Lukas 6:23 - Buku Tomoroli' Pojanci to Bo'u

²³ Apa' wae wo'o gau' ntu'a-ra mpobalinai' nabi–nabi to owi. Jadi', ane rapohewa toe-koi, mohajo-koi pai' pakagoe' moto nono-ni, apa' bohe mpai' rasi' to nirata hi rala suruga.

Lukas 6:23 Iomraidhean Croise

Matius 5:12

Nabi–nabi to owi, rabalinai' wo'o-ra-rawo hewa toe. Jadi', pakagoe'-mi nono-ni, apa' bohe mpai' rasi' to nirata hi rala suruga.

Lukas 1:41

Kana'epe-na Elisabet petabe-na Maria toe, pongkale-nami ana' to hi rala puanaka-na, pai' Elisabet, nakuasai Inoha' Tomoroli'-imi.

Lukas 1:44

Wae kaku'epe-na petabe-nu, ana' to hi rala-ku ncaliu mongkale nakeni kagoe'-na.

Lukas 6:35

”Neo' hewa tetu! Kana tapoka'ahi' bali'-ta, mo'ingku lompe' hi hira'. Wai'-ra hema to doko' mpohentai-ta, pai' neo' ncarumaka ponculia'-na. Ane wae po'ingku-ta, bohe mpai' rasi' to tarata hi eo mpeno, pai' tatuku'-mi po'ingku Pue' Ala to hi suruga. Apa' manara-i Pue' hi tauna to uma mpo'incai mpo'uli' tarima kasi pai' hi tauna to dada'a.

Suro 14:10

Toe pai' na'uli' napesukui: ”Mokore monoa'-moko!” Hangkore-idile, pai'-i momako' hilou tumai.

Suro 3:8

Hangkore-i-dile mokore-e, pai'-i momako' hilou tumai. Ngkai ree, mesua'-imi hi rala Tomi Alata'ala dohe Petrus pai' Yohanes, momako' pai' mohajo–hajo mpo'une' Alata'ala.

Suro 5:41

Malai-ramo suro toera ngkai porumpua. Goe'-ra, ra'uli': ”Marasi'-ta apa' Alata'ala mpopelihi-ta bona rabalinai' pai' raruge' sabana petuku'-ta hi Yesus.”

Roma 5:3

Pai' uma muntu' toe, goe' wo'o nono-ta hi rala kaparia to mporumpa'-ta. Apa' ta'inca, ngkai kaparia toe kita' jadi' ntaha.

2 Korintus 12:10

Jadi', ane lente-a, kupokagoe' moto. Goe'-a ane ba raruge'-a ba rabalinai'-a, ba mporata-a kasusaa' pai' kaparia sabana petuku'-ku hi Kristus. Apa' ane lente-a, nto'u toe-mi moroho-a.

Kolose 1:24

Hewa toe lau ompi', goe' moto-a mpokolo kaparia sabana pobago-ku mpotulungi-koi. Apa' ria-pidi kaparia to kana kutodohaka sabana pobago-ku hi Kristus, pai' kaparia to kurata tempo toi, kurata sabana pobago-ku hi hawe'ea topepangala' hi Kristus. Kita' omea to mepangala' hi Kristus ma'ala rarapai'-ki woto-na.

2 Timotius 2:12

Ane mosabara-ta mpokolo kaparia, moparenta wo'o-ta-tawo mpai' dohe-na. Aga ane tasapu-di petuku'-ta hi Hi'a, nasapu wo'o-ta-tawo mpai' kakita'-na topetuku'-na.

Ibrani 11:26

Oja'-i mporata ka'uaa' hi tana' Mesir, na'agi-pi raruge' sabana pepangala'-na hi Magau' Topetolo' to rata ngkabokoa'. Apa' Musa ntora mpoimata–mata hiwili pepangala'-na to narata mpai' hi eo mpeno-na.

Ibrani 11:6

Jadi' monoto-mi ta'inca karia pepangala'-na, apa' uma ria tauna to napokagoe' Alata'ala ane uma-ra mepangala'. Apa' tauna to dota mpomohui' Alata'ala kana mparasaya hewa toi: Alata'ala bate ria, pai' bate nahiwili kehi butu dua tauna to mpu'u–mpu'u mpopali'-i.

Yakobus 1:2

Ompi'-ku hawe'ea! Ane wori' nyala kasusaa' pai' pesori to mporumpa'-ta, neo' tapopeda' nono, agina tapokagoe' lau-wadi.

1 Petrus 4:13

Pokagoe' lau-mi-hana, apa' lawi' mporata-mokoi bagia hi rala kaparia to narata-mi Kristus. Ngkai toe-mi ompi', ane rata-damo tempo-na Kristus mpopehuwu kabohe tuwu'-na hi hawe'ea tauna, uma mpai' mowo kagoe'-ni.

Pangila 2:17

”Hema to tilingaa, pe'epei mpu'u-e' napa to na'uli' Inoha' Tomoroli' hi topetuku'-ku hi butu ngata-na. ”Hema to medagi, kupiliu-ra ngkoni' manna to tewuni. Kuwai'-ra hameha' watu to bula. Hi watu toe te'uki' hanga' to bo'u, to uma ra'incai tau ntani'-na. To mpo'inca, muntu' tauna to mpotarima watu toe-wadi.”

Pangila 2:26

”Hema to medagi, pai' mpobabehi konoa-ku duu' hi ka'omea-na, kuwai'-ra kuasa hibalia hewa to kutarima ngkai Tuama-ku. Kuwai'-ra kuasa moparenta, mpoparentai manusia' humalili' dunia' hante karoho–roho-na hewa karoho-na lua' ahe', pai' mporopuhi bali'-ra hewa to mpopengka kura tana'.

Pangila 2:7

”Hema to tilingaa, pe'epei mpu'u-e' napa to na'uli' Inoha' Tomoroli' hi topetuku'-ku hi butu ngata-na. ”Hema to medagi, kupiliu-ra ngkoni' wua' kaju katuwua' to hi Bonea Alata'ala.”

Pangila 21:7

Hema to mpodagi Magau' Anudaa', mporata-ra hawe'ea toe we'i lau. Aku' jadi' Pue'-ra, pai' hira' jadi' ana'-ku.

Pangila 3:12

”Hema to medagi, tida-ra hi suruga duu' kahae–hae-na. Hewa tuha' mporohoi tomi, wae wo'o Aku' mpakanoa' katida-ra hi Tomi Alata'ala hi suruga. Hi woto-ra ku'uki' hanga' Alata'ala Tuama-ku pai' hanga' ngata Alata'ala Tuama-ku, toe-mi Yerusalem to bo'u to mana'u tumai ngkai suruga ngkai Alata'ala Tuama-ku. Wae wo'o ku'uki' hi woto-ra hanga'-ku to bo'u.

Pangila 3:5

”Hema to medagi, kuheai wo'o-ra-rawo mpai' hante pohea to bula. Hanga'-ra uma kupori ngkai rala Buku Katuwua', buku po'ukia' hanga'-ra to mporata katuwua' to lompe' duu' kahae–hae-na. Pai' hi nyanyoa Tuama-ku pai' mala'eka-na kupangaku' kahira'-na topetuku'-ku.