็น ครำ เลาะ ครำ ซือ ซีเละ มัห จ็อก เลาะ จ็อก ซือ ตลอด มัห ไล แญง เอาซาง แคระ ตลอด เอาซาง ไล มัห แอง ซีวะ มัห ก็ ไล เลาะ ไล ซือ ตลอด ครำ จังนัก มัห ก็ ไล มด อัห เป็น ซะ แกะ ซะ แย็ด มัห ก็ ไล มด ไอ มี เลือก ล็อง เตาะ
กำนา ญาม แป ฮับ จดมาย ตี เอิญ เคียน ไล แป นัน แป ก็ เซียใจ แบบ แพนกาน เอาซาง นอ จดมาย นัน ก็ แอง ระ แป เฮง เอิด ใจ ซิห เอาซาง ดก กวา เครม วัล แป ซีรอก แอง เลาะ ระ นัง ออ ไอ มี ตี ติ ไอ มี ตี คอล เตาะ แป อ็อด อัง ครำ ตี แอง ลุห แป นเจิก กุญ โทด แป ก็ พอม ลงโทด ล็อง นัน ตี แอง ลุห นอ เจ็นนัน แป ก็ วาง ซีรอก เม็จ มัด เอิญ วัล แป ทืล อัง เอิญ ซีเละ อิห เม็จจึด แลว เค็ย เลือง แป ลงโทด ล็อง นัน แป ก็ แอง แคระ มด แลว แป ไอ มี ตี ติ ไอ มี ตี คอล เตาะ
เอิญ จ็อก เคิบ ปึง นัน ตี อัห เค็ย อัหแกะ ซับรวง คริซจัก เอิญ ไล คาว เลาะ อน ตัก อัห ระ อัห เคาใจ เค็ย เอิญ เจือ จังนัก ทาเน อัห ปัง เอิญ แลว อัห ก็ ไอ มี ไล ซีวะ เพิม อน ตัก เอิญ เตาะ เอิญ ไอ มี นเจ็น เม็จ ซีวะ ตัก อัห เตาะ นังเลาะ แลว อัห เป็น ซะ แกะ ตี ซับรวง คริซจัก ก็ ตึก เอิญ ไอ มี ซนใจ อัหซอ ทือ อัห อน เกียด ตัก อัห จังนัก เอาซาง ก็ ไอ มี ซนใจ เมือนนอย จังนัก ก็ ตึก อัห ไอ มี ไล ซีวะ แมะ อน ตัก เอิญ เตาะ เป็น เอาซาง ฮัก ตี ระ เอิญ เคาใจ คาว เลาะ คาว แลม คอง ออ นัน
ปัง เอิด ดาย แป ตี เป็น เอาเลียง แป ก็ ต็อง แอง เลาะ เคิบ ทาด ออ เมือนนอย อำ แป ดา อัห อำ แป คู อัห ดาย เพาะวา แป เคิบ ทาด คอง ออ ก็ มี งกี ตัก งกีจ็อง มี ล็อง เดียว เลิม นัน เป็น ทาด ก็ ตึก เป็น เอาเลียง ก็ ตึก เอาซาง ตัก วาง นทึห ก็ ตัดซิน แอ นเดิง นอย มด เจ็นนัน แป ตี เป็น เอาเลียง แป ก็ ต็อง แอง เลาะๆ ซิห ตัก ทาด คอง ออ ซัง แคระ ดาย
นะ ดาย เปือน ตี เอิญ รัก เฮย กำนา ญาม เอิญ ควะ อุ เลิม เคิบ แป แป ก็ เจือ ปัง เอิญ เลาะ แต มานะ เน เอิญ ไอ มี ควะ อุ เคิบ แป เอิญ ก็ ครอ ระ แป เฮง เจือ ปัง แญง เอิญ ติกๆ วัล ดาย ตี เอาซาง ระ แป ปน แอ็ม เจ็น ลุห นัน นำ ก็ มี เปามาย ซำรับ แป ฮัก นอ ครอ ระ แป แอง ระ เปามาย นัน ซมบูน มด จู มบลึ ดาย เจ็นนัน แป ต็อง นเจิก อัง เอาซาง ต็อง เกงใจ อัง นำ ต็อง ไอ มี ฮาน แอง ลุห เคิบ นำ แป ต็อง กิว ทือ นำ ซีเละ ซัง เลาะ
Sanasan