Ibrani 1:3 - Buku Tomoroli' Pojanci to Bo'u

³ Hi'a-mi to mpopohiloi-ta kabohe tuwu'-na Alata'ala. Kehi-na pai' kabaraka'-na hibalia hante kehi pai' kabaraka'-na Alata'ala. Hi'a to mpokuasai pai' mpewili' hawe'ea to ria hante lolita-na to mobaraka'. Ka'oti-na mpobohoi' manusia' ngkai jeko'-ra, hilou-imi mohura hi mali ngka'ana Alata'ala hi Pohuraa Kamagaua'-na hi suruga.

Ibrani 1:3 Iomraidhean Croise

Matius 22:24

Rata to Saduki toera mpo'uli'-ki Yesus: ”Guru, nabi Musa metudui' hewa toi: Ane hadua tomane mate, hiaa' uma-ki ria ana'-na, pudupuhe-na kana mpotobine balu-na, bona ria-ki-hawo muli-na tomate toei.

Markus 16:19

Ka'oti-na Pue' Yesus mpololitai-ra, te'ongko'-imi hilou hi suruga, pai'-i mohura hi mali ka'ana Alata'ala.

Yohanes 1:14

Lolita toei, mewali manusia'-imi, pai'-i mo'oha' hi laintongo'-ta. Kai', kihilo-mi-kaina kabaraka'-na. Kabaraka'-na toe narata ngkai Tuama-na, apa' Hi'a-mi Ana'-na to Hadudua. Ngkai Hi'a toe-mi pai' alaa-na ta'inca Alata'ala pai' kabula rala-na hi kita'.

Yohanes 1:29

Kampeneo-na, Yohanes mpohilo Yesus rata mpotoa'-i. Na'uli'-mi hi ntodea: ”Hilo! Etu-imi tumai Ana' Bima to naporodo Alata'ala. Hi'a-mi to jadi' tolo' woto to mpolali jeko' manusia'.

Yohanes 1:4

Hi'a-mi pehupaa' katuwua', pai' Hi'a-mi baja to mpobajahi nono manusia'.

Suro 2:33

Alata'ala to Tuama mpo'ongko'-imi, napopohura-i hi huraa karabilaa' hi mali ngka'ana-na, pai' nawai'-imi Inoha' Tomoroli'. Ngkai ree, Yesus mpohubui Inoha' Tomoroli' tumai hi kai', ntuku' janci-na Alata'ala. Jadi', napa to nihilo pai' to ni'epe-mi toe we'i lau, majadi' sabana kuasa Inoha' Tomoroli'.

Suro 7:56

Na'uli' Stefanus: ”Hilo-dile! Kuhilo langi' mobea pai' Ana' Manusia' mokore hi mali ngka'ana Alata'ala!”

Roma 1:16

Uma kupoka'ea' ngkeni Kareba Lompe'. Apa' Kareba Lompe' toe-mi baraka' Alata'ala to mpowai' kalompea' hi hawe'ea tauna to mepangala'. Lomo'-na Kareba Lompe' raparata-raka to Yahudi, aga hewa too–toi raparata wo'o-miraka tauna to bela-ra to Yahudi.

Roma 8:34

Hema to daho' mpo'uli' kana rahuku'-ta! Apa' Kristus Yesus moto-mi mate mpotolo' jeko'-ta. Pai' meliu ngkai toe: rapotuwu' nculii'-imi, pai' mohura-imi hi mali ngka'ana Alata'ala. Kristus Yesus toe-imile to mpome'alai'-ta hi nyanyoa Alata'ala-e.

2 Korintus 4:4

Noto anudaa' to mpokuasai dunia' toi mpohilingai'-ra, bona neo'-ra mpangalai' Kareba Lompe'. Baja ngkai Kareba Lompe' uma mpobajahi nono-ra. Jadi', uma oa' ra'incai kabohe tuwu'-na Kristus, to hibalia tuwu'-na hante Alata'ala.

Kolose 3:1

Kita' to mepangala' hi Kristus, ma'ala ta'uli' rapotuwu' nculii'-tamo hangkaa–ngkania hante Kristus, apa' Alata'ala mpowai'-ta katuwua' to bo'u ngkai posidaia'-ta hante Hi'a. Jadi', apa' rapotuwu' nculii' mpu'u-tamo hangkaa–ngkania hante Kristus-e, kana tapali'-mi napa to hi suruga, hi kariaa-na Kristus mohura hi mali ngka'ana Alata'ala.

Titus 2:14

Napewai' woto-na rapatehi mpotolo' jeko'-ta, nabahaka-ta ngkai hawe'ea kehi-ta to dada'a, napakaroli'-ta pai' napajadi'-ta ntodea-na pai' bagia-na, to baka' mpobabehi kehi to lompe'.

Ibrani 1:13

Uma-i ria Alata'ala mpololitai ba hadua mala'eka hewa to napololitai-ki Ana'-na toei, hewa tohe'i moni-na: ”Mohura-moko hi mali ngka'ana-ku, duu'-na kupopengkoru hawe'ea bali'-nu hi Iko.”

Ibrani 10:12

Tapi' Kristus-hana, hangkani lau-i-wadi mpotonu woto-na rapatehi mpohompo' jeko' manusia', pai' pobabehi-na toe uma-pi mingki' rahulii' duu' kahae–hae-na. Ka'oti-na mpotonu pepue'-na, mohura-imi hi mali ngka'ana Alata'ala, apa' hudu-miki bago-na.

Ibrani 12:2

Mata-ta mpototopa Yesus, Pangkeni-ta to mpotate ohea-ta pai' to mposipolea pepangala'-ta. Ntaha-i mpotodohaka kaparia duu'-na mate hi kaju parika'. Kamate-na hi kaju parika' toe anu me'eai' lia. Aga nau' wae, uma natapari, na'agi mate raparika', apa' napoimata–mata kagoea' to narata mpai' ngkabokoa'. Wae lau mohura-imi hi mali ngka'ana Pohuraa Alata'ala hi suruga.

Ibrani 4:14

Jadi', ria-taka Imam Bohe to meliu mpu'u kabohe tuwu'-na: Hi'a-mi Yesus Ana' Alata'ala. Hilou-imi mpotara langi' pai' mesua' hi rala suruga mponyanyo Alata'ala jadi' Imam Bohe-ta to mpome'alai'-ta. Toe pai' kana taperohoi ngkakamu pepangala'-ta, pai' neo' tabahakai mpangaku' kaYesus-na Pue'-ta.

Ibrani 7:27

Uma-i hewa imam–imam bohe to ntani'-na. Imam toera, butu eo-na mpotonu-ra pepue', lomo'-na pepue' to mpohompo' jeko'-ra moto ulu, pai' lako' mpotonu-ra pepue' to mpohompo' jeko' ntodea. Yesus, hangkani lau-i-wadi mpotonu pepue'-na hi Alata'ala, nto'u-na mpotonu woto-na moto bona rapatehi. Pepue'-na toe uma-pi mingki' rahulii' tena duu' kahae–hae-na.

Ibrani 8:1

Toi-mi poko lolita-ku: ria-taka-tana Imam Bohe-ta to hewa toe. Mohura-i hi mali ngka'ana Pohuraa Alata'ala hi suruga.

Ibrani 9:16

Ane rapa'-na ria hadua totu'a to doko' mpobagi rewa-na hi ana'–ana'-na, nababehi ami' sura po'iwili to mpakanoto pobagi rewa-na. Aga sura po'iwili toe uma ulu rapake' ane tuwu'-i-pidi. Ane mate-ipi topo'iwili toei, lako' ma'ala-di rapake' sura po'iwili-na. Jadi', kana ria kamatea bona sura po'iwili ma'ala rapake'.

Ibrani 9:26

Apa' ane ke hewa toe, tantu ngkai lomo' kajadi' dunia' ke wori' ngkani wo'o-i-hawo mporata kaparia duu'-na mate. Jadi', hi tempo kamohua' Eo Kiama toi-e, mehupa' hangkani lau-i-wadi hi rala dunia' toi bona mpopori jeko' manusia' hi kampewai'-na woto-na rapatehi.

1 Petrus 1:21

Ngkai Hi'a toe-mi pai' alaa-na mepangala'-mokoi hi Alata'ala. Alata'ala mpopotuwu'-i nculii' pai' nawai'-i kabohea tuwu'-na, alaa-na mepangala' pai' mesarumaka-mokoi hi Alata'ala.

1 Petrus 3:22

Katuwu'-na nculii' toe, hilou-imi hi suruga, pai'-i mohura hi mali ka'ana Alata'ala. Hawe'ea mala'eka pai' topoparenta pai' pue'–pue' to mobaraka' ntani'-na, rapopengkoru hi Hi'a omea-ramo.

2 Petrus 1:16

Kitudui'-kokoi kabohe baraka'-na Pue'-ta Yesus Kristus pai' karata-na nculii' mpai' hi dunia'. To kitudui'-kokoi toe, bela jarita to ratamangko-wadi. Ki'inca toe, apa' mata-kai moto-mi mposabii' kabohe tuwu'-na.

2 Petrus 1:17

Apa' hangkani, ria-kai doo-na Yesus hi lolo bulu', pai' kihilo-i mehini ngkai kabohe tuwu'-na pai' pebila' to narata ngkai Alata'ala Tuama-na. Ki'epe libu' ngkai Alata'ala to mobaraka' to mpo'uli': ”Hi'a toi-mi Ana'-ku to kupe'ahi', Hi'a to mpakagoe' nono-ku.”

1 Yohanes 1:7

Ane momako'-ta hi rala kabajaa-na, hewa Alata'ala ria hi rala kabajaa-na, hintuwu'-tamo hadua pai' hadua, pai' nabohoi'-ta ngkai hawe'ea jeko'-ta sabana raa' Yesus Ana'-na to mate jadi' tolo' woto-ta.

1 Yohanes 3:5

Pai' ni'inca moto ompi', patuju-na Yesus mehupa' hi dunia', bona mpolali jeko' manusia'. Hiaa' Hi'a moto, uma-hana ria jeko'-na.

Yudas 1:25

Hadua-na Hi'a-wadi Alata'ala, Magau' Tompohore-ta ngkai huku' jeko'-ta hante petolo'-na Yesus Kristus Pue'-ta. Tapomobohe hanga'-na apa' Hi'a-wadi to ncola, to bohe tuwu'-na, to mobaraka' pai' to mokuasa, ngkai owi, wae lau, pai' duu' kahae–hae-na. Amin!

Pangila 3:21

”Hema to medagi, kupiliu-ra mohura pai' moparenta dohe-ku hi Pohuraa-ku, hewa Aku' wo'o, medagi-ama, pai' wae lau mohura-ama moparenta dohe Tuama-ku hi Pohuraa-na.

Pangila 4:11

”Oo Pue'-kai, Pue' Alata'ala! Iko-wadi to natao ra'une' pai' rabila'. Iko-wadi to mokuasa! Apa' Iko to mpopajadi' butu nyala-na. Ngkai konoa-nu alaa-na jadi'-mi omea pai' ria omea.”