Lukas 10:21 - Buku Tomoroli' Pojanci to Bo'u

²¹ Nto'u toe Yesus nakuasai Inoha' Tomoroli', pai'-i mololita ngkai kagoe' nono-na, na'uli': ”O Mama, Pue' langi' pai' dunia'! Mpo'uli'-a tarima kasi, apa' hawe'ea toe lau nupopohiloi-raka tauna to uma pe'incai, tapi' nuwunii'-raka tauna to nginca pai' tauna to pante. Apa' wae-mi konoa-nu Mama.

Lukas 10:21 Iomraidhean Croise

Matius 16:17

Na'uli' Yesus: ”Marasi' mpu'u-ko, Simon ana' Yunus, apa' bela manusia' to mpopo'incai-ko tetu-e, Tuama-ku to hi rala suruga-hana.

Matius 21:16

Toe pai' ra'uli' mpo'uli'-ki Yesus: ”Nu'epe wa napa to ra'uli'-e!” Na'uli' Yesus: ”Ku'epe moto. Ko'ia-tano nibasa hi rala Buku Tomoroli'-e to mpo'uli': ’Nutudui'-ramo ana'–ana' pai' ana'lei mpohowa' lolita pe'une' hi Iko.’ ”

Matius 3:7

Wori' wo'o pangkeni agama Yahudi to rahanga' to Parisi pai' to Saduki tumai mpopeniu' hi Yohanes. Kanahilo-ra rata, na'uli'-raka: ”He koi' to bengku' gau'-ni! Napa pai' tumai mpopeniu'-koie? Ba ni'uli'-koina, ma'ala mpai' nipasalewa roe Alata'ala to neo' mporumpa'-koi!

Markus 10:15

Mpu'u ku'uli'-kokoi: Ane uma-koi mengkoru hi Alata'ala hewa ana', uma-koi mpai' jadi' ntodea-na hi rala Kamagaua'-na.”

Lukas 15:5

Ane narua'-pi, uma mowo kagoe'-na. Ngkai kagoe'-na napololopongko' bima-na toei, pai' nakeni nculii' hilou hi tomi-na.

Lukas 15:9

Wae kanarua'-na, nakio'-ramo bale-na pai' tongki-na, na'uli'-raka: ’Mai-mokoi goe' dohe-ku. Apa' kurua' nculii'-mi doi-ku to moronto.’

Yohanes 11:41

Oti toe, raderu' mpu'u-mi watu po'unca daeo'. Yesus ngkongoa' hi langi', na'uli': ”Tuama-ku, mpo'uli'-a tarima kasi, apa' nu'epe pomperapia'-ku tohe'i.

2 Korintus 4:3

Ria moto tauna to uma mpangalai' Kareba Lompe' to kikeni. Tauna to mpotoa' naraka, hira' toe-mi to uma mpangalai'-e. Ma'ala-mi ta'uli', ria to mpoputu' nono-ra alaa-na uma-ra dota mpangala' Kareba Lompe'.

Efesus 1:11

Alata'ala mpobabehi butu nyala-na ntuku' konoa-na pai' kabotu'-na moto. Ngkai lomo' kajadi' dunia' napelihi-tamo pai' napakatantu ami'-mi kakita'-na to jadi' bagia-na ngkai posidaia'-ta hante Kristus.

Efesus 1:5

Ngkai owi napakatantu ami'-mi kana'ongko'-nata jadi' ana'-na, ngkai kanape'ahi'-ta. Na'ongko'-ta jadi' ana'-na hante petauntongoi'-na Yesus Kristus, apa' toe-mi konoa-na pai' kabotu'-na ngkai lomo'-na.