Lukas 9:26 - Buku Tomoroli' Pojanci to Bo'u

²⁶ ”Hema to me'ea' mpangaku' petuku'-na hi Aku' pai' mpoka'ea' tudui'-ku, Aku' wo'o mpai' me'ea' mpangaku' kahi'a-na topetuku'-ku ane rata-apa mpai' ngkai suruga. Nto'u toe mpai', Aku' Ana' Manusia' mana'u tumai hante mala'eka–mala'eka to moroli', mehini-a hante baraka'-ku pai' hante baraka'-na Tuama-ku.

Lukas 9:26 Iomraidhean Croise

Matius 16:27

Bate rata mpai' tempo-na, Aku' Ana' Manusia' tumai ngkai suruga mpopehuwu kabaraka'-ku, to hewa kabaraka' Tuama-ku, pai' wori' wo'o mala'eka mpodohei-a. Nto'u toe mpai', bate kuhiwili kehi butu–butu dua tauna.

Matius 25:31

”Aku' Ana' Manusia', ane rata nculii'-apa mpai', mehini mpu'u-mi baraka'-ku, pai' radohei-a hawe'ea mala'eka-ku. Mohura-a mpai' moparenta hewa Magau' hi pohuraa to ncola.

Matius 26:64

Na'uli' Yesus: ”Io', hewa to nu'uli' tetu-e. Pai' ku'uli' tena: rata mpai' tempo-na nihilo-a Aku' Ana' Manusia', mohura pai' moparenta hi mali ka'ana Alata'ala to Mobaraka', pai' nihilo wo'o-a mpai' mana'u tumai ngkai suruga hi rala limu'.”

Markus 8:38

”Mo'oha'-koi hi laintongo' tauna to dada'a pai' to uma mpotuku'-a. Aga hema to me'ea' mpangaku' petuku'-na hi Aku' pai' mpoka'ea' tudui'-ku, Aku' wo'o mpai' me'ea' mpangaku' kahi'a-na topetuku'-ku ane rata-apa mpai' ngkai suruga. Nto'u toe mpai', Aku' Ana' Manusia' mana'u tumai hante mala'eka–mala'eka to moroli', mehini-a hante baraka'-na Tuama-ku.”

Yohanes 12:43

Apa' konoa-ra doko' ra'une' hingka doo-ra, uma rasaile' pe'une' to ngkai Alata'ala.

Yohanes 5:44

Beiwa kamepangala'-ni hi Aku'-e, apa' doko' rabila' doo-wadi-koi, uma-koi mpali' pebila' to ngkai Alata'ala to Hadudua.

Suro 10:22

Ratompoi': ”Kai' tohe'i, napowiwi Kapitee Kornelius. Hi'a toe, tauna to monoa' ingku-na. Mengkoru-i hi Alata'ala, pai'-i rabila' hawe'ea to Yahudi. Hadua mala'eka Pue' mpohubui-i mpokio'-ko hilou hi tomi-na, bona na'epe ba napa to nu'uli'-ki.”

Roma 1:16

Uma kupoka'ea' ngkeni Kareba Lompe'. Apa' Kareba Lompe' toe-mi baraka' Alata'ala to mpowai' kalompea' hi hawe'ea tauna to mepangala'. Lomo'-na Kareba Lompe' raparata-raka to Yahudi, aga hewa too–toi raparata wo'o-miraka tauna to bela-ra to Yahudi.

2 Korintus 12:10

Jadi', ane lente-a, kupokagoe' moto. Goe'-a ane ba raruge'-a ba rabalinai'-a, ba mporata-a kasusaa' pai' kaparia sabana petuku'-ku hi Kristus. Apa' ane lente-a, nto'u toe-mi moroho-a.

Galatia 6:14

Aga aku'-e-kuna, uma-a dota mpomobohe nono-ku, muntu' mpomobohe Pue'-ta Yesus Kristus-a, to mate raparika'. Ma'ala-mi ta'uli': nto'u Yesus raparika', aku' wo'o raparika' dohe-na, apa' mogaa'-mi posidaia'-ku hante hawe'ea to hi dunia' toi, uma-pi ria to kusarumaka ntani'-na ngkai Hi'a.

1 Timotius 5:21

Kuparesai' mpu'u-ko Timotius, bona nutuku' hawe'ea hawa'-ku toi, neo'-ko mpelence tauna, neo' mopahamalia. Alata'ala pai' Kristus Yesus moto mpotiroi-ta, nte mala'eka-na to moroli'!

2 Timotius 1:12

Jadi', ngkai pobago-ku mpokeni Kareba Lompe' toe-e, pai' alaa-ku mporata kaparia duu'-na ratarungku'-ama tohe'i-e. Aga nau' wae, uma-a me'ea'. Apa' ku'inca kahema-na to kupangala', pai' kusarumaka Hi'a-damo to mpewili'-a, pai' bate monoto hi rala nono-ku kamobaraka'-na mpewili'-a duu' rata hi Eo Kiama.

2 Timotius 2:12

Ane mosabara-ta mpokolo kaparia, moparenta wo'o-ta-tawo mpai' dohe-na. Aga ane tasapu-di petuku'-ta hi Hi'a, nasapu wo'o-ta-tawo mpai' kakita'-na topetuku'-na.

Ibrani 11:26

Oja'-i mporata ka'uaa' hi tana' Mesir, na'agi-pi raruge' sabana pepangala'-na hi Magau' Topetolo' to rata ngkabokoa'. Apa' Musa ntora mpoimata–mata hiwili pepangala'-na to narata mpai' hi eo mpeno-na.

Ibrani 13:13

Ngkai toe-mi ompi', hewa Yesus hilou hi mali ngata bona raruge', wae wo'o kita' kana mpobahaka petukua'-ta to ntani'-na, pai' mpotuku' Yesus-damo, nau' ba hema–hema to mporuge'-ta.

Yudas 1:14

Ria lolita nabi Henokh owi to mpolowa pehuku'-na Alata'ala hi guru to boa' to tuwu' tempo toi. Henokh toei, muli Adam kapitu lapi-na. Na'uli' hewa toi: ”Mpu'u–mpu'u tumai-i mpai' Pue' hante topetuku'-na to moroli' to moncobu–ncobu kawori'-ra.

Pangila 1:7

Hilo! Etu-i tumai hi rala limu'! Hawe'ea tauna mpai' mpohilo-i, rata–rata hi tauna to mpojalo-i owi. Pai' hawe'ea tauna hi dunia' motantangi' mpohilo-i. Wae mpu'u! Amin!

Pangila 20:11

Oti toe kuhilo hameha' Pohuraa to bula pai' to bohe, pai' kuhilo wo'o Hadua To Mohura hi lolo Pohuraa toe. Ngkai baraka'-na langi' pai' dunia' moronto hi ntololikia-na, duu'-na uma-pi ria.

Pangila 21:8

Aga tauna to me'eka' mpotuku'-a ba to uma mepangala', tauna to dada'a gau'-ra, topepatehi, to mogau' sala', topedoti, to mpopue' pinotau, pai' hawe'ea to moboa', bate rahuku' omea-ra hi rala tahi' apu to wewo' pai' morea'. Toe-mi to rahanga' kamatea karongkani-na.”

Pangila 3:5

”Hema to medagi, kuheai wo'o-ra-rawo mpai' hante pohea to bula. Hanga'-ra uma kupori ngkai rala Buku Katuwua', buku po'ukia' hanga'-ra to mporata katuwua' to lompe' duu' kahae–hae-na. Pai' hi nyanyoa Tuama-ku pai' mala'eka-na kupangaku' kahira'-na topetuku'-ku.