Filipi 3:3 - Buku Tomoroli' Pojanci to Bo'u

³ Kita' toi-mile to monoa' hi poncilo Alata'ala-e, kita' to mpopue'-i ngkai petete' Inoha' Alata'ala, bohe nono-ta apa' mosidai'-tamo hante Kristus Yesus. Uma-ta ncarumaka ada to kahiloa-wadi bona ngalai' jadi' monoa'-ta hi poncilo Alata'ala.

Filipi 3:3 Iomraidhean Croise

Roma 1:9

Mobago-a hante nono mpu'u mpobago bago to nawai'-ka Alata'ala, mpoparata Kareba Lompe' to mpotompo'wiwi Ana'-na. Pai' Alata'ala mpo'inca ihi' nono-ku, na'inca beiwa-a mpokahangai' oa'-koi hi rala posampaya-ku.

Roma 15:17

Ngkai posidaia'-ku hante Kristus Yesus, bohe nono-ku mpotutura bago to kupobago-ki Alata'ala.

Roma 7:6

Aga hewa toe lau, tebahaka-tamo ngkai Atura Pue' to mpohoo'-ta ri'ulu toe, apa' mate-tamo hangkaa–ngkania hante Kristus. Jadi', uma-tapa mpotuku' ohea to hae: uma-tapa mpotuku' atura–atura to te'uki'. Hewa toe lau mpotuku' ohea to bo'u-tamo: mpotuku'-ta konoa Alata'ala ngkai baraka' Inoha' Tomoroli'.

Roma 8:15

Ri'ulu, bula-ta tehoo'-pidi hi Atura Pue', me'eka'-ta mpoka'eka' pehuku'-na Alata'ala. Aga hewa toe lau, uma-tapa me'eka', apa' mporata-tamo Inoha' Tomoroli'. Apa' Inoha' Tomoroli' toei mpopajadi'-ta ana'–ana'-na Alata'ala. Pai' ngkai kuasa Inoha' Tomoroli' toei, kita' mpo'uli'-ki Alata'ala: ”O Mama! O Tuama-ku!”

Roma 9:6

Tempo toi, kaworia' to Yahudi uma napobagia Alata'ala. Aga neo' ta'uli' hewa toi: ”Alata'ala uma mpo'ihii' janci-na hi to Yahudi.” Uma makono lolita toe! Apa' uma hawe'ea muli Israel to napelihi Alata'ala jadi' bagia-na.

2 Korintus 11:18

Gati wori'-di to mpo'une' woto-ra moto pai' mpotutura pobago to rababehi hante karohoa-ra moto-e, wae wo'o-kuwo aku', mpo'une'-a woto-ku.

Galatia 5:25

Ane Inoha' Tomoroli' mpowai'-ta tuwu' to bo'u, wae-pi, bate mpotuku' Inoha' Tomoroli' toe-ta-damo.

Galatia 6:16

Mekakae-a hi Alata'ala bona kalompea' tuwu' pai' ahi'-na nawai' hi hawe'ea tauna to mpotuku' tudui' toi, duu'-na hi tauna to Israel to napobagia Alata'ala.

Efesus 6:18

Pai' hi rala panga'e-ni mpo'ewa Magau' Anudaa' toe, mosampaya pai' mekakae oa'-koi hi Alata'ala. Hi butu nyala-na mosampaya-koi ntuku' petete' Inoha' Tomoroli'. Hi rala posampaya-ni toe, kana mojaga oa' pai' neo' lempe', neo' nibahakai mposampayai hawe'ea topepangala' hi Pue' Yesus.

Filipi 1:1

Sura toi ngkai aku' Paulus pai' Timotius, batua Kristus Yesus, kipakatu tilou hi koi' ompi'–ompi' hampepangalaa'-kai hi rala Kristus Yesus to hi ngata Filipi, duu'-na hi pangkeni-ni pai' tauna to mpokamu pobago Pue' hi laintongo'-ni.

Filipi 3:12

Ompi'–ompi', uma ku'uli' kakurata-na mpu'u-mi hawe'ea toe, duu'-na moroli'-ama hante uma-pi ria jeko'-ku. Uma-kuwo. Aga kuhuduwukui bona kurata hawe'ea toe, bona jadi' moroli' mpu'u-a–apa' toe-mi pai' napelihi-a Kristus Yesus jadi' bagia-na.

Kolose 2:11

Ngkai posidaia'-ta hante Kristus, ma'ala-mi ta'uli' ratini'-tamo. Karatini'-ta toe, bela petini' to rababehi manusia', tapi' petini' hi rala nono-ta to nababehi Kristus. Batua-na, nabahaka-tamo ngkai kuasa jeko' to hi rala nono-ta.

Yudas 1:20

Aga koi' ompi'-ku to kupe'ahi'! Napoka'ahi'-koi Alata'ala. Jadi', pelompehi mpu'u-koi bona tida-koi hi rala ahi'-na toe. Neo' nibahakai mome'apui ngkanono bona moroho pepangala'-ni–apa' tudui' to tapangala' toi moroli' mpu'u. Mosampaya oa'-koi hante petete' Inoha' Tomoroli'. Pai' mpopea rasi' to nawai'-taka mpai' Pue'-ta Yesus Kristus ane tumai-ipi. To nawai'-taka mpai', katuwua' to lompe' duu' kahae–hae-na.