San Juan 5:19 - El Nuevo Testamento

¹⁹ Tjumeꞌe ndo Jesús ndache ndo na̱: ―Naa ngeꞌe nduaxin ntatjunta ixi Chjenꞌen ndo Dio juaꞌi sincheꞌe ndo naa ngeꞌe jeꞌo jeꞌe ndo. Jeꞌo ncheꞌe ndo ngeꞌe tikon ndo ncheꞌe Ndotée ndo. Kain ngeꞌe ncheꞌe ndotée ndo kao chjenꞌen ndo ncheꞌe xjan jaña.

San Juan 5:19 Iomraidhean Croise

Mateo 26:39

Ko sakjui ndo ícha kjínxin ko bakeꞌexin ntatuchiꞌin ndo ko kuisée ndo ti ngataꞌa inche ko jaꞌin nichjeꞌe ndo ndotée ndo: ―Ndotána, siá chao, tájonnta juachaxin ixi tsiꞌa ti tsango itsjá jitjiá copa jiꞌi. Ko ntatjunta ixi tsoenꞌa xranchi janꞌan tjaꞌon. Naꞌi. Jaꞌanta ncheꞌenta xranchi jaꞌanta tjaunnta.

San Lucas 21:15

Ixi janꞌan xrontatjunta ngeꞌe tsjateꞌenta, chijni jian tsayeꞌenta, ko ninaa ni ningakonꞌannta juaꞌi tsjatingíexin na̱.

San Juan 10:18

Xroꞌan ngisen tsantsjena ti rícho̱n, janꞌon tajon aséenna tsenꞌen ixi jaña tjaꞌon. Chonda juachaxin tsajon aséenna ko chonda juachaxin xroxechónna íjngo. Jiꞌi kuetuanna Ndotána.

San Juan 12:49

Ixi janꞌan nichjaxinꞌa janꞌon. Naꞌi. Ndotána, ndo tsixruanꞌanna, kuetuanna ngeꞌe xronichja ko ngeꞌe sintakuanꞌan chujni.

San Juan 12:50

Ko nóna ixi ti kuetuanꞌan Ndotána meꞌe tajon juachaxin tsechón chujni kain nchakon. Méxin, kain ngeꞌe ndachrja̱n, Ndotána kuetuanna xronichja.

San Juan 14:10

¿Á titikaonꞌanta ixi janꞌan riníi Ndotata, ko Ndotata jii ndo ngaji̱n? Ti ngeꞌe nichja janꞌan jeꞌa ti tjaꞌon nichja. Naꞌi. Ko Ndotána ndo jii ngaji̱n, jeꞌe ndo ncheꞌe ndo ixra̱.

San Juan 2:19

*Ko juatingíexin ndo Jesús: ―Tonchjejinnta niꞌngo jiꞌi ko nínxin nchakon sintakonchjian niꞌngo íjngo.

San Juan 3:3

Ko ndo Jesús ndachro ndo: ―Janꞌan ntatjua ixi ngisen tjongíeꞌa íjngo juaꞌi tsikon sen ti tetuanꞌan ndo Dio.

San Juan 5:21

Xranchi Ndotána nchexechón ndo ni tsikenꞌen ko tajon ndo juachaxin tsechón na̱ íjngo. Jaña kaxon Chjenꞌen ndo chao tsajon xjan juachaxin tsechón kain ni tjaun jeꞌe xjan.

San Juan 6:38

Janꞌan juixin ngajní ko jeꞌa ngeꞌe tjaꞌon sintaꞌa. Juiꞌi ixi sintaꞌa ixra̱ tjaun ndo tsixruanꞌanna.

San Juan 8:28

Ko ndachro ndo: ―Nchakon tsjankanitonta nta̱cru Chjenꞌen ndo Dio, xjan jongíꞌe xranchi chujni, tsonoꞌanta ixi janꞌan nduaxin ngisen ntatjunta ngisen najanꞌan. Ko tsonoꞌanta ixi jeꞌa janꞌon tituanꞌan ixra̱ ntaꞌa. Naꞌi. Jeꞌo ngeꞌe juakoꞌna Ndotána meꞌe tjako.

San Juan 9:4

Xratáanchakon xrokonda sintaꞌa ixra̱ tjaun ngisen tsixruanꞌanna. Ko ó tsi̱i̱ tiie ko xroꞌan ngisen chao sincheꞌe ixra̱.

Hechos 2:24

*Ko ndo Dio juinchexechón ndo ndo Jesús ko ndo Dio kuantsje ndo kain juachaxin chónda xichononte; í juaꞌi tsetuanꞌan xa ngajin ndo.

Romanos 6:4

*Nchakon bikitéena, nchakon meꞌe kuenꞌenna ko xrabaana xranchi jeꞌe ndo ixi xroxechónna ko xrochondana juachaxin tsechónna kain nchakon ko jian tsajina, xranchi ndo Cristo xechón ndo ixi juachaxin ijié chónda Ndotée ndo, ndo Dio.

Romanos 8:11

*Ko siá chondanta Espíritue ndo Dio, ndo juinchexechón ndo Cristo, kaxon sinchexechón ndo cuerpoanta tsikenꞌen, ixi Espíritue ndo Dio jii ngajinnta.

1 Corintios 15:12

Ko siá ndachrona ixi ndo Cristo xechón ndo, ¿sonda ndachro kaxinnta ixi xechónꞌa chujni tsikenꞌen?

2 Corintios 4:14

Méxin, noi̱na ixi ndo Dio, ndo juinchexechón Ncháina Jesús, kaxon sinchexechónna ndo jai̱na, ko tjumeꞌe jaꞌanta ko janꞌanna satsikuꞌuna ndo ti tituanꞌan ndo.

2 Corintios 5:10

*ixi kainna xrokonda tsonchjiñeꞌena ti sinchéñaxin ndo Cristo ijie̱ ixi jaña ngujnguna tsayéꞌena ngeꞌe tikinixinna ixi á jian juincheꞌena o̱ naꞌi ti xrastena ngataꞌa nunte ntiꞌi.

Efesios 2:5

Ko maski jai̱na ndatsikenꞌenna kondeexin ti ndakoꞌa juincheꞌena, jeꞌe ndo Dio juinchexechónna ndo nganii ndo Cristo ko meꞌe konꞌen ixi juasie ndo Dio, meꞌe koméꞌe jíei̱na.

Efesios 3:16

Tjáncháꞌa̱ Ndotáina Dio, ndo chónda kain juachaxin ko ti tjintee, ixi Espíritue ndo xrotjáaxinnta ndo juachaxin ko sinchesoji ndo asáanta.

Filipenses 3:21

ixi jeꞌe ndo tsindoxin ndo cuerpoi̱na ti toniꞌe ko jeꞌe ndo tsajon ndo naa cuerpo tsango chaxro xranchi chónda jeꞌe ndo. Ko kain jiꞌi tsonꞌen ixi jeꞌe ndo chónda ndo ijié juachaxin ko tituenꞌen ndo kain ngeꞌe.

Filipenses 4:13

Kain ixra̱ chao sintaꞌa ixi ndo Cristo tingijnana ndo ko nchesojina ndo.

Colosenses 1:11

Ko tjanchiana ixi jeꞌe ndo sintasojinta ndo asáanta ixi juachaxin ijié chónda ndo ko xrotjáanta ndo juaxruxin, ko soji tsakeꞌenta maski tsi̱i̱ juachjaon ngataꞌanta.

Colosenses 1:16

Ko ndo Dio chjée ndo Chjenꞌen ndo juachaxin sinchekonchjian xjan kain ngeꞌe jii ngajní ko ngataꞌa nunte xasintajni, ko kain ngeꞌe tikonni ko ti tikonꞌani. Kaxon kain ngeꞌe tetuanꞌan jii ngataꞌa chrinto ko kain juachaxin jii ngajní, kain meꞌe juinchéña ndo ixi jiꞌi sincheꞌe ixra̱ ngajin ndo.

1 Tesalonicenses 4:14

Ko jai̱na titikaꞌonna ixi kuenꞌen Ncháina Jesús ko xechón ndo, ko kaxon titikaꞌonna ixi ndo Dio juinchexechón ndo ndo Jesús, ko nchakon xrokjan ndo Jesús, tjumeꞌe sinchexechón ndo Dio kain sen tsikenꞌen, sen chuntia ndo.

1 Pedro 3:18

Ixi kaxon ndo Cristo jeꞌo naa kuenꞌen ndo ixi jíei̱na. Jeꞌe ndo jian ndo ko kuenxin ndo ixi jai̱na ni ñaꞌi, ixi jaña tsjentona ngajin ndo Dio. Ndo Cristo kuenꞌen cuerpoe ndo ko Espíritue ndo Dio juinchexechón ndo.

Apocalipsis 2:23

Ko chjenꞌen nchri meꞌe sintaniꞌa xjan ko tsenꞌen xjan. Ko kain sen niꞌngo tsonoꞌe sen ixi janꞌan chuxin ngeꞌe xraxaon aséen sen. Ko sintajenga sen ꞌna̱ kondee ngujngu ti ndakoꞌa juincheꞌe sen.